Jehovap erinitsajuissusia ilaaruk

„[Jehovap] neriorsuutigisani paamaarutinngilaa, . . . erinitsajuippoq.“ — 2 PETRUSI 3:9.

1. Jehovap inuit tunissummik asseqanngilluinnartumik sumik neqeroorfigai?

JEHOVAP allat neqeroorutigisinnaanngisaannik neqeroorfigaatigut. Kissaatiginartupilussuullunilu naleqangaarpoq, kisianni pisiarineqarsinnaananilu nammineq iliuuseqarnikkut pissarsiarineqarsinnaanngilaq. Jehovap neqeroorutigisaa tamanna tassaavoq inuunermik naassaanngitsumik tunissut — amerlanersatsinnut nunarsuarmi paratiisiusumi naassaanngitsumik inuuneq. (Johannesi 3:16) Qanoq nuannertigissava! Naalliunnartoqangaarneranut pissutaasut — eqqissiviilliorneq, nakuuserneq, piitsuuneq, pinerluttuliorneq, nappaatit allaallu toqu — peerussimassapput. Inuit Guutip naalagaaffiata asannittumik aqutsinerani eqqissilluinnarlutik ataasiussuseqarluinnarlutillu inuussapput. Paratiisi taanna erinigeqaarput! — Esaja 9:5, 6; Saqqummersitat 21:4, 5.

2. Sooq Jehovap Saatanip silarsuaa suli piinngilaa?

² Jehovap aamma piffissaq nunarsuarmik Paratiisinngortitsiffissani qilanaaraa, iluarnermi naapertuilluarnerlu nuannarai. (Tussiaat 33:5) Silarsuaq najoqqutassiaminik naapertuilluartunik soqutigisaqanngiffiusoq imaluunniit taakkununnga akeqqersimaarfiusoq, silarsuaq oqartussaassutsiminik asissuiffiusoq innuttaminillu malersuiffiusoq takugaangamiuk aliasuutigisarpaa. Taamaattorli Saatanip silarsuaa ajortoq peerniarlugu suli akuliussimannginnerminut pissutissaqarluarpoq. Pissutaasut taakku ilaatigut Jehovap qilammi nunamilu kisimi oqartussaalluni Naalagaanerata apeqquserneqarsimaneranut tunngassuteqarput. Jehovap apeqqutinik taakkuninnga aalajangiinerminut atatillugu iluarinarluinnartumik pissuseqarluni ersersippaa, pissuseq inuppassuit ullumikkut pissuserinngisaat — erinitsajuissuseq.

3. (a) Grækerit oqaasiat aamma hebræerit oqaasiat „naammagittarneq“-mik imaluunniit „erinitsajuissuseq“-mik nutserneqartartoq qanoq isumaqarpa? (b) Apeqqutit suut maanna sammissavavut?

³ Oqaaseq grækerisooq makrothymiʹa Biibilimi „naammagittarneq“-mik, „erinitsajuinneq“-mik imaluunniit oqaatsit allat oqaatsimit tamatumannga nagguillit atorlugit nutserneqartartoq nutsiinnavillugu „anernikkaaq“-mik isumaqarpoq. Hebræerit oqaasiat aamma grækerit oqaasiat „naammagittarneq“-mik, „erinitsajuissuseq“-millu nutserneqartoq ilaatigut qajassuussisuunermik kamajuinnermillu isumaqarpoq. Jehovap erinitsajuinnera uagut qanoq iluaqutigaarput? Jehovap taassumalu kiffaasa aalajaatsut naammagittassusiat pinertusaarnerallu qanoq ilinniarfigisinnaavavut? Jehovap erinitsajuissusiata imaluunniit naammagittassusiata killeqarnera qanoq nalunngilarput? Apeqqutit taakku maanna sammissavavut.

Jehovap erinitsajuissusia eqqarsaatigeriaruk

4. Jehovap erinitsajuissusia pillugu apustili Petrusi qanoq allappa?

⁴ Apustili Petrusi Jehovap erinitsajuissusia pillugu ima allappoq: „Manna puiussanngilarsi, asasakka, ulloq ataaseq [Jehovamut] ukiutut 1.000-itut immat, ukiullu 1.000-it ullortut ataatsitut illutik. [Jehovap] neriorsuutigisani paamaarutinngilaa, naak ilaat isumaqaraluartut paamaarussinerarlugu; ilissinnulli erinitsajuippoq kimilluunniit tammaqqusinnginnami, tamaasalu allamik isumataarnissamut periarfissikkumagamigit.“ (2 Petrusi 3:8, 9) Maluginiariakkit tamatumani ersersinneqartut marluk Jehovap erinitsajuissusianik paasinninnissamut iluaqutigisinnaasavut.

5. Jehovap piffissamut isiginnittaasia iliuusiinut qanoq sunniuteqarpa?

⁵ Siullermik Jehovap piffissamut isiginnittaasia uagut piffissamut isiginnittaatsitsitut inngilaq. Naassaanngitsumik inuusumut ukiut tusindit ullortut ataasiinnartut ipput. Taassumunnga piffissaq killeqanngilaq, aamma piffissamit tatineqarneq ajorpoq, akuliunnissanili paamaarutinngilaa. Jehova killeqanngitsumik ilisimassuseqarami tamanut iluaqutaasumik akuliunissaminut qaqugorpiaq  piffissaalluarnerpaassanersoq nalunngilaa, piffissallu tamatuma nalliunnissaa erinitsajuilluni utaqqivaa. Isummissanngilagulli Jehova kiffami utaqqitillutik naalliuutigisinnaasaat eqqarsaatigalugit misigittaatsuusoq. Guutiuvoq ’nallittuingaartoq’, asannilluinnartuusoq. (Lukasi 1:78; 1 Johannesi 4:8) Naalliuutit akuerigallarsimasami kingunipiluinik ataavartumik aaqqiilluinnarsinnaavoq. — Tussiaat 37:10.

6. Guuti pillugu qanoq isummissanngilagut, aamma sooq?

⁶ Soorunami erinigisamik utaqqisaqarneq imaannaanngilaq. (Ussatit 13:12) Inuit neriorsuutiminnik eqqortitsipallanngikkaangata inuit allat isumaqalersinnaasarput neriorsuutiminnik eqqortitsinianngitsut. Guutili pillugu taamatut isumaqarneq sianiilliornerungaassaaq! Guutip erinitsajuissusia paamaarnerusorigutsigu, piffissap ingerlanerani qulaleriaannaallutalu nikalloriaannaavugut, anersaakkullu puungaleratarsinnaavugut. Mannalu suli ajornerussaaq: Inunnit Petrusip mianersorfigeqqusaanit — mitallertarlutillu uppinngitsunit — tammartitaasinnaavugut. Inuit taamaattut mitallerpalullutik ima oqartarput: „Tikiunnissaaninguna neriorsuut qanoq piniartoq? Siuaasat toqummatali suut tamarmik pinngortinneqaqqaarnermissut ittuaannarsimapput.“ — 2 Petrusi 3:4.

7. Jehovap erinitsajuinnera inuit allamik isumataarnissaannik kissaateqarneranut qanoq attuumassuteqarpa?

⁷ Petrusip oqaasiinit ilinniarfigisinnaasatta aappaat tassaavoq Jehova erinitsajuitsuusoq inuit tamarmik allamik isumataarnissaat kissaatigigamiuk. Inuit ileqqorisaminnit ajortunit uteriillutik saakkumanngitsut Jehovamit nungutitaajumaarput. Guutiitsulli toqunera Guutip iluarinngilaa. Inuilli isumataartut, ileqqorisaminnit ajortunit saattut inuuginnartullu takullugit nuannaarutigisarpaa. (Ezekieli 33:11) Taamaattuminguna erinitsajuittuartoq aamma nutaarsiassaq nuannersoq nunarsuaq tamakkerlugu oqaluussissutigineqartikkaa inuit inuuginnarnissamut periarfissaqarniassammata.

8. Guutip naammagittassusia Israelikkunnut periaasianit qanoq erserpa?

⁸ Guutip naammagittassusia aamma itsaq Israelikkunnut periaasianit erserpoq. Ukiuni hundredelinni taakkua naalannginnerat ilaginnarpaa. Pruffiitini aqqutigalugit ima kajumissaareqattaarpoq: „Aqqutisi ajortut qimassigit inatsisikka maleruarlugit inassutikkalu siuaasassinnut tunniussimasakka kiffakkalu pruffiitit aqqutigalugit nalunaarutigisimasakka naapertorlugit inuullusi.“ Tamanna qanoq kinguneqarpa? Ajoraluartumik „tusaajumanngillat“. — 2 Kunngit 17:13, 14.

9. Jiisusip Ataatami naammagittassusia qanoq naammalluinnartumik ersersippaa?

 ⁹ Naggataatigut Jehovap ernini, juutinik Guutimut saammaannarteqqusilluni kajumissaariuartoq, aallartippaa. Jiisusip Ataatami naammagittassusia naammalluinnartumik ersersippaa. Jiisusip, toqungajalernerminik ilisimaarinnittup, juutit ima upputigai: „Jerusalemi, Jerusalemi! Pruffiitinik toqutsisutit ilinnullu aallartitat ujaqqanik milloorlugit. Qasseriarlungamitaava qitornatit katersorniartaraluarpakka, soorlu kukkukuup piaqqani sulummi ataannut katersortarai, piumanngilasili.“ (Matthæusi 23:37) Oqaatsit killitsinnartut taakku eqqartuussisumit misigittaatsumit pillaajumatuujusumit oqaatigineqanngillat, ikinngummilli asannittumit naammagittartumit oqaatigineqarput. Jiisusip Ataatamisut qilammiittutut inuit allamik isumataarnissaat kissaatigaa iluarisaanngitsutut eqqartuussaannginniassammata. Inuit ilaat Jiisusip mianersoqqussutaanik ilassinnipput ukiumilu 70-imi u.n.k. Jerusalemimut eqqartuussutigineqartumit annilaarnartumit eqqugaanngitsoorlutik. — Lukasi 21:20-22.

10. Guutip erinitsajuissusia qanoq iluaqutigaarput?

¹⁰ Jehovap naammagittassusia imaluunniit erinitsajuissusia tupinnangaarami, ilaa? Inuit naalanngingaaraluartut Jehovap uagutsinnik, inunnillu millionilikkuutaanik allanik, imminik ilisarisimannilernissamut annaanneqarnissamillu neriuummik ilassinninnissamut periarfissiivoq. Petrusip uppeqatini kristumiut ima allaffigai: „Paasiniarsiuk Naalakkatta erinitsajuissusia ilissi annassutissarigissi.“ (2 Petrusi 3:15) Jehovap erinitsajuissusia pissutigalugu annaanneqarsinnaalernerput qujamasuutigingaarparput, ilaa? Ullut tamaasa Jehovamut kiffartortilluta taanna qinnuigisarparput naammagittarfigiuaqqulluta, ilaa? — Matthæusi 6:12.

11. Jehovap erinitsajuissusianik paasinninnerput qanoq iliornissamut killinneqaatigissavarput?

¹¹ Jehovap sooq erinitsajuinnera paasigutsigu taassuma annaassinissaa erinitsajuilluta utaqqisinnaassavarput, neriorsuutiminik eqquutitsiniarnera eqqarsaatigalugu paamaarussisorinngisaannarlugu. (Upputit 3:26) Guutip naalagaaffiata tikiunnissaa qinnutigiuartillutigu qularinngilarput Guutip nalunngikkaa qinnummik tamatuminnga akisinissamut qaqugu piffissaalluarnerpaassanersoq. Aamma Jehovap naammagittassusiata ilaarnissaanut killinneqartarpugut, taamaaliortarpugullu qatanngutitsinnik oqaluussiffigisatsinnillu naammagittarfiginninnikkut. Aamma piuneerussaasoqarnissaa kissaatiginngilarput, inuilli allamik isumataarnissaat aamma uagutsitut inuunermik naassaanngitsumik neriuuteqalernissaat kissaatigaarput. — 1 Timotheusi 2:3, 4.

Pruffiitit naammagittassusiat eqqarsaatigeriaruk

12, 13. Pruffiiti Esajap naammagittassusermik Jaaku 5:10-mi allaaserineqartumik ersersitsinissani qanoq ililluni iluatsissimavaa?

¹² Jehovap naammagittassusianik eqqarsaatiginninneq pissutsip tamatuma pingaartinnissaanut namminerlu tamatuminnga ineriartortitsinissamut iluaqutigisarparput. Naammagittassutsimik ineriartortitsinissaq inunnut naammalluinnanngitsunut imaannaanngilaq, taamaaliornissarli ajornanngilaq. Itsaq Guutip kiffai ilinniarfigisinnaavavut. Ajoqersugaq Jaaku ima allappoq: „Qatanngutit, pruffiitit [Jehovap] aqqani oqalussimasut maligassariniarsigit atugarliuutit naammagittarluni atornissaasigut.“ (Jaaku 5:10) Tuppallernarlunilu qiimmaallannarpoq nalunagu allat uagut unamminiakkatsinnut assingusunik unamminiagaqarnerminni iluatsissimasut.

¹³ Assersuutigalugu pruffiiti Esajap suliassaminut tunngatillugu naammagittarnissaq assut pisariaqartissimavaa. Jehovap taassumunnga oqaasiini tamanna erserpoq: „Inuiaat taakku oqarfigiartukkit: Tusaasaqartuassaasi, kisianni siunersisaqarnasi, isigisaqartuassaasi, kisianni paasisaqarnasi. Inuiaat taakkua uummataat orsumik qallersigit siutaat tusassarlersissigit, isaallu mamisissigit, iseqaraluarlutik takunnissinnaajunnaarsillugit, siuteqaraluarlutik tusaasinnaajunnaarsillugit, uummatimikkullu paasinnissinnaajunnaarsillugit, saanniaqqunagillu taassumannga ajorunnaarsinneqartariaqalerlutik.“ (Esaja 6:9, 10) Inuiaat taakku soqutiginninngikkaluartut Esaja minnerpaamik ukiuni 46-ni Jehovap mianersoqqussutaanik naammagittarluni oqaluussissutiginnippoq! Naammagittassuseq aamma inuppassuit soqutiginninngikkaluartut nutaarsiassamik nuannersumik oqaluussissutiginninnermi pinertusaarnissamut iluaqutigissavarput.

14, 15. Ajornartorsiutit naammagalugit atornissaannut nikallunganerullu qaangernissaanut Jeremiap suna iluaqutigaa?

 ¹⁴ Aamma pruffiitit kiffartornerminni soqutiginninnginnerinnaanngitsoq naammagalugu atortariaqarpaat; aamma malersorneqartarput. Jeremia kiggitsivimmut kiggisinneqarpoq, parnaarunneqarluni imiisiviliamullu ninginneqarluni. (Jeremia 20:2; 37:15; 38:6) Inunnit ikiorusutaminit taamatut malersorneqarnini naammagalugu atorpaa. Taamaakkaluartorli Jeremia narrutsannanilu akiniaanngilaq. Ukiuni qulikkuutaani arlalinni naammagittarluni pinertusaarpoq.

¹⁵ Malersorneqarneq asissorneqarnerlu pissutigalugit Jeremia nipangiinnanngilaq, aamma uagut tamakku nipangiinnassutiginngilavut. Soorunalimi ilaannikkut nikallorsinnaasarpugut. Aamma Jeremia nikallorsimavoq. Taanna ima allappoq: „[Jehovap] oqaasii ulloq tamaat mitaatigineqaatigaakka. Oqaraluaraangama: ’Eqqaaqqissanngilara, aqqani oqaloqqinnianngilanga.’“ Taava qanoq pisoqarpa? Jeremia oqaluussiunnaarpa? Ima nangippoq: „Taava misigilersarpara [Guutip oqaasia] soorlu ilunni [inneq ikumasoq], soorlu saanikka ikuallanneqartut.“ (Jeremia 20:8, 9) Maluginiaruk Jeremiap inuiaat mitallernerat asissuinerallu eqqarsaatiginerugaangamigit nuannaarunnaartartoq. Tusarliussalli qanoq nuannertiginera qanorlu pingaaruteqartiginera eqqarsaatigileraangamiuk nuannaaqqilertarpoq. Aamma Jehovap ’sorsuttartorsuartut’ taanna najorpaa, Guutip oqaasianik aallussilluarluni nakimaallunilu oqaluussissutiginninnissamut nakussatsillugu. — Jeremia 20:11.

16. Nutaarsiassamik nuannersumik oqaluussissutiginninnitsinni qanoq ililluta nuannaartuarsinnaavugut?

¹⁶ Pruffiiti Jeremiap suliani nuannaarutigaa? Aap, nuannaarutigingaarpaa! Taassuma Jehova ima oqarfigaa: „Oqaatsitit nanivakka iillugillu; uangali oqaatsitit nuannaarutigaakka uummatikkullu tipaatsuutigalugit illit atinnik ateqartitaagama, [Jehova].“ (Jeremia 15:16) Jeremiap Guutimut ilumoortumut sinniisuunissamut taassumalu oqaasianik oqaluussissutiginninnissamut immikkut pisinnaatitaaffeqarnini nuannaarutigaa. Uagut aamma nuannaarsinnaavugut. Aamma nunarsuaq tamakkerlugu inuit amerlaqisut Guutip naalagaaffia pillugu tusarliussamik ilassinninnerat, allamik isumataarnerat aqqutikkullu inuunermut naassaanngitsumut sammisukkuulernerat qilammi inngilit tipaatsuutiginninnerattut tipaatsuutigaarput. — Lukasi 15:10.

„Jobip pinertusaarnera“

17, 18. Jobi pinertusaarnermik qanoq ersersitsiva, qanorlu kinguneqarpa?

¹⁷ Itsaq pruffiitit eqqartoreerlugit ajoqersugaq Jaaku ima allappoq: „Jobip pinertusaarnera tusareerparsi paasereerlugulu [Jehovap] naggataatigut qanoq iliorfigigaa; [Jehovami] nallittuingaarpoq saammaassingaarlunilu.“ (Jaaku 5:11) Grækerit oqaasiat uani „pinertusaarneq“-mik [hypomonēʹ] nutserneqarsimasoq versimilu siuliani oqaaseq „naammagittarneq“-mik [makrothymiʹa] nutserneqarsimasoq isumaat assigiiginnapajaarput. Biibilimik ilisimatooq oqaatsit taakku marluk assigiinngissutaat pillugu ima allappoq: „Siulleq [versi 10-mi makrothymiʹa] tassaavoq inunnit ajortumik pineqartilluni naammagittarneq, aappaat [versi 11-mi, hypomonēʹ] tassaavoq artornartunik atugaqartilluni sapiilluni pinertusaarneq.“

¹⁸ Jobi artorsaateqarsimaqaaq. Pigisani meeqqanilu  tamaasa annaavai naalliunnangaartumillu nappaateqalerluni. Aamma imminut ikinngutaanerartunit Jehovamit pillarneqarnerarneqarnini nanertuutigaa. Jobi nipaatsumik naalliunngilaq; pissutsit atukkani naammagittaalliutigai allaallu oqamisaarluni Guutimit naapertuilluarnerulluni. (Jobi 35:2) Taamaattorli upperunnaarnanilu assuarnaakkunnaanngilaq. Guuti perloqqunngilaa, naak Saatani oqarsimagaluartoq taamaaliorumaartoq. (Jobi 1:11, 21) Tamanna qanoq kinguneqarpa? Jehovap „Jobi pilluaqquaa suli siornagornit annerusumik“. (Jobi 42:12) Jehovap Jobi peqqissiseqqippaa, marloriaammik pigissaartilerlugu asasanilu ilagalugit imaqarluartumik pilluarnartumillu inuulersillugu pilluaqquaa. Jobip aalajaalluni pinertusaarami Jehovap kinaassusia paasisinnaanerulerpaa.

19. Jobip naammagittarluni pinertusaarnera qanoq ilinniarfigisinnaavarput?

¹⁹ Jobip naammagittarluni pinertusaarnera qanoq ilinniarfigisinnaavarput? Jobitut immaqa nappaammik eqqugaasinnaavugut allanilluunniit ajornartorsiuteqalersinnaalluta. Imaassinnaavoq paasilluanngikkipput sooq Jehovap aalajangersimasumik misilinneqartikkaatigut. Unali qularissanngilarput: Aalajaattuarutta pilluaqquneqassaagut. Jehovap kajumillutik imminik ujarlersut qularnanngivissumik akissarsisittarpai. (Hebræerit 11:6) Jiisusi ima oqarpoq: „Naggatissamut nikallujuitsuusoq annaanneqassaaq.“ — Matthæusi 10:22; 24:13.

’Jehovap ullussaa nalliutissaaq’

20. Jehovap ullussaata nalliunnissaa sooq qularinngilarput?

²⁰ Jehova naammagittartuuvoq, aammali naapertuilluartuuvoq, ajussuserlu naassaanngitsumik akueriinnarnavianngilaa. Naammagittartuaannarnavianngilaq. Petrusi ima allappoq: „[Guutip] silarsuatoqaq asattuutinngilaa.“ Noa taassumalu ilaqutai inuuinnartinneqarput, silarsuarli guutiitsoq ulersuaqarnerani suujunnaarsitaavoq. Jehovap aamma illoqarfiit Sodoma Gomorralu pillarpai arsakuinnanngorlugit. Guutip eqqartuussutiminik naammassinninneri taakku ’siunissami kinguaariinni iluaatsuujumaartunut siorasaarutissaapput’. Qularnanngilluinnarpoq ’Jehovap ullussaa nalliutissasoq’. — 2 Petrusi 2:5, 6; 3:10.

21. Qanoq ililluta naammagittarnermik pinertusaarnermillu ersersitsisinnaavugut, allaaserisamilu tulliuttumi suna misissussavarput?

²¹ Taamaattumik Jehovap kinaassusia ilaartigu inuit allat allamik isumataarnissaannik ikiorlugit annaanneqarsinnaaniassammata. Aamma pruffiitit ilaartigit soqutiginninngittoqartaraluartoq naammagittarluta nutaarsiassaq nuannersoq oqaluussissutigalugu. Aammattaaq Jobitut misilinneqarnivut naammagalugit atortarutsigit assuarnaattuaruttalu qularissanngilarput Jehovap pilluaqqungaarumaaraatigut. Kiffartornitsinni nuannaarnissamut pissutissaqarluarpugut Jehovap innuttami nunarsuaq tamakkerlugu nutaarsiassaq nuannersoq oqaluussissutiginiarlugu ilungersornerannik pilluaqqusisarnera takugaangatsigu. Tamanna allaaserisami qupperneq 12-imiittumi misissussavarput. (wE 2/1 06)

Eqqaamavigit?

• Sooq Jehova naammagittarpa imaluunniit erinitsajuippa?

• Pruffiitit naammagittarnerat qanoq ilinniarfigaarput?

• Jobi qanoq pinertusaarpa, tamannalu qanoq kinguneqarpa?

• Qanoq nalunngilarput Jehovap naammagittassusia killeqartoq?

[Atuaqqissaarnermi apeqqutit]

[Qupp. 4-mi assiliartaq]

Jiisusip Ataatami naammagittassusia naammalluinnartumik ersersippaa

[Qupp. 6-mi assiliartat]

Jeremiap naammagittarnera pillugu Jehovap taanna qanoq akissarsisippaa?

[Qupp. 7-mi assiliartat]

Jobip pinertusaarnera pillugu Jehovap taanna qanoq akissarsisippaa?