Qilammiittunik nunamiittunillu kattutititsineq
Qilammiittunik nunamiittunillu kattutititsineq
„Aalajangigaanut . . . sunik tamanik, qilammiittunik nunamiittunillu, Missiarsimi ataatsimut kattutititseqqinnissamut [naapertuuppoq].“ — EFESOSIMIUT 1:9, 10, NV.
1. Qilak nunalu eqqarsaatigalugit Jehovap ’aalajangigaa’ suua?
QILAK NUNALU EQQISSINEQARFIUSUT! Tassa Jehovap, „Guutip eqqissisitsisup“, siunertaa nuanningaartoq. (Hebræerit 13:20) Taassuma apustili Paulusi isumassarsisillugu allatsippaa ’aalajangikkani’ tassaasoq ’sunik tamanik, qilammiittunik nunamiittunillu, Missiarsimi ataatsimut kattutititseqqinnissani’. (Efesosimiut 1:9, 10, NV) Oqaluulli versimi tamatumani ’kattutititseqqinnermik’ nutserneqartoq qanorpiaq paasisariaqarpa? Biibilimik misissueqqissaartartoq J. B. Lightfoot ima allappoq: „Oqaatsimi paasinarsivoq qilak nunalu naapertuutinngitsoqarunnaarlutillu aaqqiagiiffiussasut. Qilammiittut nunamiittullu tamarmik Kristusi katersuuffigissavaat taassumanilu ataasiussuseqassallutik. Ajorti toqulu, aliasunneq naalliunnerlu peerutissapput.“
’Qilammiittut’
2. ’Qilammiittut’ kattutitinneqartussat kikkuuppat?
2 Apustili Petrusip kristumiut ilumoortut neriugisaat nuannersoq ima eqikkarpaa: „Neriorsuutaa naapertorlugu ilimagisaraavut qilaat nutaat nunalu nutaaq iluassutsip najugarisassai.“ (2 Petrusi 3:13) „Qilaat nutaat“ tassani neriorsuutigineqartut tassaapput oqartussaasut nutaat, naalagaaffik Missiarsikkoortoq. ’Qilammiittut’, Paulusip Efesosimiunut allakkamini eqqartugai, „Missiarsimi“ ataatsimut kattutitinneqassapput tassaallutillu inuit killilimmik amerlassusillit Kristusimut qilammi naalakkersueqataasussatut toqqarneqartut. (1 Petrusi 1:3, 4) Kristumiut tanitat 144.000-it taakku ’nunamit immikkoortillugit pisiaapput’, ’inunnit immikkoortillugit pisiaapput’, Kristusip qilammi naalagaaffiani taassumunnga kingornusseqataaniassagamik. — Saqqummersitat 5:9, 10; 14:3, 4, 1900/1961; 2 Korinthimiut 1:21; Efesosimiut 1:11; 3:6.
3. Sooruna tanitat suli nunamiitillutik ’qilammut pisinneqartutut’ allaatigineqartut?
3 Kristumiut tanitat anersaaq illernartoq atorlugu pinngortinneqarput, imaluunniit ernioqqissinneqarput, taamaalillutillu Jehovamit anersaakkut ernerineqalerlutik. (Johannesi 1:12, 13; 3:5-7) Jehovap qitornamisut akuerimmatik, tassa ’qitornaassuseqartimmatik’, Jiisusimut qatanngutaalerput. (Romamiut 8:15; Efesosimiut 1:5) Taamaattumik taakku pillugit allassimavoq suli maani nunamiitillutik ’makititaasut qilammullu pisinneqartut Kristusi-Jiisusimi’. (Efesosimiut 1:3; 2:6) Taamatut anersaakkut qutsissumik inissisimaffeqarput ’anersaamik illernartumik neriorsuutigisamik naqissuserneqaramik. . . . Tamanna uppernarsaasiussaavoq kingornussarsiassaannut’ qilammi taakkununnga pissamaartitaasumut. (Efesosimiut 1:13, 14; Kolossemiut 1:5) Tassa taakku tassaapput ’qilammiittut’, eqimattat ataatsit Jehovamit siumut aalajangerneqareersimasumik amerlassusillit, katersorneqartussat.
Kattutititsineq aallartippoq
4. Qanga qanorlu „qilammiittunik“ kattutititsineq aallartippa?
4 Jehovap ’ingerlatsinera’, imaluunniit aqutseriaasia, naapertorlugu „qilammiittunik“ kattutititsineq „ullut aalajangersagaasut naammatsiffissaanni“ aallartittussaavoq. (Efesosimiut 1:10, NV) Ukiumi 33-mi u.n.k. piinsip ulluani anersaaq illernartoq apustilinut ajoqersukkanullu, angutinut arnanullu, kuineqarmat piffissaq tamanna nalliuppoq. (Apustilit Suliaat 1:13-15; 2:1-4) Tamanna angerutsip nutaap atuutilerneranut uppernarsaataavoq, pisimasorlu taanna ilagiit kristumiut inuiaqatigiillu nutaat, Israelikkut anersaakkut ittut, ’Israeli Guutip pigisaata’, aallartinnerannut ersiutaavoq. — Galatiamiut 6:16; Hebræerit 9:15; 12:23, 24.
5. Sooq Jehovap uinikkut Israelikkut taarserlugit ’inuiaat’ imaluunniit inuiaqatigiit nutaat pinngortippai?
5 Inatsisit tunngavigalugit angeruseq uinikkut Israelikkunnut angeruserineqartoq iluaqutigalugu „kunngeqarfik palaseqatigiinnik innuttalik inuiaqatigiillu illernartut“ qilammi naassaanngitsumik kiffartortussaasut pilersinneqarsimanngillat. (2 Mosesi 19:5, 6) Jiisusip juutit upperisarsiornikkut siuttui ima oqarfigai: „Guutip naalagaaffia ilissinnit peerneqassaaq tunniunneqassallunilu inuiannut inerititaqartitsisinnaasunut.“ (Matthæusi 21:43) Inuiaat imaluunniit inuiaqatigiit taakku, Israelikkut anersaakkut ittut, tassaapput kristumiut tanitat angerutsimut nutaamut ilaalersinneqartut. Taakku apustili Petrusip ima allaffigai: „Ilissi tassaavusi eqqarleriit qinikkat, palaseqatigiit kunngikkormiuusut, inuit illernartut, innuttassarsiat, Guutip ilissinnik taartumit qaamasuminut tupinnaqisumut nooqqullusi qaaqqusisup pissaaneranik nalunaajaasussat, ilissi siornagut innuttarineqanngitsusi, maannali Guutimut innuttaasusi.“ (1 Petrusi 2:9, 10) Jehovap uinikkut Israelikkunnik innuttamisut angerfigeqatiginnissimanera atorunnaarpoq. (Hebræerit 8:7-13) Jiisusip siulittuineratut, naalagaaffimmut Missiarsikkoortumut ilaasinnaanermik immikkut pisinnaatitaaffik uinikkut Israelikkunnit peerneqarsimavoq Israelikkunnullu anersaakkut ittunut 144.000-inut tunniunneqarluni. — Saqqummersitat 7:4-8.
Naalagaaffik pillugu angerutsimut ilaalersinneqarput
6, 7. Jiisusip qatanngutini anersaakkut kinguaassiarititaasut sumik immikkut ittumik angerfigeqatigai, tamannalu taakkununnga qanoq isumaqarpa?
6 Unnummi Jiisusip toqunini pillugu eqqaaniaalluni nalliuttorsiortarnissamik pilersitsiffimmini apustilini aalajaatsut ima oqarfigai: „Ilissi uannut najuuttuartuuvusi misilinneqarfigisanni. Soorlu Ataatama naalagaaffik uannut pigitikkaa, taamatut uanga ilissinnut pigitippara [Angerfigeqatigaassilu, soorlu Ataatama uanga angerfigeqatigigaanga, naalagaaffik pillugu, NV] uanga nerrivinni nerillusilu imersinnaaqqullusi naalagaaffinni issiavissaarsuarnilu issiaqqullusi Israelip naggueqatigiissortai aqqaneq-marluk eqqartuutissallugit.“ (Lukasi 22:28-30) Jiisusip tassani qatanngutiminut 144.000-inut anersaakkut kinguaassiarititaasunut ’toqumut allaat ilumoortuusussanut’ ’ajugaasuusussanullu’ angeruserisani immikkut ittoq pivaa. — Saqqummersitat 2:10; 3:21.
7 Killilimmik amerlassusillit taakkua nunarsuarmi inuttut uinilittut aalittullu naassaanngitsumik inuunissamik neriuut isumakkeerluinnarpaat. Kristusi ilagalugu qilammi naalakkersuissapput issiavissaarsuarnilu issiallutik inuit eqqartuutissallugit. (Saqqummersitat 20:4, 6) Maanna misissoriartigik allassimaffiit allat tanitanut taakkununngaannaq tunngasut, allassimaffiit taakku ersersitsipputtaaq ’savat allat’ eqqaaniaalluni nalliuttorsiornermi sooq assersuutinik ilangiineq ajornerannik. — Johannesi 10:16.
8. Tanitat eqqaaniaalluni nalliuttorsiornermi timiusamik ilangiinermikkut suna ersersittarpaat? (Takuuk qupperneq 25-mi ungalusaq.)
8 Tanitat Kristusip naalliunnerani peqatigaat taassumalu toquneratut toqunissamut piareersimallutik. Paulusi, tanitanut ilaasoq, allappoq sunilluunniit pilliuteqarumalluni „Kristusi pigilerumallugu ilisimasinnaaqqullugu taanna makinneratalu pissaanera naalliunneranilu peqatigalugu“. Aap, Paulusip allaat Kristusi ’toquagut assigilerumavaa’. (Filippimiut 3:8, 10) Kristumiut tanitat ilarpassuisa ’toqu Jiisusip atugaatut’ ittoq uinimikkut naammagalugu atorpaat. — 2 Korinthimiut 4:10.
9. Eqqaaniaalluni nalliuttorsiornermi timiusaq kia timaanut assersuutaava?
9 Naalakkap unnukkorsiortitsinera pilersikkamiuk, Jiisusi ima oqarpoq: „Tassa timiga.“ (Markusi 14:22) Tassani uinikkut timini, qanittukkut aanaartuinnanngorlugu naalliutsinneqartussaq, pivaa. Timiusaq seernarsaateqanngitsoq timimut tamatumunnga assersuutaalluarpoq, Biibilimi seernarsaat ajortimut ajussutsimullu assersuutaasarmat. (Matthæusi 16:4, 11, 12; 1 Korinthimiut 5:6-8) Jiisusi naammalluinnartuuvoq, uinikkullu timaa ajorteqarani. Timini naammalluinnartoq ajortit matoorneqaatissaattut pilliutiginiarpaa. (Hebræerit 7:26; 1 Johannesi 2:2) Kristumiut aalajaatsut tamarmik, qilaliarnissamik imaluunniit nunarsuarmi paratiisiusumi naassaanngitsumik inuunissamik neriuuteqaraluarunik, tamanna iluaqutigiumaarpaat. — Johannesi 6:51.
10. Eqqaaniaalluni nalliuttorsiornermi viinnimik ilangiisartut qanoq ilillutik ’Kristusip aavanut peqatigiissuteqarpat’?
10 Viinni kristumiut tanitat eqqaaniaalluni nalliuttorsiornermi ilangiiffigisaat pillugu Paulusi ima allappoq: „Pilluaqqussutip ermusia pilluaqqusartagarput Kristusip aavanut peqatigiissutaannginnerpa?“ (1 Korinthimiut 10:16) Viinnimik ilangiisut qanoq ilillutik ’Kristusip aavanut peqatigiissuteqarpat’? Soorunami taakku utertitsissutitut pilliut pilersinneqarmat pilersitseqataanngillat, namminneq utertinneqartariaqaramik. Kristusip aavata utertitsissutaaneranik upperinninnermikkut ajortuliaminnik isumakkeerfigineqarput qilaliarnissamullu naapertuilluartuutinneqarlutik. (Romamiut 5:8, 9; Titusi 3:4-7) Kristusip aava kuisaq iluaqutigalugu taassuma kingornusseqatissai 144.000-it ’illernartinneqarput’, imaluunniit immikkoortinneqarlutillu ajortaajarneqarput ’illernartuuniassagamik’. (Hebræerit 10:29; Danieli 7:18, 27; Efesosimiut 2:19) Aap, aani kuisaq atorlugu Kristusip ’pisiarai inuit Guutip pigisassai naggueqatigiinnit immikkullu oqaasilinnit inuiannillu inuiaqatigiinnillu tamanit pisut, inuianngortillugit kunngikkormiuusut palasinngortillugillu Guutitsinnut, nunarsuarmilu [nunamullu, 1900/1961] kunngiussapput’. — Saqqummersitat 5:9, 10.
11. Eqqaaniaalluni nalliuttorsiornermi tanitat viinnimik imernermikkut suna ersersittarpaat?
11 Jiisusip toqunini pillugu eqqaaniaalluni nalliuttorsiortarnissaq pilersikkamiuk, ermuseq viinnimik imalik apustiliminut aalajaatsunut tunniuppaa imalu oqarluni: „Tamassi tassannga imeritsi, taanna tassa aaga, angerutsip aava, amerlasuut pillugit kuineqartussaq ajortit isumakkeerneqaatissaannik.“ (Matthæusi 26:27, 28) Soorlu Guutip Israelikkullu akornanni Inatsisit tunngavigalugit angeruseq ussigit savaasallu aavata kuineratigut atuutilersinneqarsimasoq, taamatuttaaq angeruseq nutaaq, Jehovap ukiumi 33-mi piinsip ulluaniilli anersaakkut Israelikkunnut angeruseriligaa, Jiisusip aavata kuineratigut atuutilersinneqarpoq. (2 Mosesi 24:5-8; Lukasi 22:20; Hebræerit 9:14, 15) Viinnimik ’angerutsip aavanut’ assersuutaasumik imernermikkut tanitat ersersittarpaat angerutsimut nutaamut ilaalersinneqarsimallutik aamma iluaqutigalugu.
12. Tanitat qanoq Kristusip toquanut kuisippat?
12 Tanitat aamma allamik eqqaasinneqartarput. Jiisusip ajoqersukkani aalajaatsut ima oqarfigai: „Ermutsip imaa imigara imissavarsi, kuineqaatigisannillu kuisikkumaarpusi.“ (Markusi 10:38, 39) Apustili Paulusip kingusinnerusukkut eqqartorpaa kristumiut ’Kristusi-Jiisusip toquanut’ kuisittut. (Romamiut 6:3) Tamanna isumaqarpoq kristumiut tanitat inuunertik pilliutigisariaqaraat, isumakkeertariaqaraat. Toqunerat pilliutitut toquneruvoq, nunarsuarmi naassaanngitsumik inuunissamik neriuut isumakkeerluinnaramikku. Kristumiut tanitat Kristusip toquanut kuisinnerat naammassissaaq taakku toqumut allaat aalajaattuareerlutik qilammi Kristusi ’kunngioqatiginiassagamikkku’ anersaatut makitinneqarpata. — 2 Timotheusi 2:10-12; Romamiut 6:5; 1 Korinthimiut 15:42-44, 50.
Assersuutinik ilangiineq
13. Sooq nunarsuarmi inuunissamik neriugisallit eqqaaniaalluni nalliuttorsiornermi assersuutinik ilangiineq ajorpat, aamma sooq najuuttarpat?
13 Eqqaaniaalluni nalliuttorsiornermi timiusamik viinnimillu ilangiineq tamakkununnga assersuutaammat, paasinarluarpoq nunarsuarmi inuunissamik neriugisaqartut ilangiissagaluarpata tamanna naleqqutissanngitsoq. Taama neriugisallit nalunngilaat Kristusip timaanut tanitatut ’avataanatik’ angerutsimullu nutaamut Jehovap Jiisusi Kristusimut naalakkersueqataasussanik angerfigeqatiginnissutaanut ilaanatik. ’Ermuseq’ angerutsimut nutaamut assersuutaammat, angerutsimut nutaamut ilaasuinnaat assersuutinik ilangiisussaapput. Guutip naalagaaffiata ataani nunarsuarmi naammalluinnarluni naassaanngitsumik inuunissamik neriugisallit Jiisusip toquanut kuisissimanngillat qilammullu taassuma naalakkersueqatissaasut qaaqqusaanatik. Assersuutinik ilangiigaluarunik ersersissagaluarpaat angerutsimut nutaamut ilaallutik uffa ilaanatik. Taamaattumik naak eqqaaniaalluni nalliuttorsiornermi ataqqinnillutik isiginnaartutut najuukkaluarlutik assersuutinik ilangiineq ajorput. Jehovap ernini aqqutigalugu pillutik iliuuserisai tamaasa qujamasuutigaat, ilaatigut Kristusip aava kuisaq tunngavigalugu isumakkeerfigineqarnertik.
14. Tanitat timiusamik viinnimillu ilangiisarneq qanoq anersaakkut nakussatsissutigisarpaat?
14 Kristumiut ikittuinnaat qilammi Kristusip naalakkersueqatissaasut qaaqqusaasut inaarutaasumik naqissuserneqarnerat naammassineqangajalerpoq. Tanitat nunarsuarmi inuunermik naanissaata tungaanut eqqaaniaalluni nalliuttorsiornermi assersuutinik ilangiisarneq anersaakkut nakussatsissutigisarpaat. Misigipput Kristusip timaanut avataasutut tanitallu allat ataasiussuseqarlutik. Timiusamik viinnimillu ilangiigaangamik eqqaasinneqartarput toqumut allaat aalajaattuarnissaminnut akisussaallutik. — 2 Petrusi 1:10, 11.
’Nunamiittut’ kattutitinneqarnerat
15. Kikkut kristumiunut tanitanut ililiuppat?
15 1930-kkut qeqqanniilli ’savat allat’ amerliartuinnartut, tassa ’savarpannguanut’ ilaanngitsut nunarsuarmilu naassaanngitsumik inuunissamik neriugisallit, tanitanik tapersersuilerput. (Johannesi 10:16; Lukasi 12:32; Zakaria 8:23) Taakku Kristusip qatanngutaanut suleqataalerput ilumoorfiginnittut, inuiannullu tamanut nalunaajaatitut ’Naalagaaffimmik nutaarsiassamik nuannersumik’ oqaluussissutiginninnermikkut taakkuninnga ikiuinerat pingaaruteqangaarpoq. (Matthæusi 24:14, NV; 25:40) Taamaalillutik qilanaarisinnaavaat Kristusimit taassuma ’savaataasut’ iluarisaasutut eqqartuunneqarnissartik, „talerpiata tungaanut“ pisinneqarnissartik, taanna inuiaqatigiit eqqartuunniarlugit tikiuppat. (Matthæusi 25:33-36, 46) Kristusip aavanik upperinninnertik pissutigalugu taakku tassaalissapput ’amerlangaartut’ „annikilliortitaangaarnermit“ aniguisussat. — Saqqummersitat 7:9-14.
16. Kikkut ’nunamiittunut’ ilaassappat, taakkulu tamarmik qanoq ’Guutimut qitornaalernissamut’ periarfissaqassappat?
16 144.000-it inaarutaasumik naqissuserneqarnerat naammassineqarpat, aseruinerup „anorai“ Saatanip nunarsuarmi pissutsinik aaqqissuussineranik ajortumik aseruisussat iperarneqarsinnaassapput. (Saqqummersitat 7:1-4) Kristusip taassumalu kunngioqataasa palasioqataasalu ukiuni 1000-ini naalakkersuinerata nalaani makitinneqartut kisissaanngitsut ’amerlangaartut’ peqatigilissavaat. (Saqqummersitat 20:12, 13) Kunngimut Missiarsiusumut, Jiisusi Kristusimut, nunarsuarmi innuttaajuarnissamut periarfissaqassapput. Ukiut 1000-it taakku qaangiuppata ’nunamiittut’ tamarmik naggataarutaasumik misilinneqassapput. Misilinneqarnermi tamatumani aalajaattuartut Guutip taava qitornamisut nunamiusutut akuerissavai. — Efesosimiut 1:10, NV; Romamiut 8:21; Saqqummersitat 20:7, 8.
17. Jehovap siunertaa qanoq naammassineqassava?
17 Jehovap taamaalilluni taamanikkussamut silatungaartumik ingerlatsinini, imaluunniit aqutseriaatsini, aqqutigalugu siunertani, ’tassa sunik tamanik, qilammiittunik nunamiittunillu, Missiarsimi ataatsimut kattutititseqqinnissaq’, naammassereersimassavaa. Qilammi nunamilu pinngortitat sianissusillit tamarmik taava eqqisseqatigiillutik ataasiussuseqassapput Pinngortitsisorsuarmut, Jehova Guutimut, taassumalu naalakkersuineranut naapertuilluartumut nuannaarlutik naalatsigitillutik.
18. Tanitat aamma taakkua suleqataasa eqqaaniaalluni nalliuttorsiornermi najuunnissaq qanoq iluaqutigissavaat?
18 Apriilip ulluisa 12-ianni 2006-imi katersuunnissaq tanitanut ikittunnguanut aamma taakkua suleqataannut ’savanut allanut’ ilaasunut millionilikkuutaanut ilumut uppernikkut nakussatsinnassaaq. Kristusip toquneranik eqqaaniaaneq nalliuttorsiutigissavaat Jiisusip peqqussutaa una malillugu: „Taamaaliortaritsi eqqaallunga.“ (Lukasi 22:19, NV) Najuuttut tamarmik Jehovap ernini asasani Jiisusi Kristusi aqqutigalugu pillutik iliuuserisai eqqarsaatigisariaqarpaat.
Uteqqiineq
• Jehovap ’qilammiittut’ ’nunamiittullu’ sumik siunertaqarfigai?
• ’Qilammiittut’ kikkuuppat, qanorlu ’kattutitinneqarpat’?
• ’Nunamiittut’ kikkuuppat, sumillu neriugisaqarpat?
[Atuaqqissaarnermi apeqqutit]
[Qupp. 25-mi ungalusaq]
’Kristusip timaa’
Korinthimiunut allakkat siulliit 10:16, 17-imi Paulusip timiusap Kristusip qatanngutaanut tanitanut qanoq isumaqarneranik eqqartuinermini oqaaseq ’timi’ immikkut ittumik atorpaa. Ima allappoq: „Timiusaq aggortagarput Kristusip timaanut peqatigiissutaannginnerpa? Timiusaq ataasiummat tamatta timiuvugut ataaseq, tamatta timiusaq ataaseq ilangiiffigigatsigu.“ Kristumiut tanitat eqqaaniaalluni nalliuttorsiornermi timiusamik ilangiigaangamik, ersersittarpaat tanitat ilagiissaanni, timitut ataatsitut Kristusimik niaqulittut ittumi, ataasiussuseqarlutik. — Matthæusi 23:10; 1 Korinthimiut 12:12, 13, 18.
[Qupp. 25-mi assiliartat]
Sooq tanitaannaat eqqaaniaalluni nalliuttorsiornermi timiusamik viinnimillu ilangiisarpat?
[Qupp. 27-mi assiliartaq]
Jehovap ingerlatsinera aqqutigalugu qilammi nunamilu pinngortitat tamarmik ataasiussuseqalissapput