Jehovap oqaasia uumavoq

Jobimik allakkanit pingaarnersat

ATAATAANERPAAQ Jobi nunami Usimi najugaqarpoq ullumikkut Arabiamik atilimmi. Tamatuma nalaani Israelikkorpassuit Egyptenimi nunasisimapput. Jobi Israelikkuunngikkaluarluni Jehovamik pallorfiginnittuuvoq. Biibilimi Jobi pillugu ima allassimavoq: „Taanna nunarsuarmi tamarmi nalissaqanngilaq assuarnaatsuullunilu peqqusersuitsuugami Guutimillu mianerinnittuulluni ajortumik iliuuseqarnaveersaartuugami.“ (Jobi 1:8) Taamaattumik Jehovamut kiffaasup saqqumilaartup Jaakup ernerata Josefip toqunerata kingorna Jehovamullu kiffaasup saqqumilaartup allap Mosesip pruffiitinngunnginnerani inuusimassaaq.

Mosesi, Jobimik allakkanik allattuunerarneqartartoq, ukiuni 40-ni Midjanimiitilluni, Usip eqqaaniittumi, Jobi tusaamasimassagunarpaa. Aamma Mosesi Israelikkut ukiuni 40-ni inoqajuitsukkut ingerlaarnerata naggataata nalaani Usip eqqaaniitillugit Jobip inuunerata naggataa pillugu tusagaqarsimassaaq. * Jobip misigisaasa allaatigineqarnerat nuanningaarmat oqaluttuaq taanna allaaserisatut torrallatatut isigineqartarpoq. Aammami tassani apeqqutit imaattut akineqarput: Sooq inuit ajunngitsut naalliunnartunik nalaataqartarpat? Sooq Jehovap ajussuseq akueraa? Inuit naammalluinnanngitsut Guutimut assuarnaattuarsinnaappat? Jobimik allakkat Guutip oqaasiata isumassarsiarititaasup ilaatut ullumikkuttaaq uumallutillu sunniisinnaassuseqarput. — Hebræerit 4:12.

’PEERLI ULLOQ INUNNGORFIGA’

(Jobi 1:1–3:26)

Ullut ilaanni Saatanip Jobip Guutimut assuarnaatsuunera apeqquserpaa. Jehovap Saatanip unammillernera akueraa Jobillu ajunaarnernik eqqugaanissaa akueralugu. Jobilli Guuti perloqqujumanngilaa. — Jobi 2:9.

Jobip ikinngutai pingasut takkupput „misigeqatiginninnertik takutikkiartorlugu“. (Jobi 2:11) Oqaaseqanngivillutik Jobi najorpaat Jobip ima oqarnissaata tungaanut: ’Peerli ulloq inunngorfiga.’ (Jobi 3:3) „Meeqqatut ullup qaamarnganik takunngisaannarsimasutut“, tassa meeqqatut toqungalluni inunngortutut, ikkusuppoq. — Jobi 3:11, 16.

Allassimaffiit pillugit apeqqutit akineqartut:

1:4 — Jobip meerai inuuissiortarpat? Naagga. Allassimaqqaarfinni hebræerisuuni oqaaseq ’ulloq’-mik isumalik versimi tamatumani atorneqartoq inuit ilaasa ’inuuissiorneq’-tut paasisarsimavaat. Hebræerit ’ullormut’ aamma ’inuuissiornermut’ oqaatsit atortagaat assigiinngillat isumaallu assigiinnatik. (1 Mosesi 40:20) Oqaaseq ’ulloq’ Jobi 1:4-p allassimaqqaarfiani atorneqartoq isumaqarpoq piffissaq seqernup nuineraniit tarrinneranut. Jobip erneri arfineq-marluk ukiut tamaasa ulluni arfineq-marlunni ilaqutariittut katerisimaartitsisarsimagunarput. Ullut taakkua ingerlaneranni erneri tamarmik immikkut nikittaallutik illuminni katerisimaartitsisuusarsimagunarput.

1:6; 2:1 — Kina Jehovamut sassarsinnaatitaagami? Jehovamut sassartut ilaat tassaapput Guutip ernitua, Oqaaseq, inngilit aalajaatsut aammalu „Guutip erneri“ qilammiut naalasseriitsut, ilaatigut Saatani Diaavulu. (Johannesi 1:1, 18) Saatani taassumalu inngilii Guutip naalagaaffiata 1914-imi pilersinneqarnerata kinguninngua aatsaat qilammiit igitaapput. (Saqqummersitat 12:1-12) Taakkua sassarnissaat Jehovap akueraa, Saatanip unammillernera tamatumunngalu atatillugu  apeqqutaalersut anersaajusunut tamanut malugeqqullugit.

1:7; 2:2 — Jehovap Saatani toqqaannartumik oqaluuppaa? Biibilimi erseqqissumik oqaluttuarineqanngilaq Jehovap pinngortitani anersaajusut qanoq attaveqarfigisarnerai. Pruffiitilli Mikap takorruuilluni takuaa tusarlugulu inngili Jehovamik toqqaannartumik oqaloqateqartoq. (1 Kunngit 22:14, 19-23) Jehova Saatanilu oqaloqatigiittarsimagunarput akunnermiliuttoqaratik.

1:21 — Jobi qanoq ililluni ’anaanami timaanut’ utersinnaagami? Jehovap inuk „issumit“ pinngortissimammagu, oqaaseq ’anaanaq’ issumut assersuutaavoq. — 1 Mosesi 2:7.

2:9 — Jobip nulia misigissutsikkut qanoq issimava uini ima oqarfigigamiuk: „Guuti perloqquinnaruk toqullutillu“? Jobip nulia uimisut annaasaqarpoq. Uini siornatigut peqqissuusoq amiilaarnartumik nappaateqalernera anniaatigisimassaqaa. Qitornani asasani annaavai. Tamakkua tamaasa ima isumatsaatigitigisimasinnaavai pingaarnerpaaq puigorlugu — Guutimut attaveqarnertik.

Ilinniarfigisinnaasavut:

1:8-11; 2:3-5. Soorlu Jobimik oqaluttuap takutikkaa qanoq oqalunneq pissusilersornerlu, eqqortumillu pissutiginiagaqarluni Jehovamut kiffartorneq assuarnaatsuunermut ilaapput.

1:21, 22. Pissutsit qanorluunniit ikkaluaraangata Jehovamut ilumoorfiginnittuarnikkut takutissinnaavarput Saatani sallutuujusoq. — Ussatit 27:11.

2:9, 10. Jobitulli uppernitsinni aalajaattariaqarpugut naak ilaquttatta ilaannit kristumiutut sammisartakkanut peqataasarnerput iluarineqanngittaraluartoq, imaluunniit aalajangiusimasatta akerlianik iliuuseqartinniarluta upperunnaarsinniarlutaluunniit tatineqartaraluarluta.

2:13. Jobip ikinngutai Jehova neriorsuutaalu pillugit tuppallersaataasunik oqaasissaqanngillat, Jehovap isiginnittaasiatut isiginnittaaseqannginnamik.

„ASSUARNAATTUASSAANGA“

(Jobi 4:1–31:40)

Jobip ikinngutaasa pingasut pingaarnerpaatut oqaatiginiagaat tassaavoq Jobi Guutimit taama ajortigisumik pillarneqarmat ajortuliorsimassasoq. Elifazi oqaaseqaqqaartuuvoq. Oqaaseqareermat Bildadi oqaaseqarpoq. Taanna tusangiasaarivoq, Sofarilu suli sakkortunerusumik oqalulluni.

Jobip tikeraartut pingasut eqqarsartaasiat kukkusoq akuerinngilaa. Paasiuminaatseqaa sooq Guutip naalliunnini akuerigaa, taamaattumillu ingasaassilluni imminut illersorpoq. Taamaakkaluartoq Jobip Jehova asavaa, imalu torlulalluni: „Toqussara tikillugu assuarnaattuassaanga.“ — Jobi 27:5, NV.

Allassimaffiit pillugit apeqqutit akineqartut:

7:1; 14:14, NV — Oqariartaaseq ’pinngitsaaliissummik kiffartorneq’ qanoq isumaqarpa? Jobi ima annikilliortigaaq inuuneq pinngitsaaliissummik sulerulunnertut nukersornartutullu isigilersimallugu. Jobi 10:17-imi „katersannut saassutiteqqittarlunga“-mik allassimasoq aamma isumaqarsinnaavoq pinngitsaaliissummik sulisitaanerit imaaginnartut. Piffissaq toqusut inaanniiffik — toqunermiit makititaanermut — pinngitsoorneqarsinnaanngilaq. Taamaattumik Jobip piffissaq taanna ’pinngitsaaliissummik kiffartornermut’ assersuuppaa.

7:9, 10; 10:21; 16:22 — Jobip taamatut oqaaseqarnermigut ersersinnginnerpaa makititaanissaq upperinagu? Jobip oqaatsini nammineq siunissaminut qaninnerusumut tunngatippai. Sunaana oqaatiginiaraa? Imaassinnaavoq oqaatiginiaraa toqussagaluaruni nalimini inuusut takoqqissanngikkaanni. Taakkua isiginnittaasiat malillugu piffissaq Guutip aalajangigaa nallertinnagu illuminut uteqqinnavianngilaq ilassineqaqqinnaviarnanilu. Jobi aamma isumaqarsinnaavoq kinaluunniit toqusut inaannit nammineerluni utersinnaanngitsoq. Jobi 14:7, 13-imi erseqqippoq siunissami makititaanissani neriuutigigaa. (Taakkununnga ilanngullugu takuuk Jobi 14:14, 15-ip sammineqarnera Napasuliaq Alapernaarsuiffik 1. juuni 2005-imoortoq, qupp. 12.)

10:10 — Qanoruna Jehovap Jobi ’immuttut kueriarlugu immussualiatut issortikkaa’? Jobip anaanami illiaani pilersimanini taalliortorpalaartumik oqaluttuaraa.

19:20, NV — Jobip ima oqarnera qanoq isumaqarpa: „Kigutikka kisimik ameqartut aniguivunga“? Ameqarpasinngitsut ameqarnerarlugit aniguinerarami suutaarutivissimanini pisimasinnaavaa.

 Ilinniarfigisinnaasavut:

4:7, 8; 8:5, 6; 11:13-15. Isummipallattassanngilagut inuk annikilliortoq nammineq siaruartikkaminik katersuisoq Guutimillu iluarisaanngitsoq.

4:18, 19; 22:2, 3. Siunnersuuterput Guutip oqaasianik tunngaveqartariaqarpoq, nammineq isummatsinnik tunngaveqarnani. — 2 Timotheusi 3:16.

10:1. Jobip narrutsassimanermik naalliunnerminut allanik pissuteqarsinnaanera takusinnaanngilaa. Naalliuuteqaraangatta narrutsattassanngilagut, ingammik akerleriissutaalersimasut suunerannik paasinnilluarsimanerput eqqarsaatigalugu.

14:7, 13; 19:25; 33:24. Saatanip qanorluunniit misilikkaluarpatigut makititaanissamik neriuuterput iluaqutigalugu misilinneqarnerit naammagalugit atorsinnaavavut.

16:5; 19:2. Oqaatsitsinnik allat qiimmassartariaqarlutigillu nakussatsittariaqarpavut, erloqisinnagit. — Ussatit 18:21.

22:5-7. Siunnersuutit unnerluutiginnissutinik pissutissaqanngitsunik tunngaveqartut iluaqutaanatik ajoqutaapput.

27:2; 30:20, 21. Assuarnaattuarniarluni naammalluinnartuusariaqanngilaq. Jobip Guuti isornartorsioramiuk kukkuvoq.

27:5. Jobip assuarnaattuassanerluni assuarnaattuassannginnerluniluunniit nammineq kisimi aalajangersinnaavaa, inuummi Guutimut asanninnera assuarnaassusianut aalajangiisuuvoq. Taamaattumik Jehovamut asanningaarneq ineriartortittariaqarparput.

28:1-28. Inuit nalunngilaat nunap erlinnartuutai sumiinnersut. Taamaattunik ujaasinerminni pillaqqillutik nunap iluatigut aqqutit timmissat tigutsisillit takusinnaanngisaat aqqutigisarpaat. Guutimilli mianerinnittoq Guutimeersumik ilisimassuseqalersarpoq.

29:12-15. Immikkut pisariaqartitsisut ilumoorfiginnilluta tunniusimaffigisariaqarpavut.

31:1, 9-28. Jobi qaninniarujuugaqarneq ajorami, allasiorneq ajorami allanullu naapertuilluanngitsumik naakkittaatsumilluunniit iliorneq ajorami maligassaalluarpoq. Pigisalerituujunanilu guutipilussiortuunngilaq.

„OQAASERISIMASARALUAKKA TAMAASA UTERTIPPAKKA PEQQISSIMINERALU TAKUTILLUGU ISSUMI ARSANILU ISSIALLUNGA“

(Jobi 32:1–42:17)

Angut inuusuttoq Elihumik atilik oqallittunik eqqissilluni malinnaasoq maanna oqalulerpoq. Jobi erloqisitsisuilu pingasut naqqippai.

Elihu oqalukkunnaarniariarmat Jehova anorersuarmit akivoq. Jobip sooq naalliuttariaqarnera nassuianngilaa. Ajugaqanngitsulli Jobi apereqattaarpaa Guutip pissaaneranik mianernangaartumik ilisimassusersuanillu eqqaasillugu. Jobi nassuerpoq iluamik paasisimasaqarnani oqalussimalluni, oqarporlu: „Oqaaserisimasaraluakka tamaasa utertippakka peqqissimineralu takutillugu issumi arsanilu issiallunga.“ (Jobi 42:6) Jobi misilinneqarunnaarami assuarnaassutsi akilerneqaatigaa.

Allassimaffiit pillugit apeqqutit akineqartut:

32:1-3 — Elihu qanga tikiuppa? Elihup oqaaserineqartut tamaasa tusaasimagamigit, Jobi suli oqalulinngitsoq tusarnaarfigisinnaasaminut ingissimassaaq taamaalillunilu Jobip ikinngutaasa pingasut ulluni arfineq-marlunni nipangersimanerat naggaserlugu. — Jobi 3:1, 2.

34:7 — Jobi „mitalliutinik imerpoq soorlu imermik imertoq“. Tamanna qanoq paasisariaqarpa? Jobi aliasungaarami tikeraartimi pingasut illaruaatiginninnerat imminut tunngateqqajaavaa naak Guutimik akerlilersuinerugaluartoq. (Jobi 42:7) Jobip illaruaatiginninnerit iivai angutitut mamarsarluni imermik imertutut.

Ilinniarfigisinnaasavut:

32:8, 9. Ilisimassuseq ukioqqortusiartorneq ilutigalugu takkunneq ajorpoq. Ilisimassuseqassagaanni  Guutip oqaasia paasisimasariaqarpoq anersaavanillu siulersorneqartilluni.

34:36. Arlaatigut ’misilinneqarnernik eqqorneqaraangatta’ assuarnaassutsitsinnik uppernarsaanissamut periarfissaqalertarpugut.

35:2, 1900/1961. Elihu tusarnaaqqissaarpoq oqalulinnginnerminilu suna pineqarnersoq paasillugu. (Jobi 10:7; 16:7; 34:5) Kristumiut utoqqaanertat siunnersuinnginnerminni tusarnaaqqissaaqqaartariaqarput, aamma pissutsit suut pineqarnersut sunarpiarlu pineqarnersoq paasilluaqqaartariaqarlugu. — Ussatit 18:13.

37:14; 38:1–39:30. Jehovap tupinnartuliai pissaaneranik ilisimassusianillu ersersitsisut eqqarsaatigeqqissaaraangatsigit maniguutilersarpugut, tamannalu taassuma kisimi oqartussaaneranik qutsissisitsinerup uagut soqutigisatsinnit tamanit pingaaruteqarneruneranik paasinninnissamut iluaqutigisarparput. — Matthæusi 6:9, 10.

40:1-4. Ajugaqanngitsoq naammagittaalliutigerusulerutsigu ’qanerput assatsinnik matusariaqarparput’.

40:15–41:26. Behemoti (imermiutarsuaq) Livjatanilu (kuukkooriarsuaq) nukittoorujussuupput! Guutimut kiffartornitsinni pinertusaarsinnaaqqulluta uumasunik nukittoorsuarnik taakkuninnga pinngortitsisup nukik uagutsinnut tunniussinnaasaa pisariaqartipparput. — Filippimiut 4:13.

42:1-6. Jobip Jehovap oqaasii tusaramigit Guutillu nukingata qanoq ersersinneqarsimaneranik eqqaasinneqarami, tamanna ’Guutip isiginissaanut’, imaluunniit taanna pillugu sallusuissutip paasinissaanut, iluaqutigaa. (Jobi 19:26) Tamanna eqqarsaataatsiminik allannguissutigaa. Biibili tunngavigalugu siunnersorneqaraangatta, kukkussutivut nassuerutigipallattariaqarpavut pisariaqartunillu allannguilluta.

’Jobitut pinertusaarneq’ ineriartortiguk

Jobimik allakkani erseqqissumik takutinneqarpoq Guuti inuit naalliuutaannut akisussaanngitsoq. Saataniuna akisussaasoq. Guutip ajussutsimik akuerinninnera pissutigalugu periarfissaqalerpugut Jehovap kisimi oqartussaaneranik uagullu assuarnaassutsitsinnik akerleriissummi qanoq inissisimanitsinnik takutitsinissamut.

Jehovamik asannittut tamarmik Jobitulli misilinneqartussaapput. Jobimik oqaluttuaq misilinneqarnerni taamaattuni pinertusaarsinnaanitsinnut qularunnaarutigaarput. Tamanna ajornartorsiutitta naggateqarumaarnerannik eqqaasitsivoq. Jaaku 5:11-mi ima allassimasoqarpoq: „Jobip pinertusaarnera tusareerparsi paasereerlugulu [Jehovap] naggataatigut qanoq iliorfigigaa.“ Jehovap Jobi assuarnaattuarmat akissarsisippaa. (Jobi 42:10-17) Uagutsinnut siunissarititaasoq nuanningaarami — nunami paratiisiusumi inuuneq naassaanngitsoq! Taamaattumik uaguttaaq, Jobitut, assuarnaattuarniarluta aalajangiusimatigu. — Hebræerit 11:6. (wE 3/15 06)

[Quppernerup ataani ilanngussaq]

[Qupp. 16-mi assiliartat]

„Jobip pinertusaarnera“ qanoq ilinniarfigisinnaavarput?