Silaqassuseq — sooq qaqutigooqaa?

„SUSORUNA? Tamanna ilisimanerusariaqaraluarpaa,“ isiginnittoq oqarpoq. Allap niaqquni ileqimisaartortippaa, ingerlaatigalunilu oqalorujuppoq: „Silaqassuseqalaarsimaguni taamaaliorsimanavianngikkaluarpoq.“ Oqaatsit taamaattut immaqa tusarsimassavatit. Sunaliuna „silaqassuseq“?

Den Danske Ordbog naapertorlugu silaqassuseq tassaavoq ’eqqarsarluarsinnaaneq, pissutsinik naliliillaqqissoq silatuumillu aalajangiisinnaassuseqartoq’. Silaqassuseqarneq tassaavoq eqqarsartaatsimik atuineq. Amerlasuut allanit eqqarsaassutsikkumasarput. Tusagassiortunit, peqatiminnit paasinnittaatsinilluunniit nuimanerusunit aqunneqartittarput.

Silaqassuseqarneq ullutsinni qaqutiguulersimagunarpoq. Angut paasisimasamigut ilumoorpoq taamaalluni oqarami: ’Silaqassuseq nalinginnaasoq nalinginnaavallaanngilaq.’ Taavami qanoq silaqassuseqartoqalersinnaava, qanorlu iluaqutigineqarsinnaava?

Silaqassuseq qanoq ineriartortinneqarsinnaava?

Silaqassuseq ineriartortissallugu ajornanngilaq, kisiannili piffissaq sivisooq, isumatussuseq aammalu sulerusussuseqartuarnissaq pisariaqarput. Silaqassuseqalernissamut uagutsinnut iluaqutaasinnaasut pingasut misissorneroriartigit.

Biibilimik atuaqqissaarneq siunnersuutaanillu maleruaaneq. Biibili, allataalluartoq tunngavilersugaalluartunillu imalik, ilisimassuseqalernissamut silaqassuseqalernissamullu iluaqutaalluinnartuuvoq. (Efesosimiut 1:8) Apustili Paulusip kristumioqatini ima kaammattorpai: „Kiisalu, qatanngutit, pingaartissigit suut ilumoortut tamaasa, suut assuarnaatsut, suut iluartut, suut minguitsut, suut asanartut, suut ajunngitsumik oqaatigineqarsinnaasut, tassa suut ajunngitsut nersornartullu.“ (Filippimiut 4:8) Siunnersuut tamanna maleruartuarutsigu siuneqassuseq pissuserlu silaqassuseqarnermik tunngaveqartoq angusinnaavarput.

Misilittakkat ilinniutigalugit. Taalliortup Schweizimiup silaqassuseqarneq inuunermi misilittakkanut attuumassuteqartippaa. Oqarpoq: „Silaqassuseq . . . misilittakkanit siumullu isigisinnaanermit katitigaavoq.“ Aap, „misilittagaqanngitsup tatigisarpai oqaaserineqartut suut tamaasa, silatuup alloriarnini sianigeqqissaartarpai“. (Ussatit 14:15) Silaqassuseq ineriartortinneqartarpoq qimerluuinikkut, sungiusarnikkut misilittakkatigullu. Iliuuserisimasat pitsaanerusumik iliuuserinissaat piffissap ingerlanerani ilikkarneqarsinnaapput. Kukkussutilli ilinniarfigissagaanni maniguuttuusariaqarpoq. Oqartoqarsinnaanngilaq anersaaq usorsitsaarumatooq, makitasooq namminissarsiortorlu, ulluni kingullerni makkunani inuppassuarni atugaasoq, silaqassuseqarnermut ersiutaasoq. — 2 Timotheusi 3:1-5.

Ikinngutissarsiornermi peqqissaartuuneq. Ikinngutitta ilisimassuseqalernissatsinnik silaqassuseqalernissatsinnillu ikiorsinnaavaatigut imaluunniit ajoqusersinnaavaatigut.  Ussatit 13:20-mi allassimavoq: „Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.“ Eqqarsartaaseq paasinnittaaserluunniit Guutimut naalanngitsuni oqaasianillu itigartitsisuni atugaasoq akuerisariaqanngilarput. Ussatit 17:12-imi allassimavoq: „Nannumik piaraakkamik naapitsineq navianannginneruvoq sianiitsumik qaatusimasaqanngivissumik naapitsinermit.“

Silaqassuseq qanoq uagutsinnut iluaqutaasinnaava?

Silaqassutsip ineriartortinnissaa uagutsinnut iluaqutaavoq. Inuuneq soqutiginarnerulersittarpaa allaat piffissamik atuilluarnerulersitsisinnaalluni. Allaat silaqassutsip isumatsassimaneq, inuit eqqarsaqqaaratik iliuuserisartagaannit pilersartoq, millisissinnaavaa. Inuit siuneqassuseqarluanngitsut inuunerminnik imminnut artukkertarput. „Sianiitsoq assoroornerata nukillaartittarpaa,“ Biibilimi allassimavoq. (Oqaluussisartup oqaasii 10:15) Inuit taamaattut immaqa assoruuttarput qasulerlutillu, naleqartumilli naammassisaqarpallaartaratik.

Eqqiluisaarneq, oqaloqatigiinneq eqiasuissuserlu aamma piitsuussutip qanoq naammagalugu atorneqarsinnaanera inuunermullu tunngasut assigiinngitsorpassuit pillugit Biibilimi atoriaannaasunik siunnersuutissarpassuaqarpoq. Inuit millionillit uppernarsarsinnaavaat Biibilip siunnersuutaanik najoqqutassiaanillu silatuunik maleruaanerujartortillutik inuunerat nalerisimaarnarnerulersimasoq.

Silaqassuseqarnerup ilitsersuutinik inatsisinillu maleruaalersiinnanngilaatigut, pisussaaffitsinnilli naammassinninnissatsinnik aamma ikiorpaatigut. Silaqassuseqarnerli ilisimassuseqanngikkaanni naammanngilaq. „Ilisimasoq tamakkuninnga naalaassaaq suli annerusumik ilisimasaqalissalluni,“ Ussatit 1:5-imi allassimavoq. Ilikkartariaqarparputtaaq eqqortumik inerniliisinnaajumalluta paasissutissarsiarisimasatta misissoqqissaartarnissaat. Tamatuma ’ilisimassusermik pigisaqarluta inuunissatsinnut’ ikiussavaatigut. — Ussatit 28:26.

Silaqassuseq anneruniajuissusermut atassuteqarpoq. Naak akisussaaffitsinnik naammassisarpassuaqarusukkaluarluta siuneqassuseqartariaqarpugut pisinnaasattalu killeqarnera eqqarsaatigalugu. Ilumoorpoq Paulusi oqarmat ’tamaviaarluta Naalagaq kiffartuutissagipput’. (1 Korinthimiut 15:58) Kajumissaarulli tamanna Oqaluussisartup oqaasii 9:4-miittoq eqqarsaatigalugu paasisariaqarpoq, allassimammat: „Qimmermi uumasoq pitsaaneruvoq løvimit toqungasumit.“ Jehovamut kiffartortilluta peqqissuserput sianigigutsigu sivisunerusumik inuusinnaassaagut eqinnaattuaannassallutalu. Silaqassuseqarnerup oqimaaqatigiissaarinissatsinnik ikiorsinnaavaatigut, taamaalilluta suliat assigiinngitsut suliarisinnaaniassagatsigit nikallorata. Aap, silaqassuseqarneq iluaqutissarpassuaqarpoq! (wE 5/15 05)

[Qupp. 11-mi assiliartaq]

Biibili siunnersuutissarpassuarnik pitsaasunik imaqarpoq

[Qupp. 12-mi assiliartaq]

Silaqassuseq ineriartortinneqartarpoq qimerluuinikkut sungiusarnikkut misilittakkatigullu