„Guuti qaninniarsiuk, taava taanna ilissinnut qanillissaaq“

Siornatigut kingornatigullu inooriaasitoqaq taartoq, siunissarli qaamasoq

„GUUTIP oqaasia uumavoq sunniisinnaassuseqarlunilu panamillu illuttut kiinalimmit ipinnerulluni . . . uummatip eqqarsaatai isumaalu eqqartuuttarlugit.“ (Hebræerit 4:12) Taamatut apustilip Paulusip Guutimit tusarliussap pissaanera nukik sunniisinnaasoq nassuiarpaa. Ukiuni hundredelinni siullerni erseqqilluartumik tusagassap pissaanerata uummammik sunniisinnaanera takutippaa. Naak taamani inooqataasut nalaanni sunniinerlunneqaraluartoq, kristumiut inuttut pissuseq nutaaq atisimavaat. — Romamiut 1:28, 29; Kolossemiut 3:8-10.

Ullumikkuttaaq erseqqippoq Guutip oqaasia, Biibili, pissaaneqartoq iluaqutaasumillu allanngortitsisinnaasoq. Assersuutigeriartigu Richard Tysklandimeersoq. Nerinnattoq pillagunartoq, isummamigut allanngoriataallaqqissoq sumininnguit patsisiliullugit paannilersartoq. Inuunera nakuusernermik malunnaateqarpoq, tilluuttartuullunilu. Sungiusapiloortarpoq Westfalenillu tilluuttartuisa oqimaannerinut pissartanngorluni. Saniatigullu imigassartorpallaartarami paannikulaartarpoq. Paanninnerillu ilaanni angutip toqutaaneranik kinguneqarpoq, Richardilu parnaarussaangajalluni.

Aappariinnerammi? Oqaluttuarpoq: „Heikelu Biibili misissunngikkallaratsigu, immikkut inuuvugut. Heikep piffissaq annertooq ikinngutiminut atortarpaa, uangalu piffissaq tamangajaat tilluunnermut, saarlisaarnermut aqqartartutullu atortarpara.“

Richard Heikelu Jehovap Nalunaajaasuinik atuaqqissaaqatigineqaleramik, Richardip eqqarsaatimigut inuunermini allanngortitassani Guutip maligassiaanut tulluarsarnissaanut ajornarunarluinnartutut takorloorpaa. Jehovali pillugu ilisimasaqarnerujartortilluni, kissaateqaleraluttuinnarpoq Guutip peqqusaanik maleruaanissaminik. Paasivaa Guutip nakuusernermik nuannarinnittoq akuerinngikkaa, tamakkuninngaluunniit aliikkusersortittoq. Jehova pillugu allassimasoqarpoq: „Nakuusernermik nuannarisaqartoq uumigaa.“ — Tussiaat 11:5.

Richard Heikelu misigipput upperisamut nunarsuup paratiisinngornissaanut neriuummut kajungerlutik. Tamannalu misigerusuppaat. (Esaja 65:21-23) „Guuti qaninniarsiuk, taava taanna ilissinnut qanillissaaq“ — qaaqqusissut tamanna Richardip assut kajungernartippaa. (Jaaku 4:8) Nassuerutigaa ajoqersuut isumassarsiarititaasoq maleruassallugu qanoq pingaaruteqartigisoq: „Nakuusertoq sinngageqinagu, tumai atuallanniaqinagit. Tunussisormi [Jehovamut] maajunnartuuvoq, peqqusersuitsorli [Jehovami] peqataavoq.“ — Ussatit 3:31, 32.

Richard kissaateqangaarpoq allanngorusulluni, kisianni paasivaa nammineerluni tamanna saperlugu. Taamaammat paasivaa Guutimut qinunikkut ikiorneqarnissani qinnutigisariaqarlugu. Jiisusip apustiliminut oqaasii naapertorlugit iliuuseqarpoq: „Eqqumaniarlusilu qinugitsi ussernartumut peqqunasi. Anersaaq kajumikkaluarpoq uinilli sanngiippoq.“ — Matthæusi 26:41, 1900/1961

Kingorna Richardip paasigamiuk nakuuserneq kamattarnerlu qanoq Guutip isigigai, paasilluarpaa  tilluuttarneq timersornertut atorsinnaanagu. Jehovap ikiuineratigut, atuaqqissaaqatiginnitsimilu kaammattuinerisigut, nakuusissaarpoq. Tilluuttarunnaarpoq paannittarunnaarlunilu, aalajangerporlu ilaqutariit iluanni ajunnginnerusumik inuuneqarnissartik sulissutiginiarlugu. „Biibilimi sallusuissutsip ilinniartippaanga iliuuseqannginninni eqqarsaqqaartassasunga,“ Richard oqarpoq, massakkut Jehovap ilagiivisa ilaanni nakkutilliisunngorsimasoq qanilaartoq. Nangippoq: „Maannakkut nuliannut meeqqannullu asannittuuvunga ataqqinnittuullungalu, ilaqutariittullu ataqatigiilersimavugut.“

Inuit kukkusumik paasitinneqarsimasut ilaatigut Jehovamut nalunaajaasut ilaqutariinnik aserorterisutut pasillertarpaat. Richardimullu pisimasup takutippaa pasilliinerit taamaattut patsisissaqanngitsut. Biibilimi sallusuissutsip ilaqutariit ataqatigiissilersittarpai siunissamullu qaamasumut pisittarlugit, allaat taartumik inooriaaseqarsimagaluartunut. — Jeremia 29:11. (wE 5/15 03)

[Qupp. 9-mi issuagaq]

„Paratiisimik neriuutip allanngortissimavaanga“

[Qupp. 9-mi ungalusaq]

Biibilimi najoqqutassiat atorsinnaapput

Biibili pissaaneqangaartumik inuit inooriaasiannut sunniuteqarsinnaavoq. Ataani taaneqartut Biibilip najoqqutassiaasa nakuusertartuusimagaluartut allanngortittarsimavai:

„Kamajaatsuuneq pitsaaneruvoq pissarsuulluni sorsuttartuunermit; pinaveersaarneq pitsaaneruvoq illoqarfimmik tiguaanermit.“ (Ussatit 16:32) Aqussinnaanngisamik kamanneq sanngiinnermut ersiutaavoq, nakuussusiunani.

„Inuk silatussusiata kamajaatsunngortittarpaa.“ (Ussatit 19:11) Siuneqassutsip paasinnissinnaanerullu ikiorsinnaavaatigut qanorpiaq pisoqarneranik paasinninnissamut taamaalillunilu kamannerit pinngitsoortissinnaallugit.

„Narrajasumik ikinnguteqarniaqinak kamajasumillu peqateqarnaveersaarlutit, taassuma inuusaasia ilinniarfigeqqunagu.“ (Ussatit 22:24, 25) Kristumiut silatusaarlutik kamajasunik pissusilinnik ilaqarnaveersaartarput.