Ajunngitsoq qanoq ililluni ajortumut ajugaajumaartoq

Kunngi Daavi inuuvoq ajunngitsoq. Taanna Guutimik asanningaarpoq, naapertuilluarneq erinigaa atugarliortullu misigeqatigalugit. Taamaakkaluartoq kunngip ajunngitsup taassuma Batseba, kiffami tatigisami ilaata nulia, allasiorfigaa. Daavillu paasigamiuk Batseba naartulersissimallugu, taassuma uiata toqutaanissaa isumagaa. Taava katippaa pinerluttuliani isertorniarsarigaluarlugit. — 2 Samueli 11:1-27.

INUIT ajunngitsuliorsinnaassuseqarunik, taava sooq taama ajortoqartigineranut pisuuppat? Tamatumunnga pissutaasut tunngaviusut Biibilimi paasinarsisinneqarput. Aamma Biibilimi ersersinneqarpoq Guutip qanoq ililluni Kristusi Jiisusi ikiortigalugu ajortut tamaasa ataasiaammik piiarumaarai.

Ajortulioqqajaasarneq

Kunngi Daavip ajortumik iliortarnitsinnut pissutaasut ilaat nammineq uparuarpaa. Kanngunartuliani qulaajarneqareermata iliuutsiminut tamanut imminut akisussaatippoq. Peqqissimingaarluni ima allappoq: „Erniuninniilli pisooreerpunga, ajortimiillunga anaanama ilumiugilermangali.“ (Tussiaat 51:7) Guutip siunertarisimanngisaannarpaa meeqqanik ajortuliorumaartunik ilumioqalertoqarnissaa. Evali tamatumalu kingorna Adami Guutimut pikitsitsiniarlutik aalajangeramik ajorteqanngitsunik meerartaarsinnaajunnaarput. (Romamiut 5:12) Inuit naammalluinnanngitsut amerliartornerat ilutigalugu erseqqissivoq inuit ajortulioqqajaasartut, Mosesimik allakkat siulliit 8:21-mimi allassimavoq „inuit inuusunnerminniit ajortuinnarmik eqqarsaateqartut“.

Ajortumik ilioqqajaasarneq aqunneqanngikkuni kingunerisinnaavai „kinguaassiuutitigut inuunerlunneq, . . . akerariinnerit, saqitsaanneq, sinnganeq, kamajassuseq, namminissarsiorneq, assuariinnerit, immikkoorniarneq, qinngarsuinerit“ iliuutsillu allat aseroriartornartut Biibilimi  „uinngup suliaanik“ taaneqartut. (Galatiamiut 5:19-21) Assersuutigalugu kunngi Daavi uinikkut sanngiissummut nakkaannarpoq kinguaassiuutitigullu inuunerlulluni, inoqutaasa akornanni akerariinnermik eqqissiunnaarnermillu kinguneqartumik. (2 Samueli 12:1-12) Eqqarsaatini kanngunartut akiorsimasinnaagaluarpai. Batsebamulli pilerissusipiluni akiornagu periaaseq ajoqersukkap Jaakup kingusinnerusukkut allaatigisaa malillugu iliorpoq: „Kinaluunniit usserneqartarpoq nammineq pilerissutsiminit nassataritilluni kajumitsatsitaallunilu; pilerissutsillu ilumileraangami ajorti erniarisarpaa, ajortillu inersimaleraangami toqu erniarisarpaa.“ — Jaaku 1:14, 15.

Toqoraanerit, pinngitsaaliilluni atoqateqarnerit sallunaveeqqutissatullu tigusarinninnerit allaaserisap siuliani eqqaaneqartut, inuit kissaatigisapilutik iliuutsiminnut aalajangiisuutikkaangatigit qanoq pisoqarsinnaaneranut assersuutissaapput ingasattut.

Ilaannikkut ajussuseq ilisimaatsuussusermik pissuteqartarpoq

Apustilip Paulusip Biibilimi oqaluttuarineqarnerani inuit ajortumik iliortarnerannut pissutaasoq alla erserpoq. Paulusi toqugami saamasutut asannittutullu ilisimaneqarluni toquvoq. Qatanngutini kristumiut kiffartuunniarlugit imminut pilliutigisimavoq. (1 Thessalonikamiut 2:7-9) Siornatigut Saulusitut ilisimaneqarallarami „kamattorsuujuarpoq [taakkorpiaat] sioorasaarlugit toqukkumallugit“. (Apustilit Suliaat 9:1, 2) Sooq Paulusip kristumiut siulliit ajortumik pineqarnerat akueraa taakkuninngalu ajortumik pinneqataalluni? Ima oqarpoq: „Uppinngissutsinni sianiginagu taamaaliorama.“ (1 Timotheusi 1:13) Aap, Paulusip taamanikkut ’Guuti ilungersuutigaa, kisianni silaqassuseqarnani’ imaluunniit Ny Verden-Oversættelsen naapertorlugu ’eqqorluartumik ilisimasaqarnani’. — Romamiut 10:2.

Paulusitut inuppassuit ajunngitsumik isumaqarlutik ajortumik iliortarsimapput Guutip piumasaa pillugu eqqorluartumik ilisimasaqannginnamik. Assersuutigalugu Jiisusip ajoqersukkani mianersoqqullugit ima oqarfigai: „Allaat ullut nalliukkumaarput ilissinnik toqutsisut isumaqalerfissaat taamaaliornermikkut Guuti kiffartuullugu.“ (Johannesi 16:2) Ullumikkut Jehovap Nalunaajaasuisa Jiisusip oqaasiisa ilumuussusiat misigaat. Nunarpassuarni malersugaasimapput allaallu Guutimut kiffartornerartunit toqutaallutik. Paasinarpoq taamatut kukkusumik aallussilluarneq Guutip iluarinngimmagu. — 1 Thessalonikamiut 1:6.

Ajussutsip pilerfia

Jiisusip ajortumut pissutaanerpaasoq uparuarpaa. Upperisarsiornikkut siuttut imminik toqutsiniartut pillugit taanna ima oqarpoq: „Ataataq ilissi nagguigisarsi tassa Diaavulu, ataatassilu pilerigisai naammassiumavasi. Taanna pileqqaarneranniit toqutsisuuvoq.“ (Johannesi 8:44) Saatanip namminissarsiornermik pissuteqarluni Adami Evalu Guutimut pikitsitsinissamut nakutippai. Pikitsitsinerup tamatuma kingunerisaanik inuit tamarmik ajortilinngorput taamalu toqusussanngorlutik.

Saatanip toqutserusussuseqarnera aamma Jobimut iliorfiginninnerani erserpoq. Saatanip Jobip assuarnaassusianik misiliinissaa Jehovap akuerimmagu, Saatanip Jobi pigisaanik tamanik arsaarnissaa naammaginngilaa. Aamma Saatanip Jobip qitornaasa qulit toqunerat pisuussutigaa. (Jobi 1:9-19) Ukiut hundredet kingulliit ingerlaneranni inuttut naammalluinnanngissuseq  soqutigisaqannginnerlu pissutigalugit aammattaaq Saatanip nunarsuarmi pissutsinut sunniuteqarnera pissutaalluni inuiaat ajussutsip sakkortusiartornera misigaat. Biibilimi ersersinneqarpoq Diaavulu ’nunamut igitaasoq, inngiliilu taassumunnga ilanngullugit igitaasut’. Siulittuummi tamatumani eqqorluartumik siulittuutigineqarpoq Saatanip killiligaanerata kingunerisaanik ’nunamut’ aatsaat taama ’eqqanartoqartigissasoq’. Saatanip inuit ajortumik iliornissaannut pinngitsaalisinnaanngilai, ’silarsuarmilli tamarmik tammartitsiniaaneq’ pikkoriffigisupilussuuaa. — Saqqummersitat 12:9, 12.

Ajortulioqqajaasarneq peerneqassaaq

Ajussuseq nunamit peerneqarluinnassappat inuit inunnguuseralugu ajortumik ilioqqajaasarnerat, eqqorluartumik ilisimasaqannginnerat Saatanillu sunniuteqarnera iliuuseqarfigineqartariaqarput. Inunnguuseralugu ajortulioqqajaasarneq qanoq ililluni inuit uummataannit peerneqarsinnaava?

Inuit ajortulioqqajaasarnerat nakorsanit inuilluunniit nakorsaasiaat atorlugit peerneqarsinnaanngilaq. Jehova Guutili ajortip naammalluinnanngissutsillu kingornussatta aaqqiissutissaannik pilersitsivoq piumasut tamarmik iluaqutigisinnaasaannik. Apustili Johannesi ima allappoq: „Jiisusip aavata tamanik ajortaajassavaatigut.“ (1 Johannesi 1:7) Inuup naammalluinnartup Jiisusip nammineq kajumissutsiminik uagut pilluta inuunini pilliutigigamiuk, „ajortivut timiminiitillugit sanningasulimmut [nappakkamut, NV] qangattaappai, uagut ajortimit toqulluta inuujunnaarluta iluartumik inuusinnaaqqulluta“. (1 Petrusi 2:24) Jiisusip imminut pilliutigaluni toqunerata Adamip ajortuliaata kinguneri piiassavai. Paulusi allappoq Jiisusi Kristusi „imminut tunniussimasoq akigaluni inuit tamarmik utertitaassutissaannik“. (1 Timotheusi 2:6) Aap, Kristusip toqunera pissutaalluni inuiaat tamarmik naammalluinnartunngornissamut — Adamip annaasimasaata atugarilernissaanut — periarfissaqalerput.

Immaqali ima aperivutit: ’Ukiut 2000-it missiliorlugit matuma siorna Jiisusip toqunera pissutaalluni inuiaat naammalluinnartunngornissamut periarfissaqalersimappata, taava sooq ajussuseq toqulu suli atuuppat?’ Apeqqummut tamatumunnga akissut ajussutsimut pissutaasumut allamut tunngassuteqarpoq — inuit Guutip siunertaanik ilisimanninnginnerat.

Eqqorluartumik ilisimasaqarneq ajunngissusermik tunngavissiivoq

Inuk eqqortuliorusuttoq Jehovap Jiisusillu ajussuseq peerniarlugu maanna qanoq iliuuseqarnerat pillugu eqqorluartumik ilisimasaqaleraangami piaarinani iliuutsinik ajortunik akuerinninnginnissamut, ajornerusumilluunniit, ’Guutimut akiuuttunngunnginnissamut’ tamanna iluaqutigisinnaavaa. (Apustilit Suliaat 5:38, 39) Ilisimaatsuutilluni iliuuserisimasat ajortut Jehova Guutip puigorumavai. Apustili Paulusi Athenimi oqalugiarnermini ima oqarpoq: „Guutip ullut imminik ilisimanninngiffiusut ilaginnaaginnarfigisimagaluarpai, maannali inuit peqqusiffigai tamarmik sumiluunniit ittut allamik isumataassasut, aalajangersimavaami ulloq silarsuarmik tamarmik naapertuilluartumik eqqartuussiffissani angutikkut tamatumunnga qinereersimasamigut; tamannalu tamanut upperisassanngortippaa toqusunit makitikkamiuk.“ — Apustilit Suliaat 17:30, 31.

Paulusip nammineq nalunngilaa Jiisusi toqusunit makititaasimasoq, tassami Jiisusip makititaasimasup nammineerluni oqaluussimavaa kristumiunillu malersuinera akornuserlugu. (Apustilit Suliaat 9:3-7) Paulusi Guutip siunertaanik eqqorluartumik ilisimasaqalerniariarluni allanngorpoq Kristusillu ilaarneratigut inuttut pitsassuanngorluni. (1 Korinthimiut 11:1; Kolossemiut 3:9, 10) Paulusip aamma „Naalagaaffimmik iivangkiiliu“ aallussilluarluni oqaluussissutigaa. (Matthæusi 24:14) Jiisusip toquneranit makititaaneraniillu ukiut 2000-ingajaat ingerlaneranni Jiisusip inuit ilaat naalagaaffimmini naalakkersueqatissamisut toqqarpai, taakkununngalu ilaavoq Paulusi. — Saqqummersitat 5:9, 10.

1900-kkunniilli manna tikillugu Jehovap Nalunaajaasuisa Jiisusip peqqussutaa una kajumillutik piviusunngortippaat: „Taamaattumik aallarlusi inuiaqatigiit tamaasa uannut ajoqersuganngortissigik kuillugit Ataatap Ernerullu Anersaallu Illernartup aqqani ajoqersorlugillu ilissinnut peqqussutikka tamaasa maleruaqqullugit.“ (Matthæusi 28:19, 20) Tusarliussamik eqqumaffiginnittut  tamarmik Kristusip qilammi naalakkersuinerata ataani nunarsuarmi naassaanngitsumik inuusinnaapput. Jiisusi ima oqarpoq: „Inuuneq naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.“ (Johannesi 17:3) Guutimik Kristusimillu ilisarisimannilernissamik ikiuineq inuup inummut allamut iliuuserisinnaasaanit tamanit pitsaanerpaavoq.

Naalagaaffik pillugu nutaarsiassamik nuannersumik ilassinnittut pissutsit soorlu „asanninneq, nuannaarneq, eqqissineq, kamajasuunnginneq, inussiarnisaarneq, ajunngitsuuneq, unneqqarissuseq, qanilaarneq, imminullu naalakkersinnaaneq“ ersersittarpaat, naak avatiminni ajortorpassuarnik pisoqartaraluartoq. (Galatiamiut 5:22, 23) Jiisusitut ’ajortoq ajortoqataanik akilertanngilaat’. (Romamiut 12:17) Inuttut ataasiakkaatut ’ajortoq ajugaaffigaat ajunngitsoq atorlugu’. — Romamiut 12:21; Matthæusi 5:44.

Ajortumut ajugaalluinnarneq

Ajussutsimut pissutiviusoq, Saatani Diaavulu, inuit ajugaaffigisinnaanngisaannassavaat. Jehovalli qanittukkut Jiisusi aqqutigalugu Saatanip niaqua sequmisissavaa. (Romamiut 16:20) Aamma Jehovap Kristusi Jiisusi naalakkissavaa politikkikkut aaqqissuussinerit tamaasa ’aserorteqqullugillu suujunnaarseqqullugit’, taakkualu ilarpassui oqaluttuarisaanermi ajortorpassuarnut pissutaasimapput. (Danieli 2:44; Oqaluussisartup oqaasii 8:9) Ullormi eqqartuussiffissami ’Naalakkamik Jiisusimik iivangkiiliumut naalakkumanngitsut’ tamarmik „peersitaallutik naassaanngitsumik suujunnaarsitaaneq pillaatisiarissavaat“. — 2 Thessalonikamiut 1:8, 9; Sefania 1:14-18.

Saatani taassuminngalu tapersersuisut piiagaareerpata Jiisusip annattut nunarsuup aallaqqaammut pissusianik atuutilersitseqqinnissaannik qilammiit ikiussavai. Kristusip aamma makititaanissamut qinngaqqunnanngitsut tamaasa makitinneratigut nunarsuarmi minguiarsimasumi inuunissamut periarfississavai. (Lukasi 23:32, 39-43; Johannesi 5:26-29) Taamaalilluni ajussutsip kingunipilui inuiaat atugarilersimasaasa ilaat peerneqassapput.

Jehovap inuit Jiisusi pillugu nutaarsiassaq nuannersoq naalaqqullugu pinngitsaalinianngilai. Inuilli naassaanngitsumik inuuneqalissutaasinnaasumik ilisimassuseqalernissaannut periarfissippai. Pingaaruteqarpoq ilisimassusermik tamatuminnga pigiliussinissamut periarfissannik illit maannakkut atorluaanissat. (Sefania 2:2, 3) Taamaalioruit ajussutsip qanorluunniit ittup nalaatavit naammagalugu atornissaa ilikkassavat. Aamma paasissavat Kristusi qanoq ililluni ajortumut ajugaalluinnassasoq. — Saqqummersitat 19:11-16; 20:1-3, 10; 21:3, 4. (wE 1/1 06)

[Qupp. 5-mi assiliartaq]

Saulusip eqqorluartumik ilisimasaqannginnami iliuutsit ajortut akuerai

[Qupp. 7-mi assiliartaq]

Guutimik Kristusimillu ilisarimannilernissamik ikiuineq inuup inummut allamut iliuuserisinnaasaanit tamanit pitsaanerpaavoq