Aliikkutassat ineriartornartut nukissaqalersitsisut

„Nerigussi imerussiluunniit qanorluunniillu iliorlusi taamaaliussaasi Guutip ataqqinaatissaanik.“ — 1 KORINTHIMIUT 10:31.

1, 2. Sammisassat nuannersut sooq ’Guutip tunissutaatut’ isigineqarsinnaappat, qanorli Biibilimi toqqaannartumik mianersoqqussuteqarpa?

NUANNARISATSINNIK sammisaqarusuttarnerput pissusissamisoorpoq. Guutitta pilluartup, Jehovap, inuunermik nuannaarutiginninnissarput kissaatigaa, inuunermillu nuannaarutiginninnissamut periarfissarpassuaqartippaatigut. (1 Timotheusi 1:11; 6:17) Kunngi Salomo silatooq ima allappoq: „Paasivara inunnut pitsaanerpaassasoq inuunertik atorunikku nuannaarlutik. . . . Inuit nerillutillu imersinnaammata suleruloornermillu inerititaat inuulluutigisinnaallugit tamannaavortaaq Guutip tunissutaa.“ — Oqaluussisartup oqaasii 3:12, 13.

² Taamatut suliarisimasanik pitsaasunik eqqarsaatiginnilluni qasuersaarneq tamatuminngalu nuannaarutiginninneq ilumut nukissaqalernarpoq, ingammik ilaquttat ikinngutilluunniit nuannersumik ilagalugit taamaalioraanni. Taamatut nuannaarutiginninneq ’Guutip tunissutaatut’ eqqortumik taaneqarsinnaavoq. Soorunami Pinngortitsisup naammangaartunik uagutsinnut tunisinera pissutigiinnarlugu killeqanngitsumik aliikkusersorsinnaatitaalinngilagut. Imerpallaarneq, nerivallaarneq kinguaassiuutitigullu inuunerlunneq Biibilimi assuarineqarput taamaaliortartullu mianersoqquneqarlutik ’Guutip naalagaaffianik kingornussarsinnginnissamik’. — 1 Korinthimiut 6:9, 10; Ussatit 23:20, 21; 1 Petrusi 4:1-4.

3. Anersaakkut eqqumanissamut Jehovallu ullussarsuata eqqarsaatiginissaanut suna iluaqutigissavarput?

³ Ulluni atugarliungaarfiusuni kingullerni makkunani kristumiunut silarsuarmi ajortunngorsimasumi iliuuserineqartartunit sunnertinnani isumatusaarluni inuunissaq aatsaat taama unamminiarnartigaaq. (Johannesi 17:15, 16) Siulittuutigineqartutut inuit ullumikkut ’inuulluarniutinik Guutimit ima pingaarnerutitsitigaat’ ’naalliunnartoqangaarnissap’ qanillineranut uppernarsaatit eqqumaffiginagit. (2 Timotheusi 3:4, 5; Matthæusi 24:21, 37-39) Jiisusip ajoqersukkani ima mianersoqquai: „Mianersoritsi uummatisi malussarlersitaaqqunagit aalakoornermit imerajunnermillu inuunerullu matuma piinik isumakuluutinit, pakasarteqqunasi ullup taassuma tassanngaannaq tikiunneranit nigartuutitut illuni.“ (Lukasi 21:34, 35) Guutimut kiffaasutut Jiisusip mianersoqqussutaanik eqqumaffiginninnissaq aalajangiusimavarput. Inuit silarsuarmi guutiitsumi avatangiisitsinniittut  assiginagit anersaakkut eqqumanissarput Jehovallu ullussarsuata eqqarsaatiginissaa ilungersuutigaarput. — Sefania 3:8; Lukasi 21:36.

4. (a) Aliikkutassanik naleqquttunik nassaarnissaq sooq imaannaanngila? (b) Efesosimiut 5:15, 16-imi siunnersuut suna malikkumavarput?

⁴ Silarsuarmi iliuuserineqartartut ajortut, Diaavulup pilerinartunngortissimallugillu qanillinissaat ajornannginnerulersissimammagu taakkua nigorsimanissaat imaannaanngilaq. Tamanna ajornarnerungaartarpoq aliikkutassarsioraangatta. Silarsuup neqeroorutaasa amerlanerpaartaat ’uinngup pilerigisaanut’ kajumissaarisarput. (1 Petrusi 2:11) Aliikkutassat ajoqutaasut kikkunnit tamanit ornigarneqarsinnaasuniipput, aammattaarli atuagassiatigut, tv-kkut, internetikkut, videukkut dvd-kkullu angerlarsimaffinnut eqqunneqarsinnaapput. Taamaattumik Guutip oqaasiani kristumiunut ima silatuumik siunnersuuteqarpoq: „Sianiginiarsiuk qanoq inuunersusi, siuneqanngitsutut pinnasi, siuneqartutulli iliorlusi. Piffissaqqissoq atorniarsiuk, ullut ajortuummata.“ (Efesosimiut 5:15, 16) Aatsaat siunnersuut taanna maleqqissaarutsigu qulakkeersinnaavarput aliikkutassanit ajoqutaasunit napitinneqannginnissarput, piffissaajarneqannginnissarput, aap, allaat Jehovamut attaveqarnitta aserorneqannginnissaa, taamaaliunngitsooruttami naggataatigut piuneerussaassaagut! — Jaaku 1:14, 15.

5. Uagutsinnut suna nakussatsinnarnerpaava?

⁵ Kristumiut ulapaartuugamik ilaannikkut qasuersaarnissaminnik pisariaqartitsisarnerat paasinarpoq. Aammami Oqaluussisartut oqaasii 3:4-mi allassimavoq ’illarfissaqarlunilu qittaserfissaqartoq’. Taamaammat aliikkutassat Biibilimi piffissaajaatitut isigineqanngillat. Aliikkusersornerli uatsinnik nukissaqalersitsisussaavoq, anersaakkut peqqissutsitsinnik navianartorsiortitsinani anersaakkulluunniit sammisassanut akornutaanani. Kristumiut inersimalluartut misigisimavaat allanut iluaqutaasumik iliuuseqarneq pilluarnarnerpaasoq. Jehovap piumasaanik iliorneq inuunerminni salliuppaat Jiisusillu nammaataa iluaqisoq nammakkiukkaangamikku ’tarnimikkut nukissaqalertarlutik’. — Matthæusi 11:29, 30, NV; Apustilit Suliaat 20:35.

Aliikkutassanik naleqquttunik toqqaaneq

6, 7. Aliikkusersuut kristumiunit akuerineqarsinnaanersoq akuerineqarsinnaannginnersorluunniit aalajangerniarlugu suna iluaqutigisinnaaviuk?

⁶ Aliikkusersuutip aalajangersimasup kristumiunut naleqquttuunera qanoq ililluta qulakkeersinnaavarput? Angajoqqaat meeqqatik siunnersortarpaat, pisariaqartitsisoqaraangallu aamma utoqqaanertat ikiuuttarput. Allanilli oqaluttuunneqarnissarput pisariaqartussaanngikkaluarpoq atuakkap, filmip, qiteriaatsip, erinarsuutip pinnguaatilluunniit aalajangersimasup naleqquttuunnginnera pillugu. Paulusi allappoq ’inersimasunngorluarsimasut piginnaassutsimik atortuinnarnerisigut sungiussisimasut ajunngitsumik ajortumillu immikkoortitsisinnaalerlutik’. (Hebræerit 5:14; 1 Korinthimiut 14:20) Najoqqutassianik Biibilimiittoqarpoq. Nalunngeqatiginnissutit, Guutip oqaasia tunngavigalugu ilinniartinneqarsimasoq, malillugu ilioruit taanna iluaqutigissavat. — 1 Timotheusi 1:19.

⁷ Jiisusi oqarpoq ’orpik inerititaanit ilisarineqartartoq’. (Matthæusi 12:33) Aliikkusersoriaaseq  ajortunik inerititaqarpat, soorlu nakuusernermik, kinguaassiuutitigut inuunerlunnermik, anersaarsiornermilluunniit, taava kristumiut taanna itigartittariaqarpaat. Aamma akuerineqarsinnaanngilaq inuunermik peqqissutsimillu navianartorsiortitsippat, aningaasatigut ajornartorsiulersitsippat nikallungaannalersitsippalluunniit, allanulluunniit naakkiussutaasinnaappat. Apustili Paulusip uagutsinnut mianersoqqussutigaa allap nalunngeqatiginnissusianik ikiliinerup ajortuliornerunera. Ima allappoq: „Taama qatanngutinut ajortuliorlusi tarningisa nalunngissusiat qajannartoq ikilerassiuk Kristusimut ajortuliorpusi. Nerisassammi qatanngutiga tammartippassuk neqitussaarluinnarumaneruvunga qatanngutiga tammartikkumanagu.“ — 1 Korinthimiut 8:12, 13.

8. Qarasaasiami pinnguaatit, videot dvd-llu suut navianaatigaat?

⁸ Pisiniarfiit qarasaasiami pinnguaatinik, videunik dvd-nillu ulikkaarput. Taakkua ilaat immaqa nuannerlutillu qasukkarsimaarnarput, amerligaluttuinnarpulli Biibilimi assuarineqartunik imaqartartut. Qarasaasiami pinnguaatinik pinnguartut ajoqusiinissaat, toqutsinissaat ingasattumilluunniit inuunerluttuliornissaat piumasarineqarpat oqartoqarsinnaanngilluinnarpoq tamakku ajoqutaanngitsut! Jehovap „nakuusernermik nuannarisaqartoq uumigaa“. (Tussiaat 11:5; Ussatit 3:31; Kolossemiut 3:5, 6) Aamma pinnguaat ilinnik pilerissuseqarnerulersitsippat qininganerulersitsippalluunniit, misigissutsikkut qasulersitsippat piffissamilluunniit naleqangaartumik maangaannartitsisitsippat, taava tamatuma anersaakkut ajoqutaanera nassuerutigiuk pisariaqartunillu allannguipallallutit. — Matthæusi 18:8, 9.

Ineriartornartumik aliikkusersornissamik pisariaqartitsineq qanoq matussusersinnaagipput

9, 10. Aliikkusersornissamik pisariaqartitsineq ajunngitsumik matussuserniarlugu qanoq iliortoqarsinnaava?

⁹ Ilaannikkut kristumiut ima aperisarput: „Aliikkusersoriaatsit suut akuerineqarsinnaagamik? Silarsuummi neqeroorutaasa ilarpassui Biibilimi najoqqutassianut akerliupput.“ Qularissanngilat aliikkutassanik ineriartornartunik nassaartoqarsinnaanera, iliuuseqarnissarli pisariaqarpoq. Pilersaarusiorluarnissaq pisariaqarpoq, ingammik angajoqqaat taamaaliornissaat pisariaqarpoq. Inuppassuit ilaquttatik uppeqatitillu qasuernartumik eqqissisimaaqatigisarpaat. Eqqissisimanartunik nuannersunillu avatangiiseqarluni ullormut pisimasut Biibilimulluunniit tunngasut oqaloqatigiissutigiitigalugit nereqatigiinneq nuannerlunilu ineriartornarpoq. Asiaqatigiittoqarsinnaavoq, pisuttuaqatigiilluni, sisorariaqatigiilluni pinnguaatinilluunniit aliikkusersoqatigiilluni. Taamatut ineriartornartumik aliikkusersorneq nuannersupilussuusinnaallunilu ilorrisimaarnarsinnaavoq.

¹⁰ Utoqqaanertaq nulianilu meeqqanik pingasunik perorsaasimasoq ima oqaluttuarpoq: „Meeqqat mikisuullutilli sumi feeriassanersugut aalajangeeqataaffigisarpaat. Ilaannikkut meeqqat tamaasa immikkut ikinngutigilluagaannik ilaserinnitsittarpavut, taamaalillunillu feeriarnerput nuannernerulertarpoq. Meeqqat inuuneranni pisut pingaarutillit malunnartittarpavut. Taamaaliortarpugut soorlu ilaquttavut ikinngutivullu ilagiinneersut uagutsinnut qaaqqullugit. Siaasaaqatigiissitsisarpugut, aliikkusersoqatigiissitsisarluta, arsaalluta  pinnguaatinilluunniit allanik pinnguarluta. Pisuttuarniarluta biilerluta qaqqanukartarpugut periarfissallu taamaattut Jehovap pinngortitarsuanik ilinniarnissamut atortarlugit.“

11, 12. (a) Ilaannikkut aliikkusersoqatigiissitsiniaraangavit allat peqataatinniarlugit qanoq iliorsinnaavit? (b) Katerisimaarnerit qanoq ittut inuppassuit puiunaatsittarpaat?

¹¹ Ilaannikkut aliikkusersoqatigiinnissamut allanik qaaqqusinikkut illit neruttorsinnaavit imaluunniit ilaqutariittut neruttorsinnaavisi? Immaqa qiimmassarneqarnissamik pisariaqartitsisoqarpoq, soorlu uillarneq, aappaqanngitsoq ilaqutariilluunniit ataasiinnarmik pilersuisullit. (Lukasi 14:12-14) Aamma soqutiginnilerlaat ikittunnguit ilanngullugit qaaqqusisinnaavutit, kisianni soorunalimi taakkua allanik ajortumik sunniinnginnissaat mianersuutigisariaqarpoq. (2 Timotheusi 2:20, 21) Napparsimasut innarluutillilluunniit angerlarsimaffitsik qimassinnaanngippassuk immaqa nerisassanik nassarluni pulaarneqarsinnaapput nereqatigalugillu. — Hebræerit 13:1, 2.

¹² Katerisimaarnerit pisariunngitsumik nerisassianik nereqatigiiffiusut, qanoq ililluni Jehovamut nalunaajaasunngorsimanerluni suullu Guutimut aalajaattuarnissamut iluaqutigisimanerlugit oqaluttuaqattaaffiusut inuppassuit puiunaatsittarpaat. Biibilimut tunngasut kikkut tamarmik, aamma meeqqat, oqaloqataaffigisinnaasaat oqaluuserineqarsinnaapput. Tamakkuninnga oqaloqatigiissuteqarnerit kikkunnut tamanut pisuunnguallaataallutillu qiimmassaataasinnaapput, aamma kinaluunniit peqqusiileqilersinneqarnavianngilaq kinaluunniillu imminut ajukkuttutut misigilertariaqarnani.

13. Jiisusi inoroorsaarnermut inoroorsaarfigineqarnermullu tunngatillugu qanoq maligassiuilluarpa?

¹³ Jiisusi inoroorsaarnermut inoroorsaarfigineqarnermullu tunngatillugu maligassiuilluarpoq. Periarfissat taamaattut anersaakkut pilluaqqussutisianik aveqatiginninnissamut atortuaannarpai. (Lukasi 5:27-39; 10:42; 19:1-10; 24:28-32) Ajoqersugaasa siulliit taassuma maligassiaa malippaat. (Apustilit Suliaat 2:46, 47) Apustili Paulusi ima allappoq: „Takorusukkaluaqaassimi ilangiisikkumallusi Anersaap tunissutaanik, nakussatsitaaqqullusi, tassa: ilissi uangalu upperisaqaqatigiinnitsigut ilissinni kajumissaaqatigiissinnaaqqulluta.“ (Romamiut 1:11, 12) Tamatumunnga assingusumik uagut katerisimaarnitsinni tamanut qiimmassaataasinnaasunik anersaakkullu nakussatsissutaasinnaasunik avatangiiseqartariaqarpugut. — Romamiut 12:13; 15:1, 2.

Eqqaasitsissutit mianersoqqussutillu

14. Inuppassuarnik katerisimaartitsinissaq sooq inassutiginartinneqanngila?

¹⁴ Unnersuussutigineqarpoq inuppassuulluni katerisimaartannginnissaq, katerisimaarnerni taamaattuni susoqarneranik nakkutilliinissaq amerlanertigut ajornakusoortarmat. Ilaqutariit ilaat piffissami kristumiutut sammisassaqarfiunngitsumi asiarniarlutik pinnguaammilluunniit unammillerpalaarpallaanngitsumik pinnguarniarlutik aalajangersinnaapput. Utoqqaanertat ilagiinniluunniit kiffartortut ilaat ilaagaangamik sunniuteqarluarniartarsinnaapput taamaalillunilu katerisimaarneq suli annerusumik pisuunnguallaataasinnaavoq.

15. Sooq qaaqqusisup katerisimaarnerup nalaani nakkutilliisoqarnissaa isumagisariaqarpaa?

¹⁵ Katerisimaartitsiniarluni pilersaaraanni eqqaamasariaqarpoq susoqarneranik nakkutilliisoqartariaqarnera. Inoroorsaarnerit nuannarigaluarlugu paasigukku pulaartuit ilaata angerlarsimaffinni pisut mamiasuutigigai tamanna aliasuutigissagaluarpat, ilaa? Najoqqutassaq Mosesimik allakkat tallimaat 22:8-miittoq eqqarsaatigiuk. Israelikkuusoq illuliortoq illup qaavanik toqqissumik, pulaartoqaraanni atorneqartartumik, kaajallallugu ungaluliisussaavoq. Sooq? „Taamaalioruit nakkarluni toqusoqarpat illoqatitit aammut pisuutitaalersissanngilatit.“ Tamatumunnga assingusumik pulaartutit illersortariaqarpatit taakku timikkut anersaakkullu iluaqutissaat eqqarsaatigalugit — ingasattumilli killilersornagit.

16. Katerisimaarnermi imigassallertoqarpat suna mianersuutigineqartariaqarpa?

¹⁶ Katerisimaarnermi imigassaq sassaalliutigineqarpat mianersoqqissaartariaqarpoq. Qaaqqusisut kristumiut ilarpassui imigassallerniarlutik aalajangertarput aatsaat namminneerlutik nakkutigisinnaagunikku pulaartumik qanoq imigassallerfigineqartiginerat qanorlu imigassartortiginerat. Allanik mamiatsatsitsisinnaasut imerpallaarnissamulluunniit ussernartorsiulersitsisinnaasut akuerineqartussaanngillat. (Efesosimiut 5:18, 19) Pulaartut ilaat arlaannik pissuteqarlutik imigassartorniarnatik  aalajangersinnaapput. Nunarpaalunni inuusuttut aalajangersimasumik ukioqalertinnatik imigassartornissaat inerteqqutaavoq, aamma kristumiut kaasarip inatsisai naalassavaat, killilersuineq sualuginaraluarpalluunniit. — Romamiut 13:5.

17. (a) Katerisimaarnermi nipilersortoqassappat qaaqqusisup peqqissaarluni mianersorlunilu nipilersuutinik toqqaanissaa sooq pingaaruteqarpa? (b) Festernermi qitittoqassappat suut pinngitsoorneqartariaqarpat?

¹⁷ Nipilersuutit, qiteriaatsit aliikkusersoriaatsillu allat tamarmik kristumiunut najoqqutassianut naapertuuttuunissaat qaaqqusisup qulakkeertariaqarpaa. Nipilersuutit inuit nuannarisaat assigiinngilluinnartuupput, nipilersuutillu assigiinngitsorparpassuupput. Nipilersuutilli ullumikkornitsat ilarpassui pikitsitsiumatussutsip anersaavanik, kinguaassiuutitigut inuunerlunnermik nakuusernermillu siuarsaapput. Nipilersuutinik peqqissaarluni mianersorlunilu toqqaanissaq pisariaqarpoq. Nipilersuutit akuerineqarsinnaasut sallaatsuusariaqanngillat, kisianni aamma illigussaarerpaluttuusariaqarnatillu kanngutsiallannartuusariaqanngillat, nipilersoriaatsinimi taamaattuni nipitoorujussuarmik nipilersornissaq sakkortuumillu rytmeqarnissaq pingaarnerpaajusarpoq. Nipilersuutip nipituallaanngitsumik nipilersorneqartariaqarneranik suli paasinnilluarsimanngitsumut nipilersuutit isumagisassanngortinnissaat mianersuutigiuk. Qiteriaaseq atisalersoriaatsimut assersuunneqarsinnaavoq. Ileqqorissaarluni torersumik qitittariaqarpoq, peqqusaarnani. Erseqqilluinnassaaq iviangit siffissallu aalatillugit qitinneq kristumiumut naleqqutinngitsoq. — 1 Timotheusi 2:8-10.

18. Angajoqqaat meeqqamik aliikkusersuutiginiagaannik nakkutilliinikkut meeqqatik qanoq illersorsinnaavaat?

¹⁸ Angajoqqaat kristumiut festernerni tamani meeqqamik qaaqqusaaffigisaanni suut pilersaarutigineqarnersut paasiniartariaqarpaat, amerlanertigut silatusaarnerussaaq nammineq ilaanissaq. Ajoraluartumik angajoqqaat ilaasa meeqqatik festernernut nakkutilliisoqanngitsunut festeqataasullu ilaasa kinguaassiuutitigut inuunerlunnissamut arlaatigulluunniit naleqqutinngitsumik pissusilersornissamut napitiffigisaannut ilaatittarsimavaat. (Efesosimiut 6:1-4) Inuusuttuaqqat inersimasunnguleraluarpataluunniit akisussaassuserminnillu pingaartitsillutik ersersereeraluarpassuk, suli ’inuusuttut kajungerisaannik qimarratiginninnissamut’ ikiorneqartariaqarput. — 2 Timotheusi 2:22.

19. Piviusoq suna ’ujaqqaartariaqakkatsinnik’ pingaarnerutitsinissamut iluaqutigisinnaavarput?

¹⁹ Ingasaassinani ineriartornartumik aliikkusersorneq inuunermik nuannaarutiginninnerulersitsisinnaavoq. Jehovap nuannaarnermik erliguutinngilaatigut, nalunngilluinnarparpulli taamatut aliikkusersornerit imminni qilammi erlinnartuutinik katersinissamut iluaqutiginngikkivut. (Matthæusi 6:19-21) Jiisusip ajoqersukkaminut paasitippaa ’Guutip naalagaaffianik iluarneranillu ujaasineq’ inuunermi pingaarnerpaajusoq; inuunermi pingaarnerpaat tassaanngillat ’tamakku Guutimik nalusut ujartagaat’, sunik nerinissaq imaluunniit sumik imernissaq imaluunniit sunik atisaqarnissaq. — Matthæusi 6:31-34.

20. Pilersuisup annerup tunniussassai ajunngitsut suut Jehovamut kiffaasut aalajaatsut qilanaarutigisinnaavaat?

²⁰ Aap, ’nerigutta imeruttaluunniit qanorluunniillu iliorluta taamaaliorsinnaavugut Guutip ataqqinaatissaanik’, Pilersuisuusoq anneq ajunngitsorpassuit nuannaarutigisinnaasavut pillugit qutsavigalugu. (1 Korinthimiut 10:31) Jehovap nunarsuassaani paratiisiusumi qanittukkut piviusunngorumaartumi, inuit taassuma piumasaqaataanik naapertuilluartunik naammassinnittut tamaasa ineriartornartumik peqatigalugit, taassuma tukkortuuneranik tamakkiisumik nuannaarutiginninnissamut periarfissarpassuaqarumaarpoq. — Tussiaat 145:16; Esaja 25:6; 2 Korinthimiut 7:1.

Eqqaamavigit?

• Aliikkutassanik ineriartornartunik nassaarnissaq sooq kristumiunut imaannaanngila?

• Ilaqutariit kristumiut aliikkusersoriaatsit suut nuannaarutigisinnaasimavaat?

• Ineriartornartunik aliikkutaqartilluni eqqaasitsissutit mianersoqqussutillu suut eqqaamaneqartariaqarpat?

[Atuaqqissaarnermi apeqqutit]

[Qupp. 9-mi assiliartaq]

Aliikkutassanik inerititaqarluartunik toqqaasarit

[Qupp. 10-mi assiliartat]

Aliikkusersoriaatsit suut kristumiut akueriumanngilaat?