Eqqunngitsumik upperisarsiorneq peqataaffiginngilluinnaruk!

„’Akornannit anigitsi avissaarlugillu, oqarpoq [Jehova], mingunnartumillu attueqinasi.’“ — 2 KORINTHIMIUT 6:17.

1. Inuit eqqortuliorusuttorpassuit suut assut paaseruppaat?

INUIT eqqortuliorusuttorpassuit Guuti pillugu inuiaallu siunissaat pillugu sallusuissut naluaat. Upperisarsiornermut tunngatillugu apeqqutit isumakuluutigisatik akineqarsimanngimmata inuunerminni paatsiveerusimaarlutillu nalornipput. Inuit millionilikkuutaat upperisapalaanut, ileqqulersuutinut nalliuttunullu Pinngortitsisumut nikanarsaataasunut inussiaataapput. Sanilivit eqqarlivilluunniit ilaasa immaqa anniarfik ikualasoq, Guuti ataasiullunilu pingasuusoq, tarnip toqusuitsuunera ajoqersuutilluunniit eqqunngitsut allat upperaat.

2. Upperisarsiornikkut siuttut qanoq iliorsimappat, qanorlu kinguneqartumik?

² Sooruna anersaakkut taama taarsiortoqartigisoq? Tupaallannaraluartumik upperisarsiorneq pissutaavoq — erseqqinnerusumik oqaatigalugu upperisarsiornikkut peqatigiiffiit tamakkunanilu siuttuusut Guutip eqqarsaataanut akerliusumik ajoqersuisartut. (Markusi 7:7, 8) Tamatuma kingunerisaanik inuppassuit salloqittarneqarlutik isumaqarput Guuti ilumoortoq pallorfigalugu, eqqortumilli oqaatigissagaanni taanna nikanarsarpaat. Pissutsit alianartut tamakkua eqqunngitsumik upperisarsiornermik pissuteqavipput.

3. Kina eqqunngitsumik upperisarsiornermik pilersitsisuua, taannalu Biibilimi qanoq allaatigineqarpa?

³ Pinngortitaq takussaanngitsoq kinaassusilik eqqunngitsumik upperisarsiornermik pilersitsisuuvoq. Taanna pillugu apustili Paulusi ima allappoq: „Pissutsit aaqqissuussaanerata matuma guutiata uppinngitsut isumaat tappiillisippai, Missiarsi, tassa Guutip assinga, pillugu tusagassap nuanningaartup qaamangaarnera qaamaqqunagu.“ (2 Korinthimiut 4:4, NV) ’Pissutsit aaqqissuussaanerata matuma guutia’ tassaavoq Saatani Diaavulu nammineq. Taanna eqqunngitsumik upperisarsiornermik pilersitsisuuvoq, sapinngisaminillu iliuuseqartarpoq tamanna siuarsarniarlugu. Paulusi ima allappoq: „Allaat Saatani nammineq qaamasumut inngiliunerarpoq. Taamaattumik eqqumiigisassaanngilaq taassuma kiffarisaattaaq kiffatut iluartutut pissuseqartuusaartarmata.“ (2 Korinthimiut 11:14, 15) Saatanip ajortut ajunngitsutut isikkoqalersittarpai inuillu salloqittartarlugit salluliuutini upperilerniassammatigit.

4. Guutip itsaq Israelikkunnut inatsisaani pruffiitioqqusersut pillugit qanoq allassimasoqarpa?

⁴ Taamaattumik tupinnanngilaq eqqunngitsumik upperisarsiorneq Biibilimi sakkortuumik assuarineqarmat. Assersuutigalugu Mosesip inatsisaani Guutip toqqakkamisut innuttai pruffiitioqqusersunut toqqaannartumik mianersoqquneqarput. Ajoqersuutinik eqqunngitsunik siuarsaasoq guutipilussiornermillu tapersersuisoq kinaluunniit ’toqunneqassaaq tunussisitsiniarami Jehovamit’. Israelikkut ima peqquneqarput: „Ajortoq akornassinnit piiassavat.“ (5 Mosesi 13:2-6) Aap, Jehovap eqqunngitsumik upperisarsiorneq ajortutut isigaa. — Ezekieli 13:3.

5. Ullumikkut mianersoqqussutit suut eqqumaffigisariaqarpavut?

⁵ Jiisusi Kristusi taassumalu apustilii eqqunngitsumik upperisarsiornermut Jehovatut aalajangersimalluinnartumik isiginnittaaseqarput. Jiisusip ajoqersukkani ima mianersoqquai: „Pruffiitioqqusersunut mianersoritsi; taakkua savatut atisaqarlutik ornittarpaasi, ilumikkulli amaruupput kiisortut.“ (Matthæusi 7:15; Markusi 13:22, 23) Paulusi ima allappoq: „Guutip kamannera qilammit saqqummersitaasarpoq inuit soqqusaassusiinut iluaassusiinullu tamanut sallusuissut . . . saqqummitsaaligaangassuk.“  (Romamiut 1:18) Taamaattumik pingaaruteqartorujussuuvoq kristumiut ilumoortut mianersoqqussutinik tamakkuninnga eqqumaffiginninnissaat ajoqersuutinillu eqqunngitsunik ilinniartitsissutiginnittunik aamma inuit allat sallusuissummik Guutip oqaasianeersumik ilinniarnissaannik akornusiisunik tamanik ingalassimanninnissaat. — 1 Johannesi 4:1.

„Babylonersuaq“ qimarratigiuk

6. „Babylonersuaq“ Biibilimi qanoq allaatigineqarpa?

⁶ Malugiuk Saqqummersitani eqqunngitsumik upperisarsiorneq qanoq allaatigineqarnersoq. Eqqunngitsumik upperisarsiorneq atortittartutut aalakoortutut naalagaaffippassuarnut taakkualu innuttaannut pissaaneqartutut allaatigineqarpoq. Arnap assersuutaasup taassuma kunngerpassuit kinguaassiuutitigut inuunerloqatigisarpai Guutillu kiffaasa ilumoortut aavannit aalakkoorluni. (Saqqummersitat 17:1, 2, 6, 18) Qaavani allassimavoq ateq minguttumik maajunnartumillu ileqqoqarneranut naleqqulluartuusoq. Ateq imaappoq: „Babylonersuaq, arnat atortittartut nunarsuullu maajunnartuisa anaanaat.“ — Saqqummersitat 17:5.

7, 8. Eqqunngitsumik upperisarsiorneq qanoq ililluni atortittartutut iliuuseqarsimava, qanorlu kinguneqartumik?

⁷ Biibilimi Babylonersuup allaatigineqarnera silarsuarmi upperisarsiornernut eqqunngitsunut tamanut naleqquppoq. Upperisarsiornerit tusindilippassuit taakku pisortatigoortumik silarsuaq tamakkerlugu peqatigiiffittut oqaatigineqanngikkaluarlutik, siunertamikkut iliuutsimikkullu ataasiussuseqarluinnarput. Soorlu Saqqummersitani arnap kinguaassiuutitigut inuunerluttup allaatigineqarnerani ersertoq, eqqunngitsumik upperisarsiornerit silarsuarmi naalakkersuisunut sunniuteqartorujussuupput. Arnatut katinnermi neriorsuutiminik eqqortitsinngitsutut, eqqunngitsumik upperisarsiorneq naalakkersuisunik attaveqarfiginnittaqattaarnermigut atortippoq. Ajoqersugaq Jaaku ima allappoq: „Allasiortuususi, nalugassiuk silarsuarmut ikinngutaaneq tassaasoq Guutimik akerartuineq? Silarsuarmut ikinngutaajumasoq Guutimut akeranngortarpoq.“ — Jaaku 4:4.

⁸ Eqqunngitsumik upperisarsiornermik silarsuarmilu naalakkersuisunik akuleriissitsineq tamanna inuppassuarnut naalliunnartunik kinguneqarsimavoq. Ph.d Xolela Mangcu, Afrikami politikkimik misissueqqissaartartoq ima maluginiagaqarsimavoq: „Inuiaat oqaluttuarisaaneranni upperisarsiornermik politikkimillu akuleriissitsineq pissutigalugu toqoraanersuit pisarsimapput.“ Ungasinngitsukkut aviisit ilaanni ima allassimavoq: „Ullumikkut akerleriinnerit aassunninnersaat navianarnersaallu . . . upperisarsiornermut attuumassuteqartarput.“ Inuit millionilikkuutaat akerleriinnerni upperisarsioqatigiinnit tapersersorneqartuni toqunneqarsimapput. Babylonersuaq allaat Guutip kiffaanik ilumoortunik malersuisarsimallunilu toqutsisarsimavoq, aap, aavannit aalakoorporlusooq. — Saqqummersitat 18:24.

9. Jehovap eqqunngitsumik upperisarsiornermik uumiginninnera Saqqummersitani qanoq ersersinneqarpa?

⁹ Jehovap eqqunngitsumik upperisarsiorneq uumigaa. Tamanna Babylonersuup qanoq pineqarnissaanik siulittuummi erseqqippoq. Saqqummersitat 17:16-imi ima allassimavoq: „Nassuit qulit takusavit nersutillu arnaq atortittartoq taanna  uumissulissavaat suerullugulu tamataarutitillugulu neqaalu nerillugu ikuallallugulu.“ Siullermik nersummit nujuartamit angisuumit toqussutaasumik aqqunartiterneqassaaq nerineqarlunilu. Taava timaata sinnikorisinnaasai nunguillugit ikuallanneqassapput. Tamatumunnga assingusumik silarsuarmi naalakkersuisut qanittukkut eqqunngitsumik upperisarsiorneq akuliuffigissavaat. Guutip taama iliuuseqartissavai. (Saqqummersitat 17:17) Babylonersuaq, eqqunngitsumik upperisarsiornerup silarsuarmi tamarmi naalagaaffissua, suujunnaarsitaasussaavoq. ’Kingorna nanineqassanngilaq.’ — Saqqummersitat 18:21, 1900/1961.

10. Eqqunngitsumik upperisarsiornermut tunngatillugu qanoq iliortariaqarpugut?

¹⁰ Kristumiut ilumoortut Babylonersuarmut tunngatillugu qanoq iliortariaqarpat? Biibilimi erseqqissumik ima peqquneqarpugut: „Qimallugu anigitsi, innuttakka, ajortuliornerini peqataaqqunasi perluutaanillu eqqorneqaqqunasi.“ (Saqqummersitat 18:4) Aniguiumasut kingusinaartinnatik eqqunngitsumik upperisarsiorneq qimattariaqarpaat. Nunamiikkallarami Jiisusip siulittuutigaa ullussani kingullerni inuppassuit imminik malinnittuunerassasut. (Matthæusi 24:3-5) Inuit taamaattut ima oqarfigai: „Ilisarisimanngisaannarpassi. Nigorsinga, ilissi inatsisinik unioqqutitsisuususi!“ (Matthæusi 7:23) Jiisusi Kristusi, maanna kunngitut ivertinneqareersoq, eqqunngitsumik upperisarsiornermut attuumassuteqanngilluinnarpoq.

Qanoq eqqunngitsumik upperisarsiornermut peqataanngilluinnartoqarsinnaava?

11. Eqqunngitsumik upperisarsiorneq peqataaffiginngilluinnarumallugu qanoq iliortariaqarpugut?

¹¹ Kristumiut ilumoortut upperisarsiornikkut ajoqersuutinik eqqunngitsunik itigartitsinermikkut eqqunngitsumik upperisarsiorneq peqataaffiginngilluinnarsinnaavaat. Taamaattumik upperisarsiornermut tunngatillugu radiokkut tv-kkulluunniit aallakaatitat atuagassiallu Guuti taassumalu oqaasia pillugit salluliuutinik imallit ingalassimasarpavut. (Tussiaat 119:37) Aamma silatusaassaagut peqatigiiffiit eqqunngitsumik upperisarsiornermut attuumassuteqartut aaqqissugaat sunngiffimmilu sammisassarititaat peqataaffiginngikkutsigik. Eqqunngitsumik pallorfiginninneq tapersersorumanngilluinnarparput. (1 Korinthimiut 10:21) Tamakkuninnga sammisaqarnaveersaarneq illersuutigissavarput napitinneqannginnissatsinnut „ilisimaqqissaarniutinik salloqittaatinillu piunngitsunik, taakku tunngaveqarmata inuit kingornussassiissutaannik silarsuullu pissaanerinik, Kristusimit pisuunngitsunik“. — Kolossemiut 2:8.

12. Qanoq ililluni eqqunngitsumik upperisarsioqatigiinnut attaveqarunnaarluinnartoqarsinnaava?

¹² Upperisarsioqatigiinnut ilaasortatut nalunaarsorneqarsimasoq Jehovamut nalunaajaasunngorumaguni qanoq iliortariaqarpa? Amerlanertigut naammattarpoq inuup taassuma allaganngorlugu upperisarsioqatigiinnut ilaasortaaffigisaminut  ilaasortaajunnaarumanerminik nalunaaruteqarnera, eqqunngitsumik upperisarsiornermut ilaasortatut isigineqarunnaarumanini ersersillugu. Qanorluunniit pisoqaraluarpat pingaaruteqarpoq taassuma eqqunngitsumik pallorfiginninnermit anersaakkut qanorluunniit ittumik mingutsinneqarnaveersaarluinnarniarluni aalajangersimalluinnarluni iliuuseqarnissaa. Jehovamut nalunaajaasunngorumasup tamatumunnga tunngatillugu iliuutsimini upperisarsioqatigiinnut ilaasortaaffigisimasaminut eqqaamiuminullu erseqqissartariaqarpaa ilaasortaajunnaarluni.

13. Biibilimi siunnersuummi sorlermi erserpa eqqunngitsumik upperisarsiornermut peqataanngilluinnarnissaq pisariaqartoq?

¹³ Paulusi ima allappoq: „Uppinngitsut qamutinik uniaqatiginiaqinasigik! Iluarnerummi inatsisaanneq sukkut peqatiginerpaa? Qaamasoq taartorlu sukkut assigiissuteqarpat? Qanoq ilillutik Kristusi Beliarilu naligiissinnaappat, imaluunniit qanoq ililluni uppertup uppinngitsoq agguaqatigisinnaavaa? Guutip naalaffia guutipiluillu qanoq ataqatigiissinnaappat? . . . Taamaattumik: ’Akornannit anigitsi avissaarlugillu, oqarpoq [Jehova], mingunnartumillu attueqinasi.’“ (2 Korinthimiut 6:14-17) Oqaatsit taakku eqqumaffigaavut eqqunngitsumik upperisarsiornermut peqataanngilluinnarnitsigut. Paulusip siunnersuutaa taanna maleruassagutsigu, aamma eqqunngitsumik upperisarsiortut attaveqarfiginaveersaassavavut?

’Silatusaartarit’

14. Eqqunngitsumik upperisarsiortut attaveqarfiginngilluinnarnissaat pisariaqarpa? Nassuiaruk.

¹⁴ Guutip kiffaasa inuit eqqunngitsumik upperisarsiortut attaveqarfiginaveersaartariaqarpaat? Allamik upperisallit qanillinaveersaarluinnartariaqarpavut? Naamerluinnaq. Inatsisit annerusut marluusut aappaat imaappoq: „Tullit ilittut asassavat.“ (Matthæusi 22:39) Inoqativut Guutip naalagaaffia pillugu nutaarsiassamik nuannersumik oqaluttuukkaangatsigik ersersittarparput asallutigik. Aamma Biibilimik atuaqqissaaqatigigaangatsigik paasitikkaangatsigillu eqqunngitsumik upperisarsiornermut peqataanngilluinnartariaqartut, tamanna asanninnermut ersiutaavoq.

15. ’Silarsuarmut ilaannginnerput’ qanoq paasisariaqarpa?

¹⁵ Nutaarsiassaq nuannersoq inoqatitsinnut oqaluussissutigigaluarlutigu, Jiisusimut ajoqersugaagatta ’silarsuarmut ilaanngilagut’. (Johannesi 15:19, NV) Oqaaseq ’silarsuaq’ matumani isumaqarpoq innuttaaqatigiit Guutimit avissaarsimasut. (Efesosimiut 4:17-19; 1 Johannesi 5:19) Silarsuarmit avissaaqqajuarniarpugut ima paasillugu Jehovamut nikanarsaataasunik isumaqarnaveersaartugut, oqaloriaaseqarnaveersaartugut pissusilersornaveersaartugullu. (1 Johannesi 2:15-17) Aamma kristumiunut najoqqutassianik maleruaanngitsut qanittumik ikinngutiginaveersaarpavut najoqqutassiamut matumunnga naapertuuttumik iliorluta: „Ikinngutipalaaqarneq ileqqorikkaluartunut aseruutissiisarpoq.“ (1 Korinthimiut 15:33) Silarsuarmut ilaannginneq tassaavoq ’silarsuarmit mingutsinneqatsaaliuarneq’. (Jaaku 1:27) Taamaattumik silarsuarmit avissaaqqajuarniarnerput ima paasisariaqanngilaq inuit allat qanillinaveersaarivut. — Johannesi 17:15, 16; 1 Korinthimiut 5:9, 10.

16, 17. Kristumiut inuit sallusuissutinik Biibilimeersunik ilisimasaqanngitsut qanoq pissuseqarfigisussaavaat?

¹⁶ Sallusuissutinimmi Biibilimeersunik ilisimasaqanngitsut qanoq pisussaavavut? Paulusip ilagiit Kolossemiittut ima allaffigai: „Ilaginngisassi peqatigisarnerini silatusaartaritsi piffissaqqissorlu atortarsiuk. Tamatigut oqaluttassaasi inussiarnersumik tarajulimmillu, ilisimaqqullugu kikkut tamaasa qanoq akisariaqartassagisi.“ (Kolossemiut 4:5, 6) Apustili Petrusi ima allappoq: ’Naalagaq Kristusi uummatissinni illernartissiuk, piareersimajuaritsilu neriuutigisaq ilissinniittoq pillugu isumarsi illersorsinnaaqqullugu nassuiaaqqusisumut kimulluunniit. Taamaaliortassaasili qanilaarlusi mianerinnittuullusilu [saamallusi ataqqinnilluinnarlusilu, NV].’ (1 Petrusi 3:15, 16) Paulusip  kristumiut siunnersorpai „inoqatiminnut mitallersooqqunagit saqitsaassiumatooqqunagillu, saamasooqqullugilli inoqatitillu tamaasa qanilaartumik pissuseqarfigeqqullugit“. — Titusi 3:2.

¹⁷ Jehovamut nalunaajaasuugatta allat sorraaffigerusunngilavut anneruniarfigerusunnagilluunniit. Aamma inuit upperisarsioqatigiinnut allanut ilaasut nikassaarpaluttumik oqaluuserineq ajorpavut. Periaaserittarpugulli, aamma pulaagarput, sanilerput suleqaterpulluunniit inussiarniikkaluaraangat imaluunniit akerartuigaluaraangat. — Kolossemiut 4:6; 2 Timotheusi 2:24.

’Oqaatsinut peqqissinartunut najoqqutassiaq aalajangiusimajuk’

18. Eqqunngitsumik upperisarsiornermut utertut anersaakkut qanoq alianartunik atugaqarpat?

¹⁸ Inuit ilaat sallusuissut Biibilimeersoq ilikkareerlugu eqqunngitsumik upperisarsiornermut utertuuppata qanoq alianartigissagaluarpa! Taamaaliornerup kingunipilui Biibilimi ima allaatigineqarput: „Inuimmi Naalakkatsinnik annaassisitsinnillu Jiisusi-Kristusimik ilisarsinikkut silarsuup mingunnartuinut atajunnaarsimasut napititaaqqikkunik ajugaaffigineqarlutillu, taava kingulleq siullermernit taakkununnga ajornerussaaq. . . . Taakkununnga eqquuppoq ussat torrallataq imaattoq: ’Qimmeq meriaaminut utertarpoq.’ Aamma una: ’Puuluki ipiiarneqareerluni kingumut marullummi niuutileraraaq.’“ — 2 Petrusi 2:20-22.

19. Sooq anersaakkut peqqissutsitsinnik navianartorsiortitsisinnaasut tamaasa eqqumaffigiuarnissaat taama pingaaruteqartigaa?

¹⁹ Anersaakkut peqqissutsitsinnut navianartorsiortitsisinnaasut tamaasa eqqumaffigisariaqarpavut. Taamaaliunngikkuttami anersaakkut ittunik pingaartitsiunnaarsinnaavugut. Paulusi ima mianersoqqusivoq: „Anersaaq nassuitsumik oqarpoq ullussani kingullerni inuit ilaat uppernermik tunussiumaartut, tassa naalakkamikkit anersaat tammartitsisut anersaapiluillu ajoqersuutaat.“ (1 Timotheusi 4:1) „Ullussani kingullerni“ taakkunani inuuvugut, eqqunngitsumillu upperisarsiornermut peqataanaveersaanngitsut ’tamanut tamaanga nassataritittarsinnaapput malinnit ajoqersuutit suulluunniit anoraannit inuillu immeraammik nalussinerannit, taakkua peqqusersusaarlutik aqqutissaanngitsunut tammarnartunut ingerlakkaangatik’. — Efesosimiut 4:13, 14.

20. Eqqunngitsumik upperisarsiornerup sunniutipiluinut imminut qanoq illersorsinnaavugut?

²⁰ Eqqunngitsumik upperisarsiornerup sunniutipiluinut imminut qanoq illersorsinnaavugut? Jehovap uagut pilluta pilersitai tamaasa eqqarsaatigikkit. Guutip oqaasia, Biibili, pigaarput. (2 Timotheusi 3:16, 17) Aamma Jehova „kiffaq ilumoortoq silatoorlu“ aqqutigalugu anersaakkut inuussutissanik naammangaartunik pilersuisimavoq. (Matthæusi 24:45) Sallusuissummi siumukariartortilluta ’nerisassat tamuasarissat inersimasunngorluarsimasunit nerineqartussaasut’ mamarinerulertariaqannginnerpavut, kristumiullu ataatsimiinnerinut, sallusuissutit Biibilimeersut pillugit ilinniarfigisartakkatsinnut, najuunnissaq kajumiginerulertariaqannginnerparput? (Hebræerit 5:13, 14; Tussiaat 26:8) Aalajangiusimaniartigu Jehovap uagut pilluta pilersitaanik iluaqutiginnilluarnissarput, „oqaatsinut peqqissinartunut najoqqutassiaq“ tusagarput aalajangiusimasinnaaniassagatsigu. (2 Timotheusi 1:13, NV) Taamaaliorutta eqqunngitsumik upperisarsiornermut peqataanngilluinnarsinnaavugut. (wE 3/15 06)

Suna ilikkarpiuk?

• „Babylonersuaq“ suua?

• Eqqunngitsumik upperisarsiornermut peqataanngilluinnarumalluta qanoq iliortariaqarpugut?

• Navianartut Guutimut attaveqarnitsinnik ajoqusiisinnaasut suut nigorsimasariaqarpavut?

[Atuaqqissaarnermi apeqqutit]

[Qupp. 28-mi assiliartaq]

Nalunngiliuk sooq „Babylonersuaq“ arnatut kinguaassiuutitigut inuunerluttutut oqaatigineqartoq?

[Qupp. 29-mi assiliartaq]

„Babylonersuaq“ suujunnaarsitaasussaavoq

[Qupp. 31-mi assiliartaq]

Allamik upperisallit ’saamasumik ataqqinnilluinnartumillu’ pisarpavut