„Parnaarussat iperagaanissaat“ oqaluussissutigisiuk

KIFFARTORNERMI aallaqqaataani Jiisusip oqaatigaa „parnaarussat iperagaanissaat“ oqaluussissutiginiarlugu. (Lukasi 4:18) Kristumiut ilumoortut Naalakkamik maligassiuinera malippaat Guutip naalagaaffia pillugu nutaarsiassaq nuannersoq ’inunnut tamalaanut’ oqaluussissutigalugu, taakkua anersaakkut parnaarussaaqqanerminnit aniguiniassammata inuunerminnillu pitsaanerulersitsiarnerminni ikiorneqarniassammata. — 1 Timotheusi 2:4, NV.

Ullumikkut tamatumunnga ilaavoq parnaarussavinnut pinerIussimanertik pissutigalugu parnaarussaaqqasunut, anersaakkulli aniguisinneqarnermik qujamasuutiginnittunut, oqaluussineq. Allaaserisami qiimmaallannartumi matumani Jehovap Nalunaajaasuisa Ukrainemi Europamilu sumiiffinni allani parnaarussivinni oqaluussisarnerat pillugu atuarsinnaavutit.

Ikiaroornartumik atornerluisooreersimallutik kristumiunngortut

Serhii * 38-nik ukioqarpoq ukiunilu 20-ni parnaarussaaqqasimalluni. Allaat atuarnini parnaarussivimmi naammassisimavaa. Taanna ima oqarpoq: „Ukiorpassuit matuma siorna toqutsinera pillugu parnaarussaavunga, sulilu ukiualuit parnaarussaaqqasussaavunga. Taamanikkut parnaarussivimmi qunusiarinnittarpunga parnaarussallu allat qunugaannga.“ Taamaalioraangami naqisimaneqanngitsutut misigisarpa? Naamik. Serhii ukiorpassuarni ikiaroortarlunilu imigassartorpallaartarpoq, tupamullu inussiaataalluni.

Taavali parnaarussaqatiminit sallusuissut Biibilimeersoq pillugu oqaluttuunneqarpoq. Soorlumi taarsuarmi qaamarnup qinngornera takullugu. Qaammatialuit ingerlaneranni pinngitsoorsinnaanngisani taamaatippai, nutaarsiassarlu nuannersoq oqaluussissutigisalerpaa kuisillunilu. Maanna Serhii parnaarussivimmi piffissaq tamaat Jehovamut kiffartortutut ulapaarluni inuuvoq. Pinerluttut arfineq-marluk inooriaatsiminnik allannguiniarneranni anersaakkullu imminut qatanngutinngorniarneranni ikiorpai. Taakkua ilaat arfinillit maanna iperagaareerput, Serhiili nammineq suli parnaarussaaqqavoq. Narrutsassimanngilaq, nuannaarutigaali inoqatini anersaakkut parnaarussaaqqanermit aniguisinneqarnissaannik ikiorsinnaagamigit. — Apustilit Suliaat 20:35.

Serhiip parnaarussivimmi atuaqatigisartagaasa ilaat tassaavoq Victor, ikiaroornartuerniartarsimallunilu ikiaroornartumik atornerluisuusimasoq. Victor iperagaanermi kingorna anersaakkut siumukartuarpoq  kingusinnerusukkullu Ukrainemi Kiffartortut Toqqakkat Atuarfianni atualerluni. Maanna Moldovami specialpioneriuvoq. Victor ima oqaluttuarpoq: „Arfineq-pingasunik ukioqarlunga pujortartalerpunga, aqqaneq-marlunnik ukioqarlunga imigassamik atornerluisuuvunga 14-inillu ukioqarlunga ikiaroortarlunga. Inooriaasera allanngorterusukkaluarpara, allanngueriaraluarnikkali tamarmik iluatsittanngillat. Taava 1995-imi nuliaralu ikinngutipalaakka qimallugit nuunniarluta aalajangerniariartugut nuliara toqutsisartumit silanngajaartumit kapoorneqarluni toqutaavoq. Inuunera nakkaalluinnarpoq. ’Nuliara maannakkut sumiippa? Inuk toqugaangat qanoq pisoqartarpa?’ Apersortuarpunga, akissutissarsisinnaanangali. Maqaasivallaarunnaarniarlunga ikiaroorneruleraluttuinnarpunga. Ikiaroornartuerniarnera pillugu tigusaavunga ukiunilu tallimani parnaarussivimmiittussatut eqqartuunneqarlunga. Parnaarussivimmi apeqqutima akissutissarsiniarneranni Serhiip ikiorpaanga. Arlaleriarlunga ikiaroortarunnaarniarsarisimagaluarpunga, maannali Biibili iluaqutigalugu iluatsippara. Guutip oqaasia sunniinertoqaaq!“ — Hebræerit 4:12.

Pinerluttut soqutigittaatsut allanngorput

Vasyl ikiaroorsimanngisaannarpoq, kisianni parnaarussaaqqasutullusooq issimavoq. Ima oqaluttuarpoq: „Kickboxerneq tiguartisimaffigaara. Imminut ilinniartippunga allanik takuneqarsinnaanngitsumik ajoquserlugit nakuuserfiginninnissamut.“ Vasylip inuit nakuuserluni tilliffigisarpai. „Pingasoriarlunga parnaarussaavunga, tamatumalu kingunerisaanik nuliama qimappaanga. Kingullermik ukiut tallimat parnaarussaaqqaninni Jehovap Nalunaajaasuisa atuagaataat atuagassiaataallu atuartalerpakka. Tamanna Biibilimik misissuerusulissutigaara, timersuulli nuannarinerpaasara — kickboxerneq — suli aalluppara.

Qaammatini arfinilinni Biibilimik atuartareerlunga allanngoriartulerpunga. Unamminermi ajugaaneq siornatigutut nuannaarutigitigiunnaarpara. Esaja 2:4 iluaqutigalugu inuunera misissoqqissaalerpara paasillugulu eqqarsartaasera allanngortinngikkukku inuunerma sinnera parnaarussivimmiissallunga. Taamaammat unamminermut atortukka tamaasa igippakka inuttullu imminut suliarilerlunga. Tamanna imaannaanngilaq, qinunerli eqqarsaatiginnilluarnerlu iluaqutigalugit ileqqupalaakka ileqqoriunnaariartuaarpakka. Ilaannikkut qianngarma Jehova qinnuigisarpara ueqqivigisannit aniguinissamut nakussatseqqullunga. Naggataatigut aniguivunga.

Parnaarussivimmit iperagaanerma kingorna ilaquttakka najoqqilerpakka. Maannakkut aamarsuarsiorfimmi sulivunga. Tamanna pissutigalugu nuliama oqaluusseqatiginissaanut ilagiinnilu akisussaaffimma isumaginissaannut piffissaqalerpunga.“

 Mykolap ikinngutaasalu Ukrainemi aningaaseriviit arlallit ujajaaffigaat. Tamatuma kingunerisaanik Mykola ukiuni qulini parnaarusimaneqartussanngortinneqarpoq. Parnaarussaannginnermini ataasiaannarluni oqaluffimmiissimavoq — tassani ujajaanissamut piareersaatitut. Ujajaaneq iluatsinngitsoorpoq. Mykolali naalagiarami isumaqalerpoq Biibili oqaluttuanik pikkunaatsunik ulikkaartoq naneruutit, nalliuttut palasillu upperluarniartut pillugit. Taanna ima oqarpoq: „Biibili atuartalerpara, naluarali suna pissutiginerlugu. Takorluukkannit allaanerulluinnarpoq!“ Biibilimik atuaqqissaaqatigineqarumavoq 1999-imilu kuisilluni. Ullumikkut Mykola takugaanni ilagiinni kiffartortup maniguuttup taassuma sakkulisarluni aningaaserivinnik ujajaasartuusimanera takorlooruminaappoq.

Vladimir toqumut eqqartuussaavoq. Eqqartuussutip naammassineqarnissaa utaqqitillugu Guutimut qinuvoq neriorsorlugulu kiffartorfiginiarlugu asattuunneqaruni. Piffissap ingerlanerani inatsisit allanngortinneqarput toqumullu pillagassanngortinneqarnera allanngortinneqarpoq inuuneq naallugu parnaarusimaneqartussanngorlugu. Vladimirip neriorsuutini eqqortinniarlugu upperisaq ilumoortoq ujalerpaa. Allakkatigut kursuserpoq adventisiortullu oqaluffiannit allagartamik nersornaatisilluni, nalerisimaalernanili.

Taavali Vladimir atuagassiat Napasuliaq Alapernaarsuiffik Vågn op!-ilu parnaarussiviup atuakkanik atorniartarfiani atuareerlugit Jehovap Nalunaajaasuisa Ukrainemi immikkoortortaqarfiannut allappoq pulaarneqarumalluni. Qatanngutit illoqarfimmi tassaniittut pulaarmanni imminut Jehovap Nalunaajaasuisa ilaattut isigilereerpoq parnaarussivimmilu oqaluussilluni. Guutip naalagaaffianik oqaluussissutiginnittutut piukkunnarsarnissamut ikiorneqarpoq. Allaaserisap matuma allanneqarnerata nalaani Vladimirip parnaarussallu allat arfineq-marluk kuisinnissartik utaqqivaat. Vladimirili parnaarussivimmilu ineqatai tamarmik upperisaqaqatigiikkamik akornutissaqarput. Inuuneq naallugu parnaarussassanngortitaasimasut inuuneq naallugu parnaarussassanngortitaasimasunik allanik immissut upperisalinnik ineqateqarput. Taavami kikkut oqaluussiffigissagamikkit? Parnaarussanik paarsisunut aamma allakkatigut nutaarsiassaq nuannersoq oqaluussissutigisarpaat.

Nazar Ukrainemiit Tjekkiamut nuuppoq, tassanilu piiaasunut ilanngulluni. Tamatuma kingunerisaanik ukiut pingasut affarlu parnaarussaavoq. Parnaarussivimmiitilluni Jehovap Nalunaajaasui illoqarfimmit Karlovy Varymiit oqaluussiartorlutik takkukkaangata soqutiginnilluni tusarnaartarpai. Sallusuissut ilinniarpaa inunnullu akuulluinnalerluni. Parnaarussanik paarsisut ilaata allanngornera maluginiarpaa Nazarillu parnaarussivimmi ineqataasa ilaat ima oqarfigalugu: „Tamassi Ukrainemiutut taassumatut ikkumasuugussi allamik suliffittaarsinnaassagaluarpunga.“ Alla ima oqarpoq: „Jehovap Nalunaajaasuisa taakku qanorpiaq iliussanerlutik nalunngilaat. Pinerluttoq parnaarunneqaruni, tatiginartuulluni parnaarussivimmit anisaraaq.“ Maanna Nazar angerlareerpoq. Sanasutut sulineq ilinniarsimavaa nuliarsimallunilu, aamma nulianilu piffissaq tamaat kiffartortuupput. Jehovap Nalunaajaasuisa parnaarussivimmut pulaartarsimanerat assut qujamasuutigaa.

Avataanit nersugaaneq

Parnaarussaannaanngitsut Jehovap Nalunaajaasuisa parnaarussivinni iliuuserisartagaat qujamasuutigaat. Miroslaw Kowalski, Polenimi parnaarussiviit ilaat sinnerlugu oqaaseqartartoq, ima oqarpoq: „Pulaartarnerat pingaarteqaarput. Parnaarussat ilaat atugarliortarsimapput. Inuttut pineqanngisaannarsimagunarput. . . . [Jehovap Nalunaajaasuinit] ikiorneqartarnerput naleqangaarpoq, parnaarussat ikiornissaannut sulisuvut ilinniartitsisuvullu ikippallaarmata.“

Polenimi parnaarussivimmi allami parnaarussivimmi inspektøri immikkoortortaqarfimmut allappoq Jehovap Nalunaajaasui qinnuigalugit parnaarussivimmi suliniuteqarneruleqqullugit. Sooq? Ima nassuiaavoq: „Napasuliaq Alapernaarsuiffimmut sinniisut parnaarussivimmut pulaakulanerusuuppata parnaarussat innuttaaqatigiissutsikkut pissuserisariaqakkanik kissaatiginartunik ineriartortitsinissamut aamma qiningavallaarunnaarnissamut iluaqutigissagaluarpaat.“

Parnaarussaq isumatsaqqasoq imminoriaraluarsimasoq, Jehovalli Nalunaajaasuinit ikiorneqarsimasoq Ukrainemi aviisimi allaaserineqarpoq. Allaaserisami ima allassimavoq: „Maanna angut taanna misigissutsimigut pitsanngoriartorpoq. Parnaarussanit ulluinnarni suliarineqartartut suliarisarpai parnaarussanullu allanut maligassiuilluni.“

Parnaarussiviup avataani angusaqarluarneq

Jehovap Nalunaajaasuisa sulinerat parnaarussivimmiinnaanngitsoq sunniuteqarluartarpoq. Aamma  parnaarussat iperagaareeraangamik tamanna iluaqutigisarpaat. Jehovap Nalunaajaasuisa ilaat marluk, Brigitte Renatelu, siornatigut parnaarussaasimasunik ukiorpaalunni ikiuisarsimapput. Tyskit aviisianni Main-Echo Aschaffenburg-imi taakkua ima oqaluttuarineqarput: „Siornatigut parnaarussaasimasut iperagaanerisa kingorna qaammatit pingasut tallimalluunniit isumagisarpaat inuunerullu siunertaanik paasiniaanissamut kajumissaartarlugit. . . . Namminneq kajumissutsiminnik nakkutilliisutut pisortatigoortumik akuerisaapput. . . . Aamma parnaarussivimmi sulisut suleqatigilluartupilussuuaat.“ Taamatut ikiuinerup kingunerisaanik siornatigut parnaarussaasimasut arlallit Jehovamut tunniulluinnarsimapput.

Aammattaaq parnaarussivimmi sulisut Jehovap Nalunaajaasuisa Biibilimik ilinniartitsissutiginninnerat iluaqutigaat. Assersuutigalugu Roman sakkutooqarfimmi majooriusimallunilu Ukrainemi parnaarussivimmi psykologiusimavoq. Jehovap Nalunaajaasuinit pulaarneqarami Biibilimik atuaqqissaarnissamut akuersivoq. Ilaanni paasilerpaa Nalunaajaasut suliffimmini parnaarussanut pulaarnissamut akuerisaanngitsut. Taamaattumik parnaarussivimmi inspektøri aperaa sulinermini Biibili atortarsinnaanerlugu. Akuerisaavoq, parnaarussallu qulit missiliorlugit soqutiginnipput. Romanip Biibili pillugu ilikkartakkaminik tamanik akuttunngitsumik oqaluttuuttarpai, tamannalu kinguneqarluarpoq. Parnaarussat ilaat iperagaanermik kingorna siumukartuarput kingusinnerusukkullu Jehovamut nalunaajaasutut kuisillutik. Romanip Guutip oqaasiata qanoq sunniuteqartigisinnaanera takugamiuk Biibilimik atuaqqissaartarnini ilumoorunnerulerpaa. Sakkutuujujunnaarpoq Biibililu pillugu ilinniarnini ingerlateqqillugu. Maanna siornatigut parnaarussaasimasoq oqaluusseqatigisarpaa.

Parnaarussaq ima allappoq: „Maani Biibili, Biibililersaarutit Biibilimillu atuaqqissaarneq nappatigaavut.“ Oqaatsit taakku atorlugit parnaarussiviit ilaanni Biibililersaarutinik qanoq pisariaqartitsisoqartiginera allaatigineqarluarpoq. Ukrainemi ilagiit ilaata parnaarussivimmi illoqarfimminniittumi Biibilimik ilinniartitsissutiginninneq ima allaatigaa: „Aqutsisut atuagassat aggiuttakkavut qujamasuutigaat. Napasuliaq Alapernaarsuiffik Vågn op!-ilu saqqummeraangata Napasuliaq Alapernaarsuiffik-nik 60-inik Vågn op!-inillu 60-inik pisarput.“ Ilagiit allat ima allapput: „Parnaarussivik 20-nik atuakkanik atorniartarfeeralik isumagisarparput. Atuakkanik atorniartarfiit tamarmik atuagaatitsinnik atuagassiaatitsinnillu pingaarnerpaanik peqarnissaat isumagisarparput. Atuagassat ataatsimut katillugit karsit 20-t anguaat.“ Parnaarussiviit ilaanni ataatsimi paarsisut atuagassiaativut tamaasa atuakkanik atorniartarfimmiitittarpaat, parnaarussat atuagassiat saqqummersut tamaasa iluaqutigisinnaaniassammatigit.

2002-mi Ukrainemi immikkoortortaqarfik immikkoortortamik parnaarussivinnut parnaarussanullu atassuteqaataasumik pilersitsivoq. Manna tikillugu immikkoortortap tamatuma parnaarussiviit 120-t atassuteqarfigisarpai taakkualu pulaarneqarnissaat ilagiinnut isumagisassanngortittarlugu. Immikkoortortaq qaammatit tamaasa 50-it missiliorlugit parnaarussanit allagarsisarpoq, taakkualu amerlanersaat atuagassanik piumasarlutilluunniit Biibilimik atuaqqissaaqatigineqarumasarput. Immikkoortortaqarfik atuakkanik, atuagassianik atuagassiaaqqanillu parnaarussivinnut nassiussuisarpoq qatanngutit illoqarfimmi tassaniittut parnaarussanut attaveqalernissaasa tungaanut.

Apustili Paulusi kristumioqatiminut ima allappoq: „Eqqaamasarniarsigit parnaarussaasut.“ (Hebræerit 13:3) Paulusip tamatumani upperisartik pillugu parnaarussaasut eqqarsaatigai. Ullumikkut Jehovap Nalunaajaasuisa parnaarussaasut eqqaamasarpaat taakku pulaartarlugit ’parnaarussallu iperagaanissaat’ taakkununnga oqaluussissutigalugu. — Lukasi 4:18. (wE 12/15 05)

[Quppernerup ataani ilanngussaq]

[Qupp. 18-mi assiliartaq]

Parnaarussiviup qarmaa, Lviv, Ukraine

[Qupp. 19-mi assiliartaq]

Mykola

[Qupp. 19-mi assiliartaq]

Vasyl nulialu, Iryna

[Qupp. 19-mi assiliartaq]

Victor