’Putumatsaaliniaritsi’

„Misilittagaqanngitsup tatigisarpai oqaaserineqartut suut tamaasa, silatuup alloriarnini sianigeqqissaartarpai.“ — USSATIT 14:15.

1, 2. (a) Lotip Sodomami misigisimasai qanoq ilinniutigisinnaavavut? (b) Oqaaseq ’putumatsaaliniaritsi’ qanoq isumaqarpa?

ABRAHAMIP Loti nunamik toqqaaqqaaqqummagu, Lotip nunap ilaa imeqarfigissoq „[Jehovap] naatsiiviatut“ ittoq orniginartippaa. Nuna tamanna nunasiffissaqqippasissimassaaq, Lotimmi „Jordanip Qoorua tamaat najugassamisut qinerpaa“ Sodomallu qanittuani ilaquttanilu najugassilluni. Lotilli ajorpasinngikkaluartut nakutitaassutigisimavai, eqqaannimi najugaqarput ’angutit Sodomamiut iluaatsorsuit Jehovamik ajortuliorfiginnittartut’. (1 Mosesi 13:7-13) Tamatuma kingorna pisut Lotimut taassumalu ilaqutaanut naalliuutaangaarput. Naggataatigut taanna paninilu qaarusummi najugaqartariaqalerput. (1 Mosesi 19:17, 23-26, 30) Aallaqqaammut ajorpasinngikkaluaqisut paasinarsivoq ajorluinnartuusut.

² Lotip misigisimasaanik oqaluttuaq ullumikkut Guutip kiffaanut ilinniutissartaqarpoq. Aalajangigassaqaraangatta navianaataasinnaasut eqqumaffigisariaqarpavut nalileeqqaarnitsinnillu nakutitaanaveersaarluta. Taamaattumik Guutip oqaasiani ima naleqqulluartumik kajumissaarneqarpugut: ’Putumatsaaliniaritsi.’ (1 Petrusi 1:13, 1900/1961) Oqaaseq ’putumatsaalineq’ ’imigassamit sunnigaasimannginneq’-mik isumaqavippoq, tassa imaappoq misikkarlussisimannginneq. Matumani assersuutitut atorneqarpoq, Biibilimillu misissueqqissaartartoq R.C.H. Lenski naapertorlugu „isumakkut eqqissisimallunilu allanngujuinneq silatusaartumik naliliisinnaalersitsisoq taamaalillunilu eqqortumik aalajangiisinnaalersitsisoq“ pineqarpoq. Pissutsit putumatsaalinissatsinnik pisariaqalersitsisut misissoriartigit.

Niuernikkut isumaqatigiissutigisinnaasamik naliliiniaraanni

3. Niueqatigiinnissamik neqeroorfigitikkaanni mianersornissaq sooq pisariaqarpa?

³ Takorlooriaruk inummit ataqqineqartumit, immaqa uppeqatinnit, niueqatigiinnissamik neqeroorfigineqarlutit. Angornioqaluni iluatsitsilluarnissamut periarfissat pillugit oqaluttuuppaatit kajumissaarlutillu iliuuseqapallaqqullutit periarfissaq maangaannartinnginniassagakku. Immaqa illit ilaquttatillu pitsaanerusunik atugaqalernissarsi takorloorpat, immaqalu allaat eqqarsarlutit tamanna pissutigalugu anersaakkut sammisassanut piffissaqarnerulissallutit. Ussatit 14:15-imili ima mianersoqqussuteqarpoq: „Misilittagaqanngitsup tatigisarpai oqaaserineqartut suut tamaasa, silatuup alloriarnini sianigeqqissaartarpai.“ Niueqatigiinnermik aallarniinerup nalaani pissangagaanni amerlanertigut navianaataasinnaasut sumiginnarneqartarput niuernerullu qanoq nalorninartigisinnaanera eqqarsaatigilluarneqartarani. (Jaaku 4:13, 14) Pissutsini taamaattuni putumatsaalinnissap ila pingaaruteqassusia!

4. Niuernikkut isumaqatigiissutigisinnaasatsinnik naliliiniarnitsinni qanoq ililluta ’alloriarnivut sianigeqqissaarsinnaavavut’?

⁴ Silatuup aalajangiitinnani niuernikkut isumaqatigiissutigisinnaasani misissoqqissaassavaa. (Ussatit 21:5) Navianaateqarsorinanngikkaluartoq taamatut misissuinermi navianaatit paasineqarsinnaapput. Una takorlooriaruk: Inuup niuernikkut pilersaarutini piviusunngortinniarlugit aningaasanik pissarsiorpoq aningaasaliiguillu iluanaaruteqarluarnissamik neqeroorfigalutit. Neqeroorutaa pilerinarsinnaavoq, navianaataali suuppat? Aningaasanik atorniartup niuerneq iluatsissappat iluatsissanngikkaluarpalluunniit aningaasanik utertitsinissani akueraa, imaluunniit aatsaat niueqatigiinneq iluatsippat akiliutit utertissavai? Allatut oqaatigalugu: Niueqatigiinneq iluatsinngippat aningaasanik annaasaqarsinnaavit? Aamma imminut ima aperisinnaavutit: „Sooq neqeroorfiginnittup inuinnaat aningaasanik atorniarfigai? Niuernikkut ingerlanniagaq bankit navianaateqarpallaartutut nalilerpaat?“ Navianaataasinnaasut eqqarsaatiginissaat piffissaqarfigigukku, tamanna  siunnersuutip silatusaartumik nalilernissaanut iluaqutigissavat. — Ussatit 13:16; 22:3.

5. (a) Jeremia narsaammik pisigami qanoq silatuumik iliuuseqarpa? (b) Niuernikkut isumaqatigiissutinik tamanik allaganngortitsineq sooq iluaqutaava?

⁵ Pruffiiti Jeremia illortaaminit, aamma Jehovamik pallorfiginnittumit, narsaammik pisigami ilisimannittut najuutsillugit isumaqatigiissusiorpoq. (Jeremia 32:9-12) Ullumikkuttaaq niuernikkut isumaqatigiissutigisat, aamma eqqarlinut uppeqatinullu niuernikkut isumaqatigiissutigisat, allaganngorlugit uppernarsaateqartinnissaasa qulakkeernissaat silatusaarnerussaaq. * Paasiuminartumik eqqarsaatigilluakkamillu allaganngorlugu isumaqatigiissusiorneq paatsooqatigiinnernik pinngitsoortitseqataasarlunilu ataasiussuseqartitseqataasarpoq. Allaganngorluguli isumaqatigiissusiorsimannginneq amerlanertigut Guutip kiffaasa akornanni ajornartorsiuteqalernermut pissutaaqataasarpoq. Ajornartorsiutit taamaattut ajoraluartumik aliasuutaasinnaallutillu narrutsassutaasinnaapput allaallu anersaakkut peqqiilliulersitsisinnaallutik.

6. Sooq piumatuneq mianersorfigisariaqarparput?

⁶ Aamma piumatuneq mianersorfigisariaqarparput. (Lukasi 12:15) Iluanaaruteqarluarsinnaaneq niuernikkut ingerlanniakkap navianaataanik takunnissinnaajunnaarsitsisinnaavoq. Allaat Jehovamut kiffartornermi annertuumik akisussaaffeqarsimasut tamatumunnga napitissimapput. Guutip oqaasiani ima mianersoqqussuteqarpoq: „Aningaaserituussutsissi qanoq inuunissarsi aalajangissanngilaa, pigisasili naammagisigit.“ (Hebræerit 13:5) Kristumiu niuernikkut isumaqatigiissuteqarusunnerluni paasiniarlugu imminut ima aperisariaqarpoq: ’Tamanna pisariaqarluinnarpa?’ Jehovamut kiffartornermik pingaarnerpaatitsilluni pilimanianngitsumik inuuneq „ajortunut tamanut“ illersuutigissavarput. — 1 Timotheusi 6:6-10.

Aappaqanngitsut kristumiut unamminiagaat

7. (a) Aappaqanngitsorpassuit kristumiut sunik unamminiagassaqarpat? (b) Aapparisassamik toqqaaneq Jehovamut ilumoorfiginninnermut qanoq attuumassuteqarpa?

⁷ Jehovamut kiffaasorpassuit katerusuttorujussuugaluarput, sulili aapparisinnaasaminnik tulluartumik nassaarsimanngillat. Nunat ilaanni aappaqanngitsut katinnissamut tatineqartupilussuusarput. Immaqali uppeqatit akornanni aapparisinnaasamik naapitsinissamut periarfissaqarpianngilaq. (Ussatit 13:12) Kristumiulli paasivaat taamaallaat „Naalakkami“ katinnissamik Biibilimi oqaaqqissaarummik malinninneq Jehovamut ilumoorfiginninnerusoq. (1 Korinthimiut 7:39) Aappaqanngitsut kristumiut tatineqarnerminni ussernartorsiortinneqarnerminnilu aalajaassinnaassagunik putumatsaalisariaqarput.

8. Niviarsiaq Shulamimiu qanoq tatineqarpa, ullumikkullu arnat kristumiut tamatumunnga assingusumik qanoq unamminiagaqarsinnaappat?

⁸ Erinarsugassiat Pingaarnersaanni oqaluttuarineqarpoq niviarsiaq nunaannarmiu Shulamimiumik taaneqartoq. Niviarsiaq taanna kunngimit malugineqarpoq. Kunngip taanna angummut inuusuttumut asannilersooqqareeraluartoq nuliarsarfigaa pisuussutini, ataqqisaanini, alutornassutsinilu atorlugit kakkanniarfigalugu. (Erinarsugassiat Pingaarnersaat 1:9-11; 3:7-10; 6:8-10; 7:1) Arnaaguit kristumiu aamma allamit kissaatiginngisannik malugitissinnaavutit. Imaassinnaavoq suliffinniittup, immaqa qaffasissumik atorfillip, nersualaartaleraatit, arlaannik ikiortaleraatit ilaginissarnullu periarfissarsiortalerluni. Inuit taamatut qujanarniarfiginnittut  mianersorfigikkit. Inuit taamaattut tamatigut ajuutiginninnissamik kinguaassiuutitigulluunniit inuunerlunnissamik siunertaqartanngikkaluartut amerlanertigut taamatut siunertaqartarput. Niviarsiaq Shulamimiu assigalugu ’qarmatut’ igit. (Erinarsugassiat Pingaarnersaat 8:4, 10) Qaninniarnerit kissaatiginngisatit aalajangersimallutit itigartikkit. Aallaqqaammulli suleqatitit paasitikkit Jehovap Nalunaajaasuisa ilagigaatsit, periarfissallu tamaasa oqaluussiffiginissaannut atukkit. Tamanna illersuutigissavat.

9. Internetikkut inummut takornartamut attaveqalernerup navianaataasa ilaannik eqqaasaqarit. (Aamma takuuk qupperneq 16-imi ungalusaq).

⁹ Internetimi nittartakkat, aappaqanngitsut aappassaminnik ujaasineranni ikiorniarlugit pilersinneqarsimasut, nuannarineqarlualersimapput. Inuit ilaasa tamakku inunnik naapissinnaanngisaraluaminnik ilisarisimannilerfigisinnaasamittut isigaat. Takornartamulli attaveqalerneq navianaateqarpoq. Internetimi piviusut piviusuunngitsullu immikkoortinnissaat ajornakusoorsinnaavoq. (Tussiaat 26:4) Jehovamut kiffaanerartut ilaannaat ilumoortumik Jehovamut kiffaapput. Aammattaaq internetikkut naapeqatigiittarneq asannilersoortitseriaannaavoq tamatumalu kingunerisaanik naliliilluarsinnaajunnaartoqarsinnaalluni. (Ussatit 28:26) Inummut ilisimasaqarfigerpianngisamut qanittumik attaveqarnermik ineriartortitsineq sianiilliorneruvoq, internetikkuugaluarpat allatigulluunniit tamanna pigaluarpat. — 1 Korinthimiut 15:33.

10. Aappaqanngitsut kristumiut uppeqatiminnit qanoq qiimmassarneqarsinnaappat?

¹⁰ Jehova kiffaminut ’misiginneqataangaarpoq’. (Jaaku 5:11, NV) Nalunngilaa kristumiut katerusuttut unamminiarnartut nalaattagaat ilaannikkut artornartupilussuusartut, taakkualu ilumoorfiginninnerat pingaartippaa. Allat taakkuninnga qanoq qiimmassaasinnaappat? Taakkua naalannerat imminullu pilliutigeriaannaanerat pillugu nersualaakulasarnissaat eqqaamasariaqarparput. (Eqqartuussisut 11:39, 40) Aamma katerisimaaqatigiinnernut ineriartornartunut ilanngullugit qaaqqusinnaavavut. Qanittukkut taamaaliornikuuit? Aammattaaq qinnussinnaavavut Jehova qinnuigalugu taakkua ikioqqullugit anersaakkut oqimaaqatigissaariuarsinnaaqqullugit taassumunngalu kiffartornertik nuannaarutigisinnaaqqullugu. Jehovamut kiffat ilumoorfiginnittut taakkua ilumoorluta soqutiginerisigut taakkununnga ersersitsigu Jehovap pingaartitsineratut pingaartillugit. — Tussiaat 37:28.

Peqqiilliuuteqaleraanni

11. Ilungersunartumik peqqiilliuuteqartut sunik unamminiagassaqarpat?

¹¹ Uagut nammineq asasattaluunniit ilaat ilungersunartumik peqqiilliuuteqaleraangata annikilliuutaasaqaaq.  (Esaja 38:1-3) Sunniuteqarluartumik nakorsartinniaraangatta Biibilimi najoqqutassianik aalajangiusimanninnissarput pingaaruteqarpoq. Assersuutigalugu kristumiut aattunnginnissamik Biibilimi peqqussutip naalannissaa aalajangiusimalluinnarpaat, aamma nappaatinik suussusersiortaatsit nakorsaariaatsilluunniit anersaarsiornermut attuumassuteqartut tamaasa ingalassimavaat. (Apustilit Suliaat 15:28, 29; Galatiamiut 5:19-21) Nakorsatulli ilinniagaqarsimanngitsunut nakorsaariaatsit assigiinngitsut isummerfigiuminaassinnaapput isummerfiginissaallu paatsiveerunnarsinnaalluni. Putumatsaalinissatsinnut suna iluaqutigisinnaavarput?

12. Kristumiu nakorsaariaatsimik sorlermik nakorsartissanerluni eqqarsaatiginninnermini qanoq ililluni oqimaaqatigiissaariuarsinnaava?

¹² „Silatuup alloriarnini sianigeqqissaartarpai“ Biibilimik kristumiullu atuagaataannik atuagassiaataannillu misissuinermigut. (Ussatit 14:15) Silarsuup ilaani ikittuinnarnik nakorsaqarfiusuni napparsimmaveqarfiusunilu inuiaat nakorsaataat naasunit nakorsaasiaasoq immaqa nakorsaatissatuaavoq. Nakorsaammik taama ittumik nakorsartinnissaq eqqarsaatigigaanni paasissutissat atorluarsinnaasut uaniipput: Vagttårnet 15. septembari 1982, qupp. 19-23. (Kalaallisuunngortitaanngitsoq). Ilaatigut uku paasiniartariaqarpavut: Nakorsaq anersaarsiortartutut ilisimaneqarpa? Nakorsaariaaseq taanna guutit narrutsatsitat (imaluunniit siuaasat anersaavi) akeqqalluunniit angakkuersaarniartartut nappaatinut toqumullu pissutaasorinerannik tunngaveqarpa? Nakorsaasiornermi nakorsaatilluunniit atornerani pilliisoqartarpa, serrasoqartarpa ileqqulersuutilluunniit anersaarsiornermut tunngasut atorneqartarpat? (5 Mosesi 18:10-12) Taamatut misissuineq siunnersuutip matuma isumassarsiarititaasup malinnissaanut iluaqutigissavarput: „Suut tamaasa paasiniaqqissaarsigit; ajunngitsut aalajangiussigit.“ * (1 Thessalonikamiut 5:21, NV) Tamanna iluaqutigalugu oqimaaqatigiissaariuarsinnaassaagut.

13, 14. (a) Timikkut peqqissutsitsinnut tunngatillugu qanoq ililluta ingasaassinianngitsuunerput ersersissinnaavarput? (b) Allat peqqissuseq katsorsaariaatsillu pillugit oqaloqatigigaangatsigik sooq ingasaassiniannginnissaq pisariaqarpa?

¹³ Inuunermi sutigut tamatigut ingasaassinianngitsuunissaq pisariaqarpoq, aamma timikkut peqqinnermut tunngatillugu. (Filippimiut 4:5) Peqqissutsitsinnut oqimaaqatigiissumik isiginnittaaseqarnerput inuunermik tunissutaasumik pingaartitsinitsinnut ersiutaavoq. Peqqiilliuuteqalerutta peqqiilliuuterput eqqarsaatigalugu iliuuseqarnissamut pissutissaqarluarpugut. Piffissarli Guutip inuiaqatigiinnik katsorsaaffissaa nalliutsinnagu peqqilluinnartoqalersinnaanngilaq. (Saqqummersitat 22:1, 2) Timikkut peqqissuserput ima sammitigilernaveersaartariaqarparput anersaakkut pisariaqartitavut pingaaruteqarnerungaartut tunulliutilerlugit. — Matthæusi 5:3; Filippimiut 1:10.

¹⁴ Aamma allat peqqissutsimut katsorsartinnermullu tunngasunik oqaloqatigigaangatsigik oqimaaqatigiissumik isiginnittaaseqartariaqarlutalu ingasaassinianngitsuusariaqarpugut. Kristumiut ataatsimiinnerini ataatsimeersuarnerinilu anersaakkut sammisaqaqatigiinniarnitsinni tamakku pingaarnerutillugit oqaloqatigiissutigissanngilavut. Aammattaaq aalajangigassat katsorsartinnermut tunngasut Biibilimi najoqqutassianut, inuup nalunngeqatiginnissutaanut Jehovamullu attaveqarneranut attuumassuteqarajupput. Taamaammat asannittuliussanngilagut uppeqaterput uatsitut  isumaqalersinniarsarigutsigu nalunngeqatiginnissutaanillu sumiginnaatinniarsarigutsigu. Ilagiinni utoqqaanertat inersimalluartut siunersiorneqarsinnaagaluartut kristumiut tamarmik immikkut aalajangiiniarnerminni ’nammagassatik namminneq nammattussavaat’, aamma „tamatta immikkut Guutimut nassuertussaavugut“. — Galatiamiut 6:5; Romamiut 14:12, 22, 23.

Tatineqaraangatta

15. Pissutsit stressernartut qanoq uagutsinnut sunniuteqarsinnaappat?

¹⁵ Pissutsit stressernartut pissutigalugit Jehovamut kiffaasut ilumoorfiginnittut allaat oqaatsikkut iliuutsikkullu sianiilliorsinnaapput. (Oqaluussisartup oqaasii 7:7) Jobi sualuttumik misilinneqarami oqimaaqatigiissaarilluarsinnaajunnaarpoq eqqarsartaatsiminullu tunngatillugu naqqinneqartariaqarluni. (Jobi 35:2, 3; 40:6-8) Aamma Mosesip ’inunnit nunarsuarmiittunit tamanit anneruniajuinnerpaagaluarluni’ narrutsatsitaavoq mianersuaalliorlunilu oqalulluni. (4 Mosesi 12:3; 20:7-12; Tussiaat 106:32, 33) Daavip kunngi Sauli toqunngimmagu imminut naalakkersinnaanera nersornarpoq, Nabalilli Daavi soqqusaalliorfigimmagu taassumalu angutitai oqalorujuummagit Daavi kamangaalerpoq naliliilluarsinnaajunnaarlunilu. Aatsaat Abigajili akuliummat silattuaqivoq peqqamillu kukkorujussuanngitsoorluni. — 1 Samueli 24:3-8; 25:9-13, 32, 33.

16. Suna isumaalliunnginnissamut iluaqutigisinnaavarput?

¹⁶ Aamma uagut pissutsit stressernartut pissutigalugit naliliilluarsinnaajunnaarsinnaavugut. Daavitut allat qanoq isumaqarnerannik eqqarsaatiginneqqissaarneq isumaalliunnginnissamut ajortulioriataannginnissamullu iluaqutigisinnaavarput. (Ussatit 19:2) Aammattaaq Guutip oqaasiani ima oqaaqqissaarneqarpugut: „Kamassimariannguaritsi, kisiannili ajortuliornasi! Innanngavissinni eqqarsarallaritsi, nipangersimagitsilu!“ (Tussiaat 4:5) Ajornanngippat aatsaat eqqissereeraanni iliuuseqarnissaq aalajangiinissarluunniit silatusaarnerussaaq. (Ussatit 14:17, 29) Jehova qamannga pisumik qinulluta saaffigisinnaavarput, „taava eqqissinerup Guutimit pisup siuneqassusernit tamanit annerungaartup [uummativut eqqarsaativullu] sernigissavai Kristusi-Jiisusimi“. (Filippimiut 4:6, 7) Taamatut Guutimit eqqissisitaanerup oqimaaqatigiissaarisinnaanngortissavaatigut aamma putumatsaalinissatsinnut iluaqutigissavarput.

17. Putumatsaaliniarluta sooq Jehova tunaarisariaqarparput?

¹⁷ Silatusaarniarluta navianartullu ingalassimaniarlugit ilungersortaraluarluta tamatta kukkusarpugut. (Jaaku 3:2) Sianiginngilluinnakkatsinnik kukkorujussuangajassinnaavugut. (Tussiaat 19:13, 14) Aamma uagut inuit Jehovamut atanata alloriartarnivut aqussinnaanagillu alloriarnitsinnik aqutsisinnaatitaanngilagut. (Jeremia 10:23) Taamaattumik taassuma Tussiaat 32:8-mi uagutsinnut neriorsuutaa qujamasuutigaarput: „Siuneqassutsimik tunissavakkit ingerlavissannillu ilinniartillutit. Siunnersussavakkit, isinnik isigiuartillutit.“ (NV) Aap, Jehovap ikiuineratigut putumatsaalisinnaavugut. (wE 3/1 06)

[Quppernerup ataani ilanngussat]

Qanoq akissavit?

Qanoq ililluni putumatsaalisoqarsinnaava

• niuernikkut neqeroorfigineqaraanni?

• aappassarsioraanni?

• peqqiilliuuteqaleraanni?

• tatineqaraanni?

[Atuaqqissaarnermi apeqqutit]

[Qupp. 16-mi assiliartaq]

Upperineqarsinnaappat?

Aappaqanngitsunut nittartakkani makkuninnga nalunaaruteqarpoq:

„Tamanna ilungersuutigigaluarlutigu inuit ataasiakkaat kinaassusiviat nittartakkami takutinneqarnersoq qulakkeerneqarsinnaanngilaq.“

„Nittartakkami matumani paasissutissat eqqorluartuunerat, tamakkiisuunerat atorneqarsinnaaneralluunniit qulakkeersinnaanngilarput.“

„Isummat, siunnersuutit, nalunaarutit, neqeroorutit paasissutissalluunniit allat nittartakkami [matumani] atuarneqarsinnaasut allattuisa namminneq akisussaaffigaat . . . upperineqartariaqarnatillu.“

[Qupp. 14-mi assiliartaq]

„Silatuup alloriarnini sianigeqqissaartarpai“

[Qupp. 15-mi assiliartaq]

Arnat kristumiut niviarsiaq Shulamimiu qanoq ilaarsinnaavaat?

[Qupp. 17-mi assiliartaq]

„Suut tamaasa paasiniaqqissaarsigit; ajunngitsut aalajangiussigit“