’Aallarlusi ajoqersuganngortitsigitsi, kuillugit’
’Aallarlusi ajoqersuganngortitsigitsi, kuillugit’
’Taamaattumik aallaritsi inunnillu inuiannit tamaneersunik ajoqersuganngortitsigitsi kuillugit, ajoqersorsigillu ilissinnut peqqussutikka tamaasa maleruaqqullugit.’ — MATTHÆUSI 28:19, 20, NV.
1. Qaqqaq Sinajip eqqaani Israelikkut qanoq aalajangerpat?
UKIUT 3500-t missiliorlugit matuma siorna inuiaqatigiit ataatsit tamakkerlutik Guutimut neriorsuipput. Israelikkut Qaqqaq Sinajip eqqaani katersorsimatillutik tamanut ima nalunaarput: „[Jehovap] oqaasii tamaasa malillugit iliorumavugut.“ Tamanna aallarnerfigalugu Israelikkut inuiaqatigiinngorput Guutimut tunniulluinnarsimasut, taassumannga ’immikkoortitaallutik pigisassarsiarineqartut’. (2 Mosesi 19:5, 8; 24:3) Taassumannga illersorneqarnissartik aamma kinguaariikkuutaani nunami ’immummik tungusunnitsuummillu kuuttumi’ najugaqalernissartik qilanaaraat. — 3 Mosesi 20:24.
2. Ullumikkut inuit Guutimut qanoq ittumik attaveqalersinnaappat?
2 Kisianni tussiaasiortup Asafip uppernarsivaa Israelikkut ’Guutip angerusia aalajangiutinngikkaat inatsisaalu maleruarumanagit’. (Tussiaat 78:10) Israelikkut siuaasamik Jehovamut neriorsuutaat eqqortinngilaat, naggataatigullu Guutimut immikkut ittumik attaveqarnertik annaavaat. (Oqaluussisartup oqaasii 5:3; Matthæusi 23:37, 38) Taamaattumik ’Guuti Guutimik nalusunik aterminut innuttassarsisimavoq’. (Apustilit Suliaat 15:14) Ullunilu makkunani kingullerni taassuma „inuppassuit amerlangaaramik kisinneqarsinnaanngitsut, inuiaqatigiinnit naggueqatigiinnillu inuiannillu immikkullu oqaasilinnit tamanit pisut“ katersorpai, taakkulu nuannaarlutik torlulapput: „Annassut Guutitsinnit issiavissaarsuarmi issiasumit Savaaqqamillu pivoq“. — Saqqummersitat 7:9, 10.
3. Guutimut qanittumik attaveqalersinnaajumalluni qanoq iliortoqartariaqarpa?
3 Taamatut Guutimut erlinnartumik attaveqartunut ilaassagutta taassumunnga tunniulluinnartariaqarpugut tamannalu imermut morsutsitaalluni kuisinnikkut kikkut tamarmik takkuanni ersersillugu. Tamanna Jiisusip ajoqersukkaminut peqqussutaanut naapertuuppoq: „Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqani kuillugit, ajoqersorsigillu ilissinnut peqqussutikka tamaasa maleruaqqullugit.“ (Matthæusi 28:19, 20, NV) Israelikkut Mosesi tusarnaarpaat ’angerutsip allassimaffianik’ atuffammatik. (2 Mosesi 24:3, 7, 8) Taamaattumik nalunngilluinnarpaat Jehovamut sunik pisussaaffeqarnerlutik. Ullumikkuttaaq kuisinniarluni iliuuseqartinnani Guutip piumasaa oqaasiani Biibilimiittoq pillugu eqqorluartumik ilisimasaqarnissaq pisariaqarluinnarpoq.
4. Kuisinnissamut piukkunnarsarniarluni qanoq iliortoqartariaqarpa? (Ungalusaq qulaaniittoq ilannguguk.)
4 Erseqqippoq Jiisusip kissaatigigaa ajoqersukkami kuisinnginnerminni uppernerminnut tunngavissaqarluarnissaat. Kajumissaaginnanngilai ajoqersuganngortitsiortoqqullugit, aammali kajumissaarpai ’peqqussutiminik tamanik maleruaanissaq’ inunnut allanut ilinniartitsissutigeqqullugu. (Matthæusi 7:24, 25; Efesosimiut 3:17-19) Taamaattumik kuisinnissamut piukkunnarsisimasut amerlanertigut qaammatini arlalinni imaluunniit allaat ukiumi ataatsimi marlunniluunniit Biibilimik atuaqqissaarsimasarput, taamaalillutik aalajangipallanneq ajorput tunngavissaqarluartumilli aalajangertarlutik. Kuisittussat kuisilernerminni apeqqutit tunngaviusut marluk angertarpaat. Jiisusip erseqqissarmagu ’oqaaserput aap aappimik isumaqartissagipput, oqaaserpullu naagga naaggamik isumaqartillugu’, tamatta iluaqutigissavarput kuisittussanut apeqqutit marluk taakkua qanoq pingaaruteqartiginerat eqqarsaatigeqqissaarutsigu. — Matthæusi 5:37, NV.
Allamik isumataarneq tunniulluinnarnerlu
5. Iliuuserineqartussat tunngaviusut marluk suut kuisittussamut apeqqummi siullermi eqqaaneqarpat?
5 Kuisittussamut siullertut apeqqutigineqartarpoq inooriaaserisimasani peqqissimissutigineraa inuuninilu Jehovamut tunniulluinnarsimaneraa taassuma piumasaatut iliorniarluni. Apeqqummi tamatumani kuisitsinnani iliuuserisariaqakkat marluk pingaarutillit erseqqissarneqarput, tassa allamik isumataarneq tunniulluinnarnerlu.
6, 7. (a) Sooq kuisittussat tamarmik allamik isumataartariaqarpat? (b) Allamik isumataareeraanni sunik allannguisoqartariaqarpa?
6 Sooq kuisitsinnani allamik isumataartariaqarpa? Apustili Paulusi ima nassuiaavoq: ’Siornatigut tamatta uinitta pilerissusiatigut iliortarpugut.’ (Efesosimiut 2:3) Guutip piumasaa pillugu eqqorluartumik ilisimasaqalinngikkallaratta silarsuarmi pingaartinneqartunut najoqqutarineqartunullu naapertuuttumik inuuvugut. Inuunerput silarsuup matuma guutianit, Saatanimit, aqunneqarpoq. (2 Korinthimiut 4:4) Guutilli piumasaa paasigatsigu aalajangerpugut „inuit pilerissusii piunnaarlugit Guutip piumasaa malissallugu“. — 1 Petrusi 4:2.
7 Taamatut allamik inooriaaseqalerneq pilluaqqussuterpassuarnik kinguneqartarpoq. Pingaarnerpaamik Jehovamut erlinnartumik attaveqartoqalersinnaavoq. Daavip Guutimut taamatut attaveqarneq Guutip ’toqqanut’ tikeraaqqusaanermut aamma ’qaqqaani illernartumi’ ineqaqqusaanermut — ataqqinaataasorujussuarmut — assersuuppaa. (Tussiaat 15:1) Paasinarpoq Jehovap qaaqqusissut taanna kimulluunniit tunniukkumanngimmagu, ’assuarnaallutilli inuusunut, innarluitsumik iliortunut ilumoortumillu uummammit pisumik oqaluttunut’ taamaallaat tunniukkumammagu. (Tussiaat 15:2) Sallusuissummik ilinnialinnginnitsinni pissutsinik qanoq ittunik atugaqarnerput apeqqutaalluni, piumasaqaatinik taakkuninnga eqqortitsissagutta imaassinnaavoq arlaannik allannguisariaqartugut — ileqqutsigut inuttullu pissuserisatsigut. (1 Korinthimiut 6:9-11; Kolossemiut 3:5-10) Taamatut allannguinissamut kajumississutigisaq tassaavoq allamik isumataarneq — inooriaaserisimasatsinnik peqqissimissutiginningaarneq Jehovalu nuannaartinniarlugu aalajangerluinnarneq. Tamanna allannguilluinnarnermik kinguneqartarpoq, namminissarsiortumik silamiutut inooriaaseqarunnaarluni Guutillu iluarisaanik inuulerluni. — Apustilit Suliaat 3:19, 20a.
8. Qanoq Jehovamut tunniulluinnartoqartarpa, tamannalu kuisinnermut qanoq attuumassuteqarpa?
8 Kuisittussanut apeqqutip siulliup naggataatungaani kuisittussat aperineqarput Jehovap piumasaatut iliorniarlutik taassumunnga tunniulluinnarsimanersut. Tunniulluinnarneq kuisitsinnani iliuuserisassaavoq pingaarutilik. Tunniulluinnartoqartarpoq Jehova qinunikkut oqarfigalugu Kristusi aqqutigalugu inuunerput taassumunnga tunniukkumallugu. (Romamiut 14:7, 8; 2 Korinthimiut 5:15) Taamalu Jehova Naalagarilerlugulu Piginnittorilertarparput, aamma Jiisusitut Guutip piumasaatut iliornissaq kajungeraarput. (Tussiaat 40:9; Efesosimiut 6:6) Taamatut ataasiaannarluni Jehovamut pingaartorsiornartumik neriorsuisoqartarpoq. Tunniulluinnarnerli inummut immikkut ittuummat inummik allamik ilisimannittoqarani pisarluni, ullormi kuisiffimmi kuisittussanut apeqqutit akillugit tamanut nalunaarneq Ataatatsinnut qilammiusumut taamatut pingaartorsiorluta neriorsuisimanitsinnik kikkunnut tamanut ilisimatitsissutaavoq. — Romamiut 10:10.
9, 10. (a) Guutip piumasaatut iliorniarluta qanoq iliortariaqarpugut? (b) Allaat nazistit tunniulluinnarsimanitta pingaaruteqassusia qanoq nassuerutigaat?
9 Guutip piumasaatut iliornermut tunngatillugu Jiisusip maligassiaa malissagutsigu qanoq iliortariaqarpugut? Jiisusip ajoqersukkani ima oqarfigai: „Uannik malinnikkumasoq imminut isumakkiissaaq, nappagarlu anniartitaaffini ersukkiutissavaa malittuarlungalu.“ (Matthæusi 16:24, NV) Tassani iliuuserisariaqakkavut pingasut eqqaavai. Siullermik imminut ’isumakkeertariaqarpugut’. Tassa imaappoq namminissarsioqqajaanitsinnut naammalluinnanngissuserpullu pissutigalugu kajungerisatsinnut naaggaartariaqarpugut Guutillu siunnersuutai ilitsersuutaalu angertariaqarlugit. Aappassaanik ’nappagaq anniartitaaffipput ersukkiutissavarput’. Jiisusip nalaani nappagaq anniartitaaffik nikanarsagaanermut anniaatinullu assersuutaavoq. Kristumiuugatta nutaarsiassaq nuannersoq pillugu naalliunnissaq piareersimaffigaarput. (2 Timotheusi 1:8) Silarsuarmit immaqa mitaatigineqarlutalu assuarineqartaraluarluta Kristusi ilaarparput tamatuma „kanngunarsaataanera soqutiginagu“, nuannaarluta nalunnginnatsigu Guutimit iluarisaalluta. (Hebræerit 12:2) Pingajussaanik Jiisusi ’malittuarparput’. — Tussiaat 73:26; 119:44; 145:2.
10 Soqutiginarpoq allaat akerlilersortitta ilaasa nassuerutigimmassuk nangaassuteqarata Guuti kiffartorfiginiarlugu tunniulluinnarsimanerput. Nazistit nalaanni Tysklandimi tigusanut inissiarsuarmi Buchenwaldimi Jehovap Nalunaajaasui upperisaminnik taamaatitsiumanngitsut peqquneqarput nalunaarut una atsioqqullugu: „Suli Biibilimik atuaqqissaartartuuvunga aalajaatsoq Jehovamullu neriorsuutiga unioqqutinngisaannassavara.“ Nalunaarummi tamatumani Guutimut kiffaasut tunniulluinnarsimasut ilumoortut tamarmik isumaat ersersinneqarluarpoq! — Apustilit Suliaat 5:32.
Jehovap Nalunaajaasuinut ilanngulluni nalunaarneq
11. Kuisittup suna immikkut pisinnaatitaaffigilertarpaa?
11 Kuisittussamut aappaattut apeqqutigineqartarpoq paasisimaneraa kuisinnermigut nalunaarluni Jehovap Nalunaajaasuinut ilanngulluni. Kuisinnermigut Guutip oqaasianut kiffanngortarpoq Jehovap aqqanik taaguutilik. Tamanna immikkut pisinnaatitaaffiuvoq angisooq akisussaaffiullunilu pimoorunneqartussaq. Kuisittoq aamma tamanna pissutigalugu naassaanngitsumik annaanneqarnissamik periarfissaqarpoq Jehovamut aalajaattuaruni. — Matthæusi 24:13.
12. Jehovap aqqanik taaguuteqarsinnaanermik immikkut pisinnaatitaaffik sumik pisussaaffittaqarpa?
12 Guutip ajugaqanngitsup aqqanik, Jehovamik, taaguuteqarsinnaaneq pisinnaatitaaffiuvoq asseqanngilluinnartoq. Pruffiiti Mika ima allappoq: „Inuiaat allat tamarmik inuupput namminneq guutimik aqqanni; uagulli inuujumavugut [Jehovap] Guutitta aqqani naassaanngilluinnartumik.“ (Mika 4:5) Immikkulli pisinnaatitaaffik tamanna pisussaaffittaqarpoq. Jehovap aqqanut ataqqinaataasumik inuuniartariaqarpugut. Paulusip kristumiut Romamiittut eqqaasippai inunnut allanut namminneq ajoqersuutigisaminnik maleruaanngitsoqarpat, Guutip aqqa ’mitaatigineqarluniluunniit’ narrunarsarneqassasoq. — Romamiut 2:21-24.
13. Sooq Jehovamut kiffaasut tunniulluinnarsimasut Guutiminnik nalunaajaatiginninnissaq akisussaaffigaat?
13 Inuk Jehovap Nalunaajaasuinut ilanngukkaangami aamma Guutiminik nalunaajaatiginninnissamik akisussaaffeqalertarpoq. Jehovap innuttani tunniulluinnarsimasut, Israelikkut, Guutiussutsimi naassaanngitsup nalunaajaatiginissaanut kajumissaarpai. (Esaja 43:10-12, 21) Inuiaqatigiilli taakkua akisussaaffitsik eqqortinngilaat, naggataatigullu Jehovamit iluarisaajunnaarluinnarput. Ullumikkut kristumiut ilumoortut Jehovamik nalunaajaatiginninnermik immikkut pisinnaatitaaffeqarnertik tulluusimaarutigaat. Taanna pillugu nalunaajaavugut asagatsigu aamma aqqa illernarsiserusukkatsigu. Ataatarput qilammiusoq taassumalu siunertaa pillugu sallusuissut nalunnginnatsigu qanoq aamma nipangiutiinnarsinnaassavarput? Apustili Paulusitut misigivugut, taanna ima oqarmat: ’Pinngitsoornanga tusarliuttussaavara, eqqanarlu uanga iivangkiiliu nalunaajaatiginngikkukku.’ — 1 Korinthimiut 9:16.
14, 15. (a) Jehovap peqatigiissortai anersaakkut ineriartornitsinnut qanoq pingaaruteqarpat? (b) Aaqqissuussinerit suut anersaakkut ineriartornissamut iluaqutigisinnaavavut?
14 Apeqqutit aappaanni aamma kuisittussaq eqqaasinneqarpoq ilagiit Guutip anersaamigut siulersugaasa suleqatiginissaat akisussaaffigigaa. ’Qatanngutitsinnit’ immikkoorniarsinnaanngilagut, taakkunannga ikiorneqarnissaq, tapersersorneqarnissaq kajumissaarneqarnissarlu pisariaqartikkatsigu. (1 Petrusi 2:17; 1 Korinthimiut 12:12, 13) Guutip peqatigiissortai anersaakkut ineriartornissatsinnut pingaaruteqarluinnarput. Taakku aqqutigalugit Biibililersaarutinik naammangaartunik pilersorneqartarpugut eqqorluartumik ilisimasaqarnikkut ineriartorsinnaaqqulluta, ajornartorsioraangatta silatusaarsinnaaqqulluta aamma Guutimut qanittumik attaveqarnermik ineriartortitsisinnaaqqulluta. Soorluttaaq anaanaasoq qitornaminik isumassuillunilu peqqinnartunik nerisitsisartoq, ’kiffaq ilumoortoq silatoorlu’ piffissaq eqqorlugu anersaakkut inuussutissanik naammangaartunik, anersaakkut siumukarnissatsinnut iluaqutigisinnaasatsinnik, uatsinnik pilersuisarpoq. — Matthæusi 24:45-47; 1 Thessalonikamiut 2:7, 8.
15 Jehovap innuttai sapaatip-akunneranut ataatsimiinnerni pisariaqartumik ajoqersorneqarlutillu kajumissaarneqartarput Jehovamut nalunaajaasutut aalajaassinnaaniassammata. (Hebræerit 10:24, 25) Teokratiimik Ilinniarfimmi inuppassuit takkuanni oqalunnissamut ilinniartinneqartarpugut, aamma oqaluussinermut tunngasumik ataatsimiinnerni tusarliunniakkatsinnik sunniuteqarluartumik saqqummiussinissamut ajoqersorneqartarpugut. Ataatsimiinnertigut namminerlu Biibililersaarutinik atuaqqissaartarnitsigut paasisarparput Jehovap peqatigiissortani anersaaminik siulersortarai. Aalajangersimasumik aaqqissuussinerit tamakku aqqutigalugit Guutip navianartunut mianersoqqusarpaatigut, oqaluussisartutut pikkorinnerulernissamut ilinniartilluta anersaakkullu eqqumajuarnissatsinnut ikiortarluta. — Tussiaat 19:8, 9, 12; 1 Thessalonikamiut 5:6, 11; 1 Timotheusi 4:13.
Kuisinnissamut kajumississutigisaq
16. Suna kajumississutigalugu Jehovamut tunniulluinnarpugut?
16 Kuisittussanut apeqqutit marluk taamaalillutik kuisittussanik eqqaasitsipput kuisinnerup tamatumalu akisussaaffittaata pingaaruteqassusiannik. Kuisinniarlutik aalajangernissamut suna kajumississutigissagamikku? Ajoqersuganngorpugut kuisimasut Jehovap ’kajungilersimmatigut’, imaanngitsoq pinngitsaalineqaratta. (Johannesi 6:44) ’Guuti tassaagami asanninneq’, qilak nunarsuarlu asanninnikkut, pinngitsaaliinikkuunngitsoq, aquppai. (1 Johannesi 4:8) Jehova kajungeraarput asannittumik pissuseqarnera uatsinnillu isumaginneriaasia pissutigalugit. Jehovap ernituani uagut iluaqutissatsinnut tunniuppaa siunissamillu pitsaanerpaamik neqeroorfigaluta. (Johannesi 3:16) Aamma uagut inuunitsinnik taassumunnga tunniussinissamut — tassa taassumunnga tunniulluinnarnissamut — killinneqarpugut. — Ussatit 3:9; 2 Korinthimiut 5:14, 15.
17. Tunniulluinnarnerput sumut tunniulluinnarnerunngila?
17 Jehovamut, suliassamut pinnata, tunniulluinnarpugut. Guutip innuttaminut suliassiissutaa allanngortussaavoq, taakkuali taassumunnga tunniulluinnarnerat taannaajuassaaq. Assersuutigalugu Jehovap Abrahamimut suliassiissutaa Jeremiamut suliassiissutaanit allaanipilussuuvoq. (1 Mosesi 13:17, 18; Jeremia 1:6, 7) Tamarmilli Guutip imminnut suliassiissutai immikkut ittut naammassivaat, Jehova asagamikku aalajaallutillu taassuma piumasaatut iliorusukkamik. Ullumikkut naggatissap nalaani Kristusimut ajoqersukkat kuisimasut tamarmik Guutip naalagaaffianik oqaluussissutiginninnissamik ajoqersuganngortitsiortornissamillu peqqussut malillugu iliorniarlutik ilungersorput. (Matthæusi 24:14; 28:19, 20) Suliassamik tamatuminnga uummatikkut iluunngarluni suliarinninneq Ataatatsinnik qilammiusumik asanninnitsinnik taassumunngalu tunniulluinnarluinnarsimanitsinnik ersersitsilluarneruvoq. — 1 Johannesi 5:3.
18, 19. (a) Kuisinnitsinni tamanut suna nalunaarutigisarparput? (b) Allaaserisami tulliuttumi suut sammineqassappat?
18 Qularutissaanngilaq kuisinneq pilluaqqussutissartaqangaartoq, eqqarsaatigilluaqqaarnaguli iliuuserineqartussaanngilaq. (Lukasi 14:26-33) Kuisinneq pisussaaffigiumasinnaasatsinnit allanit tamanit pingaaruteqarnerusumik aalajangersimanitsinnut ersiutaavoq. (Lukasi 9:62) Kuisinnikkut tamanut ammasumik ima nalunaarpugut: „Guuti taama ittoq, naassaanngitsumik Guuterput, taanna siulersortigissavarput [toqunissatta tungaanut, NV]!“ — Tussiaat 48:15.
19 Allaaserisami tulliuttumi kuisinnermut tunngatillugu apeqqutigineqarsinnaasut allat sammissavavut. Kuisinnginnissamut pissutissaqarluartoqarsinnaava? Qanoq utoqqaatigineq apeqqutaasariaqarpa? Kuisittoq najuuttullu tamarmik kuisinnerup ataqqinnarpaluttumik ingerlanissaanut qanoq ilillutik peqataasinnaappat?
Uku nassuiarsinnaavigit?
• Sooq kuisitsinnani allamik isumataartoqartariaqarpa?
• Guutimut tunniulluinnarneq qanoq paasisariaqarpa?
• Jehovap aqqanik taaguuteqarnermik immikkut pisinnaatitaaffik sumik pisussaaffittaqarpa?
• Kuisinnissamut suna kajumississutigisariaqarparput?
[Atuaqqissaarnermi apeqqutit]
[Qupp. 13-mi ungalusaq]
Kuisittussanut apeqqutit marluk
Jiisusi Kristusip pilliutaa tunngavigalugu ajortuliatit peqqissimissutigaagit, Jehovamullu tunniulluinnarsimavit taassuma piumasaatut iliorumallutit?
Paasiviuk tunniulluinnarnikkut kuisinnikkullu Jehovap Nalunaajaasuinut ilanngullutit nalunaartutit ilagiit Guutip anersaamigut siulersugai peqatigalugit?
[Qupp. 14-mi assiliartaq]
Tunniulluinnarneq tassaavoq qinunikkut Jehovamut pingaartorsiorluni neriorsuineq
[Qupp. 16-mi assiliartaq]
Oqaluussinerput Guutimut tunniulluinnarsimanitsinnut ersiutaavoq