Kristumiutut kuisinnissamut qanoq piukkunnarsartoqartartoq

„Suna akornutaassava kuineqarnissannut?“ — APUSTILIT SULIAAT 8:36.

1, 2. Filipip kunngip atorfilittaa Etiopiamiu qanoq ililluni oqaloqatigilerpaa, qanorlu takuneqarsinnaava angut taanna anersaakkut ittunik soqutigisaqartoq?

UKIOQ ataaseq marlulluunniit Jiisusip toqunerata kingorna naalagaaffimmi atorfilik aqqut Jerusalemimiit Gazamukartoq atorlugu hiistimik qimuttoqarluni kujammut ingerlavoq. 1500 kilometerit missiliorlugit ilungersunartumik angalasussaavoq. Angut Guutimik mianerinnittoq taanna Etiopiamiit aqqussua tamaat Jerusalemiliarsimavoq Jehovamik pallorfiginninniarluni. Sivisuumik angerlamut angalanermini Guutip oqaasianik atuarnermigut piffissaq atorluarpaa — tamannalu upperneranut uppernarsaataavoq. Jehovap angut eqqortuliorusuttoq taanna malugaa, inngililu aqqutigalugu ajoqersugaq Filipi peqquaa Etiopiamiu orneqqullugu oqaluussiffigeqqullugulu. — Apustilit Suliaat 8:26-28.

² Kunngip atorfilittaanik Etiopiamiumik oqaloqateqalernissaq Filipimut ajornanngitsuararsuuvoq, taanna nipituumik atuarmat, soorlumi taamanikkut tamanna nalinginnaasoq. Taamaattumik Filipip tusaasinnaavaa Esajap allagai atuarai. Angut soqutiginnilerpoq Filipi ima aperimmat: „Atuakkatit paasivigit?“ Tamanna Esaja 53:7, 8-mik eqqartuilissutigaat. Naggataatigut Filipip „Jiisusimik iivangkiiliu taassumunnga tusarliuppaa“. — Apustilit Suliaat 8:29-35.

3, 4. (a) Sooq Filipip ingerlaannaq Etiopiamiu kuivaa? (b) Apeqqutit suut maanna sammissavavut?

³ Etiopiamiup erniinnaq paasivaa Jiisusi Guutip siunertaani qanoq inissisimaffeqarnersoq, aamma Kristusimut ajoqersukkatut kuisinissaq pisariaqartoq. Taamaammat taassuma eqqaminni imeqartoq takuleramiuk Filipi ima aperaa: „Suna akornutaassava kuineqarnissannut?“ Tamatumani soorunami  pissutsit immikkut ittuupput. Angut uppertoq taanna Guutimik pallorfiginnittooreerpoq juutit upperisaannut ilanngussimasoq. Sivisuumik utaqqisariaqassagunarpoq kuisinissamut periarfissaqaqqilernissani utaqqissagaluaruniuk. Aamma pingaaruteqarneruvoq angutip taassuma Guutimit sumik piumaffigineqarnerluni paasinninnera nangaananilu tamatuminnga maleruaarusunnera. Filipi kajumilluni Etiopiamiup kissaatigisaatut iliorpoq, taannalu kuisereerami ’ingerlaqqippoq nuannaarluni’. Qularnanngitsumik nunagisamini nutaarsiassamik nuannersumik oqaluussissutiginnittunngorpoq aallussilluartoq. — Apustilit Suliaat 8:36-39.

⁴ Tunniulluinnarneq kuisinnerlu tuaviuussassaanatillu eqqarsaqqaarnani iliuuserineqartussaanngillat. Soorlumi kunngip atorfilittaanik Etiopiamiumik oqaluttuami ersertoq ilaannikkut sallusuissummik Guutip oqaasianeersumik tusarnermik kingunitsianngua kuisittoqartarsimavoq. * Taamaammat naleqquppoq apeqqutinik ukuninnga eqqarsaatiginninnissaq: Qanoq ililluni kuisinnissamut piareersartoqarsinnaava? Qanoq utoqqaatigineq qanoq pingaaruteqartigaa? Inuk kuisitsinnani sutigut erseqqissumik anersaakkut siumukarsimasariaqarpa? Tamanillu pingaarnerpaamik: Sooq Jehovap kiffami taamatut iliuuseqarnissaat piumasaraa?

Neriorsuut pingaartorsiornartoq

5, 6. (a) Itsaq Jehovap innuttai taassuma asanninneranut qanoq periarpat? (b) Kuisinnikkut Guutimut qanittumik qanoq ittumik attaveqalersinnaavugut?

⁵ Jehovap Israelikkut Egyptenimit aniguisereeramigit ’immikkoortillugit pigisassarsiarinissaannut’, asanissaannut, illersornissaannut ’inuiaqatigiittullu illernartunngortinnissaannut’ piumassuseqarpoq. Inuiaqatigiilli taamatut pilluaqquneqassagunik Guutip asanninneranut aalajangersimalluinnartumik periartariaqarput. Taamaaliorput ’Jehovap oqaasii tamaasa malillugit iliorniarlutik’ angernermikkut taassuminngalu angerfigeqatiginninnermikkut. (2 Mosesi 19:4-9) Ukiuni hundredelinni siullerni Jiisusip imminik malinnittut inunnik inuiannit tamaneersunik ajoqersuganngortitsiortoqquai, ajoqersuutaanillu akuerinnittut kuisipput. Jiisusi Kristusimut uppertunngorsimaneq tamatumalu kingorna kuisinneq Guutimut attaveqarluarnissamut aalajangiisuupput. — Matthæusi 28:19, 20; Apustilit Suliaat 2:38, 41.

⁶ Biibilimi oqaluttuarineqartuni tamakkunani erserpoq Jehovap imminut kiffartorumallutik pingaartorsiornartumik neriorsuisut neriorsuutiminnillu eqqortitsisut pilluaqqusarai. Tunniulluinnarneq kuisinnerlu kristumiunut iliuuserisassaapput pisariaqartut Jehovap pilluaqqusineranik kinguneqartartut. Taassuma aqqutigeqqusaanik maleruaanissarput taassumanngalu siulersorneqarnissarput aalajangiusimavarput. (Tussiaat 48:15) Taamaammat Jehovap assersuutaasumik tasiorpaatigut aqqutikkut ingerlavigisariaqakkatsigut siulersorluta. — Tussiaat 73:23; Esaja 30:21; 41:10, 13.

7. Sooq tunniulluinnarneq kuisinnerlu inuup nammineq aalajangigassaraa?

⁷ Tunniulluinnarnissamut kuisinnissamullu kajumississutigisarput tassaasariaqarpoq Jehovamik asanninneq taassumunngalu kiffartorumaneq. Kuisittoqassanngilaq atuaqqissaarnerup naammalernerarneqarnera ikinngutilluunniit kuisittussaanerat pissutigiinnarlugu. Soorunami angajoqqaat kristumiullu inersimalluartut allat tunniulluinnarnissaq kuisinnissarlu eqqarsaatigeqqullugu kajumissaarisinnaapput. Assersuutigalugu apustili Petrusip piinsip ulluani oqalugiaatiminik tusarnaartut kajumissaarpai ’kuiseqqullugit’. (Apustilit Suliaat 2:38) Taamaakkaluartorli tunniulluinnarnerput inuttut nammineq aalajangigassaraarput, kialuunniillu aalajangiissussinnaanngilaatigut. Guutip piumasaatut iliornissaq nammineq aalajangertussaavarput. — Tussiaat 40:9.

Kuisinnissamut piareersarluarneq

8, 9. (a) Sooq naalungiarsunnik kuisineq Biibilimut naapertuutinngila? (b) Inuusuttut kuisitsinnatik anersaakkut sutigut siumukarsimasariaqarpat?

⁸ Meeqqat paasisimasaqassusertik tunngavigalugu tunniulluinnarsinnaappat? Biibilimi eqqaaneqanngilaq kuisinniarluni qanoq utoqqaatigisariaqarneq. Qularnanngilluinnarporli naalungiarsuit uppertunngorsinnaannginnerat, suliamikkut uppernerminnik ersersitsisinnaannginnerat aamma  Guutimut tunniulluinnarsinnaannginnerat. (Apustilit Suliaat 8:12) Kristumiut ukiuni hundredelinni siullerni inuusimasut pillugit oqaluttuarisaanermik ilisimatooq Augustus Neander atuakkiamini Allgemeine Geschichte der christlichen Religion und Kirche-mi ima allappoq: „Aallaqqaammut inersimasuinnaat kuisittarput, upperneq kuisinnerlu imminnut atalluinnartutut isigineqarmata.“

⁹ Inuusuttut ilaat allanut naleqqiullugit anersaakkut ittunik paasinniaarnerusartut, allat paasinninniaasaarnerusarput. Inuusuttulli kuisitsinnatik namminneq Jehovamut attaveqalersimasariaqarput, sallusuissutinik Biibilimeersunik tunngaviusunik tunniulluinnarnerullu qanoq paasisariaqarneranik paasinnilluarsimasariaqarlutik, soorluttaaq inersimasut taamaattariaqartut.

10. Tunniulluinnartinnani kuisitsinnanilu suut iliuuserineqaqqaartariaqarpat?

¹⁰ Jiisusip ajoqersukkani peqquai peqqussutiminik tamanik maleruaanissaq inunnut allanut ilinniartitsissutigeqqullugu. (Matthæusi 28:20) Taamaattumik nutaat sallusuissut pillugu eqqorluartumik ilisimasaqarneq pigiliuteqqaartariaqarpaat Jehovamut taassumalu oqaasianut uppertunngorniassagamik. (Romamiut 10:17; 1 Timotheusi 2:4; Hebræerit 11:6) Sallusuissummit Biibilimeersumit inuup uummataa killinneqaraangat, taava inuup taassuma allamik isumataarnissamut inooriaaserisimasaminillu saannissamut tamanna killinneqaatigissavaa. (Apustilit Suliaat 3:19) Naggataatigut inuk taanna Jiisusip peqqusisimaneratut Jehovamut tunniulluinnarusulertarpoq kuisikkumalertarlunilu.

11. Sooq kuisitsinnani aalajangersimasumik oqaluusseqataasarnissaq pingaaruteqarpa?

¹¹ Kuisitsinnani iliuuserineqartussaq pingaarutilik alla tassaavoq Guutip naalagaaffia pillugu nutaarsiassamik nuannersumik oqaluussissutiginninnermut peqataaneq. Tamanna tassaavoq Jehovap ulluni kingullerni makkunani innuttaminut suliareqqusaasa pingaarnerpaartaat. (Matthæusi 24:14) Oqaluussisartut kuisimanngitsut taamaalillutik upperisartik pillugu allanik oqaloqateqarnissartik nuannaarutigisinnaavaat. Aamma suliassamut tamatumunnga peqataagaangamik, tamanna kuisinnermik kingorna aalajangersimasumik aallussilluarlutillu oqaluusseqataasarnissaminnut piareersaatigisarpaat. — Romamiut 10:9, 10, 14, 15.

Kuisinnissannut akornutissaqarpit?

12. Immaqa suut pissutigalugit ilaat kuisinnissamut tunuarsimaartarpat?

¹² Ilaat kuisinnissaminnut nangaapput akisussaaffittaa akisussaaffigiumannginnamikku. Paasivaat Jehovap najoqqutassiaanik maleruaassagunik inuunerminni allannguingaatsiartariaqarlutik. Immaqaluunniit isumakuluutigaat kuisereerunik Guutip piumasaqaataasa maleruaruminaatsinnissaat. Ilaat allaat ima eqqarsartarput: „Immaqa unioqqutitsisuussaanga ilagiinnullu ilaajunnaarsinneqarlunga.“

13. Jiisusip nalaani inuit ilaasa taassumunnga ajoqersuganngornissamut suut akornutigaat?

¹³ Jiisusip nalaani ilaasa nammineq soqutigisat ilaqutariittullu attaveqatigiilluarneq ajoqersuganngornissaminnut akornutigaat. Allakkanik ilisimasoq oqarsimavoq Jiisusi sumunnaraluarpalluunniit malinniarlugu. Jiisusilli oqarfigaa amerlanertigut unnuiffissaqartarnaniluunniit. Jiisusi allamut maleqqummat, angut kajumissaagaa taanna akivoq ataatani ’iliartoqqaartariaqarlugu’. Jiisusi ingerlaannaq malissinnaagaluarpaa aatsaallu pisariaqalerpat ilaquttaminut akisussaaffini tamanna isumagalugu, angerlarsimaannarusunnerugunarporli ataatamilu toqunissaa utaqqillugu. Kiisalu pingajuat oqarpoq Jiisusimik malinnitsinnani inoqutini ’inuulluaqqujartoqqaarallartariaqarlugit’. Jiisusip taamatut nangaaneq ’tunummut qiviarnermut’ assersuuppaa. Taamaammat ’tunummut qiviarusuttut’  kristumiutut akisussaaffeqarumannginnerminnut utoqqatsissutissaminnik nassaartuaannarsinnaassagunarput. — Lukasi 9:57-62.

14. (a) Petrusi, Andreasi, Jaaku Johannesilu qanoq periarpat Jiisusip inunnik aalisartunngoqqullutik kajumissaarmatik? (b) Sooq Jiisusip nammaataata nammakkiunnissaanut nangaasariaqanngilagut?

¹⁴ Petrusip, Andreasip, Jaakup Johannesillu periarnerat allaanerulluinnarpoq. Jiisusip taakkua kajumissaarmagit maleqqulluni inunnillu aalisartunngoqqullugit qanoq pisoqarnera Biibilimi ima oqaluttuarineqarpoq: „Erniinnaq qassutitik ilaginnaannarlugit malippaat.“ (Matthæusi 4:19-22) Ingerlaannaq taamatut aalajangeramik Jiisusip kingusinnerusukkut oqaaserisaasa ukua ilumuussusiat namminneq misigaat: „Nammaatara ilissinnut pisissiuk, ilinniarfigisingalu qanilaarama uummatikkullu makitajuikkama; taava qasuerfissarsiumaarpusi tarnissinnut [tarnissigullu nukissaqalissaasi, NV]. Nammaatarami iluaqaaq, nammakkiussaralu oqeqaluni.“ (Matthæusi 11:29, 30) Ilumoorpoq kuisinnerup uagutsinnik akisussaaffeqalersitsinera, Jiisusilli uppernarsaavigaatigut akisussaaffik tamanna nammaatatut iluaqisutut oqeqisutullu uagutsinnik nukissaqalersitsingaartutut ittoq.

15. Guutip ikiuinissaa annertoqqusersuinissaalu naatsorsuutigisinnaagipput Mosesimik Jeremiamillu oqaluttuani qanoq erserpa?

¹⁵ Soorunami imminut ajukkunneq nalinginnaavoq. Mosesi Jeremialu aallaqqaammut misigipput Jehovap imminnut suliassiissutigisai suliarisinnaanagit. (2 Mosesi 3:11; Jeremia 1:6) Guutip taakkua qanoq eqqissisarpai? Mosesi ima oqarfigaa: „Uanga najussavakkit.“ Jeremialu ima neriorsorpaa: ’Uanga najorpakkit annaatissallutillu.’ (2 Mosesi 3:12; Jeremia 1:8) Uaguttaaq qularinngilarput Guutip annertoqqusersussagaatigut. Guutimik asanninneq taassuminngalu tatiginninneq iluaqutigalugit tunniulluinnarsimanitsinnik eqqortitsisinnaanitsinnik qularinnittuarneq ajugaaffigisinnaavarput. Apustili Johannesi ima allappoq: „Asanninneq ersinermik ilaqanngilaq, asanninnerulli naammatsittup ersineq peersittarpaa.“ (1 Johannesi 4:17, 18) Nukappiarannguaq kisimiilluni angalaguni ersisinnaavoq, ataatanili tasioraangamiuk toqqissisimasarpoq. Uaguttaaq Jehova uummatikkut iluunngarluta tatigigutsigu toqqissisimasinnaavugut, taassuma ’ingerlavissavut nalimmatsissammagit’ ingerlaqatigigaangatsinni. — Ussatit 3:5, 6.

Pisoq ataqqinninnermik ersersitsisoq

16. Sooq kuisittoq imermut morsutsitaasariaqarpa?

¹⁶ Kuisinneq sioqqutitsiarlugu kristumiutut kuisinnerup pingaaruteqassusia pillugu Biibili tunngavigalugu oqalugiartoqartarpoq. Oqalugiaatip tamatuma naalernerani kuisittussat qinnuigineqartarput kuisittussanut apeqqutit marluk akinerisigut uppernerminnik tamanut nalunaarutiginneqqullugit. (Romamiut 10:10; takuuk qupperneq 13-imi ungalusaq). Taava kuisittussat imermut morsutsinneqartarput, taamaalillutillu Jiisusip nammineq maligassiaa malittarpaat. Biibilimi ersersinneqarpoq Jiisusi kuisereerami ’imermit qaqisoq’. (Matthæusi 3:16; Markusi 1:10) Erseqqippoq Johannesi Kuisisup Jiisusi imermut morsutsissimagaa. *  Imermut morsutsitaaneq inuunitsinni allannguilluinnarsimanermut naleqquttumik assersuutaavoq — siornatigut inooriaaserisimasarput eqqarsaatigalugu assersuutaasumik ’toquvugut’ Guutimullu kiffartornermi inuuneq nutaaq aallartillutigu.

17. Kuisittussat isiginnaartullu tamarmik qanoq ilillutik kuisinnerup ataqqinarpaluttumik pinissaanut peqataasinnaappat?

¹⁷ Kuisinneq pimoorunneqartussaallunilu nuannersuuvoq. Biibilimi ersersinneqarpoq Jiisusi Johannesip kuussuaq Jordanimut morsutsimmani Guutimut qinusoq. (Lukasi 3:21, 22) Kuisittussat ullumikkut Jiisusip maligassiaanut tamatumunnga naapertuuttumik ataqqinnippaluttuusariaqarput. Aamma ulluinnarni assuarnaatsumik atisalersortaqqulluta Biibilimi kajumissaarneqaratta, ullormi kuisiffitsinni siunnersuummik tamatuminnga maleruaanissarput pingaaruteqarnerungaarpoq! (1 Timotheusi 2:9) Isiginnaartut aamma ataqqinnissinnaapput kuisittussanut oqalugiaat tusarnaaqqissaarlugu kuisittoqarneralu eqqissillutik isiginnaarlugu. — 1 Korinthimiut 14:40.

Ajoqersukkatut kuisimasuunerup pilluaqqussutissartai

18, 19. Kuisinneq sunik immikkut pisinnaatitaaffittaqarlunilu pilluaqqussutissartaqarpa?

¹⁸ Guutimut tunniulluinnaraangatta kuisikkaangattalu ilaqutariissuarnut asseqanngitsunut ilaalertarpugut. Pingaarnerpaamik Jehova Ataatagilerlugulu ikinngutigilertarparput. Kuisinngikkallaratta Guutimut takornartaavugut; maannali taassumannga saammaanneqarpugut. (2 Korinthimiut 5:19; Kolossemiut 1:20) Kristusip pilliutaa aqqutigalugu Guutimut qanillivugut, taannalu uagutsinnut qanillivoq. (Jaaku 4:8) Pruffiiti Malakip nassuiarpaa Jehovap aterminik atuisut tamatuminngalu taaguuteqartut malugisarlugillu tusarnaartarai, aamma taakku eqqaamaneqaqqullugit mappersakkamini atii allattortarai. Guuti ima oqarpoq: „Taakku uanga pigissavakka. . . . Qajassuutissavakka, soorlu ataatap ernini kiffartortini qajassuuttaraa.“ — Malaki 3:16-18.

¹⁹ Kuisinneq pissutigalugu aamma silarsuaq tamakkerlugu qatanngutigiissuarnut ilanngussinnaanngortarpugut. Apustili Petrusip Jiisusimut apeqqutigimmagu taassuma ajoqersugai pilliutigisimasaminnut taarsiullugu sunik pilluaqqussutisiumaarnersut, Jiisusi ima neriorsuivoq: „Kinaluunniit illuminik, qatanngutiminik angutinik arnanillu, ataataminik anaanaminillu, qitornaminik narsaamminilluunniit atera pillugu qimatsisimasoq pissarseqqissaaq 100-riaammik inuunerlu naassaanngitsoq kingornutissallugu.“ (Matthæusi 19:29) Ukiut arlallit tamatuma kingorna Petrusip „qatanngutigiissutut peqatigiit tamaasa“ „silarsuarmiittut“ allaatigai. Petrusi qatanngutiminit nammineq ikiorneqarsimavoq qatanngutigiissuarnullu asannittunut ilaanerup pilluaqqussutissartai misigisimallugit. Uaguttaaq tamanna misigisinnaavarput. — 1 Petrusi 2:17, NV; 1 Petrusi 5:9.

20. Kuisikkutta sumik nuanningaartumik periarfissaqalissaagut?

²⁰ Jiisusip aamma eqqartorpaa imminik malinnittut ’inuuneq naassaanngitsoq kingornutissagaat’. Aap, tunniulluinnarlutalu kuisikkutta ’inuuniviup pigilernissaanut’ — tassa Guutip silarsuassaani nutaami naassaanngitsumik inuulernissamut — periarfissaqalissaagut. (1 Timotheusi 6:19) Uagut nammineq siunissarput ilaquttattalu siunissaat pitsaanerusumik tunngavilersinnaanerparput? Taama nuannertigisumik siunissaqaratta ’Jehovap Guutitta aqqani soraajuitsumik, aap allaat naassaanngitsumik, saqisinnaassaagut’. — Mika 4:5, NV. (wE 4/1 06)

[Quppernerup ataani ilanngussaq]

Uku nassuiarsinnaavigit?

• Jehovap asanninneranut qanoq periartariaqarpugut, aamma sooq?

• Kuisitsinnata sutigut anersaakkut siumukartariaqarpugut?

• Unioqqutitsinissamut annilaanganeq akisussaaffeqarumannginnerluunniit sooq kuisinnissamut tunuarsimaassutigisariaqanngilavut?

• Jiisusi Kristusimut ajoqersukkat kuisimasut pilluaqqussutissat nuanningaartut suut iluaqutigisinnaavaat?

[Atuaqqissaarnermi apeqqutit]

[Qupp. 17-mi assiliartaq]

„Suna akornutaassava kuineqarnissannut?“

[Qupp. 20-mi assiliartat]

Kuisinneq pimoorunneqartussaallunilu nuannersuuvoq