Kristusip ajoqersuutaa ullumikkut sumi malinneqarpa?

JIISUSI KRISTUSI inuit inuusimasut pingaarnerpaartaasa ilaattut sumi tamaani isigineqarpoq. Inuppassuillumi isumaqarput inuit pingaarnerpaartarigaat. Ukiuni 2000-ingajanni ajoqersuutaa sunniuteqangaarsimavoq inuit inuunerannut — „inuinnannguit inussiarnersut ajunngitsullu maluginiarnanngitsumik inuunerannut aammattaarlu ikiuiniaqatigiiffiit suliniarluartut suliaannut,“ tuluk atuakkiortoq Melvyn Bragg allappoq.

Kristumiussuseq qanoq isigineqarpa?

Kristumiussuseq „inuiaat anersaakkut siuariarnerisa annerpaat ilaattut“ oqaatigineqarsimavoq. Glasgow Caledonian University-meersoq David Kelso ima isiginnittaaseqarpoq: „[Kristumiussuseq] ukiuni 2000-ini oqaluttuarisaanermini eqqumiitsuliornerup, illuliassanik titartaarsarnerup, isumaliutersortarnerup, nipilersornerup inuillu atugarisaasa tungaasigut nalissaqanngitsunik angusarpassuaqarpoq.“

Allarpassuilli allatut isiginnittaaseqarput. Kristumiussutsip ordbogimi ima nassuiarneqarnera akuersaarpaat: „Upperisarsiorneq Jiisusi Kristusimik ajoqersuutaanillu tunngaveqartoq, Biibilimillu allakkatut illernartutut atuisoq.“ (Den Danske Ordbog) Taamatulli isumallit upperisarsioqatigiit kristumiussutsimut sinniisuunerartut iliuusii maajugaat.

Assersuutigalugu tyskip isumaliutersortartup Friedrich Nietzschep (1844-1900) kristumiussuseq „inuiannut naassaanngitsumik kanngunarsaataasutut“ taavaa. Taassuma kristumiussuseq „perloqqussuterujussuartut, ajortunngungaarsimanertut, . . . anguniakkani anguniarlugit aserorsaarinerit, peqqusersusaarnerit, malunnaarsaarnerit ajortisaarinerillu suulluunniit atortarai“ allaatigaa. Nietzschep isiginnittaasia ingasattajaartorujussuugaluarpoq, misissueqqissaartartulli ingasaassinnginnerusut arlallit assingusumik isummersimapput. Sooq? Ukiut  hundredelikkuutaat ingerlaneranni kristumiuunerartut pissusilersornerat Jiisusi Kristusip pissusiisa assinginik ilisarnaateqarnatik, „ajortunngungaarsimanerulli, naakkittaatsumik pinerlunnerit Guutimillu mitaatiginninnerit“ nalinginnaanerannik ilisarnaateqarmata.

Kristusip kristumiut najorpai?

Taamaattumik ima aperinissamut pissutissaqarpoq: „Ullumikkut Kristusip kristumiut najorpai?“ „Soorunami,“ ilaat ingerlaannaq akissapput. „Ajoqersukkani ’ullut tamaasa silarsuup naggatissaanut allaat’ najorumallugit neriorsorpai, ilaa?“ (Matthæusi 28:20) Ilumut, taamaaliorpoq. Isumaqarpa imminik malinninnerartut tamaasa qanorluunniit pissuseqaraluarpata najorumaarlugit?

Eqqaamajuk Jiisusip nalaani upperisarsiornikkut siuttut ilaat isumaqarmata Guutip piumasaqaateqanngivilluni najortuassagaatik. Guutip Israelikkut siunertamut immikkut ittumut qinersimammagit, upperisarsiornikkut siuttut ilaat isumaqarput Guutip ajattulinngisaannassagaatik — qanorluunniit ilioraluarunik. (Mika 3:11) Naggataatigulli Guutip inatsisaanik najoqqutassiaanillu itigartitsinerminni ingasaassivallaalerput. Taamaattumik Jiisusip toqqaannartumik ima oqarfigai: „Illorsi ilissinnut qimagaassaaq inuerullugu.“ (Matthæusi 23:38) Upperisarsiornikkut aaqqissuussineq tamarmi Guutimit iluarisaajunnaarpoq. Ajattorpaa illoqarfiillu pingaarnersaat, Jerusalemi, naalaffillu tassaniittoq ukiumi 70-imi Romamiunit piuneerutitillugit.

Tamatumunnga assingusumik kristumiut ullumikkut nalaataqarsinnaappat? Jiisusip ajoqersukkani „silarsuup naggatissaanut allaat“ najorumallugit neriorsuumminut tunngatillugu sunik piumasaqarfiginerai sammeriartigu.

[Qupp. 3-mi assiliartaq]

Jiisusi Kristusip ajoqersuutaa silarsuarmi tamarmi inuit millionilikkuutaat inuunerannut sunniuteqangaarsimavoq