Tatitusaaritsi
Tatitusaaritsi
„Tatitusaaritsi, ilissi ulluni makkunani tusartusi pruffiitit oqaasiinik.“ — ZAKARIA 8:9.
1, 2. Sooq Haggajip Zakariallu allagaat soqutigisariaqarpavut?
HAGGAJIP Zakariallu siulittuutitik ukiut 2500-t missiliorlugit matuma siorna allakkaluaraat ullumikkut atorluarsinnaasupilussuupput. Oqaluttuat allakkani taakkunani marlunniittut oqaluttuarisaanikkut soqutiginaateqaannanngillat. Taakkua ’siornatigut allagaasunut tamanut’ ilaapput, „uatsinnut ilinniutissaallutik“. (Romamiut 15:4) Allakkani taakkunani atuakkatta amerlanersaat Guutip naalagaaffiata 1914-imi qilammi pilersinneqarneraniilli pisimasunik eqqarsaatiginnilissutigaavut.
2 Pisimasut pissutsillu Guutip itsaq innuttaasa misigisimasaat pillugit apustili Paulusi ima allappoq: „Tamakku tamarmik taakkununnga nalliupput mianersoqqussutaallutik, allassimappullu uatsinnut ullut naggatissaannik angumerinnittunut ilitsersuutaallutik.“ (1 Korinthimiut 10:11) Taava immaqa ima apererusulerputit: ’Haggajip Zakariallu allagaat ullutsinni qanoq iluaqutaasinnaagamik?’
3. Haggajip Zakariallu sumut tunngasut sammivaat?
3 Soorlu allaaserisap matuma siuliani eqqaaneqartoq, Haggajip Zakariallu siulittuutaat piffissamut juutit Babylonimi tigusaaqqanerannit aniguisitaanerata nunamullu Guutip tunniussaanut uternerata kingunitsiannguanut tunngavoq. Pruffiitit marluk taakkua naalaffimmik sanaqqiinermut tunngasut sammivaat. Ukiumi 536-mi u.n.s. juutit naalaffiup toqqaviliornera naammassivaat. Utoqqaat ilaasa qanga pissutsit eqqarsaatigigaat amerlanersaasa maanna pisut qiimmattaatigaat. Ullutsinnili suli pingaaruteqarnerusumik pisoqarsimavoq. Qanoq pisoqarsimagami? — Ezra 3:3-13.
4. Sorsunnersuup siulliup kinguninngua qanoq pisoqarpa?
4 Sorsunnersuup siulliup kinguninngua Jehovap kiffai tanitat Babylonimi Angisuumi tigusaaqqanerminnit aniguisitaapput. Tamanna Jehovap annertoqqusersuineranut uppernarsaataavoq pingaaruteqartoq. Upperisarsiornikkut siuttunit taakkualu politikkikkut pilersaapiloqataannit Biibilimik atuaqqissaartut tamanut ammasumik oqaluussinerat ilinniartitsinerallu unitsinneqartutut isikkoqaraluarpoq. (Ezra 4:8, 13, 21-24) Jehovalli oqaluussinermut ajoqersuganngortitsiortornermullu akornutaasut piiarpai. 1919-imiilli ukiut qulikkuutaat ingerlaneranni Guutip naalagaaffianik oqaluussissutiginninneq siumukarpoq, tamannalu unitsinneqarsinnaasimanngilaq.
5, 6. Zakaria 4:7-imi allassimasut naammassinninnissarsuarmut sumut tikkuussippat?
5 Qularissanngilarput ullutsinni Jehovap kiffaasa naalattut oqaluussinerat ajoqersuganngortitsiortornerallu taassuma annertoqqusersuineratigut siumukartuarumaartut. Zakaria 4:7-imi ima allassimavoq: „Ujarak inaarutissaq taassuma aassavaa inuit ima torlulatillugit: ’Pinnissusia, pinnissusia.’“ (1990) Tamanna ullutsinni naammassinninnissarsuarmut sumut tikkuussiva?
6 Zakaria 4:7 Naalakkamik kisimi oqartussaasumik Jehovamik pallorfiginninnerup ilumoortup taassuma naalaffiata anersaakkut ittup silarliani nunarsuarmiittumi kisimi atulerfissaanut tikkuussivoq. Naalaffik taanna tassaavoq aaqqissuussineq. Taanna aqqutigalugu Jehova qanillisinnaallugulu pallorfigisinnaavarput Jiisusi Kristusip utertitsissutitut pilliutaa tunngavigalugu. Ilumoorpoq naalaffissuaq anersaakkut ittoq ukiut hundredellit siulliit nalaanniilli piusimasoq, tamatumali silarliani nunarsuarmiittumi pallorfiginninneq ilumoortoq suli tamakkiisumik atulersinneqanngilaq. Inuit millionillit maanna naalaffiup anersaakkut ittup silarliani nunarsuarmiittumi Jehovamut kiffartorput. Taakkua makititaasimasullu millionillit Jiisusi Kristusip ukiuni tusindini naalakkersuinerani naammalluinnartunngoriartuaartinneqassapput. Ukiut tusindit taakkua naalerneranni nunarsuarmi minguiarneqarsimasumi Guutimik ilumoortumik pallorfiginnittuinnaat kingulerutissapput.
7. Ullutsinni pallorfiginninnerup ilumoortup kisimi atulersinneqarnissaanut tunngatillugu Jiisusi qanoq inissisimaffeqarpa, aamma sooq tamanna uagutsinnut qiimmassaataava?
7 Naalagaatitaq Zerubbabeli palasiunerlu Josva ukiumi 515-imi u.n.s. naalaffik naammassineqarmat najuupput. Jiisusip pallorfiginninnerup ilumoortup kisimi atulersinneqarnissaanut tunngatillugu suliassaa tamatumunnga assingusoq Zakaria 6:12, 13-imi ima siulittuutigineqarpoq: „Ima oqarpoq Katersaarsuit [Jehovaat]: ’Tikiukkumaarpoq angut Semakimik ateqartitaq; taanna inimini naalerumaarpoq. [Jehovap] naalaffissaa sanajumaarpaa. . . . Ataqqinassuseq pigilerumaarpaa naalakkersuissallunilu issiavissaarsuarmini, palasiusoq [palasiullunilu, 1900/1961] issiavissaarsuarmini issiajumaarpoq.’“ Jiisusip — qilammiittup Daavillu kinguaavinik kunngikkormiunik ’naajartortitsisup’ — naalaffimmi anersaakkut ittumi sulinermik tapersersuinera eqqarsaatigalugu, isumaqarpit sulinerup tamatuma siumukarnissaa akornuserneqarsinnaasoq? Naamik, taamaattoqarsinnaanngilaq! Ulluinnarni isumakuluutivut allamut saasaatiginagit, tamanna kiffartornitsinni pinertusaarnissamut kajumississutigisariaqarparput, ilaa?
Pingaarnersiuineq
8. Sooq naalaffimmi anersaakkut ittumi sulineq inuunitsinni pingaarnerpaatittariaqarparput?
8 Jehovamit annertoqqusersorneqarumallutalu pilluaqquneqarumalluta naalaffimmi anersaakkut ittumi sulineq inuunitsinni pingaarnerpaatittariaqarparput. Juutit oqarsimanerattut oqarnata ’[piffissaq] suli nalliutinnginnerarlugu’, eqqaamasariaqarparput maanna „ullussani kingullerni“ inuulluta. (Haggaji 1:2; 2 Timotheusi 3:1) Jiisusip ajoqersukkami aalajaatsut Guutip naalagaaffia pillugu nutaarsiassamik nuannersumik oqaluussissutiginnikkumaarnerat ajoqersuganngortitsiortorumaarnerallu siulittuutigaa. Kiffartornermi immikkut pisinnaatitaaffipput sumiginnarnaveersaartariaqarparput. Oqaluussineq ilinniartitsinerlu, silarsuarmit akerlilersorneqarneq pissutigalugu unitsikkallarneqartut 1919-imi aallarteqqinneqarput, sulili naammassineqanngillat. Naammassineqarumaarneralli qularissanngilat!
9, 10. Jehovamit pilluaqqusaanissamut suna aalajangiisuua, tamannalu uagutsinnut qanoq isumaqarpa?
9 Inuiattut inuttullu ataasiakkaatut qanoq eqiasuitsigaluta pimoorussitigalutalu sulinerput naapertorlugu pilluaqquneqassaagut. Jehovap neriorsuutaa maluginiariaruk. Juutit uummatikkut iluunngarlutik pallorfiginnileqqinniariartut pimoorullugulu naalaffimmut toqqavilioqqilerniariartut Jehova ima oqarpoq: „Ulloq manna aallarnerfigalugu pilluaqqusissaanga.“ (Haggaji 2:19) Jehovamit iluarisaalluinnaqqilissapput. Maanna eqqarsaatigeriakkit pilluaqqussutissat Guutip ima oqarluni neriorsuutigisai: „Karrit naalluassapput [Eqqissinartumik kinguneqartussaammata, 1900/1961], viinnequtillu inerititaqassapput; nuna naatitaqassaaq qilallu isugutatsitsissalluni. Tamakku tamaasa pigitikkumaarpakka inuiaat ukua amiakkuinut.“ — Zakaria 8:9-13.
10 Jehovap uagutsinnut suliassiissutaa eqiasuilluta uummatikkullu nuannaarluta suliarigutsigu, taassuma juutinik taakkuninnga anersaakkut pigisatigullu pilluaqqusisimanermisut uagut pilluaqqujumaarpaatigut. Pilluaqqussutit taakku ilaatigut tassaapput eqqisseqatigiinneq, toqqissisimaneq, pigissaarneq anersaakkullu ineriartorneq. Paasisariaqarparpulli naalaffimmi anersaakkut ittumi Jehovap peqqusineratut sulinerput Guutimit pilluaqqusaajuarnissatsinnut aalajangiisuusoq.
11. Qanoq misissoqqissaarsinnaavarput suut pingaarnerpaatinnerlugit?
11 Maanna piffissanngorpoq ’atukkatsinnik maluginiaanissamut’. (Haggaji 1:5, 7) Inuunitsinni sunik pingaarnerpaatitsinitsinnik eqqarsaatiginninnissamut piffissaqartariaqarpugut. Jehovap ullumikkut uagutsinnik pilluaqqusineranut aalajangiisuusut tassaapput taassuma aqqanik uagut qanoq qutsissisitsitiginerput, aamma taassuma naalaffiani anersaakkut ittumi uagut qanoq suleqataatiginerput. Imminut ima aperisinnaavutit: ’Siornatigut pingaarnersiuisarsimanittut pinnanga allatut pingaarnersiuisalersimavunga? Guutimik, sallusuissummik Biibilimeersumik Guutimullu kiffartornermik ilungersuussinikka, kuisinnginninni ilungersuussininnut naleqqiullugit qanoq ippat? Ilorrisimaarnissara ima pingaartitsigaara Jehova taassumalu naalagaaffia pillugit qanoq sammisaqartigisinnaaninnut tamanna sunniuteqarluni? Inunnut qununeq — inuit allat qanoq eqqarsassanerannik annilaangaginninneq — ilaatigut tunuarsimaassutigisarpara?’ — Saqqummersitat 2:2-4.
12. Juutit akornanni pissutsit qanoq ittut Haggaji 1:6, 9-mi erseqqissarneqarpat?
12 Soorunami kissaatiginngilarput Guutip aterminik qutsissisitsinngitsoorsimanerput pillugu uagutsinnik pilluaqqusinngitsoornissaa. Eqqaamajuk juutit nunaminnut utertut naalaffiliorneq aallartilluareerlugu ’namminneq illutik ulapputigigaat’, soorlu Haggaji 1:9-mi taama allassimasoq. Inooriaasertik namminnerlu pisariaqartitatik pingaartittupilussuanngorpaat. ’Annikitsuinnarnilli katersuisoqartarpoq’, aamma nerisassat, imigassat atisassallu oqortut amigaatigineqarput. (Haggaji 1:6) Tamatumunnga pissutaavoq Jehovap pilluaqqusinnginnera. Tamanna ilinniutigisinnaavarput?
13, 14. Haggaji 1:6, 9-mit ilikkakkavut qanoq atorsinnaavavut, aamma sooq tamanna pingaaruteqarpa?
13 Jehovamut kiffartorneq tunulliullugu imminut iluarusutsikkumanerput akiortariaqarparput Guutimit pilluaqqusaajuarumalluta. Aamma taamaaliortariaqarpugut allamut saasaatigisarput aningaasarsiornermik ulapputiginninnerugaluarpat, pisuunngupallanniarnerugaluarpat, silarsuarmi matumani pilerinartumik atorfittaarumalluni qaffasinnerusumik ilinniagaqarniarneq pillugu pilersaarutinik piviusunngortitsiniarnerugaluarpat inuttulluunniit ineriartornissatsinnik pingaartitsinerugaluarpat.
14 Tamakkua immaqa ajortuliornerunngikkaluarput. Inuunermulli naassaanngitsumut sanilliullugit ’suliaapput toqungasut’. (Hebræerit 9:14) Tamanna qanoq paasisariaqarami? Tassa anersaakkut toqungallutillu asuliinnaallutillu inerititaqanngillat. Tamakkuninnga suliaqartuaraanni, anersaakkut toqunermik kinguneqarsinnaavoq. Apustilit nalaanni kristumiut tanitat ilaannut taama pisoqarsimavoq. (Filippimiut 3:17-19) Aamma ullutsinni kristumiut ilaannut taama pisoqarsimavoq. Immaqa ilisarisimasaqarputit kristumiutut sammisassanik sammisaqassaariartuaarsimasunik ilagiinnillu qimagukkiartuaarsimasunik; maannalu taakkua Jehovamut kiffartuleqqerusuppasinngillat. Qamannga pisumik neriuutigaarput inuit taamaattut Jehovamut uternissaat, ilumoorporli ’sulianik toqungasunik’ noqqaassuteqarneq Jehovamit iluarisaajunnaarnermik pilluaqquneqarunnaarnermillu kinguneqarsinnaasoq. Taamatut pisoqartarnera assut alianarpoq, tamanna nuannaarnermik eqqissinermillu, Guutip anersaavata inerititaanik, annaasaqarnermik kinguneqartarmat. Aamma takorlooriaruk qatanngutigiissuarnut kristumiunut asannittunut ilaajunnaarneq qanoq annaasaqataatigissanersoq! — Galatiamiut 1:6; 5:7, 13, 22-24.
15. Pallorfiginninnitsinnik ilumoorussinissaq pillugu Haggaji 2:14-imi suna paasivarput?
15 Ilumoorulluinnarneqartussaapput. Maluginiariaruk Jehovap juutit illumik imminik pallorfiginnittarfiusumik sumiginnaallutik namminneq illuminnik, piviusumik assersuutaasumillu, iluarsaassisut qanoq isiginerai. Haggaji 2:14-imi ima allassimavoq: „’Taamattaaq uannut ipput inuiaat uku, inuiaqatigiit uku ilumut taamaapput uanga isinni,’ oqarpoq [Jehova]. ’Taama ipput assaasa suliaat tassanilu pilliutiginiagaat tamarmik: Minguttuupput!’“ Juutit soqutigisaqarpianngitsut pallorfiginninnermik ilumoortumik sumiginnaajuartillugit, Jerusalemimi pilliiviugallartumi pilliutaat assersuutaasut akuerineqarsinnaanngillat. — Ezra 3:3.
Jehova kiffaminik aalajaatsunik annertoqqusersuiniarluni neriorsuivoq
16. Zakariap takorruugai tunngavigalugit juutit suut qularutiginngilaat?
16 Zakariap takorruugai arfineq-pingasut aqqutigalugit juutit Jehovap peqqussutaanut naalallutik naalaffimmik sanaqqiisut Jehovamit annertoqqusersorneqarumaarnerminnik neriorsorneqarput. Takorruugaq siulleq naalaffiup naammassineqarumaarneranik aamma juutit naalallutik suliarisariaqakkaminnik suliaqartuartillugit Jerusalemip Judallu pigissaarnermik pilluaqquneqarumaarnerannik neriorsuutaavoq. (Zakaria 1:8-17) Takorruukkat aappaat naalagaaffiit pallorfiginninnermik ilumoortumik akerlilersuisut tamarmik nungutinneqarumaarnerannik neriorsuutaavoq. (Zakaria 2:1-4) Takorruukkat sinneri Guutip naalaffiliornermik sernissuiumaarneranut, inuit inuiappassuarneersut illumut Jehovamik pallorfiginnittarfimmut takkussuukkumaarnerannut, nunami eqqissineqarumaarlunilu toqqissisimaneqarumaarneranut, naalaffiliornermi akornutaasut qaangeruminaassorinartut qaangerneqarumaarnerannut, ajussutsip guutiitsuussutsillu peerneqarumaarnerannut inngilillu naalaffiliornermik nakkutilliillutillu sernissuiumaarnerannut uppernarsaataapput. (Zakaria 2:9, 15; 3:10; 4:7; 5:6-11; 6:1-8) Paasinarpoq Guutip annertoqqusersuinissaanik neriorsuutit tamakku pissutigalugit juutit naalattut inooriaatsiminnik allannguimmata suliamillu naammassinninnissamik, Guutip aniguisinniarlutik siunertarisaanik, pingaarnerpaatitsimmata.
17. Uagutsinnut neriorsuutigineqartut eqqarsaatigalugit imminut qanoq aperisariaqarpugut?
17 Pallorfiginninnerup ilumoortup ajugaalluinnarumaarneranik neriorsuut sulerusulissutigisariaqarparput illullu Jehovamik pallorfiginnittarfiup eqqarsaatigeqqissaarnissaanut kajumississutigisariaqarlugu. Imminut ima aperigit: ’Uanga upperigukku Guutip naalagaaffia pillugu nutaarsiassamik nuannersumik oqaluussissutiginninnissamut ajoqersuganngortitsiortornissamullu piffissanngortoq, taava inuuninni anguniakkakka pingaarnerpaatitakkalu tamatuminnga upperinninninnut naapertuuppat? Guutip oqaasiata siulittuutaasup atuaqqissaarnissaanut naammattumik piffissaqartarpunga? Tamakkua eqqarsaatigisarpakka, aamma uppeqatikka naapitakkalu allat tamakku pillugit oqaloqatigisarpakka?
18. Zakaria kapitali 14 naapertorlugu siunissami sunik pisoqarumaarpa?
18 Zakariap Babylonip Angisuup aserorneqarnissaa, Harmagedonimi sorsunnissamik kinguneqartussaq, innersuussutigaa. Ima allassimavoq: „Tassaajumaarpoq ulloq takisooq — [Jehovap] ilisimavaa [Jehovap ulluatut ilisimaneqartoq, NV] — ulluunani unnuaananilu, unnuuneralu allaat qaamasarumaarpoq.“ Aap, Jehovap ullua nunarsuarmi taassumunnga akeraasunut ulluujumaarpoq nillerlunilu taartoq! Jehovamulli kiffaasunut naassaanngitsumik qaammaqqutaajumaarpoq — Guutimit iluarisaanermik kinguneqarumaarpoq. Zakariap aamma allaatigaa silarsuassami nutaami Jehovap illernassusiata sunit tamanit oqaluussissutigineqarumaarnera. Guutip naalaffissuani anersaakkut ittumi pallorfiginninneq ilumoortoq nunarsuarmi pallorfiginninnerussaaq kisiartaasoq. (Zakaria 14:7, 16-19) Neriorsuut nuanningaarami! Siulittuutigineqartup eqquunnera misigiumaarparput, aamma Jehovap kisimi oqartussaanerata qutsissisinneqarnera takujumaarparput. Ulloq taanna ulluussaaq asseqanngitsoq Jehovamit pigineqartoq!
Pilluaqqussutissat ataavartut
19, 20. Sooq Zakaria 14:8, 9 qiimmaallannarpa?
19 Pisussap tamatuma mianernangaartup kingorna Saatani taassumalu anersaapilui susinnaajunnaarnerup itinersuanut parnaarunneqassapput. (Saqqummersitat 20:1-3, 7) Taava Kristusip ukiuni tusindini naalakkersuinerani inuit pilluaqquneqangaassapput. Zakaria 14:8, 9-mi ima allassimavoq: „Ullussami tassani imeq inuussutaasoq kuukkumaarpoq Jerusalemimit. Affaa kuukkumaarpoq immamut kangianiittumut affaalu immamut kitaaniittumut aasakkut ukiukkullu. [Jehova] kunngiujumaarpoq nunarsuarmut tamarmut. Ullussami tassani [Jehova] ataasiussaaq aqqalu ataasiussalluni.“
20 „Imeq inuussutaasoq“, imaluunniit „kuussuaq imermik inuussutaasumik . . . imilik“, Jehovap pilersitaanut inuunartunut assersuutaasoq, naalagaaffiup Missiarsikkoortup inissisimaffianit puilajuarumaarpoq. (Saqqummersitat 22:1, 2) Amerlangaartut Jehovamik pallorfiginnittut Harmagedonimilu aniguisut, toqup Adamimeersup pillagassaatitsineranit aniguisinneqarumaarput. Toqungasut allaat tamanna makititaanermikkut iluaqutigissavaat. Taamaalilluni Jehovap nunarsuarmut naalakkersuinerani ukiut nutaat aallartissapput. Inuit nunarsuarmiittut tamarmik Jehova qilammi nunamilu Kisimi Oqartussaasutut kisimilu pallorfigisassatut isigissavaat.
21. Suna aalajangiusimasariaqarparput?
21 Haggajip Zakariallu siulittuutigisaat, aamma eqquussimasut, eqqarsaatigalugit Jehovap naalaffimmi anersaakkut ittup silarliani uagutsinnut suliassiissutigisimasaanik suliarinnittuarnissamut pissutissaqarluarpugut. Qanortoq tamatta — pallorfiginninnerup ilumoortup kisimi atulersinneqarnissaata tungaanut — Guutip naalagaaffiata soqutigisaanik inuunitsinni pingaarnerpaatitsiniarsarisa. Zakaria 8:9-mi ima kajumissaarneqarpugut: „Tatitusaaritsi, ilissi ulluni makkunani tusartusi pruffiitit oqaasiinik.“ (wE 4/15 06)
Eqqaamavigit?
• Oqaluttuarisaanermi pisimasut ullutsinnut assingussuteqartut Haggajip Zakariallu allagaannik ullumikkut atorluarsinnaanngorsitsisut suuppat?
• Haggajip Zakariallu allagaat pingaarnersiuineq pillugu qanoq ilinniarfigaavut?
• Haggajip Zakariallu siulittuutaannik misissuinitsinni sooq neriulluarnissamut pissutissaqalerpugut?
[Atuaqqissaarnermi apeqqutit]
[Qupp. 28-mi assiliartaq]
Haggajip Zakariallu juutit kajumissaarpaat uummatikkut iluunngarlutik suleqqullugit taamaalillutillu Guutimit pilluaqquneqarlutik
[Qupp. 29-mi assiliartaq]
Illit ’nammineq illut ulapputigaajuk’?
[Qupp. 30-mi assiliartaq]
Jehovap pilluaqqusinissani neriorsuutigaa, pilluaqqusivorlumi