Jehovap oqaasia uumavoq

Tussiaatit immikkoortuisa siulliannit pingaarnersat

BIIBILIP atuagartaanut Pinngortitsisumut, Jehova Guutimut, unnersiutiginnissutitut erinarsuutaanerusunut taaguutigissallugu suna naleqquppa? Taaguut Tussiaatit naleqqunnerpaavoq. Tussiaatini Biibilip atuagartaasa takinersaannipput siulittuuterpaaluit erinarsuutillu nuannersut Guutip pissusiinik nuanningaartunik suliaanillu angingaartunik oqaluttuartut. Erinarsuutit ilarpassui taalliortut atugarliornerminni misigissusiinik ersersitsipput. Tussiaatit allataapput ukiut 1000-it missaasa ingerlaneranni — pruffiitip Mosesip nalaaniit aallarussaanerup kingornata tungaanut. Allattuupput Mosesi, kunngi Daavi allallu. Ullumikkut isikkuatut isikkulerlugu atuakkamik immikkoortortalersuisimasoq tassaasorineqarpoq palasi Ezra.

Itsarli Tussiaatit tallimanik immikkoortortaqarsimapput: (1) Tussiaatit 1-41; (2) Tussiaatit 42-72; (3) Tussiaatit 73-89; (4) Tussiaatit 90-106; aamma (5) Tussiaatit 107-150. Allaaserisami uani immikkoortoq siulleq sammissavarput. Tussiaatit immikkoortumi tamatumaniittut tamarmik, pingasut kisiisa pinnagit, Israelikkut kunngiannit Daavimit allataasorineqarput. Tussiaat 1, 10, 33-lu kimit allataanersut ilisimaneqanngilaq.

„GUUTIGA, QAQQARA QIMARNGUFFIGA“

(Tussiaat 1:1–24:10)

Tussiaammi siullermi Jehovap inatsisaanik nuannarisaqartoq pilluarnerarneqartoq tussiaatip aappaani Guutip naalagaaffia immikkut sammineqarpoq. * Tussiaatit taakkua amerlanersaat Guutimut ilungersortumik qinnutaapput. Assersuutigalugu Tussiaatit 3-5, 7, 12, 13 aamma 17 akeqqanit aniguisitaanissamik qinnutaapput. Tussiaat 8-mi Jehovap angingaassusia inuit suunngissusiannut sanilliunneqarpoq.

Jehovap innuttaminik illersuisuunera pillugu Daavi ima oqarpoq: „Guutiga, qaqqara qimarnguffiga.“ (Tussiaat 18:3) Jehova Tussiaat 19-imi Pinngortitsisutut Inatsisiliortutullu, Tussiaat 20-mi Annaassisutut Tussiaat 21-milu kunngimi tanitap annaassisuatut unnersiutigineqarpoq. Tussiaat 23-mi Paarsisorsuartut Tussiaat 24-milu kunngitut naalannaammik piginnittutut taalliarineqarsimavoq.

Allassimaffiit pillugit apeqqutit akineqartut:

2:1, 2 — Suunuku ’pilersaarutit iluatsittussaanngitsut’ inuiaat oqalorujuutigigaat? ’Pilersaarutit iluatsittussaanngitsut’ tassaapput nunami naalakkersuisut pissaaneqartuaannarniarlutik suliniuteqartuarnerat. Pilersaarutaat ’iluatsittussaanngillat’ siunertaat iluatsinngitsoortussaagamik. Inuiaat „[Jehovamut] taassumalu tanitaanut“ akerliusumik inissikkamik iluatsinnissartik ilimagisinnaanngilaat, ilaa?

2:7 — „[Jehovap] aalajangiinera“ suugami? Aalajangiinera tassaavoq naalagaaffik pillugu Jehovap ernerminik asasaminik Jiisusi Kristusimik angerfigeqatiginninnera.— Lukasi 22:28, 29.

2:12 — Inuiaat naalakkersuisuisa qanoq ’erneq kunissinnaagamikku’? Biibilip nalaani kunissineq ikinngutigiinnermut ilumoorfiginninnermullu ersiutaavoq. Assersuutigalugu pulaartut kunillugit tikilluaqquneqartarput. Nunarsuarmi kunngit peqquneqarput ’erneq kunissagaat’, ima paasillugu kunngitut Missiarsiusutut tikilluaqqussagaat.

 3:1 — Tussiaatit ilaanni qulequtaq versi 1-iutinneqartarpoq. Sooq ilaat qulequtaqartinneqarpat? Ilaatigut qulequttani paasissutissaqartarpoq tussiaasiortoq pillugu aamma/imaluunniit tussiaasiarineqarnerani pissutsit qanoq issimanersut pillugit, soorlu Tussiaat 3-mi taamaattoq. Qulequttat ilaanni tussiaatip siunertaa atorneqarnissaaluunniit allassimasarpoq (Tussiaat 4 aamma 5) nipilersuutaaluunniit pillugu ilitsersuutitaqarsinnaalluni (Tussiaat 6, 1900/1961).

3:3 — „Sela“ suugami? Inuppassuit isumaqarput oqaaseq taanna nipaalluni eqqarsarfissaqarniassammat erinarsortut kisimik imaluunniit erinarsortut nipilersortullu nipangernissaannut nalunaaqutaasoq. Eqqarsaat misigissuserluunniit erseqqissarniarlugu nipangillatsiartarput. Atuffassinermi oqaaseq atuarneqartariaqanngilaq.

11:3 — Tunngaviusut patajasunngortut suunuku? Tassaapput inuiaqatigiit tunngavigisaat — naapertuilluassuseq, inatsisit aaqqissugaanerlu. Tunngaviusut taakkua amigaataalerpata, innuttaaqatigiinni eqqissiviilliortoqalissaaq naapertuilluassuseerullunilu. Taamaattoqaleraangat ’iluartup’ Guuti tatigilluinnartariaqarpaa. — Tussiaat 11:4-7.

21:4 — Oqariartaaseq ’niaqorut kuultiusoq’ qanoq isumaqarpa? Oqaatigineqanngilaq oqariartaatsimi pineqarnersoq niaqorutivik imaluunniit Daavip ajugaanerpassui pissutaallutik kunngiussusiata naalannarnerulerneranut assersuutaanersoq. Tussiaalli siulittuutaasoq taanna tikkuussivoq Jehovap 1914-imi kunngiussutsimik, niaqorummut assersuunneqartumik, Jiisusi Kristusimut tunniussineranut. Niaqorutip kuultimit sanaajunerata takutippaa kunngiussusia pitsaanerpaajusoq.

22:2, 3 — Sooq Daavi misigisimasinnaava Jehovamit qimanneqarsimalluni? Daavi akeqqaminit tatineqangaarami ’ilersimavoq uummataa kutsuttut aqililluni iluani aattutut’. (Tussiaat 22:15) Daavi misigisimasinnaavoq Jehovamit qimanneqarsimalluni. Jiisusi qisummut kikiattorneqarami taamatuttaaq misigaaq. (Matthæusi 27:46) Daavip oqaasiinit erserpoq inuit atugarliungaarnerminni periaaserisartagaat inuppalaartoq. Daavilli qinnutaani Tussiaat 22:17-22-mi issuarneqartumi erseqqippoq Guutimut upperunnaarsimanngitsoq.

Ilinniarfigisinnaasavut:

1:1. Jehovamut asanninngitsut ilaginaveersaartariaqarpavut. — 1 Korinthimiut 15:33.

1:2. Ullut tamarluinnaasa anersaamut tunngasunik sammisaqartassaagut. — Matthæusi 4:4.

4:5. Kamalerutta pitsaanerpaassaaq nipangersimaannarutta kingusinnerusukkut peqqissimissutigisatsinnik oqartuunnginniassagatta. — Efesosimiut 4:26.

4:6, 1900/1961. Pilliutivut anersaakkut ittut aatsaat eqqortumik pissutiginiagaqarluta pilliutigigutsigik Jehovallu piumasaqaatai eqqortikkutsigik tassaassapput ’tunissutit iluartut’.

6:6. Inuuginnarusunnissatsinnut allamik pitsaanerusumik pissutissaqarnerpa? — Tussiaat 115:17.

9:13. Jehovap toqutsisut pillassavai, kisianni „ikiortariallit nillianerat“ eqqaamavaa.

15:2, 3; 24:3-5. Guutip kiffai ilumoortumik oqaluttariaqarput ilumuunngitsumillu  uppernarsaanaveersaartariaqarlutik allanillu ingutsinaveersaartariaqarlutik.

15:4. Neriorsuuterput Biibilimut akerliunngippat sapinngisarput tamaat oqaatsivut eqqortinniartariaqarpavut aamma uagutsinnut artornaraluarpalluunniit.

15:5. Jehovamut kiffaasutut aningaasat naapertuilluanngitsuliornermut atussanngilavut.

17:14, 15, 1900/1961. ’Silap matuma inuisa’ pigissaarneq, ilaqutaqalerneq kingornussarsiassaqartitsinerlu pingaartittarpaat. Daavip inuunerani pingaarnerpaasimavoq Guutimit ajunngitsumik tusaamaneqarneq ’kiinaa takujumallugu’, imaluunniit Jehovamit iluarisaaneq misigiumallugu. Daavi ’iteruni’, tassa Jehovamit neriorsorneqaruni, taassuminnga takunninnini ’qaarsillaatigiumaarpaa’, tassa Jehovamut qaninnini nuannaarutigissavaa. Daavitut pisuussutit anersaakkut ittut pingaartittariaqarpavut, ilaa?

19:2-7. Pinngortitarsuup oqalussinnaanngitsup eqqarsarsinnaanngitsullu Jehova naalannarsisissinnaappagu, taava uagut inuit oqalussinnaallutalu eqqarsarsinnaallutalu pallorfiginnissinnaasugut naalannarsisinnerungaartariaqarparput, ilaa? — Saqqummersitat 4:11.

19:8-12. Jehovap uagutsinnut piumasaqaatai iluaqutaapput!

19:13, 14. Kukkunerit makitasaarnerillu ajortuliornerupput pinngitsoortinniartariaqakkavut.

19:15. Qanoq iliornivut mianersuutigiinnarnagit, aammattaarli oqaatsivut eqqarsaativullu mianersuutigisariaqarpavut.

„Illersussavarma pisuussuteqannginnama [assuarnaatsuugama, NV]“

(Tussiaat 25:1–41:14)

Tussiaatini taakkunani siullerni marlunni Daavip assuarnaattuarumalluni qamannga pisumik kissaatini aalajangiusimannilluinnarninilu ersersippai. „Assuarnaallungami inuuvunga,“ erinarsorpoq. (Tussiaat 26:11) Qinnummi ajortuliaminik isumakkeerfigeqqulluni qinulluni ima nassuerpoq: „Nipangiinnarama timiga taroriartorpoq anersaarulunninni ulloq tamaat.“ (Tussiaat 32:3) Jehovap kiffai ilumoorfiginnittut Daavip ima neriorsoqqissaarpai: „[Jehovap] isaasa sammivigaat iluartut, ikioqqullutik nillianerat siutaasa tusartarpaat.“ — Tussiaat 34:16.

Tussiaat 37-mi siunnersuutit naleqangaartut Israelikkunnut iluaqutaapput, uagutsinnuttaaq pissutsit aaqqissuussaanerata matuma ’ulluini kingullerni’ inuusunut iluaqutaangaarput! (2 Timotheusi 3:1-5) Tussiaat 40:8, 9-mi Jiisusi Kristusi pillugu ima siulittuuteqarpoq: „Tikiuppunga; — mappersakkami allaaserineqarpunga — Guuti, piumasat malillugu iliornissaq tassa kajungerisara; inatsisitit uanga ilunni ipput.“ Tussiaatit immikkoortuani uani tussiaammi kingullermi ukiuni pisimasoqarfioqisuni Daavip Batsebamik ajortulioqateqareernermi kingorna ukiuni annikilliorfiusuni Jehovamut ikioqqulluni qinuvoq. Ima erinarsorpoq: „Illersussavarma pisuussuteqannginnama [assuarnaatsuugama, NV].“ — Tussiaat 41:13.

Allassimaffiit pillugit apeqqutit akineqartut:

26:6 — Daavitut Jehovap pilliivianik kaaviinerput qanoq paasisariaqarpa? Pilliivik Jiisusi Kristusip pilliutaanik inuiaat utertitsinneqaatissaattut ilassinninnermut atatillugu Jehovap piumasaanut assersuutaavoq. (Hebræerit 8:5; 10:5-10) Pilliutip tamatuma upperineratigut Jehovap pilliivia kaavipparput.

29:3-9 — Jehovap nipaata kallermut sumi tamani mianerinnilersitsisutut assersuunneqarnera sumut assersuutaava? Una isumagiinnarpaa: Jehovap pissaanera mianernangaarpoq!

31:24 — Qanoq Jehovap makitaniartut sakkortuumik pillartarpai? Naapertuilluartoq piaarinani kukkugaangat Jehovap perorsaatissittarpaa. Makitaniartorli ajortuliortuartarmat sakkortuumik pillaatissinneqassaaq. — Ussatit 11:31; 1 Petrusi 4:18.

33:6 — Versimi uani Jehovap qarnata ’anersaaminera’ qanoq isumaqarpa? Tamatumani pineqartoq tassaavoq Guutip nukinga sulisoq,  imaluunniit anersaava illernartoq, qilannik takussaasunik pinngortitsigami atugaa. (1 Mosesi 1:1, 2) Anersaaq illernartoq Jehovap qarnata anersaamineranik taaneqarpoq anersaarujussuarnertut ungasissumiittunut sunniuteqarsinnaammat.

35:19 — Daavip uumiginnitsimi qiviartannginnissaat qinnutigimmagu qanoq isumaqarpa? Daavimut akeraasut qiviarnerat Daavimut taakkua pilersaarutipilummik iluatsinnerannik nuannaarutiginninnerannut ersiutaavoq. Taamatut pisoqannginnissaa Daavip qinnutigaa.

Ilinniarfigisinnaasavut:

26:4. Internetimi chatertarfinni kinaassutsiminnik isertuussisut, aamma atuaqatit suleqatilluunniit ikinngutaanerartut, uagutsinnilli ajunngitsumik kissaassinngitsut, attaveqarfiginaveersaartariaqarpavut. Aammattaaq ilaginaveersaartariaqarpavut tunussisut, qalikkut eqqortuliorusuppasittartut, marloqiusamillu inuusut.

26:7, 12; 35:18; 40:10. Kristumiut katerisimaaqatigiinneranni Jehova unnersiutigisariaqarparput.

26:8; 27:4. Kristumiut ataatsimiinneranni najuuttarneq nuannaraarput?

26:11. Daavip assuarnaattuarnissani aalajangiusimalluinnarnerarlugu oqarpoq, aammali utertinneqarnissani qinnutigaa. Aap, naammalluinnanngitsuugaluarluta assuarnaattuarsinnaavugut.

29:10 Jehovap „imarsuaq“ qulangerlugu issianera pissaanerminik aqutsilluinnarsinnaaneranut assersuutaavoq.

30:6. Jehovap pissusia pingaarnerpaaq tassaavoq asanninneq, kamannerunngitsoq.

32:9. Jehovap siutitoorsuartut siutituutulluunniit supissaammik iperaattamilluunniit pinngitsaalillugit naalatsinneqartartutut itsikkusunngilaatigut. Kissaatigaa piumasaminik paasinninnerput pissutigalugu naalassagitsinni.

33:17-19. Inuit aaqqissuussinerat, qanorluunniit pissaaneqartigigaluartoq, annaassisinnaanngilaq. Jehova taassumalu naalagaaffia tatigisariaqarpavut.

34:11. Guutip naalagaaffianik inuunerminni salliutitsisunut neriorsuut tamanna nuanningaarami!

39:2, 3. Inuit ajortut uppeqatitsinnik ajortumik pinninniarlutik paasiniaaffigigaangatigut, ’qanerput nipangersimaasertariaqarparput’ oqaaseqarnatalu.

40:2, 3. Jehovamik neriuffiginninneq iluaqutigalugu isumatsassimaneq naammagalugu atorneqarsinnaavoq — soorlulusooq „aserornerup itersaanit, mingummit marullummillu“ qaqilluni.

40:6, 13. Ajunaarnerit inuttulluunniit sanngiissutit, qanorluunniit amerlatigigaluartut, sapersissinnaassanngilaatigut eqqaamajuarutsigu pilluaqqussutisiavut ’amerlavallaaramik taagorneqarsinnaanngitsut’.

„Unnersiutigineqarli [Jehova]“

Immikkoortumi siullermi matumani Tussiaatit 41-t ilumut tuppallersaataangaarlutillu qiimmassaataangaarput! Qanorluunniit misilinneqartigigaluarutta qanorluunniillu ilerasuuteqartigigaluarutta Guutip oqaasiata immikkoortua tamanna kimittooq nakussatsissutigisinnaallugulu qiimmassaatigisinnaavarput. (Hebræerit 4:12) Tussiaatit taakkua inuunermi najoqqutassanik tutsuiginartunik imaqarput. Neriorsoqqissaarneqaqattaarpugut Jehovap imminiiginnassanngikkaatigut, qanorluunniit ittumik ajornartorsiuteqaraluarutta.

Tussiaatit immikkoortuat siulleq manna ima naavoq: „Unnersiutigineqarli [Jehova], Israelip Guutia, naassaanngilluinnartumik. Amen, amen.“ (Tussiaat 41:14) Tussiaatit taakkua misissoreerlugit Jehova unnersiutigerusunnarsivoq, ilaa? (wE 5/15 06)

[Quppernerup ataani ilanngussaq]

[Qupp. 10-mi assiliartaq]

Pinngortitarsuup uumassuseqanngitsup Jehova unnersiutigisinnaappagu, uagut suli annerusumik taamaaliortariaqannginnerpugut!

[Qupp. 8-mi assiliartaq]

Tussiaatit siulliit 41-t amerlanersaat Daavimit allanneqarsimapput

[Qupp. 8-mi assiliartaq]

Ullorissat: Courtesy United States Naval Observatory

[Qupp. 9-mi assiliartaq]

Tussiaammi sorlermi Jehova Paarsisorsuartut eqqaaneqarpa?

[Qupp. 10-mi assiliartaq]

Ullorissat, qupp. 9 aamma 10: Courtesy United States Naval Observatory

[Qupp. 11-mi assiliartaq]

Ullorissat: Courtesy United States Naval Observatory

[Qupp. 11-mi assiliartaq]

Ullut tarmarluinnaasa anersaakkut ittunik sammisaqartarit