Aniguinissannut piareersimavit?

„Umiarsuarmut ikiartoritsi, illit ilaquttatillu tamassi, paasigakku illit eqqarleriit makkua akornanni iluartuusutit.“ — 1 MOSESI 7:1.

1. Jehova qanoq ulersuarmit aniguinissamut periarfissiiva?

NOAP nalaani Jehovap ’ulersuaq iluaatsut silarsuaannut nalliutitippaa’, aammali aniguisoqarsinnaanera isumagaa. (2 Petrusi 2:5) Guutip ilumoortup Noa naapertuilluartuusoq sukumiisumik ilitsersorpaa qanoq umiarsualiussanersoq inuit uumasullu nunarsuaq tamakkerlugu ulersuassami aniguissutissaannik. (1 Mosesi 6:14-16) Soorlu Jehovamut kiffaasumit aalajaatsumit ilimagineqarsinnaasoq, „Noa Guutip peqqusineratorluinnaq iliorpoq“. Ilaatigut Noap naalalluinnarnera pissutigalugu ullumikkut uagut inuuvugut. — 1 Mosesi 6:22.

2, 3. (a) Noap nalaani inuusut taassuma sulineranut qanoq periarpat? (b) Suna upperilluinnarlugu Noa umiarsuarmut ikiva?

² Umiarsualiornissaq imaannaanngilaq. Qularnanngitsumik inuppassuit Noap ilaqutaasalu naammassisaat tupigusuutigaat. Tamannali umiarsuarmut ikigaanni aatsaat aniguisoqarsinnaaneranik taakkuninnga qularunnaarsitsinissamut naammanngilaq. Naggataatigut Guutip silarsuaq ajortoq tamanna kamajuiffigiunnaarpaa. — 1 Mosesi 6:3; 1 Petrusi 3:20.

³ Noa ilaqutaalu ukiuni qulilinni arlalinni suleruloreersut, Jehovap Noa ima oqarfigaa: „Umiarsuarmut ikiartoritsi, illit ilaquttatillu tamassi, paasigakku illit eqqarleriit makkua akornanni iluartuusutit.“ Jehova taassumalu oqaasii upperilluinnarlugit „Noa ernini nulianilu ukuanilu ilagalugit umiarsuarmut ikivoq“. Jehovap umiarsuup matua matuaa kiffani illersorniarlugit. Nunarsuarmi ulersuaqalermat paasinarsivoq umiarsuaq Guutip inuunermik annaassissutissaatut aaqqissuussaasoq. — 1 Mosesi 7:1, 7, 10, 16.

Ullumikkut Noap ulluini pissutsinut assingussuteqartut

4, 5. (a) Jiisusip najuuffissani sumut assersuuppaa? (b) Noap ullui nalerpullu qanoq assingussuteqarpat?

⁴ „Soorlu Noap ulluini ittoq, taamatuttaaq Inuup Ernerata tikiuffissaa ikkumaarpoq.“ (Matthæusi 24:37) Taama oqarluni Jiisusip takutippaa takussaanani najuuffissani Noap ulluisut ikkumaartoq, ilumullu taamaappoq. Ingammik 1919-imiilli mianersoqqussut Noap inoqatiminut mianersoqqussutaanut assingusoq inunnut inuiannit tamaneersunut tusarliunneqarsimavoq. Inuillu amerlanersaat Noap nalaani inuusut periarsimanerattut periarsimapput.

⁵ Taamani Jehova akuliuppoq silarsuaq ’nakuusernermik ulikkaartoq’ ulersuarmi suujunnaarsillugu. (1 Mosesi 6:13) Takunnittunut tamanut erseqqippoq Noa ilaqutaalu nakuusernermut tamatumunnga peqataajumanngitsut eqqissillutilli umiarsualiortut. Tamanna aamma ullutsinnut assingussuteqarpoq. Ullumikkuttaaq inuit eqqortuliorusuttut ’immikkoortissinnaavaat iluartoq iluanngitsumit, tassa Guutimik kiffartuussisoq kiffartuussisuunngitsumit’. (Malaki 3:18) Jehovap Nalunaajaasuisa peqqusersuinnerat, inussiarnernerat, qanilaarnerat eqiasuinnerallu takunnittunit paqumisunngitsunit nersorneqartarpoq, Guutillu innuttaasa silarsuarmiut amerlanersaannit pissuserisatik tamakku allaanerussutigaat. Jehovap Nalunaajaasuisa nakuuserneq qanoq ikkaluartorluunniit itigartittarpaat Jehovallu anersaavanit siulersortillutik. Aqqutikkut naapertuilluartukkut ingerlapput tamannalu pissutigalugu eqqissinermik pilluaqquneqarlutik. — Esaja 60:17.

6, 7. (a) Noap nalaani inuit suna paasinngilaat, ullumikkullu pissutsit tamatumunnga qanoq assingussuteqarpat? (b) Assersuutit suut takutippaat Jehovap Nalunaajaasui amerlanertigut allaanerusutut isigineqartartut?

 ⁶ Noap nalaani inuusut paasinngilaat Noa Guutimit tapersersorneqartoq taassumalu ilitsersuutaanik maleruaasoq. Taamaattumik Noap oqaluussinera ilumoorutinngilaat mianersoqqussutaalu eqqumaffiginagu. Ullumikkummi? Inuppassuit Jehovap Nalunaajaasuisa sulinerat pissusilersornerallu tupigusuutigigaluarlugit, amerlanersaasa nutaarsiassaq nuannersoq Biibilimilu mianersoqqussutit ilumoorutinngilaat. Sanilit, sulisitsisut eqqarlillu immaqa kristumiut ilumoortut pissuserissuunerat nersortarpaat, taavali ajusaarlutik ima oqartarput: „Ajoraluartumilli Jehovamut nalunaajaasuupput!“ Arajutsivaat sooq Jehovap Nalunaajaasuisa asanninneq, eqqissineq, inussiarnisaarneq, ajunngitsuuneq, qanilaarneq imminullu naalakkersinnaaneq pissuserigaat, tassa Guutip anersaavanit illernartumit siulersortikkamik. (Galatiamiut 5:22-25) Taamatut pissuseqarnerat pissutigalugu tusarliussaat tutsuiginarnerusussaagaluarpoq.

⁷ Assersuutigalugu ilaanni Ruslandimi Jehovap Nalunaajaasui naalagaaffilersaarfiliorput. Angut saneqquttoq sulisut ilaat oqaloqatiginiarlugu unippoq oqarlunilu: „Sanaartorfik manna maluginiarnangaarami — pujortartoqanngilaq oqaasipiluttoqarnanilu aalakkoortoqarnanilu! Jehovamut nalunaajaasuunnginnerpit?“ Sanaqataasup angut ima aperaa: „Naaggaaraluaruma upperissavinga?“ Angut akinasuarpoq: „Naamik, upperissanngikkaluarpakkit.“ Ruslandimi illoqarfimmi allami borgmesterip Jehovap Nalunaajaasuisa naalagaaffilersaarfiliornerat takoreerlugu tupigusuttorujussuuvoq. Oqarpoq Jehovap Nalunaajaasuisa namminissarsiunngitsumik iliornerat takugamiuk upperisarsiornerit tamaasa assigiissikkunnaarini. Taakku tassaapput Jehovap innuttaasa inunnit Biibilimi najoqqutassianik maleruaanngitsunit immikkooruteqarnerannut assersuutit marluinnaat.

8. Silarsuup ajortup matuma naggatissaani aniguissagaanni suna pisariaqarpa?

⁸ ’Silarsuatoqqap’ ulersuarmi suujunnaarsinneqarnissaa qanilliartortillugu, Noa aalajaalluni ’iluarnermik nalunaarutiginnippoq’. (2 Petrusi 2:5) Pissutsit aaqqissuussaanerata maanna atuuttup ulluini kingullerni makkunani Jehovap innuttaasa taassuma najoqqutassiai naapertuilluartut tusarliuttarpaat silarsuassamilu nutaami inuunissamut aniguisinnaanissaq pillugu nutaarsiassaq nuannersoq oqaluussissutigalugu. (2 Petrusi 3:9-13) Soorlu Noa taassumalu ilaqutai Guutimik mianerinnittut umiarsuarmiikkamik aniguisut, ullumikkut aniguissagaanni uppertuusariaqarpoq Jehovallu peqatigiissortaasa ilaannut nunarsuarmiittunut ilumoorfiginnilluni attaveqartariaqarluni.

 Aniguissagaanni uppertuusariaqarpoq

9, 10. Sooq Saatanip pissutsinik aaqqissuussinerata naggatissaani aniguissagaanni upperneq pisariaqarpa?

⁹ Silarsuup matuma Saatanimit pissaaneqarfigineqartup piuneerunneqarnissaani aniguiniarluni qanoq iliortoqartariaqarpa? (1 Johannesi 5:19) Siullermik paasisariaqarparput illersorneqartariaqarluta. Taavalu illersuutitut atoqquneqartoq iluaqutigisariaqarparput. Noap nalaani inuit ulluinnarni sammisartakkatik ingerlatiinnarpaat paasinagulu ajunaarnissarsuarmut illersorneqartariaqarnertik. Aamma Guutimut uppernikipput.

¹⁰ Noalli tassumalu ilaqutaasa paasivaat illersorneqartariaqarnertik annaanneqartariaqarnertillu. Aamma ersersippaat qilammi nunamilu kisimi Oqartussaasoq, Jehova Guuti, upperigitsik. Apustili Paulusi ima allappoq: „Uppersuseqarnani Guutimit iluarisaaneq ajornaqaaq, Guutimummi pisup upperisariaqarpaa taanna tassaareersoq ujarlersinilu akissarsisissagai.“ Paulusi ima nangippoq: „Uppernikkut Noa ilimasaarneqarpoq suli takussaanngitsumik, Guutimillu mianerinnittuugami umiarsualiorpoq inoqutimi annaffissaannik. Uppernermigut tamatumuuna silarsuaq eqqartuuppaa namminerlu iluarneq uppernikkut kingornussassarilerlugu.“ — Hebræerit 11:6, 7.

11. Itsaq Jehovap illersueriaasia qanoq ilinniutigisinnaavarput?

¹¹ Pissutsit aaqqissuussaanerata ajortup maanna atuuttup naggatissaani aniguissagutta piuneerunneqarnissaanik upperinninnerinnaq naammanngilaq. Uppernerput iliuuseqarnikkut takutittariaqarparput Guutillu annaassissutissatut aaqqissuussaa iluaqutigilluarlugu. Taamaaliussagutta soorunami Guutip ernerata, Jiisusi Kristusip, utertitsissutitut pilliutaa upperisariaqarparput. (Johannesi 3:16, 36) Eqqaamasariaqarparpulli taamaallaat umiarsuarmiittut Ulersuarmit aniguisut. Taamatuttaaq itsaq Israelimi illoqarfiit qimarnguffiusut illersuutaasinnaapput aatsaat piaarinaatsorluni toqutsisoq illoqarfimmut tassunga qimaappat tassaniiginnarpallu palasiunerup toqunissaata tungaanut. (4 Mosesi 35:11-32) Mosesip nalaani Egyptenimi perluit qulissaanni Egyptenimiut angajulliliaat toquneqarput, Israelikkulli angajulliliaat asattuunneqarput. Sooq? Jehovap Mosesi ima peqqusimavaa: „[Israelikkut savaaqqap poorskisiutissap] aavata ilaa illup neriffimmik matserfiata saneraqutaanut marlunnut ikaarutaanullu qulaaniittumut tarnutissavaat. . . . Qaalersinnagu illussi silataannut anisoqassanngilaq.“ (2 Mosesi 12:7, 22) Israelikkut angajulliliaasa ilaannit illumit matserfimi saneraqutaanut marlunnut ikaarutaanullu qulaaniittumut aammik taninneqarsimasumit  aninikkut mianersoqqussummik Guutimeersumik tamatuminnga sumiginnaanissaq sapiiserfigiumaneqassanerpa?

12. Tamatta imminut qanoq aperisariaqarpugut, aamma sooq?

¹² Taamaattumik imminut misissornissatsinnut pissutissaqarluarpugut. Jehovap anersaakkut illersuinissamik aaqqissuussaata ilumut iluaniippugut? Annikilliornartussarsuaq nalliuppat, taamatut illersortissarsiortut nuannaarnermit qujamasunnermillu qiassapput. Allat aliasunnermit peqqissiminermillu qiassapput.

Aaqqissuussaanikkut allannguinerit piareersarnermut iluaqutigaavut

13. (a) Suna siunertaralugu aaqqissuussaanikkut allannguisoqartarsimava? (b) Pitsanngoriaatit ilaannik eqqaasaqarit.

¹³ Jehovap peqatigiissortaminik nunarsuarmiittunik aaqqissuussaanikkut pitsanngoriartuaartitsisoqarnissaa isumagisimavaa. Pitsanngoriaatit tamakku Jehovap uagutsinnik anersaakkut illersuinissamik aaqqissuussaanik alutornarsaaqataallutik, aalajaallisaaqataallutillu nakussatsiseqataapput. 1870-ikkunnit 1932 tikillugu utoqqaanertat ilagiinnilu kiffartortut ilagiinnit qinerneqartarput. 1932-mi utoqqaanertat qinikkat sulinermut imaluunniit kiffartornermut ataatsimiititaliamit, sulinermut siulersuisutut toqqakkamut suleqataasutut ilagiinnit qinerneqartumit, taarserneqarput. 1938-mi ilagiinni kiffartortut nakkutilliisullu tamarmik Biibilimi najoqqutassiat malillugit toqqarneqartalerput. 1972-imiilli Jehovap Nalunaajaasuisa Siulersuisoqatigiivi utoqqaanertanik ilagiinnilu kiffartortunik Biibilimi najoqqutassiat malillugit toqqaasarsimapput ilagiit piukkussinerat tunngavigalugu, ilagiillu taava allakkatigut toqqaaneq pillugu nalunaarfigineqartarput. Ukiut ingerlaneranni Siulersuisoqatigiit akisussaaffeqarnerujartuinnarput, suliassaallu oqilisarniarlugit allannguisoqarsimavoq.

14. Ilinniartitsinermik aaqqissuussineq suna 1959-imi aallartinneqarpa?

¹⁴ 1950-imi Tussiaat 45:17-imik misissueqqissaartoqarnera pissutigalugu siumukartumik ilinniartitsinermik aaqqissuussineq aallartinneqarpoq. Versi taanna imaappoq: „Ernitit kunnginngorumaarput illit siuaasatillu kingoraarlusi; naalagarsuanngortissavatit nunarsuarmi tamarmi.“ Utoqqaanertat ullumikkut ilagiinni siulersuisut suliassanut Guutimeersunut maannakkut Harmagedonillu kingorna suliarineqartussanut ilinniartinneqartarput. (Saqqummersitat 16:14, 16) 1959-imi Naalagaaffimmut Kiffartornermik Ilinniarfik pilersinneqarpoq. Taamani ilinniarneq qaammammik ataatsimik sivisussuseqarpoq pingaartumillu ilagiinni kiffartortunit, nakkutilliisunit siulittaasunit taamani taamatut taaneqartartunit, peqataaffiginneqarluni. Maanna nakkutilliisut ilagiinnilu kiffartortut tamarmik ilinniarfimmi tamatumani ilinniartinneqarsinnaapput. Qatanngutit angutit taakku ilinniarfimmeereeraangamik ilagiinni attavigisaminni Jehovamut nalunaajaasunik tamanik ilinniartitsinermi siulersuisuusarput. Taamaalillutik tamarmik anersaakkut nakussatsinneqartarput Guutillu naalagaaffianik nutaarsiassamik nuannersumik oqaluussissutiginnittutut pikkorinnerulernissaminnut sunniuteqarnerusumillu oqaluussisinnaalernissaminnut ikiorneqartarlutik. — Markusi 13:10.

15. Ilagiit anersaakkut minguissusiat qanoq marlutsigut illersorneqartarpa?

¹⁵ Ilagiinnut kristumiunut ilannguterusuttut piumasaqaatinik aalajangersimasunik naammassinnittariaqarput. Soorunami „mitallersut“ ilagiinni inissaqanngillat, soorluttaaq Noap umiarsuaanut iseqqusaanngitsut. (2 Petrusi  3:3-7) Ingammik 1952-imiilli Jehovap Nalunaajaasuisa ilagiit illersorneqarnissaat pingaartinnerujartorsimavaat — unioqqutitsisunik allamik isumataarumanngitsunik ilaajunnaarsitsisarnermikkut. Unioqqutitsisut ilumoorlutik peqqissimisut allamillu isumataartut soorunami asannittumik ikiorneqartarput ’narlumuinnaq pisullutik ingerlanissaminnut’. — Hebræerit 12:12, 13; Ussatit 28:13; Galatiamiut 6:1.

16. Jehovap innuttaasa anersaakkut atugaat qanoq ippat?

¹⁶ Jehovap innuttaasa anersaakkut atugarissaarnerat tupinnarnanilu nalaatsornerinnaanngilaq. Pruffiiti Esaja aqqutigalugu Jehova ima oqarpoq: „Kiffakka nerissapput, ilissili kaassaasi, kiffakka imissapput, ilissili imerusussaasi, kiffakka nuannaartinneqassapput, ilissili kanngusutsinneqassaasi, kiffakka uummammik iluunngaannit qiimmattassapput, ilissili uummatissigut naalliunnermik nilliassaasi nimaarlusilu isumatsannissinni.“ (Esaja 65:13, 14) Jehovap piffissaalluartukkut peqqinnartunik anersaakkut inuussutissanik naammangaartunik anersaakkullu nukittujuarnissatsinnut iluaqutaasunik pilersortuarpaatigut. — Matthæusi 24:45.

Aniguinissannut piareersarit

17. Suna iluaqutigalugu aniguinissatsinnut piareersarsinnaavugut?

¹⁷ Ullumikkut kajumissaarummik matuminnga maleruaanissaq aatsaat taama pingaaruteqartigaaq: „Immitsinnut isumageqatigiinniarta asaqatigiinnermut ajunngitsuliornermullu kajumissaaqatigiittarluta, ilagiittut katisimasarnivut tamatigut peqataanngitsoorfigisarnatigit, soorlu ilaat taama ileqqoqartut, oqaaqqissaaqatigiittarniartali.“ (Hebræerit 10:23-25) Jehovap Nalunaajaasuisa ilagiivisa 98.000-init amerlanerusut ilaannut qanittumik attaveqarlutalu suleqataagutta aniguinissatsinnut piareersarnermut iluaqutigisinnaavarput. Uppeqatitsinnit tapersersorneqassaagut ’inuttut nutaamik pissuseqalerniarsaritilluta’ Jehovallu annaassissutissatut aaqqissuussaa pillugu allat ilinniarneranni uummatikkut iluunngarluta ikiuitilluta. — Efesosimiut 4:22-24, NV; Kolossemiut 3:9, 10; 1 Timotheusi 4:16.

18. Sooq ilagiinnut kristumiunut qanittumik attaveqarnissat aalajangiusimaviuk?

¹⁸ Saatanip taassumalu silarsuaata ajortup ilagiinnit kristumiunit qimagutitinniarsuataarpaatigut. Ilagiinnulli ilaajuarsinnaavugut pissutsillu aaqqissuussaanerata ajortup maanna atuuttup naggatissaani aniguisinnaalluta. Qanortoq Saatanip ilungersorluni iliuuserisaanik akiuinissarput Jehovamut asanninnermit taassumalu asannittumik aaqqissuussinerinik qujamasuutiginninnermit aalajangiusimatigu. Ullumikkut pilluaqqussutisiatsinnik eqqarsaatiginneqqissaartarneq aalajangiusimanninnerulissutigisinnaavarput. Allaaserisami tulliuttumi pilluaqqussutit taakkua ilaat misissussavavut.

Qanoq akissavit?

• Nalerput Noap ulluinut qanoq assingussuteqarpa?

• Aniguissagaanni pissuseq suna pisariaqarpa?

• Aaqqissuussaanikkut allannguutit suut Jehovap uagutsinnik illersuinissamik aaqqissuussaanik nakussatsiseqataappat?

• Aniguinissatsinnut inuttut nammineq qanoq piareersarsinnaavugut?

[Atuaqqissaarnermi apeqqutit]

[Qupp. 23-mi assiliartaq]

Noa inoqatiminit upperineqanngilaq

[Qupp. 24-mi assiliartaq]

Guutip mianersoqqussutaanik ilumoorussineq imminut akilersinnaavoq

[Qupp. 25-mi assiliartaq]

Naalagaaffimmut Kiffartornermik Ilinniarfiup suna siunertaraa?

[Qupp. 26-mi assiliartaq]

Massakkut ilagiinnut kristumiunut qanittumik attaveqarnissamut piffissaavoq