Assuarnaalluni inuunerup nuannersortai

’[Jehovap] pilluaqqusinera pisuunngortitsisaraaq, erloqinartumillu ilasarinngilaa.’ — USSATIT 10:22, 1900/1961.

1, 2. Sooq siunissaq eqqarsaatigivallaarnaveersaartariaqarparput?

„SIUNISSAQ eqqarsaatigivallaarutsigu, . . . ullumikkut atukkatsinnik nuannaarutiginninnissamut akornutaassaaq,“ isumaliutersortartoq Amerikamiu taama allappoq. Assersuutigalugu meeqqanut inersimasutut pisinnaatitaaffeqarnissamik eqqarsaatiginnippallaartunut aatsaallu meeraajunnaarujussuareeramik meeraanerup nuannersortaanik paasinnilersunut taamaappoq.

² Allaat Jehovamik pallorfiginnittut taamatut eqqarsartaaseqalersinnaapput. Qanoq ililluni taamaattoqarsinnaava? Guutip nunami paratiisiliornissaminik neriorsuutiminnik eqquutititsinissaa erinigaarput, aamma qilanaaraarput nappaateqarani, utoqqalinani naalliuuteqaranilu inuunissaq. Soorunami tamakkuninnga qilanaarinninneq iluaqutaavoq, taavami siunissami timikkut pilluaqqussutisiassat ima eqqarsaatigitigigutsigik ullumikkut anersaakkut pilluaqqussutisiavut arajutsillugit? Taamaappat alianassagaluarpoq. Nikallungaqqajaassagaluarpugut uummatitsigullu anneqqajaassagaluarluta ilimagisavut piffissamut naatsorsuutigisatsinnut eqquutinngimmata. (Ussatit 13:12) Inuunermi ajornartorsiutit pissutigalugit immaqa isumatsassimalissagaluarpugut imminulluunniit nalligilissagaluarluta. Pissutsillu unamminiarnartut iliuuseqarfiginagit immaqa naammagittaalliortuaannalissagaluarpugut. Tamakku tamaasa pinngitsoortissinnaavavut qujamasulluta ullumikkut pilluaqqussutisiavut eqqarsaatigeqqissaartarutsigik.

3. Allaaserisami matumani suna pingaarnerutissavarput?

³ Ussatit 10:22-mi ima allassimavoq: ’[Jehovap] pilluaqqusinera pisuunngortitsisaraaq, erloqinartumillu ilasarinngilaa.’ (1900/1961) Jehovap kiffaasa ullumikkut anersaakkut pisuujunerat tassaannginnerpa pilluaqqussut nuannaarutigineqartariaqartoq? Anersaakkut pisuujunitsinnut pissutaasut ilaat misissoriartigik eqqarsaatigalugulu  uagutsinnut inuttut ataasiakkaatut qanoq isumaqarnersut. Jehovap ’iluartumut assuarnaalluni inuusumut’ pilluaqqussutaasa naammangaartut eqqarsaatigeqqissaarnissaat piffissaqarfigigutsigu, Ataatatsinnut qilammiusumut nuannaarluta kiffartortuarnissatsinnik aalajangiusimanninnerulissutigissavarput. — Ussatit 20:7.

’Pilluaqqussutit’ maannangaaq uagutsinnik ’pisuunngortitsisartut’

4, 5. Biibilimi ajoqersuutigineqartoq sorleq illit immikkut pingaartippiuk, aamma sooq?

⁴ Biibilimi ajoqersuutigineqartut pillugit eqqorluartumik ilisimasaqarneq. Upperisarsioqatigiit kristumiuunerartut amerlanersaasa Biibili upperinerarpaat, isumaqatigiissutigisinnaanaguli tassani ajoqersuutigineqartut suunersut. Amerlanertigut allaat upperisarsioqatigiinnut ataatsinut ilaasortaasut Biibilimi sunarpiaq ajoqersuutigineqarnersoq pillugu assigiinngitsunik isumaqartarput. Pissutsit taakkua atugaat pissutsinit Jehovap kiffaasa atugaannit allaanerulluinnarput. Uagut inuiaqatigiissutsikkut, kulturikkut naggueqatigiissutsikkullu qanorluunniit tunuliaqutaqaraluartugut Guuti ilumoortoq atiatigut ilisimasarput pallorfigaarput. Taanna guutiunngilaq paasiuminaatsoq ataasiullunilu pingasuusoq. (5 Mosesi 6:4; Tussiaat 83:19; Markusi 12:29) Aamma nalunngilarput Guutip qilammi nunamilu kisimi oqartussaanera pillugu akerleriissut pingaaruteqarluinnartoq erniinnaq aalajangerneqartussaasoq taassumunngalu assuarnaattuarnitsigut akerleriissummi tamatumani taanna tapersersoripput. Toqungasut pillugit sallusuissut nalunngilarput taamaattumillu Guuti inunnik anniarfimmi ikumasumi imaluunniit innermi eqqiarfimmi naalliutitsisutut oqaatigineqartoq siooraginagu. — Oqaluussisartup oqaasii 9:5, 10.

⁵ Aammattaaq nuannaarutigaarput nalunnginnatsigu pinngoriartuaarnikkut pissaanernit kinaassusiliunngitsunit nalaatsornerinnaakkut pinngorsimanata. Guutilli pinngortitaraatigut, taanna assilillugu pinngortitaavugut. (1 Mosesi 1:26; Malaki 2:10) Guuti unnersiutigalugu tussiaasiortoq ima allappoq: „Qutsavigissavakkit pinngortitaagama tupinnangaartumik, suliatit tupinnangaarput, tamanna nalunngilluinnarpara!“ — Tussiaat 139:14.

6, 7. Illit nammineq allannguutigisimasannik allalluunniit allannguutigisimasaannik pilluaqqussutinik kinguneqartunik eqqaasaqarit.

⁶ Ileqqunit pissusilersornernillu ajoqutaasunit aniguisitaaneq. Tusagassiuutini pujortartarnerup, imigassartorpallaarnerup tamalikannerullu navianaatai pillugit mianersoqqussutinik ulikkaarpoq. Inuilli amerlanersaasa mianersoqqussutit tamakku sumiginnartarpaat. Qanorli pisoqartarpa inuup eqqortuliorusuttup Guuti ilumoortoq iliuutsinik tamakkuninnga assuarinnittoq taamaaliortartunillu aliasuutiginnittoq paasileraangagu? Taava inuk ilumoorusuttoq ileqqunik ajoqutaasunik tamakkuninnga taamaatitsinissaminut killinneqartarpoq! (Esaja 63:10; 1 Korinthimiut 6:9, 10; 2 Korinthimiut 7:1; Efesosimiut 4:30) Soorunami pingaarnerpaamik Jehova Guuti nuannaartinniarlugu taamaaliorpoq, aammali peqqinnerulernermik qamuunalu eqqissinermik pilluaqquneqartarpoq.

⁷ Ileqqupiluit taamaatinnissaat sapernartorujussuusinnaavoq. Taamaattorli ukiut tamaasa titusindilikkuutaat taamaaliortarput. Jehovamut tunniulluinnarput imermullu morsutsitaallutik kuisillutik, taamaalillutillu tamarmik takkuanni ersersippaat ileqqut Guutip iluarinngisai taamaatissimallugit. Tamanna tamatsinnut qiimmaallannangaarami! Tamanna ajortuliornaveersaarnissamut ajoqutaasunillu iliuuseqarnaveersaarnissamut aalajangiusimanninnerulissutigaarput.

8. Siunnersuutit Biibilimiittut ilaqutariinnik pillualersitseqataasut suuppat?

⁸ Ilaqutariittut inuuneq pilluarnartoq. Nunani arlalinni ilaqutariittut inuuneq ajorsigaluttuinnarpoq. Aappariippassuit avittarput, amerlanertigullu  taakkua meeraat misigissutsimikkut ajoquserneqartarput. Europami nunat ilaanni inoqutigiit 20 procentingajaat ilaqutariiupput kisimiittunik pilersuisullit. Ilaqutariittut assuarnaalluta inuunissarput eqqarsaatigalugu Jehovap qanoq ikiorsimavaatigut? Efesosimiunut allakkat 5:22–6:4 atuariaruk maluginiarlugillu Guutip uiusunut, nuliaasunut meeqqanullu siunnersuutai pitsaasut. Tassani Biibilimilu allassimaffinni allani allassimasunik malinninneq qularnanngivissumik aappariinnermut nakussatsissutaassaaq, angajoqqaat meeqqaminnik iluamik perorsaanissaannut iluaqutaassaaq ilaqutariittullu inuunermik pillualersitseqataassalluni. Tamanna tassaannginnerpa pilluaqqussut nuannaarutigineqartariaqartoq?

9, 10. Siunissamut isiginnittaaserput silarsuup isiginnittaasianit qanoq allaanerua?

⁹ Silarsuarmi ajornartorsiutit qanittukkut aaqqinneqarumaarnerannik qularutiginninnginneq. Ilisimatuussutsikkut teknikkikkullu immikkut ilisimasaqartoqaraluartoq silarsuarmilu siuttut ilaat ilumoorlutik ilungersortaraluartut, inuiaat ajornartorsiutaat ilungersunartut suli aaqqinneqanngillat. Klaus Schwab, World Economic Forum-imik tunngaviliisoq, ungasinngitsukkut oqarpoq ’silarsuup unamminiarnartui amerligaluttuinnartut aaqqinnissaannulli piffissaarukkaluttuinnartugut’. Eqqaavai ’navianaatit nunanut tamanut sunniuttartut, soorlu peqqarniisaarniarneq, avatangiisinik aserorterineq aamma aningaasaqarnikkut allanngorarnerit’. Klaus Schwab ima isummerpoq: „Silarsuarmi ataasiussuseqarluinnarluni aamma aalajangersimalluinnarluni iliuuseqarfigineqartariaqartut aatsaat taama amerlatigipput.“ Ukiut 2000-ikkut ingerlatillugit inuiaat siunissaat pingaarnertigut suli ernumanarpoq.

¹⁰ Qiimmaallannangaarami nalunagu Jehovap naalagaaffik inuiaat ajornartorsiutaannik tamanik aaqqiisinnaasoq pilersissimagaa — Naalagaaffik Missiarsikkoortoq! Naalagaaffik taanna atorlugu Guutip ilumoortup „nunarsuarmi tamarmi sorsunnerit soraarsikkumaarpai“ atuutilersillugulu ’eqqissineqangaarneq’. (Tussiaat 46:10; 72:7) Kunnginngortitap Jiisusi Kristusip ’piitsoq, annikilliortitaq sanngiitsorlu qunutitaanermit nakuuserfigisaanermillu aniguisissavai’. (Tussiaat 72:12-14) Naalagaaffiup tamatuma naalakkersuineratigut nerisassaaleqisoqassanngilaq. (Tussiaat 72:16) Jehovap „qulliit tamaasa [isitsinnit] allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.“ (Saqqummersitat 21:4) Naalagaaffik taanna qilammi pilersinneqareerpoq ungasinngitsukkullu nunarsuarmi pissutsinut akuliutissalluni ajornartorsiutillu aaqqinniarlugit pisariaqartunik iliuuseqassalluni. — Danieli 2:44; Saqqummersitat 11:15.

11, 12. (a) Aliikkusersornermik noqqaassutiginninneq ataavartumik pilluarnermik kinguneqartarpa? Nassuiaruk. (b) Suna pilluarnermik piviusumik kinguneqartarpa?

¹¹ Suup piviusumik pillualersitsisarneranik ilisimanninneq. Suna pilluarnermik piviusumik kinguneqartarpa? Psykologip pilluassagaanni pisariaqartut pingasuunerarpai — aliikkusersorneq, pimoorussineq (ilaatigut suliamik ilaquttariittullu inuunermik soqutiginningaarneq) aamma siunertalimmik iliuuseqarneq (inuunermi nammineq nalerisimaarnissamit pingaaruteqarnerusumik anguniagaqarneq). Aliikkusersorneq pingaaruteqannginnerpaatut eqqaavaa oqarlunilu: „Tamanna eqqarsarnarpoq inuppassuit aliikkusersorneq inuunerminni qitiutimmassuk.“ Tamatumunnga tunngatillugu Biibilimi qanoq allassimasoqarpa?

¹² Kunngi Salomo ima oqaaseqarpoq: „Isumaliorpunga: Misileriassagiga nuannaarluni pilluarlunilu inuuneq! Sunaaffali aamma tamanna piunngitsuuvoq! Qiimasaarneq pillugu oqartariaqarsimavunga: ’Sianiilliornerinnaavoq!’ nuannaarnerlu  pillugu: ’Sumut iluaqutaagami?’“ (Oqaluussisartup oqaasii 2:1, 2) Tassa pilluarneq aliikkusersornikkut anguneqartartoq Biibili naapertorlugu sivikitsuinnaavoq. Taavami suliamik pimoorussineq? Uagut isumaqarluarnerpaamik suliassaqarpugut, tassa Guutip naalagaaffianik oqaluussissutiginninneq ajoqersuganngortitsinerlu. (Matthæusi 24:14; 28:19, 20) Allat Biibilimi tusarliussaq pillugu oqaluttuukkaangatsigit, suliamut uagutsinnut tusartitsinnullu annannissamik kinguneqarsinnaasumut peqataasarpugut. (1 Timotheusi 4:16) ’Guutimut suleqataagatta’ misigaarput ’tunisineq pilluarnarnerusoq tigusinermit’. (1 Korinthimiut 3:9; Apustilit Suliaat 20:35) Suleqataanerput pissutigalugu inuunerput siunertaqarlualertarpoq, aamma Pinngortitsisoq mitallersiminut, Saatani Diaavulumut, akissutissarsivoq. (Ussatit 27:11) Aap, Jehovap takutissimavaatigut Guutimut tunniusimaneq piviusumik ataavartumillu pillualersitsisartoq. — 1 Timotheusi 4:8.

13. (a) Qanoq ililluni Teokratiimik Ilinniarfik pilluaqqussutaava nuannaarutigisinnaasarput? (b) Illit Teokratiimik Ilinniarfik qanoq iluaqutigaajuk?

¹³ Ilinniartitsinermik aaqqissuussineq naleqangaartoq sunniuteqarluartorlu. Gerhard Jehovap Nalunaajaasuisa ilagiivisa ilaanni utoqqaanertatut kiffartorpoq. Inuusuttuunini eqqarsaatigalugu ima oqarpoq: „Inuusuttuugallarama oqalunneq assut ajornartorsiutigaara. Tatineqaraangama oqarsinnaanngingajattarpunga ittoqilerlungalu. Ajukkuttarpunga isumatsassimangaalertarlungalu. Angajoqqaama oqalunnermik ilinniartinneqarnissara isumagaat, iluaqutaanngillarli, ajornartorsiutiga timikkut pissuteqarnani tarnikkulli pissuteqarmat. Aaqqissuussaq asseqanngitsoq Jehovameersoq — Teokratiimik Ilinniarfik — iluaqutigaara. Ilinniarfimmut tamatumunnga nalunaarnera pissutigalugu sapiissuseqalerpunga. Ilikkakkakka sapinngisannik atorniartarpakka. Iluaqutaavorlu! Oqallorinnerulerpunga, isumatsassimajunnaarlunga oqaluussinermilu nakimaannerulerlunga. Maanna allaat tamanut ammasumik oqalugiartarpunga. Jehovamut qujamasungaarpunga ilinniarfik taanna aqqutigalugu sapiissuseqalersimmanga.“ Jehovap suliassiissutaa naammassisinnaaniassagatsigu taassuma uagutsinnik ajoqersueriaasia pilluaatigisinnaavarput, ilaa?

14, 15. Piffissami aliasuffiusumi isumakuluuteqarfiusumilu ikiuineq suna pineqariaannaava? Assersuummik eqqaasaqarit.

¹⁴ Jehovamut qanittumik attaveqarneq silarsuarlu tamakkerlugu qatanngutigiissuarnit ataasiussuseqartunit tapersersorneqarneq. Katrin, Tysklandimi najugaqartoq, Asiap kujataa-kangiani nunap sajunnersua tamatumalu kingunerisaa tsunami pillugit nalunaarutit tusaramigit qamuuna assut aalaterneqarpoq. Ajunaarnersuaq nalliummat pania Thailandimiippoq. Nalunaaquttap-akunnerini 32-ni anaanaasup taassuma naluaa panini aniguisimanersoq imaluunniit ajunaarsimasut amerliartuinnartut akornanniinnersoq. Kiisami sianerfigineqarluni panimmi isumannaatsumiinneranik uppernarsaavigineqarami Katrin eqqissiallaqaaq!

¹⁵ Nalunaaquttap-akunnerini annilaangaffiusuni taakkunani Katrinip suna iluaqutigaa? Ima allappoq: „Piffissaq tamarluinnangajaat Jehovamut qinuvunga. Qinugaangama nakussatsinneqartarpunga qamuunalu eqqissisarlunga. Aammattaaq anersaakkut qatanngutinnit asannittunit uannik  sapinngisaminnik tapersersuisunit pulaarneqartarpunga.“ (Filippimiut 4:6, 7) Eqqarsaatigiuk qanoq ajortigissagaluartoq Katrin nalunaaquttap-akunnerini annilaangaffiusuni taakkunani Jehovamut qinunikkut saaffiginnissinnaananilu anersaakkut qatanngutiminit asannittunit tuppallersarneqarsinnaasimanngitsuuppat! Jehovamut taassumalu erneranut anngigisaqarnata attaveqarnerput qatanngutigiissuarnullu kristumiunut qanittumik attaveqarnerput pilluaqqussutaavoq asseqanngitsoq naleqangaartorlu taamaattussaannartut isigineqartussaanngitsoq!

16. Makititaanissamik neriuutip naleqassusianik ersersitsisumik misigisamik eqqaasaqarit.

¹⁶ Asasat toqusimasut takoqqinnissaannik neriuut. (Johannesi 5:28, 29) Angut inuusuttoq Matthiasimik atilik Jehovap Nalunaajaasuisa ilaattut perorsarneqarsimavoq. Tamatumali pilluaqqussutissartai pingaartinngilai, inuusuttuaraallunili ilagiinnit kristumiunit qimagukkiartorpoq. Maanna ima allappoq: „Ataataga itisuunik oqaloqatigineq ajorpara. Ukiut ingerlaneranni isumaqatigiinngissuterpassuaqarpugut. Taamaattoq ataatama tamatigut ajunnginnerpaamik kissaappaanga. Asangaarpaanga, tamannali taamani paasinngilara. 1996-imi ataatama napparsimalluni nallaviata saniani issiallunga tasiorakku qiasorujussuullunga oqarfigaara iliuuserisimasakka aliasuutigingaarlugit asangaarigalu. Tusaasinnaanngilaangali. Sivikitsumillu napparsimareerluni eqqissivoq. Inuuginnarsinnaassaguma makititaaffimmi ataataga takoqqikkukku oqaloqatigiissaqqaarpugut. Qularnanngivissumik nuannaarutigissavaa tusarlugu maanna utoqqaanertatut kiffartortunga nuliaralu pioneritut kiffartorneq immikkut pisinnaatitaaffigigipput.“ Ila, makititaanissamik neriuut uagutsinnut pilluaqqussutaangaarami!

’Erloqinartumik ilasarinngilaa’

17. Jehovap pilluaqqussutaanik eqqarsaatiginneqqissaarneq uagutsinnut qanoq sunniuteqassava?

¹⁷ Ataatani qilammiusoq pillugu Jiisusi Kristusi ima oqarpoq: „Taassuma seqerni ajortunut ajunngitsunullu nueqqusarpaa siallersitsisarlunilu iluartunut iluaatsunullu.“ (Matthæusi 5:45) Jehovap allaat iluaatsunut ajortunullu pilluaqqussutit naammangaartut tunniuttarunigit, soorunalimi assuarnaallutik inuusut pilluaqqunerungaassavai! Tussiaat 84:12-imi ima allassimavoq: „[Jehovap] assuarnaallutik inuusut sumik ajunngitsumik erliguutissanngilai.“ Jehovap asasiminik immikkut isumassuinera asanninneralu eqqarsaatigeqqissaaraangatsigu, uummaterput qujamasunnermik nuannaarnermillu ulikkaartarpoq!

18. (a) Sooq oqartoqarsinnaava Jehovap pilluaqqusinini erloqinartumik ilasarinngikkaa? (b) Sooq Guutip kiffaasa ilumoorfiginnittut ilarpassui naalliuttarpat?

¹⁸ ’[Jehovap] pilluaqqusinera’ — taannaavoq taassuma innuttaanik anersaakkut pisuunngortitsisoq. Neriorsoqqissaarneqarpugullu ’erloqinartumik ilasarinngikkaa’. (Ussatit 10:22, 1900/1961) Taavami sooq Guutip kiffaasa ilumoorfiginnittut ilarpassui erloqinartumik naalliunnartumillu misilinneqarlutillu annikilliortinneqartarpat? Pissutaasut pingaarnerit pingasuupput. (1) Ajortulioqqajaanerput. (1 Mosesi 6:5; 8:21; Jaaku 1:14, 15) (2) Saatani taassumalu inngilipilui. (Efesosimiut 6:11, 12) (3) Silarsuaq guutiitsoq. (Johannesi 15:19) Jehovap ajornartorsiortinneqarnerput akueraa, ajornartorsiutinulli pisuunngilaq. Ilumummi „tunissutit ajunngitsut naammalluinnartuusullu tamarmik pavannga qaamasut ataataannit . . . pisarput“. (Jaaku 1:17) Jehovap pilluaqqusinera erloqinartunut pissutaaneq ajorpoq.

19. Assuarnaallutik inuujuartut suna pissaraat?

¹⁹ Anersaakkut pisuunngussagaanni Guutimut qanillisariaqarpoq. Taassumunnga anngigisaqarnata attaveqarnerput ineriartortikkutsigu, ’katersissaagut pisuussutinik siunissami toqqaviusinnaasunik ajunngitsunik inuunivik pigilersinnaajumallugu’. (1 Timotheusi 6:12, 17-19) Guutip silarsuassaani nutaami anersaakkut pilluaqqussutit saniatigut aamma timikkut pilluaqqussutit iluaqutigissavavut. Taamanikkussamut Jehovamut naalattut tamarmik inuunivik nuannaarutigisinnaassavaat. (5 Mosesi 28:2) Nuannaarluta sulilu aalajangiusimanninnerulluta assuarnaalluta inuujuarta. (wE 5/15 06)

Suna ilikkarpiuk?

• Sooq siunissamik eqqarsaatiginnippallaarneq silatusaarnerunngila?

• Pilluaqqussutit suut ullumikkut iluaqutigaavut?

• Sooq Guutip kiffai aalajaatsut naalliuttarpat?

[Atuaqqissaarnermi apeqqutit]