Kunngi Kristusi ilumoorfiginnillutit kiffartorfigiuk

„Naalagaassusermik naalannaammillu kunngiussusermillu tunineqarpoq; inuiaqatigiit, naggueqatigiit immikkullu oqaasillit tamarmik kiffartorfigaat.“ — DANIELI 7:14.

1, 2. Qanoq ililluta nalunngilarput Kristusi ukiumi 33-mi Guutip naalagaaffiani tamakkiisumik pissaaneqalinngitsoq?

NAALAKKERSUISUP kia innuttani pillugit inuunini pilliutigaa kunngitullu naalakkersuiniarluni uummaqqilluni? Kunngi kina maani nunarsuarmi inuusinnaasimava innuttani imminik tatiginnilersillugit ilumoorfiginnilersillugillu taavalu qilammit naalakkersuilerluni? Inuk taamaaliorsinnaasimasutuaq — allarpassuarnillu iliorsinnaasimasutuaq — tassaavoq Jiisusi Kristusi. (Lukasi 1:32, 33) Ukiumi 33-mi piinsip ulluani, Kristusip toqunerata, makititaanerata qilaliarneratalu kingorna, Guutip „sunut tamanut niaquusoq“ taanna ’ilagiinnut niaquulersippaa’. (Efesosimiut 1:20-22; Apustilit Suliaat 2:32-36) Taamaalilluni Kristusi naalakkersuilerpoq, killilimmilli. Taassumunnga innuttaasut siulliit tassaapput kristumiut tanitat, taakkulu tassaapput anersaakkut Israeli, „Israeli Guutip pigisaa“. — Galatiamiut 6:16; Kolossemiut 1:13.

² Ukiumi 33-mi piinsip ulluaniit ukiut 30-ngajaat qaangiuttut apustili Paulusip uppernarsarpaa Kristusi Guutip naalagaaffiani pissaanermik tamakkiisumik suli tunineqarsimanngitsoq, taannali „Guutip talerpiata tungaani [issialersimavoq], tassanilu utaqqiinnarlugu akeqqami isikkaminut tummarfiliunneqarnissaat“. (Hebræerit 10:12, 13) Ukiut hundredellit siulliit naalerneranni apustili Johannesip utoqqalisup takorruukkami takuaa qilammi nunamilu Kisimi Oqartussaasup, Jehovap, Kristusi Jiisusi naalagaaffimmi qilammiittumi pilersinneqarlaami kunnginngortikkaa. (Saqqummersitat 11:15; 12:1-5) Uagut ullumikkut inuusugut Kristusip qilammi kunngitut Missiarsitut 1914-imi naalakkersuilerneranut uppernarsaaterpassuit eqqarsaatigisinnaavavut. *

3. (a) 1914-imiilli Guutip naalagaaffia pillugu nutaarsiassap nuannersup immikkoortua alla suna aallartippa? (b) Imminut qanoq aperisinnaavugut?

³ Aap, 1914-imiilli Guutip naalagaaffia pillugu nutaarsiassap nuannersup immikkoortua pissanganartoq alla aallartippoq. Taamanimiilli Kristusi Guutip naalagaaffiani qilammiittumi kunngitut naalakkersuivoq, naak tamanna ’akeqqami akornanni’ naalakkersuinerugaluartoq. (Tussiaat 110:1, 2; Matthæusi 24:14; Saqqummersitat 12:7-12) Aammattaaq taassumunnga innuttaasut ilumoorfiginnittut nunarsuarmiittut oqartussaassusia kajumillutik ilassivaat nunarsuaq tamakkerlugu inuiaat oqaluttuarisaaneranni asseqanngitsumik Biibilimik ilinniartitsinermi peqataallutik. (Danieli 7:13, 14; Matthæusi 28:18) Kristumiut tanitat, „Naalagaaffiup qitornai“, ’Kristusi sinnerlugu oqariartortitatut’, imaluunniit ambassadøritut, kiffartorput. Taakkua ’savanit allanit’ amerliartuinnartunit, Guutip naalagaaffianit aallartitaasunit, ilumoorfiginnittunit tapersersorneqarput. (Matthæusi 13:38; 2 Korinthimiut 5:20; Johannesi 10:16) Taamaakkaluartoq imminut misissortariaqarpugut paasiniarlugu uagut nammineq inuttut Kristusip oqartussaanera akuerinerlugu. Taanna ilumoorfigilluinnarparput? Qanoq ililluta kunngi qilammi naalakkersuisoq ilumoorfigisinnaavarput? Misissoqqaariartiguli Kristusimik ilumoorfiginninnissamut sunik pissutissaqarnerluta.

Kunngi ilumoorfiginninnissamut kajumissisitsisoq

4. Jiisusip kunngitut Guutip toqqagaatut nunarsuarmi kiffartortilluni suut suliarai?

⁴ Kristusi ilumoorfigaarput iliuuserisimasai qujamasuutigigatsigit pissusiilu asseqanngitsut nuannarigatsigit. (1 Petrusi 1:8) Jiisusip kunngitut Guutip toqqagaatut nunarsuarmiitilluni, piffissaq Guutip aalajangigaa nalliuppat kunngitut naalakkersuisutut silarsuaq tamakkerlugu sujumaarnerluni killilimmik  takutippaa. Kaattut nerisippai. Napparsimasut, tappiitsut, innarluutillit, tusilartut oqajuitsullu ajorunnaarsippai. Toqusut ilaat allaat inuulerseqqippai. (Matthæusi 15:30, 31; Lukasi 7:11-16; Johannesi 6:5-13) Aammattaaq Jiisusip nunami inuunera pillugu ilisimasaqarnerput pissutigalugu taassuma nunamut naalakkersuisussatut qanoq pissuseqarumaarnera paasisaqarfigilaarparput — pissusiisalu maluginiarnarnerpaartaat tassaavoq imminut pilliutigeriaannaalluni asanninnera. (Markusi 1:40-45) Tamatumunnga tunngatillugu Napoleon Bonaparte ima oqarnerarneqarsimavoq: „Alexander, Cæsar, Kaalersuaq uangalu nammineq naalagaaffissuarnik tunngaviliivugut, piliarsuavulli sumik tunngavilerpavut? Pissaanermik tunngavilerpavut. Jiisusi Kristusip kisimi naalagaaffini asanninnermik tunngavilerpaa, sulilu ullumikkut inuit millionillit taanna pillugu toqujumasinnaapput.“

5. Sooq Jiisusip pissusii taama nuannarineqartigaat?

⁵ Jiisusi saamasuullunilu uummammigut maniguuttuummat tatineqartutut nanertugaasutullu misigisut ilinniartitsissutai ineriartornartut tusarnaaraangamikkit inussiarnerneralu malugigaangamikku nukissaqalertarput. (Matthæusi 11:28-30) Meeqqat taanna ilagigaangamikku iluarusuttarput. Angutit maniguullutillu silatuut taassumunnga ajoqersuganngorusussuataarput. (Matthæusi 4:18-22; Markusi 10:13-16) Aamma soqutigittartuullunilu ataqqinnittuummat arnarpassuit Guutimik mianerinnittut ilumoorfiginnillutik taassuminnga tapersersuipput, taakkualu ilaasa kiffartornerani isumassorniarlugu piffissartik, nukitik pigisatillu pilliutigaat. — Lukasi 8:1-3.

6. Lazarusi toqummat Jiisusip misigissutsit itisuut suut ersersippai?

⁶ Kristusip ikinngutini asasani Lazarusi toqummat misigissutsimi itinerpaat ilaat ersersippai. Mariap Martallu annikilliornerat ima killinneqaatigitigaa aliasunnermit allaat nimaarluni ’qullilillunilu’. Jiisusi kamaammerpoq nalunngikkaluarlugu Lazarusi erniinnaq inuulerseqqittussaallugu. Taava asanninneq misigeqatiginninnerlu kajumississutigalugit oqartussaassutsini Guutimeersoq atorpaa Lazarusilu toqusunit makitillugu. — Johannesi 11:11-15, 33-35, 38-44, 1900/1961.

7. Sooq Jiisusimik ilumoorfiginninnissarput naleqqulluinnarpa? (Aamma takuuk qupperneq 17-imi ungalusaq).

⁷ Jiisusip eqqortunik asanningaarnera ilumoortuusaarnermillu guutiitsuussusermillu maajuginninnera pissutigalugit taassuminnga mianerinningaarpugut. Marloriarluni niuertunik piumatuunik naalaffimmit sapiilluni anisitsivoq. (Matthæusi 21:12, 13; Johannesi 2:14-17) Inuttullu nunamiutut assigiinngitsorpassuartigut malersorneqarpoq taamaalillunilu tatineqarnerit ajornartorsiutillu nalaattakkavut nammineq misigalugit. (Hebræerit 5:7-9) Jiisusip aamma nalunngilaa uumissorneqarluni naapertuilluanngitsuliorfigineqarlunilu qanoq innersoq. (Johannesi 5:15-18; 11:53, 54; 18:38–19:16) Naggataatigut Ataatami piumasaa naammassiniarlugu innuttanilu inuunermik naassaanngitsumik inuusinnaalersinniarlugit sapiilluni peqqarniitsumik toqutaanissani akueraa. (Johannesi 3:16) Kristusip pissusii tamakkua ilumoorfiginnillutit taassumunnga kiffartortuarnissannut kajumississutiginnginnerpigit? (Hebræerit 13:8; Saqqummersitat 5:6-10) Kunngimut Kristusimut innuttaassagaanni suut piumasarineqarpat?

Kristusimut innuttanngornissamut qanoq piukkunnarsartoqartartoq

8. Kristusimut innuttaasunut suut piumasarineqarpat?

⁸ Assersuusiaq una eqqarsaatigeriaruk: Nunami allami innuttanngorniaraanni amerlanertigut piumasaqaatinik tunngaviusunik naammassinninnissaq pisariaqartarpoq. Imaassinnaavoq piumasarineqartoq innuttanngorsinnaasut tatiginartuussasut peqqissuussasullu. Taamatulli Kristusimut innuttaasut ileqqorissuunertik anersaakkullu peqqissuunertik attattuartariaqarpaat. — 1 Korinthimiut 6:9-11; Galatiamiut 5:19-23.

9. Kristusimik ilumoorfiginnilluta qanoq ersersissinnaavarput?

⁹ Jiisusi Kristusip aamma pissutissaqarluarluni piumasaraa innuttani imminik naalagaaffimminillu ilumoorfiginnittuussasut. Ilumoorfiginninnertik takutippaat taassuma kunngitut Guutip toqqagaatut nunarsuarmiikkami inunnut ilinniartitsissutigisai naapertorlugit inuunermikkut. Assersuutigalugu pigisanik noqqaassuteqarnissamit Guutip naalagaaffiata soqutigisai Guutillu piumasaa pingaartinneruaat. (Matthæusi 6:31-34) Aammattaaq Kristusip pissusii ilungersorlutik ersersinniarsarisarpaat, misilinneqarnerpaaffimminni allaat. (1 Petrusi 2:21-23) Aamma Kristusimut innuttaasut taassuma maligassiaanik malinnipput allanut ajunngitsuliorniarlutik siulliullutik iliuuseqarnermikkut. — Matthæusi 7:12; Johannesi 13:3-17.

10. Qanoq ersersinneqarsinnaava Kristusimik ilumoorfiginnilluni (a) ilaqutariinni aamma (b) ilagiinni?

 ¹⁰ Jiisusip ajoqersugaasa aamma taassuminnga ilumoorfiginninnertik ersersittarpaat ilaqutariittut inuunerminni taassuma pissusiinik ersersitsinermikkut. Assersuutigalugu uiusut kunngiminnik qilammiittumik ilumoorfiginninnertik ersersittarpaat nuliaminnut meeqqaminnullu pissusilersornerminni taanna ilaarlugu. (Efesosimiut 5:25, 28-30; 6:4; 1 Petrusi 3:7) Nuliaasut Kristusimik ilumoorfiginninnertik ersersittarpaat minguitsumik inuunermikkut aamma ’piuaatsumik qanilaartumillu anersaaqarnermikkut’. (1 Petrusi 3:1-4; Efesosimiut 5:22-24) Meeqqat Kristusimik ilumoorfiginnittarput taassuma naalannikkut maligassiaanik malinnikkaangamik. Jiisusi meeraagallarami angajoqqaaminut naalatsigitippoq, taakkua naammalluinnanngitsuugaluartut. (Lukasi 2:51, 52; Efesosimiut 6:1) Kristusimut innuttaasut ilumoorfiginnillutik taanna ilaarniarsaraat ’misiginneqataanermikkut, qatanngutigiittut asaqatigiinnermikkut nallittuinermikkullu’. Kristusitut inniarlutik sapinngisaminnik iliorput, ’qanilaarlutik, ajortoq ajortoqataanik akilernagu, oqaasipilulluunniit oqaasipiloqataanik’. — 1 Petrusi 3:8, 9; 1 Korinthimiut 11:1.

Innuttaasut inatsisinut naalattut

11. Kristusimut innuttaasut inatsisit suut naalappaat?

¹¹ Soorlu innuttanngorniaraanni nunami inatsisaasut naalanneqartariaqartut, taamatuttaaq Kristusimut innuttaasut „Kristusip inatsisaa“ naalattariaqarpaat Jiisusillu ilinniartitsissutai peqqussutaalu tamaasa naapertorlugit inuullutik. (Galatiamiut 6:2) Ingammik asanninnermut ’inatsimmik akimasumik’ taakkua ilumoorfiginnillutik maleruaanissaat pingaaruteqarpoq. (Jaaku 2:8) Inatsisinut taakkununnga suut ilaappat?

12, 13. Qanoq ililluta ilumoorfiginnilluta ’Kristusip inatsisaanut’ naalatsigitissaagut?

¹² Kristusimut innuttaasut naammalluinnanngitsuullutillu kukkusarput. (Romamiut 3:23) Taamaammat ’qatanngutigiittut ilumoortumik asaqatigiinnerup’ ineriartortinnissaa sulissutigiuartariaqarpaat ’uummammik minguitsumik asaqatigiinniassagamik’. (1 Petrusi 1:22) ’Assuarliutissaqartoqaraangat’ kristumiut ilumoorfiginnillutik Kristusip inatsisaa maleruassavaat ’kamageqatigiinnermikkut isumakkeerfigeqatigiinnermikkullu’. Inatsimmut tamatumunnga naalannertik naammalluinnanngissutit isiginngitsuusaartuarnissaannut asaqatigiinnissamullu pissutissarsiornissamut iluaqutigissavaat. Ilumoorfiginnillutik kunngitsinnut asannittumut naalattut asanninnermillu, ’ataasiussutsip qilerutaanik naammalluinnartumik’, atisisut ilaginerat qujamasuutigingaartannginnerpiuk? — Kolossemiut 3:13, 14.

¹³ Aammattaaq Jiisusi nassuiaavoq asanninneq ersersitani, allanullu ilaarterusutani, asanninnermit inuit imminnut ersersittagaannit annerusoq. (Johannesi 13:34, 35) Uagutsinnik asannittuinnaat asagutsigit iliuuserput immikkut ittuunavianngilaq. Asanninnerput ilaannakuullunilu amigassagaluarpoq. Jiisusip kajumissaarpaatigut Ataatami asanninnera ilaaqqullugu, uagutsinnut akeraasut, uagutsinnik uumissuillutillu malersuisut, allaat  asanninnermik najoqqutassianik tunngavilimmik ersersitsiviginerisigut. (Matthæusi 5:46-48) Aamma asanninneq taanna Guutip naalagaaffiani innuttaasut suliaminni pingaarnerpaami ilumoorfiginnillutik pinertusaarnissamut kajumississutigaat. Suliaat pingaarnerpaaq suugami?

Ilumoorfiginninnerat misilinneqarpoq

14. Sooq oqaluussineq taama pingaaruteqartigaa?

¹⁴ Ullumikkut Guutip naalagaaffiani innuttaasut „Guutip naalagaaffianik“ peqqissaartumik nalunaajaanissaq suliassaraat pingaaruteqarluinnartoq. (Apustilit Suliaat 28:23) Suliaq tamanna assut pingaaruteqarpoq naalagaaffik Missiarsikkoortoq Jehovap qilammi nunamilu kisimi oqartussaaneranik qutsissisitsisussaammat. (1 Korinthimiut 15:24-28) Nutaarsiassaq nuannersoq oqaluussissutigigaangatsigu tamatuminnga tusartut Guutip naalagaaffiani innuttanngornissamut periarfissaqalertarput. Aamma inuit tusarliussamut periarnerat misilinneqaatitut atulissaaq, taannalu tunngavigalugu kunngi Kristusi taakkuninnga eqqartuussisinnaavoq. (Matthæusi 24:14; 2 Thessalonikamiut 1:6-10) Taamaattumik Kristusimut ilumoorfiginninnerput ersersissagutsigu, taassuma Guutip naalagaaffia pillugu allanut oqaluttuussinissamik peqqussutaata naalannissaa pingaaruteqarluinnarpoq. — Matthæusi 28:18-20.

15. Sooq kristumiut ilumoorfiginninnerat misilinneqarpa?

¹⁵ Soorunalimi Saatanip oqaluussineq suut tamaasa atorlugit akerlilersorpaa, aamma naalakkersuisut nunamiusut Kristusip oqartussaanera Guutimeersoq akuerinngilaat. (Tussiaat 2:1-3, 6-8) Taamaammat Jiisusip ajoqersukkani ima mianersoqquai: „Kiffaq naalakkaminit annerunngilaq. Uanga qinugisimaguninnga ilississaaq qinugiumaarpaasi.“ (Johannesi 15:20) Tassa Kristusimut ajoqersukkat ilumoorfiginninnerminnut misilinneqataasumik anersaakkut sorsupput. — 2 Korinthimiut 10:3-5; Efesosimiut 6:10-12.

16. Guutip naalagaaffiani innuttaasut qanoq ilillutik „Guuti Guutip piinik“ tunisarpaat?

¹⁶ Guutilli naalagaaffiani innuttaasut kunngiminnut takussaanngitsumut ilumoorfiginnittuarput oqartussaasunut nunamiusunut ataqqinnillutik. (Titusi 3:1, 2) Jiisusi ima oqarpoq: „Kaasari tunisiuk kaasarip piinik Guutilu Guutip piinik.“ (Markusi 12:13-17) Taamaammat Kristusimut innuttaasut oqartussaasut inatsisaat naalattarpaat taakku Guutip inatsisaanut akerliunngikkaangata. (Romamiut 13:1-7) Juutilli eqqartuussisoqatigiivisa pingaarnersaasa Jiisusip ajoqersugaanik oqaluussiunnaaqqusinermikkut Guutip inatsisai sumiginnaramikkit, ajoqersukkat aalajangersimalluinnarlutik ataqqinnillutilli oqarput ’Guuti naalakkamissut inunnit naalattariaqarnerullugu’. — Apustilit Suliaat 1:8; 5:27-32, NV.

17. Ilumoorfiginninnikkut misilinneqaraangatta sooq sapiissinnaavugut?

¹⁷ Soorunami Kristusimut innuttaasut malersorneqaraangamik kunngiminnik ilumoorfiginnittuarniarlutik sapiissuseqangaartariaqarput. Taamaakkaluartoq Jiisusi ima oqarpoq: „Pilluarpusi ilissi uanga pillunga mitaatigippasi qinugalusilu tamanillu ajortunik oqaatigippasi sallullutik. Tipaatsugitsi nuannaarlusilu akissarsiassarsi qilanniittoq angeqimmat.“ (Matthæusi 5:11, 12) Ukiuni hundredelinni siullerni Jiisusimut ajoqersukkat oqaatsit taakkua ilumuussusiat misigaat. Guutip naalagaaffianik oqaluussissutiginnittuarnertik pillugu iperartorneqaraluaraangamilluunniit „[nuannaartarput] Jiisusip aqqa pillugu narrunarsagaanissamut qinngaqqunnartitaannginnamik. Naalaffimmi illuminnilu ullut tamaasa ajoqersuinertik ingerlatiinnarpaat nalunaajaatigalugulu Jiisusi tassaasoq Tanitaq [Ullullu tamaasa, naalaffimmi illumillu illumut angalaarlutik, soraarnatik ajoqersuiuaannarput Missiarsimillu, Jiisusimik, nutaarsiassaq nuannersoq oqaluussissutigalugu, NV].“ (Apustilit Suliaat 5:41, 42) Nersualaarneqartariaqarputit misilinneqarnerpit, napparsimanerpit, aliasunnerpit akerlilersorneqarnerpilluunniit nalaani taakkunatulli ilumoorfiginnikkaangavit. — Romamiut 5:3-5; Hebræerit 13:6.

18. Jiisusip Pontiusi-Pilatusimut oqaasiini suna erserpa?

¹⁸ Jiisusip kunngitut Guutip toqqagaatut suli nunarsuarmiitilluni Romamiut naalagaatitaat  Pontiusi-Pilatusi ima tunngavilersuiffigaa: „Uanga naalagaaffiga silarsuarmit matumannga pinngilaq [silarsuarmut matumunnga ilaanngilaq, NV]. Uanga naalagaaffiga silarsuarmit matumannga pisuugaluarpat kiffama akiuullutik illersussagaluarpaannga juutinut pisinneqaqqunanga; kisiannili naalagaaffiga silarsuarmit matumannga pinngilaq.“ (Johannesi 18:36) Taamaammat Guutip naalagaaffiani innuttaasut kimulluunniit sakkulersorneq ajorput, aamma inuit akerleriinnerinut akuliunneq ajorput. ’Eqqissinermut naalagaanermut’ ilumoorfiginninnertik pissutigalugu nunat assigiinngitsut politikkikkut suliniutaannut kalluunnaveersaarluinnarput. — Esaja 2:2-4; 9:5, 6.

Innuttaasunut ilumoorfiginnittunut naassaanngitsumik pilluaqqussutissat

19. Sooq Kristusimut innuttaasut siunissamut isumalluarsinnaappat?

¹⁹ Kristusimut, ’Kunngit Kunngiannut’, innuttaasut siunissamut isumalluarput. Kunngitut pissaanerminik Guutimeersumik atuinissaa qilanaaraat. (Saqqummersitat 19:11–20:3; Matthæusi 24:30) „Naalagaaffiup qitornai“, imaluunniit tanitat ilumoorfiginnittut, kinguleruttut suli nunarsuarmiittut Kristusip qilammi kunngioqatissaatut kingornussassartik erlinnartoq qilanaaraat. (Matthæusi 13:38; Lukasi 12:32) Kristusip ’savaatai allat’ ilumoorfiginnittut kunngimik ima oqarluni akuerinninnissaa pissangallutik utaqqivaat: „Qaagitsi, ataatama pilluaqqusai, naalagaaffik [nunarsuaq paratiisiusoq Guutip naalagaaffiata oqartussaaffigisaa] silarsuup tunngavilerneqarneraniit ilissinnut pisassarititaasoq kingornussarisiuk.“ (Johannesi 10:16; Matthæusi 25:34) Taamaattumik qanortoq Guutip naalagaaffiani innuttaasut tamarmik ilumoorfiginnillutik kunngi Kristusimut kiffartortuarnissartik aalajangiusimalissuk. (wE 5/1 06)

[Quppernerup ataani ilanngussaq]

Uku nassuiarsinnaavigit?

• Sooq Kristusimik ilumoorfiginninnissarput naleqqulluinnarpa?

• Kristusimut innuttaasut qanoq ersersittarpaat taanna ilumoorfigalugu?

• Sooq kunngi Kristusi ilumoorfigiumavarput?

[Atuaqqissaarnermi apeqqutit]

[Qupp. 17-mi ungalusaq]

KRISTUSIP PISSUSII ASSEQANNGITSUT SULI ALLAT

Kinaassusersiortuunnginneq — Johannesi 4:7-30.

Misiginneqatiginninneq — Matthæusi 9:35-38; 12:18-21; Markusi 6:30-34; Hebræerit 4:15, 16.

Imminut pilliutigeriaannaalluni asanninneq — Johannesi 13:1; 15:12-15.

Ilumoorfiginninneq — Matthæusi 4:1-11; 28:20; Markusi 11:15-18.

Ingasaassinianngitsuuneq — Matthæusi 15:21-28.

[Qupp. 15-mi assiliartaq]

Asannittuliorfigeqatigiinnitsigut ilumoorfiginnilluta „Kristusip inatsisaa“ naalapparput

[Qupp. 17-mi assiliartaq]

Kristusip pissusii ilumoorfiginnillutit taassumunnga kiffartornissamut kajumississutigaagit?