Paarsisut ’savaatinut maligassaasut’
Paarsisut ’savaatinut maligassaasut’
„Guutip savaataanik ilissinniittunik paarsisuuniaritsi, paarisigit . . . nammineq kajumissutsissinnit . . . kajumillusilu . . ., savaatinut maligassaagitsi.“ — 1 PETRUSI 5:2, 3.
1, 2. (a) Jiisusip apustili Petrusi sumik immikkut pisinnaatitaaffilerpaa, aamma sooq Jiisusip tatiginninnera tunngavissaqarluarpa? (b) Jehovap paarsisut toqqakkat qanoq misigissuseqarfigai?
UKIUMI 33-mi piinsip ullua sioqqullugu Petrusi ajoqersukkallu allat arfinillit ullaakkorsiorput Jiisusip Galilæap Tasersuata sinaani piareersarsimasaanik. Petrusip Jiisusi makititaasimasoq aatsaat takunngilaa, qularnanngitsumillu nuannaaqaaq nalunnginnamiuk Jiisusi uumasoq. Petrusili aamma immaqa annilaangasimassaaq. Ilami ullualuinnaat qaangiuttut inuppassuit takkuanni Jiisusimik ilisarisimanninnini miserratigaa. (Lukasi 22:55-60; 24:34; Johannesi 18:25-27; 21:1-14) Jiisusip Petrusi peqqissimisoq uppernikinnera pillugu naveerpaa? Naagga. Petrusili immikkut pisinnaatitaaffilerpaa ’savaatiminik’ nerlersuisussanngortillugu taakkuninngalu paarsisussanngortillugu. (Johannesi 21:15-17) Soorlu ilagiit kristumiut siulliit pillugit Biibilimi oqaluttuami ersertoq, Jiisusip Petrusimik tatiginninnera tunngavissaqarluarpoq. Sualuttumik misilinneqarnerup amerliartupiloornerullu nalaani Petrusi apustilit allat utoqqaanertallu Jerusalemimiittut peqatigalugit ilagiinnut kristumiunut paarsisuuvoq. — Apustilit Suliaat 1:15-26; 2:14; 15:6-9.
2 Ullumikkut Jehovap Jiisusi aqqutigalugu angutit piukkunnaatillit anersaakkut ittumik paarsisuusussatut toqqarsimavai, taakkualu inuiaat oqaluttuarisaanerata ulluini artornarnerpaani Taassuma savaataanik siulersuisussaapput. (Efesosimiut 4:11, 12; 2 Timotheusi 3:1) Taamatut tatiginninnissaq pissutissaqarluarpa? Aap, qatanngutigiissuit kristumiut eqqissisimasut nunarsuarmi tamarmiittut tamatumunnga uppernarsaataapput. Ilumoorpoq paarsisut taakkua naammalluinnanngitsuusut, soorluttaaq Petrusi taamaassimasoq. (Galatiamiut 2:11-14; Jaaku 3:2) Taamaakkaluartorli Jehovap savanik ’nammineq ernermi aavanik pissarsiaminik’ isumassuisussanngortippai. (Apustilit Suliaat 20:28, NV) Jehovap angutit taakkua asangaarpai ’marloriaammillu ataqqineqartussatut’ isigalugit. — 1 Timotheusi 5:17.
3. Anersaakkut ittumik paarsisut qanoq ilillutik kiffartornerminni kajumissuseqartuarsinnaappat?
3 Anersaakkut ittumik paarsisut kiffartornerminni qanoq ilillutik kajumissuseqartuarsinnaappat, taamaalillutillu savaatinut maligassanngorlutik? Taakkua Petrusitut ukiunilu hundredelinni siullerni paarsisutut allatut Guutip anersaava illernartoq, akisussaaffimminnik isumaginnissinnaaqqullutik pisariaqartitaminnik nakussatsitsisartoq, tunaaraat. (2 Korinthimiut 4:7) Anersaaq illernartup aamma anersaap inerititai — asanninneq, tipaatsunneq, eqqissineq, kamaginninneq, inussiarnerneq, ajunngissuseq, upperneq imminullu naalakkersorsinnaaneq — taakkunani ineritittarpai. (Galatiamiut 5:22, 23) Misissoriartigu paarsisut Guutip savaataanik isumassuinerminni anersaap inerititaanik ersersitsinissamut tunngatillugu qanoq maligassiuilluarsinnaanersut.
Savaatit ataatsimut isigalugit aamma tamaasa immikkut asasariaqarpaat
4, 5. (a) Jehovap Jiisusillu qanoq ersersippaat savaatit asallugit? (b) Anersaakkut ittumik paarsisut savaatinut asanninnermik ersersitseriaasiannik eqqaasaqarit.
4 Pissuseq Guutip anersaavata ineritittagaa pingaarnerpaaq tassaavoq asanninneq. Jehovap savaatiminut tamanut asanninnini ersersittarpaa anersaakkut inuussutissanik naammangaartunik pilersoraangamigit. (Esaja 65:13, 14; Matthæusi 24:45-47) Savaatilli nerisassaqarnissaat isumagiinnanngilaa. Savaatini tamaviisa asannittumik isumassorpai. (1 Petrusi 5:6, 7) Jiisusip aamma savaatit asavai. Taakkua pillugit inuunini akigaa, taakkualu inuttut ataasiakkaatut tamaviisa ilisarisimavai, ’aqqilu’ nalunagit. — Johannesi 10:3, 14-16.
5 Anersaakkut ittumik paarsisut Jehova Jiisusilu ilaarpaat. Guutip savaatai ataatsimut isigalugit asanninnermik ersersitsivigisarpaat ilagiinni ’ilinniartitsinermikkut’. Paarsisut oqalugiaatigisartagaat Biibilimik tunngaveqartut savaatinik illersuinissamut taakkuninngalu anersaakkut inuussutissiinissamut iluaqutaapput, tamakkununngalu tunngatillugu ilungersorlutik suliaat tamanit takuneqarsinnaapput. (1 Timotheusi 4:13, 16, NV) Suliaalli malunnannginnerusut tassaapput ilagiinnut tunngasunik nalunaarsuiniarlutik, allakkatigut attaveqatigiinnermik isumaginninniarlutik, ataatsimiinnerit pilersaarusiorniarlugit aamma ilagiit ataatsimiinnerisa sammisassaasalu allat „ippinnanngitsumik torersumillu“ ingerlanissaannik qulakkeerisussanik allarpassuarnik isumaginninniarlutik iliuuserisartagaat. (1 Korinthimiut 14:40) Suliassat tamakkua ilarpassui ilagiinneersunit malugineqarani suliarineqartarput. Tamakkua asanninnermik pissuteqarluni suliaapput. — Galatiamiut 5:13.
6, 7. (a) Paarsisut ilaatigut qanoq ilillutik savat ilisarisimanerulersinnaavaat? (b) Misigissutsit pillugit utoqqaanertanik oqaloqateqartarneq sooq ilaannikkut pitsaasarpa?
6 Paarsisut kristumiut asannittut savaatit ilagiinniittut tamaviisa inuttut soqutiginiarlugit sapinngisaminnik iliortarput. (Filippimiut 2:4) Paarsisut savaatit ataasiakkaat ilisarisimanerulertarpaat, ilaatigut tamanut oqaluussinermi qanimut suleqatiginerisigut. Jiisusip ajoqersukkani oqaluusseqatigikulasarpai, periarfissallu taamaattut taakkua kaammattornissaannut atortarlugit. (Lukasi 8:1, 2a) Paarsisoq kristumiu misilittagaqarluartoq ima oqarpoq: „Isumaqarpunga qatanngummik angummik arnamilluunniit qiimmassaaniarluni iliuuserisinnaasaq pitsaanerpaaq tassaasoq oqaluusseqatigalugu, aamma taamaalilluni ilisarisimaqatigiillualertoqartarpoq.“ Qanittukkut utoqqaanertat ilaannik oqaluusseqateqarnissannut periarfissaqarsimanngikkuit, taava immaqa taakkua ilaat isumaqatigisinnaavat.
7 Jiisusip asanninneq kajumississutigalugu ajoqersukkani aliasoqatigalugillu nuannaaqatigisarpai. Assersuutigalugu ajoqersukkami ilaat 70-it (1900/1961) oqaluussereerlutik nuannaaqalutik utermata „qiimmattarpoq“. (Lukasi 10:17-21) Lazarusilli toqunera Mariamut taassumalu ilaqutaanut ikinngutaanullu qanoq sunniuteqartoq takugamiuk ’qullilivoq’. (Johannesi 11:33-35, 1900/1961) Paarsisut isumassuisut ullumikkut aamma savat misiginneqatigisarpaat. Asanninneq kajumississutigisarpaat ’tipaatsuttut tipaatsoqatiginissaannut, qiasullu qiaqatiginissaannut’. (Romamiut 12:15) Inuuninni nuannaaruteqaraangavit aliasuuteqaraangavilluunniit paarsisut kristumiut misigissutsinnik oqaluttuunnissaannut nangaassanngilatit. Nuannaarnerit pillugu tusakkatik qiimmassaatigissavaat. (Romamiut 1:11, 12) Misilinneqarnitit pillugit ilisimasaqalernertik ilinnik nakussatsitsinissaminnut tuppallersaanissaminnullu iluaqutigissavaat. — 1 Thessalonikamiut 1:6; 3:1-3.
8, 9. (a) Utoqqaanertap nuliani qanoq asannittuliorfigaa? (b) Paarsisup ilaquttaminik asannittuliorfiginninnissaa sooq pingaaruteqarpa?
8 Paarsisup savaatinik asanninnera ingammik nammineq ilaquttaminik iliorfiginninneratigut ersertarpoq. (1 Timotheusi 3:1, 4) Aappaqarpat, nuliaminik asanninnera ataqqinninneralu uiusunut allanut maligassaalluassaaq. (Efesosimiut 5:25; 1 Petrusi 3:7) Uillarnerup kristumiup Lindamik atillip oqaluttuaa maluginiariaruk. Uia ukiut 20-t sinnerlugit nakkutilliisutut kiffartorsimavoq. „Uima piffissarujussuaq ilagiinnik isumaginninnermut atortarpaa, suleqataasutulli misigitippaanga. Tapersersuininnik qujamasuutiginninnerminik ersersitsikulasarpoq, sapinngisanilu tamaat ilaginiartarlunga. Taamaammat asaneqartutut misigivunga ilagiinnullu piffissamik atuinera ajorinagu.“
9 Paarsisoq kristumiu ataataappat, meeqqaminik asannittumik siunnersuisarnera nersualaarisarneralu angajoqqaajusunut allanut maligassaalluassaaq. (Efesosimiut 6:4) Ilaquttaminik asannittuliorfiginninnera anersaaq illernartumit paarsisutut toqqarneqarami tatigineqarnini malillugu iliorneranut uppernarsaataajuassaaq. — 1 Timotheusi 3:4, 5.
Attaveqaqatigiinnikkut nuannaarneq eqqissinerlu siuarsartariaqarpaat
10. (a) Ilagiit nuannaarnerannut eqqissinerannullu suna ajortumik sunniuteqarsinnaava? (b) Apeqqut suna ukiuni hundredelinni siullerni ilagiinnik eqqissiunnaartitseqqajaava, apeqqullu taanna qanoq sammineqarpa?
10 Anersaaq illernartup kristumiut tamaasa immikkut qamannga pisumik nuannaalersissinnaallugillu qamuuna eqqissitissinnaavai, aamma pissuserineqartussat taakku utoqqaanertaqatigiinni ilagiinniittunilu ineriartortissinnaavai. Attaveqaqatigiilluartoqanngippalli nuannaarnermut eqqissinermullu tamatumunnga ajortumik sunniuteqarsinnaavoq. Kunngi Salomo ima oqarpoq: „Isumalioqatigiittoqanngikkaangat pilersaarutit asuliinnartarput.“ (Ussatit 15:22) Paarlattuanilli ataqqinnittumik ammasumillu attaveqaqatigiinneq nuannaarnermik eqqissinermillu siuarsaasarpoq. Assersuutigalugu kipineqartarnerup apeqquserneqarnera ilagiinni kristumiuni siullerni eqqissiunnaartitseqqajaammat, siulersuisoqatigiit Jerusalemimiittut anersaaq illernartumit siulersortipput. Utoqqaanertat siulersuisoqatigiiusut aamma kipineqarnermut tunngatillugu isumaat assigiinngillat, uummaarissumillu tamanna oqallisigereeramikku aalajangiipput. Tamarmik isumaqatigiillutik aalajangigartik ilagiinnut nalunaarutigimmassuk qatanngutit tamanna „nuannaarutigaat“. (Apustilit Suliaat 15:6-23, 25, 31; 16:4, 5) Nuannaarneq eqqissinerlu siuarsarneqarput.
11. Utoqqaanertat qanoq ilillutik ilagiinni nuannaarnermik eqqissinermillu siuarsaasinnaappat?
11 Ullumikkut aamma taamaappoq. Paarsisut attaveqaqatigiilluaraangamik ilagiinni nuannaarnermik eqqissinermillu siuarsaasarput. Ilagiinni eqqissineq ajornartorsiutinit navianartorsiortinneqaraangat naapeqatigiittarput isummatillu ammasumik oqaloqatigiissutigalugit. Paarsisut allat oqaaseqaraangata ataqqinnillutik tusarnaartarpaat. (Ussatit 13:10; 18:13) Anersaaq illernartumit siulersorneqarnissartik qinnutigereeraangamikku Biibilimi najoqqutassiat najoqqutassiallu ’kiffamit ilumoorlunilu silatuumit’ tunniunneqartut tunngavigalugit aalajangiisarput. (Matthæusi 24:45-47; 1 Korinthimiut 4:6) Utoqqaanertaqatigiit Biibilimik tunngaveqartumik aalajangeereeraangata utoqqaanertat tamavimmik anersaaq illernartup siulersuineranut naalatsigitittarput aalajangerneqartumik tapersersuinermikkut — aamma namminneq isumartik amerlanerussuteqartunit tapersersorneqanngikkaluartoq. Taamatut anneruniajuitsuuneq nuannaarnermik eqqissinermillu siuarsaasarpoq Guutimillu qanoq saqeqateqarnissaq eqqarsaatigalugu savanut maligassaalluarluni. (Mika 6:8) Ilagiinni paarsisut Biibili tunngavigalugu aalajangigaat anneruniajuillutit malittarpigit?
Kamaginnittuusariaqarlutillu inussiarnersuusariaqarput
12. Sooq Jiisusi apustilinut kamaginnittuusariaqarlunilu inussiarnersuusariaqarpa?
12 Jiisusi apustilinut kamaginnittuullunilu inussiarnersuuvoq, naak taakku kukkussutitik kukkussutigisaqattaartaraluaraat. Assersuutigalugu maniguuttuunissap pisariaqassusia taakkununnga erseqqissaqqeqattaarpaa. (Matthæusi 18:1-4; 20:25-27) Taamaakkaluartorli Jiisusip nunami inuunerani unnummi kingullermi taassuma apustilimi isigaat asallugit taakkuninnga maniguunnermik ilinniartitsinerata kingunitsianngua, apustilit „oqqassutigilerpaat kina arlartik ilaminit annerusutut naatsorsuunneqassanersoq“. (Lukasi 22:24; Johannesi 13:1-5) Jiisusip apustilit sukannersumik naveerpai? Naamik, eqqarsalersinniarlugit inussiarnersumik ima oqarpoq: „Kina annerua: Nerrivimmi inissisimasoq imaluunniit kiffartuussisoq? Tassaannginnerpa nerrivimmi inissisimasoq? Uangali akornassinni kiffartortutut ippunga.“ (Lukasi 22:27) Jiisusip kamaginninnera inussiarnerneralu — aamma nammineq maligassiuilluarnera — apustilit naggataatigut killinneqaatigaat.
13, 14. Paarsisut ingammik qaqugukkut inussiarnisaartariaqarpat?
13 Anersaakkut ittumik paarsisoq immaqa aamma ilagiinniittumik sanngiissut aalajangersimasoq pillugu arlaleriarluni siunnersuisariaqartarpoq. Paarsisup inuk taanna paamitsaassinnaavaa. ’Torersumilli inuuseqanngitsut ilitsersoraangamigit’ nammineq sanngiissutini eqqaamasarunigit qatanngutiminut kamaginnittuusinnaallunilu inussiarnersuusinnaavoq. Taamaalilluni Jiisusi Jehovalu, kristumiunut tamanut — aamma paarsisunut — taamatut pissuseqartut, ilaassavai. — 1 Thessalonikamiut 5:14; Jaaku 2:13.
14 Paarsisut immaqa ilaanneeriarlutik sualuttumik ajortuliorsimasumik sukannersumik oqaaqqissaarisariaqartarput. Unioqqutitsisorlu peqqissiminanilu allamik isumataanngippat paarsisut taanna ilagiinnit peersittariaqartarpaat. (1 Korinthimiut 5:11-13) Taamaakkaluartoq pineqartumut periaasianni ersissaaq uumigisaat tassaasoq ajortuliaq, ajortuliortuunngitsoq. (Judasi 23) Paarsisut inussiarnisaarnerat savap qimagussimasup savaatinut uternissaanut ajornannginnerulersitsisinnaavoq. — Lukasi 15:11-24.
Upperneq kajumississutigalugu ajunngitsuliornerit
15. Paarsisut Jehovap ajunngissusia ilaatigut qanoq ilaartarpaat, taamaaliornissaminnullu suna kajumississutigaat?
15 „Tamanut ajunngisaartarpoq [Jehova],“ allaat inunnut taakkununnga iliuutsiminik qujamasuutiginninngitsunut. (Tussiaat 145:9; Matthæusi 5:45) Taassuma ajunngissusia ingammik erserpoq innuttaminik ’Naalagaaffimmik iivangkiiliumik’ oqaluussissutiginnikkiartortitsineratigut. (Matthæusi 24:14) Paarsisut Guutip ajunngissusianik ersersitsisarput oqaluussinermi siuttuunermikkut. Taamatut qasusuillutik sulinissamut suna kajumississutigaat? Jehovamik taassumalu neriorsuutaanik upperinnilluinnarnertik. — Romamiut 10:10, 13, 14.
16. Paarsisut savanut qanoq ’ajunngitsuliorsinnaappat’?
16 Paarsisut oqaluussinermikkut ’tamanut ajunngitsuliornissartik’ sulissutigiinnarnagu, aammattaaq ’pingaartumik uppeqatiminnut’ ajunngitsuliornissaq akisussaaffigaat. (Galatiamiut 6:10) Ilaatigut taamaaliortarput kaammattuillutik paarsisutut pulaarnermikkut. Utoqqaanertaq ima oqarpoq: „Paarsisutut pulaartarnera nuannareqaara. Pulaarnitsinni qatanngutit angutit arnallu iliuuseqarnerat pillugu nersualaarnissaannut aamma iliuuserisaasa pingaartinneqarnerannik paasitinnissaannut periarfissaqartarpunga.“ Paarsisut ilaannikkut immaqa oqaluussisartup Jehovamut kiffartornermi qanoq siumukarsinnaaneranik siunnersuuteqartarput, taamaaliornerminnilu apustili Paulusi ilaartarunikku silatusaassapput. Maluginiariaruk qatanngutinut Thessalonikamiittunut taanna qanoq kajumissaarinersoq: „Naalakkami tatigaassi peqqussutivut naalakkisi siunissamilu naalakkumaarlugit.“ (2 Thessalonikamiut 3:4) Taamatut tatiginninnermik ersersitsinerat ilagiinniittut tamarmik ajunngitsuliornissamut kajumississutigisinnaavaat ’siulersuisunullu naalannissaannut’ ajornannginnerulersitsisinnaalluni. (Hebræerit 13:17) Paarsisunit kaammattuutaasumik pulaarneqaraangavit qujamasunninnik ersersitsinissat eqqaamasarpiuk?
Saamasuussagaanni imminut naalakkersinnaasariaqarpoq
17. Petrusi Jiisusimit qanoq ilinniartinneqarpa?
17 Jiisusi kamassaarneqaraluaraangamiluunniit saamasarpoq. (Matthæusi 11:29) Killuutigineqarlunilu tigusarineqarami saamallunilu imminut naalakkersinnaassuseqarluarpoq. Petrusilli eqqarsaqqaarani pannani amuaa akisillunilu saassussilluni. Jiisusilli taanna ima oqarfigaa: „Isumaqarpit Ataataga qinnuigisinnaanngikkiga maannakkorpiaq ikiortisseqqullunga inngilinik legioninit aqqaneq-marlunnit amerlanerusunik?“ (Matthæusi 26:51-53; Johannesi 18:10) Petrusip ilinniartitsissutigineqartoq pigiliuppaa kingusinnerusukkullu kristumiut ima eqqaasillugit: „Kristusi aamma anniartitaammat ilissi pillusi maligassamillu qimatsivigalusi, tumini atuarlugit malinnaaqqullusi. . . . Oqaasipiluunneqarami oqaasipiluummik akissuteqanngilaq, anniartitaanermini sioorasaarinngilaq.“ — 1 Petrusi 2:21-23.
18, 19. (a) Paarsisut ingammik qaqugukkut saamanermik imminullu naalakkersinnaanermik ersersitsisariaqarpat? (b) Allaaserisami tulliuttumi apeqqutit suut sammissavavut?
18 Paarsisut ilagiinni suliniutitik iluatsissappata aamma saamasuusariaqarput, naapertuilluanngitsumik pineqaraluarunilluunniit. Imaassinnaavoq ikiorniagaraluat nuanninngitsumik periartoq. Inuk taanna anersaakkut ittumik sanngiilluniluunniit napparsimappat, utoqqaanertanit saaffigineqaruni immaqa allaat ’eqqarsariaqqaarnani’ akissutaa ’panatut kapisisinnaavoq’. (Ussatit 12:18) Jiisusilli pisimaneratut paarsisut sakkortuumik akisinavianngillat allatulluunniit akiniaanaviaratik. Imminut naalakkersinnaanermik ersersitsisarput misiginneqataanerminnillu ersersitsiuarlutik, tamannalu ikiortarialimmut pilluaqqussutaasinnaavoq. (1 Petrusi 3:8, 9) Utoqqaanertat maligassiuinerat ilinniarfigaajuk siunnersorneqaraangavillu saamanermik imminullu naalakkersinnaanermik ersersitsisarlutit?
19 Qularutissaanngilaq Jehovap Jiisusillu paarsisut tusindillit, kajumillutik savaatinik silarsuarmi tamarmiittunik isumassuisut, imminut pilliutigeriaannaallutik sulinerat pingaartingaaraat. Jehovap taassumalu ernerata ilagiinni kiffartortut tusindillit ’illernartunik kiffartuussinermi’ utoqqaanertanik tapersersuisut asangaarpaat. (Hebræerit 6:10) Soormiuna qatanngutit angutit kuisimasut ilaasa ’suliamik kusanartumik’ suliaqarnissartik nangaassutigigaat? (1 Timotheusi 3:1, NV) Aamma Jehovap paarsisutut toqqakkani qanoq ilinniartittarpai? Apeqqutit taakku allaaserisami tulliuttumi sammissavavut.
Eqqaamavigit?
• Paarsisut ilaatigut qanoq savaatinut asanninnermik ersersitsisarpat?
• Ilagiinniittut tamarmik qanoq ilillutik nuannaarnermik eqqissinermillu siuarsaaqataasinnaappat?
• Sooq paarsisut siunnersuigaangamik kamaginnittuullutillu inussiarnisaartarpat?
• Utoqqaanertat ajunngissusiat uppernerallu qanoq ersertarpa?
[Atuaqqissaarnermi apeqqutit]
[Qupp. 4-mi assiliartaq]
Asanninneq kajumississutigalugu utoqqaanertat ilagiinnut kiffartortarput
[Qupp. 4-mi assiliartat]
Piffissartik aamma atortarpaat ilaquttamik sukisaarsaqatiginissaannut . . .
. . . aamma oqaluusseqatiginissaannut
[Qupp. 6-mi assiliartaq]
Utoqqaanertat attaveqaqatigiilluarnerat ilagiinni nuannaarnermik eqqissinermillu siuarsaasarpoq