Biibilimik paasinninneq nuannaarutaalersinnaasoq

BIIBILIMIIPPUT sallusuissutit naleqangaartut Guutiminngaaneersut. Inuunerup siunertaa, silarsuarmi naalliuutit pissutaat inuiaallu siunissaat Biibilimi oqaluttuarineqarput. Tassani ilinniarpavut qanoq pillualersinnaanersugut, qanoq ikinngutitaarsinnaanersugut ajornartorsiutivullu iluatsittumik qanoq iliuuseqarfigisinnaanerivut. Sulilu pingaarnerusumik Pinngortitsiserput Ataatarpullu qilammiusoq, Jehova, pillugu Biibilimi paasisaqarpugut. Taamatut ilisimasaqalerutta nuannaalissutigisinnaavarput inuunerpullu siunertaqalersinnaalluni.

Guutimik ilisimasaqalerneq Biibilimi nerinermut assersuunneqarpoq. Jiisusi ima oqarpoq: „Inuup timiusaannaq inuussutissarinngilaa, oqaaserli sunaluunniit Guutip qarnanit anisoq.“ (Matthæusi 4:4; Hebræerit 5:12-14) Soorlu inuuinnarniarluni ullut tamaasa peqqinnartunik nerineq pisariaqartoq, taamatuttaaq aatsaat Guutip oqaasia aalajangersimasumik atuartarutsigu Guutip inuunermik naassaanngitsumik neriorsuutaa iluaqutigissavarput.

Nerineq nuannaarutigisarparput nerinermik nuannaarutiginnittussatut pinngortitaagatta aamma tunngaviusumik pisariaqartitarput matussusertarmagu. Pilluarusukkuttali tunngaviusumik pisariaqartitaq alla matussusertariaqarparput. Jiisusi ima oqarpoq: „Pilluarput anersaakkut pisariaqartitaqarnerminnik miserratiginninngitsut qilammiup naalagaaffia pigigamikku.“ (Matthæusi 5:3, NV) Piviusumik pillualissagutta pisariaqartitaq taanna matussusertariaqarparput, taamaaliorsinnaavugullu Guutip oqaasianik paasinninnikkut.

Ilumoorpoq isumaqartoqarmat Biibili paasiuminaatsuusoq. Assersuutigalugu Biibilip ilaa ileqqunik nalusatsinnik oqariartaatsinilluunniit assersuutaasunik eqqartuiffiusoq paasissagutsigu immaqa ikiorneqartariaqarpugut. Aammattaaq Biibilimiipput siulittuutit oqaatsit assersuutaasut  atorlugit allataasut, aatsaallu paasineqarsinnaallutik Biibilimi allassimasunut allanut pineqartumik tamatuminngarpiaq eqqartuiffiusumut sanilliukkaanni. (Danieli 7:1-7; Saqqummersitat 13:1, 2) Taamaattoq Biibili paasineqarsinnaavoq. Tamanna qanoq qularinngissinnaavarput?

Inuit tamarmik nuannaarutilersinnaasaat

Biibilimiippoq Guutip oqaasia, taannalu aqqutigalugu piumasani pillugu uagutsinnut paasissutissiisarpoq. Jehovap atuakkamik paasineqarsinnaanngitsumik inuilluunniit ilinniagartuut kisimik paasisinnaasaannik tunissanerpaatigut? Naamik, taamaaliornavianngilaq. Jiisusi Kristusi ima oqarpoq: „Kia arlassi ataataasup ernermi aalisakkamik qinnuigippani pulateriaarsummik tunissanerpaa, mannimmilluunniit qinnuigippani skorpionimik tunissanerpaa? Ilissimi ajortuususi qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.“ (Lukasi 11:11-13) Taamaattumik qularissanngilarput Biibilimik paasinnissinnaalluta, ilumoorlutalu Guuti qinnuigigutsinni pisariaqartumik ikiussagaatigut. Allaat Biibilimi ajoqersuutit tunngaviusut meeqqanit paasineqarsinnaapput. — 2 Timotheusi 3:15.

Biibilimik paasinnissagaanni iliuuseqartariaqarpoq, paasinninnerli uagutsinnut qiimmassaataangaarsinnaavoq. Jiisusi toqusunit makinermi kingorna ajoqersukkaminut marlunnut takutippoq, siulittuutillu Biibilimeersut ilaannik oqaluttuullugit. Lukasi ima oqaluttuarpoq: „Mosesi pruffiitillu tamaasa aallarniutigeriarlugit Allakkani tamani imminik pilluni allassimasunik nassuiaaffigai.“ Qanoq kinguneqarpa? Ajoqersukkat taakkua marluk ilikkakkaminnik unnuk taanna eqqarsaatiginnereerlutik imminnut ima oqarfigipput: „Uummativut kissalersimannginnerpat aqqutitsinni oqaluffigimmatigut Allakkanillu nassuiaalluta?“ (Lukasi 24:13-32) Allakkanik paasinninnerminnik taama nuannaarutiginnitsigipput Guutip neriorsuutaanik upperinninnertik nakussatsinneqarmat siunissarlu isumalluarfigileramikku.

Guutip oqaasianik ilinniarneq artornanngilluinnarpoq. Akerlianilli soqutiginarpoq iluaqutaallunilu — nerisassanik mamartunik nerinermit nuannaarutaanerungaartoq. Taamatut ilikkagaqarniarluni qanoq iliortoqartariaqarpa? Allaaserisami tulliuttumi ersersinneqarpoq qanoq ’Guutimik ilisimasaqalerneq’ nuannaarutigineqarsinnaasoq. — Ussatit 2:1-5.

[Qupp. 4-mi assiliartaq]

Biibilimik paasinnissinnaaqqulluta Jehovap Ataatatut asannittutut anersaani illernartoq uagutsinnut tunniuttarpaa