Biibilimik paasinnissagaanni suna pisariaqarpa?

’ILISIMASUNUT sianisuunullu tamanna isertorpat saqqummersilluguli meerannguanut.’ (Lukasi 10:21) Jiisusip Ataataminut qilammiusumut taama oqarluni ersersippaa Biibilimik paasinnissinnaassagaanni eqqortumik isiginnittaaseqartoqartariaqartoq. Jehovap ilisimassusianut ersiutaavoq atuakkamik maniguuttut ilikkagaqarusuttullu kisimik eqqortumik paasisinnaasaannik inunnut tunissuteqarsimanera.

Amerlanersatta maniguunnissaq sapernartittarpaat. Tamatta pingaarniaqqajaasuuneq inunnguuseraarput. Aammattaaq „ullussani kingullerni“ inuit „namminissarsiortut, . . . puffajasut [namminiinnaq isummaminnik atuiumasut, NV], makitaniartut“ akornanni inuuvugut. (2 Timotheusi 3:1-4) Taamatut pissuseqarneq Guutip oqaasianik paasinninnissatsinnut akornutigisinnaavarput. Ajoraluartumilli tamatta avatangiisitsinnit sunnerneqartarpugut. Biibilimik paasinninnissamut isiginnittaaseq pisariaqartoq qanoq isiginnittaaserilersinnaavarput?

Uummatikkut isumakkullu aalajangiussisimaneq

Ezrap, itsaq Guutip innuttaasa siuttuisa ilaata, „aalajangiussimavaa [Jehovap] inatsisai paasiniarluarniarlugit“. (Ezra 7:10) Taamatut kissaateqarneq qanoq ineriartortissinnaavarput? Biibili eqqortumik isiginnittaaseqarfigileqqaartariaqarparput. Apustili Paulusi kristumioqatiminut ima allappoq: „Guutip oqaasia uatsinnit tusagarsi ilassigassiuk inuit oqaasiattut ilassinngilarsi, kisianni pissusiviatut, tassa Guutip oqaasiatut.“ (1 Thessalonikamiut 2:13) Jehovap Biibili inunnit allatsippaa, taakkuali allagaat taassuminngaaneersuupput. Pingaaruteqartoq tamanna akuerigutsigu, atuakkatsinnit killitsiasuunerussaagut. — 2 Timotheusi 3:16.

Aamma uummatikkut eqqortumik kissaateqarnermik ineriartortitsisinnaavugut qinunikkut. Biibili Guutip anersaavanit illernartumit isumassarsiarititaalluni allagaammat, tusarliussaanik paasinninnissatsinnik aamma anersaap illernartup ikiorsinnaavaatigut. Taamatut ikiorneqarnissaq qinnutigisariaqarparput. Malugiuk tussiaasiortup tamanna qanoq pingaartitsigigaa, ima allappoq: „Paasisimasaqassusermik tuninnga maleruaqqullugit inatsisitit, naalallugillu uummatikkut iluunngarlunga.“ (Tussiaat 119:34) Tassa isumakkut Biibilip paasinissaa kisiat qinnutiginagu, aammattaarli qinnutigissavarput uummatikkut eqqortumik isiginnittaaseqalernissarput Biibilimi allassimasut ilassisinnaaqqullugit. Biibili paasissagutsigu eqqortuusunit killitsiasuusariaqarpugut.

Eqqortumik isiginnittaaseqarniarsariitigaluta Biibilimik atuaqqissaarneq qanoq iluaqutigisinnaanerlutigu eqqarsaatigisarutsigu pitsaassaaq. Guutip oqaasiani siunnersortissarsiortarnissamut ajunngitsunik pissutissarpassuaqarpoq,  pingaarnerpaavorli Guutimut qanillinissatsinnut iluaqutigissagatsigu. (Jaaku 4:8) Pissutsini assigiinngitsuni Jehova qanoq periaaseqartarnersoq, asasini qanoq pingaartitsiginerai, imminillu tunussisut qanoq isiginerai atuaraangatsigik, kinaassusilittut ilisarisimalertarparput. Biibilimik atuartarnitsinnut pingaarnertut pissutaasariaqarpoq Guutimik ilisarisimannilernerunikkut taassumunnga attaveqarnitsinnik nakussatsitsinnissaq.

Eqqortumik isiginnittaaseqarnissamut suna akornutigisinnaavarput?

Guutip oqaasianik paasinninnissatsinnut suna akornutigisinnaavarput? Kukkusumik ilumoorfiginnittussatut misigineq akornutaasut ilagisinnaavaat. Immaqa inuit ilaasa upperisaat isumaallu pingaartippavut. Kisiannimi inuit taakkua sallusuissut Guutip oqaasianeersoq akuerinngippassuk pingaartinngippassulluunniit? Taamaappat sorpiaat Biibilimi ajoqersuutigineqartut paasiuminaatsissavavut. Taamaattumik Biibilimi kajumissaarneqarpugut ilinniakkavut eqqortuunersut qulakkeerniaqqissaartassagivut. — 1 Thessalonikamiut 5:21.

Jiisusip arnaa, Maria, assingusumik nalaataqarpoq. Juutit ileqqutoqaannik ataqqinningaartussatut perorsarneqarpoq. Mosesip inatsisai maleruaqqissaartarpai qularnanngitsumillu synagogimiittarluni. Kingusinnerusukkut paasivaa pallorfiginninneq angajoqqaami ilinniartitsissutigisaat Guutimit iluarisaajunnaarsimasoq. Taamaattumik Mariap Jiisusip ajoqersuutaa ilassivaa ilagiinnullu kristumiunut ilaasut siulliit ilagilerlugit. (Apustilit Suliaat 1:13, 14) Taamaaliorneq angajoqqaanut taakkualuunniit ileqqutoqaannut ataqqinninngitsuliornermut ersiutaanani Mariap Guutimut asanninneranut ersiutaavoq. Tusarliussaq Biibilimeersoq iluaqutigissagutsigu, Mariatulli Guutimut ilumoorfiginninnerput allanut ilumoorfiginninnitsinnit pingaarnerutittariaqarparput.

Ajoraluartumik sallusuissut Biibilimeersoq inuppassuarnit pingaartinneqarpianngilaq. Ilaasa upperisarsiornikkut ileqqutoqqat sallumik tunngavillit malinnissaat naammagaat. Allat inooriaatsimikkut oqaatsitigullu sallusuissut mitaatigaat. Taamaattumik tusarliussamik Biibilimeersumik ilassinninneq akeqarpoq: Ikinngutinut, sanilinut, suleqatinut, aap allaat ilaquttanut attaveqarnermi ajornartorsiortitsilersinnaavoq. (Johannesi 17:14) Soorluli kunngi silatooq Salomo ima allattoq: „Pisiariniaruk sallusuissuseq, akigeqinagulu.“ (Ussatit 23:23) Sallusuissuseq pingaartikkutsigu, Biibilimik paasinninnissamut Jehovap ikiussavaatigut.

Tusarliussamik Biibilimeersumik paasinninnissamut akornutigisinnaasarput alla tassaavoq tassani allassimasunik malinnikkusunnginneq. Jiisusi ajoqersukkaminut ima oqarpoq: „Ilissi tunineqarpusi Qilaap Naalagaaffiata anngigisai ilisimasinnaassallugit, taakkuli taama pineqanngillat. Inuiaammi taakkua uummataat orsumik qallersimapput, siutaat tusassarlersimapput.“ (Matthæusi 13:11, 15) Jiisusip oqaluussiffigisaasa amerlanersaasa taassuma tusarliussaa ilassinngilaat allannguerusussuseqarnatillu. Niuertumit Jiisusip assersuusiamini eqqaasaanit allaanerulluinnassusiat! Niuertup taassuma sapangaq akisoorujussuaq nassaarigamiuk, pisiarisinnaajumallugu pigisani tamaasa tuniniapallappai. Sallusuissummik Biibilimeersumik paasinninnissaq uagutsinnut taamatulli naleqartigisariaqarpoq. — Matthæusi 13:45, 46.

Ilinniarusussuseqarneq — unamminiarnartoq

Biibilimik paasinninnissaq eqqarsaatigalugu ilinniarusussuseqarnissaq unamminiarnarnerpaajusinnaavoq. Ilaasa imminnit nikanarnerusorisaminnit ilinniartinneqarnissaq akueriuminaatsittarpaat. Taamaattoq Jiisusi Kristusip apustilii ’inuinnaapput immikkut ilinniagaqarsimanngitsut’. (Apustilit Suliaat 4:13) Sooq taamaannersoq Paulusip ima nassuiarpaa: „Eqqarsaatigeriarsiuk, qatanngutit, qaaqqusaagassi qanoq ittusi: Amerlanngilasi uinimmut atasunik ilisimasuususi, amerlanngilasi pissaaneqartusi, amerlanngilasi akimasuususi. Silarsuarmili sianiissuseq Guutip qinerpaa ilisimasut kanngusutsinniarlugit.“ (1 Korinthimiut 1:26, 27) Ilinnit pingaannginnerusorisannit ilinniartinneqarlutit maniguuttuunissat ajornakusoortikkukku eqqaamajuk taanna ilinnik ilinniartitsisutut Guutip atoraa. Jehovamik ’ajoqersortitsinnik’ ilinniartinneqarnermit immikkut pisinnaatitaaffimmik annerusoqanngilaq, ilaa? — Esaja 30:20; 54:13.

Na’amanip Aramæerit sakkutuuisa naalagaata imminit pingaannginnerusumik siunnersorneqarnissani  assut akueriuminaatsippaa. Pupeerunnissani neriuutigalugu Jehovap pruffiitianut Elisamukarpoq. Guutilli ajorunnaassutissatut Na’amanimut inassutigisaa, kiffaq aqqutigalugu ingerlateqqinneqarpoq. Ilitsersuutit ingerlateqqinnerinullu periaaserineqartoq, Na’amanip maniguunnikkut misilinneqatigaa, Guutillu pruffiitiata oqarneratut iliorumanngeqqaaraluarpoq. Kingusinnerulaartukkut Na’amanip isummani allanngortippaa ajorunnaarsitaallunilu. (2 Kunngit 5:9-14) Biibilimik atuartilluta assingusumik unamminiagassaqalersinnaavugut. Immaqa ilinniarparput anersaakkut ileqqussatigullu ’ajorunnaarsitaassagutta’ inooriaaserput allanngortittariaqarlutigu. Qanoq iliortariaqarnitsinnik allanit ilinniartinneqarnissatsinnut maniguussuseqarpugut? Ilinniarusussuseqartut kisimik Biibilimik paasinninneq nuannaarutigisinnaavaat.

Biibilimi oqaluttuarineqarpoq Etiopiamiut dronningianni Kandakemi atorfilik pissaaneqangaartoq ajunngitsumik isiginnittaasilik. Qamutiminik Afrikamut utertillugu, ajoqersukkap Filipip arpalluni anguaa saaffigalugulu. Filipip angut aperaa atuakkani paasinerai. Atorfilittap maniguulluni ima akivaa: „Qanoq ilillunga paasisinnaassavakka ilitsersorneqanngikkuma?“ Angut taanna Guutip oqaasianik paasisaqarnerulerami kuisippoq. Taava ’ingerlaqqippoq nuannaarluni’. — Apustilit Suliaat 8:27-39.

Jehovap Nalunaajaasui inuupput allatulli ittut. Sapaatip-akunneri tamaasa inuit 6 millioninit amerlanerusut Biibilimik atuaqqissaaqatigisarpaat. Biibilimi inooriaaseq pitsaanerpaaq innersuussutigineqarmat, inuiannut neriuut qularnaatsutuaq tassaniimmat inuillu Guutimik ilisarisimannilernissaminnut taanna iluaqutigisinnaammassuk inuit millionilikkuutaat paasisimavaat Biibilimik atuaqqissaarneq tusarliussaanillu paasinninneq nuannaarutaangaartoq. Tamanna aamma illit nuannaarutigilersinnaavat. (wE 4/1 06)

[Qupp. 7-mi assiliartaq]

Na’amanip kiffamik nikanartumik ilitsersorneqarnini akueriuminaatsippaa

[Qupp. 7-mi assiliartaq]

Biibilimik paasinninneq nuannaarutaangaarpoq