„Inatsisitit nuannareqaakka“

„Inatsisitit nuannareqaakka, eqqarsaatinniipput ulloq tamaat.“ — TUSSIAAT 119:97.

1, 2. (a) Tussiaat 119-imik allannissamut isumassarsititaasup pissutsit atugai qanoq ippat? (b) Atukkaminut qanoq periarpa, aamma sooq?

ANGUT Tussiaat 119-imik allattoq sualuttumik misilinneqarpoq. Imminut akeraasunit anneruniartunit Guutip inatsisaanik soqutiginninngitsunit mitallerneqarlunilu salluliuutigineqarpoq. Naalagartat ajortumik pilersaaruteqarfigaat malersorlugulu. Guutiitsut unguaat toqunniarlugulu sioorasaarlugu. Tamakkua tamaasa ’aliasunnermit sinissaarussutigai’, (NV). (Tussiaat 119:9, 23, 28, 51, 61, 69, 85, 87, 161) Taamaakkaluartoq tussiaasiortoq ima allappoq: „Inatsisitit nuannareqaakka, eqqarsaatinniipput ulloq tamaat.“ — Tussiaat 119:97.

² Imminut ima aperisoqarsinnaavoq: „Guutip inatsisai tussiaasiortumut qanoq tuppallersaataallutillu nakussatsissutaasinnaagamik?“ Qularinngilaa Jehovamit isumassorneqarluni, tamannalu nappatigaa. Akerlilersortiminit annikilliortitaagaluarluni inatsisinik Guutip asannilluni tunniussaanik malinninnerup iluaqutissartai ilisimagamigit pilluarpoq. Jehovap imminut ajunngitsuliorsimanera paasilluarpaa. Aamma tussiaasiortup Guutip inatsisaani siunnersuutigineqartut malikkamigit imminut akeraasunit ilisimasaqarnerulerpoq, tamannalu allaat inuuginnassutigaa. Inatsisinut naalannini pissutigalugu qamuuna eqqissisimallunilu ilerasuuteqanngilaq. — Tussiaat 119:1, 9, 65, 93, 98, 165.

3. Sooq Guutip najoqqutassiai malillugit inuunissaq ullumikkut kristumiunut unamminiarnartuua?

³ Ullumikkuttaaq Guutip kiffaasa ilaat uppernermikkut sualuttumik misilinneqartarput. Immaqa tussiaasiortutut toqunneqarnissamik sioorasaarneqartanngikkaluarpugut, ’ullunili kingullerni atugarliungaarfiusuni’ inuuvugut. Inuit ulluinnarni peqatigisartakkatta ilarpassui anersaakkut nalilinnik asanninngivipput — pigisanut imminnuinnarlu tunngasunik anguniagaqarput, makitasuujullutillu ataqqinninngitsuupput. (2 Timotheusi 3:1-5) Inuusuttut kristumiut ileqqussatigut assuarnaassusiat misilinneqartuarpoq. Taamaattunik avatangiiseqarluni Jehovamik eqqortunillu asannittuarnissaq sapernarsinnaavoq. Qanoq ililluta imminut illersorsinnaavugut?

4. Tussiaasiortup Guutip inatsisaanik pingaartitsinini qanoq takutippaa, aamma sooq kristumiut taamatut iliortariaqarpat?

⁴ Tussiaasiortup tatisinerup naammagalugu atornissaanut iluaqutigisaa tassaavoq pingaartitsilluni Guutip inatsisaanik eqqarsaatiginneqqissaarnissaminut piffissaqartarnera. Taamaalilluni Inatsisit nuannarilerpai. Versini Tussiaat 119-imiittuni tamangajavinni Jehovap inatsisaasa ilisarnaataat eqqaaneqarput. * Kristumiut ullumikkut Mosesip inatsisaanik Guutip itsaq Israelikkunnut tunniussaanik maleruaasussaatitaanngillat. (Kolossemiut 2:14) Najoqqutassialli Inatsisiniittut suli naleqangaarput. Najoqqutassiat taakkua tussiaasiortumut tuppallersaataapput, aammattaaq Guutimut kiffaasut inuunermi ajornartorsiutit qaangerniarlugit ilungersortut tuppallersaatigisinnaallugillu nakussatsissutigisinnaavaat.

5. Mosesip inatsisaasa ilaannut tunngasut suut maanna misissussaavavut?

⁵ Mosesip inatsisaasa ilaannut tunngasut pingasuinnaat — tassa sabbatimik aaqqissuussaq, naatitanik  katersuineq pillugu aaqqissuussaq pilerissuseqannginnissamillu inassut — qanoq kajumissaatigisinnaanerlugit misissoriartigu. Taakkua tamaasa immikkut misissorneranni paasissavarput unamminiarnartut ullutsinnut ilisarnaataasut naammagalugit atorsinnaassagutsigit, najoqqutassiat inatsisinut taakkununnga tunngaviusut paasinissaat pingaaruteqartupilussuusoq.

Anersaakkut pisariaqartitavut matussusertariaqarpavut

6. Inuit tamarmik sunik tunngaviusunik pisariaqartitaqarpat?

⁶ Inuk pisariaqartitaqartutut pinngortitaavoq. Assersuutigalugu timikkut peqqissuussagaanni nerisassaqarnissaq, imigassaqarnissaq inissaqarnissarlu pingaaruteqartupilussuupput. Aammali inuup ’anersaakkut pisariaqartitani’ matussusertariaqarpai. Taamaaliunngikkuni piviusumik pilluarnavianngilaq. (Matthæusi 5:3, NV) Jehovap anersaakkut pisariaqartitat matussuserneqartarnissaat pingaartingaaramiuk, Israelikkut peqquai sapaatip-akunneranut ulloq ataaseq ulluinnarni sammisartakkatik sammisassanngikkaat anersaakkut ittunik sammisaqarniassammata.

7, 8. (a) Sabbati ullullu allat Guutip qanoq assigiinngissuteqartippai? (b) Sabbati sooq pilersinneqarpa?

⁷ Sabbatimik aaqqissuussaq aqqutigalugu erseqqissarneqarpoq Guutimut attaveqarneq nakussatsinniarlugu piffissamik atuisarnissap qanoq pingaaruteqartiginera. Oqaaseq „sabbati“ Biibilimi atorneqaqqaarpoq inoqajuitsumi mannamik pilersuinermut tunngatillugu. Israelikkut paasitinneqarput sapaatip-akunnerata ulluini arfinilinni inuussutissamik tupinnartuliamik tamatuminnga katersuisassasut. Ullut arfernanni „ullunut marlunnut naammattunik“ katersuisassapput, ullut arfineq-aappaanni katersugassaqarnavianngimmat. Ullut arfineq-aappaat ’sabbatiussaaq illernartoq [Jehovamut] pigititaasoq’, ullormilu tassani kikkut tamarmik inigisaminni uninngaannassapput. (2 Mosesi 16:13-30) Inatsisit Qulit ilaanni peqqussutigineqarpoq sabbatimi suliaqartoqanngilluinnassasoq. Ulloq taanna illernartuuvoq. Peqqussummik tamatuminnga malinninnginnermut pillaat tassaavoq toqu. — 2 Mosesi 20:8-11; 4 Mosesi 15:32-36.

⁸ Jehovap innuttami timikkut anersaakkullu peqqissusiannik isumassuinera sabbati pillugu inatsimmi erserpoq. Jiisusi ima oqarpoq: „Sabbati pilersitaavoq inuk pillugu.“ (Markusi 2:27) Israelikkut qasuersaarnissamut periarfissaqaliinnanngillat, aammali Pinngortitsisumut qanillinissamut taassumunngalu asanninnerminnik ersersitsinissamut periarfissaqalerput. (5 Mosesi 5:12) Ulluuvoq anersaakkut ittuinnarnik sammisaqarfiusussaq. Sammisassat taakkua ilagaat ilaqutariittut guutisiorneq, qinuneq Guutillu inatsisaanik eqqarsaatiginneqqissaarneq. Sabbatimik aaqqissuussaq Israelikkut piffissartik tamaat nukitillu tamaasa pigisanik noqqaassutiginninnermut atunnginnissaannut illersuutigaat. Aamma sabbati taakkununnga eqqaasitsissutaavoq Jehovamut attaveqarnerata inuunerminni pingaarnerpaajuneranik. Najoqqutassiaq atortuujuartoq taanna Jiisusip ima oqarluni uteqqippaa: „Allassimavoq: ’Timiusaannaq inuup inuussutiginngilaa, oqaaserli sunaluunniit Guutip qarnanit anisoq inuussutigisaraa.’“ — Matthæusi 4:4.

9. Sabbatimik aaqqissuussaq kristumiut qanoq ilinniarfigisinnaavaat?

 ⁹ Guutimut kiffaasut akunnerit 24-t sabbatimi qasuersaarnissaq pisussaaffigiunnaareeraluaraat sabbatimik aaqqissuussaq oqaluttuarisaanikkut soqutiginaateqaannanngilaq. (Kolossemiut 2:16) Tamanna sammisassanik anersaakkut ittunik pingaartitsisariaqarnitsinnik eqqaasitsissutaannginnerpa? Pigisalerituneq aliikkusersornerlu sammisassanit pallorfiginninnitsinnut tunngasunit pingaarnerutinneqartussaanngillat. (Hebræerit 4:9, 10) Imminut ima aperigit: „Inuuninni suna pingaarnerpaatippara? Atuaqqissaarneq, qinuneq, kristumiut ataatsimiinnerinut peqataaneq Guutillu naalagaaffia pillugu nutaarsiassamik nuannersumik oqaluussissutiginninneq allanit tamanit pingaarnerutippakka? Imaluunniit sammisassat tamakkua samminissaanninngarnit soqutigisat allat pingaartinneqarnerusarpat?“ Jehovap neriorsoqqissaarpaatigut anersaakkut ittut salliutikkutsigik inuunermi pisariaqartunik amigaateqanngisaannassasugut. — Matthæusi 6:24-33.

10. Anersaakkut sammisassanut piffissaqarneq qanoq iluaqutigisinnaavarput?

¹⁰ Piffissaq Biibilimik atuakkanillu atuagassianillu Biibililersaarutinik atuaqqissaarnermut atuakkatsinnillu eqqarsaatiginneqqissaarnermut atortagarput Jehovamut qanillinerunissamut iluaqutigisinnaavarput. (Jaaku 4:8) Susanip, ukiut 40-t missiliorlugit matuma siorna aalajangersimasumik Biibilimik atuaqqissaartarnissaminut piffissamik immikkoortitsisimasup, nassuerutigaa aallaqqaammut nuannerpianngitsoq. Pisussaaffittut artornartutut isigaa. Atuarnerujartortillunili nuannarileraluttuinnarpaa. Maanna arlaannik peqquteqarluni atuaqqissaanngitsooraangami nuanniilliortarpoq. Taanna ima oqarpoq: „Atuaqqissaartarnera Jehovap Ataatatut ilisarisimalernissaanut iluaqutigaara. Tunaarisinnaallugulu tatigisinnaavara qinunikkullu saaffigeriaannaallugu. Jehovap kiffani qanoq asatigigai, uannik qanoq isumassuinera aamma uannik qanoq ikiuisimanera tapersersuisimaneralu takullugu nuanneqaaq.“ Aap, anersaakkut pisariaqartitavut aalajangersimasumik matussusertarutsigit uagutsinnut nuannaarutaangaarsinnaavoq!

Katersuinissamik Guutip inatsisaa

11. Katersuineq pillugu aaqqissuussaq qanoq ingerlasarsimava?

¹¹ Mosesip inatsisaasa ilaannut tunngasoq alla, Guutip innuttami atugarissaarnissaannik isumaginninneranik ersersitsisoq, tassaavoq katersuisinnaatitaaneq. Jehovap peqqussutigisimavaa naasorissaasoq Israelikkuusoq naatitaminik katersuigaangat sulisuisa qimaannagaannik piitsoq katersuinissaminut akuerineqartassasoq. Naasorissaasut narsaatimik killingat tikivillugu killuisussaanatillu viinnequtinik oliveninillu sinneruttunik katersuisussaanngillat. Aamma karrinik qilertanik narsaammut qimaannarneqarsimasunik katersueqquneqanngillat. Tamanna asannittumik aaqqissuussaavoq piitsunut, takornartanut, iliarsunnut uillarnernullu iluaqutaasoq. Katersuineq suliaavoq ilungersunartoq, katersuigaannili qinnuuloornissaq pisariaarutissaaq. — 3 Mosesi 19:9, 10; 5 Mosesi 24:19-22; Tussiaat 37:25.

12. Katersuineq pillugu aaqqissuussaq aqqutigalugu naasorissaasut sumik periarfissaqalerpat?

¹² Katersuineq pillugu inatsimmi naasorissaasut naatitamik ilaannik qanoq annertutigisumik piitsunut uninngatitsiinnartassanerannik peqqussuteqanngilaq. Namminneq aalajangertussaavaat narsaatimik sinaat katersuiffigineqanngitsoq qanoq atitutigissanersoq. Taamaalilluni katersuineq pillugu aaqqissuussaq aqqutigalugu inuit tukkornermik ilinniartinneqarput. Aamma naasorissaasut Katersugassaqartitsisumut qujamasunnerminnik ersersitsinissaminnut periarfissaqalerput, ’piitsumimmi nallittuisup pinngortitsisaa ataqqivaa’. (Ussatit 14:31) Boazi taamaaliorsimavoq. Taassuma Ruthip, uillarnerusup narsaatiminilu katersuisartup, karrinik katersugassaqarluarnissaa qulakkeerpaa. Jehovap Boazi tukkortuunera pillugu akissarsisingaarpaa. — Ruthi 2:15, 16; 4:21, 22; Ussatit 19:17.

13. Katersuineq pillugu inatsisitoqaq qanoq ilinniarfigaarput?

¹³ Najoqqutassiaq katersuineq pillugu inatsimmut tunngaviusoq allanngornikuunngilaq. Jehovap kiffami tukkortuunissaat piumasaraa, pingaartumik immikkut pisariaqartitsisunut. Tukkornerujartuinnartilluta pilluaqquneqarnerujartuinnassaagut. Jiisusi ima oqarpoq: „Tunisigitsi, taava ilississaaq tunineqassaasi. Uuttukkap imai  ajunngitsut naqittaassat aalaterussat qammisimasullu ilissinnut tunniunneqarumaarput. Uuttuutigisassinnimmi uuttuiffigineqarumaarpusi.“ — Lukasi 6:38.

14, 15. Qanoq tukkortuusinnaavugut, tamannalu uagutsinnut ikiukkatsinnullu qanoq pilluaqqussutaasinnaava?

¹⁴ Apustili Paulusip kajumissaarpaatigut ’tamanut ajunngitsulioqqulluta, pingaartumik uppeqatitsinnut’. (Galatiamiut 6:10) Taamaattumik uppeqatitta kristumiut uppernermikkut misilinneqarneranni anersaakkut ikiorneqarnissaat eqqumaffigisupilussuusariaqarparput. Kisianni aamma allatigut ikiorneqartariaqarpat, soorlu naalagaaffilersaarfimmut pisiniarfinnulluunniit ingerlanneqarlutik? Illit ilagiinni utoqqaqarpa, napparsimasoqarpa innarluuteqartoqarpaluunniit qiimmassaataasumik pulaarneqarnerminnik ikiorneqarnerminnilluunniit qujamasuutiginnissinnaasunik? Tamakkuninnga pisariaqartitsisut eqqumaffiginiartarutsigik, immaqa Jehovap ikiortariallip qinnutaanut akissutitut atussavaatigut. Allanik isumassuineq kristumiutut pisussaaffiuvoq, isumassuisulli aamma nammineq tamanna iluaqutigissavaa. Uppeqatitsinnut piviusumik asannittuliortarutta assut nuannaarlutalu nalerisimaassaagut, Jehovamillu akuerineqassaagut. — Ussatit 15:29.

¹⁵ Kristumiut namminissarsiunnginnermik ersersitseriaasiat alla pingaarutilik tassaavoq Guutip siunertaa pillugu allat oqaluttuunniarlugit piffissaminnik nukimminnillu atuinerat. (Matthæusi 28:19, 20) Tunniulluinnarnissamut ikiuisimanerminnik nuannaarutiginnissimasut tamarmik Jiisusip oqaasiisa ukua ilumuussusiat misigaat: „Tunisineq pilluarnarneruvoq tigusinermit.“ — Apustilit Suliaat 20:35.

Pilerissuseqarnaveersaartariaqarpugut

16, 17. Inatsisit qulinganni suna inerteqqutigineqarpa, aamma sooq?

¹⁶ Maanna Guutip Israelikkunnut inatsisaasa ilaannut tunngasut pingajuat, tassa inatsisit qulingat pilerissuseqarnissamut inerteqqutitalik, misissussavarput. Inatsit imaappoq: „Tullivit illua pileritsaatissanngilat. Pileritsaatissanngilatit tullivit nulia inussiaataaluunniit angut inussiaataaluunniit arnaq ussiutaaluunniit siutituujutaaluunniit suugaluartulluunniimmi tullivit pigisai.“ (2 Mosesi 20:17) Inuup kialuunniit peqqussut taamaattoq unioqqutitsaalisinnaanngilaa, kialluunniimmi allap uummammiui takusinnaanngilai. Peqqussulli tamanna pissutigalugu Inatsisit inuit inatsisaannit qaffasinnerungaalerput. Taakkua aqqutigalugit Israelikkut tamavimmik  paasitinneqarput Jehovamut, uummatip kajungerisaanik takunnissinnaasumut, toqqaannartumik akisussaallutik. (1 Samueli 16:7) Aamma peqqussummi tamatumani ajortunut, eqqunngitsuliornerpassuarnut, pissutiviusoq uparuarneqarpoq. — Jaaku 1:14.

¹⁷ Pilerissuseqannginnissamik inatsit Guutip kiffaasa pigisalerituunngunnginnissamut, piumatuunngunnginnissamut inuunerminnilu atukkaminnik naammagittaalliutiginninnginnissamut iluaqutigaat. Aamma tillinniarnissamut kinguaassiuutitigulluunniit inuunerlunnissamut ussernartorsiunnginnissamut illersuutigaat. Inoqartuaannassaaq uagut nammineq pigerususinnaasatsinnik pigisalinnik, imaluunniit arlaatigut uagutsinnit ingerlalluarpasinnerusunik. Pissutsini taamaattuni eqqarsaativut aqussinnaajunnaarutsigit nuannaarunnaarsinnaallutalu sinngalersinnaavugut. Biibili naapertorlugu pilerissuseq, imaluunniit piumatussuseq, ’Guutip iluarinngisaanik eqqarsartaaseqarnermut’ ersiutaavoq. Pilerissuseqarnaveersaarutta nalunanngilaq tamanna uatsinnut pitsaanerpaassasoq. — Romamiut 1:28-30, NV.

18. Anersaaq qanoq ittoq ullumikkut silarsuarmi malunnarnerua, ajortumillu qanoq sunniuteqarsinnaava?

¹⁸ Anersaaq ullumikkut silarsuarmi malunnarnerusoq pigisaleritunermik unamminermillu siuarsaavoq. Pilerisaarutitigut niuertut atortunut nutaanut pilerissuseqalersitsisarput isumaqalersilluta taakku pigutsigit aatsaat pillualissasugut. Anersaaq taannarpiaq Jehovap inatsisaani assuarineqarpoq. Anersaamut tamatumunnga attuumassuteqarluinnartoq tassaavoq qanorluunniit pilliuteqassagaluaraanni nuimasunngorusunneq pisuussutinillu katerserusunneq. Apustili Paulusi mianersoqqusilluni ima allappoq: „Inuit pisuunngorumasut usserneqarlutillu napitinneqartarput ueqqivigisarlugillu kajungerfigiligarpassuatik sianiitsuliornerusut ajoqutaasullu, inunnut aseruutaasut tammartitsisullu. Aningaaserituujunermi ajortunut tamanut sorlaavoq; tamatumannga pileritsatsitaallutik inuit ilaat uppernerminnit tunussisitaasarput taamalu imminnut amerlasuunik erloqissutissiorlutik.“ — 1 Timotheusi 6:9, 10.

19, 20. (a) Jehovap inatsisaanik nuannarisaqartunut naleqavissut suuppat? (b) Allaaserisami tulliuttumi suna sammineqassava?

¹⁹ Guutip inatsisaanik nuannarisaqartut pigisaleritunerup navianaatai nalunngilaat tamatumunngalu illersorneqarlutik. Assersuutigalugu tussiaasiortoq Jehovamut qinuvoq ima oqarluni: „Uummatiga saatsiguk oqaaqqissaarutinnut, iluanaarutissanut pinnagu! Inatsisit tunniussimasatit iluaqutigineruakka kuultinit sølvinillu tuusintinit.“ (Tussiaat 119:36, 72) Oqaatsit taakkua ilumuussusiannik qularutiginninnginneq, napiaaniutit soorlu pigisalerituneq, piumatussuseq inuunermilu atukkanik naammagittaalliutiginninneq nigorsimasinnaajumallugit oqimaaqatigiissaariuarsinnaanissamut pisariaqartumut iluaqutigissavarput. ’Guutimut tunniusimaneq’, pisuussutinik katersuinerunngitsoq, iluanaarnarnerpaavoq. — 1 Timotheusi 6:6, NV.

²⁰ Soorluttaaq taamani najoqqutassiat inatsisinut Jehovap itsaq Israelikkunnut tunniussaanut tunngaviusut Jehovap inatsisit Mosesimut tunniummagit pingaaruteqartut, taamatulli piffissami inuuffigisatsinni ajornartorsiorfiusumi pingaaruteqartigipput. Najoqqutassiat taakkua inuunitsinni maleqqissaarnerujartortillugit paasilluarnerujartuinnarlugillu nuannarineruleraluttuinnassavavut, aamma pilluarnerulissaagut. Inatsisit pingaarutilippassuarnik ilinniarfigisinnaavavut, inuillu Biibilimi oqaluttuarineqartut inuunerat misigisimasaallu misissorlugit oqaaqqissaarutit eqqaasitsissutillu Guutip inatsisaaniittut qanoq pingaaruteqartiginersut paasisinnaavarput. Allaaserisami tulliuttumi tamanna misissussavarput.

[Quppernerup ataani ilanngussaq]

Qanoq akissavit?

• Tussiaat 119-imik allattup sooq Jehovap inatsisai nuannarai?

• Sabbatimik aaqqissuussaq kristumiut qanoq ilinniarfigisinnaavaat?

• Katersuineq pillugu Guutip inatsisaa sooq suli naleqangaarpa?

• Pilerissuseqannginnissamik peqqussut qanoq illersuutigaarput?

[Atuaqqissaarnermi apeqqutit]

[Qupp. 23-mi assiliartaq]

Sabbati pillugu inatsimmi najoqqutassiaq suna erseqqissarneqarpa?

[Qupp. 25-mi assiliartaq]

Katersuineq pillugu inatsit qanoq ilinniarfigaarput?