Jehovap ’pileqqaarnerannit qanoq pisoqarnissaa nalunaarutigaa’

„Uattut ittoqanngilaq. Pileqqaarnerannit qanoq pisoqarnissaa nalunaarutigaara, itsaanilli suli pinngitsut oqaatigaakka.“ — ESAJA 46:9, 10.

1, 2. Babylonip piuneerunneqarneranut tunngatillugu suna maluginiarnarpa, tamatumanilu Jehova pillugu suna paasivarput?

UNNUAP taarnerani akeqqap sakkutuui malugitinnaveersaarlutik toraakkamik tungaanut, illoqarferujussuarmut Babylonimut, kuussuakkut Eufratikkut ingerlaarput. Illoqarfiup isertarfia qanilligamikku tupaallannartumik takusaqarput. Babylonip qarmarsuisa isaaffissui ammatiinnarneqarsimapput! Sakkutuut kuummit majuarput, illoqarfiup tungaanukarlutik, imaaliallaannarlu illoqarfik tiguarpaat. Siulersuisuat Kyrosi erngerluni nunamut tiguakkamut naalaganngorpoq, kingusinnerusukkullu Israelikkut tigusat iperagaanissaat peqqussutigaa. Aallarussaasut tusindillit Jerusalemimut uterput Jehovamik pallorfiginninneq pilerseqqinniarlugu. — 2 Nalunaarsuutit 36:22, 23; Ezra 1:1-4.

² Ukiup 539-p ukiullu 537-p u.n.s. akornanni pisimasut tamakkua ullumikkut oqaluttuarisaanermi ilisimatoorpassuarnit ilumoornerarneqarput. Maluginiarnarpoq pisimasut tamakku ukiut 200-t missiliorlugit tamatuma siorna ilisimaneqareersimanerat. Ukiut taama amerlatigisut sioqqullugit Jehovap pruffiitini Esaja isumassarsisillugu Babylonip piuneerussaanissaanik allaaserinnitsippaa. (Esaja 44:24–45:7) Babyloni qanoq piuneerunneqarumaarnersoq Guutip paasitiinnanngilaa, aammali sakkutuut naalagaata illoqarfimmik tiguaajumaartup atia paasitippaa. * Jehova Israelikkut, taamanikkut nalunaajaasigisani, saaffigalugit ima oqarpoq: „Eqqaaniarsigit siornagut naammassisakka! Uangami Guutiuvunga, allamillu taamaattoqanngilaq, Guutiuvunga, uattut ittoqanngilaq. Pileqqaarnerannit qanoq pisoqarnissaa nalunaarutigaara, itsaanilli suli pinngitsut oqaatigaakka.“ (Esaja 46:9, 10a) Jehova ilumut Guutiuvoq pisussanik ilisimannereersinnaasoq.

3. Apeqqutit suut maanna misissussavavut?

 ³ Jehova siunissaq pillugu qanoq ilisimasaqartigaa? Tamatta immikkut iliuusissavut ilisimareerpai? Siunissarput siumut aalajangeriigaanerluni? Allaaserisami matumani tulliuttumilu apeqqutinut taakkununnga aamma apeqqutinut taakkununnga assingusunut Biibilimi akissutigineqartut misissussavavut.

Jehova — Guuti siulittuisartoq

4. Siulittuutinut Biibilimi allanneqarsimasunut kina aallaaviua?

⁴ Jehova siunissamik ilisimannereersinnaagami Biibilip nalaani kiffani isumassarsisillugit siulittuuterpassuarnik allatsippai, tamannalu pissutigalugu taassuma iliuuseriniagaanik ilisimannereernissamut periarfissaqarpugut. Jehova ima nalunaarpoq: „Siornagut oqaatigisat eqquutereerput, nutaat maanna nalunaarutigaakka, tusarliuppakka naalersutut puttutinnginneranni.“ (Esaja 42:9) Guutip innuttai immikkut pisinnaatitaaffigissaangaaramik!

5. Jehovap iliuuseriumaagaanik ilisimannereerneq sumik akisussaaffittaqarpa?

⁵ Pruffiiti Amosip ima neriorsoqqissaarpaatigut: „Guuti [Jehova] qanoq iliortarinngilaq pilersaarutini kiffaminut pruffiitinut saqqummerseqqaartinnagit.“ Pruffiitit taamatut ilisimasaqareeramik akisussaaffeqalerput. Maluginiariaruk tamatuma kingorna Amosip torrallallugu assersuusiaa: „Løveq uiannisaaraangat kinaluunniit ersilertannginnerpa?“ Soorlu løveq uiannisaaraangat inuit uumasullu ingerlaannaq iliuuseqartartut, taamatuttaaq pruffiitit soorlu Amosi Jehovap nalunaarutaanik ingerlaannaq ingerlatitseqqittarput. „Guuti [Jehova] oqalukkaangat kinami taava siulittuissannginnerpa?“ — Amosi 3:7, 8.

Jehovap oqaasiata ’naammasseqquneqartut naammassissavai’

6. Babylonip piuneerussaanissaanut tunngatillugu Jehovap ’pilersaarutaa’ qanoq naammassineqarpa?

⁶ Pruffiitini Esaja aqqutigalugu Jehova ima oqarpoq: „Pilersaarutiga aalajaappoq, piumasakka tamaasa naammassissavakka.“ (Esaja 46:10b) Guutip Babylonimut tunngatillugu ’pilersaarutaanut’, tassa piumasaanut imaluunniit siunertaanut, ilaavoq Kyrosimik Persiamit aallaqqusinera Babyloni tiguarniassammagu uppitillugulu. Tamanna sioqquterujussuarlugu Jehovap nalunaarutigaa tamanna siunertaralugu. Eqqaaneqareersutullu siulittuut ukiumi 539-mi u.n.s. eqquuteqqissaarpoq.

7. Sooq qularutigissanngilarput Jehovap ’oqaasiata’ naammasseqquneqartut naammassiuaannassagai?

⁷ Kyrosip Babylonimik tiguaanera ukiunik 400-ngajannik sioqqullugu, Judami kunngi Joshafatip Ammonikkut Moabikkullu sakkutuui kattussimasut sorsuffigisussanngorpai. Taanna tatiginnilluni ima qinuvoq: „[Jehova] siuaasatta Guutiat! Illit Guutiuvutit qilammiittoq, inuiaallu kunngeqarfii tamaasa naalagaaffigaatit. Nakuussuseq pissaanerlu illit assanniipput; kimilluunniit ilinnut ajugaasinnaasoqanngilaq.“ (2 Nalunaarsuutit 20:6) Esaja taamatulli tatiginnitsigaaq ima oqarami: „Katersaarsuimmi  [Jehovaata] pilersaarusiugaa kia atortuujunnaarsissinnaavaa? Assaa silugussimasoq kia uteriartissagamiuk?“ (Esaja 14:27) Babylonimi kunngi Nebukadnesari piffissami aalajangersimasumi silanngajaareerluni aaqqikkami maniguulluni ima nassuerpoq: „Kialuunniit akornusersorsinnaanngilaa, imalu oqarsinnaasoqanngilaq: ’Susutinuna?’“ (Danieli 4:32) Jehovap nammineq innuttani ima uppernarsaavigai: „Oqaasera . . . susaarluni uannut utissanngilaq, kisianni suliareqqusakka suliarissavai naammasseqqusakkalu naammassissallugit.“ (Esaja 55:11) Qularutiginngilluinnarparput Jehovap oqaasiisa eqquuttuaannarnerat. Jehovap siunertaa naammassineqartuaannassaaq.

Guutip „siunertarisaa naassaanngitsoq“

8. Guutip „siunertarisaa naassaanngitsoq“ suugami?

⁸ Paulusi kristumiunut Efesosimiittunut allappoq Guuti ’naassaanngitsumik siunertaqartoq’. (Efesosimiut 3:11, NV) Matumani pineqaannanngilaq suliassamut pilersaarusiaq, soorlulusooq Guuti arlaannik naammassisaqarniarluni pilersaarusiortariaqartoq. Tamannaliuna Jehovap inuiannut nunarsuarmullu aallaqqaammulli siunertaminik naammassinninniarluni aalajangerneranut tunngassuteqartoq. (1 Mosesi 1:28) Jehovap siunertaata naammassineqarnissaa qanoq qularnaatsiginersoq paasinerujumallugu, siulittuut Biibilimi allanneqarsimasoq siulleq misissussavarput.

9. Mosesimik allakkat siulliit 3:15 Guutip siunertaanut qanoq attuumassuteqarpa?

⁹ Soorlu Mosesimik allakkat siulliit 3:15-imi ersersinneqartoq, Adami Evalu ajortulioriiginnartut Jehova aalajangerpoq arnaq assersuutaasoq pigisani kinguaassamik pilersitsissasoq, imaluunniit ernertaassasoq. Aamma Jehovap ilisimareerpaa arnap pigisami aamma Saatanip, taakkualu tamarmik immikkut kinguaassaasa, akerariinnerat qanoq kinguneqassanersoq. Arnap Guutip pigisaata kinguaassaata kimmia aserorterneqartussaagaluartoq, kinguaassap taassuma piffissaq Guutip aalajangigaa nalliuppat pulateriaarsuup, Saatani Diaavulup, niaqua aserortissavaa. Tamatuma nalaani Jehovap siunertaa kinguaariit toqqakkat atorlugit pinngitsoorani naammassineqariartuaassaaq, Jiisusip Missiarsitut neriorsuutigisatut saqqummernissaata tungaanut. — Lukasi 3:15, 23-38; Galatiamiut 4:4.

Jehovap siumut aalajangeriigai

10. Jehovap Adami Evalu ajortuliussasut aallaqqaataaniilli siumut aalajangereersimavaa? Akissutit tunngavilersoruk.

¹⁰ Jiisusip Guutip siunertaani inissisimaffia pillugu apustili Petrusi ima allappoq: „Silarsuummi tunngavilerneqanngikkallarneraniilli [Jiisusi] tamatumunnga qinerneqareersimavoq, maannali ullut naggatissaanni aatsaat ilissi pissutigalusi saqqummersinneqarluni.“ (1 Petrusi 1:20) Imaappa Jehovap aallaqqaataaniilli siumut aalajangereersimagaa Adami Evalu ajortuliussasut, aamma Jiisusi Kristusip inuunerminik utertitsissutitut akiliutitut pilliuteqarnissaa pisariaqartinneqalissasoq? Naamik. Oqaaseq ’tunngaviliineq’ grækerit oqaasiannit nutsiinnavillugu ’naatsiiassamik nakkartitsineq’-mik isumaqartumit nutserneqarpoq. Adamip Evallu ajortuliornerat sioqqullugu ’naatsiiassamik nakkartitsisoqarsimava’, imaluunniit kinguaassaq nunamiusoq ilumiugineqalersimava? Naamik. Adami Evalu naalannginnermik kingorna aatsaat qitorniulerput. (1 Mosesi 4:1) Tassa Adamip Evallu pikitsitsinerata kingorna, kisianni Eva suli naartulinngitsoq, Jehovap siumut aalajangereerpaa ’kinguaassap’ saqqummernissaa. Jiisusip toquneratigut makititaaneratigullu Jehovap asannilluni utertitsissutitut akiliut pilersippaa, taannalu aqqutigalugu ajorti kingornussaasoq suujunnaassaaq Saatanillu ilungersuutigisai tamarmik maangaannartinneqassallutik. — Matthæusi 20:28; Hebræerit 2:14; 1 Johannesi 3:8.

11. Jehovap siunertaminik naammassinninnissaq eqqarsaatigalugu suna siumut aalajangereersimavaa?

¹¹ Aamma Guuti siunertaminik naammassinninnissaq eqqarsaatigalugu allamik siumut aalajangeriigaqarpoq. Tamanna Paulusip kristumiunut Efesosimiittunut oqaasiini erserpoq. Paulusi allappoq Guutip ’suut tamaasa, qilammiittut nunamiittullu, Missiarsimi ataatsimut kattutiteqqikkumaarai’. (NV) Taava ’qilammiittunut’,  tassa Kristusip kingornusseqatissaatut toqqarneqartunut, tunngatillugu Paulusi ima nassuiaavoq: „Guutip aalajangiineragut taamaattussaatitaareeratta, Guutimmi suut tamaasa naammassisarpai piumasani pissamaarutit malillugit.“ (Efesosimiut 1:10, 11) Aap, Jehovap siumut aalajangereersimavaa inuit killilimmik amerlassusillit arnap Guutip pigisaata kinguaassaata pingaannginnerusortaanut ilaassasut Kristusilu peqatigalugu utertitsissutip iluaqutissartaanik iluaqutaalersitseqataassasut. (Romamiut 8:28-30) Apustili Petrusip taakkua ’inuiaqatigiittut illernartutut’ eqqaavai. (1 Petrusi 2:9, NV) Apustili Johannesip immikkut pisinnaatitaaffigalugu takorruukkami tusarpaa Kristusip kingornusseqatissaasa amerlassusissaat, tassa 144.000-it. (Saqqummersitat 7:4-8; 14:1, 3) Taakkua kunngi Kristusi ataasioqatigalugu Guutip ’naalannassusiata unnersiutigineqaatissaanik kiffartorput’. — Efesosimiut 1:12-14, NV.

12. Qanoq ililluta nalunngilarput 144.000-it inuttut ataasiakkaatut siumut aalajangerneqareersimanngitsut?

¹² 144.000-iussasut siumut aalajangerneqareersimammat, imaanngilaq inuit ataasiakkaat ilaasa aalajaallutik taamatut Guutimut kiffartornissaat siumut aalajangerneqareersimasoq. Kristumiummi Allagaataanni Grækerisuuni oqaaqqissaarutit allanneqarput, kristumiut tanitat assuarnaattuarsinnaaqqullugit qilammullu qaaqquneqarnerminnut qinngaqqunnanngitsooqqullugit siunnersornissaat nakussatsinnissaallu pingaarnerutillugu. (Filippimiut 2:12; 2 Thessalonikamiut 1:5, 11; 2 Petrusi 1:10, 11) Jehovap ilisimareerpaa inuit 144.000-it siunertaminik naammassinninnissamut piukkunnarsiumaartut. Taakkuali kikkuussanerannik aalajangiisuusoq tassaavoq qaaqqusaasut qanoq inuuniarnerlutik inuttut namminneq aalajangernerat, tamannalu tamarmik immikkut namminneq aalajangigassaraat. — Matthæusi 24:13.

Jehovap siumut ilisimariigai

13, 14. Jehovap siumut ilisimannereersinnaanerminik atueriaasia sumut naapertuuppa, aamma sooq?

¹³ Jehova Guutiugami siulittuisartoq siunertaqartorlu, taava siumut ilisimannereersinnaanini qanoq atortarpaa? Pingaarnerpaamik uppernarsaavigineqarpugut Guutip aqqutai tamarmik ilumoortuusut, naapertuilluartuusut asannittuusullu. Ukiuni hundredelinni siullerni Paulusip kristumiut hebræerit allaffigigamigit uppernarsarpaa Guutip uppernarsaanera aamma Guutip neriorsuutaa ’aalajangersariigaasut aalajaatsut . . . marluk Guutip sallunnginneranik naqissusiisut’. (Hebræerit 6:17, 18) Aamma Paulusip ajoqersukkamut Titusimut allakkamini isuma tamanna allaatigaa, allappormi Guuti ’sallusuitsuusoq’. — Titusi 1:2.

¹⁴ Aammattaaq Jehova killeqanngitsumik pissaaneqaraluarluni naapertuilluanngitsuliunngisaannarpoq. Mosesip Jehova allaatigaa ’Guutitut aalajaatsutut, salloqittaanngisaannartutut; naapertuilluartuuvoq peqqusersuitsuullunilu’. (5 Mosesi 32:4) Jehova qanorluunniit ilioraluaraangat, iliuusii pissusiinut nuanningaartunut naapertuuttarput. Suliaanit erserpoq pissusii pingaarnerit — asanninnera, ilisimassusia, naapertuilluassusia pissaaneralu — oqimaaqatigiilluinnartuusut.

15, 16. Jehovap Adami Evalu Naatsiivimmi Edenimi sunik periarfissippai?

¹⁵ Eqqarsaatigeriaruk Jehovap pissusii pingaarnerit Naatsiivimmi Edenimi pisunut qanoq  attuumassuteqarnersut. Ataatatut asannittutut Jehovap inuit pisariaqartitaat tamaasa isumagai. Adami eqqarsarsinnaanngortippaa, tunngavilersuisinnaanngortillugu isummersinnaanngortillugulu. Uumasutut tamatigut eqqarsaatigeqqaarnagu iliuuseqartartutut innani Adami aalajangersinnaassuseqarpoq. Adami pinngortinneqareermat Guuti issiavissaarsuarminit qilammiittumit ammut isigivoq ’pinngortitanilu tamaasa’ qimerloorlugit, „takuaalu ajunngingaartut“. — 1 Mosesi 1:26-31; 2 Petrusi 2:12.

¹⁶ Kingusinnerusukkut Jehova aalajangerami Adami ’orpiup ajunngitsumillu ajortumillu ilisimalersitsisup’ paarnaanik nereqquniarnagu, aamma Adamip siunnersorluarnissaa isumagaa, taanna qanoq iliorniarnerluni aalajangersinnaaniassammat. Jehovap „naatsiiviup orpii tamaasa“, ataaseq kisiat pinnagu, Adamimut neriffigisinnaatippai mianersoqquaalu orpiup neriffigeqqusaanngitsup paarnaanik neriguni ajunaarnermik kinguneqarumaartoq. (1 Mosesi 2:16, 17) Adamip iliuusiisa kingunerisinnaasai taassumunnga saqqummiuppai. Adamimita qanoq iliussava?

17. Sooq oqartoqarsinnaava Jehovap siumut ilisimannereersinnaanini qaqugu atussanerlugu nammineq aalajangertaraa?

¹⁷ Jehova sunik tamanik siumut ilisimannereersinnaagaluarluni aalajangersimagunarpoq Adamip — Evallu — qanoq iliorumaarnerat siumut ilisimareerniarnagu. Taamaammat apeqqutaasoq tassaanngilaq Jehova siunissamik siumut ilisimannereersinnaanersoq, apeqqutaasorli tassaavoq siumut ilisimannereerniarluni aalajangernersoq. Aammattaaq oqarsinnaavugut Jehova Guutiugami asannittoq pikitsitsinerup tamatuma — kingunerisalu alianartut tamarmik — pinissaat piaaraluni naakkittaallunilu siumut aalajangereernavianngikkaa. (Matthæusi 7:11; 1 Johannesi 4:8) Tassa Jehovap siumut ilisimannereersinnaanini qaqugu atussanerlugu nammineq aalajangertarpaa.

18. Sooq Jehovap siumut ilisimannereersinnaanerminik qaqugukkut atuissanerluni nammineq aalajangertarnera naammalluinnanngitsuuneranut ersiutaanngila?

¹⁸ Jehovap siumut ilisimannereersinnaanini qaqugu atussanerlugu nammineq aalajangertarmagu, imaappa Jehova arlaannik amigaateqartoq ajoquteqartorluunniit, tassa naammalluinnanngitsuusoq? Naagga. Mosesip Jehova ’Qaarsutut’ allaatigaa imalu nangilluni: „Naammalluinnartuupput suliai.“ Guuti inuit ajortuliaasa kingunerinut pisuutinneqarsinnaanngilaq. Pisimasut kingunipilui ullumikkut misigisavut Adamip naalannginneranik pissuteqarput. Apustili Paulusi erseqqissumik tunngavilersuivoq „inukkut ataasiinnakkut ajorti silarsuarmut tikiuttoq ajortikkullu toqu tikiulluni, taamatut toqu inunnut tamanut annguppoq tamarmik ajortuliormata“. — 5 Mosesi 32:4, 5; Romamiut 5:12; Jeremia 10:23.

19. Apeqqutit suut allaaserisami tulliuttumi misissussavavut?

¹⁹ Matumani misissukkavut tunngavigalugit paasivarput Jehova naapertuilluanngitsuliorneq ajortoq. (Tussiaat 33:5) Jehovalli pissusii najoqqutassiaalu siunertaanut naapertuuttuaannarput. (Romamiut 8:28) Guutiugami siulittuisartoq Jehovap ’pileqqaarnerannit qanoq pisoqarnissaa nalunaarutigaa, itsaanilli suli pinngitsut oqaatigai’. (Esaja 46:9, 10) Aamma paasivarput Jehovap siumut ilisimannereersinnaanini qaqugu atussanerlugu nammineq aalajangertaraa. Tamannali uagutsinnut qanoq sunniuteqarpa? Qanoq ililluta qulakkeersinnaavarput aalajangikkavut Guutip asannittumik siunertaanut naapertuuttut? Aamma sunik pilluaqqussutissartaqarpa? Allaaserisami tulliuttumi apeqqutit taakkua misissussavavut.

[Quppernerup ataani ilanngussaq]

Uteqqiineq

• Itsaq pisimasut suut Guutip oqaasiata ’naammasseqquneqartunik naammassinnittuaannarneranut’ uppernarsaataappat?

• Jehovap ’siunertani naassaanngitsoq’ eqqarsaatigalugu suna siumut aalajangereersimavaa?

• Jehovap siumut ilisimannereersinnaanini qanoq atortarpaa?

[Atuaqqissaarnermi apeqqutit]

[Qupp. 13-mi assiliartaq]

Guutip siulittuutigisimavaa Jiisusip toqunissaa makititaanissaalu

[Qupp. 15-mi assiliartaq]

Jehovap Adamip Evallu iliuusissaat siumut aalajangersimavaa?