Guutip utoqqaat isumassorpai

SILARSUARMI utoqqarpassuit ajortumik pineqartarnerisa nalinginnaanera tupaallannanngilaq. Itsaq Biibilimi siulittuutigineqarpoq silarsuarmik aaqqissuussinerup guutiitsup maannakkut atuuttup ’ulluini kingullerni’ inuit ’namminissarsiortuujumaartut asanniuitsuujumaartullu’. (2 Timotheusi 3:1-3) Grækerit oqaasianni „asanniuitsut“-mik nutserneqartumi pineqartunut ilaasinnaapput ilaqutariittut pissusissamisoortumik asaqatigiinnermik amigaateqartut. Biibilimi siulittuutigineqartutorluinnaq tunniusimaneq taamaattoq ullumikkut amigaataavoq.

Utoqqarnik ajortumik pinnittunit allaanerulluinnarluni Jehova Guutip ukioqqortusisimasut pingaartippai isumassorlugillu. Misissorneroriartigu Biibilimi tamanna qanoq ersersinneqarnersoq.

„Uillarnerit sernissortaat“

Jehova Guutip utoqqarnik isumassuinera Allakkani Hebræerisuuni erseqqippoq. Assersuutigalugu Tussiaat 68:6-imi Daavip Guuti ’uillarnerit sernissortaannik’ taavaa, uillarnerillu ukioqqortuugajupput. * Jehovap uillarnernik isumassuinera erseqqippoq. Allaat Biibilimi allassimavoq ’kamangaalissasoq’ uillarnerit ajortumik pineqarpata. (2 Mosesi 22:21-23) Uillarnerit, aap, utoqqaat aalajaatsut tamarmik, Guutimit kiffaanillu pingaartinneqangaarput. Ussatit 16:31-mi Jehova Guutip innuttaasalu utoqqarnut isiginnittaasiat ima allaatigineqarpoq: „Nutsat qeersuusut tassaapput niaqorut  kusanartoq, taanna iluarnerup aqqutaaniippoq.“

Ilimagineqarsinnaasutut inatsisini Jehovap Israelikkunnut tunniusaani utoqqarnik ataqqinninneq pingaartinneqarpoq. Israelikkut ima peqquneqarput: „Qeersuut nikuiffigissavatit utoqqaallu ataqqillugit. Guutit mianerissavat. Uanga tassaavunga [Jehova]!“ (3 Mosesi 19:32) Israelimi utoqqarnik ataqqinninneq Jehova Guutimut attaveqarnermut atassuteqarluinnarpoq. Utoqqaat ajortumik piitigalugit Guutimik asanninneraasoqarsinnaanngilaq.

Kristumiut Mosesip inatsisaanik maleruaasussaanatik ’Kristusip inatsisaanik’ maleruaasussaapput. ’Kristusip inatsisaa’ kristumiut pissusilersornerannut isiginnittaasiannullu sunniuteqangaarpoq assersuutigalugu ataataminnut anaanaminnullu utoqqarnullu asannittuliornissaminnut kajumississutigisarpaat. (Galatiamiut 6:2; Efesosimiut 6:1-3; 1 Timotheusi 5:1-3) Taamaaliunngillat peqquneqaramik, uummatimikkulli kajumilersinneqaramik. „Uummammik minguitsumik asaqatigiissaasi,“ apustili Petrusi allappoq. — 1 Petrusi 1:22.

Ajoqersukkap Jaakup utoqqarnik isumaginninnissatsinnut pissutaasoq suli alla eqqaavaa. Ima allappoq: „Guutisiorneq minguitsoq piviusorlu Guutimut Ataatatsinnut tassaavoq iliarsunnik uillarnernillu atugarliuutilinnik isumaginninneq imminillu mingutsinneqatsaalineq silarsuarmit.“ (Jaaku 1:27) Killitsinnartoq Jaakup erseqqissarpaa. Malugeqquaa uillarnerit iliarsuillu Jehovap isaani qanoq erlinnartigisut.

Tassa naammanngilaq utoqqaat ajortumik pinnginnissaat. Isumassuineq aamma iliuuseqarnikkut ersersittariaqarpoq. (Takuuk ungalusaq „Asanninneq iliuutsikkut ersersinneqartoq“ qupperneq 6, 7-imiittoq). Jaaku ima allappoq: „Upperneq sulianik ilaqanngitsoq toqungavoq.“ — Jaaku 2:26.

Utoqqaat ’atugarliornerminni’ tuppallersaatissaat

Jaakup oqaasii aamma allamik ilinniarfigisinnaavavut. Malugiuk oqarmat kristumiut uillarnernik „atugarliuutilinnik“ isumaginnissasut. Grækerit oqaasiat ’atugarliuummik’ nutserneqartoq atorneqartarpoq pissutsit atukkat tatisinerat pissutaalluni annikilliorneq imaluunniit naalliuuteqarneq pineqaraangat. Qularutissaanngilaq utoqqarpassuit taamatut annikilliuuteqartarnerat. Ilaat kiserliorput. Allat qangatut naammassisaqarsinnaajunnaarnertik nanertisimassutigaat. Allaat Guutimut kiffartornermi peqataalluartut nikallungalersinnaapput. Assersuutigeriartigu John * ukiuni qulikkuutaani sisamani Guutip naalagaaffianik aalajaalluni oqaluussisartuusoq, ukiullu kingulliit pingasut immikkut ittumik piffissaq tamaat kiffartortuusoq. Ullumikkut John 80-it sinnerlugit ukioqarpoq, miserratiginngilaalu ilaannikkut nikallungasarnini. Ima oqarpoq: „Piffissap ingerlanerani kukkussuterpassuakka ajunnginnerusumillu iliuuseqartarsimasinnaagaluarnera eqqarsaatigiuarpakka.“

Utoqqaat taamaattut tuppallersaatigisinnaavaat Jehovap naammalluinnartuugaluarluni naammalluinnartuunissatsinnik piumaffiginninnginneranik ilisimaarinninnertik. Kukkussutigisartakkatsinnik ilisimaarinnikkaluartoq taanna pillugu Biibilimi ima allassimavoq: „lllit [Jehova], ajortuliat naatsorsuutigissagaluarukkit kina atassagaluarpa taava, [Jehova]?“ (Tussiaat 130:3) Jehovap kukkussutivut kisiisa isiginagit uummammiugut pingaartippai. Qanoq tamanna nalunngissinnaavarput?

 Kunngi Daavi — nammineq naammalluinnanngitsuusoq kukkussuterpassuaqartorlu — Guutimit isumassarsisitaalluni Tussiaat 139:1-3-mi ima allappoq: „[Jehova], illit misissuiffigisimavarma, nalunangalu. Nalunngilarma issiagaluaruma nikorfagaluarumaluunniit, ungasissumit allaat paasereertarpat qanoq eqqarsartunga. Nalunngilat pisukkuma nalagumaluunniit, aqqutikkalu tamaasa nalunngilluinnarpatit.“ Oqaaseq uani „nalunngilat“-mik nutserneqartoq allassimaqqaarfinni atorneqartoq isumaqarpoq „nakkartippaa“, soorlu naasorissaasoq karrit qalipakui karrinit immikkoortinniarlugit nakkartitsisartoq. Guutimit isumassarsisitaalluni Daavip neriorsoqqissaarpaatigut Jehovap ajunngitsuliavut nakkartitsivimmiitittutut ittarai eqqaamallugillu.

Ataatatta qilammiusup naakkinnittup, tassunga aalajaattuartilluta, ajunngitsuliavut eqqaamassavai — pingaartillugillu. Aap, Biibilimi allassimavoq taassuma naapertuilluanngitsuliornertut isigissagaa suliavut aqqanullu asanninnerput puigorunigik. — Hebræerit 6:10.

„Siulliit peermata“

Biibilimi ersersinneqarpoq utoqqalinermi ajornartorsiutit Guutip inuiannut siunertarinngikkai. Siuaasavut siulliit, inuit aappariit siulliit,  Pinngortitsisumut pikitsitsereermata aatsaat utoqqalinerup sunniutipilui atugaalerput. (1 Mosesi 3:17-19; Romamiut 5:12) Naassaanngitsumilli taamaassanngilaq.

Eqqaaneqareersutut pissutsit ajortut ullumikkut misigisatta ilarpassui — ilaatigut utoqqarnik ajortumik pinninnerit — pissutsit aaqqissuussaanerata maanna atuuttup ’ulluini kingullerni’ inuunitsinnut uppernarsaataapput. (2 Timotheusi 3:1) Guutip atorunnaarsissavai ajortip sunniutai, ilaatigut utoqqalinermi ajoqutit toqulu. Biibilimi ima allassimavoq: „[Guutip] qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.“ — Saqqummersitat 21:4.

Guutip silarsuassaani nutaami utoqqalinermi erloqinartut anniaatillu, aamma utoqqarnik ajortumik pinnittarnerit, qanganngorsimassapput. (Mika 4:4) Allaat toqungasut Guutip eqqaamasai uummaqqissapput nunamilu paratiisiusumi naassaanngitsumik inuunissamut periarfissaqassallutik. (Johannesi 5:28, 29) Taamanikkussamut aatsaat taama erseqqitsigissaaq Guutip utoqqarniinnaanngitsoq, aammattaarli imminut naalattunik tamanik, isumassuinera. (wE 6/1 06)

[Quppernerup ataani ilanngussaq]

[Qupp. 6, 7-mi ungalusaq/​assiliartat]

Asanninneq iliuutsikkut ersersinneqartoq

Jehovap Nalunaajaasuisa akornanni ilagiinni nakkutilliisut utoqqarnik isumassuinermi siuttuupput. Apustili Petrusip oqaaqqissaarutaa una malinniartarpaat: „Guutip savaataanik ilissinniittunik paarsisuuniaritsi.“ (1 Petrusi 5:2) Utoqqarnik iliuutsikkut ikiuineq Guutip savaataanik isumassuinermut ilaavoq. Suusinnaappat?

Utoqqaat tamarmik immikkut sunik pisariaqartitsinersut paasilluarniarlugu nikallujuittariaqarpoq immaqalu aamma arlaleriarluni pulaarneqartariaqarput oqaloqatigineqartariaqarlutillu. Immaqa pisiniarnermi eqqiaanermiluunniit ikiortariaqarput, kristumiut ataatsimiinnerinut biiliunneqarnissaq imaluunniit Biibilimik kristumiulluunniit atuagassiaataannik atuffanneqarnissaq pisariaqartippaat. Qanoq iliortoqarsinnaaneranik siunnersuutialunnguaannaapput. Ajornanngikkaangat pitsaasunik atoriaannaasunillu ikiuiniarnernik aallartitsisoqartariaqarpoq. *

Taavami qanoq pissaagut ilagiinni qatannguterput utoqqaq ajornartorsiulerpat immaqalu aningaasatigut ikiorneqartariaqarpat? Pitsaassaaq pineqartoq ikiuisinnaasunik meeraqarnersoq allanilluunniit ilaqutaqarnersoq paasiniaqqaaraanni. Taamaaliorneq Timotheusimut allakkat siulliit 5:4-mi allassimasunut naapertuutissaaq: „Uillarneq qitornaqarpat ernutaqarpalluunniit taakkua ilikkaqqaartariaqarpaat ilaquttaminni Guutimik mianerinnilluni inuuneq utoqqartamillu akillugit ajunngitsuliorfiginissaat, tamanna Guutip iluarimmagu.“

Immaqa pineqartoq pisortatigoortumik ikiuutisisinnaanerluni paasiniaanissamut ikiorneqartariaqarpoq. Aamma imaassinnaavoq ilagiinniittut ilaat aningaasatigut ikiuisinnaasut. Tamakkunatigut ajornartorsiut aaqqinneqarsinnaanngippat, ilagiinni utoqqaanertat naliliiffigisinnaavaat pineqartup ilagiinnit aningaasatigut ikiuutisinissamut piumasaqaatit eqqortinnerai. Tamanna ilagiinni kristumiuni siullerni ilaasut ilaannut periarfissaavoq, apustili Paulusimi suleqatiminut Timotheusimut ima allappoq: „Uillarnertut naatsorsuunneqarsinnaavoq minnerpaamik 60-inik ukioqartoq ataasiinnarmik ueqarsimasoq ajunngitsuliortartutullu naluneqanngitsoq; qitornaminik paaqqinnittuullunilu perorsaasimasuussaaq, inoroorsaartuusimassalluni, illernartut isigaat asattarsimassallugit, ajorsartunik ikiuisarsimassalluni, tassami tamatigut ajunngitsuliorniartuusimassalluni.“ — 1 Timotheusi 5:9, 10.

[Quppernerup ataani ilanngussaq]

[Qupp. 5-mi assiliartaq]

Tabithap uillarnerit pissaaleqisut ikiortarpai. — Apustilit Suliaat 9:36-39.