Ilissi inuusuttuususi, Jehovamut kiffartorniarlusi aalajangeritsi!

„Ullumi [nammineq, NV] aalajangerniaritsi sorliit guutisiorfigiumagisi.“ — JOSVA 24:15.

1, 2. Kuisitseriaatsit kukkusut suut kristumiuunerartunit atorneqartarsimappat?

„ATUAKKIORTOQ Tertullianimik atilik ukiut 100-kkut naalerneranni u.n.k. ima allappoq: „[Meeqqat] Kristusimik ilisarisimannissinnaanngoreerpata kristumiunngortissigik.“ Naalungiarsunnik kuisisarneq, ileqqoq nalimini kristumiunit tunussisimasunit pigiliunneqalersoq, akerlilerpaa. Tertullianimut Biibilimullu akerliusumik ilagiinni ajoqersuisuunerup Augustinip kuissut tassaanerarpaa ajortisiap ajoqutaanik peersitsisartoq, aamma meeqqat kuisinneqarnatik toqusut anniarfimmut pisussanngortarnerarpai. Upperisaq tamanna naalungiarsuit inunngoreernerata kingorna sapinngisamik sukkanerpaamik kuisitsisarnermik siuarsaavoq.

² Kristumiuunerartut oqaluffeqarfissuisa ilarpassuini suli naalungiarsunnik kuisitsisoqartarpoq. Aamma inuiaqatigiit kristumiuunerartut naalakkersuisui upperisarsiornikkullu siuttut oqaluttuarisaanerup ingerlanerani „Guutimik nalusunik“ ajugaaffigineqarsimasunik pinngitsaaliillutik kuisitsisarsimapput. Naalungiarsunnilli kuisitsineq pinngitsaaliillunilu inersimasunik kuisitsineq Biibilimi tunngavissaqanngillat.

Ullumikkut inunnguutsiminit tunniulluinnarsimasoqanngilaq

3, 4. Angajoqqaat tunniulluinnarsimasut meeraasa namminneq piumassutsiminnit tunniulluinnarnissamut suna iluaqutigisinnaavaat?

³ Biibilimi ersersinneqarpoq Guutip meeraaqqat illernartutut isigigai, taakkua angajoqqaavisa aappaannaaluunniit kristumiuuppat uppertoq. (1 Korinthimiut 7:14) Tamanna pissutaalluni meeqqat taakku Jehovamut kiffaareerpat tunniulluinnarsimasut? Naamik. Meeqqalli Jehovamut tunniulluinnarsimasunik angajoqqaallit ilinniartinneqartarput namminneq piumassutsiminnik tunniulluinnarnerannik kinguneqarsinnaasumik.  Kunngi Salomo silatooq ima allappoq: „Ernera, ataatavit inassutai maleruarniakkit anaanavillu ajoqersuussutaa sumiginnarnagu. . . . Ingerlagaangavit tasissersuuttassavaatsit, innangagaangavillu sernissussavaatsit, iteraangavillu oqaluffigisassavaatsit. Inassummi qulliuvoq, ajoqersuussullu qaammaqqutaalluni, ilitsersuineq oqaaqqissaarinerlu inuunermut aqqutaapput.“ — Ussatit 6:20-23.

⁴ Angajoqqaat kristumiuusut ajoqersuinerat inuusuttunut illersuutaasinnaavoq, inuusuttut angajoqqaamik siunnersuutaat maleruarumappatigik. Salomo aamma ima allappoq: „Erneq ilisimasoq ataataminut nuannaarutaasarpoq, ernerli sianiitsoq anaanaminut isumakuluutaalersarpoq.“ „Tusaaniarit ernera, ilisimassuseqalerniarit uummatit ingerlavimmut eqqortumut sammisillugu.“ (Ussatit 10:1; 23:19) Aap, ilissi inuusuttuususi angajoqqaassi ilinniartitsinerat iluaqutigissagussiuk, ilitsersuinerit, siunnersuinerit perorsaanerillu kajumillusi akuerisariaqarpasi. Inunngunngilasi ilisimassuseqarlusi, ’ilisimassuseqalersinnaavusili’ namminerlu kajumissutsissinnit ’inuunermut aqqut’ ingerlavigisinnaallugu.

Jehovap oqaaqqissaarutaa eqqartorneqarmat suna pineqarpa?

5. Paulusip meeqqat ataataasullu qanoq siunnersorpai?

⁵ Apustili Paulusi ima allappoq: „Qitornaasusi, angajoqqaasi naalassigit Naalakkami, tamanna iluarmat. ’Ataatat anaanallu ataqqikkit!’ Tassa inassut neriorsuutitalik siulleq: ’atugarissaaqqullutit inuummersoqqullutillu nunami.’ Ataataasusilu, qitornasi kamatseqinasigit, perorsarsigilli anusinngorsartarlugit oqaaqqissaartarlugillu [Jehovamit] pisumik [Ilissilu ataataasusi, qitornasi narrutsatseqinasigik, perorsartuarsigilli Jehovap ileqqoreqqusai oqaaqqissaarutaalu malillugit, NV].“ — Efesosimiut 6:1-4.

6, 7. ’Jehovap oqaaqqissaarutaa’ malillugu meeqqanik perorsaaneq qanoq paasisariaqarpa, aamma sooq tamanna angajoqqaat meeqqaminnik naleqqutinngitsumik sunniiniarnerattut paasisariaqanngila?

⁶ Angajoqqaat kristumiut meeqqatik „Jehovap ileqqoreqqusai oqaaqqissaarutaalu malillugit“ perorsaraangamikkik, naleqqutinngitsumik sunnerniartarpaat? Naamik. Angajoqqaat ilumoortuusorisaminnik ileqqussatigullu iluaqutaasorisaminnik meeqqaminnik ilinniartitsisut kia isorisinnaagamigit? Guuteqannginneraasut meeqqaminnik Guutip piunnginneranik ilinniartitsinertik pillugu isornartorsiorneqarneq ajorput. Katuullit katuullit upperisaat naapertorlugu meeqqaminnik perorsaanissaminnut pisussaasutut misigipput, tamannalu pillugu qaqutigut isornartorsiorneqartarput. Jehovap Nalunaajaasui aamma meeqqatik sallusuissutinut tunngaviusunut ileqqussatigullu najoqqutassianut atatillugu Jehovap eqqarsartaasianik pigiliussinissaannik perorsaraangamikkit, meeqqaminnik uukapaatitsiniarnerarneqartariaqanngillat.

⁷ Theological Dictionary of the New Testament naapertorlugu grækerit oqaasianni Efesosimiunut allakkat 6:4-mi ’oqaaqqissaarut’-mik nutserneqarsimasumi pineqarpoq „isumamik naqqiiniarneq, ajortunik aaqqiiniarneq, eqqarsartaatsimik pitsanngorsaaniarneq“. Taavami inuusuttoq angajoqqaaminit perorsarneqarumanngippat kammalaatit tatisinerat taakkualu iliornerattut iliorusunneq pissutigalugit? Kikkut ajoqutaasumik sunniinerarneqarsinnaappat — angajoqqaat imaluunniit inuusuttup kammalaatai? Inuusuttoq ikiaroornartutornissamut, putumanissamut ileqqorluttuliornissamulluunniit kammalaatiminit tatineqarpat, taava taassuma angajoqqaavi qitornamik eqqarsartaasianik naqqiiniarnertik qitornaminnillu taamatut ileqqoqarnerup qanoq kinguneqarsinnaaneranik paasititsiniarsarinertik pillugu isornartorsiorneqassappat?

8. Timotheusip ’uppilernera’ qanoq paasisariaqarpa?

⁸ Apustili Paulusip Timotheusi inuusuttoq ima allaffigaa: „Ilinniarsimasatit nakimaatsumillu upperilersimasatit aalajangiunniakkit! Nalunngilammi kikkunnit tamakku ilinniarsimallugit, meeraaninniillu ilisimavatit Allakkat Illernartut ilinnik ilisimassuseqalersitsisinnaasut annannissamik Kristusi-Jiisusimut uppernikkut.“ (2 Timotheusi 3:14, 15) Timotheusi mikisunnguusorli anaanaata aanaatalu taassuma Guutimut uppernerata tunngavissaqarluarnissaa isumagisimavaat Allakkanik Illernartunik ilinniartillugu. (Apustilit Suliaat 16:1; 2 Timotheusi 1:5) Kingusinnerusukkut  taakku kristumiunngoramik Timotheusi upperisamik tamatuminnga pinngitsaalillugu upperisaqalersinngilaat, taannali nammineq ’uppilerpoq’ Allakkanik ilisimasaqarneq tunngavigalugu silatusaartumik tunngavilersuinerat iluaqutigalugu.

Jehovap kajumissaarpaatit aalajangeqqullutit

9. (a) Jehovap susinnaanngortilluta pinngortippaatigut, tamatumunngalu suna pissutaava? (b) Guutip ernituata piumasamisut iliorsinnaatitaanini qanoq atorpaa?

⁹ Jehovap uagut robottitut, nammineq piumasaminik iliortussatut allamillu susinnaanngitsutut, pinngortissinnaasimagaluarpaatigut. Taamatulli pinngortinnata nammineq piumasatsitut iliorsinnaanngortilluta pinngortippaatigut. Guuterput kajumittunik innuttaqarusuppoq. Pinngortitani, utoqqaat inuusuttullu, asanninneq pissutigalugu imminut kiffartortut takullugit nuannaarutigisarpaa. Asannilluni Guutip piumasaanut naalatsigitinnermi maligassiuilluarnerpaaq tassaavoq taassuma ernitua, taannalu pillugu Jehova nammineq ima oqarpoq: „Tassa ernera asasara, nuannarisara.“ (Matthæusi 3:17) Angajulliliap taassuma Ataatani ima oqarfigaa: „Guuti, piumasat malillugu iliornissaq tassa kajungerisara; inatsisitit uanga ilunni ipput.“ — Tussiaat 40:9; Hebræerit 10:9, 10.

10. Akuerineqarsinnaasumik Jehovamut kiffartorneq sumik tunngaveqarpa?

¹⁰ Jehovap piumasaraa ernerminit siulersorneqarlutik imminut kiffartortut, Jiisusitut piumasaminut naalatsigitinnissamut kajumitsigissasut. Tussiaasiortoq siulittuilluni ima erinarsorpoq: „Ullormi sakkutuussannik sorsuttussarsiffigisanni innuttatit kajumillutik sassarumaarput. Illernartumik assuarsimallutik, qaalersup erniaasut, innuttatit inuusuttut kanernertut issapput.“ (Tussiaat 110:3, NV) Jehovap peqatigiissortai, qilammiittut nunarsuarmiittullu, taassuma piumasaanut asannilluni naalatsigitinneq tunngavigalugu sulipput.

11. Inuusuttut angajoqqaanit tunniulluinnarsimasunit perorsarneqarsimasut sumik aalajangigassaqarpat?

¹¹ Tassa ilissi inuusuttuususi paasisariaqarparsi angajoqqaassi utoqqaanertalluunniit kristumiut ilagiinniittut kuisinnissassinnut pinngitsaalinianngikkaasi. Jehovamut kiffartornissaq ilissi nammineq kissaatigisariaqarparsi. Josvap Israelikkut ima oqarfigai: „[Jehova] kiffartuussiuk ilumoorlusi unneqqarillusilu . . . Ullumi [nammineq, NV] aalajangerniaritsi sorliit guutisiorfigiumagisi.“ (Josva 24:14-22) Ilissi aamma nammineq aalajangertariaqarpusi Jehova kiffartorfigissanerlugu taassumalu piumasaatut iliorniarlusi taassumunnga tunniulluinnassanerlusi.

Akisussaaffiit eqqortiguk

12. (a) Angajoqqaat meeqqaminnik perorsaasinnaagaluarlutik, meeqqatik pillugit sunaana iliuuserisinnaanngikkaat? (b) Inuusuttoq aalajangikkani pillugit qaqugukkut Jehovamut akisussaalertarpa?

¹² Piffissaq ilissi inuusuttut angajoqqaassi aalajaannerannit illersorneqarunnaarfissarsi nalliutissaaq. (1 Korinthimiut 7:14) Ajoqersugaq Jaaku ima allappoq: „Ajunngitsumik iliorneq suusoq ilisimagaluarlugu ajunngitsuliunngitsoq ajortuliortuuvoq.“ (Jaaku 4:17) Angajoqqaat meeqqatik sinnerlugit Guuti kiffartorfigisinnaanngilaat, soorluttaaq meeqqat angajoqqaatik sinnerlugit Guutimut kiffartorsinnaanngitsut. (Ezekieli 18:20) Jehova taassumalu siunertaa pillugit ilinniareerpit? Ilikkakkavit paasinissaannut namminnerlu taassumunnga attaveqalernissannut naammattumik utoqqaassuseqarpit? Taava silatusaarnerussanngila isumaqassalluni Jehovap illit taassumunnga kiffartorniarlutit aalajangersinnaasutut isigigaatit?

13. Inuusuttuaqqat kuisimanngitsut apeqqutinik sunik imminut aperisariaqarpat?

¹³ Inuusuttuullutillu kuisimanngitsuuit, angajoqqaanit Guutimik mianerinnittunit perorsagaavit,  kristumiut ataatsimiinnerinut najuuttarpit immaqalu allaat nutaarsiassamik nuannersumik oqaluussissutiginneqataasarlutit? Taamaappat taava ilumoorlutit imminut ima aperigit: ’Sooq taamaaliortarpunga? Angajoqqaama piumasarimmassuk ataatsimiigiarlungalu oqaluusseqataasarpunga, imaluunniit Jehovap nuannaartinnissaa kissaatigigakku taamaaliortarpunga?’ Illit ’Guutip piumasaata ajunngitsup, iluarinartup, naammalluinnartup’ suunera qulakkeerpiuk? — Romamiut 12:2.

Sooq kuisinnissat kinguarsassaviuk?

14. Biibilimi oqaluttuat suut ersersippaat kuisinnissaq pisariaqanngitsumik kinguartinneqartussaanngitsoq?

¹⁴ „Suna akornutaassava kuineqarnissannut?“ Angutip Etiopiamiup iivangkiiliumik oqaluussissutiginnittartumut Filipimut taama aperisup, Jiisusip Missiarsiunera paaseqqammerpaa. Etiopiamiulli Allakkat pillugit ilisimasaqangaarami paasivaa ilagiinnut kristumiunut ilaasutut maannamiit Jehovamut kiffartorniarnerminik ersersitsinissani kinguarsartussaanagu. Tamanna nuannaarutigingaarpaa. (Apustilit Suliaat 8:26-39) Aamma arnaq Lydiamik atilik, ’uummataa ammarneqarmat Paulusip oqaasiinik pigiliussisoq’, nammineq inoqutinilu ingerlaannaq kuisipput. (Apustilit Suliaat 16:14, 15) Taamatuttaaq parnaarussanik paarsisup Filippimiittup Paulusi Silasilu tusarnaarpai ’Jehovap oqaasia imminut nalunaajaatigimmassuk’, „kinguninngualu nammineq inoqutinilu tamarmik kuisipput“. (Apustilit Suliaat 16:25-34) Taamaammat illit nammineq atugarisatit eqqarsaatigikkit. Jehova taassumalu siunertai pillugit tunngaviusunik ilisimasaqaruit, taassuma piumasaatut iliornissat ilumoorlutit kissaatigigukku, ilagiinni tusaamasaalluaruit, aalajaallutit ataatsimiigiartaruit Guutillu naalagaaffia pillugu nutaarsiassamik nuannersumik oqaluussissutiginneqataasaruit, sooq taava kuisinnissat kinguarsassaviuk? — Matthæusi 28:19, 20.

15, 16. (a) Tunngavilersuut kukkusoq suna inuusuttut ilaasa kuisinnaveersaassutigisinnaavaat? (b) Tunniulluinnarneq kuisinnerlu inuusuttunut qanoq illersuutaasinnaappat?

¹⁵ Imaassinnaanerpa ajortuliortuussagaluaruit akisussaatinneqarnissat annilaangagalugu kuisinnissat, iliuuseq pingaaruteqartoq, kinguarsarit? Taamaappat manna eqqarsaatigeriaruk: Ullut ilaanni ajutoornissat annilaangagiinnarlugu kørekortitaanngitsuuginnassagaluarpit? Soorunalimi naamik! Kuisinnissattaaq kinguarsartussaanngilat kuisinnissamut piukkunnarsisimaguit. Illimmi Jehovamut tunniulluinnarnerit taassumalu piumasaatut iliorniarlutit angernerit ajortumik akiuinissamut kajumississutaangaassaaq. (Filippimiut 4:13) Ilissi inuusuttuususi ilimagissanngilarsi kuisinnissassi kinguartinneratigut Jehovamut akisussaanngitsoorsinnaallusi. Akisussaaffeqarsinnaanermut naammattumik utoqqaassuseqalersimagussi, iliuutsissinnut Jehovamut akisussaassaasi, kuisissimagussi kuisissimanngikkussiluunniit. — Romamiut 14:11, 12.

¹⁶ Nunarsuarmi tamarmi Jehovap Nalunaajaasorpassui misigipput inuusunnerminni kuisinniarlutik aalajangersimanertik assut iluaqutigisimallugu. Assersuutigalugu qatanngut angut 23-nik ukiulik Europap Kippasissuaneersoq oqaluttuarpoq 13-inik ukioqarluni kuisinnini ’inuusuttut  kajungerisaannut’ nassataritinnginniassagami mianersornissaminut kajumississutigisimallugu. (2 Timotheusi 2:22) Siusissorujussuakkut anguniagarilerpaa piffissaq tamaat kiffartortunngornissani. Ullumikkut Jehovap Nalunaajaasuisa immikkoortortaqarfiisa ilaanni kiffartornini nuannaarutigaa. Inuusuttut Jehovamut kiffartorniarlutik aalajangertut tamarmik pilluaqquneqangaarumaarput, aamma illit.

17. ’Jehovap piumasaata’ suuneranik paasinninnissaq sutigut pisariaqarpa?

¹⁷ Tunniulluinnarneq kuisinnerlu iliuutsitsinni tamani Jehovap piumasaanik eqqarsaatiginnilluta inuunerup aallarnerfigaa. Tunniulluinnarnerput eqqortinniarlugu ’piffissamik pisisariaqarpugut’. Qanoq ililluta taamaaliorsinnaavugut? Piffissaq pingaaruteqannginnerusunut atortagaraluarput, pimoorussilluta Biibilimik atuaqqissaarnermut, ataatsimiinnernut najuunnermut ’Naalagaaffimmillu nutaarsiassamik nuannersumik’ sapinngisaq tamaat oqaluussissutiginneqataanermut atorlugu. (Efesosimiut 5:15, 16, NV; Matthæusi 24:14, NV) Jehovamut tunniulluinnarsimanerput taassumalu piumasaatut iliorusunnerput inuunermi sutigut tamatigut iluaqutigissavarput. Ilaatigut sunngiffitsinnik qanoq atuinitsinnut, qanoq nerillutalu imertarnitsinnut nipilersuutinillu qanoq ittunik tusarnaartarnitsinnut sunniuteqassaaq. Soormi aliikkusersoriaatsit naassaanngitsumik nuannaarutigisinnaasatit toqqarukkit? Jehovap Nalunaajaasuisa ilaasa inuusuttut nuannaartut tusindilikkuutaat oqaluttuussinnaassavaatsit ’Jehovap piumasaanik’ maleruaajutigaluni peqqinnartunik nuannisaariaaserpassuaqartoq. — Efesosimiut 5:17-19.

„Ingerlaqatigissavassi“

18. Inuusuttut imminut qanoq aperisariaqarpat?

¹⁸ Ukioq 1513-imiit u.n.s. ukiumi 33-mi u.n.k. piinsip ullua tikillugu Jehova aaqqissuussaalluartunik nunarsuarmi innuttaqarpoq imminut kiffartortussatut nalunaajaasigisassamisullu toqqarsimasaminik. (Esaja 43:12) Israelikkut inuiaqatigiinnut taakkununnga ilaallutik inunngorput. Jehovali piinsip ulluaniilli nunarsuarmi allanik innuttaqalerpoq, Israelikkut anersaakkut ittut, ’aterminut innuttassarsiat’. (1 Petrusi 2:9, 10; Apustilit Suliaat 15:14; Galatiamiut 6:16) Apustili Paulusip eqqaavaa Kristusi pigisaqartoq „inuiannik minguitsunik ajunngitsuliornissamillu noqqaassuteqartunik“. (Titusi 2:14) Ilissi inuusuttut nammineq paasiniartariaqarparsi inuiaat taakku kikkuunersut. „Inuiaat iluartut, ilumoornermik aalajangiussisut“ najoqqutassiat Biibilimeersut malillugit inuusut, Jehovamut nalunaajaasutut aalajaatsutut kiffartortut taassumalu naalagaaffianik inuiaat neriuutissatuaattut oqaluussissutiginnittut ullumikkut kikkuuppat? (Esaja 26:2-4) Kristumiuuneraqatigiit ilagiivi upperisarsioqatigiillu allat qimerlooriakkit, taakkununngalu ilaasortaasut inuuserisaat Guutip kiffaanut ilumoortunut Biibilimi piumasaqaataasunut naleqqiullugit.

19. Nunarsuaq tamakkerlugu inuit millionillit suna qularutigiunnaarsimavaat?

¹⁹ Nunarsuaq tamakkerlugu inuit millionillit, taakkualu akornanni inuusuttorpassuit, qularutigiunnaarsimavaat Jehovap Nalunaajaasuisa ilaat tanitat kinguleruttut tassaasut „inuiaat iluartut“. Inuit millionillit taakkua anersaakkut Israelikkut ima oqarfigaat: „Ingerlaqatigissavassi tusaratsigu Guutip najoraasi.“ (Zakaria 8:23) Iluunngarluta neriuutigalugulu qinnutigaarput ilissi inuusuttut Guutip innuttaanut ilaalerniarlusi aalajangerumaartusi taamaalillusilu ’inuuneq’ — Jehovap silarsuassaani nutaami inuuneq naassaanngitsoq — ’qinerlugu’. — 5 Mosesi 30:15-20; 2 Petrusi 3:11-13. (wE 7/1 06)

Uteqqiineq

• Jehovap oqaaqqissaarutaa qanoq paasisariaqarami?

• Kiffartorneq qanoq ittoq Jehovamit akuerineqarsinnaava?

• Inuusuttut angajoqqaanit tunniulluinnarsimasunit perorsarneqarsimasut tamarmik sumik aalajangigassaqarpat?

• Sooq kuisinnissaq pisariaqanngitsumik kinguartinneqartussaanngila?

[Atuaqqissaarnermi apeqqutit]

[Qupp. 13-mi assiliartat]

Kikkut tusarnaassavigit?

[Qupp. 15-mi assiliartat]

Tunniulluinnarneq kuisinnerlu ilinnut qanoq illersuutaasinnaappat?

[Qupp. 16-mi assiliartat]

Kuisinnissannut suna akornutaassagami?