Jehovap naalliuttoq aniguisittarpaa

„Iluartoq ajunaarnernik amerlasuunik eqqorneqartarpoq, [Jehovalli] tamakkunannga tamanit annaattarpaa.“ — TUSSIAAT 34:20.

1, 2. Kristumiup aalajaatsup suna ajornartorsiutigilersimavaa, aamma sooq uagut taamatut misigisinnaavugut?

ARNAQ Keikomik * atilik ukiut 20-t sinnerlugit Jehovamut nalunaajaasuusimavoq. Piffissami aalajangersimasumi pioneriusimavoq, imaluunniit piffissaq tamaat oqaluussisartuusimavoq, tamannalu assut nuannarisimavaa. Ungasinngitsukkulli nikallungalersimavoq kiserliulersimallunilu. Ima oqaluttuarpoq: „Qiajuaannalerpunga.“ Eqqarsaatini nuanninngitsut akiorniarlugit nammineq atuaqqissaarnermut piffissaq annerusoq atortalerpaa. „Taamaalioraluarlungali eqqarsartaasera allanngortissinnaanngilara,“ oqarpoq. „Ima isumatsassimatigaanga toqorusunnerullunga.“

² Aamma illit taamatut isumatsannikuuit? Jehovamut nalunaajaasuusutut nuannaarnissamut pissutissaqarluarpugut, Guutimut tunniusimaneq ’inuunermut matumunnga piumaartussamullu immini neriorsuutitaqarmat’. (1 Timotheusi 4:8) Aamma anersaakkut paratiisimiippugut. Kisianni imaappa uagut aliasuuteqarsinnaanngitsugut? Naamerluinnaq. Biibilimi ima allassimavoq: „Iluartoq ajunaarnernik amerlasuunik eqqorneqartarpoq.“ (Tussiaat 34:20) Tamanna tupinnanngilaq, ’silarsuarmi tamarmi Ajortumut [Saatani Diaavulumut] naalatsigitippoq’. (1 Johannesi 5:19) Tamatuma ilumoornera tamatta annerusumik minnerusumilluunniit misigisarparput. — Efesosimiut 6:12.

Naalliuutit sunniutaat

3. Guutip kiffaanik isumatsangaarsimasunik Biibilimi oqaluttuarineqartunik eqqaasaqarit.

³ Sivisunaartumik misilinneqarnerit pissutigalugit inoorusussuseerussinnaavugut. (Ussatit 15:15) Jobi assuarnaatsoq eqqarsaatigeriaruk. Taanna naakkittaatsumik misilinneqarnermini  ima oqarpoq: „Inuk arnamit erniusoq inuunikittarpoq eqqissinaatsorsiortaqalunilu.“ (Jobi 14:1) Jobi nuannaarunnaarsimavoq allaallu isumaqaleraluarluni Jehovamit tununneqarsimalluni. (Jobi 29:1-5) Jobi Guutip itsaq kiffaasa akornanni naalliuuteqartutuaasimanngilaq. Biibilimi oqaluttuarineqarpoq Hanna qitornaatsuunini pillugu ’isumatsassimaqisoq’. (1 Samueli 1:9-11) Ilaqutariinni ajornartorsiutit erloqissutigalugit Rebekka ima oqarpoq: „Inuunera uannut avaanngunarsilerpoq.“ (1 Mosesi 27:46) Daavi kukkunini eqqarsaatigalugit ima oqarpoq: „Aliasullunga angalaarpunga ulloq tamaat.“ (Tussiaat 38:7) Oqaluttuani ikittunnguani taakkunani erseqqippoq angutit arnallu Guutimik mianerinnittut kristumiut sioqqullugit inuusut isumatsangaartarsimasut.

4. Ullumikkut kristumiunik ’nikallortoqartarnera’ sooq tupinnanngila?

⁴ Kristumiummi? Paulusip Thessalonikamiut ’nikallortunik tuppallersaaqqunissaat’ pisariaqartutut isigisimavaa. (1 Thessalonikamiut 5:14, 1900/1961) Qinerlerfissiami allassimasoqarpoq grækerit oqaasianni „nikallortut“-mik nutserneqarsimasumi pineqarsinnaasut inuit „inuunermi tatisinernik nanertuuteqarallartut“. Paulusip oqaasiini erserpoq Thessalonikami ilagiinniittut tanitat ilaat nikallungasimasut. Ullumikkut aamma kristumiut ilaat nikallungapput. Sooq? Pissutaasartut pingasut misissoriartigik.

Naammalluinnanngissuserput nikalluutigisinnaavarput

5, 6. Romamiunut allakkat 7:22-25-mi allassimasut sumik tuppallersaatissarsiffigisinnaavavut?

⁵ Ajortunngorsimangaaramik ileqqussatigut ’sianigisaaruttutut’ pinnatik kristumiut naammalluinnanngissusertik erloqissutigisarpaat. (Efesosimiut 4:19, 1900/1961) Taakku immaqa Paulusip misigisimaneratut misigipput, taanna ima allammat: „Guutimmi inatsisai inuutsikkut ilorlikkut nuannarigaluarpakka, kisianni paasisarpara inatsisinik allanik avatinniittoqartoq, taakkulu inatsisinut eqqarsaatinniittunut akerartortuusut ajortillu inatsisaanit avatinniittunit tiguagaatillunga.“ Taava ima oqarpoq: „Uangannguakkuluk!“ — Romamiut 7:22-24.

⁶ Aamma illit taamatut misiginikuuit? Nammineq naammalluinnanngissutinik eqqummaariffiginninneq kukkunerunngilaq, tamannami ajortip ilungersunarneranik uagutsinnut eqqaasitsissutaasinnaagami ajortumillu uumiginninnissamut aalajangiusimanninnerulissutigisinnaagatsigu. Imaanngilarli kukkussutivut aliasuutigiuaannavillugit inuussasugut. Naalliunnini oqaatigereerlugu Paulusi ima nangippoq: „Guuti qujanarsili Jiisusi-Kristusikkut Naalakkatsigut!“ (Romamiut 7:25) Aap, Paulusip qularinngilaa Jiisusip aava kuineqartoq ajortimit kingornussaminit utertinneqaatigisinnaallugu. — Romamiut 5:18.

7. Nammineq ajortulioqqajaasarnerit nikallungassutigigaanni qanoq iliortoqarsinnaava?

⁷ Ajortiliussutsit nanertuutigaajuk? Taava apustili Johannesip oqaasii uku tuppallersaatigisinnaavatit: „Ajortuliortoqassappat illersortissaqarpugut Ataatami, tassa Jiisusi-Kristusimik iluartuusumik; taannalu pilliutaavoq saammaannartitsissut uaguinnaanngitsut silarsuulli ajortai tamaasa pillugit.“ (1 Johannesi 2:1, 2) Ajortulioqqajaasarnitit  nikalluutigisarukkit, taava imminut eqqaasittuarit ajortuliortut, inuit naammalluinnanngitsut, pillugit Jiisusi toqusoq. Naluneqanngitsutummi inuit „tamarmik ajortuliorput Guutimit naalannassuseq pigiunnaarlugu“. — Romamiut 3:23.

8, 9. Imminut eqqartuuteqqajaasarnerput sooq akiortariaqarparput?

⁸ Ajortuliorujussuarnikuuit? Taamaappat qularnanngitsumik tamanna Jehovamut qinunikkut saqqummiussimassavat, immaqa arlaleriarlutit. Utoqqaanertanit anersaakkut ikiorneqareerputit. (Jaaku 5:14, 15) Immaqa ilumoorlutit allamik isumataarputit taamaammallu ilagiinniiginnarlutit. Imaluunniit piffissap ilaa Guutip peqatigiissortaa qimappat, kingusinnerusukkulli isumataarputit ilerasuutaaruteqqillutillu. Pisimasut taakku arlaanni ajortuliat immaqa qamuuna anniaatigaat. Taamaappat eqqaamajuk Jehova ilumoorlutik peqqissimisunik ’isumakkeerfiginnittuartartoq’. (Esaja 55:7) Aamma pillagassaatitaajuartussatut misiginissat kissaatiginngilaa. Saatanimuna taamatut misigitikkumagaatit. (2 Korinthimiut 2:7, 10, 11) Diaavulu piuneerussaassaaq tamanna pisassarigamiuk, aamma taassuma isumaqalerserusuppaatit illittaaq taamatut eqqartuunneqartariaqartutit. (Saqqummersitat 20:10) Uppernerit Saatanimit aserorneqarteqinagu. (Efesosimiut 6:11) Tamatumunnga tunngatillugu taanna ’assortoruk’, soorluttaaq allanut tunngatillugu assortortarit. — 1 Petrusi 5:9.

⁹ Saqqummersitat 12:10-mi Saatani taaneqarpoq ’qatanngutitta unnerluutiginnittaattut’. Aap, „ullukkut unnuakkullu“ kristumiunik tanitanik Guutimut unnerluutiginnittarpoq. Versi taanna eqqarsaatigigaangakku ilimanarpoq paasisarit Saatani nuannaassasoq imminut eqqartuullutillu pillagassaatikkuit, massa Jehovap eqqartuutinngikkaluaraatit pillagassaatinngikkaluaraatillu. (1 Johannesi 3:19-22) Sooq kukkunitit pillugit imminut ima naalliutsitsigissavit uniinnarusulerlutit? Guutimut attaveqarnerit Saatanimut aserorneqarteqinagu. Jehovap ’nallittuisuullunilu saammaasuuneranik, kamajaatsuullunilu ilumoornermik peqangaartuuneranik’ Diaavulumit puiortitaanngisaannarit. — 2 Mosesi 34:6.

Pisinnaasatta killeqarnerat nikalluutigisinnaavarput

10. Pisinnaasatta killeqarnerat uagutsinnut qanoq nikalluutaasinnaagami?

¹⁰ Kristumiut ilaat nikallortarput namminneq kissaatigisamittut Guutimut kiffartortigisinnaannginnamik. Aamma illit taamatut misigivit? Nappaatit, utoqqalineq allalluunniit pissutigalugit siornatigutut oqaluusseqataatigisinnaajunnaarpit? Ilumoorpoq uagut kristumiut Guutimut kiffartorniarluta piffissamik piseqqulluta kajumissaarneqartugut. (Efesosimiut 5:15, 16) Taavami kiffartornermi iliuuseqarsinnaajunnaavissimaguit taamaattumillu nikallungallutit?

11. Paulusip siunnersuutaa Galatiamiunut allakkat 6:4-miittoq qanoq iluaqutigisinnaavarput?

¹¹ Biibilimi kajumissaarneqarpugut ’eqeersimaarunnaaqqunata, malinniaqqullugilli uppernikkut nikallujuinnikkullu Guutip neriorsuutigisaanik kingornussisussat’. (Hebræerit 6:12) Taamaaliorsinnaavugut aatsaat taakku maligassiuilluarnerat qimerloorutsigu uppernerallu ilaarniarsarigutsigu. Iluaqutiginavianngilarpulli imminut isornartorsiorluta allanut naleqqiuttarutta suliavullu naammagisinnaanngikkutsigit. Taamaattumik Paulusip siunnersuutaa una malittariaqarparput: „Kialuunniit nammineq suliani misilissavaa, sulianilu namminiinnaq usorsisimaarutigissavai allanut naleqqiunnagit.“ — Galatiamiut 6:4.

12. Sooq Jehovamut kiffartornitsinnik ’usorsisimaarutiginnissinnaavugut’?

¹² Kristumiut ’usorsisimaarnissaminnut’ pissutissaqarluarput — aamma ilungersunartumik peqqiilliuuteqaraluarunilluunniit. Biibilimi ima uppernarsaavigineqarpugut: „Guutip iluaatsuunnginnami puiorsimanngilai suliasi asanninnersilu aqqanut takutissimasarsi.“ (Hebræerit 6:10) Pissutsit qanoq iliuuseqarfigisinnaanngisatit pissutaallutik siornatigutut kiffartortiginissat artornarsisimava? Taava immaqa Jehovap ikiuineratigut oqaluusseriaatsit allat, soorlu oqarasuaatikkut allakkatigulluunniit oqaluussineq, atorluarniarnerusinnaavatit. Qularissanngilat uummatikkut iluunngarlutit kiffartornerit aamma Jehovamut inoqatinnullu  asanninnermik ersersitsinerit pillugu Jehovap pilluaqqujumaaraatit. — Matthæusi 22:36-40.

’Ullut atugarliungaarfiusut’ nikalluutigisinnaavavut

13, 14. (a) ’Ullut atugarliungaarfiusut’ pissutigalugit sunik naalliuuteqarsinnaavugut? (b) Sumi ersersinneqarpa ullumikkut inuppassuit ’asanniuitsuusut’?

¹³ Guutip silarsuassaani nutaami naapertuilluassuseqarfiusumi inuunissaq qilanaaraarput, maannakkorpiarli ’ullut atugarliungaarfiusut’ anigoruminaatsut inuuffigaavut. (2 Timotheusi 3:1) Pisut isumakulunnartut aniguisitaanissap qanillineranut ersiutaanerannik ilisimaarinninnerput tuppallersaatigaarput, taamaakkaluartorli pissutsit sunnerneqaatigisarpavut. Imaassinnaavoq suliffissaaleqisutit. Immaqa suliffissarsinissaq ajornakusoorpoq, qaammatillu ingerlatillugit eqqarsalersinnaavutit Jehovap ilumut ajornartorsiutitit isiginerai imaluunniit qinnutitit tusartarnerai. Immaqaluunniit assigiinngisitsinermit eqqugaasimavutit arlaatigulluunniit naapertuilluanngitsuliorfigineqarsimallutit. Aviisit qulequtaasa qissimilaaginnarnerisigut Lotip naapertuilluartup inuit eqqaminiittut inuunerlunnerannit ’atugarliortitaasup’ („nikallortup“, Young’s Literal Translation of the Holy Bible) misigisimaneratut misigilersinnaavugut. — 2 Petrusi 2:7.

¹⁴ Ulluni makkunani kingullerni inuppassuit ’asanniuitsuujumaarnerata’ Biibilimi siulittuutigineqarnerata eqqortuunera miserratigineqarsinnaanngilaq. (2 Timotheusi 3:3) Ilaqutariit iluanni asanniuitsuuneq imaluunniit tunniusimaqatigiinnginneq nalinginnaasorujussuuvoq. Atuakkami Family Violence-imi ima allassimasoqarpoq: „Ilaquttamit toqutaanissaq, timikkut eqqarsartaatsikkulluunniit naalliutsitaanissaq kinguaassiuutitigulluunniit atornerlunneqarnissaq ilaqutaanngitsunit taamatut pineqarnissaminngarnit ilimanaateqarnerorpasippoq. Angerlarsimaffik asaneqartutut misigiffiusussaagaluarlunilu toqqissisimaffiusussaagaluaq, inersimasut meeqqallu ilaannut allanit tamanit navianarnerpaavoq.“ Angerlarsimaffimmi pissutsit ajortut annilaangarujussualersitsisinnaasarlutillu isumatsassimalersitsisinnaapput. Illit taamatut atugaqaruit qanoq iliorsinnaavit?

15. Jehovap asanninnera inuup kialuunniit asanninneranik qanoq akimuisarpa?

¹⁵ Daavi ima erinarsorpoq: „Ataatama anaanamalu qimakkaluarpannga [Jehovap] ilasiarissavaanga.“ (Tussiaat 27:10, 1990) Tuppallersaataavoq nalunagu Jehovap asanninnera angajoqqaat nunamiusut asanninnerannik akimuisartoq! Angajoqqaanit akuerineqannginneq, ajortumik pineqarneq qimagaanerluunniit qanorluunniit annernartigigaluarpat, tamanna pissutigalugu Jehovap isumassunnginnerulernavianngilaatit. (Romamiut 8:38, 39) Eqqaamajuk Guutip asasani kajungilersittarai. (Johannesi 3:16; 6:44) Inoqatinnit qanorluunniit  pineqarsimagaluaruit, Ataatavit qilammiusup asavaatit!

Isumatsassimannginnerulerniarlutit illit nammineq qanoq iliorsinnaasutit

16, 17. Isumatsassimagaanni anersaakkut nukittujuarniarluni qanoq iliortoqarsinnaava?

¹⁶ Isumatsassimanerit akiorniarlugu nammineq iliuuseqarsinnaavutit. Assersuutigalugu kristumiutut kiffartornermi sapinngisat tamaat suliniuteqarit, naleqquttumillu pilersaarusiorit taannalu malillugu. Guutip oqaasianik eqqarsaatiginneqqissaartarit, pingaartumik nikallunganerit pillugu sapilersutut misigigaangavit. Tussiaasiortoq ima erinarsorpoq: „Oqaraangama: ’Patajalerput isikkakka’, unneqqarissutsivit najummisarpaanga, [Jehova]. Eqqarsaatima eqqissiviilliortileraangannga tuppallersaanerpit nuannaalersittarpaanga.“ (Tussiaat 94:18, 19) Biibilimik atuartuarneq oqaatsit tuppallersaataasut eqqarsaatillu qiimmassaataasut eqqarsaatinniitinnissaannut iluaqutigissavat.

¹⁷ Qinuneq aamma pingaaruteqarluinnarpoq. Misigissutsitit tamaasa oqaasertassaqartinngikkaluarukkilluunniit Jehovap nalunngilaa suut oqaatiginiarsarineritit. (Romamiut 8:26, 27) Tussiaasiortoq ima neriorsueqqissaarpoq: „Nanertuutigisat [Jehovamut] tunniuguk, taava isumagiumaarpaatit. Iluartoq patajatinngisaannassavaa.“ — Tussiaat 55:23.

18. Isumatsassimaneq akiorniarlugu qanoq iliortoqarsinnaava?

¹⁸ Inuit ilaat nikallorujussuaqqanertik pissutigalugu isumatsassimasarput. * Nikallorujussuaqqaguit, taava eqqarsaatigikkit Guutip silarsuassaa nutaaq imalu oqartarunnaarfissaq: „Napparsimavunga!“ (Esaja 33:24) Sivisujaartumik isumatsassimasimaguit taava immaqa immikkut ilisimasalinnit ikiorneqarnissat pisariaqartippat. (Matthæusi 9:12) Aamma pingaaruteqarpoq timikkut peqqissutsinnik soqutiginninnissat. Immaqa peqqinnartunik nerisaqarneq timersortarnerlu iluaqutigisinnaavatit. Naammattumik sinittarit. Fjernsynerniarlutit innarnaveersaartarnak, aamma sunngiffimmi sammisassat aliikkutassallu timikkut misigissutsikkullu qasusaataasut samminaveersaartakkit. Guutimut kiffartorneq aallunnerpaasaruk! Piffissaq Guutip ’qullinnik tamanik isinnit allarteriffissaa’ suli nalliutinngikkaluarpoq, pinertusaarnissamulli ikiussavaatit. — Saqqummersitat 21:4; 1 Korinthimiut 10:13.

„Guutip assaata pissarsuup ataani“ inuuneq

19. Jehovap naalliuttut qanoq neriorsorpai?

¹⁹ Biibilimi ersersinneqarpoq naapertuilluartoq ajunaarnernik amerlasuunik eqqorneqarsinnaasoq, aammali tassani neriorsorneqarpugut taanna ’Jehovap tamakkunannga tamanit annaattaraa’. (Tussiaat 34:20) Guuti qanoq ililluni taamaaliortarpa? Paulusip ’kapinartup timiminut kapputtup’ peerneqarnissaa qinnutigisaqattaarmagu Jehovap ima akivaa: „Pissaanera sanngiissutsimi [naammatsittarpoq].“ (2 Korinthimiut 12:7-9) Jehovap Paulusi qanoq neriorsorpaa, illillu qanoq neriorsorpaatit? Ullumikkut tupinnartuliornissani neriorsuutiginngilaa, neriorsuutigaali pinertusaarnissamut nukissaqartinnissat.

20. Petrusimik allakkat siulliit 5:6, 7 naapertorlugu naalliuteqarnitsinni suna qularissanngilarput?

²⁰ Apustili Petrusi ima allappoq: „Guutip assaata pissarsuup ataani qanilaartuugitsi, taava taassuma piffissaq nalliuppat akitsisissavaasi, isumakuluutisilu tamaasa taassumunnga pisissigit isumassormasi.“ (1 Petrusi 5:6, 7) Jehovap isumassoramisigut imminiinngisaannassavaatigut. Misilinneqarnitsinni annertoqqusersussavaatigut. Eqqaamajuk kristumiut aalajaatsut ’Guutip assaata pissarsuup ataaniinnerat’. Jehovap imminut kiffartornitsinni pinertusaarnissamut nakussatsittarpaatigut. Taanna ilumoorfigigutsigu anersaakkut aaqqinneqarsinnaanngitsumik sumilluunniit ajoqusernavianngilagut. Taamaattumik Guuti ilumoorfigiuartigu, silarsuassami nutaami neriorsuutigisaani naassaanngitsumik inuusinnaaniassagatta. Taava aamma ulloq taassuma naalliuttumik ataavartumik annaassiffissaa misigissavarput! (wE 7/15 06)

[Quppernerup ataani ilanngussat]

Eqqaamavigit?

• Sooq Jehovamut kiffaasut allaat aliasuttarpat?

• Guutip kiffaasa ilaasa isumatsassimasarnerannut pissutaasartut ilaannik eqqaasaqarit.

• Isumakuluutivut naammagittarluta atorsinnaaniassagatsigit Jehovap qanoq ikiortarpaatigut?

• ’Guutip assaata pissarsuup ataaniinnerput’ qanoq paasisariaqarpa?

[Atuaqqissaarnermi apeqqutit]

[Qupp. 29-mi assiliartat]

Jehovap innuttai naalliuuteqartaraluarlutik nuannaarnissaminnut pissutissaqarput

[Qupp. 31-mi assiliartaq]

Oqarasuaatikkut oqaluussineq uummatikkut iluunngarlutit Jehovamut kiffartornissannut periarfissavit ilagaat