Jehovap peqatigiissortaa qujamasuutigisigu

„Qaarsillartitaavugut illuit ajunngitsuutaanik.“ — TUSSIAAT 65:5.

1, 2. (a) Naalaffimmut atatillugu aaqqissuussinerit Guutip innuttaanut qanoq sunniuteqassappat? (b) Qanoq Daavi naalaffiliornermik tapersersuiva?

DAAVI Allakkani Hebræerisuuni inuit oqaluttuarineqartut maluginiarnarnerpaartaasa ilagaat. Itsaq Israelimi savanik paarsisoq, nipilersortartoq, pruffiiti kunngilu taanna Jehova Guutimik tatiginnilluinnartuuvoq. Daavip Jehovamut qanittumik attaveqarnini pissutigalugu taassuminnga illuliuussinissani kissaatigilerpaa. Illu, imaluunniit naalaffik, taanna Israelimi pallorfiginninnermut ilumoortumut qitiusussaassaaq. Daavip nalunngilaa naalaffimmik aaqqissuussaq Guutip innuttaanut nuannaarutaallunilu pilluaqqussutaassasoq, taamaattumillu ima erinarsorpoq: „Pilluarpoq illit [Jehova] najortigiumallugu qinikkat ineqartitallu silarliutinni. Qaarsillartitaavugut illuit ajunngitsuutaanik, naalaffippit illernassusianik.“ — Tussiaat 65:5.

² Daavili Jehovap illuata sananeqarnerani siuttuunissamut akuerineqanngilaq. Immikkut pisinnaatitaaffik tamanna taassuma erneranut Salomomut tunniunneqarpoq. Daavip immikkut pisinnaatitaaffiup tamatuma nammineq kissaatigingaakkami allamut tunniunneqarnera naammagittaalliutiginngilaa. Taassumunnga pingaarnerpaaq tassaavoq naalaffiup sananeqarnissaa. Suliassamik uummatikkut iluunngarluni tapersersuivoq naalaffiliornissamik pilersaarutit nammineq Jehovamit pisimasani Salomomut tunniullugit. Aamma Daavip Levikkut tusindillit nikittaallutik kiffartortarnissaat aaqqissuuppaa naalaffiliornermullu kuultingaatsiamik sølvingaatsiamillu tunissuteqarluni. — 1 Nalunaarsuutit 17:1, 4, 11, 12; 23:3-6; 28:11, 12; 29:1-5.

3. Guutip kiffai pallorfiginninnermik ilumoortumik aaqqissuussinermut qanoq isiginnittaaseqarpat?

³ Israelikkut aalajaatsortaasa Guutip illuani pallorfiginninnermut ilumoortumut atatillugu aaqqissuussat tapersersorpaat. Ullumikkut Jehovamut kiffaagatta uaguttaaq Jehovap peqatigiissortaani nunarsuarmiittumi pallorfiginninnermik ilumoortumik aaqqissuussinermik tapersersuivugut. Taamaalilluta  ersersittarparput Daavitut isiginnittaaseqarluta. Naammagittaallioqqajaasuunngilagut. Guutip peqatigiissortaata ilisarnaatai nuannersut pingaarnerutippavut. Nuannersorpassuit qujamasuutigisinnaasavut eqqarsaatiginikuuigit? Taakkua ilaat misissoriartigik.

Siuttuusunik qujamasuutiginninneq

4, 5. (a) ’Kiffap ilumoorlunilu silatuup’ imminut suliassiissutigineqartoq qanoq suliarisarpaa? (b) Jehovap Nalunaajaasuisa ilaat anersaakkut nerisassanut pisartakkaminnut tunngatillugu qanoq misigippat?

⁴ ’Kiffamik ilumoorlunilu silatuumik’, Jiisusi Kristusip pigisaminut nunarsuarmiittunut tamanut paarsisunngortitaanik, qujamasuutiginninnissamut pissutissaqarluarpugut. Inussiaqatigiit, kristumiuusut tanitat, nutaarsiassamik nuannersumik oqaluussissutiginninnermi siuttuupput, ataatsimiinnerit Guutimik pallorfiginniffigisartakkavut piareersartarpaat atuagassanillu Biibililersaarutinik oqaatsinut assigiinngitsunut 400-nit amerlanerusunut saqqummersitsisarlutik. Nunarsuaq tamakkerlugu inuit millionillit anersaakkut ’nerisassanik piffissaq eqqorlugu tunniunneqartartunik’ taakkuninnga qujamasullutik ilangiisarput. (Matthæusi 24:45-47) Pisakkatsinnik tamakkuninnga naammagittaalliutiginninnissamut pissutissaqanngilluinnarpugut.

⁵ Jehovamut nalunaajaasup arnap utoqqaap Elfimik atillip ukiorpassuarni siunnersuutit Biibilimeersut atuakkaniittut atuagassianiittullu inussiaqatigiinneersuniittut malikkaangamigit tuppallersaatigalugillu nakussatsissutigisarsimavai. Elfi qujamasungaarnini kajumississutigalugu ima allappoq: „Jehovap peqatigiissortaa piusimanngitsuuppat qanoq iliussagaluarpunga?“ Aamma Peter Irmgardilu ukiorpassuarni Guutimut kiffartorsimapput. Irmgardip atuakkat atuagassiallu „Jehovap peqatigiissortaanit asannittumit isumassuisumillu“ saqqummersinneqartartut tamaasa qujamasuutigai. Atuakkat atuagassiallu ilarpassui inunnut immikkut pisariaqartitsisunut, soorlu isigiarsuttunut tusilartunullu, immikkut naqiterneqartarput.

6, 7. (a) Nunarsuaq tamakkerlugu ilagiit qanoq nakkutigineqartarpat? (b) Jehovap peqatigiissortaa nunarsuarmiittoq pillugu qanoq oqartoqarsimava?

⁶ Jehovap Nalunaajaasuisa Siulersuisoqatigiivi, angutit tanitat ikittunnguit Jehovap Nalunaajaasuisa qullersaqarfianni Brooklynimi New Yorkimiittumi kiffartortut, ’kiffap ilumoortup’ sinniisigai. Siulersuisoqatigiit Jehovamut kiffaasunik misilittagaqarluartunik immikkoortortaqarfinni, nunarsuaq tamakkerlugu ilagiinni 98.000-init amerlanerusuni suliarineqartunik nakkutilliiffiusuni, kiffartortussanik toqqaasarput. Angutit piumasaqaatinik Biibilimeersunik naammassinnittut ilagiinni taakkunani utoqqaanertatut ilagiinnilu kiffartortutut toqqarneqartarput. (1 Timotheusi 3:1-9,  12, 13) Utoqqaanertat siuttuupput, aamma Guutip savaatai asannittumik paaralugit nakkutigaat. Savaatinut taakkununnga ilaaneq ’qatanngutigiissutullu peqatigiit tamarmik’ asaqatigiinnerannik ataasiussuseqarnerannillu misigisaqarneq pilluaqqussutaangaarpoq! — 1 Petrusi 2:17, NV; 1 Petrusi 5:2, 3.

⁷ Taakkununnga ilaasut ilarpassui naammagittaalliornatik utoqqaanertanit asannittumik anersaakkut siunnersorneqartarnerminnik qujamasuutiginnipput. Eqqarsaatigeriaruk Birgit, nuliaasoq kristumiu 30-t sinnerlugit ukiulik. Inuusuttuaraalluni ikinngutipalaaqalersimavoq ajortuliungajassimallunilu. Utoqqaanertalli Biibili tunngavigalugu siunnersuutaat paasiuminartut uppeqatimilu tapersersuinerat iluaqutigalugit navianartorsiorunnaarpoq. Birgit maanna qanoq misigiva? Ima oqarpoq: „Jehovap peqatigiissortaanut nuanningaartumut suli ilaagama qujamasoqaanga.“ Angut inuusuttoq 17-inik ukiulik Andreasimik atilik ima oqarpoq: „Taanna ilumut Jehovap peqatigiissortaraa, peqatigiissortaq silarsuarmi pitsaanerpaaq.“ Jehovap peqatigiissortaata nunarsuarmiittup ilisarnaatai nuannersut tamaasa qujamasuutigissannginnerpavut?

Siuttuusut naammalluinnanngitsuupput

8, 9. Daavip nalaani inuusut ilaat suppat, taakkualu iliuusiinut Daavi qanoq periarpa?

⁸ Pallorfiginninnermi ilumoortumi siuttuusussatut toqqarneqarsimasut soorunalimi naammalluinnanngitsuupput. Tamavimmik kukkusarput, ilaallu sanngiillioqqajaajuarput akiorniarsuataakkaminnik. Tamanna toqqissisimajunnaarutigisariaqarparput? Naamik. Itsaq Israelimi inuit pingaarutilimmik akisussaaffilerneqarsimasut allaat kukkorujussuartarsimapput. Assersuutigalugu Daavi inuusuttuusoq kunngi Saulimut naalliuuteqartumut nipilersoriartoqquneqarpoq, Sauli isumamigut eqqissiniassammat. Kingusinnerusukkulli Saulip Daavi toqoriaraluarpaa, naggataatigullu Daavi inuuinnarumalluni qimaasariaqarpoq. — 1 Samueli 16:14-23; 18:10-12; 19:18; 20:32, 33; 22:1-5.

⁹ Israelikkut ilaasa allat Daavi ilumuunngitsuliorfigaat. Daavip sakkutuuisa naalagaanertaata Joabip Saulip ilaqutaa, Abneri, toquppaa. Daavip ernera Absalomi imminut kunnginngortinniarluni ataataminut perlulioqatigiinnianik pilersitsivoq. Aamma Daavi siunnersortiminit tatigisaminit Akitofelimit killuutigineqarpoq. (2 Samueli 3:22-30; 15:1-17, 31; 16:15, 21) Tamakku tamaasa misigigaluarlugit Daavi narrutsannanilu naammagittaalliunngilaq; aamma pallorfiginninneq ilumoortoq tununngisaannarpaa. Daavi atugarliornermini Jehovamut qanittumik attaveqartuaannarpoq taamanilu Saulimit qimaagami ajunngitsumik isiginnittaaseqarnermisut isiginnittaaseqartuarluni. Taamani Daavi ima erinarsorpoq: „Saammaannga Guuti, saammaannga. Ilinni qimarnguffissarsiorpunga, suluit alanngigaanni qimarnguffissarsiorpunga navianartorsiornera qaangiutserlugu.“ — Tussiaat 57:2.

10, 11. Arnaq kristumiu Gertrudimik atilik inuusuttuulluni sumik nalaataqarpa, uppeqatimilu naammalluinnanngissutaat pillugit qanoq oqarpa?

¹⁰ Ullumikkut Guutip peqatigiissortaani taamatut ilumuunngitsuliortoqartanngilaq. Jehovalluunniit, taassumaluunniit inngiliisa anersaakkut ittumilluunniit savanik paarsisut inuit killuussigajuttuullutillu ajortut ilagiinni kristumiuniinnissaat akuerinavianngilaat. Taamaakkaluartorli uagut nammineq inuttut naammalluinnanngissutsitsinnit aamma uppeqatitta inuttut naammalluinnanngissusiannit tamatta eqqorneqartarpugut.

¹¹ Gertrud, ukiorpassuarni aalajaalluni Jehovamut kiffartortoq, inuusuttuulluni peqquserluttutut piffissaq tamaat oqaluussisartuusaartutut eqqunngitsumik unnerluutigineqartarpoq. Qanoq piva? Taamatut pineqarnini naammagittaalliutigaa? Naamik. 2003-mi 91-inik ukioqarluni toqunngitsiarnermini inuunini kingumut eqqarsaatigaa imalu oqarluni: „Misigisakka taakku kingusinnerusukkullu misigisakka pissutigalugit paasivara inuit ataasiakkaat kukkussuteqartaraluartut, Jehova uagut inuit naammalluinnanngitsut atorluta suliaminik pingaaruteqangaartumik siuarsaasoq.“ Gertrud  uppeqatimi naammalluinnanngissutaannit eqqorneqaraangami qamannga pisumik qinulluni Jehova saaffigisarpaa.

12. (a) Ukiuni hundredelinni siullerni kristumiut ilaat qanoq ajortumik isiginnittaaseqarpat? (b) Suut pingaarnerutittariaqarpavut?

¹² Kristumiut ilumoorfiginnillutillu aallussilluarnerpaat allaat naammalluinnanngitsuummata, kiffartortoq toqqagaq kukkussuteqaraangat ’suliassavut suliariuartariaqarpavut naammagittaalliornata’. (Filippimiut 2:14) Ukiuni hundredelinni siullerni ilagiinni kristumiuniittut ilaasa ikittunnguit isiginnittaaserisimasaat ajortoq ilaaraluarutsigu qanoq alianartigissagaluarpa! Ajoqersugaq Judasi naapertorlugu taamanikkut eqqunngitsumik ilinniartitsisut ’Jehovap naalagaassusia asiginnarpaat pissaasullu qutsissumiittut mitaatigalugit’. Aamma ’naammagittaalliorput atugarisaminnillu ajorneraallutik’. (Judasi 8, 16) Naammagittaalliortut ajorneraasullu ilaarnaveersaartigit nuannersullu ’kiffaq ilumoortoq’ aqqutigalugu pisakkavut pingaarnerutillugit. Jehovap peqatigiissortaata ilisarnaatai nuannersut pingaartitsigik ’suliassavullu suliariuarlugit naammagittaalliornata’.

„Oqaasii sakkortoqaat“

13. Inuit ilaasa Jiisusip ajoqersuutaa aalajangersimasoq qanoq periarfigaat?

¹³ Ukiuni hundredelinni siullerni inuit ilaasa ilagiinni kiffartortut toqqakkat naammagittaalliutigigaat, allat Jiisusip ajoqersuutai naammagittaalliutigaat. Johannesi 6:48-69-imi allassimasutut Jiisusi ima oqarpoq: „Uanga uininnik nerisoq uangalu aannik imertoq naassaanngitsumik inuuneqarpoq.“ Taamatut oqartoq tusareerlugu „ajoqersugaasa ilarpassui . . . oqarput: ’Oqaasii sakkortoqaat; kikkut taamaattut tusarnaarumasinnaavaat?’“ Jiisusip nalunngilaa „ajoqersukkami tamanna oqalorujuutigigaat [naammagittaalliutigigaat, NV]“. Nangilluni ima allassimasoqarpoq: „Tamatuma kingorna ajoqersugaasa ilarpassuisa qimappaat angalaqatigiunnaarlugulu.“ Ajoqersukkalli ilaannaat naammagittaalliorput. Maluginiariaruk qanoq pisoqarnersoq Jiisusip ajoqersukkat aqqaneq-marluk ima aperimmagit: „Aamma ilissi qimanniarpisinga?“ Apustili Petrusi ima akivoq: „Naalagaq, kina ornissagatsigu? Illit oqaatsinik naassaanngitsumik inuussutaasunik pigisaqarputit, upperpugullu nalunagulu illit tassaasutit Guutip illernartua.“

14, 15. (a) Sooq Guutip innuttaasa ilaat ikittunnguit kristumiut ajoqersuutaasa ilaannik naammagittaalliutiginnittarpat? (b) Emanuelip misigisaa qanoq ilinniutigisinnaavarput?

¹⁴ Nalitsinni Guutip innuttaasa ilaat ikittunnguit kristumiut ajoqersuutaasa ilaannik naammagittaalliutiginnissimapput Jehovallu peqatigiissortaa nunarsuarmiittoq naammagittaalliorfigisimallugu. Sooq taama pisoqartarpa? Taamatut naammagittaalliortarneq Guutip periaasianik paasinninnginnermik pissuteqarajuppoq. Pinngortitsisup sallusuissut innuttaminut paasinarsisikkiartuaartarpaa. Taamaattumik sallusuissummik paasinninnerput ilaannikkut pinngitsoorani naqqinneqartariaqartarpoq. Jehovap innuttaasa amerlanersaasa eqqornerusumik paasinnittoqaraangat tamanna nuannaarutigisarpaat. Ilaalli ikittunnguit ’iluarniarpallaalertarput’ allannguutillu ajuallaatigalugit. (Oqaluussisartup oqaasii 7:16) Tamanna ilaatigut makitanermik pissuteqarsinnaavoq, ilaallu siulersorneqarumanngissutsiminnit napitinneqartarput. Tamatumunnga sunaluunniit pissutaagaluarpat taamatut naammagittaalliortarneq ulorianarpoq, silarsuarmut utissutigisinnaagatsigu silarsuarmiittutullu iliulissutigisinnaagatsigu.

¹⁵ Jehovap Nalunaajaasuisa ilaata Emanuelimik atillip atuakkani atuagassianilu ’kiffamit ilumoorlunilu silatuumeersuniittut’ atuartakkami ilaat isornartorsiortarsimavai. (Matthæusi 24:45) Kristumiutut atuagaativut atuagassiaativullu atuartarunnaarpai, ilaannilu utoqqaanertat najukkamini ilagiinniittut nalunaarfigai Jehovamut nalunaajaasoorusukkunnaarluni. Sivitsunngitsorli Emanuelip paasilerpaa Jehovap peqatigiissortaanit ajoqersuutigineqartut ilumut ilumoortuusut. Qatanngutit attaveqarfigai kukkusimaninilu nassuerutigalugu, ilagiinnullu ilanngutiteqqinneqarpoq. Tamanna  taassuma nuannaaleqqinneranik kinguneqarpoq.

16. Kristumiut ajoqersuutigisaannik aalajangersimasunik nalornissuteqarunnaarnissamut suut iluaqutigisinnaavavut?

¹⁶ Taavami Jehovap innuttaasa ajoqersuutaasa ilaat pillugit nalornissuteqarnerput pissutigalugu naammagittaalliorusutsakkutta? Taava naammagittaalliunngikkisa. Immaqa „kiffaq ilumoortoq“ piffissap ingerlanerani apeqqutitsinnut akissutaasunik nalornissutigisatsinnillu paasinarsisitsisunik saqqummersitsissaaq. Utoqqaanertanut kristumiunut ikiortissarsiorneq silatusaarneruvoq. (Judasi 22, 23) Aamma Jehovamut qinuneq, nammineq atuaqqissaartarneq uppeqatinillu anersaakkut ittunik pingaartitsisunik peqateqartarneq nalorniunnaarnissamut iluaqutigisinnaavavut. Aamma tamakku iliuuserisarutsigik sallusuissutinik Biibilimeersunik uppernermut nakussatsinnartunik, Jehovap tusarliisartui aqqutigalugit paasisatsinnik, pingaartitsinerulissutigisinnaavavut.

Isumalluartumik isiginnittaaseqartuarit

17, 18. Naammagittaalliornata isiginnittaaseq qanoq ittoq ineriartortittariaqarparput?

¹⁷ Nassuerutigisariaqarpoq inuit naammalluinnanngitsut inunnguuseralugu ajortulioqqajaasarmata, ilaallu naammagittaallioqqajaasupilussuusinnaasarput, tamatumunnga pissutissaqanngikkaluarlutik allaat. (1 Mosesi 8:21; Romamiut 5:12) Naammagittaalliortuarnerli ileqquliutiinnarutsigu Jehova Guutimut attaveqarnerput annaariaannanngussavarput. Taamaammat sunilluunniit naammagittaalliutiginneqqajaasarnerput akiortariaqarparput.

¹⁸ Ilagiinni pissutsinik naammagittaalliutiginninnata isumalluartumik isiginnittaaseqartuarnissaq Jehovamillu ataqqinningaalersitsisunik uagutsinnillu uppernikkut ulapputeqartuartitsillutillu, oqimaaqatigiissumik isiginnittaaseqartuartitsillutillu, nuannaartitsillutillu peqqissuutitsisunik ileqquliussinissaq pitsaassaaq. (1 Korinthimiut 15:58; Titusi 2:1-5) Jehovap peqatigiissortaminiittut suut tamaasa pissaaneqarfigai, aamma Jiisusip ilagiinni tamani qanoq ingerlasoqarnera arajutsisimanngilaa, soorluttaaq ukiuni hundredelinni siullerni taamaassimasoq. (Saqqummersitat 1:10, 11) Taamaammat Guuti ilagiinnullu niaquusoq Kristusi naammagittarluta utaqqitigit. Paarsisut akisussaassutsiminnik ilisimannittut aaqqinneqartariaqarsinnaasunik aaqqiinissamut atorneqarsinnaapput. — Tussiaat 43:5; Kolossemiut 1:18; Titusi 1:5.

19. Guutip naalagaaffiata pissutsinik inuit atugaannik tamakkiisumik aqutsilernissaa nalliutserlugu suut isiginiarnerusariaqarpavut?

¹⁹ Qanittukkut pissutsit aaqqissuussaanerat ajortoq maanna atuuttoq suujunnaassaaq, naalagaaffillu Missiarsikkoortoq pissutsinik inuit atugaannik tamakkiisumik aqutsilissaaq. Tamanna nalliutserlugu tamatta immikkut isumalluartumik isiginnittaaseqartuarnissarput pingaaruteqarluinnarpoq! Tamanna uppeqatitta kukkussutaannik isiginninniannginnissamut pissusiinillu ajunngitsunik takunninnissamut iluaqutigissavarput. Taakku pissusii ajunngitsut isiginiarnerugutsigit nuannaalissaagut. Taamaalilluta qiimmallutalu anersaakkut ineriartussaagut naammagittaalliorneq pissutigalugu misigissutsikkut qasusoornata.

20. Isumalluartumik isiginnittaaseqarneq sunik pilluaqqussutissartaqassava?

²⁰ Aamma isumalluartumik isiginnittaaseqarnerput iluaqutigalugu eqqaamasinnaassavavut pilluaqqussuterpassuit Jehovap  peqatigiissortaanut nunarsuarmiittumut attaveqarnerput pissutigalugu iluaqutigisartakkavut. Jehovap peqatigiissortaa taanna silarsuarmi kisiartaavoq qilammi nunamilu Kisimi Oqartussaasumik ilumoorfiginnittoq. Illit Guutimik ilumoortutuamik, Jehovamik, pallorfiginnissinnaanermik immikkut pisinnaatitaaffeqarnerit qanoq igaajuk? Qanortoq Daavitut, ima erinarsortutut, isiginnittaaseqarina: „[Illit] qinnutitsinnik tusartartutit. Inuit tamarmik ornissavaatsit. Pilluarpoq illit najortigiumallugu qinikkat ineqartitallu silarliutinni. Qaarsillartitaavugut illuit ajunngitsuutaanik.“ — Tussiaat 65:3, 5. (wE 7/15 06)

Eqqaamavigit?

• Ilagiinni siuttuusut sooq qujamasuutigisariaqarpavut?

• Qatanngutit angutit siuttuusut kukkussuteqaraangata qanoq periartassaagut?

• Biibilimik eqqornerusumik paasinnittoqaraangat tamanna qanoq isiginnittaaseqarfigisariaqarparput?

• Kristumiup nalorniunnaarnissaminut suut iluaqutigisinnaavai?

[Atuaqqissaarnermi apeqqutit]

[Qupp. 24-mi assiliartaq]

Daavip naalaffiliassamut pilersaarutit Salomomut tunniuppai pallorfiginninnerlu ilumoortoq uummatikkut iluunngarluni tapersersorlugu

[Qupp. 27-mi assiliartaq]

Utoqqaanertat kristumiut kajumillutik anersaakkut ikiuisarput