„Naammagittaalliornasi“
„Naammagittaalliornasi“
„Suliassasi suliariniarsigit naammagittaalliornasi.“ — FILIPPIMIUT 2:14.
1, 2. Apustili Paulusip kristumiut Filippimiittut Korinthimiittullu qanoq siunnersorpai, aamma sooq?
UKIUNI hundredelinni siullerni Paulusip ilagiinnut kristumiunut Filippimiittunut allakkamini Guutimit isumassarsiarititaasuni uppeqatini assut nersualaarpai. Tukkortuunerat aallussilluartuunerallu pillugit nersualaarpai ajunngitsuliaannillu nuannaarutiginninnini ersersillugu. Taamaakkaluartoq Paulusip ’naammagittaalliornatik suliassaminnik suliarinnittarnissaannik’ eqqaasippai. (Filippimiut 2:14) Sooq apustilip tamanna kajumissaarutigaa?
2 Paulusip nalunngilaa naammagittaallioqqajaajuarneq qanoq kinguneqarsinnaasoq. Ukiualuit tamatuma siorna ilagiit Korinthimiittut naammagittaalliornerup navianarsinnaaneranik eqqaasippai. Paulusip malugeqquaa Israelikkut inoqajuitsumiitillutik arlaleriarlutik Jehovamik kamatsitsisimanerat. Qanoq? Ajoqutaasunut pilerissuseqarnermikkut, guutipilussiornermikkut kinguaassiuutitigullu inuunerlunnermikkut, Jehovamik misiliinermikkut naammagittaalliornermikkullu. Paulusip Korinthimiut kajumissaarpai oqaluttuat taakku ilinniutigeqqullugit. Taanna ima allappoq: „Naammagittaallioqinasilu taakkua ilaasa naammagittaalliorsimanerattut inngilimillu toqutitsisumit toqutaallutik.“ — 1 Korinthimiut 10:6-11.
3. Naammagittaalliortarneq pillugu misissuineq sooq uagutsinnut ilinniutissaalluassava?
3 Ullumikkut Jehovamut kiffaagatta Filippimi ilagiinniittut isiginnittaaserisimasaannut assingusumik isiginnittaaseqarpugut. Ajunngitsuliornissaq noqqaassutigaarput aamma asaqatigiippugut. (Johannesi 13:34, 35) Naammagittaallioqqajaajuarnerulli itsaq Guutip innuttaasa akornanni ajoqusiisimanera eqqarsaatigalugu, siunnersuummik matuminnga uummammiuliussinissamut pissutissaqarluarpugut: „Suliassasi suliariniarsigit naammagittaalliornasi.“ Naammagittaalliortut pillugit Biibilimi oqaluttuat misissoqqaariartigik. Taakku misissoreerutsigik ullumikkut naammagittaallioqqajaalernaveersaarniarluta naammagittaallioqqajaanerlu ajoqusiinaveersaartinniarlugu qanoq iliorsinnaanersugut misissussavarput.
Inuit ajortut Jehova naammagittaalliorfigaat
4. Israelikkut inoqajuitsumi qanoq naammagittaalliorpat?
4 Oqaaseq hebræerisooq ’naammagittaalliornermik, orulunermilluunniit’ isumaqartoq Israelikkut ukiuni 40-ni inoqajuitsumi ingerlaarnerannut tunngatillugu atorneqarpoq. Israelikkut inuunerminni atukkaminnik ilaannikkut naammaginninneq ajorput, tamannalu ersersittarpaat naammagittaalliornermikkut. Assersuutigalugu Egyptenimi inussiaataanerminnit aniguisinneqarnerminnit sapaatip akunnialui qaangiutiinnartut „ilagiit Israelikkut tamarmik . . . inoqajuitsumiitillutilli naammagittaalliorlutik Mosesimut Aronimullu oqalorujulerput“. Israelikkut nerisassat naammagittaalliutigalugit ima oqarput: „Ajunnginnerusimassagaluarpoq [Jehovap] Egyptenimi toqutiinnarsimappatigut igat neqiliuutit killingini issiasarallaratta naammatsillutalu nerisinnaagallaratta. Ilissili inoqajuitsumut matumunnga ingerlatippatsigut katersorsimasut makku tamaasa perlertinniarlugit.“ — 2 Mosesi 16:1-3.
5. Israelikkut ilumoortumik kina naammagittaalliorfigaat?
5 Israelikkut oqaatigisaannut akerliusumik Jehovap inoqajuitsumi taakkua pisariaqartitaannik isumagai, asannilluni nerisassanik imermillu pilersorlugit. Israelikkut inoqajuitsumi perlerlutik toqunissaannut aarlerinartoqanngilluinnarpoq. Naammagittaannerulli anersaavanik ilumioqangaarlutik annikilliuutitik ingasattajaarlutik naammagittaalliutigilerpaat. Mosesimut Aronimullu naammagittaallioraluartut, Jehovap tamanna imminut naammagittaalliornertut isigaa. Mosesip Israelikkut ima oqarfigai: „[Jehovap] imminerminut oqalorujunnersi tusaavaa. Uagummi suugatta? [Jehova-una] naammagittaalliorfigigissi, uagut pinnata.“ — 2 Mosesi 16:4-8.
6, 7. Mosesimik allakkat sisamaat 14:1-3-mi allassimasutut Israelikkut isumaat qanoq allanngorsimava?
6 Tamatuma kingunitsianngua Israelikkut naammagittaallioqqipput. Mosesip angutit aqqaneq-marluk nunamut neriorsuutigisamut alapernaarsuiartortippai. Taakku ilaat qulit uteramik isumalluarnanngitsumik nalunaaruteqarput. Tamanna qanoq kinguneqarpa? „Israelikkut tamarmik Mosesi Aronilu naammagittaalliorfigalugit oqalorujuuppaat suaartarlutik: ’Egyptenimi toquinnarsimassagaluaratta! Inoqajuitsumiluunniit maani toquinnarsinnaagaluaruttatoq! Soormi [Jehovap] nunamut tassunga [Kana’animut] ingerlanniarpaatigut uffa panamik toqutaasussaasugut arnartavullu meerartavullu akeqqanit tigusarineqartussaallutik? Pitsaanerunnginnerpa Egyptenimut utiinnarutta?’“ — 4 Mosesi 14:1-3.
7 Israelikkut isumaat ila allanngorsimangaarami! Egyptenimit aniguisinneqaramik Immakkullu Aappalaartukkut siulersorneqaramik ima qujamasutsigigaluarput Jehova erinarsorlutik unnersiutigalugu. (2 Mosesi 15:1-21) Inoqajuitsumiinnerulli artornartui atuleramikkit Kana’anikkullu qunugileramikkit qujamasukkunnaarlutik naammagittaatsunngorput. Kiffaanngissuseqarnertik pillugu Guuti qutsaviginagu tunngavissaqanngitsumik ujariatsinerarput Guutilu tamatumunnga pisuutillugu. Taamaammat naammagittaalliornerat Jehovap tunniussaanik qujamasuutiginninnginnerannut ersiutaavoq. Tupinnanngilaq taanna ima oqarmat: „Qanoq sivisutigisumik inuit taakkua ajortut oqalorujullutik naammagittaalliorfigissavaannga?“ — 4 Mosesi 14:27; 21:5.
Ukiuni hundredelinni siullerni naammagittaalliortut
8, 9. Kristumiut Allagaataanni Grækerisuuni naammagittaalliortunik eqqaasaqarit.
8 Misissoreerparput inuit ilaasa kikkut tamarmik tutsaanni naammagittaalliornerat. Jiisusi Kristusili ukiumi 32-mi u.n.k. tupiusaliorfiup nalliussineqarnerani Jerusalemimiimmat „inuit [isertortukkut, 1900/1961] assut oqalliseraat.“ (Johannesi 7:12, 13, 32) Tassa isussukulullutik oqallisigaat. Inuit ilaasa ajunngitsuunerarpaat allat ajorneraraat.
9 Ilaanni Jiisusi taassumalu ajoqersugai Levimut, imaluunniit Matthæusimut, ilanngaaserisuusumut pulaarput. „Farisiiarit taakkualu allakkanik ilisimasortaat oqalorujulerput [naammagittaalliulerput, NV] ajoqersugaalu aperalugit: ’Sooq ilanngaaserisut ajortuliortullu nereqatigaasigit imeqatigalugillu?’“ (Lukasi 5:27-30) Tamatuma kingunerileraa Galilæami „juutit Jiisusi oqalorujuussutigilerpaat [naammagittaalliorfigilerpaat, NV] oqarmat: ’Uanga tassaavunga timiusaq qilammit aqqartoq.’“ Allaat Jiisusip ajoqersugaasa ilaasa taassuma oqaasii ajuallaatigaat naammagittaalliulerlutillu. — Johannesi 6:41, 60, 61.
10, 11. Juutit grækerisut oqaluttut sooq naammagittaalliorpat, naammagittaalliutigineqartullu qanoq iliuuseqarfigineqarneranik eqqarsaatiginninneq utoqqaanertat kristumiut qanoq iluaqutigisinnaavaat?
10 Ukiumi 33-mi piinsip ulluata kinguninngua naammagittaalliortoqarmat ajunnginnerusumik kinguneqarpoq. Ajoqersuganngorlaarpassuit Judæami uppeqatimik inoroorsaarnerat iluaqutigaat, tunniunneqartunilli agguaanermut tunngatillugu ajornartorsiuteqalerpoq. Tamanna ima oqaluttuarineqarpoq: „Hellenistit hebræerit oqalorujuutigilerpaat ullut tamaasa nerisassanik agguaanermi uillarnertamik tunulliunneqartarnerat.“ — Apustilit Suliaat 6:1.
11 Tamatumani naammagittaalliortut Israelikkut inoqajuitsumi naammagittaalliornerattut naammagittaalliunngillat. Hellenistit, tassa juutit grækerisut oqaluttut, namminissarsiorlutik namminneq inuunerminni atukkaminnik naammagittaalliutiginninngillat. Uillarnerilliuna ilaasa pisariaqartitaasa matussuserneqannginnerat malugeqqugaat. Aamma naammagittaalliortut pikitsitsinngillat, Jehovamik akerlilersuinngillat. Taakkua naammagittaalliutertik apustilinut saaffiginnissutigaat, naammagittaalliornerallu pissutissaqavimmat ajornartorsiut ingerlaannaq iliuuseqarfigineqarpoq. Apustilit ullumikkut utoqqaanertanut kristumiunut maligassaalluangaaramik! Anersaakkut ittumik paarsisut taakku ’piitsut nillianerat tusaanngitsoornaveersaaqqissaarpaat’. — Ussatit 21:13; Apustilit Suliaat 6:2-6.
Naammagittaalliornerup aserorsaataanera mianersorfigiuk
12, 13. (a) Naammagittaalliorneq sumut assersuunneqarsinnaava? (b) Suut naammagittaalliulersitsisinnaappat?
12 Biibilimi oqaluttuarineqartut misissukkatta amerlanersaat, naammagittaalliornerup itsaq Guutip innuttaanik ajoquseerujussuartarneranut ersiutaapput. Taamaattumik taamatut naammagittaalliornerup ullumikkut qanoq aserorsaataasinnaaneranik pimoorussilluni eqqarsaatiginninnissaq pitsaassaaq. Immaqa tamanna assersuusiorluni paasiuminarsarneqarsinnaavoq. Saffiugassat ilarpassuisa manngertorneqqajaasarnerat pissusissamisoorpoq. Saffiugassap manngertornilernera paasiaaraluarlugu sumiginnaraanni, saffiugassaq ima manngertornertigisinnaavoq atorneqarsinnaajunnaarluni. Biilit isaterneqaraangata amerlanertigut maskiinaasa ajoquteqarnerat isaterneqarnerannut pissutaanani, manngertorningaarmata atornissaasa navianarsisimanerat pissutaasarpoq. Assersuut taanna naammagittaalliornermut tunngatillugu qanoq atorsinnaagatsigu?
13 Soorlu saffiugassat aalajangersimasut manngertorneqqajaasartut, taamatuttaaq inuit naammalluinnanngitsut naammagittaallioqqajaasarput. Eqqumasariaqarpugut uagut nammineq naammagittaallioqqajaalernerluta malugisinnaaniassagatsigu. Soorlu isugutak silaannarlu tarajulik manngertornertitsisartut, taamatuttaaq atugarliorneq uagutsinnik naammagittaallioqqajaanerulersitsisinnaavoq. Tatineqarnerup paamitsalaarnerit isumaqatigiinngissuterujussuanngortissinnaavai. Pissutsillu aaqqissuussaanerata matuma ulluini kingullerni pissutsit ajorneruleriartortillugit, naammagittaalliutigisinnaasat amerligaluttuinnassagunarput. (2 Timotheusi 3:1-5) Tamanna pissutigalugu Jehovamut kiffaasoq inummut allamut naammagittaalliulersinnaavoq. Pissutigisaa soqutaarpianngitsuusinnaavoq, soorlu allap sanngiissutaanik paamitsaassineq imaluunniit piginnaanerinik kiffartornermiluunniit immikkut pisinnaatitaaffiinik sinngaginninneq.
14, 15. Sooq naammagittaallioqqajaalerneq sumiginnassanngilarput?
14 Naammagittaalliornitsinnut pissutaasoq suugaluarpalluunniit, misigissuseq taanna nununngikkutsigu naammagittaallioqqajaajuartunngorsinnaavugut. Naammagittaallioqqajaajuarneq anersaakkut peqqissutsitsinnik ima sanngiilliartortitsitigisinnaavoq uagutsinnik anersaakkut sanngiillilluinnartitsilluni. Israelikkut inoqajuitsumi atukkatik naammagittaalliutigigamikkit ima ingasatsigipput Jehova isornartorsiorlugu. (2 Mosesi 16:8) Qanortoq uagut taamaaliunngisaannarisa!
15 Saffiugassaq manngertorneqqajaannginnerulersinneqarsinnaavoq manngertorninissamut illersuummik seqqittarlugu manngertorninerillu ataasiakkaat suliaripallallugit. Tamatumunnga assingusumik immaqa nammineq naammagittaallioqqajaanerput akiorsinnaavarput Jehova qinnuigigutsigu ikioqqulluta ajornartorsiullu iliuuseqarfiginiarsuataarlugu. Qanoq?
Pissutsit Jehovap isiginnittaasiatut isigikkit
16. Naammagittaallioqqajaasuugaanni tamanna qanoq ajugaaffigineqarsinnaava?
16 Naammagittaallioqqajaajuartut imminnuinnaq eqqarsaatigisarput namminnerlu ajornartorsiutitik kisiisa eqqarsaatigisarlugit pilluaqqussutillu Jehovamut nalunaajaasutut iluaqutigisartakkavut puiorlugit. Naammagittaallioqqajaasarutta tamannalu ajugaaffigerusukkutsigu pilluaqqussutinik taakkuninnga imminut eqqaasittariaqarpugut. Assersuutigalugu tamavitta Jehovap nammineq aqqanik taaguuteqarsinnaaneq immikkut pisinnaatitaaffigaarput nuanningaartoq. (Esaja 43:10) Jehovamut qanittumik attaveqarnermik ineriartortitsisinnaavugut taannalu ’qinnutinik tusartartuusoq’ qaqugukulluunniit saaffigisinnaallutigu. (Tussiaat 65:3; Jaaku 4:8) Inuunerput siunertaqarluarpoq Guutip qilammi nunamilu kisimi oqartussaaneranik akerleriissut paasigatsigu eqqaamagatsigulu Guutimut assuarnaattuarneq immikkut pisinnaatitaaffiusoq. (Ussatit 27:11) Guutip naalagaaffia pillugu nutaarsiassamik nuannersumik oqaluussissutiginninnermut aalajangersimasumik peqataasinnaavugut. (Matthæusi 24:14) Jiisusi Kristusip utertitsissutitut pilliutaanik upperinninneq pissutigalugu ilerasuuteqanngissinnaavugut. (Johannesi 3:16) Qanorluunniit atugaqaraluarluta pilluaqqussuterpassuit tamakku iluaqutigisinnaavavut.
17. Naammagittaalliornissamut pissutissaqarluaraluaruttaluunniit sooq pissutsit Jehovap isiginnittaasiatut isiginiarsarissavavut?
17 Misilillugu pissutsit uagut nammineq isiginnittaatsitsinniinnaq isiginagit, Jehovap isiginnittaasiatut isigeriartigik. Tussiaasiortoq Daavi ima allappoq: „Ingerlavigeqqusannik ilinniartinnga, [Jehova], aqqutigeqqusannik ajoqersunnga.“ (Tussiaat 25:4) Naammagittaalliornissatsinnut pissutissaqarluarutta, Jehovap tamanna arajutsisimanngilaa. Ajornartorsiut ingerlaannaq aaqqissinnaagaluarpaa. Soormiuna atugarliortoqarnissaa ilaannikkut akuerisaraa? Imaassinnaavoq pissuserineqartussanik ajunngitsunik soorlu naammagittassusermik, pinertusaarsinnaanermik, uppernermik kamaginninnermillu ineriartortitsinissamut ikiorniarluta taamaaliortoq. — Jaaku 1:2-4.
18, 19. Erloqinartoqartillugu naammagittarnerup qanoq kinguneqarsinnaaneranik assersuuteqarit.
18 Erloqinartut naammagittaalliornata naammagalugit atorutsigik, tamanna inuttut pissutsitsinnik pitsaanerulersitsiinnarnani aamma pissusilersornitsinnik isiginnittut killinneqaatigisinnaavaat. 2003-mi Jehovamut nalunaajaasorpaaluit Ungarnimi ataatsimeersuaqataaniarlutik busserlutik Tysklandimit aallarput. Bussimik ingerlatitsisup ulluni qulini Jehovap Nalunaajaasuinik ilaqarnissani nangaassutigigaluarpaa. Angalanerulli naalernerani taassuma isiginnittaasia allanngorluinnarsimavoq. Sooq?
19 Angalaneranni akornutissarpaaloqarsimavoq. Qatanngutilli naammagittaalliunngillat. Bussinik ingerlatitsisoq oqarpoq aatsaat taama angalaqatigiinnik nuannertigisunik angallassilluni! Neriorsuivoq tulliani Jehovap Nalunaajaasui matuminut kasuttorpata isertikkumaarlugit tusarnaarlugillu. Tassa ilaasut ’naammagittaalliunnginnerat’ killinneqaataavoq.
Isumakkeerfiginninneq ataasiussusermik siuarsaasarpoq
20. Sooq isumakkeerfigeqatigiittariaqarpugut?
20 Taavami uppeqaterput pillugu naammagittaalliutissaqarutta? Pisoq ilungersunarpat najoqqutassiat Jiisusip eqqaasai, Matthæusi 18:15-17-imi allanneqarsimasut, atortariaqarpavut. Tamannali pisariaqartuaannarnavianngilaq, naammagittaalliutigineqartummi amerlanersaat pingaaruteqarpallaarneq ajorput. Soormi tamanna isumakkeerfiginninnissamut periarfissatut isigigukku? Paulusi ima allappoq: „Kamageqatigiigitsi isumakkeerfigeqatigiittarlusilu arlassinnut assuarliutissaqaraangassi. Soorlu [Jehovap] isumakkeerfigigaasi taamatuttaaq ilissi iliussaasi. Tamakkuali tamarmik qaavatigut atiniarsiuk asanninneq, tassaammat naammalluinnassutsip qilerutaa [ataasiussutsip qilerutaa naammalluinnartoq, NV].“ (Kolossemiut 3:13, 14) Isumakkeerfiginninnissamut piumassuseqarpugut? Jehova uagut pilluta naammagittaalliornissamut pissutissaqannginnerpa? Naamik, pissutissaqarpoq. Taamaakkaluartorli misiginneqataanini ersersittuarpaa isumakkeerfigiuartarlutalu.
21. Naammagittaalliortunik tusarnaartut qanoq sunnerneqartarpat?
21 Sunaluunniit pillugu naammagittaallioraluarutta naammagittaalliornerput ajornartorsiutitsinnut aaqqiissutaanavianngilaq. Hebræerit oqaasiat naammagittaalliornermik nutserneqartoq, aamma „oruluneq“-mik nutserneqarsinnaavoq. Ilimanarpoq naammagittaalliortuartumik ilaqarutta tujormissasugut taannalu qanillinaveersaassagipput. Uagut naammagittaalliorutta, imaluunniit orulugutta, ilimanarpoq uagutsinnik tusarnaartut taamatut misigissasut. Taakku immaqa ima tujormitigissapput nigorsimarusunnerulluta! Naammagittaallioraanni imaassinnaavoq allanit malugineqartoqarsinnaasoq, taamaalioruttali allat uagutsinnut qanillerusulernavianngillat!
22. Niviarsissap Jehovap Nalunaajaasui qanoq allaatigai?
22 Isumakkeerfiginneriaannaaneq ataasiussusermik siuarsaasarpoq, tamannalu Jehovap innuttaasa pingaartingaarpaat. (Tussiaat 133:1-3) Europami nunat ilaanni niviarsiaq katuuliusoq 17-inik ukiulik Jehovap Nalunaajaasuisa immikkoortortaqarfiannut allappoq nersorinninnini paasitinniarlugu. Ima allappoq: „Peqatigiissortaavoq uanga nalunngisanni kisiartaasoq ilaasortaasa akornanni uumissuinermik, pilerissusermik, allatut isumalinnik iluarisaqanngeqajaanermik, namminissarsiornermik aaqqiagiinnginnermilluunniit avissaartuussuteqarfiunngitsoq.“
23. Allaaserisami tulliuttumi suna sammissavarput?
23 Anersaakkut pilluaqqussuterpassuarnik Guutimik ilumoortumik, Jehovamik, pallorfiginnittutut iluaqutigisartakkatsinnik qujamasuutiginninnerput, ataasiussusermik siuarsaanissamut inummullu namminermut tunngasut pissutigalugit allat naammagittaalliorfiginaveersaarnissaannut iluaqutigissavarput. Allaaserisami tulliuttumi sammineqassaaq pissuserineqartussat Guutip pissusiinut assingusut naammagittaallioriaatsip suli navianaateqarnerusup — tassa Jehovap peqatigiissortaanik nunarsuarmiittunik naammagittaalliutiginninnerup — nakkaannarfiginnginnissaanut qanoq iluaqutigissagivut.
Eqqaamavigit?
• Naammagittaalliorneq qanoq paasisariaqarpa?
• Naammagittaalliornerup sunniutai assersuusiorluni qanoq paasiuminarsarneqarsinnaappat?
• Naammagittaallioqqajaanitta ajugaaffiginissaanut suna iluaqutigisinnaavarput?
• Allanik isumakkeerfiginneriaannaaneq naammagittaalliornaveersaarnissamut qanoq iluaqutigisinnaavarput?
[Atuaqqissaarnermi apeqqutit]
[Qupp. 19-mi assiliartaq]
Israelikkut ilumoortumik Jehova naammagittaalliorfigaat
[Qupp. 21-mi assiliartaq]
Pissutsit Jehovap isiginnittaasiatut isiginiarsaraagit?
[Qupp. 22-mi assiliartat]
Isumakkeerfiginninneq kristumiutut ataasiussusermik siuarsaasarpoq