Jiisusip najuunnissaanut nalunaaqut eqqumaffigaajuk?

KIALUUNNIIT pinartumik napparsimalernissani ajunaarnermilluunniit eqqugaanissani kissaatiginngilaa. Inuup silatuup navianartoqarsinnaaneranik nalunaaqutit eqqumaffigissavai sillimaniarlunilu. Jiisusi Kristusip nalunaaqut immikkut ittoq eqqumaffigisassarput oqaluttuaraa. Nalunaaqut eqqarsaatigisaa silarsuarmut tamarmut pingaaruteqassaaq inunnullu tamanut sunniuteqassalluni, aamma ilinnut ilaquttannullu.

Jiisusip Guutip naalagaaffia ajortunik piiaasussaq nunarsuarmillu paratiisinngortitsisussaq eqqartorpaa. Naalagaaffik tamanna ajoqersugaasa soqutigisorujussuuaat qaqugulu tikiunnissaa paaserusullugu. Aperipput: „Oqarfigitigut qaqugu tamanna pissasoq sunalu nalunaaqutaassasoq illit tikiunnissannut silarsuullu naggatissaanut.“ — Matthæusi 24:3.

Jiisusip ilisimavaa toqunermi makititaanermilu kingorna ukiut hundredellit qaangiuppat aatsaat qilammi issiavissaarsuarmi Missiarsikkoortumik kunngitut inuit naalakkersuiffigilerumaarlugit. Jiisusip kunngitut ivertinneqarnissaa inunnut takussaanngitsuusussaammat, ajoqersukkani paasinnissinnaaqqullugit qaqugu ’tikiunnissaminik silarsuullu naggatissaanut nalunaaqutaasussamik’ oqaluttuuppai. Nalunaaqut tamanna arlalinnik pisussaqarpoq tamarmiullutik piffissamut Jiisusip tikiunnissaanut ilisarnaataasussat.

Iivangkiiliunik allattut Matthæusip, Markusip aammalu Lukasip peqqissaartumik Jiisusip akissutaa allappaat. (Matthæusi kapitali 24 aamma 25; Markusi kapitali 13; Lukasi kapitali 21) Biibilimik allattut allat annikitsualunnik arlaqartunik nalunaaqummut ilanngussipput. (2 Timotheusi 3:1-5; 2 Petrusi 3:3, 4; Saqqummersitat 6:1-8; 11:18) Annikitsualuttai tamaasa misissussallugit inissaqanngimmata pisussat pingaarnerit tallimat nalunaaqummut ilisarnaataasut Jiisusip eqqartugai misissussavavut. Paasilissavat tamanna pisariaqartuusoq ilinnullu pingaaruteqangaartuusoq. — Takuuk qupperneq 6-imi ungalusaq.

„Atukkanut nutaanut allannguinerujussuaq“

„Inuiaammi pikitsitsiumaarput inuiannut, naalagaaffillu naalagaaffimmut.“ (Matthæusi 24:7) Tyskit aviisiat Der Spiegel allappoq 1914 sioqqullugu inuit „upperigaat siunissaq isumalluarnartoq kiffaanngissuseqarnerulernermik, siuariartornermik pigissaarnerulernermillu nassataqartoq“. Taava suut tamarmik allanngorput. „Sorsunneq aggustimi 1914-imi aallartittoq 1918-imilu novembarimi naasoq quarsaarnaqaaq. Tamanna oqaluttuarisaanermik allannguineruvoq, nutaanngitsoq nutaarlu immikkoortinneqariataarmata,“ atuagassiami GEO-mi allassimavoq. Sakkutuut 60 millioninit amerlanerusut nunavinnit tallimaniit akersuunnermut amiilaarnartumut tamatumunnga peqataapput. Ullut tamaasa agguaqatigiissillugu sakkutuut 6000-t missaaniittut toqutaasarput. Kingorna oqaluttuarisaanermut ilisimatuunit  kinguaariinni tamani, politikkikkut isumaat apeqqutaatinnagit, „ukiut 1914-imiit 1918-imut atukkanut nutaanut allannguinerujussuartut“ isigineqarput.

Sorsunnersuaq siulleq nunarsuup inuinut uterteqqitassaanngitsumik allannguivoq, tamannalu ilutigalugu pissutsinik aaqqissuussaanerup ullui kingulliit aallartipput. 1900-kkut ukiui sinneruttut sorsunnernik arlaqartunik, sakkulisarlutik akersuunnernik aammalu pinerliinianik takussutissartaqarput. Maannakkut ukiut hundredikkuutaat nutaat aallartinneraniippugut, pissutsilli pitsaanerusumut allanngorsimanngillat. Sorsunnermik misigisaqaannanngilagut; aammattaaq nalunaaqutip ilai allat ersaripput.

Kaannersuaq, nappaatit nunallu sajuttarneri

„Sumilu tamani kaannersuaqartarumaarpoq.“ (Matthæusi 24:7) Sorsunnersuup siulliup nalaani Europa kaannersuarmik eqqugaavoq, taamanerniilli inuiaat erloqinartumik tamatuminnga atugaqalerput. Oqaluttuarisaanermik ilisimatooq Alan Bullock allappoq 1933-mi Ruslandimi Ukrainemilu „inuppassuit kaattut nunaannarni angalaarsimasut . . . Aqquserngit sinaat toqungasut timaanik ulikkaarput.“ 1943-mi tusagassiortoq T.H. White Henanimi Kinamiittumi kaannersuarmut takunnittuusimavoq. Allappoq: „Kaannersuaqartillugu suna tamangajammi nerineqarsinnaanngorlunilu agguaqqissaarneqartarpoq, nerineqartarpoq nukinnguullunilu. Aatsaalli toqunissaq pinngitsoorneqarsinnaajunnaaleraangat nerineqarsinnaanngitsutut isigisimasat nerineqarsinnaasutut takorloorneqalertarput.“ Afrikami kaannersuaq alianaraluartumik ukiuni qulikkaani kingullerni piffinni amerlasuuni ulluinnarsiutaalersimavoq. Nunarsuaq tamanut nerisassaqartitsilluaraluarpoq, taamaattorli FN-ip Inuussutissarsiornermik Nunalerinermillu peqatigiiffia naliliivoq silarsuarmi inuit 840 millionit naammattumik nerineq ajortut.

’Nappaassuaqarluni toqoraataasumik.’ (Lukasi 21:11) „1918-imi Spaniamiut nappaataat 20-50 millionillit akornanni inuit inuunerannik naleqarsimasoq ilimagineqarpoq, toqu qernertumit toqusunit imaluunniit sorsunnersuarmi siullermit toqusunit amerlanerullutik,“ Süddeutsche Zeitung nalunaarusiorpoq. Taamanimiilli amerlaqisut nappaatinit soorlu malariamit, kuppernermit, tuberkulosemit, poliomit koleramillu eqqugaasimapput. Aammattaaq silarsuarmiut aids-ip unitsitassaanngitsutut siaruaanneranut quarsaarlutik isiginnaartuupput. Maannakkut ima inissisimavugut nappaatinik ajugaaffigisinnaanngisatsinnik peqarluta naak tupinnaannartumik nakorsaatitigut ilisimatusarnikkut siuariarnersuaqaraluartoq. Imminnut assortuuttut taamaattut siornatigut ilisimaneqanngitsup paasisinnaalersippaatigut piffissaq inuuffigisarput immikkut ittuusoq.

’Nuna sajuttarluni.’ (Matthæusi 24:7) Ukiuni hundredelinni kingullerni nunap sajuttarnera inuit hundredetusindillit inuunerannik naleqarsimavoq.  Allaaserisaq naapertorlugu 1914-imiilli agguaqatigiissillugu ukiumut nunap sajunneri 18-it, illorsuarnik aseruisimapput nunamilu quppaqalersitsillutik. Nunap sajuttarneri suli sakkortunerusut, inuit inuunerannik naleqartartut illorsuarnillu nungutitsilluinnartut, missiliukannerlugu ukiumut ataasiarluni pisarput. Naak teknologii atorlugu atortorissaaruteqaraluaqisoq suli toqusartut amerlaqaat, illoqarfiit alliartupiloortut amerlasuut nunap sajuttoqarfiusinnaasup killinnguaniimmata.

Nutaarsiassaq nuannersoq!

Ullunut kingullernut nalunaaqutip ilai amerlanerit alianartuupput. Jiisusili aamma nutaarsiassamik nuannersumik tusarliussivoq.

„Naalagaaffimmillu iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.“ (Matthæusi 24:14) Suliap Jiisusip aallarnersimasaata — Naalagaaffik pillugu nutaarsiassamik nuannersumik oqaluussissutiginninneq — ulluni kingullerni qutsinnerpaaffissani tikissavaa. Taamaattoqarsimavorlumi. Jehovap Nalunaajaasuisa Biibilip oqariartuutaa oqaluussissutigaat inuillu ilikkakkaminnik ulluinnarni inuunerminni atuinissaanik ajoqersorlugit. Jehovap Nalunaajaasui 6 millioninit ikinnerunngitsut nunani 235-ni oqaluussipput oqaatsit 400-t sinneqartut atorlugit.

Maluginiaruk Jiisusi oqanngimmat silarsuarmi pisartut toqqissisimananngitsut pissutigalugit suliat tamarmik unitsinneqassasut. Aamma oqanngilaq silarsuaq ataatsimut isigalugu nalunaaqutit ataasiakkaaginnaat kisimik misigineqassasut. Siulittuutigaali pisussat amerlasuut ataatsikkut nalunaaqutaassasut silarsuarmi sumiikkaluaraanniluunniit ilisarineqarsinnaasut.

Pisimasut ataasiakkaat pisimasulluunniit immikkut ittut eqqarsaatigigukkit, nalunaaqut nunarsuarmut tamarmut attuumassuteqartoq arlalinnik takussutissaqartoq takusinnaaviuk? Pisut ilinnut ilaquttannullu attuumassuteqarput. Soormiuna, immaqa aperivutit, inuit taama ikitsigisut kisimik nalunaaqutit takusimagaat?

 Nammineq soqutigisat salliutinneqarput

„Nalunneq inerteqqutaavoq“, „Iserneq inerteqqutaavoq — sarfaq sakkortooq“, „Arriilligit“. Tassaapput allagartat mianersoqqussutit maleruarumaneqakulanngitsut. Sooq? Nammineq iliuusererusunnerusatsinnik iliuuseqarnerorusuttaratta. Assersuutigalugu imaassinnaavoq inatsimmit piumasaqaatigineqartumit sukkanerusumik biilerusuttugut, imaluunniit inerteqqutaasumi nalukkusuttugut. Mianersoqqussutinilli sumiginnaaneq sianiitsuliorneruvoq.

Assersuutigalugu Østrigip, Frankrigip, Italiap Schweizillu sisoraariartarfiini aputit sisoorneri takornariat inuunerannik akeqartarsimapput, sisorarfissat avataanni sisorartoqaqqusinnginnermik snowboardertoqaqqusinnginnermillu mianersoqqussutit sumiginnartaramikkit. Süddeutsche Zeitung naapertorlugu takornariat mianersoqqussutinik sumiginnaasut, oqariartaaseq navianartoqanngippat nuannernavianngilaq najoqqutaralugu inuupput. Alianaraluartumik mianersoqqussutinik sumiginnaaneq ajunaarnernik kinguneqarsinnaasarpoq.

Suna tunngavigalugu nalunaaqut Jiisusip eqqartugaa inuit sumiginnarpaat? Immaqa pisuunngorumanermik tappiillisitaasimapput, soqutigisaqannginnermik misikkarlussisimapput, aalajangersinnaajunnaarsimapput, ulluinnarni suliassanik ulapputeqarpallaalersimapput imaluunniit atorfimmik annaanissaat annilaanngatigaat. Tamakkua arlaata Jiisusip najuunnissaanik nalunaaqummik sumiginnaalersissinnaavaatsit? Silatusaarnerussanngila nalunaaqut eqqumaffigigaanni mianersoqqussullu naapertorlugu iliuuseqarluni?

Nunami paratiisiusumi inuuneq

Inuit amerliartuinnartut Jiisusip tikiunnissaanut nalunaaqut eqqumaffigaat. Tysklandimi angut inuusuttoq, Kristian, allappoq: „Ullut atukkavut tarrajuttuupput. Qularutissaanngilaq ’ulluni kingullerni’ inuusugut.“ Nulianilu piffissarujussuaq atorlugu inunnut allanut naalagaaffik Missiarsikkoortoq pillugu oqaloqatiginnittarput. Frankip, aamma Tysklandimi najugaqartup, nuliani ilagalugu Biibilimi nutaarsiassaq nuannersoq pillugu allat oqaluttuullugit qiimmassartarpai. Oqarpoq: „Silarsuarmi pisartut pissutigalugit amerlasuut siunissaq isumakuluutigaat. Inuit ikiorniarpavut siunissaq nuannernerusumik isigeqqullugu nuna paratiisiusoq pillugu Biibilimi siulittuutinik paasitinniarneratigut.“ Taamaalillutik Kristianip Frankillu Jiisusip nalunaaqutaata ilaa piviusunngortippaat — Naalagaaffik pillugu nutaarsiassaq nuannersoq oqaluussissutigineratigut. — Matthæusi 24:14

Ullut kingulliit sakkortunerpaaffissani nallerpagu Jiisusip aaqqissuussaaneq nutaanngitsoq inuillu taassuminnga tapersersuisut peerniarpai. Tamatuma kingorna naalagaaffiup Missiarsikkoortup nunarsuarmi pisartut saassavai, siulittuutigineqareersutullu nunarsuaq paratiisinngortinneqassaaq. Inuiaat nappaatinit toqumillu aniguisitaassapput toqusimasullu nunarsuarmi inuunermut makitinneqassapput. Piffissami nalunaaqummik eqqumaffiginnittut nuanningaartunik tamakkuninnga neriuutissaqartitaassapput. Taamaattumik silatusaarnerussanngila nalunaaqut pillugu aammalu aaqqissuussaanerup matuma naggatissaanit aniguinissamut qanoq iliortoqarsinnaanera pillugu ilisimasaqarnerulissalluni? Ilumut, inuit tamarmik tamanna sulissutigisariaqaraluarpaat. — Johannesi 17:3. (wE 10/1 05)

[Qupp. 4-mi issuagaq]

Jiisusi pisussarpassuarnik ataatsimut tamarmik silarsuarmi sumiikkaluaraanniluunniit nalunaaqutaasussamik ilisariuminartumik siulittuivoq.

[Qupp. 6-mi issuagaq]

Nalunaaqut nunarsuarmut tamarmut attuumassuteqartoq arlalinnik takussutissaqartoq takusinnaaviuk?

[Qupp. 6-mi ungalusaq/​assiliartat]

ULLUNUT KINGULLERNUT NALUNAAQUTIT

Sorsunnersuit siornatigut takuneqarsimanngisaannartut. — Matthæusi 24:7; Saqqummersitat 6:4

Kaannersuit. — Matthæusi 24:7; Saqqummersitat 6:5, 6, 8

Nappaassuit toqoraataasut. — Lukasi 21:11; Saqqummersitat 6:8

Inatsisaatsuliornerit ingasatsikkiartortut. — Matthæusi 24:12

Nunap sajuttarneri. — Matthæusi 24:7

Ullut atugarliungaarfiusut. — 2 Timotheusi 3:1

Aningaaserituut. — 2 Timotheusi 3:2

Angajoqqaaminnut naalanngitsut. — 2 Timotheusi 3:2

Asanniuitsut. — 2 Timotheusi 3:3

Inuulluarniutinik Guutimit pingaarnerutitsisut. — 2 Timotheusi 3:4

Naammatsiuitsut. — 2 Timotheusi 3:3

Ajunngitsunut akeraasut. — 2 Timotheusi 3:3

Navianartorsiornermut soqutigisaqannginneq. — Matthæusi 24:39

Mitallersut ullunut kingullernut nalunaaqut itigartippaat. — 2 Petrusi 3:3, 4

Guutip naalagaaffia nunarsuarmi tamarmi oqaluussissutigineqarpoq. — Matthæusi 24:14

[Qupp. 5-mi suminngaanneernerat]

WWI sakkutuut: Atuakkamit The World War — A Pictorial History, 1919; ilaqutariit piitsut: AP Photo/Aijaz Rahi; poliomik eqqugaasoq: © WHO/P. Virot