Liberia — Sorsuffiugaluarluni anersaakkut ineriartorfiuvoq

LIBERIAMI naalagaaffiup inui imminnut ukiut qulit sinnerlugit sorsuussimapput. Ukioq 2003 qiteqqukkaa pikitsitsisut akiuullutik illoqarfimmut pingaarnermut Monroviamut appakaassimapput. Jehovap Nalunaajaasorpassui angerlarsimaffimminniit qimaasariaqartarsimapput, ilaatigut arlaleriarlutik. Tamatigullu pigisaminnik tilliffigineqartarput.

Illoqarfissuarmi akersuuttoqarnerani inuit tusindilikkaat toqutaapput. Toqutaasut ilagaat Jehovap Nalunaajaasui marluk, angut arnarlu. Erloqinartorsiorneq tamanna Jehovap Nalunaajaasuisa allat qanoq anigorpaat, taakkulu ikiorniarlugit qanoq iliortoqarpa?

Ajornartorsiortunik ikiuineq

Ajornartorsiortoqarnera tamaat eqqugaasut Liberiami Jehovap Nalunaajaasuisa immikkoortortaqarfiannit ikiorneqarput. Nerisassanik, nakorsaatissanik illumilu atortussanik pingaarnerusunik isumagineqarput. Umiarsualiviup pikitsitsisunit tiguagaaqqanerata nalaani nerisassaaleqineqarsimavoq. Immikkoortortaqarfiup taamatut pisoqarsinnaanera ilimagereersimavaa oqaluussisartunullu 2000-inut illoqarfimmi sumi tamaani naalagaaffilersaarfinnut qimaasunut naammattunik pissamaasersoreersimallutik. Umiarsualiviup ammarneqaqqinnissaata tungaanut peqqumaatit naammanniassammata qatanngutit nerisassat naammattusaarlugit agguaassortarpaat. Belgiami Sierra Leonemilu immikkoortortaqarfiit nakorsaatinik nakorsaanermullu atortunik illoqarfimmut timmisartukkut nassiussisimapput, Tuluit Nunaannilu Frankrigimilu immikkoortortaqarfiit atisarpassuarnik nassiussillutik.

Naak pissutsit isumatsannaraluaqisut qatanngutit isumalluarlutillu neriulluarput. Qatanngutip pingasoriarluni angerlarsimaffimminit qimaasimasup oqaasii qatannguterpassuit isumaqataaffigaat. Ima oqarpoq: „Pissutsit tamakku oqaluussissutigaavut; ulluni kingullerni inuuvugut.“

Tusagassamut nuannersumut ajunngitsumik periarnerit

Nunami tassani perulluliortoqaraluartoq uiverneqaraluartorlu oqaluussisartut suli kiffartornerminni angusaqarluartarput. Januaarimi 2003-mi oqaluussisartut 3879-it amerlanerpaaffigisimavaat, februaarimilu 15.227-t atuaqqissaaqatigineqartartut nalunaarutigineqarsimallutik.

Inuit tusagassaq nuannersoq ilassigasuartarpaat. Nunap tamatuma kujataata-kangisissortaani illoqarfeeqqami tamatumunnga assersuutissaqarluarpoq. Ilagiit Jiisusip toquata eqqaaniarneqarnera illoqarfimmi annerulaartumi Bewahnimi nalliuttorsiutiginiarlugu pilersaarutigaat, ataatsimiittarfimminniit 4-5 tiimit pisullugu ungasitsigisumiittumi. Qatanngutit illoqarfimmi innuttaasunik nalliuttorsiornissamut qaaqqusinnginnerminni Bewahnip borgmesteria qaaqqusissummik tuneqqaarsimavaat. Taassuma qaaqqusissut atuareeramiuk Biibilini tigoriarlugu illoqarfimmi innuttaasut ornippai. Taava allassimaffimmik, qaaqqusissummi innersuussutigineqartumik, atuffappai eqqaaniaallunilu nalliuttorsiornermut peqataaqqullugit kajumissaarlugit. Oqaluussisartut tikiukkamik paasivaat suliassartik naammassineqareersimasoq. Eqqaaniaalluni nalliuttorsiornermut borgmesteri meeqqani nulianilu marluk ilagalugit takkuppoq. 27-t najuupput. Taamanimiilli  borgmesterip metodistit oqaluffiat qimappaa. Jehovap Nalunaajaasuinit Biibilimik atuaqqissaaqatigineqartalerpoq, taakkulu neqeroorfigai naalagaaffilersaarfissap toqqavissaanik.

Isiginnittaaseq allanngortoq

Qatanngutitta inooriaasiat pissutigalugu akerlilersuisut ilaasa sallusuissummut isiginnittaasertik allanngortissimavaat. Tamatumunnga Opoku assersuutissaalluarpoq. Taanna specialpionerip (piffissaq tamaat oqaluussisartup) oqaluussitilluni naapikkamiuk Napasuliaq Alapernaarsuiffik-mik neqeroorfigaa. Atuagassiami allaaserisaq Opokup soqutiginartissimavaa, akissaqanngilarli. Pionerip nassuiaappaa atuagassiaq akeqanngitsoq tunniullugulu isumaqatigaa aggeqqikkumalluni. Pioneri aggeqqimmat Opokup aperaa: „Ilisarisinnaavinga? Illoqarfimmi Harperimi ikinngutivit amerlanersaasa nalunngilaannga. Meerartasi atuarfimmiit anisittarpakka!“ Taava nassuiaappaa illoqarfimmi gymnasiami pisortaasimalluni, Jehovap Nalunaajaasuisalu meerartaasa erfalasoq ilassiumasanngimmassuk malersugarisarsimallugit.

Pingasoriarlunili Jehovap Nalunaajaasui tullerminnik asannittuliortut takoreeramigit, isiginnittaatsini allanngortittariaqarsimavaa. Siullermik Jehovap Nalunaajaasuisa ilaasa uppeqatiminnik perulunnartumik napparsimasumik isumassuinerat takusimavaa. Allaat nunami sanilerisaminni passunneqarnissaa isumagaat. Opoku isumaqarsimagaluarpoq napparsimasoq taanna Jehovap Nalunaajaasuisa akornanni „pingaartorsuusimasoq“, paasivaali ilagiinni allatulli nalinginnaasutut ilaasortaasoq. Pisimasoq alla 90-ikkunni Opoku qimaasutut Nagguaatsup Tuugaavata Sineriaaniitillugu pivoq. Ullut ilaanni qilalerami angut inuusuttoq imermik pisiniarfigaa. Opoku taamaallaat aningaasamik angisuumik tigumiaqarpoq inuusuttup taassuma utertulersinnaanngisaanik, taamaattumik Opoku imermik akilersinnagu tunivaa. Angutip inuusuttup imeq Opokumut isaakkamiuk aperaa: „Isumaqarpit qaqugumulluunniit inuit, ilittut uattullu ittut, sunilluunniit akeqanngitsunik imminnut tunioraattut misigiumaarivut?“ Opokup eqqoriarpaa taanna Jehovap Nalunaajaasuisa ilagissagaat, inuusuttullu tamanna ilumoornerarpaa. Qatanngutip taassuma tukkussusia inussiarnissusialu killinneqaatigai. Naggataatigut specialpionerip akeqanngitsumik atuagassiamik tuniserusunnerata Opoku qularunnaarsippaa Jehovap Nalunaajaasuinut isiginnittaasia kukkusuusoq isumanilu allanngortittariaqarlugu. Anersaakkut siumukarpoq, maannalu oqaluussisartuuvoq suli kuisinneqanngitsoq.

Liberiami qatanngutit suli pissutsini ajungaartuni kiffartorput, taamaattorli Guuti tatigaat aalajaallutillu Guutip naalagaaffiata naapertuilluartup aqutsinerata ataani pissutsit pitsaanerusut atuutilerumaartut pillugit tusagassaq nuannersoq oqaluussissutigaat. Taakku suliaat aterminullu asanninnerminnik ersersitsinerat Jehovap puiunngisaannassavai. — Hebræerit 6:10. (wE 4/1 04)

[Qupp. 8-mi nunap assingi]

(Tekstens opstilling ses i den trykte publikation)

MONROVIA

[Qupp. 9-mi assiliartaq]

Ulluni atugarliorfiusuni Jehovap innuttaasa ikiortariallit anersaakkut timikkullu ikiortarpaat