Nalunaaqutit eqqumaffiginissaat pingaaruteqarpoq

„Aallaqqaammut isumaqaraluarpunga ernerput Andreas niaqorluinnartoq. Neriumajunnaarporli kissarneqartorujussuanngorlunilu. Niaqorlunnera sakkortusiartuinnarpoq, uangalu ernumalerpunga. Uiga angerlarmat Andreas nakorsiaapparput. Nakorsap misissorpaa, Andreasimilu ersiutaasut pissutigalugit erngerluni unitsinneqarpoq. Niaqorlunnerinnaq napparsimassutiginngilaa, ajornerujussuarli. Andreas meningitisimik nappaateqarpoq. Katsorsarneqarporli erniinnarlu peqqissilluni.“ — Gertrud, anaanaq Tysklandimeersoq.

ANGAJOQQAARPASSUIT qularnanngitsumik tamatuminnga assingusumik misigisaqarnikuupput. Meeqqamik napparsimalerneranut nalunaaqutaasunik maluginiagaqartarput. Naak nappaatit tamakkerlutik taamak navianartiginngikkaluartut, kingunipiloqarsinnaavoq ersiutaasut meeqqap pinartumik nappaateqalerneranik nalunaaqutit angajoqqaat sumiginnarpatigit. Nalunaaqutit taamaattut eqqumaffigalugillu sillimaffigisassat piareersimaffigigaanni kinguneqarluarsinnaavoq. Tamanna pingaaruteqartorujussuuvoq.

Peqqinnissamuinnaq tunngatillugu kisimi taamaanngilaq. Assersuutigalugu eqqarsaatigeriaruk qarsutsinersuup tsunamip 2004-mi decembariugaa Indiap Imartaata eqqaaniittunik aseruinera. Australiami Hawaiimilu ilisimatuut Sumatrap avannaani nunap sajunnissaa sakkortooq takusinnaasimavaat, pisullu kingunerisaanik navialissutaasinnaasut siulittuutigereersimallugit. Taamaattorli kalerrisaaruteqanngilaq inuit navianartorsiorfimmiittut kalerrinneqarsinnaaqqullugit mianersoqqussullu piareersimaffigalugu. Tamatuma kingunerisaanik inuit 220.000-init amerlanerusut inuunertik annaavaat.

Nalunaaqutit pingaaruteqarnerungaartut

Jiisusi nunamiikkallarami tusarnaartini oqarfigai nalunaaqutit maluginiassagaat eqqumaffigalugillu. Pingaaruteqangaartoq oqaluuseraa. Biibilimi allassimavoq: „Farisiiarit saddukiiarillu Jiisusi ornippaat, misilinniaramikkulu qinnuigaat qilammit nalunaaqummik takuteqqullutik. Oqarfigaali: ’Unnukkaangat oqartarpusi: Aqagu silagissaaq, qilak aappillersimavoq, ullaakkullu oqartarpusi: Ullumi silarlussaaq, qilak aappillersimavoq aarlerinarlunilu. Qilaap isikkua nassuiaatissaqartittarparsi, nalunaaqutilli maanna pisut nassuiarsinnaanagit.’“ — Matthæusi 16:1-3.

’Nalunaaqutit maanna pisut’ pillugit oqalunnermini Jiisusip juutit tusarnaartini paasitinniarpai piffissaq inuuffigisartik pingaaruteqangaartoq  eqqumaffigisariaqaraluaraat. Juutit aaqqissuussaanerani allannguinissarujussuaq tamanut attuisussaq qanittuaraarsuuvoq. Ullualunni toqunissi sioqqullugu Jiisusip nalunaaqut alla pillugu ajoqersukkani oqaluttuuppai — najuunnissaminik nalunaaqummik. Taamani taamatut oqarnera ullumikkut inunnut tamanut pingaaruteqartorujussuuvoq.