Jehovap oqaasia uumavoq

Tussiaatit immikkoortuisa tallimaannit pingaarnersat

PISUUT immaqa ima oqarput: „Ernivut inuusunnerminni ipput naasutut inerilluarsimasutut; panivut ipput sukatut teqeqquusutut, illussaarsuup sukaasut qiperukkatut. Qimatulivivut qimatunik tamalaanik ulikkaarput. Narsaanni savaativut tuusintilinngorput, 10.000-ilinngorlutik.“ Pigissaartullu immaqa ima oqarput: „Pilluarput inuiaat taama ittunik atugaqartut!“ (Tussiaat 144:12-15a) Allaanerulluinnartumik tussiaasiortoq ima oqarpoq: „Pilluarput inuiaat [Jehovamik] Guuteqartut!“ (Tussiaat 144:15b, NV) Qanoq allaanerusinnaagami? Jehova Guutiuvoq pilluartoq, taassuminngalu pallorfiginnittut aamma pillualissapput. (1 Timotheusi 1:11) Ilumoortoq tamanna erinarsuutini Guutimit isumassarsiarititaasuni, tassa Tussiaat 107-imiit 150-imut, erseqqippoq.

Tussiaatit immikkoortuisa tallimaanni Jehovap pissusii nuannersut, ilaatigut ilumoorfiginnilluni tunniusimanera, sallusuissusia ajunngissusialu aamma paasinarsisinneqarput. Guutip kinaassusia paasinerujartortillugu asanerulerlugulu mianerinerulissavarput. Tamanna pilluarnerulissutigissavarput. Tussiaatit immikkoortuisa tallimaanni tusarliussap naleqangaassusia! — Hebræerit 4:12.

JEHOVA ILUMOORFIGINNILLUNI TUNNIUSIMANERA PISSUTIGALUGU PILLUARTUT

(Tussiaat 107:1–119:176)

„Taakkua qutsavigilissuk [Jehova] unneqqarissusia [ilumoorfiginnilluni tunniusimanera, NV] pillugu, inunnullu tupinnartuliai pillugit.“ Taama erinarsorput juutit Babylonimut aallarussaaqqanerminnit nunaminnut utertut. (Tussiaat 107:8, 15, 21, 31) Daavillu Guuti ima unnersiutigaa: „Ilumoorsutsit nuissanut [atavoq].“ (Tussiaat 108:5) Erinarsuutip tulliani ima qinuvoq: „Ikiunnga, [Jehova] Guutiga, unneqqarissutsit [ilumoorfiginnillutit tunniusimanerit, NV] naapertorlugu annaannga.“ (Tussiaat 109:18, 19, 26) Tussiaat 110 Missiarsip naalagaassusia pillugu tussiaataavoq siulittuutaasoq. „[Jehovamik] mianerinninneq tassa ilisimassuseqarnermut aallarniutaasoq,“ Tussiaat 111:10-mi allassimavoq. Tussiaatip tullia ima oqaasertaqarpoq: „Pilluarpoq [Jehovamik] mianerinnittoq.“ — Tussiaat 112:1.

Tussiaat 113-imiit 118-imut tussiaatinik hallelujaarutinik taaneqartarput oqariartaaseq „halleluja“, imaluunniit „Jah unnersiutigisiuk“, taakkunani arlaleriarluni atorneqarmat. Misjna — ukiuni 200-kkunni allataasoq siornatigut ileqqutoqqanik allataanngitsunik imalik — naapertorlugu erinarsuutit taakkua poorskimi juutillu ukiumoortumik nalliuttorsiornerini atorneqartarput. Kapitalimi tussiaammilu Biibilimi takinersaasumi, Tussiaat 119-imi, Jehovap oqaasia saqqummersitaq unnersiutigineqarpoq.

Allassimaffiit pillugit apeqqutit akineqartut:

109:23 — Qanoq isumaqarluni Daavi ima oqarpa: „Taroriartorpunga tarratut nungujartortutut, pillertatut issugiunneqarpunga.“ Daavip toqussi qanittuararsuullugu misiginini taalliortorpalaartumik taama oqaatigaa. — Tussiaat 102:12.

110:1, 2 — ’[Daavip] Naalagaa’, Jiisusi Kristusi, Guutip talerpiata tungaani issiatilluni suleriva? Toqusunit makinnermi kingorna Jiisusi qilaliarpoq, tassanilu Guutip talerpiata tungaani issiavoq 1914-imi kunngitut naalakkersuilernermi tungaanut. Makinnerminiit 1914-ip tungaanut Jiisusip tanitat naalagaaffigai. Oqaluussinermi ajoqersuganngortitsiortornermilu sulineranni siulersorpai, naalagaaffimminilu naalakkersueqatigilernissaannut piareersarlugit. — Matthæusi 24:14; 28:18-20; Lukasi 22:28-30.

110:4 — Sumut tunngatillugu Jehova ’uppernarsaava uppernarsaanerminillu utertitsinngila’?  Uppernarsaaneq uani pineqartoq tassaavoq Jehovap Jiisusi Kristusimik kunngitut palasiunertullu kiffartornissamik angerfigeqatiginnissutaa. — Lukasi 22:29.

113:3 — Jehovap aqqata „kangianiit kitaanut“, imaluunniit ’seqernup nuisarfianit tarrittarfianut’ (1900/1961), unnersiutigineqarnissaa qanoq paasisariaqarpa? Ullut tamaasa Guutimik pallorfiginnittut inuit eqimattakkuutaartut ataasiinnaat pineqanngillat. Seqernup qinngornerata kangiani nuinerminiit kitaani tarrinnerminut nunarsuaq tamaat qaamatittarpaa. Tamatumunnga assingusumik nunarsuaq tamakkerlugu Jehova unnersiutigineqassaaq. Tamanna pisinnaanngilaq aaqqissuussaasumik iliuuseqartoqartinnagu. Jehovap Nalunaajaasuisa ilaattut Guutimik unnersiutiginninnissaq Guutillu naalagaaffia pillugu aallussilluarluta oqaluusseqataanissaq immikkut pisinnaatitaaffigaarput asseqanngilluinnartoq.

116:15, 1900/1961 — Qanoq ’ungagisami toquat Jehovap erlinnaritigaa’? Jehovamut kiffartortut taassumunnga ima erlinnartigaat katersatut, imaluunniit eqimattatut, toqunissaat akuerisinnaanngitsutut isigalugu. Jehovap kiffami nungutitaanissaat akuerigaluarpagu akerai taassumannga pissaaneqarnerorpasissagaluarput. Aamma nungutitaagaluarpata silarsuassami nutaami tunngavissaasinnaasunik nunarsuarmiittuerutissagaluarpoq.

119:71, NV — Annikilliorneq qanoq iluanaarutaasinnaagami? Annikilliorneq Jehovamik tatiginninnerunissamik, qamannga pisumik taassumunnga qinunissamik, Biibilimik atuaqqissaarnermut tassanilu ilitsersuutigineqartut maleruarnissaannut piffissap annerusup atornissaanik ilinniarfigisinnaavarput. Aammattaaq annikilliuleraangatta iliuutsitsigut paasinarsisinnaavoq pissuseqarnersugut ajortunik sulissutigisariaqakkatsinnik. Annikilliuutit uagutsinnut iluaqutaasumik sunniuteqartikkutsigik narrutsassimaalissutigissanngilavut.

119:96 — Qanoq isumaqarpa „inivillutik suliaagaluartut tamarmik killeqartut“? Tussiaasiortup eqqartugaa tassaavoq inuup isiginnittaasia naapertorlugu naammalluinnassuseq, uani ’inivillutik suliaagaluartunik’ taaneqartoq. Naammalluinnassuseq pillugu inuup paasinnittaasia killeqartoq eqqarsaatigisimagunarpaa. Guutilli inassutai taamatut killeqanngillat. Siunnersuutaapput inuunermi sutigut tamatigut atorluarsinnaasut. Nutsikkami 1900/1961-imeersumi ima allassimavoq: ’Naammatsitaagaluit tamaasa takusarpakka naggateqartut, inassutitilli killisissaanngillat.’

119:164 — Guutip ’ullormut arfineq-marloriarluni’ unnersiutigineqartarnerata suna maluginiarnartortarigamiuk? Kisitsit 7 naammalluinnassutsimut assersuutaagajuppoq. Taamaattumik tussiaasiortup oqaatiginiarpaa unnersiutiginninnerit tamarmik Jehovamik unnersiutiginnissutaasariaqartut.

Ilinniarfigisinnaasavut:

107:27-31. Harmagedonilerpat silarsuup ilisimassusia ’iluaqutaassanngilaq’. (Saqqummersitat 16:14, 16) Ilisimassut, imaluunniit silatusaarsinnaaneq, tamanna tassaanngilaq aseruinersuarmit annassutaasinnaasoq. Jehovap annaassinissaanik tatiginnittut kisimik inuuginnassapput ilumoorfiginnillunilu tunniusimanera pillugu taassumannga ’qutsaviginnissallutik’.

109:30, 31; 110:5. Sakkutuup talerpia panarsuutigisaa eqqornatinnaveeqqutaanit, saamimmit tigummiaanit, illersorneqanngilaq. Tamanna isumaqarpoq Jehovap kiffani pillugit akiuulluni ’talerpiisa tungaanniittartorlusooq’. Taamaalilluni illersorlugillu ikiortarpai — tamannalu ’qutsaviginissaanut’ pissutissaalluarpoq.

113:4-9. Jehova qutsingaarami ’atsissisittariaqarpoq takuniaanermini qilammi’ (versi 6, 1900/1961). Taamaattoq nikanartut, piitsut arnallu ernisuitsut misiginneqatigisarpai. Jehova Naalagaq kisimi oqartussaasoq maniguuttuuvoq kiffamilu taamaannissaat kissaatigaa. — Jaaku 4:6.

114:3-7. Jehovap innuttaminut iluaqutaasumik Immami Aappalaartumi, kuussuarmi Jordanimi qaqqamilu Sinajimi tupinnartuliai pillugit ilinniarnerput killinneqaatigisariaqarparput. Inuiaat, ’nunatut’ taaneqartut, Naalagaq pissutigalugu mianerinnilertariaqarput — ’uulittutullusooq’ ittariaqarput.

119:97-101. Guutip oqaasianeersumik ilisimassuseqalerlutalu paasisimasaqalerlutalu siuneqassuseqalerutta anersaakkut ajoqutaasunut illersuutaassaaq.

119:105. Guutip oqaasia isikkatsinnut naneruaraarput ima paasillugu ajornartorsiutitsinnik qaangiinissatsinnut iluaqutigisinnaavarput. Aammattaaq  aqqutitsinnik qaammarsaasutullusooq ippoq, tassami tassani oqaluttuunneqarpugut Guuti siunissami qanoq iliorumaartoq.

ATUGARLIORALUARLUTIK PILLUARTUT

(Tussiaat 120:1–145:21)

Misilinneqarnerit atugarliornerillu qanoq anigorsinnaavavut? Apeqqut taanna Tussiaat 120-miit 134-mut erseqqissumik akineqarpoq. Atugarliuutit anigussavavut nuannaarnerpullu attatiinnassavarput Jehovamut ikiortissarsiortarnikkut. Tussiaatit taakkua, nalliussiartornermi erinarsuutinik taaneqartartut, Israelikkut ukiumoortumik nalliuttorsuit nalliussiniarlugit Jerusalemiliaraangamik erinarsuutigisarsimagunarpaat.

Tussiaat 135-mi 136-milu Jehova, guutipilunnit susinnaanngitsunit allaanerulluinnarluni, iluarisaminik iliuuseqartartutut allaatigineqarpoq. Tussiaat 136 erinarsorluni akioriissutissatut allataavoq, taallallu naanera taallap aallaqqaataanut akissutitut erinarsorneqartarpoq. Tussiaammi tullermi oqaluttuarineqarput juutit Zionimi Jehovamut pallorfiginnikkusuttut Babylonimi atugaat alianartut. Tussiaat 138-miit 145-mut Daavimit allataapput. Jehova ’qutsavigerusussimavaa uummatikkut iluunngarluni’. Sooq? Ima oqarpoq: „Pinngortitaagama tupinnangaartumik.“ (Tussiaat 138:1; 139:14) Tussiaat 140-miit 144-mut Daavip qinnutigai inunnit ajortunit illersorneqarnissani, naapertuilluartumik siunnersorneqarnissani, malersortiminit aniguisitaanissani Guutimillu siulersorneqarnissani. Jehovap innuttai pilluartuusut erseqqissarpaa. (Tussiaat 144:15) Guutip angingaassusia ajunngingaassusialu nassuiareerlugit Daavi ima nalunaarpoq: „Qanerma nalunaajaatigissavaa [Jehovap] nersorneqaatissaa; pinngortitat tamarmik unnersiutigissavaat aqqa illernartoq naassaanngitsumik.“ — Tussiaat 145:21.

Allassimaffiit pillugit apeqqutit akineqartut:

122:3 — Jerusalemi qanoq illoqarfiliaava „inuiannut katersuuffissiaasoq“? Itsaq illoqarfiliortarnertut Jerusalemimi illut imminut qanittuararsuupput, taamaattumik illoqarfik illersoruminartuuvoq. Illut imminnut taama qanitsigimmata illoqarfimmiut ikioqatigiissinnaapput illersoqatigiissinnaallutillu. Tamanna Israelip naggueqatigiissortai aqqaneq-marluusut Guutimik pallorfiginninniarlutik katersuukkaangata anersaakkut ataasiussuseqarnerannut eqqaanarpoq.

123:2 — Inussiat isaat pillugit assersuummi sunaana pineqartoq? Inussiat inussiallu arnat isaat naalakkamik imaluunniit naalakkamik arnap assaannut sammisarput marlunnik pissuteqarlutik: paasiniarlugu naalagartik imaluunniit naalagartik arnaq qanoq kissaateqarnersoq, aamma illersorneqarumallutik inuunermilu pisariaqartitaminnik piumallutik. Taamatuttaaq uagut Jehova isigisutut ittariaqarparput paasiniarlugu piumasaa suunersoq, taassumanngalu iluarisaajumalluta.

131:1-3 — Daavip qanoq ililluni ’tarnini qasuersillugulu eqqissisippaa; soorlu meeraq anaanamini ittoq’? Soorlu meeraq anaanaminik kissumiartilluni tuppallertartoq nalerisimaalertartorlu, taamatuttaaq ’meeqqatut anaanamini ittutut’ Daavip tarnimi tuppallersarnissaa eqqissisinnissaalu ilikkarpaa. Qanoq? Makitaniartuunnginnermigut isimigullu pingaarniartuunnginnermigut imminullu angivallaartunik anguniagaqannginnermigut. Daavi ataqqisaaniarsarinani tusaamasaaniarsarinanilu pisinnaasami killeqarneri nassuerutigisarpai maniguuttuullunilu. Taamatut pissuseqarnera ilaarutsigu silatusaassaagut, ingammik ilagiinni akisussaaffeqalernissaq anguniagarigutsigu.

Ilinniarfigisinnaasavut:

120:1, 2, 6, 7. Oqaatissuaanerit oqaatsillu ajuallannartut allanik annikilliortitsingaarsinnaapput. ’Eqqissinermik’ noqqaassutiginninneq ilaatigut oqqamik aqutsinikkut ersersinneqarsinnaavoq.

 120:3, 4. ’Salloqittaagajuttumik oqaqartoqarnera’ akueriinnartariaqarutsigu tuppallersaatigisinnaavarput piffissanngorpat Jehovap aaqqikkumaaraa. Oqaatissuaasartut ’sorsuttartumit’ ajunaarnermik eqqugaassapput. Jehovap eqqartuussutaa ikumasutut ittoq, ’gyvelip avalequtaanut aamaartunut’ assersuunneqartoq, misiginngitsoorsinnaanngilaat.

127:1, 2. Iliuutsitsinni tamani Jehovap uagutsinnik siulersuinissaa noqqaassutigisariaqarparput.

133:1-3. Jehovap innuttaasa ataasiussuseqarnerat toqqissisimanarlunilu peqqinnarlunilu inuummarissiallannarpoq. Tamanna allanik kukkunersiuinikkut, saqitsaassinikkut naammagittaatsuunikkulluunniit aserortariaqanngilarput.

137:1, 5, 6. Jehovamut kiffaasut aallarussaaqqasut Zionimut — taamani Guutip peqatigiissortaasa ilaannut nunarsuarmiittumut — attaveqartutut misigipput. Uagummi? Peqatigiiffimmut Jehovap ullumikkut atugaanut qanittumik ilumoorfiginnittumillu attaveqarpugut?

138:2, 1900/1961. Jehovap ’oqaatsiminik angisuutitsinera [piviusunngortitsinera, NV] tusaamasaassusianik tamanik qimmuivoq’ ima paasillugu aqqi tunngavigalugu neriorsuutiminik tamanik piviusunngortitsissasoq ilimagisinnaasatsinnik tamanik qimmuingaartussamik. Siunissamut neriuutitta ilumut nuanningaassusia.

139:1-6, 15, 16. Jehovap iliuutsivut tamaasa nalunngilai, qanoq eqqarsarnersugut ilisimavaa oqaatsillu suli aninngikkivut qanoq oqarniarnersugut nalunngilaa. Ilumiuutilluta timitta pisatai ataasiakkaat suli erseqqissinngitsut ilisarisimavaatigut. Guutip inuttut ataasiakkaatut uagutsinnik ilisimasaqarnera ’tupinnarpallaarami’ uagutsinnut paasissaanngilaq. Jehova annikilliuutitsinnik ilisimanniinnarani aamma tamakku qanoq uagutsinnik sunniisarnersut ilisimagai nalunagu tuppallernassusia!

139:7-12. Sumiikkaluaruttaluunniit Guutimit nakussatsinneqarnissamut ungasippallaanngilavut.

139:17, 18. Jehova pillugu ilisimasaqarneq nuannaalissutigaarput? (Ussatit 2:10) Taamaappat nuannaarutaajuaannarsinnaasoq nassaarisimassavarput. Jehovap eqqarsaatai ’sioqqanit amerlanerupput’. Taanna pillugu ilikkagaqarnerujuaannarsinnaavugut.

139:23, 24, 1900/1961. ’Naalliunnartumut aqqutaasumik’ atuaanersugut — naleqqutinngitsunik eqqarsaateqarnersugut, kissaateqarnersugut pissuseqaqqajaanersugullu — paasiniarlugu Jehovap eqqarsaativut pissutiginiakkavullu misissuiffigissagai taakkualu taamaatinnissaannik ikiussagaatigut kissaatigisariaqarparput.

143:4-7. Atugarliuutit ilungersunartut qanoq naammagalugit atorsinnaavavut? Tamanna tussiaasiortup oqaluttuaraa: Jehovap iliuuserisimasai eqqarsaatigisariaqarpavut, assaasalu suliai isumaliutigeqqissaartariaqarlugit ikioqqullutalu qinnuigisariaqarlugu.

„Jah unnersiutigisiuk!“

Tussiaatit immikkoortui siulliit sisamat tamarmik Jehovamik unnersiutiginnissummik naggateqarput. (Tussiaat 41:14; 72:19, 20; 89:53; 106:48) Tussiaatit immikkoortuisa kingullersaanni aamma taamaappoq. Tussiaat 150:6-imi ima allassimavoq: „Anersaartortut tamarmik [Jehova] unnersiutigissavaat! Halleluja.“ Tamanna qularnanngivissumik Guutip silarsuassaani nutaami piviusunngorumaarpoq.

Taamanikkussamut pilluarfiusussaq qilanaariitigalugu Guutip ilumoortup naalannarsisinnissaanut aqqatalu unnersiutiginissaanut pissutissarpassuaqarpugut. Jehovamik ilisarisimanninnerput taassumunngalu ajunngitsumik attaveqarnitta nuannaarutigisinnaanera pissutigalugit pilluarnerput eqqarsaatigigaangatsigu uummammik qujamasuttumik unnersiutiginissaanut killinneqartarpugut, ilaa? (wE 9/1 06)

[Qupp. 15-mi assiliartaq]

Jehovap tupinnartuliai mianernangaarput

[Qupp. 16-mi assiliartaq]

Jehovap eqqarsaatai ’sioqqanit amerlanerupput’