Jehova mianeriuk pilluarlutillu!

„Pilluarpoq [Jehovamik] mianerinnittoq.“ — TUSSIAAT 112:1.

1, 2. Jehovamik mianerinninneq sunik iluaqutissartaqarpa?

PILLUALERNIARNEQ ajornaatsuinnaanngilaq. Eqqortumik aalajangiisarneq, eqqortumik iliortarneq ajortumillu iliornaveersaartarneq piviusumik pilluarnissamut aalajangiisuupput. Pinngortitsisup, Jehovap, oqaatsini Biibili uatsinnut tunniuppaa ilinniartinniarluta qanoq ililluta pitsaanerpaamik inooriaaseqalersinnaanersugut. Jehovamit siulersorneqarniarnitsigut taassumalu siulersuinera naapertorlugu iliornitsigut, taamaalillutalu Guutimik mianerinninnitsigut, piviusumik nalerisimaalersinnaallutalu pillualersinnaavugut. — Tussiaat 23:1; Ussatit 14:26.

² Allaaserisami matumani itsaq ullumikkullu ajortumik iliornissamut tatineqarnermik akiuinissamut eqqortumillu iliornissamut sapiissuseqarnissamut Guutimik mianerinnivinneq qanoq nakussatsissutigineqartarnersoq misissussavarput. Paasissavarput Guutimik mianerinninneq nuannaalissutigisinnaallugulu pillualissutigisinnaagipput, Guutimik mianerinninneq ileqqutsinnut ajortumut naqqiissutigisaratsigu, soorluttaaq Daavi taamaaliortariaqarsimasoq. Aamma paasissavarput Jehovamik mianerinninneq kingornussarsiaasoq erlinnartoq angajoqqaat meeqqaminnut kingornussarsiaritissinnaasaat. Aap, Guutip oqaasiani ima uppernarsaavigineqarpugut: „Pilluarpoq [Jehovamik] mianerinnittoq.“ — Tussiaat 112:1.

Pillualeqqipput

3. Daavip ajortuliornermi kingorna ingerlallualeqqinnissaminut suna iluaqutigaa?

³ Allaaserisap matuma siuliani eqqaaneqartutut, Daavi pisuni pingaaruteqartuni pingasuni Guutimik mianerinninngitsoorpoq ajortuliorlunilu. Jehovamilli perorsaatissinneqarnerminut periarnerani erserpoq qamanerpiaq Guutimik mianerinnittuusoq. Guutimik mianerinnillunilu ataqqinnikkami pisuunini nassuerutigaa, pissusilersorninilu aaqqillugu Jehovamullu attaveqarluaqqilerniarluni. Nammineq kukkunermi kingunerisaanik annikillioraluarluni aamma allat annikillioraluartut, ilumoorluni allamik isumataarami Jehovamit najorneqartuarlunilu pilluaqquneqarpoq. Ullumikkut kristumiut sualuttumik ajortuliortut Daavimik oqaluttuaq qularnanngivissumik tuppallersaatigalugulu qiimmassaatigisinnaavaat.

4. Guutimik mianerinninneq pillualeqqinnissamut qanoq iluaqutaasinnaava?

 ⁴ Sonja qanoq pisimanersoq eqqarsaatigeriaruk. * Piffissaq tamaat oqaluussisartuuvoq, ikinngutipalaaqalersimavorli kristumiorpalunngitsumillu pissusilersortunut ilannguttalersimalluni, ilagiinnullu kristumiunut ilaajunnaarsinneqartariaqalerpoq. Silattuaqigami Jehovamut attaveqaleqqinniarluni iliuuserisariaqakkani iliuuserai, kingusinnerusukkullu ilagiinnut ilanngutiteqqinneqarpoq. Pissutsit tamakku atortillugit Sonja Jehovamut kiffartorusukkunnaanngisaannarpoq. Piffissap ingerlanerani pioneritut kiffartoqqilerpoq. Kingusinnerusukkut utoqqaanertaq kristumiu inersimalluartoq katippaa, maannalu taanna nuannaarluni ilagiinni kiffartoqatigaa. Sonjap aqqusininnguamit kristumiut aqqutigisaannit nigorallarsimanini aliasuutigigaluarlugu, Guutimik mianerinninnini iluaqutigalugu uternini nuannaarutigaa.

Annikilliornissaq ajortuliornissaminngarnit pitsaaneruvoq

5, 6. Nassuiaruk qanoq aamma sooq Daavip Sauli marloriarluni toqutaatinngitsoorneraa.

⁵ Soorunalimi pitsaanerungaassaaq Guutimik mianerinninneq sualuttumik ajortuliunnginnissamut iluaqutigigaanni. Daavip tamanna misigaa. Taamani Saulip angutit 3000-it ilagalugit Daavi malersormagu, Sauli qaarusummut — Daavip angutitaasalu toqqorfigisimasarpiaannut — iserpoq. Daavi angutitaminit kajumissaarneqarpoq Sauli toqoqqullugu. Jehovap Daavip akeravia taassuma assaanut tunniussimannginnerpaa? Daavip nipaarsaaqqissaarluni Sauli ornippaa qallersaataatalu nuua kipillugu. Daavili Guutimik mianerinnikkami iliuutsini soqutaavallaanngitsoq taanna allaat ilerasuutigaa. Daavip angutitani kamattut avissaartippai ima oqarluni: „Jehova ataqqigakku naalakkannut, Jehovap tanitaanut, taamatut iliornianngivippunga, silugunnianngivippara; taannami Jehovap tanitaraa.“ * — 1 Samueli 24:2-8, NV.

⁶ Kingusinnerusukkut Sauli angutitaalu unnuami tammaarput, taannalu taassumalu angutitai ’tamarmik Jehovamit itisuumik sinitsitaapput’. Daavi taassumalu soraluaa saperuttaatsoq Abishaji malugitinnaveersaarlutik taakkua tammaarfiata qeqqanukarput maannalu Saulip sinittup saninnguaniillutik. Abishajip Sauli massakkorluinnaq toqorusuppaa. Daavilli nangarpaa ima oqarluni: „Kinaluunniit [Jehovap] tanitaanik ajoqusiisoq pillarneqanngitsoortussaanngilaq!“ — 1 Samueli 26:9, 12.

7. Daavip suna ajortuliornaveersaarutigaa?

⁷ Sooq Daavip Sauli toqunngilaa taamaaliornissaminut marloriarluni periarfissaqaleraluarluni? Jehovamik mianerinninnera Saulimik qunuginninneranit sakkortunerummat. Daavi Guutimik mianerinnivikkami pisariaqassappat ajortuliornissaminngarnit annikilliorumaneruvoq. (Hebræerit 11:25) Qularinngilluinnarpaa Jehova innuttaminik aamma imminik isumassuisoq. Daavip nalunngilaa Guutimut naalanneq taassuminngalu tatiginninneq pillualissutaasartoq amerlasuunillu pilluaqqussutisinartoq, Guutimillu sumiginnaaneq taassumannga iluarisaajunnaarnartoq. (Tussiaat 65:5) Aamma nalunngilaa Guutip imminik kunnginngortitsiumaarnini pillugu neriorsuutini eqqortikkumaaraa, aamma Guutip piffissarititani nalliuppat nammineq periaatsini atorlugu Sauli toqutikkumaaraa. — 1 Samueli 26:10.

Guutimik mianerinninneq pillualissutigaarput

8. Daavip tatineqarnermini periaasia qanoq uagutsinnut maligassaalluarpa?

⁸ Kristumiuugatta mittatigineqartarnissarput, malersorneqartarnissarput allatullu annikilliortinneqartarnissarput ilimagisinnaavarput. (Matthæusi 24:9; 2 Petrusi 3:3) Ilaanneeriarluta immaqa allaat uppeqatitsinnut tunngassuteqartunik ajornartorsiuteqalertarpugut. Nalunngilarpulli Jehova sunik tamanik takunnittartoq, qinnutitsinnik tusartartoq piffissakkullu eqqortukkut piumasaminut naapertuuttumik iluarsiiumaartoq. (Romamiut 12:17-21; Hebræerit 4:16) Taamaattumik akerlilersortivut qunuginagit Guuti mianeraarput aniguisitsisinnaaneralu tunaaralugu. Daavitut akiniaanaveersaartarpugut, aamma annikilliorusunnata najoqqutassiat naapertuilluartut sumiginnartanngilavut. Naggataatigut tamakku nuannaarutaallutillu pillualissutaassapput. Qanoq?

9. Malersorneqaraluarluni Guutimik mianerinninnerup qanoq pilluaataasinnaaneranik assersuuteqarit.

⁹ Qatanngut angut ukiorpassuarni Afrikami ajoqersuiartortitaasoq ima oqaluttuarpoq: „Arnaq taassumalu pania inuusuttuaraq eqqaasarpakka kristumiutut  kalluunnaveersaartuunertik pissutigalugu partiimut ilaasortaanermut uppernarsaatinik pisiumanngitsut. Anguterpaalunnit peqqarniitsumik saassunneqarput tamatumalu kingorna angerlaqquneqarlutik. Angerlarnerminni anaanaasup panini qiasoq, sooq taamatut pineqarsimanerminnik paasiuminaatsitsisoq, tuppallersarniarsaraa. Tamatuma nalaani nuannaanngilluinnarput, ilerasuuteqanngillalli. Kingusinnerusukkut Guutimut naalassimanertik pilluaatigaat. Partiimut ilaasortaanermut uppernarsaatit pisiarisimasuuppatigik angutit nuannaartupilussuusimassagaluarput. Sodavandinik tunisimassagaluarpaat, angerlamullu aqqutaa tamaat kaavillugit qitissimassagaluarput. Niviarsiararli anaanaalu silarsuarmi pilluaannerpaajusimassagaluarput nalunnginnamikku isumaqatiginngisaminnut akuersiinnarsimallutik.“ Taakkua Guutimik mianerinninnertik tamakkuninnga tamanik misigisaqannginnissaminnut illersuutigaat.

10, 11. Arnap Guutimik mianerinninnera qanoq kinguneqarluarpa?

¹⁰ Guutimik mianerinninneq aamma pillualissutaasarpoq inuunerup illernassusianik ataqqinninneq misilinneqaraangat. Mary pingajussaanik naartummat nakorsap inappaa naartuerseqqullugu. Nakorsaq ima oqarpoq: „Navianartorsiorputit. Perululeriaannaavutit akunnerillu 24-t ingerlaneranni toqusinnaallutit. Toquguit naartut aamma toqussaaq. Naartuit ajoquteqannginnissaa qulakkeerneqarsinnaanngilluinnarpoq.“ Mary Jehovap Nalunaajaasuinit Biibilimik atuaqqissaaqatigineqartarsimavoq, sulili kuisissimanani. „Taamaakkaluartorli,“ Mary oqaluttuarpoq, „Jehovamut kiffartorniarlunga aalajangereerpunga, qanorluunniillu pisoqaraluaraangat taassumunnga naalattuarnissara aalajangiusimavara.“ — 2 Mosesi 21:22, 23, NV. *

¹¹ Mary naartunermini Biibilimik atuaqqissaartuarpoq ilaquttanilu isumagilluarlugit. Kiisamilu Mary peqqissumik ernertaarpoq. Mary ima oqaluttuarpoq: „Erninera ernininnit siullernit marlunnit ajornakusoornerulaarpoq, kisianni imatorsuaq ajornartorsiuteqanngilaq.“ Maryp Guutimik mianerinninnini ilerasuuteqannginnissaminut iluaqutigaa, sivitsunngitsorlu kuisippoq. Aamma nukappiaqqap peroriartornermini Guutimik mianerinninneq ilinniarpaa, ullumikkullu Jehovap Nalunaajaasuisa immikkoortortaqarfiisa ilaanni kiffartorpoq.

’Jehovakkut pissatsitaagit’

12. Daavip Guutimik mianerinninnini qanoq nakussatsissutigaa?

¹² Daavip Jehovamik mianerinninnini ajortumik iliornaveersaarutigiinnanngilaa. Guutimik mianerinninnini pissutsini ilungersunartuni aalajangersimalluinnarluni iliuuseqarnissaminut silatusaarnissaminullu nakussatsissutigaa. Ukioq ataaseq qaammatillu sisamat Daavip taassumalu angutitaasa illoqarfik Siklagi filisterit nunaanniittoq Saulimit qimaallutik qimarnguffigaat. (1 Samueli 27:5-7) Ilaanni angutit illoqarfimmiinnginneranni piiaasoqatigiit Amalekikkuusut taakkua nuliaat meeraallu aallaruppaat, nersutaataat tillillugit illoqarfillu ikuallallugu. Daavi taassumalu angutitai uteramik paasillugulu qanoq pisoqarsimanersoq qiapput. Aliasunnerat kamanninnguutipallappoq, Daavillu angutitaasa Daavi ujaqqanik milloornialersaarpaat. Daavi aliasukkaluarluni sapilinngilaq. (Ussatit 24:10) Guutimik mianerinninnini Jehovamut saannissaminut kajumississutigaa, „[Jehovakkullu] pissatsitaavoq“. Guutip ikiuineratigut Daavip taassumalu angutitaasa Amalekikkut anguaat tigusaallu tamaasa utertillugit. — 1 Samueli 30:1-20.

13, 14. Kristumiup Guutimik mianerinninnini aalajangerluarnissaminut qanoq iluaqutigaa?

¹³ Guutip kiffai ullumikkut aamma nalaataqartarput Jehovamik tatiginninnissamik aamma aalajangersimalluinnarluni iliuuseqarnissamut sapiissuseqarnissamik pisariaqalersitsisunik. Kristinap nalaatai eqqarsaatigeriakkit. Meeraalluni Jehovap Nalunaajaasuinit Biibilimik atuaqqissaaqatigineqartarpoq. Inuussutissarsiutigaluguli pattattartoorusuppoq, pattallaqqissupilussuanngorporlumi. Aammattaaq oqaluusseqataagaangami ittoortarpoq, taamaammallu kuisinnermini akisussaaffigiligassami akisussaaffigilernissaa annilaangagaa. Kristinap Biibilimik atuaqqissaartarnini ingerlatiinnarpaa, Guutillu oqaasiata sunniinertunera malugisalerpaa. Guutimik mianerinninneq qanoq paasisariaqarnersoq ilinniarpaa, aamma paasivaa Jehovap piumasarigaa kiffami asassagaanni uummatikkut, isumakkut tarnikkullu iluunngarlutik nukitillu tamakkerlugit. (Markusi 12:30) Tamanna Jehovamut tunniulluinnarnissaminut kuisinnissaminullu kajumississutigaa.

 ¹⁴ Kristinap Jehova qinnuigaa ikioqqulluni anersaakkut siumukarsinnaaqqulluni. „Nalunngilara inuussutissarsiutigalugu pattattartuussaguma angalajuaannassallunga ukiumullu 400-riarlunga tusarnaartitsinissamik isumaqatigiissutit eqqortittassallugit,“ Kristina nassuiaavoq. „Taamaammat isumaga allanngortippara aalajangerlungalu ilinniartitsisunngorniarlunga imminut pilersorsinnaaniassagama piffissarlu tamaat kiffartorlunga.“ Tamatuma nalaani Kristina nunamini tusarnaartitsiviit tusaamasaanersaanni siullermeerluni tusarnaartitsisussanngoreerpoq. Ima oqaluttuarpoq: „Siullermeerlunga tusarnaartitsigama aamma naggammik tusarnaartitsivunga.“ Kingusinnerusukkut Kristina utoqqaanertamut kristumiumut katippoq, maannalu Jehovap Nalunaajaasuisa immikkoortortaqarfiisa ilaanni kiffartoqatigiipput. Jehovamit eqqortumik aalajangiinissaminut nakussatsinneqarsimanini aamma maannakkut nukimminik piffissaminillu taassumunnga kiffartornermut atuisinnaanini pilluaatigaa.

Kingornussarsiaq erlinnartoq

15. Daavip meeqqani sumik kingornussasserusuppai, aamma qanoq ililluni taamaaliorpa?

¹⁵ Daavi ima allappoq: „Qaaniaritsi tusarnaariarlunga qitornakka, Guutimik mianerinninnermik ajoqersussagassi.“ (Tussiaat 34:12) Daavip meeqqami kingornussassamik erlinnartumik — oqimaaqatigiissumik iluaqutaasumillu Guutimik mianerinnivinnermik — kingornussassinnissaat ilungersuutigaa. Daavip oqaatsimigut iliuutsimigullu ersersippaa Jehova Guutiusoq ingasattumik piumasaqartuunanilu ersinartuunngitsoq unioqqutitsisoqarnissaanillu utaqqiinnartuunngitsoq, qitornaminulli nunamiusunut Ataataasoq asannillunilu isumassuillunilu isumakkeerfiginnittartoq. Daavi ima aperivoq: „Kukkunerit kia nakkutigisarpai?“ Imalu nangippoq: „Sianiginagit ajortuliakka pillugit pinngitsuutinnga.“ Taama oqarluni Daavip ersersippaa Jehovap kukkunitsinnik nakkutiginniinnaavinnginneranik qularinninnginnini. Daavip qularinngilaa sapinngisani tamaat iliuuseqaruni, oqaatsini eqqarsaatinilu Jehovamit akuerineqarsinnaassasut. — Tussiaat 19:12, 14, Byington.

16, 17. Angajoqqaat meeqqatik Jehovamik mianerinninnermik qanoq ilinniartissinnaavaat?

 ¹⁶ Daavi ullumikkut angajoqqaajusunut maligassaalluarpoq. Ralph, nukkanilu Jehovap Nalunaajaasuisa immikkoortortaqarfiisa ilaanni kiffartortoq, ima oqaluttuarpoq: „Angajoqqaatta imatut perorsarpaatigut sallusuissummiinneq uagutsinnut nuannersunngortillugu. Meeraalluta ilagiit sammisartagaat pillugit oqaloqatigisarpaatigut, taakkualu sallusuissummik nuannarinninnerattut sallusuissummik nuannarinnitsigilerpugut. Qularunnaarsippaatigut Jehovamut kiffartornermi iluaqutaasinnaasugut. Ukiualunni ilaqutariit tamatta nunami Guutip naalagaaffianik oqaluussissutiginnittunik pisariaqartitsingaarfiusumi najugaqarpugut, tassanilu ilagiinnik arlalinnik pilersitseqataavugut.“

¹⁷ Ralph ima nangippoq: „Eqqortumik iliornissamut iluaqutigisavut tassaanngillat malittarisassarpassuit sukannersut, tassaavorli angajoqqaatta Jehovamik piviusutut isiginninnerat. Taakkua Jehova Guutitut ajunngitsutut asannittutullu isigaat. Taassuminnga ilisarisimanninnerulernissartik nuannaartitsinissartillu ilungersuutigaat, aamma Guutimik mianerinnivillutillu asannivinnerat ilinniarfigaarput. Ajortumik iliorsimagaluaraangattaluunniit angajoqqaatta Jehovamit asaneqanngitsutut misigitinngisaannarpaatigut, aamma kamaammiulluta ingasattumik killilersorneq ajorpaatigut. Amerlanertigut eqqissillutik oqaloqatigisarpaatigut — anaana ilaannikkut qullililluni — uummativut killinniarsaralugit. Killittarpaatigullumi. Taakkua oqaasiisigut iliuusiisigullu ilikkarparput Guutimik mianerinninneq pissusiusoq kusanartoq, aamma malugaarput Jehovamut nalunaajaasuuneq artornartuunani nuannaarutaasoq.“ — 1 Johannesi 5:3.

18. Guutimik ilumoortumik mianerinninnitsigut suna angusarparput?

¹⁸ Daavi toqungajalerluni ima oqarpoq: „Innuttaminik naalakkersuisup naapertuilluarnikkut, siulersuisup Guutimik mianerinnilluni, assigaa ullaap qaamarnga . . . seqernup nuinerani.“ (2 Samueli 23:1, 3, 4) Daavip ernerata kingoraartaatalu, Salomop, oqaatsit taakkua isumaat paasisimannguatsiarpaa, taassumami Jehova qinnuigaa ’uummateqarteqqulluni malussarissumik’ aamma ’eqqortunik eqqunngitsunillu immikkoortitsisinnaassusermik’ tuneqqulluni. (1 Kunngit 3:9) Salomop paasilluarpaa Jehovamik mianerinninneq ilisimassusermut tunngassuteqartoq aamma pilluarnermik kinguneqartartoq. Kingusinnerusukkut Oqaluussisartup oqaasiinik ima eqikkaavoq: „Tamaasa tusareerukkit ima ataatsimut katinneqartissavatit: Guuti mianeruuk inatsisaalu maleruarlugit, inuit tamarmik taamaaliortussaapput! Guutimmi akisussaatissavaatit qanoq iliorninnut tamarluinnarnut, isertortunut tamanut, ajunngitsunut ajortunulluunniit.“ (Oqaluussisartup oqaasii 12:13, 14) Siunnersuut taanna malikkutsigu misigissavarput „qanilaarnerup Guutimillu mianerinninnerup akissarsiarititaat“ tassaaginnanngitsut ilisimassuseq pilluarnerlu, aammali tassaasut „pisuussutit ataqqinaallu inuunerlu“. — Ussatit 22:4.

19. Suna ’Guutimik mianerinninnermik’ paasinnilissutigisinnaavarput?

¹⁹ Itsaq ullumikkullu misigineqarsimasunit takusinnaavarput eqqortumik Guutimik mianerinninneq Jehovamik pallorfiginnittunut ilumoortunut kajumississutaangaartartoq. Taamatut mianerinninneq Ataatatta qilammiusup iluarinngisaanik iliornaveersaarutigisinnaaginnarnagu, aammattaaq akerlilersortitsinnik qunuginninnginnissamut sapiissuseqalissutigisinnaavarput annikilliuutigisinnaasattalu naammagittarluta atornissaannut nakussatsissutigisinnaallugu. Taamaattumik tamatta, inuusuttut utoqqaallu, eqiasuilluta Guutip oqaasia atuaqqissaartartigu, ilinniakkavut eqqarsaatigeqqissaartartigik Jehovamullu aalajangersimasumik qamanngalu pisumik qinusarnikkut taassumunnga qanillilluta. Taamaaliornitsigut ’Guuti ilisimaliinnarnagu’ aammattaaq ’Guutimik mianerinninneq paasissavarput’. — Ussatit 2:1-5. (wE 8/1 06)

[Quppernerup ataani ilanngussat]

Uku nassuiarsinnaavigit?

Qanoq Guutimik mianerinninneq

• sualuttumik ajortuliornerup kingorna ingerlallualeqqinnissamut iluaqutaasinnaava?

• annikilliortinneqarnermi malersorneqarnermilu pilluaataasinnaava?

• Taassuma piumasaatut iliornissamut nakussatsissutigisinnaavarput?

• meeqqatsinnut kingornussarsiaasinnaava erlinnartoq?

[Atuaqqissaarnermi apeqqutit]

[Qupp. 17-mi assiliartaq]

Daavi Jehovamik mianerinnikkami kunngi Sauli toqunngilaa

[Qupp. 20-mi assiliartaq]

Guutimik mianerinninneq kingornussarsiaavoq erlinnartoq angajoqqaat meeqqaminnut kingornussarsiaritissinnaasaat