Jobi — angut assuarnaallunilu pinertooq

„Kiffara Jobi arajutsisimagunanngilat. Taanna nunarsuarmi tamarmi nalissaqanngilaq assuarnaatsuullunilu peqqusersuitsuugami Guutimillu mianerinnittuulluni ajortumik iliuuseqarnaveersaartuugami.“ — JOBI 1:8.

1, 2. (a) Jobi alianartunik sunik nalaataqariataarpa? (b) Jobip alianartunik nalaataqannginnermini inuunera oqaluttuariuk.

ILAANNI inuusoqarsimavoq angummik kissaatigineqarsinnaasunik tamanik pigisaqarunartumik — tassa pisuujullunilu, ataqqisaallunilu peqqissuusimavoq ilaquttanilu pilluarlutik inuusimallutik. Tassanngaannarli alianartunik nalaataqaqattaalerpoq. Pisuussutini annaariasaarpai. Taava qitornai tamarmik anorersuarujussuarmit qaqutigoortumit toqutaapput. Tamatuma kinguninngua sanngiillissutigisaminik nappaateqalerpoq timaa tamakkerlugu annernaqisunik ajuaqalerneranik kinguneqartumik. Angut taanna Jobiuvoq, Biibilip atuagartaani taassuma aqqanik taaguutilimmi inuit pingaarnerit ilaat. — Jobi, kapitali 1 aamma 2.

² Taanna ima nimaarpoq: „Ikkaluarumatoq siornatigutut.“ (Jobi 3:3; 29:2) Kia naalliutsilluni ullut atugarissaarfiusimasut kipisaffigisannginnerpai? Jobi assuarnaatsumik, perlunnut illersorneqarunarluni, inuusimavoq. Inunnit nuimasunit ataqqineqangaarlunilu siunersiorneqartarpoq. (Jobi 29:5-11) Pisuujuvoq, aningaasanulli oqimaaqatigiissumik isiginnittaaseqarpoq. (Jobi 31:24, 25, 28) Uillarnernik iliarsunnilluunniit annikilliortunik naapitaqaraangami taakkua ikiortarpai. (Jobi 29:12-16) Aamma nuliani ilumoorfigiuarpaa. — Jobi 31:1, 9, 11.

3. Jehovap Jobi qanoq isigaa?

³ Jobi assuarnaalluni inuuvoq Guutimik pallorfiginnikkami. Jehova ima oqarpoq: „Taanna nunarsuarmi tamarmi nalissaqanngilaq assuarnaatsuullunilu peqqusersuitsuugami Guutimillu mianerinnittuulluni ajortumik iliuuseqarnaveersaartuugami.“ (Jobi 1:1, 8) Jobili ileqqussatigut assuarnaatsuugaluarluni perluit pissutigalugit ilorrisimaarnartumik inuujunnaarpoq. Suliarisimasai tamarmik peerupput, pissusivialu anniaatinit, annikilliuutinit isumatsannermillu misilinneqarpoq.

4. Sooq Jobip innermillusooq misilinneqarneranik eqqarsaatiginninneq iluaqutigissavarput?

⁴ Soorunalimi Jobi Guutip kiffaasa akornanni inuttut alianartunik nalaataqarsimasutuaanngilluinnarpoq. Ullumikkut kristumiorpassuit namminneq inuunertik taassuma nalaataanut assingussuteqartippaat. Taamaammat apeqqutit marluk uku eqqarsaatigisariaqarpavut: Sooq Jobip innermillusooq misilinneqarneranik eqqarsaatiginninneq alianartunik nalaataqaraangatta iluaqutigisinnaavarput? Aamma taassuma nalaatai naalliuttunik  misiginneqatiginninnerunissamut qanoq ilinniutigisinnaavavut?

Ilumoorfiginninnerup apeqquserneqarnera assuarnaassutsillu misilinneqarnera

5. Jobip Guutimut kiffartorneranut Saatanip suna pissutaanerarpaa?

⁵ Jobip nalaatai immikkorluinnaq ittuupput. Diaavulup Jobip nalusaanik taassuma Guutimut kiffartorneranut pissutiginiagai apeqquserpai. Pinngortitat anersaajusut qilammi katersuummata Jehovap Jobip pissusii ajunngitsut malugeqqummagit, Saatani ima oqarpoq: „Taanna ilaqutaalu pigisaalu tamaasa tamatigut sernissugarisimannginnerpigit?“ Saatanip taamaalilluni Jobi — taamalu Guutimut kiffartortut allat tamaasa — namminissarsiornermik kajumississuteqarnerarpai. Saatanip Jehova ima oqarfigaa: „Assat isatseriassagit pigisai tamaasa attorlugit, taava kiinnat toqqavillugu perloqqussagaluarpaatit.“ — Jobi 1:8-11.

6. Saatanip akerleriissut pingaarutilik suna pilersippaa?

⁶ Matumani akerleriissut pingaaruteqartoq pilersinneqarpoq. Saatanip Jehovap kisimi oqartussaanerminik atueriaasia unammillerpaa. Guuti asanninneq iluaqutigalugu qilammik nunamillu ilumut aqutsisinnaava? Imaluunniit Saatanip oqamisaarneratut inuit namminissarsiornerat tamatigorluinnaq naggataatigut ajugaasassava? Jehovap kiffami assuarnaatsuunera ilumoorfiginnittuuneralu qularinagu Diaavulup Jobimik misiliinissaa akueraa. Taamaammat Saatani Jobip tulleriiginnarnik perlussiortinneqarneranut pissutaavoq. Saatanip saassussinini siulliit iluatsinngitsoormata Jobi naalliunnangaartumik nappaateqalersippaa. Saatani ima oqarpoq: „Ameq amermik naleqararaaq! Inuummi pigisani tamaasa akigeriaannaasarpai inuunini annaajumanagu.“ — Jobi 2:4.

7. Ullumikkut Guutip kiffai Jobip naalliuutigisimasaanut assingusumik qanoq naalliuuteqartarpat?

⁷ Ullumikkut Guutimut kiffaasut amerlanerpaartaat Jobitut atugarliuuteqartigisimanngillat, taamaakkaluartorli assigiinngitsorpassuarnik naalliuuteqartarput. Ilarpassui malersorneqarlutilluunniit ilaqutariittut ajornartorsiorput. Aningaasatigut ajornartorsiorneq peqqiilliornerluunniit nikallornarsinnaavoq. Ilaasa upperisartik pillugu inuunertik annaasimavaat. Isumaqassanngilagulli naalliuutigisatsinnut tamanut Saatani pisuusoq. Allaat uagut nammineq kukkunivut imaluunniit inunnguuseralugu timikkut sanngiissutivut ajornartorsiutit ilaannut pissutaasinnaapput. (Galatiamiut 6:7) Aamma tamatta utoqqalinerup sunniutipilui atortussaavavut pinngortitamilu ajunaarnersuarnit eqqugaasinnaalluta. Biibilimi erseqqissarneqarpoq ullutsinni Jehovap kiffani perlunnut naalliuutinullu taamaattunut tupinnartuliorluni illersorneq ajorai. — Oqaluussisartup oqaasii 9:11, 1990.

8. Saatanip naalliutivut qanoq atornerlussinnaavai?

⁸ Taamaattoq Saatanip upperunnaarsinniarluta naalliutivut atornerlussinnaavai. Apustili Paulusip eqqaavaa ’kapinartumik timiminut kapputtoqartoq, tassa Saatanip inngilianit anaalerneqartuarluni’. (2 Korinthimiut 12:7) ’Kapinartoq’ taanna ajornartorsiutaagaluarpat timimut tunngasoq, immaqa isigiarsunnerugaluarpat allaagaluarpalluunniit, Paulusip paasivaa ajornartorsiut tamanna tamatumunngalu tunngatillugu nukillalaarnini Saatanip imminik nuannaarunnaarsitsiniaanermini assuarnaakkunnaarsitsiniaanerminilu atornerlussinnaagai. (Ussatit 24:10) Ullumikkut Saatanip ilaquttat, atuaqatit allaallu kisermaassillutik naalakkersuisut sunnersinnaavai Guutip kiffaanik arlaatigut malersuiniassammata.

9. Akerlilersorneqarnerput malersorneqarnerpulluunniit sooq tupaallaatigisariaqanngilarput?

⁹ Ajornartorsiutit tamakku qanoq ililluta naammagalugit atorsinnaavavut? Jehovamik asanninnitta taassumalu kisimi oqartussaaneranut naalannitta patajaatsuunerannik taassumunnga ersersitsinissamut periarfissatut isigalugit. (Jaaku 1:2-4) Isumakulunnitsinnut sunaluunniit pissutaagaluarpat, Guutimik ilumoorfiginninnissap qanoq pingaaruteqartigineranik paasinninninneq anersaakkut oqimaaqatigiissaariuarnissatsinnut iluaqutigissavarput. Apustili Petrusip kristumiut ima allaffigai: „Asasakka, innikkut misilinneqarneq atugarsi tupigusuutigissanngilarsi pineqarnersi immikkuuissutut isumaqarfigalugu.“ (1 Petrusi 4:12) Aamma Paulusi ima nassuiaavoq: „Guuti mianeralugu Kristusi-Jiisusimi inuujumasut tamarmik qinugineqartarput.“ (2 Timotheusi 3:12) Jobip assuarnaassusianik apeqqusiisimanermisut Saatanip Jehovap kiffaasa assuarnaassusiat suli apeqqusertarpaa. Aap, allaat Biibilimi ersersinneqarpoq  Saatanip ulluni makkunani kingullerni Guutip innuttai aatsaat taama saassutaritigilerai. — Saqqummersitat 12:9, 17.

Paatsuuineq siunnersuutillu ajortut

10. Jobip suna naluaa?

¹⁰ Ullumikkut uagut immikkut pisinnaatitaaffeqarpugut Jobip immikkut pisinnaatitaaffigisimanngisaanik. Sooq taamatut perlussiornerluni nalulluinnarpaa, kukkullunilu isummerpoq ’Jehova tunniussigami Jehova tigusisoq’. (Jobi 1:21) Saatanip piaaraluni Jobi isumaqalersinniarsarinnguatsiarpaa taassuma naalliuutaanut Guuti pisuusoq.

11. Jobi naalliuutini qanoq periarfigai?

¹¹ Jobi nikallorluinnarpoq, Guutili perloqqujumanngilaa soorlu nuliami taamaalioqqugaluaraani. (Jobi 2:9, 10) Jobi ima oqarpoq: ’Guutiitsut uannit ingerlalluarnipilussuupput.’ (Jobi 21:7-9) Imminut ima aperisimassaaq: ’Sooq Guutip pillarpaanga?’ Ilaannikkut toqorusuinnartarpoq. Ima nillerpoq: „Toqqorumasinnaagaluarummatoq toqusullu inaanni isertorlunga kamannerit qaangiutserlugu! Qanortoq killilimmik utaqqiffissaqarteriarlunga kingumut eqqaaginga!“ — Jobi 14:13.

12, 13. Jobip ikinngutimi pingasut oqaasii qanoq sunnerneqaatigai?

¹² Jobi ikinngutiminit pingasunit ’misigeqatiginninnerminnik takutitsiniarnerartunit tuppallersaaniarnerartunillu’ pulaarneqarpoq. (Jobi 2:11) Paasinarsivorli taakku ’tuppallersaasuusut erloqisitsiinnartut’. (Jobi 16:2, 1990) Qularnanngitsumik Jobip ikinngutit uummammiuminik aniatitsivigisinnaasani ajornartorsiutiminillu oqaluttuussinnaasani iluaqutigisimasinnaagaluarpai, taakkuali pingasut Jobi paatsiveerunnerulersiinnarpaat sulilu nikallornerulersiinnarlugu. — Jobi 19:2; 26:2.

¹³ Paasinarluassaaq Jobi imminut ima aperisimassappat: ’Sooq uangarpiaq? Sugama taama perlussiortitaatigaanga?’ Ikinngutaasa nassuiaatiginiagaat paatsiveerutsitsilluinnarput. Ilimagaat Jobi arlaatigut ingasattumik ajortuliornermigut imminut naalliuutissisimasoq. „Ajortuliaqanngitsumik toqutitaasoqartarnerpa?“ Elifazi aperivoq. „Takusartakkakka malillugit imaappoq: Assallatserillutik ajussusermik nunamut matoorussisut ajunaarutissanillu siaruarterisut namminneq tamakkorpiaat katersoraraat.“ — Jobi 4:7, 8.

14. Sooq ingerlaannaq isummissanngilagut naalliuutit ajortuliorsimanermik pissuteqartut?

¹⁴ Paasinarpoq anersaamut siaruarterinani uinimmut siaruarterigaanni ajornartorsiuteqalertoqarsinnaanera. (Galatiamiut 6:7, 8) Pissutsilli aaqqissuussaaneranni maanna atuuttumi qanoq pissusilersornerput apeqqutaanani ajornartorsiuteqalertoqarsinnaavoq. Aammattaaq oqartoqarsinnaanngilluinnarpoq pisuussuteqanngitsoq perlunnut tamanut illersorneqassasoq. Jiisusi Kristusi, „minguitsoq, ajortilinnit immikkoortitaasoq“, nappakkami anniartitaaffimmi naalliunnartumik toqutaavoq, aamma apustili Jaaku martyritut toquvoq. (Hebræerit 7:26; Apustilit Suliaat 12:1, 2) Elifazip taassumalu ikinngutaasa marluk kukkusumik tunngavilersuinerat pissutigalugu Jobip tusaamasaalluarnini illersulerpaa pisuussuteqannginninilu erseqqissalerlugu. Taakkuli Jobip annikilliuutai taassuma ajortuliorsimaneranik uteriillutik pissuteqarneraanerat Jobip Guutip naapertuilluassusianut isiginnittaasianut sunniuteqarsimasinnaavoq. — Jobi 34:5; 35:2.

Naalliutsilluni iluaqutissat

15. Eqqarsartaaseq qanoq ittoq naalliuutit naammagalugit atornissaannut iluaqutigisinnaavarput?

¹⁵ Tamanna arlaannik ilinniutigisinnaavarput? Alianartunik nalaataqarneq, nappaateqarneq malersorneqarnerluunniit naapertuilluanngeqisutut misinnarsinnaavoq. Allat immaqa ajornartorsiutit tamakku amerlanersaat anigorpasittarpaat. (Tussiaat 73:3-12) Pitsaassaaq ilaannikkut apeqqutinik pingaaruteqartunik ukuninnga imminut aperisarutta: ’Guutimik asanninnera qanorluunniit pisoqaraluarpat taassumunnga kiffartornissannut kajumississutigaara? Jehova taassuminnga mitalliisunut akissutissaqarterusungaarpara?’ (Ussatit 27:11; Matthæusi 22:37) Allat isumaatsumik oqalunnerata Ataatatta qilammiusup ikiuiumaarnera pillugu qulalersinngisaannartariaqarpaatigut. Kristumiu aalajaatsoq ukiorpassuarni katsorsarneqarsinnaanngitsumik nappaateqartoq ima oqarpoq: „Nalunngilara Jehovap akuerisaa suugaluarpalluunniit naammagalugu atorsinnaallugu. Nalunngilara pisariaqartitannik nakussatsikkumaaraanga. Pisariaqartitannimmi nakussatsittuaannarnikuuaanga.“

16. Misilinneqartut Guutip oqaasia qanoq iluaqutigisarpaat?

 ¹⁶ Saatanip periaasianut tunngatillugu Jobip paasinngisaanik paasisaqarpugut. ’Qanoq ittumik pilersaaruteqarnersoq’, imaluunniit sunik pilersaarutipiloqarnersoq, nalunngilarput. (2 Korinthimiut 2:11) Aammattaaq Biibili ilisimassusermik naammangaartumik atorluarsinnaasatsinnik imaqarpoq. Angutit arnallu aalajaatsut assigiinngitsorpassuartigut naalliuuteqarnerminni ajornartorsiuteqarnerminnilu nikallujuissimasut pillugit oqaluttuaqarpoq. Apustili Paulusi, kristumiut amerlanersaannit naalliuuteqarnerusoq, ima allappoq: „Siornatigummi allagaasut tamarmik allassimapput uatsinnut ilinniutissaallutik, nikallujuilluta Allakkallu tunissutaat tuppallersaatigalugit neriuuterput aalajangiussinnaaqqullugu.“ (Romamiut 15:4) Jehovap Nalunaajaasuisa ilaata Europameersup sorsunnersuup aappaata nalaani upperisani pillugu parnaarussaasup Biibili piniassagamiuk ulluni pingasuni nerisassani taartigai. Taanna ima oqaluttuarpoq: „Taarsiilluarpunga. Kaakkaluarlunga anersaakkut inuussutissat pingaaruteqarnerungaarput. Uanga kisima iluaqutiginngilara, aamma allat misilinneqarnitsinni iluaqutigaat. Suli ullumimut Biibili taanna pigaara.“

17. Guutip pilersitai suut pinertusaarnissamut iluaqutigisinnaavavut?

¹⁷ Allakkat tuppallersaatissarsiffiginerisa saniatigut Biibililersaarutinik atuagassaaterpassuaqarpugut siunnersuutinik iluaqutaasunik imalinnik qanoq ililluta ajornartorsiutinik iliuuseqarfiginnissinnaanerput pillugu. Register til Vagttårnets publikationer qupperukku, qularnanngitsumik kristumioqatit illit misilinneqaatigisannut assingusunik misilinneqarsimasut misigisalikkersaarutaannik nassaarsinnaassaatit. (1 Petrusi 5:9) Aamma pissutsit atukkatit pillugit utoqqaanertanik paasinnittunik  kristumiunilluunniit inersimalluartunik allanik oqaloqateqarneq iluaqutigisinnaavat. Pingaarnerpaamillu: Ikiorneqarnissat Jehovamut qinnutigigaangakku taassuma anersaani illernartoq aqqutigalugu ikiortarumaaraatit qularissanngilat. Paulusip Saatanip qoqassiiniutai qanoq ililluni naammagittarluni atorpai? Guutip pissaaneranik tatiginninnermik ilinniarnermigut. (2 Korinthimiut 12:9, 10) Taanna ima allappoq: „Tamaasa pissatsitsisikkut atussallugit sapinngilakka.“ — Filippimiut 4:13.

18. Uppeqatigiit kristumiut qanoq naleqangaartumik qiimmassaqatigiissinnaappat?

¹⁸ Tassa iluaqutissaqarpugut, taakkualu iluaqutiginissaannut illit nangaanngisaannartariaqarputit. Imaattumik ussateqarpoq: „Ullormi annikilliorfiusumi sapiissuseerukkuit taava nukitit annikillissapput.“ (Ussatit 24:10) Manngertornerup saffiugassamik neriuisinnaaneratut, nikallunganeq kristumiup assuarnaassusianik sanngiillisitsisinnaavoq. Navianartoq tamanna akiorniarlugu, Jehovap uppeqativut aqqutigalugit tapersersortarpaatigut. Jiisusi unnuami tigusaaffimmini inngilimit saqqummerfigineqarluni nakussatsinneqarpoq. (Lukasi 22:43) Paulusi tigusatut Romaliartilluni „Guuti qutsavigaa nakussatsitaallunilu“, qatanngutit Forum Appiimut Tres Tabernæmullu naapigiarsimammanni. (Apustilit Suliaat 28:15) Jehovap Nalunaajaasuisa ilaata Tysklandimeersup inuusuttuaraalluni annilaangalluni tigusanut inissiarsuarmut Ravensbrückimut tikikkami ikiorneqarnini suli eqqaamavaa. Ima oqaluttuarpoq: „Uppeqatima kristumiut ilaata ingerlaannaq nassaaraanga inussiarnersumillu tikilluaqqullunga. Qatanngutip arnap aalajaatsup allap isumassorluarpaanga, uannullu anersaakkut anaananngorpoq.“

„Ilumoorit“

19. Jobip Saatanip saassussinerisa akiornissaannut suna iluaqutigaa?

¹⁹ Jehovap Jobi angutitut ’assuarnaassutsiminik aalajangiusimannittuartutut’ eqqartorpaa. (Jobi 2:3) Jobi nikallungagaluarluni aamma naalliuutiminut suna pissutaanersoq paasinngikkaluarlugu, ilumoorfiginninnini pillugu akerleriissummut pingaaruteqartumut tunngatillugu nalorninngisaannarpoq. Jobip inuunermini pingaartitani miserratigerusunngilluinnarpai. Aalajangersimalluinnarluni ima oqarpoq: „Toqussara tikillugu assuarnaattuassaanga!“ — Job 27:5, NV.

20. Sooq pinertusaarneq imminut akilersinnaava?

²⁰ Taamatut aalajangersimalluinnarutta, tamanna pissutsini qanorluunniit ikkaluartuni — ussernartorsioraluarluta, akerlilersorneqaraluarluta aamma perlussioraluarluta — assuarnaattuarnissamut iluaqutigissavarput. Jiisusip Smyrnami ilagiit ima oqarfigai: „Naalliunnissatit sioorageqinagit, Diaavulup ilasi parnaarussivimmut pisikkumaarpai misilinneqaqqullusi, naalliunnartorsiussaasilu ulluni qulini. Toqumut allaat ilumoorit, taava ajugaasumut niaqorusiussassaq inuussutaasoq ilinnut tunniukkumaarpara.“ — Saqqummersitat 2:10.

21, 22. Naalliunnitsinni pinertusaaraangatta sumik ilisimanninnerput tuppallersaatigisinnaavarput?

²¹ Pissutsit aaqqissuussaaneranni matumani Saatanimit naalakkersorneqartumi pinertusaarnerput assuarnaassuserpullu misilinneqassapput. Jiisusilli uppernarsaavigaatigut siunissap isumakuluutiginissaanut pissutissaqannginnitsinnik. Pingaaruteqarnerpaasoq tassaavoq aalajaattuarnissarput. Paulusi oqarpoq ’naalliussuserput sivikillunilu artornanngitsoq’ (1900/1961), akissarsiassarlu Jehovap uagutsinnut neriorsuutigisaa ’naalannassusiusoq angingaartoq taamalu atsigiuarluni ataavartussaq’. (2 Korinthimiut 4:17, 18) Allaat Jobip naalliunnera ukiorpassuarnut pilluarfiusunut misilinneqannginnermini misilinneqareernerminilu misigisimasaanut naleqqiullugu sivikippoq. — Jobi 42:16.

²² Inuunittali ilaani misilinneqarnerit naaffeqanngitsutut issinnaapput naalliuutillu artornartupilussuusinnaallutik. Allaaserisami tulliuttumi Jobip pinertusaarnermut tunngatillugu misilittagaanit ilinniarfigisinnaasavut suli allat misissussavavut. Aamma misissussavarput atugarliortunik qanoq nakussatsitsisinnaanerluta.

Qanoq akissavit?

• Jobip assuarnaassusianut tunngatillugu Saatanip akerleriissut pingaarutilik suna pilersippaa?

• Atugarliortarnerput sooq tupaallaatigisariaqanngilarput?

• Jehovap pinertusaarnissamut qanoq ikiortarpaatigut?

[Atuaqqissaarnermi apeqqutit]

[Qupp. 25-mi assiliartaq]

Atuaqqissaarneq, kristumiunik inersimalluartunik oqaloqateqarneq qinunikkullu uummammiugisatsinnik aniatitsineq pinertusaarnissamut iluaqutigisinnaavavut