„Jobip pinertusaarnera tusareerparsi“

„Jobip pinertusaarnera tusareerparsi paasereerlugulu [Jehovap] naggataatigut qanoq iliorfigigaa; [Jehovami] nallittuingaarpoq saammaassingaarlunilu.“ — JAAKU 5:11.

1, 2. Polenimi aappariit atugarliuutit suut naammagalugit atorpaat?

HARALD ABT ukioq ataasiunngitsoq Jehovamut nalunaajaasuusimavoq Danzig (maanna Gdańsk), Polenip avannarpasissuaniittoq, Hitlerip sakkutuuinit tiguarneqarmat. Maanna pissutsit tamaani kristumiunut ilumoortunut atoruminaallipput, aap navianarsipput. Gestapop Harald upperisaminik taamaatitsiumanerminik nalunaarummik atsiornissaanut pinngitsaaliniarsaraa, atsiorumanngilarli. Harald sapaatip-akunnialui parnaarussivimmeereerluni tigusanut inissiarsuarmut Sachsenhausenimukartinneqarpoq, tassanilu sioorasaarneqaqattaarlunilu unatarneqaqattaarpoq. Sakkutuut naalagaasa ilaata toqusut timaannik ikuallaasarfiup qanittumiittup pujoorfia tikkuarpaa oqarlunilu: „Uppernerit aalajangiusimagukku ullut 14-it qaangiutsinnagit tassanngaanniit pavunga Jehovannukassaatit.“

² Harald tigusaammat nulia, Elsa, panimminnik qulinik qaammatilimmik suli milutsitsivoq. Elsali Gestapomit malugineqanngitsuunngilaq. Sivitsunngitsoq qitornaminik arsaartippoq toqoraasarfimmullu Auschwitzimiittumut aallartinneqarluni. Ukiorpassuarnili nammineq Haraldilu inuuinnarsinnaasimapput. Vagttårnet 15. juuli 1980-imoortumi qanoq ilillutik pinertusaarsimanerat pillugu atuaqqissinnaavutit. Harald ima allappoq: „Guutimut uppernera pillugu inuuninni ukiut 14-it tigusanut inissiarsuarniinnernut parnaarussivinniinnernullu atorpakka. Ima aperineqarnikuuvunga: ’Tamakku tamaasa naammagalugit atornissaannut nuliat ilinnut iluaqutaanikuua?’ — assorsuaq iluaqutiginikuuara! Aallaqqaammulli nalunngilara uppernerminut akerliusumik iliornavianngitsoq, tamatuminngalu ilisimanninnera nakussatsissutigaara. Nalunngilara isumaqatiginngisannut akuersisimanera pissutigalugu iperagaasimaninnik ilisimanninnissaminngarnit aalajaallunga toqunissara piumanerugaa. . . . Elsap ukiorpassuarni Tysklandimi tigusanut inissiarsuarniinnermini atugarliuuterpassuit naammagalugit atorpai.“

3, 4. (a) Kristumiut kia maligassiuinera pinertusaarnissaminnut kajumississutigisinnaavaat? (b) Jobip misigisimasaanik eqqarsaatiginninnissamut sooq Biibilimi kajumissaarneqarpugut?

³ Naalliuuteqarneq imaannaanngilluinnarpoq; Jehovap Nalunaajaasuisa ilarpassuisa tamanna uppernarsarsinnaavaat. Taamaammat kristumiut tamarmik Biibilimi ima siunnersorneqarput: „Pruffiitit [Jehovap] aqqani oqalussimasut  maligassariniarsigit atugarliuutit naammagittarluni atornissaasigut.“ (Jaaku 5:10) Ukiut hundredelikkuutaat ingerlaneranni Guutimut kiffaasut ilarpassui pissutissaqanngitsumik malersorneqartarsimapput. ’Nalunaajaasut amerlaqisut’ taakku maligassiuinerat pinertusaarluta kristumiutut arpannissamut kajumississutigisinnaavarput. — Hebræerit 11:32-38; 12:1.

⁴ Jobi, Biibilimi oqaluttuarineqartoq, pinertusaarnermi maligassaavoq asseqanngitsoq. „Pinertusaartummi pilluarnerartarpavut,“ Jaaku allappoq. „Jobip pinertusaarnera tusareerparsi paasereerlugulu [Jehovap] naggataatigut qanoq iliorfigigaa; [Jehovami] nallittuingaarpoq saammaassingaarlunilu.“ (Jaaku 5:11) Jobip misigisimasaanik oqaluttuami ersersinneqatsiarpoq aalajaatsut, Jehovap pilluaqqusaasa, akissarsiariumaagaat. Sulilu pingaaruteqarnerusumik: Sallusuissutit atugarliornitta misilinneqarnittalu nalaani iluaqutigisinnaasavut paasinarsisinneqarput. Jobimik allakkat apeqqutit uku akinissaannut iluaqutigaavut: Atugarlioraangatta akerleriissutit pingaaruteqartut akuliunneqartut sooq paasiniarsarisariaqarpavut? Pissuserineqartussat isummallu suut pinertusaarnissamut iluaqutigissavavut? Uppeqativut kristumiut naalliuuteqartut qanoq nakussatsissinnaavavut?

Eqqortumik isiginnittaaseqarit

5. Misilinneqarlutaluunniit ussernartorsiortinneqaraangatta pingaarnerpaamik suna eqqarsaatigisariaqarparput?

⁵ Misilinneqarnitsinni anersaakkut oqimaaqatigiissariuarsinnaajumalluta eqqortumik isiginnittaaseqartariaqarpugut. Taamaanngippat inuttut ajornartorsiutivut anersaakkut ittunik takorluuerpiarsinnaajunnaassutigisinnaavavut. Inuit Guutimik qanoq ilumoorfiginnikkumatiginerat pillugu akerleriissut allanit tamanit pingaaruteqarnerpaavoq. Ataatatta qilammiusup tamatta immikkut uummammiuliussinnaasatsinnik qamannga pisumik ima kajumissaarpaatigut: „Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.“ (Ussatit 27:11) Immikkut pisinnaatitaaffiup asseqanngilluinnassusia! Sanngiissuteqaraluarluta aamma naammalluinnanngitsuugaluarluta Pinngortitsisoq nuannaartissinnaavarput. Jehova nuannaartittarparput taassumunnga asanninnerput pissutigalugu misilinneqarnerit naammagalugit atorsinnaanngoraangatsigik ussernartullu akiorsinnaanngoraangatsigik. Kristumiutut ilumoortumik asanninneq tamatigut ilalaartarpoq. Soraanngisaannarpoq. — 1 Korinthimiut 13:7, 8.

6. Saatanip Jehova qanoq mitallerpaa, qanorlu mitalliitigaa?

⁶ Jobimik allakkani Saatani Jehovamik mitalliisutut erseqqissumik kinaassusersineqarpoq. Tassani aamma qulaarneqarpoq akeraasup takussaanngitsup taassuma ajorniartuartuunera ersersinneqarlunilu Guutimut attaveqarunnaarsinniarsarigaatigut. Soorlu Jobimik oqaluttuami ersersinneqartoq, Saatanip Jehovamut kiffaasut tamaasa namminissarsiornerminnit siulersorneqartutut unnerluutigai, aamma uppernarsarniarsaraa taakkua Guutimik asanninnerata sanngiillisinnaanera. Ukiuni tusindilippassuarni Saatanip Jehova mitallernikuuaa. Saatani nunarsuup eqqaanut iginneqarmat nipip qilammeersup taanna ’qatanngutitta unnerluutiginnittaattut’ eqqartorpaa, taamatullu ’Guutimut unnerluutiginnittarnerarpaa ullukkut unnuakkullu’. (Saqqummersitat 12:10) Aalajaalluta pinertusaarnitsigut uppernarsarsinnaavarput taassuma unnerluutiginnissutaasa tunngavissaqannginnerat.

7. Timikkut sanngiissutivut pitsaanerpaamik qanoq akiorsinnaavavut?

⁷ Eqqaamasariaqarparput Diaavulup uagutsinnik Jehovamit qimagutititsiniarnermini naalliuutigisinnaasavut tamaasa atornerlussagai. Taassuma Jiisusi qanga usserpaa? Jiisusi ullorpassuarni iisinnginniareerluni perlilermat. (Lukasi 4:1-3) Jiisusili anersaakkut nukittuujugami Diaavulup ussiiniutai  aalajangersimalluinnarluni itigartissinnaavai. Timikkut sanngiissutip suulluunniit — immaqa nappaammik utoqqalinermilluunniit pissuteqartup — anersaakkut nukittussuseq iluaqutigalugu akiornissaata ila pingaaruteqassusia! ’Inuuserput qalleq aseroriartoraluartoq’ nikallunngilagut, ’ilorleq ullut tamaasa nutaanngoriartormat’. — 2 Korinthimiut 4:16.

8. (a) Misigissutsit nikallornartut qanoq ilillutik aseroriartuutaasinnaagamik? (b) Jiisusi qanoq ittumik isiginnittaaseqarpa?

⁸ Anersaakkut ajoqutigineqarsinnaasut allat tassaapput misigissutsit nikallornartut. Immaqa ima eqqarsartoqarsinnaavoq: ’Sooq Jehovap tamanna akueraa?’ Alla inussiarniitsumik pineqareerluni immaqa ima aperisinnaavoq: ’Qatanngut qanoq ililluni uannut taama iliorsinnaagami?’ Misigissutsit taamaattut pissutigalugit pingaaruteqarnerusut puiorsinnaavavut namminerlu atukkavut kisiisa eqqarsaatigilersinnaallugit. Jobip ikinngutiminik pingasunik kukkusumik isummertunik pakatsissutiginninnini nappaatiminik timikkut ajoquserneqarnermisulli misigissutsikkut ajoquserneqaatigitigisimannguatsiarpaa. (Jobi 16:20; 19:2) Tamatumunnga naapertuuttumik apustili Paulusi allappoq kamattuarneq ’Diaavulumik inissaqartitsisinnaasoq’, imaluunniit periarfissiisinnaasoq. (Efesosimiut 4:26, 27) Kristumiut Jiisusi ilaarunikku ’pineqarnertillu naapertuilluartumik eqqartuussisumut isumagisassanngortikkunikku’ silatusaassapput. Pakatsinertik kamannertilluunniit allanut malugitinnaveersaartariaqarpaat imaluunniit naapertuilluanngitsumik pisoqarpat tamanna sammivallaarnaveersaarlugu. (1 Petrusi 2:21-23) Jiisusip „isumaatut ittumik“ isumaqarneq Saatanip saassussinerinut illersuutaangaarsinnaavoq. — 1 Petrusi 4:1.

9. Nanertuutinut nammattariaqakkatsinnut usserneqaatigisatsinnullu tunngatillugu Guutip qanoq neriorsorpaatigut?

⁹ Pingaarnerpaamik, ajornartorsiutivut Guutimit iluarineqannginnertut isiginngisaannartariaqarpavut. Jobip, imminik tuppallersaaniaraluartunit sakkortuumik unnerluutigineqarnermi nalaani, taamatut paatsuuinini ajoqutigaa. (Jobi 19:21, 22) Biibilimi ima uppernarsaavigineqarpugut: „Guuti ajortumik misilinneqarsinnaanngilaq, namminerlu kimilluunniit ajortumik misiliisanngilaq.“ (Jaaku 1:13, NV) Jehovalli neriorsorpaatigut nanertuutigisatta suulluunniit nammannissaannut ikiorniarluta, aamma usserneqaatigisatsinnit sumilluunniit aniguisinniarluta. (Tussiaat 55:23; 1 Korinthimiut 10:13) Naalliunnitsinni Guutimut qanillinitsigut pissutsinut eqqortumik isiginnittaaseqarsinnaavugut Diaavulullu akiornissaanut nukissaqalersinnaalluta. — Jaaku 4:7, 8.

Pinertusaarnissamut iluaqutissat

10, 11. (a) Jobip misilinneqarnermi naammagalugit atornissaannut suna iluaqutigaa? (b) Jobip ilerasuuteqannginnini qanoq iluaqutigaa?

¹⁰ Jobi nuanniitsunik atugaqaraluarluni, ilaatigut ’tuppallersaasuminit’ oqaatsikkut saassutarineqarluni aamma perlussiornerminut suna pissutiviunersoq paatsiveerusimaassutigalugu, assuarnaattuarpoq. Jobip pinertusaarnera qanoq ilinniarfigisinnaavarput? Misilinneqarnerminik aniguilluarneranut pissutaalluinnartoq qularnanngitsumik tassaavoq Jehovamut aalajaannera. ’Guutimik mianerinnippoq ajortumillu iliuuseqarnaveersaarluni’. (Jobi 1:1) Tamanna inooriaaseraa. Jobip allaat paasinngikkaluarlugu sooq ingerlanerliuleriataarnerluni Jehova tunukkumanngilaa. Isumaqarpoq pissutsit atukkani qanorluunniit ikkaluarpata Guutimut kiffartortariaqarluni. — Jobi 1:21; 2:10.

¹¹ Jobip aamma ilerasuuteqannginnini tuppallersaatigaa. Toqungajalersorinarnerata nalaani, taassumunnga tuppallersaataavoq nalunagu allat ikiorniarlugit sapinngisani tamaat iliuuseqarsimalluni, Jehovap najoqqutassiaanik naapertuilluartunik maleruaasimalluni aamma pallorfiginninneq eqqunngitsoq sunaluunniit ingalassimasimallugu. — Jobi 31:4-11, 26-28.

12. Jobi Elihup ikiuineranut qanoq periarpa?

¹² Jobilli pisariaqartippaa aalajangersimasunut isiginnittaatsimi naqqinneqarnissaanut ikiorneqarnissani. Ikiorneqarnissanilu maniguulluni akueraa — tamannalu pinertusaarnerata iluatsinneranut pissutaasut suli allat ilagaat. Jobip Elihup siunnersuutai pitsaasut ataqqinnilluni tusarnaarpai Jehovallu oqaaqqissaarineranut ajunngitsumik periarluni. Ima nassuerpoq: „Oqaluuserisimavakka paasinngisakka . . . Oqaaserisimasaraluakka tamaasa utertippakka peqqissimineralu takutillugu issumi arsanilu issiallunga.“ (Jobi 42:3, 6) Jobip nappaatini suli naalliuutigigaluarlugu eqqarsartaatsimi naqqinneqarnera taamaalillunilu Guutimut qaninnerulernini nuannaarutigaa. Ima oqarpoq: „Paasivara [illit Jehova] tamanik sapigaqanngitsutit.“ (Jobi 42:2) Jehovap angingaassutsiminik oqaluttuarinninnera  iluaqutigalugu, Jobi maanna Pinngortitsisumut sanilliulluni inissisimaffimminik paasinnilluarnerulerpoq.

13. Jobip nallittuinini qanoq iluaqutigaa?

¹³ Kiisalu Jobi nallittuinermut tunngatillugu asseqanngitsumik maligassiuivoq. Jobi tuppallersaaniaraluartunit aliasutsinneqangaarpoq, Jehovalli taakkua qinnuteqqummagit taamaaliorpoq. Tamatuma kingorna Jehovap Jobi ajorunnaarsippaa. (Jobi 42:8, 10) Erseqqippoq narrutsassimaneq pinertusaarnissamut iluaqutiginavianngikkipput. Asanninnerli nallittuinerlu iluaqutigissavavut. Kamassimajunnaaraangatta anersaakkut nukissaqaleqqittarpugut, tamannalu Jehovap pilluaqqusinnaavaa. — Markusi 11:25.

Siunnersuisut silatuut pinertusaarnissamut uagutsinnik ikiuisut

14, 15. (a) Pissuserineqartussat suut iluaqutigalugit siunnersuisoq allanik nakussatsitsisinnaanngussava? (b) Nassuiaruk sooq Elihu Jobimik ikiuiniarnermini iluatsinnersoq.

¹⁴ Jobimik oqaluttuamit ilinniarfigisinnaasarput alla tassaavoq siunnersuisut silatuut pingaaruteqassusiat. Taakku qatanngutitut ’annikilliornermi ikiortissaallutik erniusimasutut’ ipput. (Ussatit 17:17) Kisianni, soorlu Jobip misigisimasaani ersertoq, siunnersuisut ilaat katsorsaanatik aliasutsitsiinnarsinnaapput. Siunnersuillaqqissoq misiginneqataasuusariaqarpoq, ataqqinnittuulluni inussiarnersuullunilu, soorluttaaq Elihu taamaassimasoq. Utoqqaanertat kristumiullu inersimalluartut allat qatanngutit ajornartorsiortut eqqarsartaatsiminnik naqqiinissaannut ikiortariaqalersinnaavaat. Tamatumunngalu tunngatillugu Jobimik allakkat iluaqutigingaarsinnaavaat. — Galatiamiut 6:1; Hebræerit 12:12, 13.

¹⁵ Elihup pissutsinik iliuuseqarfiginninnera ilinniarfigilluarsinnaavarput. Taanna naammagittarluni tusarnaaqqaarpoq Jobip ikinngutaasa pingasut oqaasiinik eqqunngitsunik akerliliinnginnermini. (Jobi 32:11; Ussatit 18:13) Elihup Jobip atia atortarpaa taanna oqaluukkaangamiuk ikinngutitullu kajumissaartarlugu. (Jobi 33:1) Elihu tuppallersaaniaraluartut pingasut assiginagit Jobimit pingaarnerusutut imminut isiginngilaq. Ima oqarpoq: „Uangattaaq marrarmit sanaajuvunga.“ Eqqarsariaqqaarnani oqalunnermigut Jobi naalliutsinnerulerusunngilaa. (Jobi 33:6, 7; Ussatit 12:18) Jobi siornatigut iliuuserisimasai pillugit isornartorsiornagu naapertuilluartuunera pillugu nersualaarpaa. (Jobi 33:32) Pingaarnerpaasorlu tassaavoq Elihup pissutsinut Guutip isiginnittaasiatut isiginnittaaseqarnera aamma Jobimik Jehovap naapertuilluanngitsumik iliunngisaannarneranik eqqaamanninnissamut ikiuinera. (Jobi 34:10-12) Jobi kajumissaarpaa nammineq naapertuilluartuunini pivallaarnagu Jehova utaqqeqqullugu. (Jobi 35:2; 37:14, 23) Utoqqaanertat kristumiut allallu Elihu ilinniarfigilluarsinnaavaat.

16. Jobimik tuppallersaaniaraluartut pingasut qanoq ilillutik Saatanimit atorneqalerpat?

¹⁶ Elihup siunnersuutai pitsaasut Elifazip, Bildadip Sofarillu oqaasiinit annernartunit allaanerulluinnarput. Taakku pingasut Jehovap ima oqarfigai: ’Eqqunngitsumik oqaluuseraassinga.’ (Jobi 42:7) Taakku ajunngitsumik siunertaqarsimaneraraluartut paasinarsivoq Saatanimit atorneqartut Jobimullu ikinngutaasutut aalajaatsuunngitsut. Taakku pingasut tamarmik aallaqqaammulli isumaqarput Jobi perlussiornerminut nammineq pisuusoq. (Jobi 4:7, 8; 8:6; 20:22, 29) Elifazi naapertorlugu Guutip kiffani tatiginngilai aamma naapertuilluartuunersugut naapertuilluartuunnginnersugulluunniit soqutiginngilaa. (Jobi 15:15; 22:2, 3) Allaat Elifazip Jobi ajortuliarisimanngisaanik ajortuliorsimanerarpaa. (Jobi 22:5, 9) Elihulli Jobi anersaakkut nakussatsippaa, tamannalu  siunnersuisut asannittut tamarmik anguniagarisariaqarpaat.

17. Misilinneqaraangatta suna eqqaamasariaqarparput?

¹⁷ Jobimik allakkat atuarnerisigut pinertusaarneq pillugu suli allamik ilikkagaqarsinnaavugut. Guutitta asannittup pissutsit atukkavut arajutsineq ajorpai, assigiinngitsutigullu ikiorumallutalu ikiorsinnaavaatigut. Elsa Abtip misigisimasai eqqartoreerpavut. Taassuma paasisaa eqqarsaatigeriaruk: „Tigusaannginninni qatanngummit arnamit allagarsiara atuarpara, taannalu allappoq sualuttumik misilinneqarnerup nalaani Jehovap anersaavata eqqissisimatitsisarnera malugineqarsinnaasoq. Eqqarsarpunga ingasattajaalaarsimassasoq. Uangali nammineq misilinneqarama paasivara taassuma allagai ilumoortuusut. Ilumut taamatut pisoqartarpoq. Tamanna nammineq misigisimanngikkaanni takorlooruminaattarpoq. Tamannali ilumut uanga misigaara. Jehova ikiuisarpoq.“ Elsap oqaluuserisaa tassaanngilaq Jehova qanoq iliorsinnaasimanersoq imaluunniit ukiut tusindit arlallit qaangiuttut Jobip nalaani susimanersoq. Uagut nalerput oqaluuseraa. Aap, „Jehova ikiuisarpoq“!

Pilluarpoq pinertusaartoq

18. Jobip pinertusaarnini qanoq iluaqutigaa?

¹⁸ Ilavut ikittuinnaat Jobip misilinneqarsimaneratut misilinneqartigiumaarput. Pissutsilli aaqqissuussaaneranni matumani misilinneqaatigisavut suugaluarpataluunniit, pissutissaqarluarpugut Jobitut assuarnaattuarnissamut. Jobi pinertusaarami inuunermini pisuunnguallappoq. Suli inutsialaanerulerlunilu pissuserinnerulerpoq. (Jaaku 1:2-4) Pinertusaarnini Guutimut attaveqarnerminut nakussatsissutigaa. Jobi ima oqarpoq: „Siornatigut allat pillutit oqaaserisaat tusallatsiaannarsimavakka, maannali nammineq isinnik takuakkit.“ (Jobi 42:5) Uppernarsarneqarpoq Saatani sallutuujusoq, Jobimi assuarnaakkunnaarsissinnaasimanngilaa. Ukiut hundredelillit arlallit tamatuma kingorna Jehovap kiffani Jobi naapertuilluarneq eqqarsaatigalugu maligassiuisutut suli eqqaasarpaa. (Ezekieli 14:14) Allaat ullumikkut Jobip assuarnaassusia pinertusaarneralu pillugit oqaluttuaq Guutip innuttaanut kaammattuutaangaartarpoq.

19. Sooq illit pinertusaarneq imminut akilersinnaasoraajuk?

¹⁹ Jaakup ukiuni hundredelinni siullerni kristumiut allaffigigamigit pinertusaarnerup nalerisimaalersitsisarnera eqqartorpaa. Aamma Jobip maligassiuinera uparuarpaa, Jehovap kiffaminik aalajaatsunik akissarsisitsingaartarneranik eqqaasinniarlugit. (Jaaku 5:11) Jobi 42:12-imi ima allassimavoq: „[Jehovap] Jobi pilluaqquaa suli siornagornit annerusumik.“ Guutip Jobi annaasaasa marloriaataannik tunivaa, taannalu pilluarluni sivisuumik inuuvoq. (Jobi 42:16, 17) Taamatulli anniaatit, naalliuutit aliasuutilluunniit pissutsit aaqqissuussaanerata matuma naggatissaata nalaani naammagalugit atorsinnaasavut tamarmik Guutip silarsuassaani nutaami peerneqarlutillu puiorneqarumaarput. (Esaja 65:17; Saqqummersitat 21:4) Jobip pinertusaarnera tusareerparput, Jehovallu ikiuineratigut Jobip maligassiaata ilaarnissaa aalajangiusimavarput. Biibilimi imaattumik neriorsuuteqarpoq: „Pilluarpoq inuk misilinneqarnermini pinertusaartoq, misilinneqarninimi attakkuniuk piumaaramiuk ajugaasumut niaqorusiussassaq inuussutaasoq Guutip asasiminut neriorsuutigisaa.“ — Jaaku 1:12. (wE 8/15 06)

Qanoq akissavit?

• Jehovap uummataa qanoq ililluta nuannaartissinnaavarput?

• Sooq isumaqassanngilagut ajornartorsiutivut Guutimit iluarisaannginnermut ersiutaasut?

• Suut Jobip pinertusaarnissaminut iluaqutigai?

• Uppeqatitsinnik nakussatsitsissagaangatta Elihup maligassiaa qanoq ilaarsinnaavarput?

[Atuaqqissaarnermi apeqqutit]

[Qupp. 30-mi assiliartaq]

Siunnersuillaqqissup allat misiginneqatigalugillu ataqqillugillu inussiarnisaarfigisarpai

[Qupp. 31-mi assiliartaq]

Elsa aamma Harald Abt