Silatusaarit Guutilu mianeralugu!

„[Jehovamik] mianerinninneq ilisimassusermut aallarniutaavoq.“ — USSATIT 9:10.

1-3. Guutimik mianerinnivinneq qanoq paasisariaqarpa?

QANGA Guutimik mianerinnittuunerarneqartarneq nersualaarneqarnertut isigineqartaraluarpoq. Ullumikkut inuppassuit isumaqarput Guutimik mianerinninneq ittangallunilu paasiuminaatsuusoq. Guutimik mianerinnivinnerup isumaa imartuvoq, allaaserisamilu matumani Guutimik mianerinninneq qanoq paasisariaqarnersoq sammissavarput.

² Oqariartaaseq ’Guutimik mianerinninneq’ Biibilimi atorneqaraangat pissutsitut kissaatiginartutut eqqartorneqartarpoq. (Esaja 11:3) Guutimik ataqqinningaarneruvoq, taassuma iluarinngisaanik iliorusunngilluinnarneq. (Tussiaat 115:11) Guutimik mianerinninneq tassaavoq Guutip ileqqussatigut najoqqutassiaanik akuerinninneq malinneqqissaarnerlu, aamma Guutip ajunngitsutut ajortutulluunniit isigisaanut inuunermik naleqqussaajumaneq. Qinerlerfissiami uparuarneqarpoq taamatut mianerinninneq „Guutimut tunngaviusumik isumaqarfiginninnermut, ilisimassuseqarluni iliuuseqarnermik aamma guutiitsuussusermik ajussusermillu sumilluunniit ingalassimanninnermik kinguneqartartumut“, ersiutaasoq. Guutip oqaasiani eqqorluartumik ima allassimasoqarpoq: „[Jehovamik] mianerinninneq ilisimassusermut aallarniutaavoq.“ — Ussatit 9:10.

³ Guutimik mianerinninneq inuup inuunerani assigiinngitsorpassuarnut attuumassuteqarpoq. Ilisimassusermut tunngaannarnani aamma nuannaarnermut, eqqissinermut, atugarissaarnermut, inuunertunermut, neriuuteqarnermut, isumalluarnermut tatiginninnermullu tunngassuteqarpoq. (Tussiaat 2:11; Ussatit 1:7; 10:27; 14:26; 22:4; 23:17, 18; Apustilit Suliaat 9:31) Uppernermut asanninnermullu tunngalluinnarpoq. Aap, Guutimut tullitsinnullu attaveqarnitsinnut tunngasut tamarmik Guutimik mianerinninnermut ilaapput. (5 Mosesi 10:12; Jobi 6:14; Hebræerit 11:7) Guutimik mianerinninnermut ilaavortaaq Ataatatta qilammiusup tamatsinnik isumassuineranik kukkussutitsinnillu isumakkeerfiginnikkumaneranik qularutiginninnginneq. (Tussiaat 130:4) Inuit ajortut peqqissimiumanngitsut kisimik Guutimik siooraginninnissamut pissutissaqarput. * — Hebræerit 10:26-31.

Jehovamik mianerinninneq ilinniartariaqarparput

4. ’Jehovamik mianerinninnerup ilinniarnissaanut’ suna iluaqutigisinnaavarput?

⁴ Silatuumik aalajangiisinnaassagaanni aamma Guutimit pilluaqquneqarsinnaassagaanni Guutimik mianerinninneq pingaaruteqarluinnarmat, taava qanoq ililluta ’ilinniarsinnaavarput Jehova [eqqortumik] mianerissallugu’? (5 Mosesi 17:19, 1900/1961) Angutit arnallu Guutimik mianerinnittut pillugit Biibilimi oqaluttuarpassuaqarpoq — oqaluttuat ’uatsinnut ilinniutissatut’ allanneqarsimasut. (Romamiut 15:4) Guutimik mianerinninnerup qanoq paasisariaqavinneranik paasinninnissamut iluaqutiginiarlugu maanna oqaluttuat taakkua ilaat misissussavarput, tassa itsaq Israelimi kunngi Daavi pillugu oqaluttuaq.

5. Daavip savanik paarsisutut sulinini Jehovamik mianerinninnermik ilinniarnissaminut qanoq iluaqutigaa?

⁵ Jehovap Israelimi kunngi siulleq, Sauli, ajattorpaa namminerminik mianerinninnani inunnut qunummat. (1 Samueli 15:24-26) Daavili Guutimik mianerinnivippoq. Tamanna inuunerani Jehovamullu qanittumik attaveqarnerani erseqqippoq. Daavi nukappiaraalluni ataatami savaataanik paarsigajuppoq. (1 Samueli 16:11) Daavip savanik paarsilluni unnuakkut qilaap ulloriaanik isiginnaartarnini Jehovamik mianerinninnermik paasinninnissaminut iluaqutigisimassavaa. Avataarsuata killeqanngitsup ilaminiinnanngua takusinnaagaluarlugu  Daavi eqqortumik isummerpoq — Guuti uatsinnit ataqqineqartariaqarlunilu pallorfigineqartariaqarpoq. Daavi kingusinnerusukkut ima allappoq: „Takugaangakkit qilak pigisat, assappit pinngortitaat, qaammat ullorissallu tassani ivertitatit, taava inuk suummat eqqaasarpiuk, inuup qitornaa suummat isumagisarpiuk?“ — Tussiaat 8:4, 5.

6. Daavi Jehovap angingaassusianik qimerluuigami qanoq misigiva?

⁶ Daavip nammineq mikissutsiminik qilammut ullorialimmut isorartuumut naleqqiussinini pissutissaqarluarluni killinneqaatigingaarpaa. Takusani annilaassutiginngilai, imatulli Jehovamik unnersiutiginninnissamut kajumississutigai: „Qilaap oqaluttuaraa Guutip naalannassusia, qilaanngusaasap nalunaarutigaa assaasa piliaat.“ (Tussiaat 19:2) Daavip taamatut Guutimik ataqqinninnini Jehovamut qaninnerulissutigaa, aamma Taassuma aqqutigeqqusaanik naammalluinnartunik ilinniarusulissutigaa taakku malissinnaaniassagamigit. Takorlooriaruk Daavi qanoq misigisimassanersoq Jehova unnersiutigigamiuk ima erinarsorluni: „Illit angingaarputit tupinnartuliortarlutillu, kisivit Guutiuvutit. Ajoqersunnga [Jehova] aqqutigeqqusannik, inuusinnaaqqullunga sallusuissutinni. Uummatima illit aqqit kisiat mianeriliuk.“ — Tussiaat 86:10, 11.

7. Daavip Guutimik mianerinninneq Goliatimut akiuunnissamut qanoq iluaqutigaa?

⁷ Filisterit Israeli isaaffigimmassuk taakkua sakkuaattartuata 3 meteringajattut angitigisup Goliatip Israelikkut asissorlugit ima oqarfigaalusooq: ’Angummik qinersigitsi uannut akiuuttussamik! Ajugaappat uagut ilissinnut inussiaataalissaagut.’ (1 Samueli 17:4-10) Sauli taassumalu sakkutuui tamarmik assut annilaarput — Daavili annilaanngilaq. Nalunngilaa inuit qanorluunniit pissaaneqartigigaluarpata siooragisassaanngitsut, Jehovali mianerisassaasoq. Daavip Goliati ima oqarfigaa: „Ornippakkit Katersaarsuit [Jehovaata] Israelip sakkutuuisa Guutiata . . . aqqani.“ Nangipporlu: ’Katersorsimasut tamarmik ilisimalissavaat panat qalugiusalluunniit Jehovap ajugaatitsinissaanut pisariaqartuunngitsut. Jehovami sorsunnermi pisussanik aalajangiisuuvoq.’ Illusaatiminik ujaqqamillu ataasiinnarmik — Jehovallu ikiuineratigut — Daavip inorujussuaq toquppaa. — 1 Samueli 17:45-47.

8. Inuit Guutimik mianerinnittut Biibilimi oqaluttuarineqartut qanoq ilinniarfigaavut?

⁸ Ajornartorsiuteqarsinnaavugut imaluunniit uagutsinnut akeraasoqarsinnaavoq Daavip nalaataatut annilaarnartigisunik. Suna iluaqutigisinnaavarput? Daavip itsarlu inuit aalajaatsut allat iluaqutigisimasaat — tassa Guutimik mianerinninneq. Guutimik mianerinninneq iluaqutigalugu inunnut qununeq ajugaaffigineqarsinnaavoq. Guutip kiffaata aalajaatsup Nehemiap nunaqqatini Israelikkuusut, akeqqaminnit tatineqartut, ima oqarluni kajumissaarpai: „Ersigeqinasigit! [Jehova] eqqarsaatigisiuk taanna angingaarmat annilaarnangaarlunilu.“ (Nehemia 4:8) Daavip, Nehemiap Guutimullu kiffaasut aalajaatsut allat Guutip suliassiissutaanik naammassinninniarnertik Jehovap ikiuineratigut iluatsippaat. Uaguttaaq Guuti mianerigutsigu iluatsissinnaavugut.

Ajornartorsiuteqaraangatta Guutimik mianerinninneq iluaqutigisarparput

9. Qanoq pisoqartillugu Daavip ersersippaa Guuti mianeralugu?

⁹ Daavip Goliatimik toqutsinerata kingorna Jehovap taanna ajugaateqattaarpaa. Saulilli Daavi sinngagilerpaa toqoriaraluarlugulu — siullermik eqqarsaqqaarnani, taava peqqusersusaarluni naggataatigullu sakkutoorpassuit peqatigalugit. Jehovap Daavi kunnginngornissaanik neriorsorsimagaluaraa, Daavi ukiorpassuarni qimaasariaqarpoq, inuuinnarumalluni tamaviaartariaqarluni Jehovamillu kunnginngortinneqarnissani utaqqisariaqarlugu. Tamakkuninnga tamanik annikilliuuteqaraluarluni Daavip ersersippaa Guuti ilumoortoq mianeralugu. — 1 Samueli 18:9, 11, 17; 24:3.

10. Daavip navianartorsiortilluni qanoq ersersippaa Guuti mianeralugu?

¹⁰ Ilaanni Daavi Akishimut filisterit nunaanni illoqarfimmi Gatimi, Goliatip inunngorfiani, kunngiusumut qimaavoq. (1 Samueli 21:11-16) Kunngip kiffaasa Daavi namminneq inuiaqatiminnut akeraanerarlugu unnerluutigaat. Daavi navianartorsiornermini qanoq periarpa? Jehovamut qinunermini uummammiugisani taassumunnga aniatippai. (Tussiaat 56:2-5, 12-14) Daavip aniguiniarluni silanngajaartuusaartariaqaraluarluni nalunngilaa ilungersuanerminik pilluaqqusilluni imminik aniguisitsisorpiaq tassaasoq Jehova. Daavip uummatikkut iluunngarluni Jehovamik tatiginninnera taassuminnga mianerinnivinneranut ersiutaavoq. — Tussiaat 34:5-7, 10-12.

11. Misilinneqarnitsinni qanoq ililluta Daavip pisimaneratut Guutimik mianerinninnermik ersersitsisinnaavugut?

 ¹¹ Daavip pisimaneratut Guutimik mianerinninnermik ersersitsisinnaavugut Jehovap ajornartorsiutitta naammagalugit atornissaannut uagutsinnik ikiuiniarnerminik neriorsuutaanik tatiginninnitsigut. Daavi ima oqarpoq: „Aqqutigisassatit [Jehovamut] isumagitikkit, tatigiuk, taava akuliukkumaarpoq.“ (Tussiaat 37:5) Imaanngilaq ajornartorsiutivut aaqqinniarlugit nammineq iliuuserisinnaasatsinnik iliuuseqarnata Jehovamut isumagitittarivut naatsorsuutigiinnarlugulu taassuma aaqqikkumaarai. Daavip Guuti qinnuigiinnanngilaa ikioqqulluni. Timikkut piginnaasani silassorissutsinilu Jehovap imminut tunniussimasai atorpai ajornartorsiutinilu aaqqinniarlugu sapinngisaminik iliorluni. Daavilli nalunngilaa inuit ilungersuutaat imminni iluatsinnissamut qulakkeerutaanngitsut. Uaguttaaq tamanna ilisimaarisariaqarparput. Iliuuserisinnaasavut tamaasa iliuuserereeraangatsigit, sinneri Jehovamut isumagitittariaqarpavut. Amerlanertigut allamik iliuuseqarsinnaaneq ajorpugut kisianni tatigalugu. Taamaakkaangat uagut nammineq Guutimik mianerinninnerput ersersittarparput. Daavip uummammit pisumik oqaatigisai tuppallersaatigisinnaavavut: „Jehovamik mianerinnittut taassuma allanut isertukkaminik oqaluttuuttarpai.“ — Tussiaat 25:14, NV.

12. Sooq qinnutivut pimooruttariaqarpavut, qanorlu isiginnittaaseqanngisaannartariaqarpugut?

¹² Taamaattumik Guutimut qinnutivut taassumunngalu attaveqarnerput pimooruttariaqarpavut. Jehovamut palligukkaangatta ’upperisariaqarparput taanna tassaareersoq ujarlersinilu akissarsisissagai’. (Hebræerit 11:6; Jaaku 1:5-8) Aamma ikioraangatigut ’qujaniartariaqarpugut’, soorlu apustili Paulusip taamaaliortaqqulluta kajumissaaraatigut. (Kolossemiut 3:15, 17) Kristumiup tanitap misilittagaqarluartup ima oqaluttuarisaatut ilinngisaannartariaqarpugut: „Guuti kiffatut qilammiusutut eqqarsaatigisarpaat. Atorfissaqartitaqaraangamik aggertinniarlugu inussatik seqqortiinnarusuttarpaat. Piumasartillu pereeraangamikku peerutitiinnarusuttarpaat.“ Taamatut isiginnittaaseqarneq Guutimik mianerinninnginnermik ersersitsineruvoq.

Guutimik mianerinninngitsooraanni

13. Daavi Guutip inatsisaanik qanoq ataqqinninngitsoorpa?

¹³ Daavip tatineqarnermini Jehovap ikiuinera malugigamiuk, Guutimik mianerinninnerulerlunilu tatiginninnerulerpoq. (Tussiaat 31:23-25) Daavili pingasoriarluni Guutimik mianerinninngitsoorpoq, tamannalu ajortorujussuarmik kinguneqarpoq. Siullermik Guutimik mianerinninngitsoorpoq  Jehovap angerusiata illerfia qamutinut ikillugu, Guutip inatsisaani peqqussutigineqartutut Levikkunnut ersutsinnagu, Jerusalemiliaatiteriaraluaramiuk. Uzzap, qamutinik ingerlassisup, illerfik nakkaqqunagu attoramiuk ataqqinnittuunnginnini pillugu ingerlaannaq toquvoq. Aap, Uzza ingasattumik ajortuliorpoq, alianartumilli taamatut pisoqarneranut pissutiviusoq tassaavoq Daavip Guutip inatsisaanik eqqortumik ataqqinninngitsoornera. Guutimik mianerinninneq taassuma innersuussineratut iliorneruvoq. — 2 Samueli 6:2-9; 4 Mosesi 4:15; 7:9.

14. Daavip Israelikkunnik kisitsisitsinera qanoq kinguneqarpa?

¹⁴ Kingusinnerusukkut Daavip Saatanimit sunnerneqarluni Israelimi angutit sakkulisarsinnaasut kisinneqartippai. (1 Nalunaarsuutit 21:1) Taamaalilluni Daavi Guutimik mianerinninngitsoorpoq, tamannalu Israelikkuusut 70.000-it toqunerannik kinguneqarpoq. Daavi peqqissimillunilu ajortuliaminik Jehovamut nassuerutiginnikkaluarluni, iliuuserisimasami kingunipilui nammineq Israelikkullu naalliuutigaat. — 2 Samueli 24:1-16.

15. Sooq Daavi kinguaassiuutitigut inuunerluppa?

¹⁵ Piffissami allami Daavip Guutimik mianerinninngikkallarnera Uriap nulianik, Batsebamik, inuunerloqateqarneranik kinguneqarpoq. Daavip nalunngilaa allasiorneq allallu aappaanik allaat pileritsaassineq eqqunngitsuliornerusoq. (2 Mosesi 20:14, 17) Daavip Batseba uffartillugu takummagu ajornartorsiut aallartippoq. Eqqortumik Guutimik mianerinninneq Daavip ingerlaannaq alassutigisussaagaluarpaa allamillu eqqarsaatiginnilissutigalugu. Taamaaliunngilarli. Batseba isigiinnavissimannguatsiarpaa pilerissutsimi Guutimik mianerinninnerminit sakkortunerulernissaata tungaanut. (2 Samueli 11:1-4; Matthæusi 5:28) Daavip puiorpaa Jehovap sulerinini tamaasa malinnaaffigeqqissaarai. — Tussiaat 139:1-7.

16. Daavip ajortuliornermi kingunipilui suut naammagittarluni atortariaqarpai?

¹⁶ Daavip Batsebamik inuunerloqateqarnera ernertaarneranik kinguneqarpoq. Tamatuma kingunitsianngua Jehovap pruffiitini Natani Daavimut aallartippaa taassuma ajortuliaa qulaarniassammagu. Daavi silattuaqigami Guutimik mianerinneqqilerpoq  peqqissimillunilu. Jehova kimigiiserfigaa igeqqunani anersaanilu illernartoq imminit peerseqqunagu. (Tussiaat 51:9, 13) Jehovap Daavi isumakkeerfigaa pillaallu sakkukillisillugu, iliuusiisali kingunipiluinut sernissunngilaa. Daavip ernera toquvoq, taamanimiillu ilaqutaani alianangaartunik pisoqartalerpoq. Tassa Guutimik mianerinninnermik puiuineq akisoqaaq! — 2 Samueli 12:10-14; 13:10-14; 15:14.

17. Iliuutsit ajortut uummatikkut qanoq aliasuutaatigisinnaanerannik assersuuteqarit.

¹⁷ Ullumikkuttaaq ileqqussanut tunngatillugu Guutimik mianerinninngikkaanni, sualuttumik sivisuumillu kingunipilutsitsisoqarsinnaavoq. Takorlooriaruk arnaq inuusuttoq qanoq misiginersoq paasigamiuk uini kristumiuusoq nunami allami sulitilluni allasiorsimasoq. Annilaarnermik aamma aliasunnermik sapilivippoq. Uia qanormita sivisutigisumik taassumannga tatigineqaleqqinniarsaralunilu ataqqineqaleqqinniarsarissava? Guutimik mianerinnivikkaanni kingunipiluit alianangaartut taamaattut pinngitsoorneqarsinnaapput. — 1 Korinthimiut 6:18.

Guutimik mianerinninneq ajortuliornaveersaarutigaarput

18. Saatanip suna anguniagaraa, aamma qanoq periaaseqarpa?

¹⁸ Saatanip silarsuarmi ileqqussatigut najoqqutarineqartut ajorsigaluttuinnarnissaat ulapputigisupilussuuaa, pingaartumillu kristumiut ilumoortut ajortunngorterusuppai. Taamaaliorniarluni uummammut isummamullu aqqut toqqaannarnerpaaq — misigissutitsigoortoq, pingaartumik isigisinnaassutitsigoorlunilu tusaasinnaassutitsigoortoq — atornerluttarpaa. (Efesosimiut 4:17-19) Assinik oqaatsinilluunniit kinguaassiuutitigut inuunerlunnermut tunngasunik inunnilluunniit kinguaassiuutitigut inuunerluttunik naammattuuigaangavit qanoq pisarpit?

19. Utoqqaanertap kristumiup Guutimik mianerinninneq ussernartup akiornissaanut qanoq iluaqutigaa?

¹⁹ Eqqarsaatigeriakkit utoqqaanertap ataataasullu kristumiup, Andrép *, Europami nakorsaasup nalaatai. André napparsimmavimmi pigaartuugaangat suleqatai arnat allagaaqqanik asanninniutinik arlaleriarlutik akisaanut kakkigussisarsimapput atoqatigeqqullutik kajumissaarlugu. Andrép taakku qaninniarnerat aalajangersimalluinnarluni itigartippaa; aamma ajortunik avatangiiseqarunnaarniarluni allami suliffissarsivoq. André Guutimik mianerinnikkami silatuumik iliorpoq, tamannalu pilluaqquneqaatigaa. Maanna nunagisamini Jehovap Nalunaajaasuisa immikkoortortaqarfianni ullup ilaannaa kiffartortarpoq.

20, 21. (a) Guutimik mianerinninneq ajortuliunnginnissamut qanoq iluaqutigisinnaavarput? (b) Allaaserisami tulliuttumi suna sammineqassava?

²⁰ Inuk aalajangersimasumik eqqarsaatipiloqartuaruni pisinnaatitaaffiginngilluinnakkaminik iliuuseqarniarluni Jehovamut erlinnartumik attaveqarunnaarumalersinnaavoq. (Jaaku 1:14, 15) Guutili mianerigutsigu inuit, sumiiffiit, sammisassat aliikkutassallu ileqqussatigut mianersorpiarunnaassutigisinnaasavut nigorsimassavavut — aap, allaat qimarratigissavavut. (Ussatit 22:3) Qanorluunniit peqqusiileqinartigissagaluarpat qanorluunniillu pilliuteqarnartigissagaluarpat Guutimit iluarisaajunnaarnissamut naleqqiullugu suunngilaq. (Matthæusi 5:29, 30) Guutimik mianerinnikkutta piaaraluta ileqqorlunnermut, ilaatigut pornomut, tunngasunik sammisaqarnianngisaannassaagut, isivulli ’naleqanngitsunit alartittassavavut’. Taamaaliorutta qularissanngilarput Jehovap ’inuuginnartikkumaaraatigut’ pisariaqartilluinnakkavullu tamaasa isumagiumaarai. — Tussiaat 84:12; 119:37, NV.

²¹ Guutimik mianerinnivinnermit siulersortinneq ilumut silatusaarnerujuaannarpoq. Aammattaaq piviusumik nuannaarnermik kinguneqartarpoq. (Tussiaat 34:10) Tamanna allaaserisami tulliuttumi erseqqissarneqassaaq.

[Quppernerup ataani ilanngussat]

Uku nassuiarsinnaavigit?

• Kristumiutut pissuserineqartussat suut Guutimik mianerinninnermut ilaappat?

• Guutimik mianerinninneq iluaqutigalugu inunnut qununeq qanoq akiorneqarsinnaava?

• Qanoq ersersissinnaavarput qinunermut eqqortumik isiginnittaaseqarluta?

• Guutimik mianerinninneq qanoq ajortuliornaveersaarutigisinnaavarput?

[Atuaqqissaarnermi apeqqutit]

[Qupp. 14-mi assiliartaq]

Daavip Guutimik mianerinninneq ilinniarpaa Jehovap pinngortitarsuata qimerloorneratigut

[Qupp. 15-mi assiliartaq]

Ilimaginngisannik ussernartorsiortinneqaleruit qanoq iliussavit?