Ilinnut iluaqutaasumik Guuti pallorfigiuk

„GUUTI qanillugu inuuneq tassa pilluarnartora,“ tussiaasiortoq Asafi taama oqarpoq. Guutimik soqutigisaqanngitsut ilorrisimaarlutik inoorusummata taakkua ilaarnissaat Asafip eqqarsaatigisimagaluarpaa. Taavali Guutimut qanilluni inuunerup ajunngitsortai eqqarsaatigilerpai paasivaalu tamanna imminut pitsaanerpaasoq. (Tussiaat 73:2, 3, 12, 28) Pallorfiginninneq ilumoortoq ilinnut aamma pitsaanerpaava? Taamaappat taava ilinnut qanoq iluaqutaasinnaava?

Imminuinnaq eqqarsaatigaluta inuunata Guutimik ilumoortumik pallorfiginnikkutta pitsaanerusumik inooriaaseqalissaagut. ’Guutimit asannittumit’ pinngortinneqaaserput pissutigalugu nammineq soqutigisavut kisiisa aallullugit pillualinngisaannassaagut. (2 Korinthimiut 13:11) Inuup pissusia pillugu ilumoortoq tunngaviusoq Jiisusip ima oqaatigaa: „Tunisineq pilluarnarneruvoq tigusinermit.“ (Apustilit Suliaat 20:35) Taamaattumik ilaquttavut ikinngutivullu pillugit iliuuseqaraangatta nuannaartarpugut. Guutili pillugu iliuuseqarneq pilluarnarnerpaajuvoq. Taanna allanit tamanit asanerusariaqarparput. Inuit assigiinngitsunik tunuliaqutallit millionilikkuutaat Guutip piumasaatut iliornikkut kiffartorfiginera nalerisimaarutigingaarpaat. — 1 Johannesi 5:3.

Inuunerup siunertaa

Pallorfiginninneq ilumoortoq aamma uagutsinnut pitsaanerpaajuvoq inuunermik siunertaqalersitsisarami. Maluginikuuiuk pilluarneq iluaqutaasumillu iliuuseqartutut misigineq imminnut atalluinnartut? Inuit amerlanersaasa inuunerminni anguniagaat ilaqutaannut, ikinngutaannut, suliffiannut sunngiffimmiluunniit soqutigisaannut tunngapput. Inuunermili nalorninartunit nuannaarunnaarsinneqarajupput. (Oqaluussisartup oqaasii 9:11) Pallorfiginninnerli ilumoortoq qutsinnerusumik inuunermi anguniagaqalersitsisarpoq nalerisimaartuaannartitsisumik, allaat inuunermi allatigut pakatsissuteqaraangatta.

Pallorfiginninneq ilumoortoq tassaavoq Jehovamik ilisarisimanninneq taassumunngalu aalajaalluni kiffartorneq. Ilumoortumik pallorfiginnittut Guutimut qanittuararsuarmik attaveqalertarput. (Oqaluussisartup oqaasii 12:13; Johannesi 4:23; Jaaku 4:8) Immaqa ilaasa takorlooruminaatsippaat Guuti ima ilisarisimatigilersinnaallugu taassumunnga ikinngutaalerlutik. Guutip inunnik qanoq pinnissimanera eqqarsaatigigaangatsigu pinngortitarsualu qimerlooqqissaaraangatsigu Jehovap pissusiisa ilaat paasisinnaavavut. (Romamiut 1:20) Allaat Guutip oqaasianik atuarnikkut paasisinnaavavut sooq pinngortitaanersugut, sooq Guutip inuit naalliunnerat akuerineraa, naalliuutillu qanoq atorunnaarsikkumaarai aamma, immaqa nuannernerpaatut, Guutip siunertaani qanoq isumaqarluartumik suleqataasinnaanersugut. (Esaja 43:10; 1 Korinthimiut 3:9) Tamakku paasigutsigik inuunerput allarluinnarmik siunertaqalissaaq!

Inummut namminermut iluaqutaasoq

Pallorfiginninnerup ilumoortup iluaqutissartaa alla tassaavoq inuttut pitsaanerulersitsisinnaanera. Guutimut eqqortumik kiffartornikkut inuttut pissuserineqartussat nuannersut ineriartortinneqartarput. Guutip erneratalu unneqqarissuunissatsinnik, akisussaassuseqartuunissatsinnik inussiarnersumillu oqaluttarnissatsinnik ilinniartippaatigut. (Efesosimiut 4:20–5:5) Guuti ima ilisarisimatigileraangatsigu asalerlugu taava ilaarusulertarparput. Biibilimi ima allassimavoq: „Guuti maligassarisiuk taassumunnga qitornaasutut asasaasutut, inuugitsilu asaqatigiillusi.“ — Efesosimiut 5:1, 2.

Guutip asannissusianik ilaarsisut akornanniilluni nuannissaqaaq, ilaa? Qujanartumik Guutimut ilumoortumut kiffartorneq kiserliornanngilaq. Eqqortuusumik ajunngitsuusumillu nuannarisaqartut attaveqarfigineqalertarput. Immaqa  aaqqissuussaasumik guutisiorneq nalorninartoqartippat. Soorlumi allaaserisap siuliani takoreeripput upperisarsioqatigiit amerlanerit aaqqissugaanerat immini ajornartorsiutaanani aaqqissueriaatsip eqqortuunnginnera eqqortumillu pissuteqarluni aaqqissuussinnginneq ajornartorsiutaapput. Upperisarsioqatigiippassuarni kristumiorpalunngitsut siuarsarneqarput, Jehovalli innuttai qutsissumik siunertaqartumik taassumannga aaqqissuussaapput. Biibilimi ima allassimavoq: ’Guuti ularussinermut Guutiunngilaq, eqqisseqatigiinnermulli.’ (1 Korinthimiut 14:33) Inuit millionilikkuutaat assigalugit immaqa misigissavat kristumiunut eqimattanut torersumik aaqqissuussaasunut ilaanerup ilinnik isumalluarnerusumik isiginnittaaseqalersitsinera.

Neriuut

Biibilimi ersersinneqarpoq Guutip pallorfiginnitsimi ilumoortut aaqqissuussaasumik ingerlanissaat isumagigaa silarsuarmik aaqqissuussinerup maanna atuuttup naggatissaani aniguisinnaaniassammata nunarsuarmillu nutaamik ’iluassutsip najugarisassaanik’ kingornussisinnaaniassammata. (2 Petrusi 3:13; Saqqummersitat 7:9-17) Taamaattumik Guuti eqqortumik pallorfigigaanni aamma neriuuteqartoqalertarpoq, tamannalu pilluassagaanni pinngitsoorneqarsinnaanngilaq. Ilaasa siunissamut isumalluarnertik politikkikkut ingerlalluarnermik, niuernikkut iluatsitsilluarnermik, peqqilluarnermik soraarninngornermillu nalerisimaarnartuuneranik tunngaveqartittarpaat. Taakkuali ilaminiinnannguisa arlaannaataluunniillu pilluarnartumik siunissaqarnissap upperinissaanut tunngavissaalluanngillat. Paarlattuanilli apustili Paulusi ima allappoq: ’Neriuffigaarput Guuti uumasoq.’ — 1 Timotheusi 4:10.

Paasiniaalluaruit Guutimik pallorfiginnittut ilumoortut nanissavatit. Silarsuatsinni avissaartuuffiusumi Jehovap Nalunaajaasuisa asaqatigiinnerat ataasiussuseqarnerallu erseqqippoq. Taakkua inuiannit tamangajanneersuupput assigiinngitsorujussuarnillu tunuliaqutaqarlutik, asaqatigiillutilli Jehovamillu asannillutik ataasiussuseqarput. (Johannesi 13:35) Qanoq misigisimanertik nammineerlutit takusinnaaniassagakku qaaqquaatsit. Asafip allanneratut ima misigipput: „Guuti qanillugu inuuneq tassa pilluarnartora.“ — Tussiaat 73:28. (wE 9/1 06)

[Qupp. 7-mi assiliartaq]

Guutimut ikinngutaalersinnaavutit