„Kissaatigisasi qanoq ittukkulluunniit Guutimut saqqummiuttarsigit“

„Kissaatigisasi qanoq ittukkulluunniit Guutimut saqqummiuttarsigit qinullusi torlulallusilu qujallusilu.“ — FILIPPIMIUT 4:6.

1. Kimut attaveqarsinnaaneq immikkut pisinnaatitaaffigaarput, aamma sooq tamanna taama nuannertigaa?

NUNAMI kunngiusumik dronningiusumilluunniit oqaloqatiginnikkumasuuguit qanormita akineqassagaluarpit? Qularnanngitsumik allattoqarfimmit akineqassaatit paasissutissinneqarlutit piffissat oqaloqatiginnittarfii pillugit aamma oqaloqatigilerukku qanoq periaaseqassanersutit. Naalakkersuisunilli tamanit qutsinnerpaamut, qilammi nunamilu Kisimi Oqartussaasumut, Jehova Guutimut tunngatillugu allaavoq. Taassumunnga palliguteriaannaavugut, sumiikkaluaraangattaluunniit aamma qaqugukkulluunniit. Qinnutit akuerineqarsinnaasut tamarmik taassumunnga anngukkumaarput. (Ussatit 15:29) Ilumut nuannissusia! Tamatumunnga periarfissaqarnitsinnik qujamasuutiginninnerput ’qinnutinik tusartartutut’ eqqortumik allaatigineqartumut aalajangersimasumik qinusarnissamut kajumississutigisariaqarparput, ilaa? — Tussiaat 65:3.

2. Qinnutit Guutimit akuerineqarsinnaassappata suut pisariaqarpat?

² Inuilli ilaat immaqa ima aperiumassapput: ’Qinnutit qanoq ittut Guutimit akuerineqarsinnaappat?’ Qinnutit tusarneqarsinnaassappata pisariaqarluinnartoq Biibilimi ima eqqaaneqarpoq: „Uppersuseqarnani Guutimit iluarisaaneq ajornaqaaq, Guutimummi pisup [palliguttup, NV] upperisariaqarpaa taanna tassaareersoq ujarlersinilu akissarsisissagai.“ (Hebræerit 11:6) Soorlu allaaserisap matuma siuliani nassuiarneqartoq, Guutimut palligunnissamut piumasaqaatit pingaarnerpaat ilaat tassaavoq upperneq. Guuti qinnutinik tusarumavoq, qinunikkulli taassumunnga palliguttut uppernikkut taamaaliortariaqarput eqqortuliortariaqarlutillu. Aamma ilumoortuusariaqarput uummatimikkullu eqqortumik isumaqartariaqarlutik.

3. (a) Guutimut kiffaasut aalajaatsut qinnutaanni erserneratut, qinnutsitsinni suut oqaatigisinnaavavut? (b) Qinoriaatsit assigiinngitsut suuppat?

³ Apustili Paulusip taamanikkut kristumiut ilungersorluni ima kajumissaarpai: „Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu.“ (Filippimiut 4:6, 7) Inuppassuit isumakuluutitik pillugit Guutimut qinusut Biibilimi oqaluttuarineqarput. Taakkua ilaat tassaapput Hanna, Elia, Hizkija Danielilu. (1 Samueli 2:1-10; 1 Kunngit 18:36, 37; 2 Kunngit 19:15-19; Danieli 9:3-21) Taakkua maligassiaat malissinnaavavut. Malugiuttaaq Paulusip oqaasiini ersermat qinoriaatsit arlaliusut. Qujaneq eqqaavaa, tassa Guutip uagut pilluta iliuuserisartagai pillugit qinunikkut Taassuminnga qutsaviginninneq. Qularnanngitsumik aamma qujaatigaluta unnersiutiginnerusuppugut. Torlulaneq tassaavoq ilungersorluni maniguullunilu qinuneq, kimigiiserluni qinuneq. Aamma aalajangersimasunik kissaateqarutta taakku saqqummiussinnaavavut. (Lukasi 11:2, 3) Ataatatta qilammiusup periaatsit tamakku atorlugit saaffiginninnivut nuannaarluni akuerisarpai.

4. Jehovap pisariaqartitavut nalunngippagit, taava sooq taakku pillugit taassumunnga qinusassaagut?

⁴ Ilaat immaqa ima aperiumassapput: ’Jehovap pisariaqartitavut tamaasa nalunngeriinnginnamigit?’ Nalunngereerpai. (Matthæusi 6:8, 32) Taavami sooq kissaatigisavut pillugit saaffigisassavarput? Tamatumunnga akissutitut ima assersuusiortoqarsinnaavoq: Pisiniarfiutillip pisiniarfiutimini pisiniartut tunissuteqarfiginissaannik neqeroorfigai, pisiniartulli taanna tunissutisiarissagunikku  pisiniarfimmukartariaqarput taannalu piumallugu. Taamaaliorumanngitsut ersersippaat soqutiginninnatik neqeroorullu qujamasuutiginagu. Qinnutitsinnut tunngatillugu aamma taamaappoq. Jehovamit qanoq ikiorneqarusunnerluta oqaatiginngikkutsigu, tamanna qujamasuppiannginnitsinnut ersiutaassaaq. Jiisusi ima oqarpoq: „Qinugitsi, taava tunineqassaasi.“ (Johannesi 16:24) Taamaalilluta ersersittarparput Guuti tatigalutigu.

Qanoq ililluta Guutimut palligutissaagut?

5. Sooq Jiisusip aqqani qinusariaqarpugut?

⁵ Jehovap uagut qanoq qinusarnissarput pillugu malittarisassarpassuarnik sukannersunik tuninngilaatigut. Ilinniartariaqarparpulli taassumunnga qanoq eqqortumik palligutissanerluta, tamannalu Biibilimi nassuiarneqarpoq. Assersuutigalugu Jiisusip ajoqersukkani ima oqarfigai: „Ataataq uanga atikkut sumik qinnuigigussiuk qinnutigisassinnik tunissavaasi.“ (Johannesi 16:23) Tassa imaappoq Jiisusip aqqani qinusassasugut. Taamaaliornitsigut Jiisusi Guutip inuiannik tamanik pilluaqqusinissaanut aqqutissatuatut akuerisarparput.

6. Qinugaangatta qanoq inissilluta qinusassaagut?

⁶ Qinugaangatta qanoq inissilluta qinusassaagut? Qinnutivut Guutimit tusarneqassappata aalajangersimasumik inissisimanissaq pillugu Biibilimi innersuussuteqanngilaq. (1 Kunngit 8:22; Nehemia 8:6; Markusi 11:25, 1900/1961; Lukasi 22:41) Guutimut qinugaanni pingaarnerpaaq tassaavoq ilumoornissaq uummatikkullu eqqortumik isumaqarnissaq. — Joeli 2:12, 13.

7. (a) Oqaaseq „amen“ qanoq isumaqarpa? (b) Sooq tamatuma qinnummi naggasiutiginissaa naleqquppa?

⁷ Qinoreeraannimi „amen“-neertarneq? Biibilimi ersersinneqarpoq tamatuma qinnummi naggasiutiginissaa amerlanertigut naleqquttuusoq, pingaartumik katersorsimasuni qinugaanni. (Tussiaat 72:19; 89:53) Oqaaseq ’amenʹ hebræerisuujuvoq isumaqarlunilu „ilumut“, „ilumuik“. McClintockip Strongillu qinerlerfissialiaanni Cyclopedia-mi nassuiarneqarpoq qinoreernermi „amen“-neeraanni taamatut oqartoqartartoq „oqaatigineqaqqammersut ilumoornerarniarlugit, aamma eqquutitinneqaqqullugit“. Tassa qinnut „amen“-imik naggaseraanni ersersinneqartarpoq oqaatigineqaqqammersut ilumoorullugit. Ilagiit sinnerlugit qinusup oqaaseq taanna naggasiutigigaangagu, tusarnaartut tusaaneqarsinnaasumik tusaaneqarsinnaanngitsumilluunniit „amen“-neersinnaapput taamaalillutillu oqaatigineqartunut qamannga pisumik akuersillutik. — 1 Korinthimiut 14:16.

8. Qinugaangatta ilaannikkut Jaakutut Aaperaatulluunniit qanoq iliorsinnaavugut, tamannalu sumut ersiutaassava?

⁸ Ilaannikkut Guutip qinnutigisatsinnik qanoq kissaatiginnitsiginerluta ersersitsinissamut periarfisseqqaartarpaatigut. Immaqa Jaakutut, pilluaqqusaajumalluni unnuaq tamaat inngilimik paannittutut, qasusuitsigisariaqarpugut. (1 Mosesi 32:25-27) Imaluunniit Aaperaatut iliortariaqarsinnaavugut, taassuma Loti naapertuilluartullu allat Sodomamiinnguatsiartut Jehovamut qinnuteqattaarpai. (1 Mosesi 18:22-33) Taamatuttaaq uagut assut pingaartitavut pillugit Jehovamut qinusinnaavugut taanna naapertuilluassutsiminik, ilumoorfiginnilluni tunniusimanerminik nallittuinerminillu atueqqullugu.

Suut qinnutigisinnaavavut?

9. Qinugaangatta suut pingaarnerpaatittariaqarpavut?

⁹ Eqqaaneqareersutut Paulusi ima oqarpoq: „Kissaatigisasi qanoq ittukkulluunniit [Nungullugit kissaatigisasi, 1900/1961] Guutimut saqqummiuttarsigit.“ (Filippimiut 4:6) Tassa imaappoq: nammineq qinnutivut inuunitsinnut tunngasunut sunut tamangajannut tunngasinnaapput. Qinnutitsinnili Jehovap soqutigisai pingaarnerpaatittariaqarpavut. Danieli tamatumani maligassaalluarpoq. Israelikkut ajortuliatik pillugit pillarneqarmata Danielip Jehova qinnuigaa nallittueqqullugu ima oqarluni: „Taamaaliorit illit nammineq pillutit, Guutiga! Tassami illoqarfik pigisat innuttatillu illit atikkut ilinnut pigititaapput.“ (Danieli 9:15-19) Uagut qinnutitsinni taamatulli ersertarpa Jehovap aqqata illernarsisinneqarnissaa piumasaatalu pinissaa pingaarnerpaatikkivut?

10. Qanoq ililluta nalunngilarput namminermut tunngasunik qinuneq pissusissamisoortoq?

¹⁰ Aammali pissusissamisoorpoq namminermut tunngasunik qinunissaq. Assersuutigalugu tussiaasiortutut Biibilimi sallusuissutinut itinerusunut tunngasunik anersaakkut paasisimasaqarnerulernissaq  qinnutigisinnaavarput. Taanna ima qinuvoq: „Paasisimasaqassusermik tuninnga maleruaqqullugit inatsisitit, naalallugillu uummatikkut iluunngarlunga.“ (Tussiaat 119:33, 34; Kolossemiut 1:9, 10) Jiisusi „qinuvoq torlulallunilu toqumit annaassisinnaasumut“. (Hebræerit 5:7) Taamaalilluni ersersippaa navianartorsioraanni misilinneqaraanniluunniit nakussatsinneqarnissap qinnutiginissaa pissusissamisoortoq. Jiisusip ajoqersukkani qinunermut najoqqutassikkamigit, namminermut tunngasut soorlu ullormut inuussutissat ajortillu isumakkeerfigineqarnissaasa qinnutigisarnissaat ilannguppai.

11. Qinuneq ussernartumut nakkaannannginnissamut qanoq iluaqutigisinnaavarput?

¹¹ Qinunissamut najoqqutassaasumut tamatumunnga ilanngullugu Jiisusi aamma ima qinoqqusivoq: „Ussernartumut pisinnata, ajortumilli annaatsigut.“ (Matthæusi 6:9-13) Kingusinnerusukkut ima oqaaqqissaarivoq: „Eqqumagitsi, qinugitsilu usserneqaqqunasi.“ (Matthæusi 26:41) Ussernartorsioraanni qinunissaq pingaaruteqartorujussuuvoq. Suligaangatta atuarfimmiikkaangattaluunniit najoqqutassianik Biibilimeersunik sumiginnaanissamut ussernartorsiorsinnaavugut. Jehovamut nalunaajaasuunngitsut kristumiunit akuerineqarsinnaanngitsunut peqataanissamut kajumissaarsinnaavaatigut. Najoqqutassianut eqqortunut akerliusumik ilioqquneqarsinnaavugut. Pissutsini taama ittuni nakkaannannginniassagatta Jiisusip siunnersuutaa malillugu qinusarutta silatusaassaagut — ussernartorsiunnginnitsinni aamma ussernartorsiortilluta.

12. Ernumanermut isumakulunnermullu pissutaasut suut Jehovamut qinunikkut saaffiginnissutigisinnaavavut, Taassumalu sunissaa naatsorsuutigisinnaavarput?

¹² Ullumikkut Guutip kiffai inuunerminni assigiinngitsunik misilinneqartarput. Nappaatit misigissutsikkullu tatineqarneq inuppassuit isumakuluutigikulasartagaasa ilagaat. Avatangiisitsinni nakuusertoqartarnera pissutigalugu ernumasarlutalu toqqissisimajunnaartarpugut. Aningaasaqarnikkut  ajornartorsiuteqarneq pissutigalugu inuunermi pisariaqartunik pinissarput ajornakusoorsinnaavoq. Pissutsini tamakkunani tamani tuppallersaataavoq nalunagu Jehova tusarnaartartoq ajornartorsiutivut taassumunnga saqqummiukkaangatsigit. Tussiaat 102:18-imi Jehova pillugu ima allassimasoqarpoq: „Tamaqanngitsut qinnutaat qiviassavaa, qinnutaat sumiginnassanngilaa.“

13. (a) Namminermut tunngasut suut qinunikkut Jehovamut saqqummiunnissaat pissusissamisoorpa? (b) Qinummik namminermut tunngasumik assersuuteqarit.

¹³ Jehovamut attaveqarnitsinnut kiffartornitsinnullu tunngasunik tamanik taassumunnga saqqummiussisarnissaq pissusissamisuussaaq. (1 Johannesi 5:14) Aappartaarnissamut suliffittaarnissamulluunniit kiffartornerulernissannulluunniit tunngatillugu aalajangigassaqaruit, Guutip siulersuinissaa qinnutigalugu tamakkua taassumunnga saqqummiunnissaannut nangaassanngilatit. Assersuutigalugu arnaq inuusuttoq Filippinerit Republikimiittoq piffissaq tamaat oqaluussisartoorusuppoq. Suliffissaqanngilarli, taamaammallu imminut pilersorsinnaanngilaq. Ima oqaluttuarpoq: „Ilaanni arfininngornerugaa pioneritut kiffartorneq eqqarsaatiginerullugu qinuvunga. Ulloq taanna kingusinnerusukkut angalaartillunga niviarsiaraq inuusuttuaraq atuakkamik neqeroorfigaara. Taanna ilimaginngisannik ima oqariataarpoq: ’Ataasinngorpat ullaakkut uanga atuarfinnukassagaluarputit.’ Aperaara: ’Sooq?’ Oqaluttuarpoq taakani sukkanerpaamik sulisussarserusuttut. Atuarfimmukarpunga ingerlaannarlu atorfinitsitaallunga. Tamakku tamarmik sukkasoorujussuarmik pipput.“ Silarsuarmi tamarmi Jehovap Nalunaajaasuisa ilarpassui taamatut aamma misigisaqartarput. Taamaammat tunuarsimaaqinak, ilumoorlutilli kissaatitit qinunikkut Jehovamut saqqummiutikkit!

Ajortuliorsimagutta qanoq iliortariaqarpugut?

14, 15. (a) Sooq ajortuliorsimasoq Guutimut qinussaassanngila? (b) Suna alla ajortuliorsimasup anersaakkut peqqissinissaanut iluaqutaasinnaava?

¹⁴ Ajortuliorsimasut Guutimut qinuneq qanoq iluaqutigisinnaavaat? Ajortuliorsimasut ilaat kanngusukkamik qinussaartarput. Tamannali silatusaarnerunngilaq. Ima erseqqissarneqarsinnaavoq: Timmisartortartup nalunngilaa tammaruni kontroltårnimut attaveqarsinnaalluni tassanngaanniillu ikiortilluni. Timmisartortartormi, tammarnermi nassuerutiginissaa kanngusuutigigamiuk, kontroltårnimut attaveqarnissaminut nangaappat? Tamanna ajunaarnersuarmik kinguneqarsinnaavoq! Taamatulli ajortuliorsimasup kanngusunnermik Guutimut ajortuliaminik nassuerutiginnilluni qinujumannginnini ajoqutigissavaa. Ajortuliorsimanermik kanngusuutiginninneq Jehovamik oqaloqateqarnissamut akornutaassanngilaq. Guutip ingasattumik ajortuliorsimasut imminut qinunissaannik allaat kajumissaarpai. Pruffiiti Esajap taamanikkut ajortuliorsimasut kajumissaarpai Jehovamik ’torlorfiginneqqullugit’, Taanna „isumakkeerfiginnittuartarmat“. (Esaja 55:6, 7) ’Jehovap kiinaanik saammarsaaniaraanni’ soorunami siullermik maniguunnissaq, ilumoorluni peqqissiminissaq ajortuliortarunnaarnissarlu pisariaqarput. — Tussiaat 119:58, NV; Danieli 9:13.

¹⁵ Ajortuliortoqarsimatillugu qinunerup pingaaruteqarneranut suli allamik pissutissaqarpoq. Anersaakkut ikiortarialik pillugu ajoqersugaq Jaaku ima allappoq: ’Ilagiit utoqqaanertaat qaaqqussavai, taakkualu qinnutissavaat. Jehovallu ajorunnaarsissavaa.’ (Jaaku 5:14, 15) Aap, ajortuliorsimasup nammineq qinulluni ajortuliani Jehovamut nassuerutigisariaqarpaa, aammali ilagiinni utoqqaanertat qinnuigisinnaavai qinnuteqqulluni. Tamanna anersaakkut peqqissinissaanut iluaqutaassaaq.

Qinnutit qanoq akineqartartut

16, 17. (a) Jehovap qinnutit qanoq akisarpai? (b) Misigisimasat suut ersersippaat qinuneq oqaluussinermut attuumassuteqarluinnartoq?

¹⁶ Qinnutivut qanoq akineqartarpat? Qinnutit ilaat erseqqissumik akineqapallattarput. (2 Kunngit  20:1-6) Qinnutit allat akiniaasaarneqarsinnaapput, aamma suut akissutigineqarnersut takujuminaassinnaapput. Jiisusip uillarneq eqqartuussisumut qinnuteqaqattaartoq pillugu assersuusiaani ersersinneqartutut, Jehovamut qinusaqattaarnissaq pisariaqarsinnaavoq. (Lukasi 18:1-8) Guutilli piumasaanut naapertuuttumik qinugaangatta, qularutigissanngilarput taassuma ima oqanngisaannarnissaa: „Pisarissersoqinanga!“ — Lukasi 11:5-9.

¹⁷ Jehovamut kiffaasut qinnutimik akineqartarnerat misigigajuppaat. Minnerunngitsumik oqaluussigaangamik. Oqaluussisartut marluk Filippinerit Republikimiittut avinngarusimasumi atuagassanik Biibililersaarutinik agguaapput. Arnaq qatanngutinit arnanit taakkunannga naqitaaqqamik tunineqarami imerlaarsivoq, imalu oqarpoq: „Ippassaq unnukkut Guutimut qinuvunga aallartitseqqullugu Biibili pillugu uannik ilinniartitsisinnaasunik, takkunnersilu qinnutinnut akissutaasoraara.“ Tamatuma kingunitsianngua arnaq taanna naalagaaffilersaarfimmi ataatsimiinnernut najuuttalerpoq. Asiap kujataata kangisissuani allami oqaluussisartup inissiarsuarni assut isumannaallisagaasuni oqaluussinissani ernumassutigaa. Jehovamulli qinuvoq, sapiilleriaramilu inissiarsuarmut iserpoq. Inissiap matuanut kasuttorpoq, arnallu inuusuttup matu ammarpaa. Pulaarnerminut pissutaasoq nassuiarmagu arnaq qissaserpoq. Taanna oqaluttuarpoq Jehovap Nalunaajaasui ujarsimallugit taakkualu nassaariniarneranni ikiorneqarnissani Guutimut qinnutigisimallugu. Oqaluussisartup nuannaarluni arnaq najukkaminni Jehovap Nalunaajaasuisa ilagiivinik atassuteqarfiginninnissaanut ikiorpaa.

18. (a) Qinnutivut akineqaraangata susariaqarpugut? (b) Qinunissamut periarfissat tamaasa atortarutsigik suna qularutigissanngilarput?

¹⁸ Qinuneq ilumut tunissutaavoq nuanningaartoq. Jehova qinnutitta tusarnaarnissaannut akinissaannullu piareersimavoq. (Esaja 30:18, 19) Jehovalli qinnutivut qanoq akinerai eqqumaffigilluinnartariaqarparput. Akigaangamitigut immaqa ilimagisatsitut iliortuaannanngilaq. Siulersuinerali malugigaangatsigu qutsaviginissaa unnersiutiginissaalu puiunngisaannartariaqarparput. (1 Thessalonikamiut 5:18) Paulusip oqaaqqissaarutaa una eqqaamasariaqarparput: „Kissaatigisasi qanoq ittukkulluunniit Guutimut saqqummiuttarsigit qinullusi torlulallusilu qujallusilu.“ Aap, Guutimik oqaloqateqarnissamut periarfissat tamaasa atortakkit. Taamaalillutit Paulusip inuit qinnutiminnik akissutisisartut pillugit oqaasiisa ukua ilumoornerat misigisarumaarpat: „Taava eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi-Jiisusimi.“ — Filippimiut 4:6, 7. (wE 9/1 06)

Qanoq akissavit?

• Qinoriaatsit assigiinngitsut suuppat?

• Qanoq qinusassaagut?

• Suut qinnutigisinnaavavut?

• Ajortuliortoqarsimappat qinuneq qanoq iluaqutaasinnaava?

[Atuaqqissaarnermi apeqqutit]

[Qupp. 15-mi assiliartat]

Qamannga pisumik qinnutit ussernartunut nakkaannannginnissamut iluaqutigaavut

[Qupp. 17-mi assiliartat]

Guutimut qinnutitsinni qujamasunnerput, isumakuluutivut kissaatigisavullu oqaatigisarpavut