’Qinnutinik tusartartumut’ qanoq palliguttoqarsinnaasoq
’Qinnutinik tusartartumut’ qanoq palliguttoqarsinnaasoq
’Illit qinnutitsinnik tusartarputit. Inuit tamarmik ornissavaatsit.’ — TUSSIAAT 65:3.
1. Inuit pinngortitanit nunarsuarmiittunit allanit suna immikkoorutigaat, tamatumuunalu sumut periarfissaqarpugut?
PINNGORTITANIT tusindilinnit nunarsuarmiittunit tamanit inuit kisimik Guutimik pinngortitsisiminnik pallorfiginnissinnaapput. Inuit kisimik nalunngilaat anersaakkut pisariaqartitaqarlutik tamannalu matussuserusuttarlugu. Tamatumuuna Ataatatsinnut qilammiusumut palligunnissamut qanittumillu attaveqalernissamut asseqanngitsumik periarfissaqarpugut.
2. Ajorti inuit Pinngortitsisiminnut attaveqarnerannut qanoq sunniuteqarpa?
2 Guutip inuk pinngortippaa Pinngortitsisiminut attaveqarsinnaasunngorlugu. Adami Evalu ajorteqaratik pinngortitaapput. Taamaammat Guuti saaffigeriaannaavaat taassumunngalu palligussinnaallutik meeqqap ataataminut palliguttarneratut. Ajortulioramilli immikkut pisinnaatitaaffik nuanningaartoq tamanna immikkut pisinnaatitaaffigiunnaarpaat. Adami Evalu Guutimut naalanngipput taassumunngalu qanittumik attaveqarnertik annaallugu. (1 Mosesi 3:8-13, 17-24) Taava imaappa Adamip kinguaavi naammalluinnanngitsut Guutimut attaveqarsinnaajunnaartut? Naamik. Jehovap taakku imminut suli palligussinnaatippai, aatsaalli piumasaqaatit aalajangersimasut naammassippatigik. Piumasaqaatit taakku suugamik?
Guutimut palligussinnaanermut piumasaqaatit
3. Inuit ajortillit qanoq ilillutik Guutimut palliguttussaappat, oqaluttuamilu sumi tamanna ersersinneqarpa?
3 Adamip ernerinut marlunnut tunngatillugu pisimasoq Guutip inummut naammalluinnanngitsumut imminut palligukkumasumut sumik piumasaqarneranik iluaqutigaarput. Kaini Abelilu Guutimut pilliuteqarlutik taassumunnga palligunniarlutik iliuuseqarput. Guutip Abelip pilliutaa iluaraa, Kainilli pilliutaa iluarinagu. (1 Mosesi 4:3-5) Sunaana assigiinngissutigigaat? Hebræerinut allakkat 11:4-mi ima allassimavoq: „Uppernikkut Abelip Guutimut sassaappaa pilliut Kainip pilliutaanit annerusoq, tamatumuunalu nalunaajaatigineqarpoq iluartuusoq.“ Tamatumani paasinarsivoq akuerineqarsinnaasumik Guutimut palligussinnaassagaanni upperneq piumasaqaataasoq. Piumasaqaat alla Jehovap Kainimut ima oqarnerani paasinarsivoq: „Ajunngitsulioruit nakimanak niaqqut makitissimasinnaavat.“ Aap, Guutip Kainip pilliutaa iluarisimassagaluarpaa Kaini allamik isumataarsimasuuppat ajunngitsuliortalerlunilu. Kainilli Guutip siunnersuutaa itigartippaa. Abeli toquppaa naggataatigullu inuiaqatigiinnit anisitaalluni. (1 Mosesi 4:7-12) Taamaalilluni inuiaat oqaluttuarisaaneranni siusissukkut erseqqissarneqarpoq uppernikkut Guutimut palligunnissaq eqqortuliornissarlu pingaaruteqartoq.
4. Guutimut palligunniarnermut tunngatillugu suna nassuerutigineqartariaqarpa?
4 Guutimut palliguterusukkaanni ajortiliuneq nassuerutigineqartariaqarpoq. Inuit tamarmik ajortiliupput, ajortilu Guutimut palligunnissamut akornutaavoq. Pruffiiti Jeremia Israelikkut pillugit ima allappoq: „[Ajortuliorpugut] . . . Nuissanik ulissimagavit qinnutinik ilinnut anngussinnaasoqanngilaq.“ (Upputit 3:42, 44) Taamaakkaluartorli Guutip piffissap ingerlanerani ersersissimavaa upperlutik imminut palliguttut, uummatimikkullu eqqortumik isumaqarlutik peqqussutiminik maleruaasut, qinnutaat tusarumallugit. (Tussiaat 119:145, 1900/1961) Misissoriartigu taakkua ilaasa suut qinnutigineraat qinnutaallu qanoq ilinniarfigisinnaanerivut.
5, 6. Aaperaap Guutimut palliguteriaasia qanoq ilinniarfigisinnaavarput?
5 Taakkua ilagaat Aaperaat. Taanna Guutimut palligunnissaminut akuerineqarpoq, Guutimmi ikinngutiginerarpaa. (Esaja 41:8) Aaperaap Guutimut palliguteriaasia qanoq ilinniarfigisinnaavarput? Ataataanerpaap aalajaatsup taassuma kingornussisussaminut tunngatillugu Jehova aperaa ima oqarluni: „Sumik tunisinnaagamma qitornaqarnanga toqusussaasunga?“ (1 Mosesi 15:2, 3; 17:18) Pisimasumi allami Aaperaap Guuti guutiitsunut Sodomamiittunut Gomorramiittunullu eqqartuussutiminik naammassinnippat kikkut annaanneqarumaarnerannik isumakuluutiginninnini oqaatigaa. (1 Mosesi 18:23-33) Aamma Aaperaat allanik qinnussisarpoq. (1 Mosesi 20:7, 17) Abelillu pisimaneratut, Aaperaat Guutimut palligukkaangami ilaannikkut pilliisarpoq. — 1 Mosesi 22:9-14.
6 Pisimasuni tamakkunani tamani Aaperaap Jehova ammasumik oqaloqatigisarpaa. Guutimulli ammasuunera Pinngortitsisumut attaveqarnermini maniguuttuuneranut attuumassuteqarpoq. Maluginiariaruk Mosesimik allakkat siulliit 18:27-mi ataqqinnippaluttumik ima oqarnera: „[Jehova], maanna kingumut sapiiserlunga ilinnut oqalulerpunga, naak issuinnaallunga arsaannaallungalu.“ Pissusia ilaagassaqqingaarami!
7. Ataataanerpaat sunut tunngasut Jehovamut qinnutigaat?
7 Ataataanerpaat assigiinngitsorpassuarnut tunngasut qinnutigisarpaat Guutimillu tusarneqartarlutik. Jaaku qinnutiminut atatillugu neriorsuivoq. Guuti qinnuigereeramiuk najoqqulluni sernigeqqullunilu, ilumoorsaarluni ima neriorsuivoq: „Uannut tunniussavit tamarmik qulingi ilinnut tunniukkumaarpakka.“ (1 Mosesi 28:20-22) Kingusinnerusukkut qatanngutini naapittussanngoramiuk sernigeqqulluni Jehova ima qinnuigaa: „Angajunnit Esauimit annaanniannga [annaanniannga-aat, 1990], ersigigakkumi; tikiulluni . . . toqorarnialeratarsinnaavaatigut.“ (1 Mosesi 32:10-13) Ataataanerpaaq Jobi meeqqani sinnerlugit pilliuteqarlunilu Jehovamut palliguttarpoq. Jobip ikinngutini pingasut sallullutik oqaatsimikkut ajortuliorsimammata Jobip taakku qinnuppai, „Jobillu qinnutaa [Jehovap] tusarpaa“. (Jobi 1:5; 42:7-9) Oqaluttuat taakku sunut tunngasunik Jehovamut qinnuteqarsinnaanitsinnik paasinninnissamut iluaqutigaavut. Aamma paasivarput Jehovap imminut eqqortumik palliguttut tusarnaarumagai.
Inatsisit tunngavigalugit angerutsip atuunnerata nalaani
8. Inatsisit tunngavigalugit angerutsip atuunnerata nalaani aalajangigassat inuiaqatigiinnut tunngasut pingaarutillit Jehovamut qanoq saqqummiunneqartarpat?
8 Jehovap Israelikkut Egyptenimit aniguisereeramigit angerfigeqatigai. Angerfigeqatigiinnerat Inatsisit tunngavigalugit angerutsimik taaneqarpoq. Tamatuma ilaatigut imarai Israelikkut palaseqatigiit toqqakkat aqqutigalugit Guutimut qanoq palligussinnaanerat pillugu malittarisassiat. Levikkut ilaat inuiaqatigiit iluaqutissaannut palasiusussatut toqqarneqarput. Inuiaqatigiinnut tunngasunik pingaarutilinnik aalajangigassaqaleraangat, inuiaqatigiinnut sinniisuusup — kunngip pruffiitilluunniit — tamanna qinunikkut Guutimut saqqummiuttarpaa. (1 Samueli 8:21, 22; 14:36-41; Jeremia 42:1-3) Assersuutigalugu naalaffik atoqqaartinneqarmat kunngi Salomo qamannga pisumik Jehovamut qinuvoq. Jehovallu ersersippaa Salomop qinnutaa akueralugu naalaffik naalannassutsiminik ulikkaarlugu imalu oqarluni: ’Siutikka matumani qinnummut naalaarumaarput.’ — 2 Nalunaarsuutit 6:12–7:3, 15.
9. Illernartuummi akuerineqarsinnaasumik Jehovamut palligussinnaanissamut suna piumasaqaatigineqarpa?
9 Inatsisini Jehovap Israelimut tunniussaani, illernartuummi Jehovamut qanoq akuerineqarsinnaasumik palliguttoqartarnera pillugu peqqussuteqarpoq. Palasiuneq ullaat unnuillu tamaasa — uumasunik pilliisoqartarnerata saniatigut — Jehovap kiinaata saani naamajuminartumik tipigissaatilliisartussaavoq. Kingusinnerusukkut palasit aamma taamatut kiffartortarput, kisianni ullormi saammaannartitsivimmiunngitsoq. Palasiuneq palasillu taamatut Jehovamik ataqqinninnerminnik ersersitsinngippata, kiffartornerat Taassumannga iluarineqarnavianngilaq. — 2 Mosesi 30:7, 8; 2 Nalunaarsuutit 13:11.
10, 11. Jehovap inuit ataasiakkaat qinnutaannik tusarnaartarneranut sumik uppernarsaatissaqarpugut?
10 Itsaq Israelimi Guutimut sinniisuusut toqqakkat aqqutigalugit taamaallaat Guutimut palliguttoqarsinnaava? Naamik, Biibilimi ersersinneqarpoq Jehovap inuit ataasiakkaat qinnutaannik tusarnaarnissani aamma iluarigaa. Naalaffiup atoqqaartinneqarnerani Salomo ima qinuvoq: „Kinaluunniit innuttavit Israelikkut ilaat qamuuna eqqorneqartutut misigisaraangat assanilu illup matuma tungaanut isatsikkaangagit, taava taakkua ilungersorlutik qinnutaat qilammi najukkanni tusartaruk.“ (2 Nalunaarsuutit 6:29, 30, 1990) Lukasip allakkamini oqaluttuaraa Johannesip Kuisisup ataataa, Zakaria, naalaffimmi tipigissaatilliitillugu inuit katersorsimasut silataani qinusut. Taamani ileqquulersimannguatsiarpoq inuit pilliivimmi kuultimik qallikkami Jehovamut tipigissaatilliisoqarnerani illernartuutip silataani katersuullutik qinusarnerat. — Lukasi 1:8-10.
11 Tassa Jehovamut eqqortumik palligukkaanni, Taanna inuiaqatigiinnut sinniisuusut qinnutaannik aamma inuit ataasiakkaat namminneq qinnutaannik tusarnaarumasarpoq. Ullumikkut Inatsisit tungavigalugit angerutsimik maleruaasussaatitaanngilagut, taamaattorli itsaq Israelikkut Guutimut palliguteriaasiat qinuneq pillugu pingaarutilimmik ilinniarfigisinnaavarput.
Kristumiutut aaqqissuussaanermi
12. Aaqqissuussineq suna aqqutigalugu kristumiut Jehovamut palligussinnaappat?
12 Maanna kristumiutut aaqqissuussaaneq malillugu inuuvugut. Palasit Guutip innuttaanut sinniisuuffigisaannik imaluunniit Guutimut qinugaangatta sammivigisinnaasatsinnik naalaffeerussimavoq. Jehovali inuit imminut palligussinnaanissaannut suli aaqqissuussaqarpoq. Aaqqissuussaq taanna suugami? Jiisusi ukiumi 29-mi u.n.k. taninneqarlunilu palasiuninngortinneqarmat naalaffik anersaakkut ittoq pilerpoq. * Naalaffik anersaakkut ittoq tassaavoq Jiisusi Kristusip ajortit matoorneqaatissaattut pilliutaa tunngavigalugu Jehovamut palligussinnaanissamut taassuminngalu pallorfiginnissinnaanissamut aaqqissuussineq nutaaq. — Hebræerit 9:11, 12.
13. Qinuneq eqqarsaatigalugu naalaffiup Jerusalemimiittup naalaffiullu anersaakkut ittup assigiissutaat suua?
13 Jerusalemimi naalaffimmut tunngasut ilarpassui naalaffimmut anersaakkut ittumut tunngasunut assigiinngitsunut assersuutaapput, ilaatigut qinunermut. (Hebræerit 9:1-10) Assersuutigalugu Illernartumi naalaffimmiittumi tipigissaat ullaakkut unnukkullu tipigissaatilliivimmi tipigissaatilliissutigineqartartoq sumut assersuutaava? Saqqummersitat naapertorlugit ’tipigissaat tassaavoq illernartut qinnutaat’. (Saqqummersitat 5:8; 8:3, 4) Daavi isumassarsisitaalluni ima allappoq: „Qinnutiga ilinnut anngulli tipigissaatilliinertut.“ (Tussiaat 141:2) Taamaammat tipigissaatilliissut naamajuminartoq kristumiutut aaqqissuussaanermi Jehovamut qinnutinut akuerineqarsinnaasunut taassuminngalu unnersiutiginninnermut assersuutissaalluarpoq. — 1 Thessalonikamiut 3:10.
14, 15. Kristumiut tanitat aamma ’savat allat’ Jehovamut palligussinnaanerat pillugu qanoq oqartoqarsinnaava?
14 Naalaffimmi anersaakkut ittumi kikkut Guutimut palligussinnaappat? Naalaffimmi Jerusalemimiittumi palasit Levikkuusullu silarlermi ilorlermi kiffartorneq immikkut pisinnaatitaaffigaat, palasilli kisimik Illernartumut isersinnaapput. Kristumiut tanitat, qilaliarnissamik neriugisallit, immikkut ittunik anersaakkut atugaqarput silarlermi ilorlermi Illernartumilu siumut assersuunneqartunik, taamatullu atugaqaramik Guutimut qinusinnaallutillu taassuminnga unnersiutiginnissinnaapput.
15 Nunarsuarmimi inuunissamik neriugisallit, ’savat allat’? (Johannesi 10:16) Pruffiiti Esajap eqqartorpaa „ullussani kingullerni“ inunnik inuiannit assigiinngitsorpassuarneersunik Jehova pallorfiginiarlugu takkuttoqarumaartoq. (Esaja 2:2, 3) Aamma allappoq ’takornartanik’ Jehovamut ilannguttoqarumaartoq, taakkuninngalu akuerinnikkumanini paasitinniarlugu Jehova oqarpoq ’illumini qinusarfimmi tipaatsutsikkumaarlugit’. (Esaja 56:6, 7) Aammattaaq Saqqummersitat 7:9-15-imi allaatigineqarput ’amerlangaartut’ ’inuiaqatigiinnit tamanit pisut’ naalaffiup anersaakkut ittup silarliani silarlermi „ullukkut unnuakkullu“ Guutimik pallorfiginninniarlutik taassumunngalu qinuniarlutik katersuussimasut. Ullumikkut Guutimut kiffaasut tamarmik taassumannga tusarneqarnissaminnik qularinninngilluinnarlutik taassumunnga palliguteriaannaanerat eqqarsaatigalugu qiimmaallannangaarami!
Qinnutit qanoq ittut Guutimit akuerineqarsinnaappat?
16. Kristumiut siulliit qinnutaat qanoq ilinniarfigisinnaavavut?
16 Kristumiut siulliit qinunerup immikkut pisinnaatitaaffiunera atorluartarpaat. Suut qinnutigisarpaat? Utoqqaanertat kristumiut Guutimit siulersorneqarnissartik qinnutigisarpaat angutinik ilagiinni akisussaaffeqalersinnaasunik toqqaassagaangamik. (Apustilit Suliaat 1:24, 25; 6:5, 6) Epafrasip uppeqatini qinnuttarpai. (Kolossemiut 4:12) Petrusi parnaarussaammat Jerusalemimi ilagiinniittut qinnuttarpaat. (Apustilit Suliaat 12:5) Kristumiut siulliit akerlilersorneqarnerminni nakimaassinnaanissartik qinnutigaat. Ima oqarput: „[Jehova], sioorasaarutaat arajutsinaveersaakkit, kiffatillu pisinnaatikkit oqaatsit siooranngivillutik [nakimanngivillutik, NV] oqaatigeqqullugu.“ (Apustilit Suliaat 4:23-30) Ajoqersukkap Jaakup kristumiut kajumissaarpai misilinneqaraangamik ilisimassuseq Guutimut qinnutigisaqqullugu. (Jaaku 1:5) Illit Jehovamut qinugaangavit tamakkununnga tunngasut ilannguttarpigit?
17. Kikkut qinnutaat Guutip tusartarpai?
17 Qinnutit ilaannaat Guutimit akuerineqarsinnaapput. Qinnutittami tusarneqarnissaat qularinagu qanoq qinusinnaavugut? Aalajaatsut itsaq Guutip tusartagai ilumoorlutik uummatimikkullu eqqortumik isumaqarlutik taassumunnga palliguttarput. Uppertuupput eqqortuliornermikkullu uppernerminnik ersersitsisarlutik. Qularutigissanngilarput Jehovap ullumikkut taamatut imminut palliguttut tusarnaarumaarai.
18. Kristumiut qinnutitik tusarneqaqqullugit piumasaqaat suna naammassisariaqarpaat?
18 Qinuneq eqqarsaatigalugu piumasaqaat suli alla naammassineqartariaqarpoq. Tamanna apustili Paulusip ima nassuiarpaa: ’Taassumuuna anersaakkut ataatsikkut ataatamut palligussinnaanngorpugut.’ Paulusip kina pivaa ima allakkami: ’Taassumuuna’? Jiisusi Kristusi pivaa. (Efesosimiut 2:13, 18, 1900/1961) Aap, Jiisusi Kristusi kisiat aqqutigalugu Ataatamut palliguteriaannaavugut. — Johannesi 14:6; 15:16; 16:23, 24.
19. (a) Qaqugukkut Jehovap Israelikkut tipigissaatilliissutaat maajugisarpai? (b) Qinnutitta Jehovamut tipigissaatilliissutitut naamajuminartutut innissaat qanoq ililluta qulakkeersinnaavarput?
19 Soorlu eqqaaneqareersoq tipigissaat palasinit Israelikkuusunit tipigissaatilliissutigineqartoq Guutip kiffaasa aalajaatsut qinnutaannut akuerineqarsinnaasunut assersuutaavoq. Ilaannikkulli Jehovap Israelikkut tipigissaatilliissutaat maajugisarpai. Tassa guutipilunnik pallorfiginniitigalutik naalaffimmi tipigissaatilliisarmata. (Ezekieli 8:10, 11) Ullumikkut aamma taamaappoq. Guutip inatsisaanut akerliusumik iliuutigalutik Guutimut kiffartornerartut qinnutaat taassumunnga narlanngunartutut ipput. (Ussatit 15:8) Taamaattumik tamatigut minguitsumik inuusa qinnutivut Guutimut tipigissaatilliissutitut naamajuminartutut inniassammata. Jehovap aqqutigeqqusaminik naapertuilluartunik maleruaasut qinnutaat iluarai. (Johannesi 9:31) Sulili allanik apeqquteqarpoq akineqartariaqartunik, soorlu: Qanoq qinussagatta? Suut qinnutigisinnaavavut? Aamma qinnutivut Guutip qanoq akisarpai? Apeqqutit taakku allallu allaaserisami tulliuttumi sammissavavut.
[Quppernerup ataani ilanngussaq]
Uku nassuiarsinnaavigit?
• Qanoq ilillutik inuit naammalluinnanngitsut akuerineqarsinnaasumik Guutimut palligussinnaappat?
• Qinugaangatta ataataanerpaat qanoq ilaarsinnaavavut?
• Kristumiut siulliit qinnutaat qanoq ilinniarfigisinnaavavut?
• Qinnutivut qaqugukkut Guutimut tipigissaatilliissutitut naamajuminartutut ittarpat?
[Atuaqqissaarnermi apeqqutit]
[Qupp. 9-mi assiliartaq]
Sooq Guutip Abelip pilliutaa iluaraa Kainillu pilliutaa iluarinagu?
[Qupp. 10-mi assiliartaq]
’Issuinnaallungalu arsaannaavunga’
[Qupp. 11-mi assiliartaq]
„Uannut tunniussavit tamarmik qulingi ilinnut tunniukkumaarpakka“
[Qupp. 12-mi assiliartaq]
Qinnutitit Jehovamut tipigissaatilliissutitut naamajuminartutut ippat?