Upperisarsiorneq sumut iluaqutaagami?

„I NUTTUT ajunngitsuusoqarsinnaavoq uppertuunngikkaluarluni!“ Taamatut isumaqarneq nalinginnaasorujussuuvoq. Inuppassuit unneqqarissut, tullerminnik asannittut akisussaassuseqartullu upperisarsiornermik soqutigisaqanngillat. Assersuutigalugu Europap kitaamiut ikittuinnaat naalagiartarput naak amerlanerit Guutimut uppertuuneraraluartut. * Allaat Latinamerikami katuullit 15-20 procentiinnaat aalajangersimasumik naalagiartartuupput.

Immaqa inuppassuit allat isumaqarnerattut isumaqarputit upperisarsiorneq inuunerup pitsaassusianut pingaaruteqanngitsoq. Soorlu kikkut tamarmik nalunngikkaat aatakkutta nalaanni inuit ullumikkuminngarnit uppernerupput. Qanoruna pisoqarmat inuppassuit upperisarsiornermik tunussisut? Uppertuunani inuttut ajunngitsoqarsinnaava? Upperisarsiornermik ilinnut iluaqutaasumik nassaassaqarpa?

Sooq inuppassuit upperisarsiornermik tunussisimanersut

Ukiuni hundredelikkuutaani arlalinni nunani kristumiuni inuit amerlanerit upperaat Guuti naalanneqartussaasoq. Naalagiartarput, palasimit siuttuuffigineqartunut ritualinut peqataanermikkut oqaluussisumulluunniit tusarnaarnermikkut, Guutimit iluarisaajumallutik. Soorunami upperisarsiornikkut ilumoortuusaarneq inuppassuarnit naluneqanngilaq. Upperisarsiornerit sorsunnernut akisussaaqataanerat, aammattaaq palasit ilaasa kanngunartumik inooriaaseqarnerat, ilisimaneqarluarpoq. Taamaattoq inuit amerlanersaasa upperisarsiornerit ajunngitsortaqartippaat. Allat paasiuminaatsortaannik, ileqqutoqaannik nipilersuutaannillu nuannarisaqarput. Allaat isumaqartoqarpoq anniarfimmi ikualasumi — Biibilimi ajoqersuutigineqanngitsumi — naassaanngitsumik tammartitaanissamik siorasaarinissamut pissutissaqartoq. Ukiulli ingerlanerini allanngornersuit pissutaallutik inuppassuit upperisarsiornernut isiginnittaasiat allanngorpoq.

Pinngoriartuaarsimanermik ajoqersuut nuannarineqalerpoq. Inuunerup nalaatsornikkut, Guutimit pinngortitaanani, pilersimanera ilaasa upperilluinnalerpaat. Guuti inuunerup puilaffigigaa upperisarsiortut amerlanersaasa qularunnaarsitsisumik nalunaajaatiginngilaat. (Tussiaat 36:10) Aammattaaq nakorsaatitigut ilisimatusarnikkut, angallatitigut atassuteqaqatigiinnikkut attaveqaqatigiinnikkullu siumukarnersuaqarpoq, taamaammallu inuppassuit isumaqalerput ajornartorsiutit tamarmik ilisimatusaatitigut aaqqinneqarsinnaasut. Aamma isumaqartoqarpoq sociologit psykologillu siunnersuinissamut upperisarsiortunit piukkunnaateqarnerusut. Guutip inatsisaanik maleruaalluni inuuneq inooriaatsinit pitsaanerpaajusoq upperisarsiortut ilinniartitsissutiginngitsoorpaat. — Jaaku 1:25.

Upperisarsiortorpassuit tusarliussaminnik allannguipput. Guutip naalanneqartussaanera ilinniartitsissutigiunnaarlugu ilinniartitsissutigilerpaat suna eqqortuunersoq sunalu eqqunngitsuunersoq inuttut nammineq aalajangertariaqaraat. Upperisarsiornikkut siuttuusut ilaasa  nuannarineqarumallutik oqaatigisarpaat inuk qanorluunniit inooriaaseqaraluaruni Guutimit iluarisaassasoq. Tamatuma Biibilimi siulittuutigineqartumik uuminnga eqqaasippaatigut: „Ullussani nalliuttussani inuit ajoqersuut peqqissinartoq naammagiunnaarumaarpaat, namminneq iluarisaminnik amerlaqisunik ajoqersuisussarsiumaarput siutimik tusarnarisaat tunngavigalugu.“ — 2 Timotheusi 4:3.

Ajoqersuutit taamaattut kajungerineqaratik maajugineqarput. Pissusissamisoortumik inuit ima aperisarput: ’Guutip pinngortitsinissamut pissaaneqarnera inatsisiliornissamullu ilisimassuseqarnera oqaluffimmit apeqquserneqarpat, taava naalagiarneq uanga sumut iluaqutigissavara? Sooq qitornakka upperisarsiornermik ilinniartissavakka?’ Inuppassuit ajunngitsumik inooriaaseqarniarsarisut upperisarsiorneq pingaaruteqanngitsutut isigilerpaat oqaluffimmillu ilaasortaajunnaarlutik. Qanoruna pisoqarmat iluaqutaasussaagaluaq iluaqutaanngitsutut isigineqalersoq? Tamanna Biibilimi nassuiarluarneqarpoq.

Upperisarsiorneq atornerlunneqaraangat

Kristumiussutsip atornerlunneqarnissaa apustili Paulusip nalimini kristumiunut mianersoqqussutigaa. Ima allappoq: „Nalunngilara . . . amaqqut qaasuttut ilissinnut tikiukkumaartut savaatinillu asattuussissanngitsut. Allaammi ilissi akornassinnit saqqummersoqarumaarpoq angutinik ilumoortuunngitsumik oqaluttunik ajoqersukkat imminnut malinnaatikkumallugit.“ (Apustilit Suliaat 20:29, 30) ’Ilumoortuunngitsumik oqaluttut’ ilagaat palasi katuuleq Augustin. Jiisusip ajoqersukkani ilinniartippai allat Allakkat atorlugit tunngavilersuillutik qularunnaarsittassagaat. Augustinilli Lukasi 14:23-mi Jiisusip oqaasiisa uku isumaat allanngortippaa: „Aallarit . . . kimigiiserfigalugit aggersinniarlugit.“ Augustinip nassuiarpaa pinngitsaaliilluni allamik isumataartitsineq ajunngitsuusoq. (Matthæusi 28:19, 20; Apustilit Suliaat 28:23, 24) Upperisarsiorneq pinngitsaaliissutitut atorpaa.

Saatani, inngili pikitsitsiumatooq, allannguisitsinermut upperisarsiornermillu atornerluinermut pisuuvoq. Ukiuni hundredelinni siullerni angutit upperisarsiortut ilagiinnik kristumiunik ajortunngortitsiniaaniarsarinissamut sunnerpai. Angutit taakkua Biibilimi ima allaatigineqarput: „Taakku apustilioqqusersuupput, kiffat ilumuunngitsut, Kristusip apustiliisut pissuseqartuusaartut. Tamannalu tupinnanngilaq, allaat Saatani nammineq qaamasumut inngiliunerarpoq. Taamaattumik eqqumiigisassaanngilaq taassuma kiffarisaattaaq kiffatut iluartutut pissuseqartuusaartarmata.“ — 2 Korinthimiut 11:13-15.

Saatanip upperisarsiortut kristumiuunerartut ileqqussatigullu oqartussaanerartut qaammarsaaneraasullu suli atortarpai nammineq najoqqutassiani malillugit, Guutip najoqqutassiai malinnagit, inuit inuulersinniarsaralugit. (Lukasi 4:5-7) Qularnanngitsumik malugisimassavat palaserpassuit atorfitsik atornerlullugu ataqqinarpaluttumik imminut taaguusersortartut uppertullu aningaasaataat pissarsiariniarsarisaraat. Aamma pissaaneqartut upperisarsiornerup aqqani innuttaasut sorsunnermi kimigiiserfigalugit imminut pilliutigitittarpaat.

Diaavulup upperisarsiorneq inuit amerlanersaasa ilimagisaannit atornerungaarpaa. Isumaqartoqarsinnaavoq upperisarsiornikkut ingasaassiniartut ikittuinnaat Saatanip piumasaatut iliortut. Biibilili  naapertorlugu ’Diaavulumik Saatanimillu taaneqartoq silarsuarmik tamarmik tammartitsivoq’. Aamma allassimavoq „silarsuaq tamarmi Ajortumut naalatsigitittoq“. (Saqqummersitat 12:9; 1 Johannesi 5:19) Upperisarsioqatigiit siuttuusunit, inunnik imminnut malinnaatitsiniaannartunit, atornerlunneqartut Guutip qanoq isumaqarfigai?

Pilliutit Jehovap nuannarinngisai

Upperisarsioqatigiit ilaanni pissuserineqartut uissuummissutigigukkit nalussanngilat Guutip ajugaqanngitsup iluarinngilluinnarai. Itsaq Israelikkut oqarnerattulli kristumiuunerartut Guutimik angerfigeqatiginninnerarput. Israelikkut ilumuunngitsiginerattulli ilumuunngitsigipput. Taamaattumik Jehova Israelikkunnik assuarinninnermisorluinnaq ullumikkut kristumiuunerartunik assuarinnippoq. Ima oqarpoq: ’Oqaatsikka naalanniarsimanngilaat inatsisikkalu asiginnarsimallugit. Uanga sussarissagakkit tipigissaatit Sabamit pisut? . . . Pilliutisi ikikkagassat nuannarinngilakka.’ (Jeremia 6:19, 20) Ilumoortuusaartut pallorfiginninnerat Guutip iluarinngilaa. Ileqqulersuutaat qinnutaallu nuannarinngilai. Israelikkunnut ima oqarpoq: „Nalliuttorsiornisi uumigaakka, tassaalermata nanertuutit nammagarineq sapilerpakka. Assasi isaakkaluarussigit isikka matussavakka, qanorluunniit qinutigigaluarussi tusassanngilassi.“ — Esaja 1:14, 15.

Nalliuttorsiornerit upperisarsiortunit kristumiunut nalliuttorsiutigisassaanerarneqartut, guutipilunnulli ataqqinaataasut, Jehovamit iluarineqarpat? Palasit Kristusip ajoqersuutaanik kimikillisitsisut qinnutaat tusartarpai? Guutip upperisarsioqatigiit inatsisiminik asiginnaasut iluarai? Qularissanngilat Israelikkut pilliutaannik nuannarinninngitsiginermisulli nalitsinni oqaluffinni ritualinik nuannarinninngitsigisoq, Israelikkummi pilliutaat pillugit ima oqarpoq: „Uanga sussarissagakkit?“

Taamaattoq Jehovap inuit eqqortuliorusuttut imminik ilumoornikkut pallorfiginnittut nuannaringaarpai. Guutip nuannaarutigisarpaa inuit ataasiakkaat taassumannga pisaminnik tamanik pingaartitsinertik ersersikkaangassuk. (Malaki 3:16, 17) Tassa apeqqutit uku qanoq akineqassappat: Guutimik pallorfiginninnani inuttut ajunngitsuusoqarsinnaava? Inuk angajoqqaani asannittut pillugit iliuuseqanngitsoq ajunngitsuunerarneqarsinnaanngilaq, ilaa? Guuti pillugu iliuuseqanngitsoq ajunngitsuunerarneqarsinnaava? Pissusissamisuuginnarpoq Guutimik ilumoortumik, inuunermik pinngortitsisumik, soqutiginnilluinnarnissarput. Allaaserisami tulliuttumi takussavarput pallorfiginninneq ilumoortoq Guutimut ataqqinaataaginnarani aammattaaq uagutsinnut iluaqutaasoq.

[Quppernerup ataani ilanngussaq]

[Qupp. 4-mi assiliartaq]

Guutip sunik tamanik pinngortitsisuuneranut uppernarsaatit upperisarsiortunit innersuussutigineqarpat?

[Qupp. 4, 5-mi assiliartaq]

Guutimut kiffaasoq uani susassaqarpa?

[Qupp. 5-mi assiliartaq]

Guutip imatut nalliuttorsiorneq qanoq isumaqarfigaa?

[Suminngaanneernerat]

AP Photo/​Georgy Abdaladze