Jehova neriuffiguuk sapiitsuullutillu

„[Jehova] neriuffiguuk, nikallornatit [sapiitsuullutillu, NV] tatitusaarit, [Jehova] neriuffiguuk.“ — TUSSIAAT 27:14.

1. Neriuuteqarneq qanoq pingaaruteqartigaa, oqaaserlu taanna Biibilimi qanoq atorneqarpa?

NERIUUT piviusoq qaamanertut qaammarissutut ippoq. Maannakkut misilinneqarnernut pissutaasunik paasinninnissamut sapiillutalu siunissamut isumalluarnissamut iluaqutigisarparput. Jehovap kisimi tutsuiginartumik neriuutississinnaavaatigut, taamaaliorporlumi oqaatsini isumassarsiarititaasoq aqqutigalugu. (2 Timotheusi 3:16) Oqaatsit neriuummut neriuuteqarnermullu tunngasut Biibilimi arlaleriaqalugit atorneqarput. Oqaatsini taakkunani pineqarput qularani ajunngitsumik qilanaarisaqarneq aamma qilanaarisaq. * Taamatut neriuuteqarneq tassaaginnanngilaq kissaateqarneq, kissaammi tunngaveqanngitsuusinnaavoq taamaattumillu piviusunngornissaa qularnarluni.

2. Neriuuteqarneq Jiisusimut qanoq sunniuteqarpa?

² Jiisusi misilinneqarlunilu annikilliortitaagaangami pissutsinut atukkaminut pissutaasut eqqarsaatigisarpai Jehovalu neriuffigalugu. „Taassuma nuannaarnissaq siunerminiittoq pillugu sanningasulik [nappagaq anniartitaaffik, NV] naammagalugu atorpaa kanngunarsaataanera soqutiginagu, maannalu Guutip issiavissaarsuata talerpiata tungaani issialluni.“ (Hebræerit 12:2) Jiisusip Jehovap kisimi oqartussaassusianik qutsissisitsinissamut aqqanillu illernarsisitsinissamut periarfissaqarnini pingaartittupilussuuaa, taamaammallu Taassumunnga naalalluinnarpoq, imminut akisunera soqutiginagu.

3. Neriuuteqarneq Guutip kiffaanut qanoq sunniuteqartarpa?

³ Kunngi Daavip neriuuteqarnerup sapiissuseqarnerullu imminnut atassuteqarnerat uparuarpaa ima oqarluni: „[Jehova] neriuffiguuk, nikallornatit [sapiitsuullutillu, NV] tatitusaarit, [Jehova] neriuffiguuk.“ (Tussiaat 27:14) Tatitusaassagutta neriuuterput takorlooruminaatsilinngisaannartariaqarparput; qilanaaralugu eqqarsaatigiuartariaqarparput  pingaartingaarlugulu. Tamanna Jiisusip sapiissusianik aallussilluarneranillu ilaarsinissamut iluaqutigissavarput, suliassaq taassuma ajoqersukkaminut suliareqqusaa peqataaffigitillugu. (Matthæusi 24:14; 28:19, 20) Neriunnermi allaat uppernermut asanninnermullu peqatigitillugu eqqaaneqarpoq pissuserineqartussat pingaaruteqangaartut pinngitsoorneqarsinnaanngitsut ilaattut Guutimut kiffaasunut ilisarnaataasutut. — 1 Korinthimiut 13:13.

’Neriuuteqangaarpit’?

4. Kristumiut tanitat taakkualu suleqataat ’savat allat’ sunik qilanaarisaqarpat?

⁴ Guutip innuttai nuanningaartumik neriuuteqarput. Kristumiut tanitat Kristusimik qilammi naalakkersueqateqarnissartik qilanaarigaat, ’savat allat’ ’nungujassusermi inussiaataanermit aniguisitaanissartik kiffaanngissusermillu Guutip qitornaasa [nunarsuarmiittut] naalannarsiffissami pisassaannik pigisaqalernissartik’ neriuutigaat. (Johannesi 10:16; Romamiut 8:19-21; Filippimiut 3:20) ’Kiffaanngissutsimut’ tamatumunnga ilaavoq ajortimit taassumalu kingunerinit tataannartunit aniguisitaanissaq. Jehovap — ’tunissutinik ajunngitsunik naammalluinnartuusunillu tamanik’ Tunisisartup — kiffani ilumoorfiginnittut tunissummik tamatuminnga allanit tamanit pitsaanerusumik tuniumaarpai. — Jaaku 1:17; Esaja 25:8.

5. Qanoq ililluta ’neriuuteqangaalertarpugut’?

⁵ Kristumiutut neriuuterput ulluinnarni uagutsinnut qanoq sunniuteqartigissava? Romamiunut allakkat 15:13-imi ima allassimavoq: „Guutip neriuuteqartitsisup immerlisi tipaatsungaarnermik eqqissinermillu uppernermi, neriuuteqangaalersillusi Anersaap Illernartup pissaaneragut!“ Aap, kristumiutut neriuut qaamanermut — naneruummut taartumi ikumasumuunngitsoq, seqernulli nuisup qaamarnanut qaammarissumut — assersuunneqarsinnaavoq. Tamanna uagutsinnik qamuuna eqqissisitsillunilu pillualersitsivoq, inuunitsinnik siunertaqarlualersitsillunilu uagutsinnik sapiillisitsivoq. Maluginiariaruk ’neriuuteqangaalertartugut’ Guutip oqaasia allanneqarsimasoq upperileraangatsigu anersaavanillu illernartumik tunineqaraangatta. Romamiunut allakkat 15:4-mi ima allassimavoq: „Siornatigummi allagaasut tamarmik allassimapput uatsinnut ilinniutissaallutik, nikallujuilluta Allakkallu tunissutaat tuppallersaatigalugit neriuuterput aalajangiussinnaaqqullugu.“ Taamaammat imminut ima aperigit: ’Ullut tamaasa Biibilimik atuartarnikkut atuaqqissaartarnikkullu neriuutiga takorlooruminartillugulu ’uummaaritsippara’? Guutip anersaava akuttunngitsumik qinnutigisarpara?’ — Lukasi 11:13.

6. Neriuuterput takorlooruminartittuarumagutsigu suna mianersorfigisariaqarparput?

⁶ Jiisusip, maligassaalluarnerpaap, Guutip oqaasia nakussatsissutigaa. Taassuma maligassiaata eqqarsaatigeqqissaarneratigut ’qasulernaveersaarsinnaallutalu nikallornaveersaarsinnaavugut’. (Hebræerit 12:3) Neriuuterput Guutimit tunniunneqartoq isummatsigut uummatitsigullu takorlooruminaatsilerutsigu allalluunniit — immaqa pigisanik noqqaassutiginninneq silarsuarmiluunniit matumani anguniakkat — allamut saasaatigigutsigit, anersaakkut qasoqqalersinnaallutalu ileqqussatigut najoqqutassiat naapertorlugit inuunissamut nukissaarullutalu sapiissuseerussinnaavugut. Taamaakkutta allaat ’uppersutsitsinni umiiaratarsinnaavugut’. (1 Timotheusi 1:19) Piviusumilli neriuuteqarneq uppernerulissutigissavarput.

Neriunneq — uppernerup ilaa pingaarutilik

7. Sooq neriunneq uppernermut pingaaruteqarpa?

⁷ Biibilimi ima allassimavoq: „Upperneq tassaavoq neriugisamik tatiginnilluinnarneq, takunngisamik qularuteqannginneq.“ (Hebræerit 11:1) Taamaattumik neriunneq uppernermut tapertaannaanani, uppernerup ilagaa pingaarutilik. Aaperaap maligassiaa eqqarsaatigeriartigu. Taanna Saralu ernertaarnissaminnik Jehovamit neriorsorneqaramik inuup isiginnittaasia malillugu meerartaarsinnaajunnaareerput. (1 Mosesi 17:15-17) Aaperaat qanoq periarpa? „Neriunartoqanngikkaluartoq neriulluni upperpoq inuiappassuarnut ataataalerumaarluni.“ (Romamiut 4:18) Aap, Aaperaap neriuutaa Guutimit tunniunneqartoq taassuma kinguaaqalerumaarnerminik upperinninneranut tunngavissiilluarpoq. Tamatuma kingunerisaanik uppernera neriuutaanik nakussatsitsillunilu qularnaannerulersitsivoq. Aaperaat Saralu allaat angerlarsimaffimmik ilaquttamillu qimannissaannut inuunermillu sinneranni nunami allami tuperni najugaqarnissamut sapiissuseqarput.

8. Aalajaalluta pinertusaaraangatta neriuuterput qanoq nakussatsinneqartarpa?

 ⁸ Aaperaat, aamma artornartikkaluaraangamiuk, Jehovamut naalalluinnarnermigut neriuttuarpoq. (1 Mosesi 22:2, 12) Jehovamut naalakkutta pinertusaaruttalu uaguttaaq akissarsisinneqarnissarput qularinngilluinnassavarput. Paulusi allappoq „nikallujuissutsip“ pilersittaraa „aalajaatsunngorneq“, tamatumalu neriugisaqarneq, „neriunnerlu taanna pakatsisitsissanngilaq“. (Romamiut 5:4, 5) Taamaattuminguna Paulusi aamma ima allattoq: „Kissaatigingaarparput tamarluinnassi pisarnissitut eqiasuissasusi, naggatissaq tikillugu neriuutersi qularinngilluinnarniassagassiuk.“ (Hebræerit 6:11, NV) Taamatut isumalluartumik isiginnittaaseqarneq, Jehovamut qanittumik attaveqarnermik tunngavilik, atugarliornerit suulluunniit sapiilluta nuannaarlutalu naammagalugit atornissaannut iluaqutigisinnaavarput.

„Neriunnissinni tipaatsugitsi“

9. ’Neriunnitsinni tipaatsuttuarniarluta’ suna iliuuseriuarsinnaavarput?

⁹ Guutip uagutsinnut neriuutissiissutaa silarsuup neqeroorutigisaanik tamanik qimmuivoq. Tussiaat 37:34-mi ima kajumissaarneqarpugut: „[Jehova] neriuffiguuk aqqutigeqqusaalu atuarlugu, taava nunamik kingornussisussanngortikkumaarpaatit, takujumaarpallu iluanngitsut piiagaanerat.“ Aap, ’neriunnitsinni tipaatsunnissamut’ pissutissaqarluarpugut. (Romamiut 12:12) ’Neriunnitsinnili tipaatsussinnaajumalluta’ neriuuterput qilanaaralugu eqqarsaatigiuartariaqarparput. Illit neriuutit Guutimit tunniunneqartoq eqqarsaatigeqqissaartarpiuk? Takorloorsinnaaviuk illit nammineq Paratiisimiittutit, peqqillutillu inuummarillutit, isumakuluuteqarnak, inunnit asasannit najorneqarlutit suliamillu nalerisimaarnarluinnartumik suliaqarlutit? Assit Paratiiserpalaartut atuagassaatitsinniittut eqqarsaatigisarpigit? Taamatut eqqarsaatiginnilluartarneq aalajangersimasumik igalaamik isikkivigissumiittumik qillersaasarnermut assersuunneqarsinnaavoq. Igalaaq qillersartanngikkutsigu ipeqarnermik ersernerlussissaaq itsuartorfiginissaalu kajungernarunnaassalluni, taava allat maluginiarnerulersinnaavavut. Qanortoq taamatut pisoqarnissaa akuerinngisaannarisigu!

10. Sooq akissarsiassamik qilanaarinninnerput Jehovamut attaveqarnitsinnut nakussatsissutaava?

¹⁰ Soorunalimi Jehovamut kiffartornitsinnut pissutaasoq pingaarnerpaaq tassaavoq taassuminnga asanninnerput. (Markusi 12:30) Aammattaarli akissarsiassaq qilanaarisariaqarparput. Allaat Jehovap taamaaliornissarput piumasaraa! Hebræerinut allakkat 11:6-imi ima allassimavoq: „Uppersuseqarnani Guutimit iluarisaaneq ajornaqaaq, Guutimummi pisup upperisariaqarpaa taanna tassaareersoq ujarlersinilu akissarsisissagai.“ Sooq Jehovap kissaatigaa uagutsinnik akissarsisitsisutut isigissagitsinni? Taamaalilluta ersersittaratsigu Ataatarput qilammiusoq ilisarisimalluarlutigu aamma nalunngikkipput tukkortuullunilu qitornaminik asannittuusoq. Eqqarsaatigeriaruk qanoq pilluaatsigalutalu nikallujatigissasugut ’siunissaqarnatalu neriuutissaqanngitsuugutta’. — Jeremia 29:11.

11. Mosesip Guutip neriorsuutai isumatusaartumik aalajangiinissaminut qanoq iluaqutigai?

 ¹¹ Mosesi neriuummik Guutimit tunniunneqartumik qilanaarluni eqqarsaatiginninnermut tunngatillugu asseqanngilluinnartumik maligassiuivoq. ’Faraop paniata ernerimmani’ periarfissarpassuaqarpoq. Pissaaneqalersinnaavoq, ataqqisaalersinnaavoq Egyptenillu pisuussutaanik tamanik pissarseqataasinnaalluni. Tamakkua anguniassavai, imaluunniit Jehovamut kiffartussava? Mosesip sapiilluni kingulleq aalajangiuppaa. Sooq? ’Akissarsiassap tunniunneqarnissaa qilanaaralugu utaqqiuaramiuk’. (Hebræerit 11:24-26, NV) Aap, Mosesip Jehovap imminut neriuutissiissutaa soqutigisupilussuuaa.

12. Kristumiutut neriuut sooq niaqorornaveeqqutitut ippa?

¹² Apustili Paulusip neriuut niaqorornaveeqqummut assersuuppaa, eqqarsarsinnaassutsitsinnik illersuisarmat, uagutsinnik isumatusaartumik aalajangiisinnaanngortitsisarmat, pingaarnersiuilluarsinnaanngortitsisarmat assuarnaattuarsinnaanngortitsisarlunilu. (1 Thessalonikamiut 5:8) Niaqorornaveeqqutit assersuutaasoq atortuaannarpiuk? Atortuaannarukku ’pisuussutit allanngujasut isumalluutiginavianngilatit, isumalluutigissavalli Guuti pisariaqakkatsinnik naammattunik tunniussisoq’. Nuannaartorineqartunut maleruutiinnassanngikkaanni namminissarsiornaveersaassagaannilu sapiitsuusariaqarpoq, tamannali imminut akilersinnaalluarpoq! Jehovamimmi asannillutillu neriuffiginnittut pissaannit, ’inuunivimmit’, sullunarnerusoq sooq naammagiinnarneqassava? — 1 Timotheusi 6:17, 19.

„Iperassanngilakkit“

13. Jehovap kiffani ilumoorfiginnittut qanoq neriorsoqqissaarpai?

¹³ Inuit pissutsit aaqqissuussaanerannik maanna atuuttumik neriuffiginnittut nalaattakkatik ajortut qularnanngitsumik assut eqqarsaatigisarpaat, ’nallisitsinerimmi’ silarsuarmi misigineqartartut ingasatsikkaluttuinnarput. (Matthæusi 24:8) Tamakkuli Jehovamik neriuffiginnittut siooraginngilaat. Taakku ’aarlerinaatsumik najugaqartuassapput eqqissillutillu inuussallutik perlussanik aarlerigisaqarnatik’. (Ussatit 1:33) Pissutsinik aaqqissuussaaneq maanna atuuttoq neriuffiginnginnamikku Paulusip kajumissaarutaa una nuannaarlutik malippaat: „Aningaaserituussutsissi qanoq inuunissarsi aalajangissanngilaa, pigisasili naammagisigit. Guutimi nammineq oqarpoq: ’Iperassanngilakkit imminiiginnassanallu.’“ — Hebræerit 13:5.

14. Sooq kristumiut timikkut pisariaqartitatik ingasattumik isumakuluutigisariaqanngilaat?

¹⁴ Allassimaffimmi tamatumani erseqqippoq Guutip isumassorumaaraatigut. Jiisusip aamma Guutip asannilluni isumassuisuuneranik uppernarsaavigaatigut ima oqarluni: „Guutip naalagaaffia iluarneralu ujaqqaarsigit, taava tamakku tamarmik ilanngullutik ilissinnut tunniunneqarumaarput. Taamaattumik aqagussaq isumakuluutigeqinasiuk; aqagussaq nammineq piminik isumakuluutissaqassaaq.“ (Matthæusi 6:33, 34) Jehovap nalunngilaa ullormut pisariaqartitatsinnik isumaginniitigaluta naalagaaffimminik ilungersuutiginninnerput uagutsinnut qanoq unamminiarnartigisoq. Taamaattumik taassuma pisariaqartitatsinnik matussusiisinnaanera matussusiiumaarneralu qularutiginngilluinnartigu. — Matthæusi 6:25-32; 11:28-30.

15. Kristumiut qanoq ilillutik ’isiminnik tappissuutitsisarpat’?

¹⁵ Jehovamik tatiginninnerput ersersittarparput ’isitsinnik tappissuutitsinitsigut’. (Matthæusi 6:22, 23, NV) Isi tappissoq eqqortuliorusuttuuvoq, minguitsumik pissutiginiagaqarpoq, pilerissuseqanngilaq namminissarsiortumillu anguniaqarnani. Tappissumilli iseqarneq piitsuulluinnartutut inuuniarluni aalajangernertut imaluunniit kristumiutut pisussaaffinnik sumiginnaanertut paasisariaqanngilaq. Isumakkulli peqqissuunertut Jehovamullu kiffartornermik salliutitsinertut paasisariaqarpoq. — 2 Timotheusi 1:7.

16. Isi tappissuutinniarlugu sooq uppertuunissaq sapiitsuunissarlu pisariaqarpa?

¹⁶ Isi tappissuutissinnaajumallugu uppertuusariaqarlunilu sapiitsuusariaqarpoq. Assersuutigalugu sulisitsisup kristumiut ataatsimiinnerisa nalaanni sulisaqqullutit kimigiiserfigippatit qanoq iliussavit? Sapiillutit anersaakkut ittut pingaarnerpaatittuassavigit? Inuk Jehovap kiffaminik isumaginnikkumaarnerminik neriorsuutiminik eqqortitsiumaarneranik qularinnittoq, Saatani tatisinerulerpat ataatsimiigiassaariaannaavoq. Aap, uppernikikkutta Saatani, Jehovaanngitsoq, suup uagutsinnut pingaaruteqarnerpaaneranik aalajangiisuulersinnaavoq. Tamanna alianarluinnassaaq! — 2 Korinthimiut 13:5.

 „Jehova neriuffiguuk“

17. Jehovamik tatiginnittut maannangaaq qanoq pilluaqquneqarpat?

¹⁷ Biibilimi erseqqissarneqarpoq Jehovamik neriuffiginnillutillu tatiginnittut ajugaaffigineqanngisaannassasut. (Ussatit 3:5, 6; Jeremia 17:7) Ilumoorpoq ilaannikkut pissakilliornerusariaqarsinnaasartut, tamannali pilluaqqussutisiariumaakkaminnut sanilliullugu pilliutitut suunngitsuaqqatut isigaat. Taakku ’Jehovamik neriuffiginninnertik’ taassumalu naggataatigut ilumoorfiginnitsimi uummataasa qinnutigisaannik ajunngitsunik tamanik tuniusiumaarneranik qularutiginninnginnertik ersersippaat. (Tussiaat 37:4, 34) Taamaattumik maannangaaq pilluarneq piviusoq misigaat. „Iluartut pisassaraat tipaatsunneq, iluanngitsulli neriuutaarunneq.“ — Ussatit 10:28.

18, 19. (a) Qanoq Jehovap asannilluni neriorsoqqissaarpaatigut? (b) Qanoq ililluni Jehova ’talerpitta tungaaniittuarsinnaava’?

¹⁸ Nukappiarannguaq ataatani tasioraangamiuk toqqissisimasarpoq. Uaguttaaq taamatut misigisarpugut Ataatarput qilammiusoq saqeqatigigaangatsigu. Jehovap Israelikkut ima oqarfigai: „Siooraqinak ilagigakkit . . . ikiorlutillu. Uangami tassaagama [Jehova] Guutit talerpikkut tigussavakkit oqarfigalutillu: ’Siooraqinak, ikiortigaarma.’“ — Esaja 41:10, 13.

¹⁹ Assersuut killitsinnangaarami — Jehovap assatsigut tigugaatigut! Daavi ima allappoq: „[Jehova] takkunniitittuaannarpara, taanna talerpimma tungaaniippoq, patajalernavianngilangalu.“ (Tussiaat 16:8) Jehova ’talerpitta tungaaniitittuarniarlugu’ qanoq iliorsinnaavugut? Iliuuserineqarsinnaasut marluupput. Siullermik, inuunermi sutigut tamatigut oqaasianit siulersortittariaqarpugut, aappassaanillu, Jehovap uagutsinnut akissarsiassarititaa nuanningaartoq qilanaarisinnaavarput. Tussiaasiortoq Asafi ima erinarsorpoq: „Maanna ilinniittuaannarpunga, talerpiga tigummivat. Ilitsersuutikkut ingerlatissavarma, naalannassusermukaatissavarma.“ (Tussiaat 73:23, 24) Taamatut uppernarsaavigineqaratta siunissamut isumalluarsinnaavugut.

’Aniguisitaanissarsi qanillivoq’

20, 21. Jehovamik neriuffiginnittut qanoq siunissaqarpat?

²⁰ Ullut ingerlatillugit Jehovap talerpitta tungaaniitinnissaa pingaaruteqarneruleraluttuinnarpoq. Qanittukkut Saatanip silarsuaa asseqanngitsumik naalliussaaq, tamannalu upperisarsiornerup eqqunngitsup aserorneqarneranik aallarnerneqassaaq. (Matthæusi 24:21) Inuit Guutimik tunussisimasut annilaangalissapput. Paatsiveerunnersuaqartilluguli Jehovamut kiffaasut sapiitsut neriuut nuannaarutigissavaat. „Tamakku pilerpata,“ Jiisusi oqarpoq, „nikuigitsi niaqqusilu massitsillugit aniguisitaanissarsimi qanillimmat.“ — Lukasi 21:28.

²¹ Aap, Guutip uagutsinnut neriuutissiissutaa nuannaarutigisigu Saatanillu peqqusersusaarluni allamut saasaareriaraluarnerinit salloqittarneqarteqinata nakutitaaqinatalu. Tamakkununngalu peqatigitillugu uppernermik, asanninnermik Guutimillu mianerinninnermik ineriartortitsinissaq suliniutigersuataartigu. Taamaaliorutta pissutsini qanorluunniit ittuni Jehovap naalannissaanut Diaavulullu akiornissaanut sapiissuseqassaagut. (Jaaku 4:7, 8) Aap, „nikallornasi [sapiillusilu, NV] tatitusaaritsi, tamassi [Jehovamik] neriuffiginnittusi“. — Tussiaat 31:25. (wE 10/1 06)

[Quppernerup ataani ilanngussaq]

Qanoq akissavit?

• Jiisusip neriuutini qanoq sapiinnerulissutigaa?

• Upperneq neriunnerlu imminnut qanoq attuumassuteqarpat?

• Neriunneq uppernerlu silatusaartumik pingaarnersiuinissamut qanoq sapiissuseqalersitsisinnaappat?

• Sooq ’Jehovamik neriuffiginnittut’ siunissamut isumalluarsinnaappat?

[Atuaqqissaarnermi apeqqutit]

[Qupp. 20-mi assiliartaq]

Inuusuttuugaluaruit utoqqaagaluaruilluunniit, takorloorsinnaaviuk illit nammineq Paratiisimiillutit?