Jehovap oqaasia uumavoq

Oqaluussisartup oqaasiinit pingaarnersat

„INUK arnamit erniusoq inuunikittarpoq eqqissinaatsorsiortaqalunilu.“ (Jobi 14:1) Inuunitta sivikitsup pilersaarutinut noqqaassutinullu siunertaqanngitsunut atulussinnannginnissaata pingaaruteqassusia! Piffissarput, nukivut iluaqutigisinnaasavullu sumut atortariaqarpavut? Suut noqqaassutiginaveersaartariaqarpavut? Oqaatsit ilisimassutaasut Oqaluussisartup oqaasiiniittut tamakkununnga tunngasunik iluaqutaasunik siunnersuutinik ilaqarput. Taakkunani tusarliunneqartut ’uummatip eqqarsaatai isumaalu eqqartuuttarpai’. — Hebræerit 4:12.

Oqaluussisartup oqaasii Israelikkunnut kunngiusumit Salomomit ilisimassuseqartutut ilisimaneqartumit allataapput. Taamaattumik inuunermi suut naleqavissuunersut suullu naleqanngitsuunersut pillugit atoriaannaasunik siunnersuutitaqarput. Salomop sanaartukkami ilai eqqartorpai, taamaattumik Oqaluussisartup oqaasii allassimassavai taakkua naammassinerisa kingorna pallorfiginninnerlu ilumoortoq suli tununnagu. (Nehemia 13:26) Taamaammat ukioq 1000 u.n.s. sioqqullugu, Salomop ukiuni 40-ni naalakkersuinermi naalernerani, naammassisimassavai.

PIUNNGITSUUNNGITSOQ SUUGAMI?

(Oqaluussisartup oqaasii 1:1–6:12)

„Suut tamarmik piunngitsuupput,“ oqaluussisartoq oqarpoq, imalu aperaluni: „Inuk suallassava assoroorussigaluaruni seqernup ataani?“ (Oqaluussisartup oqaasii 1:1-3) Oqariartaatsit „piunngitsuupput“ aamma „seqernup ataani“ Oqaluussisartup oqaasiini atorneqaqattaarput. Hebræerit oqaasiat ’piunngitsoq’-mik nutserneqartoq toqqaannartumik nutserlugu isumaqarpoq „aalaq“ imaluunniit „anersaarneq“, ilaatigullu isumaqarluni tangeqanngitsoq, ataavartuunngitsoq naleqartuaannanngitsorlu. Oqariartaaseq „seqernup ataani“ isumaqarpoq „maani nunami“ imaluunniit „silarsuarmi maani“. Taamaattumik suut tamarmik — tassa Guutip piumasaa sumiginnarlugu inuit ilungersuutigisaat tamarmik — piunngitsuupput.

„Guutip illuanukaraangavit mianersorlutit pisarniarit,“ Salomo oqarpoq, ’tusarnaariarlutit tassunnartarit’. (Oqaluussisartup oqaasii 4:17) Jehova Guutimik pallorfiginninnermik ilumoortumik ulapputeqarneq piunngitsuunngilaq. Ilumummi, Guutimut attaveqarnitsinnik eqqumaffiginninneq siunertaqarluartumik inuulernissamut pingaaruteqarluinnarpoq.

Allassimaffiit pillugit apeqqutit akineqartut:

1:4-10 — Sooq allassimava pinngortitarsuarmi kaaviiaarnerit assigiinngitsut ’qasunartuusut’? Oqaluussisartup eqqaaginnarpai nunarsuarmi inuusoqarsinnaaneranut pingaaruteqartut pingasut — seqineq, anorlertarnera erngullu pinngortitarsuarmi kaaviiaarnera. Pinngortitarsuarmi kaaviiaartut amerlaqaat, tamarmillu katitigaapput pisariusorujussuarmik. Inuuneq naallugu misissorneqarsinnaapput, taamaattoq tamakkiisumik paasinagit. Ilumut ’qasunartuusinnaapput’. Aamma kaaviiaartut taamaattut inuunitsinnut sivikitsumut assersuullugit ilungersunartuuvoq. Allaat nutaanik paasisaqarniarsarineq qasunartuuvoq. Ataatsimut oqaatigalugu Guutip ilumoortup najoqqutassiaasa pinngortitarsuarmilu atoreersimasaasa iluaqutiginerinnaasigut paasisat nutaat atorsinnaapput.

2:1, 2 — Sooruna qiimasaarneq ’sianiilliornerinnaasutut’ eqqaaneqartoq? Illarnikkut naalliuutivut puigorallarsinnaavavut. Qiimasaarnikkullu ajornartorsiutivut eqqasuutigiunnaarsinnaallugit illarnikkulli ajornartorsiutaajunnaarsissinnaanngilavut. Taamaattumik qiimasaarnikkut pillualivinniarsarineq ’sianiilliornerinnaasutut’ eqqaaneqarpoq.

 3:11 — Suunuku Guutip „ajunngitsumik eqqortumillu piffissarlu eqqorlugu“ pinngortissimagai? Jehova Guutip „ajunngitsumik eqqortumillu“, imaluunniit siunertarisamut naleqquttumik iluaqutaasumillu, pinngortissimasai tassaapput inuit siulliit, Adami Evalu. Neriusaamut tunngatillugu angeruseq, Aaperaamut angeruseq, Daavimut angeruseq pisimasullu Missiarsip tikiunnissaanut aamma Jiisusi Kristusip Guutip naalagaaffiani kunnginngortitaaneranut tunngasut tamarmik Guutip siunertaanut naleqqulluarput. Siunissamili qanittumi Jehova aamma allamik „ajunngitsumik“ iliuuseqarniarpoq. Silarsuassap naapertuilluassuseqarfiusussap nutaap piviusunngorumaarnera upperisinnaavarput. — 2 Petrusi 3:13.

3:15b — Guutip qanoq ’peeruttut [malersorneqartut, NV] ujartarpai’? „Peeruttut [Malersorneqartut, NV]“ isumaqarsinnaavoq siunertat Guutip malersugai, tassa iliuuseriumaagai. Inunngornerup toqullu, sorsunnerup eqqissinerullu nikittaattuarnerisa inuk soriarsinnaanngitsutut misigitissinnaavaa eqqarsalersillugulu pissutsit taamaattuassasut; Guutilli ilumoortup piumasani tamaasa piviusunngortissinnaavai. (Oqaluussisartup oqaasii 3:1-10, 15a) „Peeruttut [Malersorneqartut, NV]“ immaqa aamma naapertuilluartunut, ajortunit guutiitsunillu malersorneqarajuttunut, tunngatinneqarsinnaavoq. Taakkununnga tunngatillugu Jehovap naapertuilluartut ujartuartarpai ’imminik tunaarinnittut pissaanermigut ikiorniarlugit’. — 2 Nalunaarsuutit 16:9.

Ilinniarfigisinnaasavut:

1:15. Ullumikkut naapertuilluanngitsuliornerit naqisimanninnerillu aaqqinniarlugit piffissamik nukinnillu atuineq iluaqutaanngilaq. Guutip naalagaaffiata kisimi ajussuseq peersinnaavaa. — Danieli 2:44.

2:4-11. Kulturikkut soqutigisat soorlu illuliortaaseq, naatsiivilerineq, nipilersuutit pigissaarnerlu ’anorip tiguniarsarineratut suallaataanngitsigipput’, tamakkua inuuneq piviusumik siunertaqalersittanngimmassuk ataavartumilluunniit pillualersitsisinnaanatik.

2:12-16. Ilisimassuseq sianiissusermit pitsaaneruvoq, ilisimassuseqarnikkummi ajornartorsiutitta ilaat aaqqissinnaavavut. Toquli pineqaraangat inuup ilisimassusia iluaqutaanngilaq. Aamma naak taamatut ilisimassuseqarneq pissutigalugu tusaamasanngorsimagaluartoq puigorneqapallassaaq.

2:24; 3:12, 13, 22. Sulinitta inerititaanik inuulluutiginninneq kukkunerunngilaq.

2:26. Guutip „inuk iluarinartitani“ ilisimassuseqalersittarpaa, ilisimassullu tamanna nuannaalersitsisarpoq. Ilisimassuseq tamanna pigiliunneqarsinnaanngilaq Guutimut ajunngitsumik attaveqarnani.

3:16, 17. Tamatigut naapertuilluartuliortoqartarnissaata naatsorsuutiginissaa piviusorsiornerunngilaq. Ullumikkut nunarsuarmi pisut aarlerinagit Jehovap pissutsinik aaqqiinissaa utaqqitigu.

4:4. Eqiasuilluni suleruloorneq nalerisimaarnarsinnaavoq. Inuilli allat qaangerniaannarlugit sulerulooraanni unamminermik, ikiuerusunnginnermik sinnganermillu kinguneqarsinnaavoq. Kristumiutut eqiasuilluta kiffartornerput eqqortumik pissutiginiagaqarnermik aallaaveqartariaqarpoq.

4:7-12. Inuit attaveqaqatigiinnerat pigisanit pingaarneruvoq pisuunngorusunnerlu piinnarlugu annaaneqartariaqarani.

4:13. Inissisimaneq utoqqaassuserlu tamatigut allanit ataqqineqaataaneq ajorput. Akisussaaffillit silatusaartariaqarput.

4:15, 16. „Alla, inuusuttoq“ — kunngip kingoraartaa — immaqa aallaqqaammut ’innuttarilikkaminit’ tapersersorneqarpoq, „kingusinnerusukkulli inuusut nuannaarutiginngilaat“. Inuup nuannarineqarnera amerlanertigut sivikitsuinnaasarpoq.

5:1. Qinnutivut eqqarsaatigilluagaasariaqarput ataqqinnippaluttuullutillu, oqaatsillu amerlasuujusariaqaratik.

5:2-6, 1900/1961. Pigisanik noqqaassuteqarneq namminissarsiortumik takorluuinermik kinguneqarsinnaavoq. Aamma tamanna eqqissiveerussutaasinnaavoq, sinnattuasutut illuni unnuami sinninneq ajulernermik kinguneqartumik. Inuk oqaaserpassuarnik atuisoq allanit sianiitsutut isigineqalersinnaavoq, eqqarsaqqaarnanilu Guutimut neriorsuisoorsinnaalluni. Tamakku pinaveersaartinneqarsinnaapput ’Guuti mianeralugu’.

 6:1-9. Pisuussutit, ataqqisaaneq, inuuneqqortuneq ilaqutarpassuilluunniit pissutsit atukkavut pissutigalugit nuannaarutigisinnaanngikkutsigik sumut iluaqutaappat? Aamma „isit takusaat pitsaanerupput“, tassa piviusut akuerinerat pitsaaneruvoq, „tarnip pilerigisaanit“, tassa kissaatigisanik piviusunngortinneqarsinnaanngitsunik suliniuteqarnermit. Taamaattumik inooriaaseq pitsaanerpaaq tassaavoq inuunermi peqqinnartunik nuannaarutiginniitigaluni Jehovamullu qanittumik attaveqartuarnissamik pingaarnerpaatitsiitigaluni ’nerisassaqarnermik atisassaqarnermillu’ naammaginninneq. — 1 Timotheusi 6:8.

ILISIMASUMUT SIUNNERSUUTIT

(Oqaluussisartup oqaasii 7:1–12:8)

Ataqqineqarnerput qanoq illersorsinnaavarput? Naalakkersuisut nunamiuusut qanoq isigisariaqarpavut, naapertuilluanngitsuliornerillu ilisimannittuuffigisimasinnaasavut qanoq isumaqarfigisariaqarpavut? Toqungasut ilisimasaqanngimmata maannakkut qanoq inuussaagut? Inuusuttut piffissartik nukitillu isumatusaartumik qanoq atorsinnaavaat? Tamakkua allallu pillugit uagutsinnut iluaqutissanngorlugit Oqaluussisartup oqaasiini kapitali 7-imiit 12-imut allanneqarsimapput.

Allassimaffiit pillugit apeqqutit akineqartut:

7:19 — Ilisimassuseq qanoq nakuunerugami „illoqarfimmi naalagaasunit qulinit“? Biibilimi kisitsit 10 naammalluinnassusermut assersuutitut atorneqarajuppoq. Salomo oqarpoq ilisimassuseq illersuutaasinnaanerusoq sakkutuunit amerlassusissartik naammatsillugu illoqarfimmik nakkutilliisunit.

10:2 — Qanoq isumaqarpa inuup uummatini ’talerpiup tungaaniitittaraa’ imaluunniit ’saamiup tungaaniitittaraa’? Talerpik iluarisamut ilisarnaataagajummat inuup uummatini talerpiup tungaaniitikkaa isumaqarpoq ajunngitsuliornissamut uummatimigut killinneqartoq. Inulli ajortumut ingerlanissaminut uummatimigut killinneqartoq oqaatigineqarpoq uummataa saamiata tungaaniittoq.

10:15 — Qanoq „sianiitsoq assoroornerata nukillaartittarpaa“? Inuk naliliilluarsinnaassuseqanngikkuni sulerulunnera naleqavissumik kinguneqarnavianngilaq. Nalerisimaalissutiginavianngilaa. Ilungersornini nukillaarutigiinnassavaa.

11:7, 8 — Oqaatsit uku qanoq isumaqarpat: „Qaamasoq nuanneqaaq, seqinerlu isigiuminartaqaaq“? Uumassuseqartut qaamaneq seqinerlu nuannaarutigisinnaavaat. Salomop uani oqaatigaa inuulluni pitsaasoq, aamma ’nuannaartariaqartugut’ ullunit taarsiorfiusunit, imaluunniit utoqqalinermit, uummaarikkunnaarsitaatinnata.

11:10 — Sooruna „inuusuttuuneq ullaallu aappillernera“ piunngitsuusut? Inuusuttuunermi silatusaanngikkaanni piunngitsuuvoq inuusuttuunermimi uummaarinneq aalatut qaangiutipallattarpoq.

Ilinniarfigisinnaasavut:

7:6. Piffissaanngitsukkut ’illarneq qisussat igaanut qisugineqartut nutaraalunnerattut’ paaminnartigalunilu iluaqutaanngitsigaaq. Taamatut illarnaveersaartariaqarpugut.

7:21, 22. Allat oqaasii soqutiginiarpallaartariaqanngilagut.

8:2, 3; 10:4. Nakkutilliisumit sulisitsisumilluunniit isornartorsiorneqaraangatta naqqinneqaraangattaluunniit eqqissisimaannarneq  silatusaarneruvoq. Tamanna pitsaaneruvoq ’alarasuaanerminngarnit’, tassa soraarniuteqapallannermit.

8:16, 17. Guutip iliuuserisaasa tamarmik isumaat inuillu akornanni pisunik akuerinninnera tamakkiisumik paasineqarsinnaanngillat, unnuakkulluunniit sinissaarulluni eqqarsaatigeqqissaaraluaraanni. Kukkussutigineqartut tamaasa isumakuluutigigutsigik inuuneq nuannaarutigiunnaassavarput.

9:5-10, 12. ’Aalisakkat qassutinut napitittut timmissalluunniit qilorartuutinit nigarneqartut assigalugit’ ilimaginngisatsinnik toqoriaannaatigaavut. Inuussuttaaq toqusoqaraangat utertinneqarsinnaanngilaq, kinaluunniillu inuiaat akeraannut, toqumut, akiuutinngitsoorsinnaanngilaq. Taamaattumik piffissaq asiutittariaqanngilarput. Jehovap kissaatigaa inuuneq pingaartissagipput peqqinnartumillu nuannaarutigissagipput. Taamaaliussagutta Jehovamut kiffartorneq salliutittariaqarparput.

9:16-18. Ilisimassuseq pingaartittariaqarpoq, aamma inuit allat amerlanerit tamatuminnga pingaartitsinngikkaluarpataluunniit. Inuup ilisimasup eqqissilluni oqaasii tusaarusunnarnerupput sianiitsup nipituumik nillialluni oqaasiisa tusarnaarnissaannit.

10:1. Oqaatsivut iliuutsivullu mianersuutigisariaqarpavut. Sianiilliulaarneq, soorlu kamanneq, ataasiaannarluni imigassamik atornerluineq kinguaassiuutitigulluunniit minguttuumik pissuseqarneq, inummik ataqqisaasumik tusaamasaanerluutinngorsinnaavoq.

10:5-11. Inuk qaffasissumik atorfilik atorfimminut piginnaassuseqanngitsoq sinngagisariaqanngilaq. Allaat suliassaq ajornanngitsoq piginnaassuseqanngitsumik suliarineqartoq ajortumik kinguneqarsinnaavoq. ’Iluatsissagaannili ilisimassusermik atuilluarsinnaanermik’ ineriartortitsineq iluaqutaasarpoq. (Oqaluussisartup oqaasii 10:10b, NV) Guutip naalagaaffianik oqaluussissutiginninnermi ajoqersuganngortitsiortornermilu pikkorissinissatta piginnaassuseqalernissattalu pingaaruteqassusia!

11:1, 2. Uummatikkut iluunngarluta tukkortuusariaqarpugut. Taamaattuuneq tukkortoorusulersitsilissaaq. — Lukasi 6:38.

11:3-6. Inuunerup nalorninartui aalajangersinnaanngitsunnguutigisariaqanngilavut.

11:9; 12:1-7. Inuusuttut Jehovamut akissussaapput. Taamaattumik piffissartik nukitillu Guutimut kiffartornermi atortariaqarpaat utoqqalillutik nukissaarutsinnatik.

’ILISIMASUT OQAASIISA’ SIULERSORSINNAAVAATIGUT

(Oqaluussisartup oqaasii 12:9-14)

Oqaluussisartup oqaasissarsioriarluni „oqaatsit eqquisumik oqaatiginnittut“ allatai qanoq isigissavavut? Inuit ilisimassusiannit ’atuakkianit saqqummerartunit ingasalluinnartunit’ allaanerulluinnarlutik ’ilisimasut oqaasii ipput sukkatut kikissatullu imminnut qaneqalutik ikkussukkatut, nersutaatinik paarsisup ataasiinnaasup ilusilersugaatut’. (Oqaluussisartup oqaasii 12:10-12) „Nersutaatinik paarsisup ataasiinnaasup“, Jehovap, oqaasii ilisimassutaasut taakkua inuunitsinnut aalajaallisaataapput.

Oqaluussisartup oqaasiini siunnersuutit pitsaasut malinnerisigut inuunerput siunertaqarnerulissaaq pilluarnerulissaagullu. Aamma ima neriorsorneqarpugut: ’Guutimik mianerinnittut mianerinninnertik pissutigalugu pilluarlutik inuusinnaapput’. Taamaattumik ’Guutimik mianerinninnissarput inatsisaanillu maleruaanissarput’ aalajangiusimatigu. — Oqaluussisartup oqaasii 8:12; 12:13. (wE 11/1 06)

[Qupp. 5-mi assiliartaq]

Piffissaq eqqorlugu Guutip piliami ajunnginnerpaartaasa ilaat pinngortissavaa

[Qupp. 6-mi assiliartaq]

Guutip tunissutaanut ilaapput nerisassat, imigassat namminerlu suleruloornerup inerititaanik nuannaaruteqarneq