Uppernerit inooriaatsikkut ersersiguk

’Upperneq sulianik ilaqanngikkuni, immini toqungavoq.’ — JAAKU 2:17.

1. Sooq kristumiut siulliit upperneq kisiat pingaartinnagu aammattaarli iliuutsit pingaartippaat?

KRISTUMIUT siulliit ataatsimut isigalugit uppernertik inooriaatsimikkut ersersittarpaat. Ajoqersukkap Jaakup kristumiut tamaasa ima kajumissaarpai: „Oqaaseq tusaaginnarnagu maleruarsiuk.“ Imalu nangilluni: „Soorlu timi anersaartunngitsoq toqungasoq, taamattaaq upperneq sulianik ilaqanngitsoq toqungavoq.“ (Jaaku 1:22; 2:26) Jaakup taamatut allannerata kingorna ukiut 35-t qaangiuttut kristumiut amerlasuut suli uppernertik iliuutsimikkut ersersittarpaat. Ajoraluartumilli tamarmiunngitsoq taamaaliortarput. Jiisusip Smyrnami ilagiit nersualaarpai Sardesimili ilagiit ima oqarfigalugit: „Suliatit ilisimavakka. Oqaatigineqartarputit uumassuseqartutit, uffali toqungasutit.“ — Saqqummersitat 2:8-11; 3:1.

2. Uppernerminnut tunngatillugu kristumiut immikkut imminut qanoq aperisariaqarpat?

² Jiisusip pisariaqartippaa Sardesimi kristumiut — annertunerusumillu isumaqartillugu aamma oqaatsiminik kingusinnerusukkut atuaasut tamaasa — kajumissaassallugit kristumiussusermi sallusuissummut asanninnermissut siullertut asannileqqeqqullugit anersaakkullu eqqumajuaqqullugit. (Saqqummersitat 3:2, 3) Tamatta immikkut immitsinnut ima aperisinnaavugut: ’Uanga iliuutsikka sumik ersersitsippat? Erseqqinnerluni uppernera sutigut tamatigut sapinngisannik ersersinniartariga, aamma oqaluussinnginninni ataatsimiinnginninnilu?’ (Lukasi 16:10) Inuunermut tunngasut arlallit sammineqarsinnaagaluarput, ataasiinnarli misissoriartigu, tassa katerisimaarnerit, ilaatigut kristumiunik katittoqarnerata kingorna katerisimaarnerusartut.

Katerisimaarnerit annikitsut

3. Katerisimaaqataaneq pillugu Biibilimi qanoq allassimasoqarpa?

³ Kristumiunik allanik katerisimaaqateqarnissamut qaaqqusaaneq nuannersuuvoq. Jehova ’Guutiuvoq pilluartoq’, taassumalu kissaatigaa kiffani  pilluartuussasut. (1 Timotheusi 1:11) Taassuma Salomo siunersisaqarnermik uuminnga Biibilimi allatsippaa: „Nuannaarneq pitsaanerarpara seqernup ataani inummut pitsaanerusumik pilluaatissaqanngimmat kisianni nerinermik, imernermik nuannaarnermillu. Taamaaliortarsinnaavoq ulluni tamani Guutip seqernup ataani inuuffigititaani suleruloornerminut ilagitillugu.“ (Oqaluussisartup oqaasii 3:1, 4, 13; 8:15) Nuannaarneq tamanna misigisinnaavarput ilaatigut ilaqutariittut nereqatigiinnermi imaluunniit pallorfiginnittut ilumoortut ilagalugit katerisimaarnermi annikitsumi allami. — Jobi 1:4, 5, 18; Lukasi 10:38-42; 14:12-14.

4. Katerisimaartitsisup suna eqqarsaatigisariaqarpaa?

⁴ Qaaqqusisuusutut eqqarsarluarlutit pilersaarusiortariaqarputit, aamma uppeqatinnik ikittuinnarnik nuannersumut katerisimaanissamut neriartoqqusiguit. (Romamiut 12:13) Soorunami ’ilisimassutsimit pavannga pisumit’ siulersorneqarlutit qulakkeerniassavat ’suut tamarmik ippinnanngitsumik ingerlanissaat’. (1 Korinthimiut 14:40; Jaaku 3:17) Apustili Paulusi ima allappoq: „Nerigussi imerussiluunniit qanorluunniillu iliorlusi taamaaliussaasi Guutip ataqqinaatissaanik. . . . Mamiatsatsitsiniaqinasi.“ (1 Korinthimiut 10:31, 32) Suut immikkut eqqumaffigineqartariaqarpat? Illit iliuutsivit qaaqqusallu iliuusiisa uppernermut ersiutaanissaat qulakkeerniarlugu tamanna siumut eqqarsaatigereertariaqarpat. — Romamiut 12:2.

Pilersaarusiornermi suut eqqarsaatigineqartariaqarpat?

5. Sooq qaaqqusisup katerisimaarneq imigassartaqassanersoq, nipilersortoqassanersoq erinarsortoqassanersorlu eqqarsaatigeqqissaartariaqarpaa?

⁵ Qaaqqusisut ilarpassuisa isummerfigisariaqarsimavaat imigassamik sassaalliissanerlutik. Katerisimaaqatigiinneq nuannersuusinnaalluarpoq imigassartaqanngikkaluarluni. Jiisusip inuppassuarnik imminut orniguttunik nerisitsinerisa ilaat eqqarsaatigeriaruk. Timiusanik aalisakkanillu naammangaartunik pilersitsivoq, allassimanngilarli tupinnartuliornikkut viinnimik pilersitsisoq ilisimagaluaripput taamaaliorluarsinnaagaluartoq. (Matthæusi 14:14-21) Imigassamik sassaalliiniarlutit aalajangeruit taava ingasanngitsumik imigassallerit allanillu kajungernartunik qinigassaqarnissaa isumagiuk tamakkuninnga piumanerusunut. (1 Timotheusi 3:2, 3, 8; 5:23; 1 Petrusi 4:3) Arlaat ’pulateriaarsuttut kiisisinnaasumik’ immigassartornissaanut kimigiiserfiginaveersaaruk. (Ussatit 23:29-32) Taavami nipilersorneq erinarsornerlu? Nipilersortoqassappat qularnanngitsumik nipilersuutit peqqissaartumik toqqarniassavatit rytmit taallallu misissornerisigut. (Kolossemiut 3:8; Jaaku 1:21) Jehovap Nalunaajaasuisa ilarpassuisa paasisimavaat Guutip naalagaaffiata erinarsuutai-nik nipilersorneq erinarsoqatigiinnerluunniit qiimmannartuusoq. (Efesosimiut 5:19, 20) Aamma soorunami nipilersornerup oqaloqatigiinnermut nalinginnaasumut sanilinulluunniit akornutaalinnginnissaa tamatigut mianersuutigisariaqarpoq. — Matthæusi 7:12.

6. Oqaloqatigiinneq katerisimaarnermilu sammisat eqqarsaatigalugit qaaqqusisup uppernermi uummaarinnera qanoq ersersissinnaavaa?

⁶ Katerisimaarnerni kristumiut sammisat assigiinngitsut oqaloqatigiissutigisinnaavaat, atuffassisinnaallutik  imaluunniit misigisanik soqutiginartunik oqaluttuarsinnaallutik. Oqaloqatigiinneq kissaatiginanngitsumut sannguppat qaaqqusisup oqaloqatigiinneq ilorraap tungaanut periaaserilluni utertissinnaavaa. Aamma isumagisariaqarpaa oqaloqatigiinnerup najuuttumit ataatsimit salliuniarfigineqannginnissaa. Taamaattoqaannarpat qaaqqusisoq naliliisinnaassuseqarluni allanniiumallunilu assersuutigalugu inuusuttut oqaloqqusinnaavai imaluunniit sammisaq amerlanerusut oqaloqatigiissutigisinnaasaat eqqartorsinnaallugu. Tamanna inuusuttunut utoqqarnullu nuannaarutaassaaq. Aaqqissuisutut katerisimaarnerup ingerlanera isumatusaarlutit periaaserillutillu aqukkukku ’ingasaassinianngitsuunerit [najuuttunit] ilisimaneqalissaaq’. (Filippimiut 4:5, NV) Malugissavaat uppernerpit uummaarinnera inuuninnullu tunngasunut tamanut sunniuteqartoq.

Katinnerit katittorsiornerillu

7. Sooq katinneq katittorsiornerlu pillugit pilersaarusiornissamut pissutissaqarluarpugut?

⁷ Kristumiut katittarneri immikkut nuannaarutaasarput. Guutip itsaq kiffai, ilaatigut Jiisusi taassumalu ajoqersugai, katinnerni katittorsiornernilu kajumillutik peqataasarput. (1 Mosesi 29:21, 22; Johannesi 2:1, 2) Ukiunili kingulliunerusuni misigisimasatigut erseqqissumik paasinarsivoq katinnermut tunngatillugu katerisimaarneq naliliilluarsinnaanermut kristumiutullu oqimaaqatigiissaarinermut ersiutaassappat peqqissaartorujussuarmik pilersaarusiorneq pisariaqartoq. Katinnerit katittorsiornerillu nalinginnaapput, kristumiullu tamakkunuuna uppernerminnik ersersitsinissaminnut periarfissaqarput.

8, 9. Katinnerpassuit qanoq ilillutik Johannesip allagai siulliit 2:16, 17-imi allassimasup ilumoorneranut uppernarsaataappat?

⁸ Inuppassuit Guutip siunnersuutaanik ilisimasaqarnatillu maleruaanngitsut katinneq ingasaassiniarnissamut patsisissatut isigisarpaat. Atuagassiami Europami saqqummersartumi arnap katernaap katinnini katittorsiorninilu kunngikkormiunut ajukkunnanngitsoq ima allaatigisimavaa: ’Karetinik hestinik sisamanik qimuttulinnik ingerlavugut qamutinit hestinik qimuttulinnit allanit malinneqarluta — qaaqqusanik ilaasulinnik qamutinit aqqaneq-marluusunit nipilersoqatigiinnillu ilaasulimmit ataatsimit. Tamatuma kingorna mamarluinnartunik nereqatigiippugut nipilersukkanillu tusarnerluinnartunik tusarnaarluta. Ilumut peqaqqaaq. Kissaatigisimasattut ulloq taanna dronningiuvunga.’

⁹ Ileqqut periaatsillu nunamiit nunamut assigiinngissinnaasarput, atuivallaarnerli eqqaaneqareersoq uppernarsaataavoq apustili Johannesip allassimasaata uuma ilumoorneranut: „Silarsuarmiittut tamarmik — uinngup pilerigisai, isit pilerigisaat nunallu piinik usorsisimaaruteqarneq — Ataatamit pisuunngillat, silarsuarmit pisuupput.“ Takorloorsinnaanerpiuk kristumiut inersimalluartut marluk kunngikkormiunut ajukkunnanngitsumik katinnissaq asseqanngilluinnartumillu katittorsiornissaq kissaatigissagaat? Kristumiut eqqarsaatigisariaqarpaat ’Guutip piumasaanik iliortoq naassaanngitsumik atasussaammat’. — 1 Johannesi 2:16, 17.

10. (a) Ingasaassinianngitsumik katittorsiortitsissagaanni sooq pilersaarusiorneq pisariaqarpa? (b) Kikkut qaaqquneqassanersut qanoq aalajangerneqartariaqarpa?

¹⁰ Katittussat kristumiut piviusorsiortoorusupput ingasaassinianngitsoorusullutillu, siunnersuutillu pitsaasut Biibilimiittut iluaqutigisinnaavaaat. Soorunami katinneq pingaaruteqangaarpoq, katittussalli nalunngilaat katinneq kristumiut naassaanngitsumik inuusussat marluk aappariinnerannut aallaqqaataannaasoq. Katittorsiornersuaqartitsisussaatitaanngillat. Katerisimaartitsiniarlutik aalajangerunik aningaasartuutissat naatsorsussavaat, eqqarsaatigalugulu qanoq iliuuseqarfigitiginiarnerlugu. (Lukasi 14:28) Kristumiutut inooqatigiinnissaminni uiusoq Biibili naapertorlugu ittuusussaavoq. (1 Korinthimiut 11:3; Efesosimiut 5:22, 23) Taamaattumik uissaq katinnermut atatillugu katerisimaarnissamut akisussaanerpaavoq. Soorunami kikkut qaaqqorusunerlugit qaaqqusinnaanerlugillu nuliassani asannilluni isumasiorumaarpaa. Immaqa ikinngutimik ilaquttamillu tamaasa qaaqqunissaannut periarfissaqanngillat, immaqaluunniit taamaaliornissaq tulluanngilaq. Taamaappat qaaqqusassat maniguullutik ikililertariaqarpaat. Aappassiariit tatigisinnaasariaqarpaat ikinngutit kristumiut qaaqquneqanngitsut paasinnittuussasut tamannalu ajuallaatigissanngikkaat. — Oqaluussisartup oqaasii 7:9.

 ’Nerisassalerisoq’nakkutilliisoq

11. Katittorsiornermut atatillugu suliassaq suna qatanngummut angummut inersimalluartumut suliassiissutigineqarsinnaava?

¹¹ Katittussat katittorsiortitsiniarlutik aalajangerunik taava qanoq suut tamarmik ataqqinnittumik ingerlanissaat qulakkeersinnaavaat? Ukiorpaalunngortuni Jehovap Nalunaajaasuisa paasisimavaat Kanami katittorsiornermi periaatsip ilaarnissaa isumatusaarnerussasoq. Taamani ’nerisassalerisoq’ — qularnanngitsumik uppeqat akisussaassuseqartoq — nalliuttorsiornermi nakkutilliivoq. (Johannesi 2:9, 10) Taamatuttaaq uissaq isumatooq akisussaaffimmut pingaarutilimmut tamatumunnga qatanngummik angummik inersimalluartumik toqqaassaaq. Qatanngutip taassuma uissaq sunik kissaateqarnersoq nuannarisaqarnersorlu paasereeruniuk katittorsiornermut atatillugu suut tamaasa isumaqatigiissutertik malillugu ingerlanissaat isumagisinnaassavaa.

12. Imigassamik sassaalliisoqassappat uissap suna eqqarsaatigisariaqarpaa?

¹² Katittussat ilaasa immikkoortoq 5-imi eqqaaneqartumut naapertuuttumik aalajangertarpaat katittorsiornermi imigassamik sassaalliiniaratik nuannaarneq imerpallaartoqarneranit aserorneqaqqunagu. (Romamiut 13:13; 1 Korinthimiut 5:11) Imigassallertoqassappalli uissap qulakkeertariaqarpaa imigassallernerup ingasaatinnginnissaa. Kanami katittorsiornermi viinni sassaalliutigineqarpoq, Jiisusillu viinnimik pitsaanermik naammaquserpaa. Soqutiginarpoq tamanna pissutigalugu nerisassalerisup angut katernaaq ima oqarfigimmagu: „Viinni pitsaaneq siulliullugu sassaalliutigineqartaraluarpoq, imersimaaleraangatalu pitsaannginneq sassaanneqartarluni. Illit viinni pitsaaneq manna tikillugu toqqortarisimavat.“ (Johannesi 2:10) Soorunami Jiisusi imigassartorpallaarnermut kajumissaarinngilaq, taamaaliortarnermi akuerinnginnamiuk. (Lukasi 12:45, 46) Nerisassalerisup oqaasiisigut erserpoq katittorsiornermi qaaqqusanik imerpallaartoqartarsimasoq. (Apustilit Suliaat 2:15; 1 Thessalonikamiut 5:7) Taamaattumik angut katernaap qatanngutillu tatiginartup taassuma katittorsiornermi nakkutilliisutut toqqagaata marluullutik qulakkeertariaqarpaat qaaqqusat tamarmik siunnersuut erseqqissoq una malissagaat: „Viinnimik aalakooqinasi, aalakoornerup inuunerlunnerit pilersittarmagit.“ — Efesosimiut 5:18; Ussatit 20:1; Hosea 4:11.

13. Katittorsiornermi nipilersortoqassappat katittussat suna eqqarsaatigisariaqarpaat, aamma sooq?

¹³ Soorlu katerisimaarnerni allani, qulakkeerneqartariaqarpoq nipilersortoqarpat nipilersornerup nipituallaannginnissaa oqaloqatigiinnermullu akornutaannginnissaa. Utoqqaanertaq kristumiu ima oqarsimavoq: „Unnuup ingerlanerani oqaloqatigiinneq uummarisiartortillugu imaluunniit qitinneq aallartippat ilaannikkut nipilersorneq nipittorneqartarpoq. Aallaqqaammut nipilersornerulluni tunuliaqutaasoq immaqa unnuup ingerlanerani ima nipitutigilersinnaavoq oqaloqatigiinneq ajornakusuulersillugu. Katittorsiorneq katerisimaaqatigiinnermut nuannersumut periarfissaavoq. Alianassaaq nipilersornermit nipittuumit aserorneqassagaluarpat.“ Aamma tamatumunnga tunngatillugu angut katernaaq katittorsiornermilu nakkutilliisoq akisussaassuseqartariaqartarput nipilersortartut, attartugaagaluarpata attartugaanngikkaluarpataluunniit, aalajangiisuutinnagit nipilersorneq qanoq ittuussanersoq qanorlu nipitutigissanersoq. Paulusi ima allappoq: „Oqaatsissigut suliassigullu qanorluunniit ilioraangassi taamaaliortaritsi Naalakkap Jiisusip aqqani.“ (Kolossemiut 3:17) Katittorsiornerup imaluunniit ilassinninniarluni katerisimaarnerup kingorna qaaqqusat angerlarunik nipilersorneq eqqaamassanerpaat katittut sunik tamanik Jiisusip aqqani iliornerannut ersiutaasutut? Taamaaliorsinnaasariaqarput.

14. Kristumiut katinnerup kingorna suna nuannaarlutik eqqaamasinnaasariaqarpaat?

¹⁴ Aap, katinneq piareersarluarneqarsimasoq nuannersumik eqqaamaneqarsinnaasarpoq. Adam Edytalu, ukiuni 30-ni aappariissimasut, katinneq aalajangersimasoq pillugu ima oqaluttuarput: „Kristumiunik avatangiiseqarneq malunnartorujussuuvoq. Jehovamut unnersiutiginnissutaasunik erinarsuuteqarpoq, aammali pitsaasunik allanik aliikkusersuuteqarluni. Qitinneq nipilersornerlu  pingaarnerutinneqanngillat. Nuannerlunilu ineriartornarpoq, aamma suut tamarmik Biibilimi najoqqutassiat naapertorlugit ingerlapput.“ Ilumut, nulianngortussaq uinngortussarlu uppernertik iliuutsimikkut ersersinniarlugu iliuuserisinnaasarpassuaqarput.

Katittunut tunissutit

15. Biibilimi siunnersuut suna aammattaaq katittunut tunissutinut tunngatinneqarpa?

¹⁵ Nunani amerlasuuni ilaquttat ikinngutillu katittunut tunisisarnerat nalinginnaavoq. Tamatumunnga tunngatillugu suna eqqarsaatigineqarsinnaava? „Nunap piinik usorsisimaaruteqarneq“ pillugu Johannesip oqaasii eqqarsaatigeqqilaariakkit. Usorsisimaaruteqarneq kristumiunut uppernerminnik iliuutsikkut ersersitsisunut atassusinngilaa kisianni ’silarsuarmut nunguttussamut’. (1 Johannesi 2:16, 17) Katittut Johannesip oqaasiinik isumassarsiarititaasunik maleruaasut tunissutinik tamanik immikkut tunisisut kikkuuneri nalunaarutigissanerpaat? Kristumiut Makedoniamiut Akajamiullu qatanngutinut Jerusalemimiittunut tunissummik tunisipput, taakkuali atiisa tamanut nalunaarutigineqarnerannik takussutissaqanngilaq. (Romamiut 15:26) Kristumiut amerlasuut katittunut tunisinerminni kinaassusertik isertuukkusuttarpaat naleqqutinngitsumik malugeqqusaarnatik. Tamatumunnga atatillugu iluaqutaassaaq Jiisusip siunnersuutaa Matthæusi 6:1-4-mi allassimasoq misissoqqissallugu.

16. Katittunut tunissutinut atatillugu katernaat qanoq allanik qamuuna annersitsinaveersaarsinnaappat?

¹⁶ Tunisisut atii nalunaarutigineqartaraluarpata qaaqqusat pitsaanerpaamik akisuunerpaamilluunniit tunissuteqarnissaq unammissutigilersinnaavaat. Taamaattumik kristumiut katernaat isumatuut tunisisut atii nalunaarutigiumassanngilaat tunisinissamut akissaqanngitsoq kinaluunniit peqqusiileqinnginniassammat. (Galatiamiut 5:26; 6:10) Soorunami katernaat tunisisut tamarmik immikkut kikkuunerinik ilisimanninnerat kukkunerunngilaq. Qularnanngitsumik allakkamit tunissummut ilanngunneqartumit atuffassissutigineqartariaqanngitsumit takuneqarsinnaassaaq. Katittunut tunissutissarsigaangatta, tunisigaangatta tunineqaraangattaluunniit, aammattaaq inummut namminermut tunngasuni taamaattuni, uppernitta iliuutsitsinnut sunniuteqarneranik ersersitsinissamut tamatta periarfissaqartarpugut. *

17. Kristumiut uppernerminnut iliuutsiminnullu atatillugu sunik anguniagaqartariaqarpat?

¹⁷ Soorunami ileqqussatigut minguitsumik inuunerup, kristumiut ataatsimiinnerinut najuuttarnerup oqaluusseqataanerullu saniatigut aamma iliuutsit allat uppernermik ersersitsinermut ilaasariaqarput. Tamatta uummaarissumik uppissuseqartariaqarpugut iliuutsitsinnut tamanut sunniuteqartumik. — Saqqummersitat 3:2, 1900/1961.

18. Johannesi 13:17-imi allassimasoq qanoq kristumiut katittorsiornerannut katerisimaarnerinullu tunngatinneqarsinnaava?

¹⁸ Jiisusi apustilimi aalajaatsut isigaannik maniguulluni asattuinermigut taakkununnga asannilluni maligassiuereerami ima oqarpoq: „Tamanna ilisimagussiuk taava pilluassaasi taamaaliorussi.“ (Johannesi 13:4-17) Najukkatsinni allat isigaannik, soorlu pulaartup isigaanik, asattuineq pisariaqarunanngilaq nalinginnaananilu. Eqqaaneqareersutulli inuunermut tunngasuni allani, ilaatigut katerisimaarnerni kristumiullu katittorsiornerini, uppernerput ersersissinnaavarput asannittumik soqutigittartumillu iliuutsitigut. Taamaappoq nammineq katittussaagutta imaluunniit kristumiut iliuutsimikkut uppernerminnik ersersitserusuttut allat katinnerannut katittorsiornerannulluunniit qaaqqusaagutta. (wE 10/15 06)

[Quppernerup ataani ilanngussaq]

Qanoq akissavit?

Uppernerput qanoq ersersissinnaavarput

• katerisimaartitsigaangata?

• katinnissamik katittorsiornissamilluunniit aaqqissuussigaanngatta?

• katittoqarnerani tunissuteqaraangatta tunineqaraangattaluunniit?

[Atuaqqissaarnermi apeqqutit]

[Qupp. 29-mi assiliartaq]

Aammattaaq ikittuinnarnik qaaqqusigaangatta ’ilisimassutsimit pavannga pisumit’ siulersorneqartariaqarpugut