Jehovap oqaasia uumavoq

Erinarsugassiat Pingaarnersaannit pingaarnersat

„SOORLU lilja kapinartullit akornanni naasimasoq taama ippoq asanerpaasara niviarsiaqatimi akornanni.“ „Soorlu iipilequt orpippassuit orpiisa akornanni, taama ippoq asasara nukappiaqatimi akornanni.“ „Kinaana taanna alakkartoq qaalersup aappilliunneratut, qaammatitut kusanartigisoq, seqinertut qaammaritsigisoq?“ (Erinarsugassiat Pingaarnersaat 2:2, 3; 6:10) Aap, versit taakkua Biibilimi Erinarsugassiat Pingaarnersaanneersut ilumut imaqangaarput! Atuagaq tamarmi taalliaavoq imaqarluangaarmallu nuanningaarmallu ima taaguuteqarpoq: Erinarsugassiat Pingaarnersaat.

Salomop, Israelikkunnut kunngiusup, ukiuni 40-ni naalakkersuinermi aallaqqaataa tungaani, ukiup 1020-p u.n.s. missaaniugunartoq erinniaraa. Savanik paarsisup niviarsiallu nunaannarmeersup, Shulamimiuusup, asaqatigiinnerannut tunngavoq. Eqqaaneqartut allat tassaapput niviarsiap arnaa qatanngutaalu angutit, „Jerusalemip panii“, tassa arnat kunngikkunni sulisut, aamma „Zionip panii“, tassa arnat Jerusalemimeersut. (Erinarsugassiat Pingaarnersaat 1:5; 3:11) Erinarsugassiat Pingaarnersaanni oqaaseqartut kinaassusersiuminaapput, nutsikkalli ilaanni ikittuni kina qanoq oqarnersoq assigiinngitsunik isumaqarfigineqarpoq, oqaatigineqartutigulli paasineqarsinnaavoq.

Erinarsugassiat Pingaarnersaat Guutip oqaasiata ilaatut naleqangaarput marlunnik peqquteqartumik. (Hebræerit 4:12) Siullermik, tassani ilinniarparput angutip arnallu ilumoortumik asaqatigiinnerat qanoq ittuunersoq. Aappassaanik, atuakkami allaatigineqarpoq Jiisusi Kristusip kristumiullu tanitat ilagiissaasa asanninnermik ersersitsivigeqatigiinnerat. — 2 Korinthimiut 11:2; Efesosimiut 5:25-31.

„ASANNINNEQ ITERSAQINASIUK“

(Erinarsugassiat Pingaarnersaat 1:1–3:5)

„Qanerminik kunillingatoq! Asanninnerit pilluarnarneruvoq viinnimit.“ (Erinarsugassiat Pingaarnersaat 1:2) Erinarsugassiat Pingaarnersaanni oqaloqatigiinneq taama aallartippoq niviarsiamit nunaannarmeersumit pimaarniartuunngitsumit Salomop toqqanukaanneqartumit. Qanoq ililluni tassunga piva?

„Anaanama ernerisa kamaappaannga, viinnequteqarfinnut paarsisunngortippaannga,“ oqarpoq. Savanik paarsisup inuusuttup, asasaata, upernaakkut silagissorsuugaa pisuttuaqatigiumasimammagu qatanngutaasa angutit kamaappaat. Tamanna pinngitsoortinniarlugu qatanngutaasa viinnequteqarfimmut paarsisunngortippaat terianniat mikisut viinnequteqarfimmik aserorterimmata. Sulinermini Salomop tammaarfiata eqqannguanut pivoq. „Naatsiivimmut qaqqortarialinnik orpilimmut“ atermat pinnissusia malugineqarpoq, tammaarfimmukaanneqarlunilu. — Erinarsugassiat Pingaarnersaat 1:6; 2:10-15; 6:11.

Niviarsiap savanik paarsisoq asasani maqaasinerarmagu, arnat kunngikkunni sulisut kaammattuipput ’savat tumiusiorlugit’ ujaqqullugu. Salomolli ingerlaqqunngilaa. Pinnernerarlugu neriorsorpaa „allunaasamik kuultiusumik, sølviusunik sapangartalersukkamik“. Tamannali killinneqaatiginngilaa. Savanik paarsisoq inuusuttoq Salomop tammaarfianut periarfissarsilluni iserami niviarsiaq nassaaraa nillerlunilu: „Ilami pinningaaravit asanerpaasara, pinningaaravit.“ Arnap inuusuttup arnat  kunngikkunni sulisut neriorsuisippai ’asanninneq itersaqqunagu, pileritsassaaqqunagu nammineq piumallertinnagu’. — Erinarsugassiat Pingaarnersaat 1:8-11, 15; 2:7; 3:5.

Allassimaffiit pillugit apeqqutit akineqartut:

1:2, 3 — Sooruna savanik paarsisup inuusuttup asanninnera eqqarsaatimini viinnimut taassumalu aqqa uuliamut assersuukkai? Viinnip inuup uummataa nuannaartittarpaa, uulialu niaqqumut tarnunneqartoq toqqissisitsisarpoq. Taamatuttaaq angutip inuusuttup asanninneranik aqqanillu eqqaamanninnera niviarsiamut nakussassaataallunilu tuppallersaataavoq. (Tussiaat 23:5; 104:15) Kristumiut ilumoortut, pingaartumik tanitat, taamatuttaaq nakussatsinneqarlutillu qiimmassarneqartarput Jiisusi Kristusimit asannittuliorfigineqartarnertik eqqarsaatigigaangamikku.

1:5 — Sooq niviarsiap simaartuunini ’Kedarimi toqqinut’ assersuuppaa? Annoraamernit savaasap meqquinit ikaartitikkat assigiinngitsorpassuarnut atorneqartarsimapput. (4 Mosesi 31:20) Assersuutigalugu „savaasat meqquinik ikaartitikkanik“ uliliorsimapput „illernartuut qallerlugu uliliussassanik“. (2 Mosesi 26:7) Kedarimi toqqit savaasat qernertut meqquinit sanaajusarsimagunarput, ullumikkut beduinit toqqisa sananeqartarnerisut.

1:15 — Savanik paarsisup inuusuttup oqaatsit uku qanoruna isumaqartikkai: „Isitit soorlumi tuit“? Isumaqarpoq niviarsiap ikinngutimi isai tuit isaattulli sallaappalutsigalutillu saamarpalutsigisut.

2:7; 3:5 — Sooruna arnat kunngikkunni sulisut „gazellit tuttorsuillu narsarsuarmi ivigalimmiittut“ naqqissigalugit uppernarsaasinneqartut? Gazellit tuttorsuillu kusanassutsimikkut ilisimaneqarput. Niviarsiap Shulamimiup taama oqarnermigut kusanangaartut tamaasa naqqissigalugit arnat kunngikkunni sulisut uppernarsaasippai asannilersinniarsareqqunani.

Ilinniarfigisinnaasavut:

1:2; 2:6. Aappassiariit ippinnanngitsumik asanninnerminnik ersersitsivigeqatigiinnerat pissusissamisuuginnarpoq. Aappassiariittulli qulakkeertariaqarpaat taamatut attuualaarinerit tunniusimanivimmik ersersitsinerunersut, mingunnartumik pilerissuseqarnermik, kinguaassiuutitigut inuunerlunnermik kinguneqarsinnaasumik ersersitsinerunatik. — Galatiamiut 5:19.

1:6; 2:10-15. Niviarsiaq Shulamimiu uissaminit qaqqamut avinngarusimasumut angalaaqatiserineqartoq qatanngutiminit angutinit itigartinneqarpoq. Niviarsiap kinguaassiuutitigut inuunerlunneranik eqqunngitsumilluunniit pissutiginiagaqarneranik peqquteqanngilaq, ussernartorsiortitaanissaali pinngitsoortinniarlugu. Aappassiariit sumiiffinni avinngarusimasumiinnaveersaarnissaminnut tamanna ilinniarfigisinnaavaat.

2:1-3, 8, 9. Niviarsiaq Shulamimiu pinnersuuvoq, anneruniajuitsuugamili naasumut nalinginnaasumut ’Saronip asorussuanut’ [inneruulamut] (1900/1961), imminut assersuuppoq. Pinnissusia Jehovamullu aalajaannera pillugit savanik paarsisup inuusuttup ’liljamut kapinartullit akornanniittumut’ assersuuppaa. Angut inuusuttoq qanoq ittuugami? Isikkuminartuummat niviarsiap ’gazellemut’ eqqaanartippaa. Aamma anersaakkut ittunik pingaartitsisuusimassaaq Jehovamullu ilumoorfiginnittuusimassalluni. „Soorlu iipilequt orpippassuit orpiisa akornanni, taama ippoq asasara nukappiaqatimi akornanni,“ niviarsiaq oqarpoq. Upperneq Jehovamullu ilumoorfiginninneq aappassiarilersinnaasamut pissusereqqunartuupput, ilaa?

2:7; 3:5. Niviarsiap Shulamimiup Salomo ajuutiginngilaa. Savanik paarsisumut inuusuttumut asannikkami arnat kunngikkunni sulisut uppernarsaasippai allamut asannilersoornissamut pileritsassaareqqunagit. Pissusissaananilu eqqortuunngilaq kimulluunniit ajuutiginnilerneq. Kristumiup aappaqanngitsup aappartaarusuttup taamaallaat ilumoorfiginnilluni Jehovamut kiffartortumik aappartaarnissani eqqarsaatigisariaqarpaa. — 1 Korinthimiut 7:39.

 ’SUULAMIIT QANOQ IMMAT QIMERLOORUMAVISIUK?’

(Erinarsugassiat Pingaarnersaat 3:6–8:4)

„Putsutut qangattartutut illuni inoqajuitsumit“ aggersoqarpoq. (Erinarsugassiat Pingaarnersaat 3:6) Arnat Jerusalemimeersut takusaagamik suna takuaat? Tassaaku Salomo kiffaalu illoqarfimmut angerlartut. Kunngillu niviarsiaq Shulamimiu ilagaa.

Savanik paarsisup inuusuttup malissimallugit niviarsiap naapinnissaanut periarfissarsipallappoq. Asanninnerminik uppernarsaaffigaa, niviarsiallu illoqarfimmiigunnaarnissaminik erinisunnini ima oqaatigaa: „Ulloq nillertiimilerpat tarrallu tallippata majuarumaarpunga qaqqamut myrralimmut, qattunermut tipigissunik naasulimmut.“ Imalu nangippoq: „Asasara naatsiiviutiminut iserlitoq inerititaalu pitsaat mamarsaatigalugit.“ Savanik paarsisup ima akivaa: „Maanna pivunga naatsiiviutinnut, qatanngutinnut, nuliassannut.“ Arnat Jerusalemimeersut taakkununnga ima oqarput: „Qaa, ikinngutikka, neriniaritsi imeritsi, asanninnermillu naammatsisimaaritsi!“ — Erinarsugassiat Pingaarnersaat 4:6, 16; 5:1.

Niviarsiap Shulamimiup arnanut kunngikkunni sulisunut sinnattuni oqaluttuaraa imalu nangilluni: ’Asanninnermit sapilerpunga.’ Ima aperipput: „Asasat sutigut ajuutiginarnerugami?“ Ima akivoq: „Asasara qaqortuullunilu aappalaartuuvoq, angutit 10.000-ilippassuit akornanni nuimanersaavoq.“ (Erinarsugassiat Pingaarnersaat 5:2-10) Salomop pinnarinningaarnera, maniguulluni ima akivaa: ’Suulamiit qanoq immat qimerloorumavisiuk?’ (Erinarsugassiat Pingaarnersaat 6:4-12; 6:13, 1900/1961) Kunngip imminut asannilersissinnaallugu misigaluni suli annerusumik nersualaarpaa. Niviarsialli savanik paarsisumut asanninnera aalajaappoq. Naggataatigut niviarsiap angerlarnissaa Salomop akueraa.

Allassimaffiit pillugit apeqqutit akineqartut:

4:1; 6:5 — Sooq niviarsiap nujai ’savaasarpannut’ assersuunneqarpat? Nujai savaasat qernertut meqquisut qillertigisimagunarlutillu torsutigisimagunarput.

4:11 — Niviarsiap Shulamimiup oqaasii „qarlutit nektarimik kuserput“ aamma „oqqavit ataaniipput tungusunnitsuut immullu“ qanoq isumaqarpat? Nektari kuuttoq igutsaat kutsuusiaannit tiguneqarlaaq tungusunniitsuumit silameereersumit mamaqarnerullunilu tungusunninneruvoq. Assersuutip tamatuma oqaatsillu „oqqavit ataaniipput tungusunnitsuut immullu“ ataatsimut ersersippaat oqaasii qanoq nuannertigalutillu tusarnertigisut.

5:12 — Niviarsiaq qanoruna isumaqartoq ima oqarami: „Isaasa assigaat tuit kuuit killingini mitsimasut; immummi uffarsimallutik“? Asasami isai kusanartut eqqartorpai. Immaqa isaasa qernertortaat qaqortumik avatangiiseqartut tuinut qasertunut tungujuaartunut immummi uffartunut assersuuppai.

 5:14, 15 — Sooruna savanik paarsisup talii niuilu taama allaatigineqartut? Niviarsiap savanik paarsisup assaasa inuai ajaappissanut kuultiusunut kukiilu krysolitinut assersuukkunarpai. Niui assersuuppai ’sukanut marmoriusunut’ (1990), nukittullutillu isikkuminartuummata.

6:4 — Sooq niviarsiaq Tirsamut assersuunneqarpa? Kana’anikkut illoqarfiat taanna Josvamit tiguarneqarpoq, Salomollu toqunerata kingorna naalagaaffimmi avannarlermi Israelimi siullersaalluni illoqarfiuvoq pingaarnersaq. (Josva 12:7; 24; 1 Kunngit 16:5, 6, 8, 15) Qinerlerfissiami ima allassimasoqarpoq: „Illoqarfik takorannersorsuusimagunarpoq, tamannalu pissutaasimasinnaavoq uani eqqaaneqarneranut.“

6:13, 1900/1961 — Suugamik ’Maranaami [Mahanajimimi] kaavittut’? Illoqarfik Mahanajimi kuussuup Jordanip kangiatungaaniissimavoq, Jabbokip Qooruata eqqaani. (1 Mosesi 32:3, 23; 2 Samueli 2:29) Qiteriaaseq aalajangersimasoq nalliuttorsiornermi illoqarfimmi qitinneqartartoq pineqarsimasinnaavoq.

7:5 — Sooq Salomop niviarsiap qungasia ’napasuliamut tuugaamik sanaamut’ assersuuppaa? Siusinnerusukkut niviarsiaq ima nersualaarneqarpoq: „Qungatsit soorlu tassa Daavip Napasuliaa.“ (Erinarsugassiat Pingaarnersaat 4:4) Napasuliaq portullunilu amitsuuvoq, nagguaatsullu tuugaava manissuuvoq. Salomop niviarsiap qungasia pinnaraa amitsuullunilu manissuummat.

Ilinniarfigisinnaasavut:

4:1-7. Niviarsiap Shulamimiup Salomop ussiataarineri itigartippai taamaaliornermigullu takutillugu naammalluinnanngitsuugaluarluni ileqqorissuulluni. Ileqqorilluinnartuunini kajungernarnerulissutigaa. Arnat kristumiut aamma taamaattuusariaqarput.

4:12. Niviarsiap Shulamimiup angummut asanninnini uissaminuinnaq tunngatippaa, taamaattuunermigut naatsiivittut kusanartutut kaajallallugu orpikkanik qarmamilluunniit ungalusimasutut, naatsiivittut parnaaqqasumik matulittut mappiunneqarluni aatsaat iserfigineqarsinnaasutut, ippoq. Tamanna angutinut arnanullu kristumiunut aappaqanngitsunut maligassaalluarpoq.

„IKUALASOQ [JEHOVAMIT] PISOQ“

(Erinarsugassiat Pingaarnersaat 8:5-14)

„Kinaana arnaq inoqajuitsumit aggersoq asanartuutiminut tulorsimalluni?“ niviarsiaq Shulamimiu angerlamut utertoq qatanngutaasa takullugu taama aperipput. Tamanna sioqqullugu arlaat ima oqarsimavoq: „Tassaappat qarmaliaq napasuliartaliussavarput sølviusunik; tassaappalli matu parnaaqusissavarput salliligarsuarmik cederiusumik.“ (Erinarsugassiat Pingaarnersaat 8:5, 9) Niviarsiap asanninnermi allanngujaatsuunera maanna uppernarsareerlugu ima oqarpoq: ’Ungalorsuuvunga, ivianngikkalu qaqiffiliatut ipput. Taava eqqissisutut ilerpunga taassuma isaanut.’ — Erinarsugassiat Pingaarnersaat 8:10, 1900/1961.

Asanninneq ilumoortoq tassaavoq „ikualasoq [Jehovamit] pisoq“. Sooq? Asanninneq taamaattoq Jehovameersuugami. Taassumaana asannissinnaassuseqalersikkaatigut. Ikualanera qaminneqarsinnaanngilaq. Erinarsugassiat Pingaarnersaat angutip arnallu asaqatigiinnerisa ’toqusut inaattut sakkortutigineranut [ajugaaffigineqarsinnaannginneranut]’ uppernarsaataapput kusanartut. — Erinarsugassiat Pingaarnersaat 8:6, 1990.

Salomop erinarsugassiaani aamma ersersinneqarpoq Jiisusi Kristusip aamma qilammi ’nuliassanut’ ilaasut qanoq ataqatigiitsiginerat. (Saqqummersitat 21:2, 9) Jiisusip kristumiunut tanitanut asanninnera angutip arnallu asaqatigiinnerannit tamanit akimuivoq. Katersanut nuliassaasunut ilaasut tunniusimanermik aalajaatsumik ersersitsipput. Aammattaaq Jiisusip inuunini ’savat allat’ pillugit pilliutigaa. (Johannesi 10:16) Taamaattumik pallorfiginnittut ilumoortut tamarmik niviarsiaq Shulamimiu ilaarsinnaavaat asanninnermik tunniusimanermillu soraanngisaannartunik ersersitsinermikkut. (wE 11/15 06)

[Qupp. 10-mi assiliartaq]

Aappassiarilersinnaasap qanoq ittuuneranik maluginninniaanermi Erinarsugassiat Pingaarnersaat qanoq ilinniarfigaavut?