Ilumut silarsuarmik allanngortitsisoqarsinnaava?

„Inuit piitsut oqarfigisarpaatigut pingaarnerusumik eqqissineq isumannaassuserlu kissaatigigitik — aammalu inuunerminnik pitsanngorsaanissaminnut periarfissaqarnissartik tulliullugu kissaatigalugu. Inuiaqatigiinni nunanilu tamani aaqqissuussinerit naapertuilluartut kissaatigaat, taamaalillutik suliatik nunanit pisuunit peqatigiiffinnillu pisuunit pissaaneqarniarpallaartunit akerlilersorneqannginniassammata.“

TAAMA oqarluni nunarsuarmi tamarmi ikiuiniaqatigiit peqatigiiffianni pisortap piitsut neriuutaat kissaataallu nassuiarpai. Taassuma oqaasii silarsuarmi alianartunit naapertuilluanngitsunillu eqqugaasimasut tamarmik kissaataannik oqaatiginninnerulluarsinnaapput. Silarsuaq piviusumik eqqissineqarfiullunilu isumannaatsoq inuit tamarmik kipisaffigaat. Silarsuaq taamaattoq qaqugumulluunniit piviusunngussava? Silarsuarmik naapertuilluanngiffiungaartumik allanngortitsilluinnarsinnaasumik pissaaneqartoqarpa?

 Allanngueriaraluarnerit

Inuppassuit allanngueriaraluartarsimapput. Assersuutigalugu arnaq tuluk Florence Nightingale 1800-kkunni napparsimasunik eqqiluisaarnikkut isumassuinermut inuunerminik atuiniartoq. Taassuma inuunerata nalaani — tunillannartuiaateqarnanilu antibiotikaqanngimmat — napparsimasut isumagineqarnerat ullumikkutut inngilaq. Atuakkami ima allassimasoqarpoq: „Napparsimasunik paarsisut taamanikkut ilinniagaqarnatillu ipertuujupput, aamma aalakoortarnertik inuunerluttuunertillu tusaamasaanerluutigaat.“ Florence Nightingalep napparsimasunik paarsisut inuunerannik allannguiniarnini iluatsippaa? Aap, iluatsippoq. Taamatuttaaq inuppassuit namminissarsioratik isumassuisut allarpassuartigut iluatsitsilluartarsimapput — ilaannamininngui eqqaassagaanni nakorsaariaaseq, inissialiorneq, inuussutissaqartitsiniarneq, ilinniagaqarneq aammalu allassinnaannginnermik atuarsinnaannginnermillu suliniuteqarneq eqqarsaatigalugit. Tamatuma kingunerisaanik inuit millionilikkuutaat pissakilliortut inuunerat pitsanngoriariarujussuarpoq.

Taamaakkaluartorli pisut peqqarniitsut isiginngitsuusaaginnarsinnaanngilavut: Hundredemillionilikkuutaat sorsunnerit, pinerluttuliornerit, nappaatit, kaannersuit ajunaarnersuillu allat kingunerisaannik suli atugarliuuteqarput. „Piitsuussuseq inuit 30.000-it ullut tamarluinnaasa toqqutigisarpaat,“ Irlandimi ikiuiniaqatigiit peqatigiiffiat Concern taama paasissutissiivoq. Allaat inussiaateqartarneq suli atuuppoq naak ukiut hundredelikkuutaat ingerlaneranni iluarsaaqqinniartorpassuarnit akiorniarneqartarsimagaluarluni. Atuakkami Disposable People — New Slavery in the Global Economy-mi ima allassimavoq: „Afrikamiit Atlantikup akianut inussianik niuernermi aallarunneqarsimasunit ullumikkut inussiaataasut amerlanerupput.“

Sunaana inuit ataavartumik allannguiniarnerminni akornutigisaraat? Pisuut nuimasullu pissaaneqarniarpallaarnerat pissutaava, imaluunniit allamik pissuteqarpa?

Akornutaasut

Guutip oqaasia naapertorlugu silarsuarmik naapertuilluartumik inuit pilersitsiniarnerannut akornutaanerpaasoq tassaavoq Saatani Diaavulu. Apustili Johannesip oqaluttuuppaatigut „silarsuaq tamarmi Ajortumut naalatsigitittoq“. (1 Johannesi 5:19) Eqqortumik oqaatigalugu Saatani ullumikkut ’silarsuarmik tamarmik tammartitsiniarpoq’. (Saqqummersitat 12:9) Sunniinerata ajoqutaasup peerneqarnissaata tungaanut ajussutsimit naapertuilluanngissutsimillu eqqugaasoqartarumaarpoq. Qanoruna ililluni alianartoq tamanna pilersimasoq?

Inuit siulliit, Adami Evalu, nunarsuarmut inuiaat tamarmik angerlarsimaffissaannut paratiisiusumut ajunngilluinnartumik pinngortinneqarsimasumut inissinneqarput — silarsuarmut ’ajunngingaartumut’. (1 Mosesi 1:31) Pissutsit allanngorneranut suna pissutaagami? Saatani. Guutip inatsisinik angutit arnallu maleruagassaannik aalajangiisinnaatitaanera unammillerpaa, oqaamisaarlunilu Guutip aqutseriaasia naapertuilluanngitsuusoq. Saatanip Adamimut Evamullu oqartussaaffigineqarusunnginneq qinertippaa, namminneq aalajangersinnaaniassammassuk suna ajunngitsuusoq sunalu ajortuusoq. (1 Mosesi 3:1-6) Tamatuma kingunerisaanik inuit silarsuarmik naapertuilluarfiusumik pilersitsiniarnerat akornuserneqarpoq — ajortimit naammalluinnanngissusermillu. — Romamiut 5:12.

 Sooq Guutip tamanna akueraa?

Immaqa ilaat ima aperipput: ’Sooruna Guutip ajorti naammalluinnanngissuserlu akuerigai?’ ’Sooq pikitsitsisunik piuneerussinissamut aallaqqaataaniillu aallartinnissamut pissaanini killeqanngitsoq atunngilaa?’ Tamanna ajornaappalukkaluarpoq. Pissaanermilli atuineq apeqqutinik pingaarutilinnik pilersitsivoq. Pissaanermik atornerluineq silarsuarmi piitsut naqisimaneqartullu maalaarutiginerpaasarpaat, ilaa? Kisermaassilluni naalakkersuisup isumaqataanngitsut peersinniarlugit pissaanini atoraangagu inuit eqqortuliorusuttut nalornilertannginnerpat?

Guutip inuit eqqortuliorusuttut uppernarsaavigiumavai naakkittaatsumik pissaanermik atornerluisuunnginnerminik, taamaattumik Saatanip inuillu pikitsitsisimasut nammineq inatsisiminik najoqqutassiaminillu malinninnatik inuunissaat akueraa — killilimmilli. Piffissap takutikkumaarpaa Guutip aqutseriaasia eqqortutuaasoq. Paasinarsissaaq Guutip uagutsinnut killiliissutigisai uagutsinnut iluaqutaasut. Aap, Guutip aqutsineranut pikitsitsinerup kingunerisaasa alianartut takutereerpaat pissutsit taamaannerat. Takutinneqarportaaq Guuti piffissarititani nallerpat ajussutsip peernissaanut pissaanersuarminik atuinissamut pissutissaqarluartoq. Tamannalu ungasinngitsukkut pissaaq. — 1 Mosesi 18:23-32; 5 Mosesi 32:4; Tussiaat 37:9, 10, 38.

Guutip akuliunnissaata tungaanut aaqqissuussinermi naapertuilluanngitsumi soriarsinnaanata ’anersaarulullutalu nimaarpugut’. (Romamiut 8:22) Qanorluunniit pissutsit allanngortinniartigigaluarutsigit Saatani peersisinnaanaguluunniit naammalluinnanngissutsimut tunngaviusoq naalliuuteqarnitsinnut pissutaasoq peersilluinnarsinnaanngilarput. Ajortip Adamimit kingornussatta kingunerinik suujunnaarsitsinissaq uagut piginnaaneqarfiginngilarput. — Tussiaat 49:8-10.

Jiisusi Kristusi ataavartussamik allannguiumaarpoq

Tassa imaappa pissutsit aaqqinneqarsinnaanngilluinnartut? Naamerluinnaq. Inunnit toqujasunit pissaaneqarnerungaartoq ataavartussamik allannguinissamut akisussaaffilerneqarsimavoq. Taanna kinaava? Tassa Jiisusi Kristusi. Biibilimi Guutip aqqutissiuussisunngortitaatut pingaarnertut inuiannik annaassisussatut eqqaaneqarpoq. — Apustilit Suliaat 5:31.

Maanna ’eqqartuussinissaminut’ piffissaq Guutip aalajangigaa utaqqivaa. (Saqqummersitat 11:18) Qanorpiaruna iliorniartoq? „Suut tamarmik iluarsiffissaat“ isumagissavaa, „soorlu Guuti itsarsuarli pruffiitimigut illernartutigut nalunaajaasimasoq“. (Apustilit Suliaat 3:21) Assersuutigalugu Jiisusip „annaatissavai piitsoq ikioqqulluni suaartartoq annikilliortitarlu ikiortissaaleqisoq. . . . Aniguisissavai qunutitaanermit nakuuserfigisaanermillu“. (Tussiaat 72:12-16) Guuti neriorsuivoq Jiisusi Kristusi aqqutigalugu ’nunarsuarmi tamarmi sorsunnerit soraarsikkumaarlugit’. (Tussiaat 46:10) Neriorsuivoq ’innuttaasoq kinaluunniit [nunami minguiarsimasamini] oqassanngitsoq: „Napparsimavunga.“’ Tappiitsut, tusilartut, tusiattut — aap, nappaammit naalliuutinillu eqqugaasimasut tamarmik — peqqilluinnartunngussapput. (Esaja 33:24; 35:5, 6; Saqqummersitat 21:3, 4) Allaat ukiut hundredellit ingerlaneranni toqusimasut tamanna iluaqutigissavaat. Guutimi neriorsuivoq naapertuilluanngissuseq naqisimaneqarnerlu pissutigalugit toqutaasimasut makitikkumaarlugit. — Johannesi 5:28, 29.

Jiisusi Kristusip allannguinissaa ilaannakortuunaviarnanilu utaqqiisaannaagallartuunavianngilaq. Silarsuarmut naapertuilluarfiusumut akornutaasut tamaasa peerluinnassavai. Ajorti naammalluinnanngissuserlu piissavai aamma Saatani Diaavulu pikitsitsiumatussusianillu malinnittut tamaasa piuneerutissallugit. (Saqqummersitat 19:19, 20; 20:1-3, 10) Annikilliornerit naalliuutillu Guutip akuerigallarsimasai ’aappassaanik nalliutissanngillat’. (Nahumi 1:9, 1990) Tamannaana Jiisusip eqqarsaatigigaa Guutip naalagaaffiata tikiunnissaanik Guutillu piumasaata ’qilammisut nunamissaaq’ pinissaanik qinusarnissatsinnik ilinniartikkamitigut. — Matthæusi 6:10.

’Kisiannimi,’ immaqa akerliliivutit, ’Jiisusi nammineq oqannginnami ’piitsut najortigiuassagivut’? Tamanna ima paasisariaqanngila naapertuilluanngitsoqartuaannarlunilu piitsoqartuaannassasoq?’ (Matthæusi 26:11) Ilumoorpoq Jiisusi oqarmat piitsoqartuaannassasoq. Oqaasiisali Biibilimilu neriorsuutit ataqatigiinnerisa takutippaat una pigaa piitsoqartuaannassasoq pissutsit  aaqqissuussaanerat manna atuuttuartillugu. Taassuma nalunngilaa inuup kialuunniit silarsuaq piitsuussutsimit naapertuilluanngissutsimillu aniguisissinnaassanngikkaa. Nalunngilaattaaq nammineq tamakku tamaasa allanngortikkumaarlugit. Ungasinngitsukkut pissutsit aaqqissuussaanerat nutaaq pilersissavaa — „qilaat nutaat nunalu nutaaq“ anniaateqarfiunngitsoq, nappaateqarfiunngitsoq, piitsoqarfiunngitsoq toqusoqarfiunngitsorlu. — 2 Petrusi 3:13; Saqqummersitat 21:1.

’Puiunngisaannarsiuk ikiuisarneq’

Taava allat ikiorniarlugit sapinngisatsinnik iliornivut iluaqutaanngillat? Naamerluinnaq. Biibilimi kajumissaarneqarpugut allat misilinneqarlutillu annikilliuuteqaraangata ikiortassagivut. Itsaq kunngi Salomo ima allappoq: „Ajunngitsuut nigorsimatinniaqinagu atorfissaqartitsisumit, ikiuissallutit sapinngikkaangavit.“ (Ussatit 3:27) Aamma apustili Paulusip kajumissaarutaa imaappoq: ’Puiunngisaannarsigit ikiuisarneq tukkornerlu.’ — Hebræerit 13:16.

Jiisusi Kristusip nammineq kajumissaarpaatigut sapinngisarput tamaat allat ikiorniaqqullugit. Assersuusiorluni oqaluttuaraa Samariamiu angummik persuttagaasimasumik ujajaaffigineqarsimasumillu naapitsisoq. Jiisusi oqaluttuarpoq angutip Samariamiup taanna ’nalligitsaakkaa’ namminerlu pigisani atorlugit angutip unatartissimasup ikii mattusersorai ikioraalu saassunneqarnini qaangerniassammagu. (Lukasi 10:29-37) Samariamiup misigittartup silarsuaq allanngortinngilaa, kisianni angutip allap inuuneranut assut sunniuteqartumik iliuuseqarpoq. Uaguttaaq taamaaliorsinnaavugut.

Jiisusi Kristusili inunnik ataasiakkaanik ikiuinermit iliuuseqarnerusinnaavoq. Silarsuaq allanngortilluinnarsinnaavaa ungasinngitsukkullu taamaaliussaaq. Taamaaliorpat, ullutsinni pissutsinit naapertuilluanngitsunit eqqugaasimasut inuunertik pitsanngorsarsinnaalissavaat, misigissavaallu eqqissineq piviusoq isumannaassuserlu. — Tussiaat 4:9; 37:10, 11.

Taamatut pisoqarnissaanik utaqqitilluta, silarsuarmi naapertuilluanngiffiusumi eqqugaasimasunut tamanut anersaakkut timikkullu ’ajunngitsuliorniartuarta’. — Galatiamiut 6:10. (wE 11/1 05)

[Qupp. 5-mi assiliartaq]

Florence Nightingalep napparsimasunik paarsisut silarsuaat allanngorterujussuarpaa

[Suminngaanneernera]

National Library of Medicine-mit akuerineqarnikkut

[Qupp. 7-mi assiliartaq]

Kristusip ajoqersugai ikioqatigiittarput

[Qupp. 4-mi suminngaanneernera]

The Star, Johannesburg, S.A.