Silarsuaq naapertuilluanngiffiusoq

SILARSUARMI naapertuilluanngiffiusumi inuugatta isumaqatigiissutigisinnaavarput, ilaa? Qanorluunniit piginnaaneqartigigaluarutta aamma qanorluunniit silatusaartigisumik inuunerput pilersaarusiortigigaluarutsigu, inuunermi pigissaalernissaq iluatsitsilluarnissarluunniit qulakkeersinnaanngilarput, nerisassaqarnissarluunniit aamma naami. Itsaq kunngiusimasup silatuup oqarneratut pisoqarajuppoq: „Inuussutissaqarnermi ilisimasut aalajangiisuunatik, pisuussutini silassorissut aalajangiisuunatik, nuannarineqarnermi paasisimasaqarluartut aalajangiisuunatik.“ Sooq? Tamanna Salomop nangilluni ima akivaa: „Piffissaq nalaatsornikkullu pisut taakkuninnga tamanik attuisarput.“ (NV) — Oqaluussisartup oqaasii 9:11.

„Ajunaarneq tassanngaannaq nalliukkaangat“

Aap, „piffissaq nalaatsornikkullu pisut“ isumaqakkajuppoq piffissami sumiiffimmilu kukkusumiinnermik, peqqissaarluinnartumik pilersaarusiatsinnik kissaatigingaakkatsinnillu aseruisinnaasoq. Salomop oqarneratut „ajunaarneq tassanngaannaq nalliukkaangat“ tassaavugullusooq „aalisakkat qassutinut napitittut timmissallu qilorartuutinit nigarneqartut“. (Oqaluussisartup oqaasii 9:12) Assersuutigalugu inuit millionilikkuutaat ilaquttatik pilersorniarlugit qasusuillutik nunamik naggorissaasarput, ’ajunaarnerli tassanngaannaq nalliuttarpoq’ siallersimanngippat inerititaallu panernersuarmit aserorneqarpata.

Allat ikiuunniaraluarput, silarsuulli inuiaqatigiivisa ’ajunaarnermik tassanngaannaq nalliuttumit’ eqqugaasunik ikiuiniarnerigaluat amerlanertigut naapertuilluarpasittanngilaq. Kaannersuarmik akiuiniarneq assersuutigeriartigu. Ikiuiniaqatigiiffik siuttuusoq nalunaaruteqarpoq ukiup ataatsip ingerlanerani „nunavissuaq [Afrika] tamakkerlugu ikiuiniarnermi Golfimi sorsunnersuarmut aningaasat tunniunneqarsimasut tallimararterutaannaannik tunineqarsimasoq“. Naapertuilluarnerua nunavissuarmi tamarmi kaannersuup nassatarisaanik anniaatit naalliuutillu nipaallisinniarlugit atugaannut naleqqiullugit nunat pisuujunerusut nunami ataatsimi sorsunneq akiorniarlugu aningaasanik tallimariaammik amerlanerusunik atuinerat? Aamma naapertuilluarnerua piffissami pigisatigut pigissaarfiusumi, silarsuarmi tamarmi inuit sisamaagaangata ataaseq piitsuulluinnarluni inuummat aammalu ukiut tamaasa meeqqat millionilikkuutaat nappaammik pinngitsoortinneqarsinnaagaluartumik toqquteqartarmata? Naamerluinnaq!

 Soorunami „ajunaarneq tassanngaannaq nalliukkaangat“ ’piffissaq nalaatsornikkullu pisut’ kisimik sunniuteqarneq ajorput. Nukiit pissaaneqartut sunniuteqarfigisinnaanngisavut aamma inuunitsinnik aqutseqataapput susoqarnissaanillu aalajangiisooqataallutik. Ukiakkut 2004-mi Beslanimi Nordossetiamiittumi pisimasoq tamatumunnga assersuutigineqarsinnaavoq. Tassani inuit hundredelikkuutaat, taakkua ilarpassui tassaasut meeqqat mikisut ullormi atualeqqaarfimminni, peqqarniisaarniat sakkutuullu isumannaallisaasut peqqarniitsumik akersuunneranni toqutaapput. Pisimasumi alianartumi tamatumani kikkut toqunerat kikkullu aniguinerat soorunami nalaatsornerinnaavoq, ’ajunaarnernulli tassanngaannaq nalliuttunut’ taakkununnga pissutaanerpaasoq tassaavoq inuit akornanni akersuunneq.

Taamaattuaannassava?

„Kisiannimi inuuneq taamaappoq,“ inuit ilaat silarsuarmi naapertuilluanngissuseq eqqartoraangamikku taama oqartarput. „Taamaattuaannarnikuuvoq, aamma taamaattuaannassaaq.“ Isumaqarput sanngiitsut nukittuunit naqisimaneqartuaannassasut pisuullu piitsunik atornerluiuaannassasut. Aap, taakkua oqarput ’piffissaq nalaatsornikkullu pisut’ pissutigalugit inoqartuartillugu pissutsinit taamaattunit eqqugaajuarumaartugut.

Ilumut taamaattariaqarpa? Piginnaanerminnik silatusaartumik siuneqassuseqartumillu atuisut suleruloornertik pillugu naapertuilluartumik akissarsisinneqanngisaannassappat? Silarsuarmi naapertuilluanngiffiusumi ataavartumik allannguisitsisoqarumaarpa? Tamanna pillugu allaaserisami tulliuttumi qanoq eqqaaneqarnera maluginiariassagit.

 [Qupp. 2-mi suminngaanneernera]

SAQQAA: Angut meerarlu: UN PHOTO 148426/McCurry/Stockbower

[Qupp. 3-mi suminngaanneernera]

MAXIM MARMUR/AFP/Getty Images