Guutip asanninneraniittuinnarit

„Asasakka, . . . Guutip asanninneraniittuinnaritsi Naalakkatta Jiisusi-Kristusip nallittuinerata ilissinnik inuunermut naassaanngitsumut pisitsinissaa utaqqitillugu.“ — JUDASI 20, 21.

1, 2. Qanoq ilillutit Guutip asanninneraniittuinnarsinnaavit?

JEHOVAP inuiaat silarsuaat ima asatigaa ernitui tunniullugu, taassumunnga uppertut naassaanngitsumik inuusinnaaniassammata. (Johannesi 3:16) Taamatut asaneqarluni ila nuanningaarami! Jehovamut kiffaaguit, qularnanngitsumik asanninneq tamanna naassaanngitsumik nuannaarutigerusuppat.

² Ajoqersukkap Judasip nassuiarpaa qanoq ilillutit Guutip asanninneraniittuinnarsinnaasutit. Taanna ima allappoq: „Upperisarsi illernartoq tunngavigalugu immissinnut ineriartortinniaritsi qinusarlusilu Anersaakkut Illernartukkut. Guutip asanninneraniittuinnaritsi Naalakkatta Jiisusi-Kristusip nallittuinerata ilissinnik inuunermut naassaanngitsumut pisitsinissaa utaqqitillugu.“ (Judasi 20, 21) Guutip oqaasia atuaqqissaaraangakku nutaarsiassarlu nuannersoq oqaluussissutigigaangakku imminut ineriartortittarputit kristumiut ajoqersuutaannut ’uppernerpit illernartup’ ineriartortinneratigut. Guutip asanninneraniittuinnarumallutit „Anersaakkut Illernartukkut“ qinusariaqarputit, tassa tamatuma sunniineratigut qinusariaqarputit. Inuunerullu naassaanngitsup pilluaqqussutaanik pisinnaajumallutit Jiisusi Kristusip utertitsissutitut pilliutaa upperisariaqarpat. — 1 Johannesi 4:10.

3. Sooq ilaat Jehovamut nalunaajaasuujunnaarsimappat?

³ Inuit ilaat uppertuusimagaluartut Guutip asanninneraniikkunnaarsimapput. Ajortuliortutut inuuniarlutik aalajangersimagamik Jehovamut nalunaajaasuujunnaarput. Qanoq ilillutit ilinnut taamatut pisoqarnissaa pinngitsoortissinnaaviuk? Immikkoortunik tulliuttunik eqqarsaatiginneqqissaarneq ajortuliornaveersaarnissamut Guutillu asanninneraniittuinnarnissamut iluaqutigisinnaavat.

Guutimik asanninnerit ersersiguk

4. Guutimut naalannissaq qanoq pingaaruteqartigaa?

⁴ Guutimik asanninnerit ersersiguk taassumunnga naalannikkut. (Matthæusi 22:37) Apustili Johannesi ima allappoq: „Guutimut asanninneq tassaavoq inassutai maleruaratsigit, inassutaalu artornartuunngillat.“ (1 Johannesi 5:3) Guutimut naalanneq ileqqorigukku, tamanna ussernartunik akiuinissamut pisariaqartumik nakussatsissutigisinnaavat assullu nuannaarutigisinnaallugu. Tussiaasiortoq ima allappoq: „Pilluarpoq iluaatsut siunnersuutaat malillugit inuunngitsoq, . . . kisianni [Jehovap] inatsisaanik nuannarisaqartoq.“ — Tussiaat 1:1, 2.

5. Jehovamik asanninnerit sunissamut kajumississutigissaviuk?

⁵ Jehovamik asanninnerit taassuma aqqanut kanngunarsaataasinnaasumik ajortuliorujussuarnaveersaarnissamut kajumississutigissavat. Aguri ima qinuvoq: „Piitsuunermik pisuunermilluunniit tuneqinanga, nerisassanik pisassarisannik tuniinnannga; qaarsillarpallaaraluarumami miserratigeqinavakkit imalu aperalunga: ’Kinaagami taanna [Jehova]?’ Imaluunniit piitsunngorpallaarnermit  tillinniartaleqinaanga Guutimalu aqqa narrunarsarlugu.“ (Ussatit 30:1, 8, 9) Guutimut kanngunarsaataasumik iliuuseqarnikkut ’taassuma aqqanik narrunarsaannginnissat’ aalajangiusimajuk. Assuarnaatsuujuarnissat noqqaassutigiuk illit pissusilersornerit taassuminnga naalannarsisitsiniassammat. — Tussiaat 86:12.

6. Piaaralutit ajortulioruit qanoq pisoqarsinnaava?

⁶ Ataatannut qilammiusumut asannittumut aalajangersimasumik qinusarit ajortuliornissamut ussernartunik akiuinissamut ikioqqullutit. (Matthæusi 6:13; Romamiut 12:12) Guutip siunnersuutai maleruartuakkit qinnutitit akornuserneqaqqunagit. (1 Petrusi 3:7) Piaaralutit ajortulioruit alianartumik kinguneqarsinnaavoq, Jehovami assersuutaasumik nuissamik ulittarpoq naalasseriitsut qinnutaat imminut anngussinnaannginniassammata. (Upputit 3:42-44) Taamaammat maniguugit, qinnutigiullu qinunikkut Guutimut qanillinissannut akornutaasumik iliuuseqannginnissat. — 2 Korinthimiut 13:7.

Guutip erneranik asanninnerit ersersiguk

7, 8. Jiisusip siunnersuutaanik maleruaaneq ajortumik inooriaaseqalinnginnissamut qanoq iluaqutaasinnaava?

⁷ Jiisusi Kristusimut asanninnerit ersersiguk taassuma inassutaasa naalannerisigut. Tamanna ajortumik inooriaaseqalinnginnissamut iluaqutigissavat. Jiisusi ima oqarpoq: „Inassutikka maleruarussigit asannissutsinniittuassaasi, soorlu uanga Ataatama inassutai maleruarikka asannissusianiittuarlungalu.“ (Johannesi 15:10) Jiisusip oqaasiinik maleruaalluni inuuneq Guutip asanninneraniittuinnarnissamut qanoq iluaqutigisinnaaviuk?

⁸ Jiisusip oqaasiinik eqqumaffiginninneq ileqqussatigut assuarnaattuarnissamut iluaqutigisinnaavat. Guutip Israelikkunnut inatsisaa imaappoq: „Allasiussanngilatit.“ (2 Mosesi 20:14) Peqqussummut tamatumunnga tunngaviusoq Jiisusip ersersippaa ima oqarluni: „Kialuunniit allap nulia pilerigalugu isigiguniuk taanna uummatimigut allasiorfigereerpaa.“ (Matthæusi 5:27, 28) Apustili Petrusi allappoq ukiuni hundredelinni siullerni ilagiinniittut ilaasa ’isaat arnarsiortuartartut [allasiornermik ulikkaartut, NV]’, aamma ’inuit maleruutiasut tammartittaraat’. (2 Petrusi 2:14) Illit taakkunatut pinak kinguaassiuutitigut ajortuliunngitsoorsinnaavutit Guuti Kristusilu asallugillu naalakkukkit taakkununngalu attaveqarluartuarnissat aalajangiusimagukku.

Jehovap anersaavanit siulersortigit

9. Ajortuliortuaraanni suna annaaneqarsinnaava?

⁹ Guutip anersaava illernartoq qinnutigiuk, tamatumanngalu siulersortigit. (Lukasi 11:13; Galatiamiut 5:19-25) Ajortuliortuaruit Guutip anersaani utertissinnaavaa. Daavi Batseba ajortulioqatigereerlugu Guutimut ilungersorluni ima qinuvoq: „Ilinnit igeqinanga, anersaallu illernartoq uannit peerseqinagu!“ (Tussiaat 51:13) Kunngi Sauli peqqissiminanilu allamik isumataannginnami Guutip anersaavanit najorneqarunnaarpoq. Sauli ikikkagassamik pilliuteqarnermigut Amalekikkullu kunngiannik nersutaatinillu asattuussinermigut ajortuliorpoq. Taamatut pisoqarnerata kingorna Jehovap anersaani illernartoq Saulimit utertippaa. — 1 Samueli 13:1-14; 15:1-35; 16:14-23.

10. Sooruna ajortulioqattaarnissaq eqqarsaatigissanngikkilluunniit?

¹⁰ Ajortulioqattaarnissaq eqqarsaatigissanngilalluunniit. Apustili Paulusi ima allappoq: „Sallusuissut ilisimalereeraluarlugu piaaraluta ajortuliorutta taava pilliutissaqarunnaassaaq ajortit pillugit.“ (Hebræerit 10:26-31) Taama ingasatsigisumik ajortulioraluarutta qanoq alianartigissagaluarpa.

Allat asanninnermik ilumoortumik ersersitsivigikkit

11, 12. Asanninneq ataqqinninnerlu qanoq kinguaassiuutitigut inuunerlunnaveersaarutaassappat?

¹¹ Tullermik asanninneq kinguaassiuutitigut inuunerlunnaveersaarutigissavat. (Matthæusi 22:39) Asanninneq taama ittoq kajumississutigissavat uummativit paarinissaanut, uummatinnit nakutitaannginniassagavit inuup allap aappallip tunniusimaneranik ’tillinnissamut’. Taamaalioraluaruit allasiornermik kinguneqarsinnaavoq. (Ussatit 4:23; Jeremia 4:14; 17:9, 10) Jobip assuarnaatsup pisimaneratut pigit, taassuma arnat allat nuliarinngisani ajuutiginnilluni soqutigerusunngilai. — Jobi 31:1.

¹² Aappariinnerup illernassusianik ataqqinninneq ajortuliorujussuannginnissamut iluaqutigisinnaavat. Guutip siunertaa tassaavoq inuuneq  aappariittut inooqatigiinnikkut ingerlateqqinneqartassasoq. (1 Mosesi 1:26-28) Eqqaamajuk kinguaassiuutit inuunermut, illernartuusumut, tunngassuteqarmata. Kinguaassiuutitigut inuunerluttut allasiortullu Guutimut naalanngillat, atoqatigiinnermik nikanarsaapput, aappariinnerup illernassusianik ataqqinninngillat namminnerlu timiminnut ajortuliorlutik. (1 Korinthimiut 6:18) Guutimulli naalaatigaluni Guutimik tullermillu asannikkaanni, tamanna ilagiinnut kristumiunut ilaajunnaarsitaassutaasinnaasumik iliuuseqanngitsoorutaasinnaavoq.

13. Inuunerluttup „pisuussutini“ qanoq nungulussinnartarpai?

¹³ Eqqarsaatipalaat eqqarsaatiginaveersaartariaqarpavut asasavut aliasuutisserujussuannginniassagatsigit. Ussatit 29:3-mi ima allassimavoq: „Arnanik atortittartunik ilaqartartup pisuussutini nungulussinnartarpai.“ Pigisatigut pisuussutit saniatigut allanik pisuussuterpassuaqarpoq. Allasiortup allamik isumataanngitsup Guutimut attaveqarnini naleqangaartoq aserortarpaa ilaquttaminullu attaveqarunnaartarluni. Nulia avinnissaminut pisinnaatitaavoq. (Matthæusi 19:9) Allasiortoq uiugaluarpat nuliaagaluarpalluunniit avinneq aappaasumut pisuussuteqanngitsumut, qitornanut allanullu naalliuutaangaarsinnaavoq. Inuunerlunnerup sunniutipilui aserorsaataasut ussernartup tamatuma akiornissaanut kajumississutigisariaqarpavut, ilaa?

14. Ussatit 6:30-35 eqqunngitsuliornernut tunngatillugu sumik ilinniarfigisinnaavarput?

¹⁴ Allasiornerup ajoqusiinerata iluarsineqarsinnaannginnera iliuutsip namminissarsiorluinnarluni iliuuserineqartartup tamatuma pinngitsoortinnissaanut kajumississutaangaartariaqarpoq. Ussatit 6:30-35-mi ersersinneqarpoq inuit tillinniamut kaannini pissutigalugu tillittumut paasinnittuusinnaasartut, allasiortumilli ajortumik pissuteqarnera pillugu asissuisartut. Taanna „imminut aseruutissiuinnarpoq“. Mosesip inatsisaasa atuunnerata nalaani toqutaasimassagaluarpoq. (3 Mosesi 20:10) Allasiortoq nammineq pilerissutsiminik naammassinninniaannarluni allanik naalliutsitsingaartarpoq, allasiortorlu allamik isumataanngitsoq Guutip asanninneraniikkunnaartarpoq, ilagiinnullu kristumiunut minguitsunut ilaajunnaarsitaasarpoq.

Ilerasuuteqanngittuarit

15. Nalunngeqatiginnissut uutarlugu ’nalunaaqutserneqarsimasutut’ ittoq qanoq ittuua?

¹⁵ Guutip asanninneraniittuinnarumagutta nalunngeqatiginnissuterput ajortuliornermut misikkarlussitinngisaannartariaqarparput. Soorunalimi silarsuarmi inuunerlunneq akuerissanngilarput aamma ilagisartakkanik, atuagassanik aliikkusersuutinillu toqqaanissatsinnut tunngatillugu mianersortariaqarpugut. Paulusi ima mianersoqqusivoq: „Ullussani kingullerni inuit ilaat uppernermik [tunussiumaarput], tassa naalakkamikkit anersaat tammartitsisut anersaapiluillu ajoqersuutaat, siaruartigaasut ajoqersuisut salluliortut nalunngeqatiginnissutsimikkut pinerluttuliortutut nalunaaqutsigaasut peqqusersiornerisigut.“ (1 Timotheusi 4:1, 2) Nalunngeqatiginnissut uutarlugu ’nalunaaqutsigaasutut’ ittoq, uinittut uutarnikutut malussarluttumik qileroqalersimasutut ippoq. Nalunngeqatiginnissutip taama ittup tunussisunut uppernermillu tunussissutigisinnaasatsinnut mianersoqqusinnaajunnaassavaatigut.

16. Ilerasuuteqannginnissaq sooq taama pingaaruteqartigaa?

 ¹⁶ Ilerasuuteqannginnerput annaanneqarnissatsinnut aalajangiisuuvoq. (1 Petrusi 3:21, NV) Nalunngeqatiginnissuterput Jiisusip aavanik kuisamik upperinninnitsigut minguiarneqarpoq, suliat toqungasut piiarlugit, ’Guutimut uumasumut kiffartorsinnaaniassagatta’. (Hebræerit 9:13, 14) Piaaraluta ajortulioraluarutta nalunngeqatiginnissuterput mingutsinneqassaaq, minguitsuujunnaassaagullu Guutimullu kiffartornissamut naleqqukkunnaassalluta. (Titusi 1:15) Jehovalli ikiuineratigut ilerasuuteqanngissinnaavugut.

Eqqunngitsuliorumanani iliuuserineqarsinnaasut allat

17. ’Jehovamut aalajaalluinnarneq’ uagutsinnut qanoq iluaqutaava?

¹⁷ ’Jehovamut aalajaalluinnartuugit’, soorluttaaq Kalebi itsaq Israelimi taamaassimasoq. (5 Mosesi 1:34-36) Guutip ilinnut piumasaqaatai iliuuserisakkit, ’anersaapiluillu nerliutaannik’ ilangiinissat isumaliutiginngisaannaruk. (1 Korinthimiut 10:21) Tunussineq akuersaanngilluinnaruk. Anersaakkut inuussutissanik Jehovap nerrivianiinnaq sassaalliutigineqartartunik qujamasullutit ilangiisarit; taava eqqunngitsumik ilinniartitsisunit ajussutsilluunniit anersaavinit pissaasunit nakutinneqarnavianngilatit. (Efesosimiut 6:12; Judasi 3, 4) Anersaakkut ittut pingaarnerutikkit, soorlu Biibilimik atuaqqissaartarneq, ataatsimiinnernut najuuttarneq oqaluusseqataasarnerlu. Jehovamut aalajaalluinnaruit aamma tamaviaarlutit Naalagaq kiffartorfigigukku, qularissanngilat pilluarlutit inuunissat. — 1 Korinthimiut 15:58.

18. Jehovamik mianerinninneq illit pissusilersorninnut qanoq sunniuteqassava?

¹⁸ ’Mianerinnillutit ataqqinnillutillu Guutimut kiffartornissat’ aalajangiusimajuk. (Hebræerit 12:28) Jehovamik mianerinninneq oqaatseriitsuunnginnissamut kajumississutigissavat. Petrusip tanitaqatiminut siunnersuutaanik matuminnga malinninnissannut iluaqutigissavat: „Ilissi taanna kinaassusersiornani suliaat naapertorlugit tamanik eqqartuussisartoq Ataatatut torlorfigisarassiuk maani allamiuinnaagallarnissinni mianeralugu inuussaasi.“ — 1 Petrusi 1:17.

19. Ilikkakkatit Guutip oqaasianeersut sooq illit nammineq inuuninni atortuartariaqarpigit?

¹⁹ Ilikkakkatit Guutip oqaasianeersut nammineq inuuninni atortuakkit. Tamanna ingasattumik ajortuliunnginnissamut iluaqutigissavat ’ajunngitsumik ajortumillu immikkoortitsisinnaalerlutik piginnaassutsimik atortuinnarnerisigut sungiussisimasut’ ilagissammatsit. (Hebræerit 5:14) Isumaatsumik oqalunnak isumaatsuliornallu eqqumasariaqarputit, ulluni ajortuni makkunani siuneqartutut ’piffissamik pisisutut’ (NV) inuuniassagavit. ’Paasiniaruk suna Jehovap piumasarigaa’, piumasaatullu iliortuarit. — Efesosimiut 5:15-17; 2 Petrusi 3:17.

20. Sooq piumatussuseq ingalassimasariaqarparput?

²⁰ Piumatussuseq — allat pigisaannik pileritsaassineq — inissaqartinngilluinnaruk. Inatsisit Qulit ilaat imaappoq: „Tullivit illua pileritsaatissanngilat. Pileritsaatissanngilatit tullivit nulia inussiaataaluunniit angut inussiaataaluunniit arnaq ussiutaaluunniit siutituujutaaluunniit suugaluartulluunniimmi tullivit pigisai.“ (2 Mosesi 20:17) Inatsit taanna inuup illuanut, nulianut, kiffaanut, nersutaataanut allanullu illersuutaavoq. Pingaaruteqarnerpaasulli  tassaapput Jiisusip piumatussutsip inummik mingutsitsisarnera pillugu oqaasii. — Markusi 7:20-23.

21, 22. Kristumiu ajortuliorumanani qanoq iliuuseqartariaqarsinnaava?

²¹ Ajortuliornermik kinguneqarsinnaasumik piumatussuseqannginniassagavit pisariaqartunik iliuuseqarit. Ajoqersugaq Jaaku ima allappoq: „Kinaluunniit usserneqartarpoq nammineq pilerissutsiminit nassataritilluni kajumitsatsitaallunilu; pilerissutsillu ilumileraangami ajorti erniarisarpaa, ajortillu inersimaleraangami toqu erniarisarpaa.“ (Jaaku 1:14, 15) Assersuutigalugu siornatigut imigassamik ajornartorsiuteqarsimasoq immaqa aalajangissaaq angerlarsimaffimmini imigassaateqarniarnani. Kristumiuusorlu immaqa allamik suliffittaartariaqarsinnaavoq angutaaguni arnamut arnaaguniluunniit angummut ussernartorsiorumanani. — Ussatit 6:23-28.

²² Ajortuliornermik kinguneqarsinnaasumik iliuuseqalaaginnassanngilatilluunniit. Qaninniarujooraanni kanngunartunillu eqqarsaateqaraanni tamanna kinguaassiuutitigut inuunerlunnermik allasiornermilluunniit kinguneqarsinnaavoq. Salloqittaalaartarneq salluliungaatsiarnissamut sapiissuseqalersitsisinnaavoq, sallusarnerlu ileqqupalaaliunneqariartuaarsinnaavoq. Tillilaartarnikkut nalunngeqatiginnissut malussarlersinneqarsinnaavoq taamaalillunilu annerusumik tillittoqartalersinnaalluni. Tunussisullu eqqarsaataat akuerilaaginnaraanni, tamanna tunussilluinnarnermik kinguneqarsinnaavoq. — 2 Thessalonikamiut 2:3; Saqqummersitat 21:8.

Ajortuliorsimaguit qanoq iliussavit?

23, 24. Nalunaarsuutit aappaat 6:29, 30 aamma Ussatit 28:13 qanoq tuppallersaatigisinnaavavut?

²³ Inuit tamarmik naammalluinnanngitsuullutillu kukkusarput. (Oqaluussisartup oqaasii 7:20) Ingasattumilli ajortuliorsimaguit kunngi Salomop Jehovap naalaffiata atoqqaartinneqarnerani qinnutaa tuppallersaatigisinnaavat. Salomo Guutimut ima qinuvoq: „Kinaluunniit innuttavit Israelikkut ilaat qamuuna eqqorneqartutut misigisaraangat assanilu illup matuma tungaanut isatsikkaangagit, taava taakkua ilungersorlutik qinnutaat qilammi najukkanni tusartaruk; qinusoq isumakkeerfigisaruk, taamaattorli kinaluunniit qanoq iliornera naapertorlugu pineqartittaruk akillugulu iliuuseqarfigalugu, illit uummammiugisai ilisimagakkit.“ — 2 Nalunaarsuutit 6:29, 30, 1990.

²⁴ Aap, Guutip uummaterput nalunngilaa aamma isumakkeerfiginnittuuvoq. Ussatit 28:13-imi ima allassimavoq: „Unioqqutitsinerminik isertuisoq pilluaatissaqanngilaq; ajortuliaminilli anngiiaatiginnittoq soraarussisorlu nallittorneqartussaavoq.“ Ajortulianik peqqissimissutiginnilluni nassuerutiginnikkaanni periaatsimillu allanngortitsigaanni Guutimit nallittorneqartoqarsinnaavoq. Anersaakkulli sanngiillisimagaanni Guutip asanninneraniittuinnarnissamut suna alla iluaqutaasinnaava?

Qanoq akissavit?

• Qanoq ililluta Guutip asanninneraniittuinnarsinnaavugut?

• Guutimik Kristusimillu asanninneq ajortumik inooriaaseqalinnginnissamut qanoq iluaqutigaarput?

• Sooq allanik ilumoortumik asanninneq kinguaassiuutitigut inuunerlunnaveersaarutigaarput?

• Eqqunngitsuliorumanata qanoq iliorsinnaavugut?

[Atuaqqissaarnermi apeqqutit]

[Qupp. 22-mi assiliartaq]

Judasip uagutsinnut ersersippaa qanoq ililluta Guutip asanninneraniittuinnarsinnaasugut

[Qupp. 24-mi assiliartaq]

Avinneq aappaasumut pisuussuteqanngitsumut qitornanullu naalliuutaangaarsinnaavoq

[Qupp. 25-mi assiliartaq]

Illit Kalebitut ’Jehovamut aalajaalluinnarnissat’ aalajangiusimaviuk?

[Qupp. 26-mi assiliartaq]

Ussernartumik akiuinissamut ikiorneqarnissat qinnutigisaruk