Ilumut „ullussani kingullerni“ inuuvugut?

BIIBILIMI ’ullussanik kingullernik’ taaneqartuni inuunitsinnut allanngorfiusut assigiinngitsut marluk takutitseqataapput. Allakkani siulittuutigineqarpoq takussaasunik arlalinnik ’silarsuup naggatissaani’ pisoqarumaartoq. (Matthæusi 24:3) Biibilimi aamma eqqartorneqarput isummamik allannguineq ileqqullu suut inuit „ullussani kingullerni“ inuusut ilisarnaatigissagaat. — 2 Timotheusi 3:1.

Silarsuarmi pisut, inuit pissusilersortarnerisa pissuserisamikkullu allanngornerisa takutippaat ullussani kingullerni inuusugut, Guutillu naalagaaffia qanittukkut taassuma asannittaanut naassaanngitsumik pillualersitsiumaartoq. Jiisusip ullussani kingullerni inuunitsinnut ilisarnaataasussatut oqaatigisai pingasut aallaqqaatigalugu takoriartigik.

’Nallisitsinernut aallaqqaat’

„Inuiaammi pikitsitsiumaarput inuiannut, naalagaaffillu naalagaaffimmut, sumilu tamaani kaannersuaqartarumaarpoq nunalu sajuttarluni,“ Jiisusi oqarpoq imalu nangilluni: „Tamakku tamarmik nallisitsinernut aallaqqaataapput.“ (Matthæusi 24:7, 8) Misissoriartigu „tamakku tamarmik“ qanoq isumaqarnersoq.

Ukiut hundredellit matuma siorna sorsunnerit inuiaqatigiinnilu isumaqatigiinnginnerit kinguneri pissutaallutik inuppassuit toqutaapput. Nalunaarusiami Worldwatch Institute-meersumi ima allassimavoq: „Ukiuni 1900-kkunni sorsunnermi toqutaasut pingasoriaammik amerlanerupput ukiuni hundredelinni siullernit 1899-ip tungaanut sorsunnerni toqutaasunit tamanit.“ Jonathan Glover atuakkiamini Humanity — A Moral History of the Twentieth Century-mi ima allappoq: „1900-mit 1989-ip tungaanut toqutaasut 86 millioniusorineqarput. . . . 1900-kkunni sorsunnerni toqusut taama amerlatigimmata amerlassusiat takorlooruminaappoq. Agguaqatigiissillugu qassit toqutaasimanersut taagaluaraanni eqqortumik paasissutissiinerussanngilaq, tassami pingasuugaangata marluk missaat (58 millionit) sorsunnersuarni marlunni toqutaapput. Kisianni toqutaasut taakkua tamaasa piffissamut tamatumunnga tamarmut agguataaraluarutsigik ullormut 2500-t missaat toqutaasarsimassagaluarput, tassa imaappoq ukiuni 90-ini nalunaaquttap-akunneri tamarluinnaasa inuit 100-t sinnerlugit toqutaasarlutik.“ Eqqarsaatigiuk inunnut millionilinnut ikinngutiminnik ilaquttaminnillu annaasaqartunut qanoq alianartigalunilu anniaataatigisimassasoq.

Silarsuarmi nerisassarpassuarnik nioqqutissiortoqaraluartoq kaannersuaqartarnera ullunut kingullernut aamma ilisarnaataavoq. Ilisimatuut paasititsissutigaat nerisassanik nioqqutissiorneq ukiuni 30-ni kingullerni inuit amerliartornerannit sukkanerusimasoq. Taamaattoq sumiiffiit annertoorujussuit nerisassaaleqiffiupput, inuppassuit naatitsiffigisinnaasaminnik nunaateqannginnerat imaluunniit nerisassarsiniutissaminnik naammattunik aningaasaateqannginnerat pissutaalluni. Nunani ineriartorfiorpianngitsuni inuit 1,2 milliardit missaasa ullormut 1 US dollari minnerusorluunniit inuussutigisariaqarpaat. Taakkua amerlanersaat, 780 millionit missaat, kaattuaannartuupput. Silarsuarmi Peqqissaanikkut Suliniaqatigiiffik naapertorlugu timip pisariaqagai inorlugit nerisaqarsimaneq ukiut tamaasa meeqqat 5 millionit sinnerlugit toqunerannut pissutaanerpaat ilagigaat.

 Nunap sajuttarnissaanik siulittuut pillugu qanoq oqartoqarsinnaava? U.S. Geological Survey naapertorlugu 1990-imiilli agguaqatigiissillugu ukiumut 17-eriarluni nuna sajuttarsimavoq illut aseruatiternissaannut naammattumik sakkortussuseqartumik. Illut sequmilluinnarnissaannut naammattumik sakkortussuseqartumik nuna sajuttarsimavoq agguaqatigiissillugu ukiumut ataasiarluni. Tusagassiivik alla oqarpoq: „Ukiuni 100-ni kingullerni nunap sajunneri inuit hundredetusindillit inuunerannik akeqarsimavoq.“ Tamatumunnga pissutaasut ilagaat 1914-imiilli nunap sajuffigisartagaani illoqarfissuaqalersimanera.

Ilisarnaatit pingaarutillit allat

’Nappaassuaqarumaarpoq toqoraataasunik,’ Jiisusi oqarpoq. (Lukasi 21:11) Nakorsaatitigut ilisimatusarneq ullumikkut aatsaat taama siuarsimatigaaq. Taamaakkaluartoq inuiaat nappaatinik nutaanik nutaanngitsunillu suli erloqisitaapput. U.S. National Intelligence Council-imeersuni allakkani ima allassimavoq: „Nappaatit ilisimaneqarluartut 20-t — ilaatigut tuberkulose, malaria koleralu — 1973-imiilli nappaataaqqilersimapput sumiiffinnullu allanut siaruarsimallutik, amerlanertigut ulorianarnerullutik nakorsaatinullu akiuussinnaalersimallutik. 1973-imiilli napparsimalissutaasinnaasut tunillannartut ilisimaneqanngitsut katsorsarneqarsinnaanngitsut minnerpaamik 30-t paasineqarsimapput, soorlu makkua: hiv, ebola, hepatitis C aamma nipah-virusi.“ Røde Korsip 28. juuni 2000-imik ullulerneqartumi nalunaarutaa naapertorlugu 1999-imi nappaatinik tunillannartunik toqquteqartut pinngortitami ajunaarnersuarni toqusunut naleqqiullugit 160-eriaammik amerlanerupput.

’Inatsisaatsuliorneq ingasatsikkiartortoq’ ullunut kingullernut nalunaaqutit ilagaat maluginiarnartoq. (Matthæusi 24:12) Nunarsuarmi sumiiffinni amerlanerni inuit angerlarsimaffitsik parnaarnagu qimannissaa aarlerigivaat unnukkullu aqqusinermiinnissaq toqqissisimanarinagu. Taavami amerlanertigut inatsisit sumiginnarneqarnerat pissutaalluni silaannarmik, imermik nunamillu mingutsitsineq! Tamannattaaq Biibilimi siulittuutit eqquunneraat. Saqqummersitani eqqartorneqarpoq piffissaq ’nunarsuarmik aseruisunik aseruinissamut’ Guutip aalajangigaa. — Saqqummersitat 11:18.

Ullussani kingullerni inuit qanoq ikkumaartut

Nammineq Biibiliutit qupperlugu Timotheusimut allakkat aappaat 3:1-imit 5-imut atuariakkit. Tassani apustili Paulusi ima allappoq: „Ilisimassavat ullussani kingullerni nalliukkumaarmata ullut atugarliungaarfissat.“ Taava taagorpai inuit pissusii 20-t piffissami tamatumani inuit guutiitsut ilisarnaatigisassaat. Innuttaaqatigiiffigisanni taakkua arlaannik pissuseqartoqarnersoq malugisimaviuk? Inuit ullumikkut inuusut pillugit qanittukkut qanoq oqartoqarsimanersoq malugiuk.

„Namminissarsiortut.“ (2 Timotheusi 3:2) „[Inuit] aatsaat taama namminissarsiortumik ulapputeqartigipput. [Taakkua] guutinngorsimapput guutitullu pineqarnissartik naatsorsuutigaat.“ — Aviisi Financial Times, Tuluit Nunaat.

„Aningaaserituut.“ (2 Timotheusi 3:2) „Piffissami kingullermi pigisanik pingaartitsisoqangaalersimammat anneruniajuinneq pissuserineqarpiarunnaarsimavoq. Avatangiisinit pisuujusutut isigineqanngikkaanni inuuneq nuannersortaqanngilaq.“ — Aviisi Jakarta Post, Indonesia.

„Angajoqqaaminnut naalanngitsut.“ (2 Timotheusi 3:2) „Angajoqqaat qitornaminnik sisamanik ukiulimmik Ludvig XIV-iusaartumik naalagarsiortinneqaleraangamik, imaluunniit qitornaminnik arfineq-pingasunik ukiulimmik ima nilliaffigineqaraangamik: ’Uumigaakkit!’, qanoq iliussanerlutik nalusarpaat.“ — Atuagassiaq American Educator, USA.

„Ilumoorfigeqatigiinngitsut.“ (2 Timotheusi 3:2, NV) „Inuit ullumikkut aappaminnik qitornaminnillu qangarnit qimatseqqajaanerunerat, [ukiuni kingullerni 40-ni] ileqqussatigut eriagisassat tungaatigut allanngorfiunerpaaffiugunarpoq.“ — Atuagassiaq Wilson Quarterly, USA.

„Asanniuitsut.“ (2 Timotheusi 3:3) „Ilaqutariinni nakuuserneq innuttaaqatigiinni silarsuarmi sumi tamaaniittunut sunniuteqarpoq.“ — Atuagassiaq Journal of the American Medical Association, USA.

„Imminut naalakkersinnaanngitsut.“ (2 Timotheusi 3:3, NV) „Ullaat tamaasa aviisit saqqaanni atuarneqarsinnaasut ilarpassui takussutissaapput inuit imminut naalakkersinnaannginnerannut, ileqqussatigut nukittuujunnginnerannut aamma tullerminnut imminullu  misiginneqatiginnissinnaannginnerannut. . . . Innuttaaqatigiit sukangasuumik pissusilersorneq ullumikkut takussaasoq akuersaartuaannarpassuk innuttaaqatigiit ungasinngitsukkut ileqqussatigut najoqqutaarukkiartulissapput.“ — Aviisi Bangkok Post, Thailand.

„Qiningasut.“ (2 Timotheusi 3:3) „Naleqqutinngitsumik kamanneq aqussinnaanngisamillu kamanneq angallannermi, ilaqutariinni . . . pinerluttoqarneratalu kingunerisaanik pissutissaqarpasinngitsumik pisariaqanngitsumillu nakuusernermi misigineqartarput. Nakuuserneq siumut oqaatigineq ajornartarpoq eqquineralu nalaatsornerinnaasarluni, inuillu tamanna pissutigalugu soriarsinnaanngitsutut qajannartutullu misigisimallutik.“ — Aviisi Business Day, Afrika Kujalleq.

„Inuulluarniutit Guutimit pingaarnerutillugit.“ (2 Timotheusi 3:4) „Kinguaassiuutitigut kiffaanngissuseq ileqqussatigut sorsuutinngorsimavoq, kristumiutut ileqqorissuuneq akeraliullugu.“ — Internetimi atuagassiaq Boundless.

„Guutimik mianerinninneq ileqqorisuusaaginnarpaat pissaanerali asiginnarlugu.“ (2 Timotheusi 3:5) „[Hollandimi atortittartuusimasoq] nassuerpoq [atortittartuunerup] inerteqqutaajunnaarnissaanut akerliusut tassaanerusut upperisarsioqatigiit. Nipangersimalaariarluni qungujorujussuarluni oqarpoq atortittartuugallarami palaserpaaluit aalajangersimasumik atoqatigisarlugit. ’Atortittartut tamarmik isumaqarput atuinerpaajusut upperisarsioqatigiinneersuusut,’ illarluni oqaluttuarpoq.“ — Aviisi National Catholic Reporter, USA.

Siunissami qanoq pisoqassava?

Biibilimi siulittuutigineqarneratorluinnaq ullumikkut silarsuarmi ajornartorsiuterpassuupput. ’[Kristusip] tikiunnissaanut silarsuullu naggatissaanut nalunaaqutit’ pillugit siulittuutit isumalluarnartortaqarput. „Naalagaaffimmik iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq,“ Jiisusi oqarpoq. (Matthæusi 24:3, 14) Naalagaaffik pillugu nutaarsiassaq nuannersoq nunani 230-nit amerlanerusuni oqaluussissutigineqarpoq. Inuit 6 millioninit amerlanerusut „inuiaqatigiinnit naggueqatigiinnillu inuiannillu immikkullu oqaasilinnit tamanit pisut“ tamatumani suleqataapput. (Saqqummersitat 7:9) Eqiasuillutik sulinerminni qanoq angusaqarpat? Imaattumik: Guutip naalagaaffiata suuneranik, sunik naammassisaqarumaarneranik pilluaqqussutissartaanillu qanoq pissarseqataasoqarsinnaaneranik tusarliussap tusarnissaanut nunarsuarmi najugallit tamangajammik periarfissaqarput. Aap, naggatissap nalaani eqqortumik ilisimasaqarneq ’annertusiartorsimaqaaq’. — Danieli 12:4.

Taamatut ilisimasaqalernissamut pissutissaqarluarpoq. Eqqarsaatigiuk Jehovap nalerisimaarutigisaanik nutaarsiassaq nuannersoq oqaluussissutigineqareerpat qanoq pisoqarnissaa. Jiisusi ima oqarpoq: „Taava naggatissaq nalliutissaaq.“ (Matthæusi 24:14) Taamaalippat Guutip nunarsuarmi ajussutsimik suujunnaarsitsinissaanut piffissaa nalliutissaaq. Ussatit 2:22-mi ima allassimavoq: „Kisianni iluanngitsut nunamit piiagaassapput tunussisullu tassannga aallarunneqarlutik.“ Saatani anersaapiluilu qanoq pineqassappat? Itinersuarmut nakkartinneqassapput inuiaqatigiinnik tammartitsisinnaajunnaarsillugit. (Saqqummersitat 20:1-3) Taava ’peqqusersuitsut assuarnaatsullu kisimik nunamiilissapput’. Misigissavaallu Guutip naalagaaffiata pilluaqqussutai misinnangaartut. — Ussatit 2:21; Saqqummersitat 21:3-5.

Illit nammineq qanoq iliorsinnaavit?

Qularutissaanngilaq Saatanip pissutsinik aaqqissuussinerata ajortup naggatissaa qanillisoq. Ulluni kingullerni inuunitsinnut nalunaaqutinik sumiginnaasut naggatissaq nalliuppat pakasarneqassapput. (Matthæusi 24:37-39; 1 Thessalonikamiut 5:2) Taamaattumik Jiisusi tusarnaartiminut ima oqarpoq: „Mianersoritsi uummatisi malussarlersitaaqqunagit aalakoornermit imerajunnermillu inuunerullu matuma piinik isumakuluutinit, pakasarteqqunasi ullup taassuma tassanngaannaq tikiunneranit nigartuutitut illuni, inuiaammi nunarsuarmi tamarmi najugaqartut tamaasa tikissammagit. Eqqumajuarniaritsi, qinugitsilu nukissaqartitaaqqullusi pisussat suut tamaasa qimarratigisinnaaqqullugit Inuullu Ernerata saavani atasinnaaqqullusi.“ — Lukasi 21:34-36.

Inuup erneranit, Jiisusimit, iluarisaasut kisimik pissutsit aaqqissuussaanerata maanna atuuttup naggatissaani aniguinissamut periarfissaqassapput. Taamaattumik pingaaruteqarluinnarpoq  Jehova Guutimit Jiisusi Kristusimillu akuerineqarnissamik noqqaassuteqarnermut piffissamik sinneruttumik atuinissarput. Guutimut qinunermini Jiisusi ima oqarpoq: „Inuuneq naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.“ (Johannesi 17:3) Taamaattumik silatussaassaatit Jehova Guuti taassumalu piumasaqaatai pillugit ilinniarneruguit. Biibilimi ajoqersuutigineqartut pillugit paasiniaaninni najukkanni Jehovap Nalunaajaasuisa nuannaarlutik ikiorusuppaatsit. Taakkua atuagassiamilluunniit matumannga saqqummersitsisut saaffiginissaannut uummammit pisumik tikilluaqqusaavutit. (wE 9/15 06)

[Qupp. 7-mi ungalusaq/​assiliartat]

ULLUT KINGULLIIT ILISARNAATAAT

ALLANNGORNERSUIT:

▪ Sorsunnerit. — Matthæusi 24:6, 7.

▪ Nunap sajuttarneri. — Matthæusi 24:7.

▪ Kaannersuit. — Matthæusi 24:7.

▪ Nappaassuit toqoraataasut. — Lukasi 21:11.

▪ Inatsisaatsuliornerit ingasatsikkiartortut. — Matthæusi 24:12.

▪ Nunarsuarmik aseruineq. — Saqqummersitat 11:18.

INUIT:

▪ Namminissarsiortut. — 2 Timotheusi 3:2.

▪ Aningaaserituut. — 2 Timotheusi 3:2.

▪ Anneruniartut. — 2 Timotheusi 3:2.

▪ Angajoqqaaminnut naalanngitsut. — 2 Timotheusi 3:2.

▪ Qujasuitsut. — 2 Timotheusi 3:2.

▪ Ilumoorfigeqatigiinngitsut. — 2 Timotheusi 3:2, NV.

▪ Asanniuitsut. — 2 Timotheusi 3:3.

▪ Imminut naalakkersinnaanngitsut. — 2 Timotheusi 3:3, NV.

▪ Qiningasut. — 2 Timotheusi 3:3.

▪ Inuulluarniutit Guutimit pingaarnerutillugit. — 2 Timotheusi 3:4.

▪ Guutimik mianerinninnermik ileqqoqartuusaartut. — 2 Timotheusi 3:5.

PALLORFIGINNITTUT ILUMOORTUT:

▪ Ilisimasaqarnerulersimapput. — Danieli 12:4.

▪ Nunarsuaq tamakkerlugu nutaarsiassaq nuannersoq oqaluussissutigaat. — Matthæusi 24:14.

[Suminngaanneernera]

UNITED NATIONS/Photo by F. GRIFFING