Jehovap illernartunut isiginnittaasiatut isiginnittaaseqarpit?
Jehovap illernartunut isiginnittaasiatut isiginnittaaseqarpit?
„Sianiginiarsiuk . . . kinguaassiuutitigut inuunerluttoqaqqunagu . . . illernartunillu pingaartitsinngitsoqaqqunagu.“ — HEBRÆERIT 12:15, 16, NV.
1. Isiginnittaaseq nalinginnaasorujussuaq Jehovap kiffaasa isiginnittaaserinngisaat suua?
ILLERNARTUTUT isigineqartut silarsuarmi ikiligaluttuinnarput. Sociologeq franskeq Edgar Morin ima oqarsimavoq: „Ileqqorinnissamik ajoqersuutinut tunngaviusut — Guuti, inuup pissusia, nuna inunngorfik, oqaluttuarisaaneq sianissuserlu — ilaannaalluunniit assortorneqarsinnaanngitsutut ullumikkut isigineqanngillat. . . . Inuit ileqqussatigut najoqqutassiat atorusutatik kisiisa atortarpaat.“ Tamanna ’silarsuup anersaavanik’, ’anersaamik naalasseriinnerup qitornaani maanna sunniisumik’, ersersitsivoq. (1 Korinthimiut 2:12; Efesosimiut 2:2, 1900/1961) Inuit Jehovamut tunniulluinnarsimasut aamma qilammi nunamilu kisimi eqqortumik Oqartussaasumut taassumunnga kajumillutik naalatsigitittut ataqqinninngissutsip anersaavanik tamatuminnga anersaaqanngillat. (Romamiut 12:1, 2) Guutip kiffai Jehovamik pallorfiginninnerminnut tunngatillugu illernassutsip qanoq pingaaruteqartigineranik paasinnilluarput. Inuunitsinni suut illernartutut isigisariaqarpavut? Allaaserisami matumani Guutip kiffaanut tamanut illernartuusut tallimat sammissavavut. Allaaserisamilu tulliuttumi katersuunnerit illernartut, tassa kristumiutut ataatsimiittarnivut ataatsimeersuartarnivullu, sammissavavut. Oqaaserliuna „illernartoq“ qanorpiaq isumaqartoq?
2, 3. (a) Jehovap illernassusia Biibilimi qanoq erseqqissarneqarpa? (b) Qanoq ersersittarparput Jehovap aqqa illernartutut isigalugu?
2 Oqaaseq „illernartoq“ hebræerisut immikkoortinneqarsimanermik isumaqarpoq. Pallorfiginninnermut tunngatillugu oqaaseq „illernartoq“ nalinginnaasumik atorneqartartunit immikkoortinneqartut, imaluunniit illernarsisinneqartut, eqqarsaatigalugit atorneqartarpoq. Jehova illernarluinnarpoq. ’Illernarnerpaatut’ taaneqarpoq. (Ussatit 9:10; 30:3, NV) Itsaq Israelimi palasiuneq kuultimik saattukujuumik nasartaataasaminiititaqarpoq, tassanilu oqaatsit uku kigartorsimapput: „Jehovap illernassuseq pigaa.“ (2 Mosesi 28:36, 37, NV) Kerubit serafillu qilammiittut Jehovap issiavissaarsua kaajallallugu inissisimasut nipitoqisumik ima nalunaartutut Biibilimi allaaserineqarput: „Illernarpoq, illernarpoq, illernarpoq Katersaarsuit [Jehovaat].“ (Esaja 6:2, 3; Saqqummersitat 4:6-8) Taamatut oqaqattaarnerat Jehovap illernarnerpaajuneranut, minguinnerpaajuneranut mingutsitaanngilluinnarsimaneranullu erseqqissaataavoq. Taanna illernassutsimut tamarmut pilerfiuvoq.
3 Jehovap aqqa illernartuuvoq. Tussiaasiortoq ima oqarpoq: „Aqqit angingaartoq annilaarnangaartorlu inuiaat unnersiutigissavaat. Illernarpoq!“ (Tussiaat 99:3) Aamma Jiisusip ima qinunissatsinnik ilinniartippaatigut: „Ataatarput qilanniittutit! Aqqit illernartitaali [imaluunniit: „illernartutut isigineqarli; illernartutut pineqarli“].“ (Matthæusi 6:9) Jiisusip anaanaa nunamiusoq ima oqarpoq: „Tarnima [Jehova] naalannartippaa Pissaasup malunnangaartuliorfigimmanga. Illernarpoq taassuma aqqa.“ (Lukasi 1:46, 49) Jehovamut kiffaagatta taassuma aqqa illernartutut isigaarput atermullu illernartumut tamatumunnga kanngunarsaataasinnaasumik iliuuseqarnaveersaarluta. Aamma Jehovap illernassutsimut isiginnittaasiatut isiginnittaaseqarpugut, tassa imaappoq taassuma illernartutut isigisai taamatuttaaq uagut isigaavut. — Amosi 5:14, 15.
Sooq Jiisusimik ataqqinningaartugut
4. Sooq Jiisusi ’Guutip illernartuatut’ Biibilimi allaatigineqarpa?
4 Jiisusi Guutip illernartup, Jehovap, ’ernituarimmani’ illernartutut pinngortinneqarpoq. (Johannesi 1:14; Kolossemiut 1:15; Hebræerit 1:1-3) Taamaattumik ’Guutip illernartuanik’ taaneqarpoq. (Johannesi 6:69) Jiisusip inuunini qilammit nunarsuarmut nuunneqarmat illernassutsi attappaa, Mariammi anersaap illernartup pissaaneratigut taanna ernertaaraa. Inngilip Maria ima oqarfigisimavaa: „Anersaaq Illernartoq ilinnut piumaarpoq. . . .Taamaattumik meeraq erniusussaq taaneqassaaq Illernartumik, Guutip erneranik.“ (Lukasi 1:35) Kristumiut Jerusalemimiittut Jehovamut qinnutiminni marloriarlutik taassuma ernera, Jiisusi, ’kiffaatut illernartutut’ eqqartorpaat. — Apustilit Suliaat 4:27, 30.
5. Jiisusip suliassaq suna nunarsuarmiitilluni naammassivaa, aamma sooq taassuma aava erlinnarpa?
5 Jiisusip suliassaq illernartoq maani nunarsuarmiitilluni naammassisussaavaa. Ukiumi 29-mi kuisinnermini Jehovap naalaffissuani anersaakkut ittumi palasiuninngortinneqarpoq. (Lukasi 3:21, 22; Hebræerit 7:26; 8:1, 2) Aammattaaq pilliutitut toqusussaavoq. Aava kuineqartoq iluaqutigalugu utertitsissut inuit ajortillit annaanneqarnissaannik periarfissiisoq pilersinneqartussaavoq. (Matthæusi 20:28; Hebræerit 9:14) Taamaammat Jiisusip aava illernartutut, ’erlinnartutut’, isigaarput. — 1 Petrusi 1:19.
6. Kristusi Jiisusimut qanoq isiginnittaaseqarpugut, aamma sooq?
6 Kunngitsinnik palasiunitsinnillu, Kristusi Jiisusimik, ataqqinningaarnerput Paulusip taanna pillugu oqaasiini ukunani erserpoq: „Guutip [akitsingaartippaa] tunillugu atermik akimuisumik tamanik, Jiisusip aqqani seeqqummissammata tamarmik qilammiittut nunamiittullu nunallu ataaniittut, tamarmillu oqqat nassuissallutik: Jiisusi-Kristusi tassaavoq Naalagaq, Guutip Ataatap ataqqinaatissaanik.“ (Filippimiut 2:9-11) Jehovap illernartunut isiginnittaasiatut isiginnittaaseqarluta ersersittarparput, nuannaarluta naalatsigitikkaangatta Siulersortitsinnut Kunngitsinnullu naalakkersuisumut, Kristusi Jiisusimut, ilagiinnut kristumiunut niaquusumut. — Matthæusi 23:10; Kolossemiut 1:18.
7. Qanoq ersersittarparput Kristusimut naalatsigitilluta?
7 Kristusimut naalatsigitinnermut ilaavortaaq angutinik suliami maanna taassuma siulersugaani siuttuutitaanik naleqquttumik ataqqinninneq. Kristumiut tanitat Siulersuisoqatigiinnut ilaasut nakkutilliisullu immikkoortortaqarfinni, nunap immikkoortuini, ilageeqatigiinni ilagiinnilu kiffartortussatut taakkunannga toqqarneqarsimasut illernartumik akisussaaffeqartutut isigineqartariaqarput. Taamaammat aaqqissuussaq tamanna ataqqingaartariaqarparput tamatumunngalu naalatsigitilluta. — Hebræerit 13:7, 17.
Inuiaat illernartut
8, 9. (a) Israelikkut inuiattut illernartuusimanerat qanoq paasisariaqarpa? (b) Jehovap Israelikkut illernassuseq pillugu najoqqutassiamik qanoq erseqqissaavigai?
8 Jehovap Israelikkut angerfigeqatigai. Taamatut attaveqatigiinnerat pissutaalluni inuiaqatigiit nutaat taakku immikkut ittumik inissisimaffeqalerput. Inuiaat illernarsisinneqarput, imaluunniit Guutimut kiffartornissamut immikkoortinneqarput. Jehovap nammineq Israelikkut ima oqarfigai: „Ilissi uannut illernartuussaasi uanga [Jehova] illernartuugama, inuiannillu allanit immikkoortissimagassi uanga pigisassattut.“ — 3 Mosesi 19:2; 20:26.
9 Inuiaqatigiit Israelikkut pilersinneqarmatali Jehovap taakku illernassuseq pillugu najoqqutassiamik erseqqissaavigai. Qaqqaq, Inatsisit Qulit tunniunneqarfigisaat, tummalaaginnaraluarunikku toqusussaapput. Taamaattumik oqartoqarsinnaavoq Qaqqaq Sinaji illernartutut isigineqartoq. (2 Mosesi 19:12, 23) Aamma palasit, tupeq naapeqatigiittarfik pisataalu illernartutut isigineqarput. (2 Mosesi 30:26-30) Ilagiimmi kristumiut?
10, 11. Sooq oqartoqarsinnaava ilagiit kristumiut tanitat illernartuusut, tamannalu ’savanut allanut’ qanoq sunniuteqarpa?
10 Ilagiit kristumiut tanitat Jehovap isaani illernartuupput. (1 Korinthimiut 1:2) Allaammi kristumiut tanitat qanoq ilisukkulluunniit nunarsuarmiittut tamarmik naalaffimmut illernartumut assersuunneqarput, naak taakku tassaanngikkaluartut Jehovap naalaffissua anersaakkut ittoq. Jehova anersaani illernartoq iluaqutigalugu naalaffimmi, tanitat assersuunneqarfianni, ineqarpoq. Apustili Paulusi ima allappoq: „[Kristusi Jiisusimi] illuliaq tamarmi katitigaavoq ineriartorlunilu tassaalerluni naalaffik illernartoq [Jehovami]. Taassumani ilississaaq uagut ilagaluta illuliarineqarpusi Anersaakkut Guutimut ineqarfissanngorlusi.“ — Efesosimiut 2:21, 22; 1 Petrusi 2:5, 9.
11 Aammattaaq Paulusip kristumiut tanitat ima allaffigai: „Ilisimanngilisiuk Guutip naalaffigigaasi, Guutillu Anersaavata inigigaasi? . . . Guutip naalaffia illernartuuvoq, naalaffillu taanna tassa ilissi.“ (1 Korinthimiut 3:16, 17) Jehova anersaani iluaqutigalugu tanitat akornanni ’ineqarlunilu’ ’saqivoq’. (2 Korinthimiut 6:16, 1900/1961) ’Kiffani’ aalajaatsoq siulersortuarpaa. (Matthæusi 24:45-47) ’Savat allat’ tanitanik suleqateqarnertik immikkut pisinnaatitaaffittut pingaartippaat. — Johannesi 10:16; Matthæusi 25:37-40.
Kristumiuugatta illernartutut isigisavut
12. Suut inuunitsinni illernartuuppat, aamma sooq?
12 Tupinnanngilaq ilagiinni kristumiuni tanitanut suleqataannullu tunngasut ilarpassui illernartutut isigineqarmata. Jehovamut attaveqarnerput illernartuuvoq. (1 Nalunaarsuutit 28:9; Tussiaat 36:8) Tamanna uagutsinnut ima erlinnartigaaq uagut Guutittalu Jehovap akornatsinni sumilluunniit kimilluunniillu akornutaasoqarnissaa akueriumanatigu. (2 Nalunaarsuutit 15:2; Jaaku 4:7, 8) Qinuneq Jehovamut qanittumik attaveqartuarnissatsinnut pingaaruteqarpoq. Pruffiitip aalajaatsup Danielip qinuneq ima illernartitsigaa toqutaassutigisinnaagaluarlugu pisarnermisut Jehovamut qinujuarluni. (Danieli 6:8-12) ’Illernartut [imaluunniit kristumiut tanitat] qinnutaat’ tipigissaatilliissummut, itsaq naalaffimmi Guutimik pallorfiginninnermi atorneqartartumut, assersuunneqarput. (Saqqummersitat 5:8; 8:3, 4; 3 Mosesi 16:12, 13) Assersuut tamanna qinunerup illernassusianut erseqqissaataavoq. Qilammi nunamilu Kisimi Oqartussaasumut atassuteqarsinnaanerup ataqqinassusia! Qinunerup inuunitsinni illernartutut isiginissaa uatsinnut pissusissamisoorluinnarpoq.
13. Nukik suna illernartuua, qanorlu ililluta taanna inuunitsinni sunniuteqartittariaqarparput?
13 Nukik tanitani taakkualu suleqataanni sunniuteqartartoq, taakkualu namminneq immikkut illernartutut isigisaat, tassaavoq anersaaq illernartoq. Anersaaq taanna tassaavoq Jehovap nukinga sulisoq, taannalu Guutip illernartup piumasaa naapertorlugu sunniuteqartuaannarmat naleqquttumik taaneqartarpoq ’anersaaq illernartoq’, imaluunniit ’anersaaq illernartitsisoq’. (Johannesi 14:26; Romamiut 1:4) Jehovap anersaaq illernartoq iluaqutigalugu kiffani nukissaqalersittarpai nutaarsiassamik nuannersumik oqaluussissutiginnissinnaaniassammata. (Apustilit Suliaat 1:8; 4:31) Jehovap anersaani tunniuttarpaa „naalatsiminut“, uinikkut pilerissutsitik malinnagit ’anersaaq najortigalugu saqiuartunut’. (Apustilit Suliaat 5:32; Galatiamiut 5:16, 25, 1900/1961; Romamiut 8:5-8) Anersaaq sunniinertooq taanna kristumiunik ’anersaap inerititaanik’ — pissuserineqartussanik ajunngitsunik — ineriartortitsisinnaanngortitsisarlunilu ’iluartumik ileqqoqarnermut Guutimullu tunniusimanermut naapertuuttunik iliuuseqarsinnaanngortitsisarpoq’. (Galatiamiut 5:22, 23; 2 Petrusi 3:11, NV) Anersaaq illernartoq illernartutut isigivikkutsigu, tamatuminnga aliasutsitsisinnaasumik tamatumaluunniit inuunitsinni sunniuteqarnissaanut akornutaasinnaasumik iliuuseqarnaveersaassaagut. — Efesosimiut 4:30.
14. Immikkut pisinnaatitaaffik suna tanitat illernartutut isigaat, savallu allat immikkut pisinnaatitaaffik tamanna qanoq peqataaffigaat?
14 Aamma Guutip illernartup, Jehovap, aqqanik taaguuteqarnerup taassumunngalu nalunaajaasuunerup immikkut pisinnaatitaaffiunera illernartutut isigaarput. (Esaja 43:10-12, 15) Kristumiut tanitat Jehovamit ’angerutsimut nutaamut kiffartorsinnaanngortinneqarsimapput’. (2 Korinthimiut 3:5, 6) Taamaammat ’Naalagaaffimmik iivangkiiliumik oqaluussissutiginninnissamut’ ’inunnillu inuiannit tamaneersunik ajoqersuganngortitsinissamut’ piginnaatitaapput. (Matthæusi 24:14; 28:19, 20) Taakku aalajaallutik peqqussut taanna malillugu iliuuseqarput, inuillu millionillit tamanna pissutigalugu tanitanut ima oqarpullusooq: „Ingerlaqatigissavassi tusaratsigu Guutip najoraasi.“ (Zakaria 8:23) Taakku ’narsaatini viinnequteqarfinnilu sulisutut’ nuannaarlutik ’Guutip kiffaanut’ tanitanut anersaakkut ittumik kiffaapput. Taamaalillutik savat allat kristumiut tanitat nunarsuaq tamakkerlugu kiffartorneranni assorsuaq ikiorpaat. — Esaja 61:5, 6.
15. Suliaq Paulusip illernartutut isigisaa suua, aamma sooq uaguttaaq taamatut isigaarput?
15 Apustili Paulusi tamanut kiffartuuteqarnerminik illernartutut isiginnittut ilagaat. Taanna ’tamanut kiffartuuteqartussaasutut, Kristusi Jiisusimit inunnut inuiaqatigiinneersunut aallartinneqartutut, nutaarsiassaq nuannersoq Guutip pia pillugu suliassamik illernartumik aallussisutut’ imminut oqaatigaaq. (Romamiut 15:16, NV) Kristumiunut Korinthimiittunut allakkamini Paulusip kiffartornini ’erlinnartuutitut’ eqqartorpaa. (2 Korinthimiut 4:1, 7) Tamanut oqaluussinitsigut „oqaatsit Guutimit pisut“ ilisimaneqalersittarpavut. (1 Petrusi 4:11) Taamaattumik tanitanut savanulluunniit allanut ilaagaluarutta, nalunaajaaqataaneq immikkut pisinnaatitaaffittut isigaarput.
’Guutimik mianerinnilluta illernassutsimik naammassinninniarpugut’
16. ’Illernartunik pingaartitsinngitsunngornaveersaarnissamut’ suna iluaqutigissavarput?
16 Apustili Paulusi mianersoqqusivoq „illernartunik pingaartitsinngitsoqaqqunagu“. Uppeqatinilu kristumiut siunnersorpai ’illernarsagaanissamik noqqaassutiginneqqullugit’ aamma ’sianigeqqullugu sorlammik sungarnitsumik [toqunartulimmik, NV] ajoqutaasumik naalersoqannginnissaa amerlasuunik toqunartoqalersitsisumik’. (Hebræerit 12:14-16) Oqariartaatsimi ’sorlak toqunartulik’-mi pineqarput ilagiinni kristumiuniittut ilaat arlaqanngitsut periaatsinik tunngavissaqaratik isornartorsiuisartut. Assersuutigalugu imaassinnaavoq Jehovap aappariinnerup illernassusianut isiginnittaasia isumaqatiginngikkaat imaluunniit ileqqussatigut minguitsuunissap pisariaqassusia paasisinnaanngikkaat. (1 Thessalonikamiut 4:3-7; Hebræerit 13:4) Immaqaluunniit tunussisorpalaartumik, „isumaqanngitsunik, illernartunik kanngunarsaasunik“, oqaluttarput, tassa ’sallusuissummik sanioqqutsillutik ingerlasut’ oqaluuserisartagaat oqaluuserisarlugit. — 2 Timotheusi 2:16-18, NV.
17. Sooq tanitat iliuuseqartuartariaqarpat Jehovap illernassutsimut isiginnittaasiatut isiginnittaaseqarlutik ersersinniarlugu?
17 Paulusip qatanngutini tanitat ima allaffigai: „Asasakka, . . . immitsinnik minguiarniarta, timimi anersaamilu minguk tamaat piiassavarput illernartuullutalu Guutimik mianerinninnermi [Guutimik mianerinnilluta illernassutsimik naammassinninniarnitsinni, NV].“ (2 Korinthimiut 7:1) Oqaatsini taakkunani erserpoq kristumiut tanitat, ’qilammit qaaqqussummik pisimasut’, inuunermi sutigut tamatigut Jehovap illernassutsimut isiginnittaasiatut isiginnittaaseqarlutik ersersinniarlugu iliuuseqartuartariaqartut. (Hebræerit 3:1) Aamma apustili Petrusip qatanngutini tanitat ima kajumissaarpai: „Meeqqatut naalattutut nalusuugallarassi kajungerisasi ileqquliunniaqinasigit, soorlu qaaqqusisersi illernartuusoq ilississaaq inuunissigut tamatigut illernartuussaasi.“ — 1 Petrusi 1:14, 15.
18, 19. (a) ’Amerlangaartunut’ ilaasut qanoq ersersittarpaat Jehovap illernartunut isiginnittaasiatut isiginnittaaseqarlutik? (b) Kristumiutut inuunitsinni illernartoq alla allaaserisami tulliuttumi sammineqartussaq suua?
18 ’Amerlangaartunummi’ ilaasut, ’annikilliortitaangaarnissami’ aniguisussat? Taakkuattaaq ersersittariaqarpaat Jehovap illernartunut isiginnittaasiatut isiginnittaaseqarlutik. Saqqummersitani taakku Jehovap naalaffiata anersaakkut ittup silarliani nunarsuarmiittumi taassumunnga illernartumik ’kiffartortutut’ allaatigineqarput. Taakku Kristusip utertitsissutitut pilliutaanik upperinninnerminnik ersersitsisimapput, assersuutaasumik ’atisaminnik Savaaqqap aavanut eqqiaanermikkut taakku qaqortitillugit’. (Saqqummersitat 7:9, 14, 15) Tamanna pissutigalugu Jehovap isaani minguitsuupput, aamma taamaalillutik ’timimi anersaamilu minguk tamaat piiarlugu minguiarnissartik illernartuunissartillu Guutimik mianerinninnermi [Guutimik mianerinnillutik illernassutsimik naammassinninniarnissartik, NV]’ pisussaaffigilerpaat.
19 Kristumiunut tanitanut taakkualu suleqataannut pingaaruteqartoq alla tassaavoq Jehovamik pallorfiginninniarlutik taassumalu oqaasia atuaqqissaarniarlugu aalajangersimasumik katersuuttarnerat. Jehovap innuttami ataatsimiittarneri ataatsimeersuartarnerilu katersuunnertut illernartutut isigai. Pingaarutilimmut tamatumunnga tunngatillugu qanoq aamma sooq Jehovap illernartunut isiginnittaasiatut isiginnittaaseqassasugut allaaserisami tulliuttumi sammineqassaaq.
Uteqqiineq
• Isiginnittaaseq silamiorpaluttoq Jehovap kiffaasa isiginnittaaserinngisaat suua?
• Sooq Jehova illernassutsimut tamarmut pilerfiua?
• Kristusip illernassusianik ataqqinninnerput qanoq ersersittarparput?
• Inuunitsinni suut illernartutut isigisariaqarpavut?
[Atuaqqissaarnermi apeqqutit]
[Qupp. 9-mi assiliartaq]
Itsaq Israelimi palasit, tupeq naapeqatigiittarfik taassumalu pisatai illernartutut isigineqartussaapput
[Qupp. 10-mi assiliartaq]
Kristumiut tanitat nunarsuarmiittut tassaapput naalaffik illernartoq
[Qupp. 11-mi assiliartaq]
Guutimut qinusinnaaneq tamanullu kiffartuuteqarsinnaaneq immikkut pisinnaatitaaffiupput illernartut