Katersuuttarnitsinnik illernartunik ataqqinnittuunerit ersersittaruk

„Taakku qaqqannut illernartumut pisikkumaarpakka tipaatsutsillugillu illunni qinusarfimmi.“ — ESAJA 56:7.

1. Ataatsimiittarnitsinnik eqqortumik ataqqinnittuunermik ersersitsinissamut Biibilimik tunngavilinnik sunik pissutissaqarpugut?

JEHOVAP innuttani, kristumiut tanitat taakkualu suleqataat, katersorsimavai, ’qaqqamini illernartumi’ pallorfiginiassammanni. Taakku ’illumini qinusarfimmi’, naalaffimmini anersaakkut ittumi, ’inuiaqatigiit tamarmik qinusarfianni’, tipaatsutsippai. (Esaja 56:7; Markusi 11:17) Tamanna Jehovamik pallorfiginninnerup illernartuuneranut, minguitsuuneranut qutsissisitaaneranullu ersiutaavoq. Ataatsimiittarnitsinnik, Biibilimik atuaqqissaarfigisartakkatsinnik Jehovamillu pallorfiginniffigisartakkatsinnik, eqqortumik ataqqinnittuunitsinnik ersersitsisarnerput Jehovap illernartunut isiginnittaasiatut isiginnittaaseqarnitsinnut ersiutaavoq.

2. Jehovap pallorfiginnittarfittut toqqakkaminik illernartutut isiginninnera sutigut erserpa, Jiisusillu qanoq ersersippaa taamatuttaaq isiginnittaaseqarluni?

² Itsaq Israelimi Jehovap pallorfiginnittarfittut toqqagaa illernartutut isigineqartussaavoq. Tupeq naapeqatigiittarfik taassumalu pisatai atortuilu taninneqartussaallutillu illernarsarneqartussaapput ’illernangaalerniassammata’. (2 Mosesi 30:26-29) Illernartuummi init marluk aappaa ’Illernartumik’ taaneqartarpoq aappaalu ’Illernarnerpaamik’ taaneqartarluni. (Hebræerit 9:2, 3) Kingusinnerusukkut tupeq naapeqatigiittarfik naalaffimmik Jerusalemimiittumik taarserneqarpoq, illoqarfillu taanna Jehovamik pallorfiginninnermi qitiulerpoq. Taamaammat ’illoqarfimmik illernartumik’ taaneqartarpoq. (Nehemia 11:1; Matthæusi 27:53) Nunarsuarmi kiffartorallarami Jiisusi nammineq naalaffimmik eqqortumik ataqqinnittuunerminik ersersitsisarpoq. Juutit naalaffimmi niuernermikkut qaninersiorlutillu naalaffikkoortarnermikkut tamatuminnga ataqqinninnginnerat narrujuummissutigaa. — Markusi 11:15, 16.

3. Sumit erserpa Israelikkut ataatsimeersuarneri illernartuusut?

³ Israelikkut aalajangersimasumik katersuuttarput Jehovamik pallorfiginninniarlutik taassumalu inatsisaasa atuffassissutigineqarnerat tusarnaarniarlugu. Taakkua nalliuttorsiornerisa ilaat illernartumik katisimaffinnik imaluunniit nalliussivinnik taaneqartarput, tamannalu katersuunnerit taakkua illernassusiannut ersiutaavoq. (3 Mosesi 23:2, 3, 36, 37) Ezrap Nehemiallu nalaanni ataatsimeersuarnermi tamanut ammasumi „Levikkuusut . . . inatsisit inunnut nassuiarpaat“. ’Inuit tamarmik qissatilerput inatsisini allassimasut tusaramikkit’, Levikkulli „inuit eqqissisarpaat oqarfigalugit: ’Nipaarsaaritsi, ulloq manna illernartuummat!’“ Taava Israelikkut ulluni arfineq-marlunni tupiusaliorfissiorput ’tipaatsoqalutik’. Aamma ’ulluni tulleriinni tamani Guutip inatsisaanit atuartoqarpoq, ullormit siullermiit ullormut kingullermut. Ulluni arfineq-marlunni inuit nalliuttorsiorput ileqqoreqqusaliarlu malillugu ullut arfineq-pingajuat nalliuttorsiorpaluttumik katersuuffigalugu’. (Nehemia 8:7-11, 17, 18) Tamakku ilumut tassaapput pisimasut illernartut najuuttunit ataqqinnilluni soqutigineqartariaqartut.

Ataatsimiinnivut tassaapput katersuunnerit illernartut

4, 5. Sumit erserpa ataatsimiittarnivut tassaasut katersuunnerit illernartut?

⁴ Ilumoorpoq Jehova ullumikkut nunarsuarmi illernartumik illoqarfiuteqanngitsoq immikkut ittumik naalaffilimmik taassuminnga pallorfiginninnermut atortussaatitaasumik. Taamaakkaluartoq  eqqaamajuartariaqarparput ataatsimiinnerit Jehovamik pallorfiginniffiusut tassaasut katersuunnerit illernartut. Sapaatip-akunneranut pingasoriarluta katersuuttarpugut Biibilimik atuarniarlutalu atuaqqissaarniarluta. Nehemiap nalaanisut Jehovap oqaasia ’paasinartunngorlugu’ nassuiarneqartarpoq. (Nehemia 8:8) Ataatsimiittarnivut tamarmik qinunermik aallarnerneqartarlutillu naggaserneqartarput, ataatsimiinnerillu amerlanersaanni Jehovamik unnersiutiginnilluta erinarsortarpugut. (Tussiaat 26:12) Ilagiit ataatsimiittarneri pallorfiginninnitsinnut ilaapput pingaarutillit, Guutimillu mianerinnittariaqarpugut saqqummiunneqartullu ataqqinnilluta tusarnaartariaqarlutigit.

⁵ Jehovap kiffani pilluaqqusarpai imminik pallorfiginninniarlutik, oqaatsiminik atuaqqissaarniarlutik kristumiutullu asaqatigiinneq nuannaarutiginiarlugu katersuukkaangata. Qularutigissanngilarput ataatsimiittoqaleraangat ’tassani Jehovap tunniutissagaa pilluaqqussut’. (Tussiaat 133:1, 3) Pilluaqqussut tamanna ilangiiffigissavarput najuukkutta saqqummiunneqartullu anersaakkut ittut soqutiginnilluta malinnaaffigigutsigit. Aamma Jiisusi ima oqarpoq: „Marluk pingasulluunniit atinni katisimagaangata akornanniittarpunga.“ Versit ataqatigiinnerini erserpoq oqaatsini taakkunani pineqartut inuit ataasiakkaat akornanni ilungersunartunik ajornartorsiuteqalersimanera pillugu utoqqaanertat kristumiut katersuuttarneri, oqaatsilli taakku aamma ilagiittut ataatsimiittarnitsinnut tunngatinneqarsinnaapput. (Matthæusi 18:20) Kristumiut Jiisusip aqqani katersuunneranni Jiisusi anersaaq illernartoq iluaqutigalugu najuuttarpat, taava katersuunnerit taamaattut illernartutut isigisariaqarpavut, ilaa?

6. Katersuuffigisartakkavut, annerit mikinerillu, pillugit qanoq oqartoqarsinnaava?

⁶ Soorunalimi Jehova naalaffinni assannik sanaasuni ineqanngilaq. Taamaakkaluartorli naalagaaffilersaarfivut ilumoortumik pallorfiginnittarfiupput. (Apustilit Suliaat 7:48; 17:24) Taakkunani  katersuuttarpugut Jehovap oqaasia atuaqqissaarniarlugu, taassumunnga qinuniarluta erinarsorlutalu unnersiutiginiarlugu. Aamma ataatsimeersuartarfitsinni taamaaliortarpugut. Sumiiffiillu annerit ataatsimeersuarnissamut attartortakkavut — soorlu isiginnaartitsisarfiit, saqqummersitsiviit timersortarfiillu — katersuunnitsinnut illernartunut atorneqartillutik pallorfiginnittarfiusarput. Katersuunnerit minnerit annerillu Jehovamik pallorfiginniffigisartakkavut ataqqisariaqarpavut, tamannalu isummatsinni pissusilersornitsinnilu ersertariaqarpoq.

Katersuuttarnitsinnik ataqqinnittuunitsinnik qanoq ersersitsisinnaasugut

7. Katersuuttarnitsinnik ataqqinnittuunitsinnik erseqqissumik qanoq ersersitsisinnaavugut?

⁷ Katersuuttarnitsinnik ataqqinnittuunitsinnik ersersitseriaaserisinnaasatsinnik erseqqissunik peqarpoq. Ilaatigut Guutip naalagaaffiata erinarsuutai atorlugit erinarsornissamut piffissanngoraangat najuuttariaqarpugut. Erinarsuutit taakkua ilarpassui qinnutitut allanneqarsimapput taamaammallu ataqqinnilluni erinarsorneqartariaqarlutik. Apustili Paulusip Tussiaat 22-mit issuaalluni Jiisusi ima oqarnerarpaa: „Aqqit nalunaajaatigissavara uanga qatanngutinnut, ilagiinni unnersiutigissavakkit.“ (Hebræerit 2:12) Taamaattumik aqutsisup erinarsuummik aallarniinnginnerani inissatsinneereersimanissarput erinarsortillutalu taallap isumaanik eqqarsaatiginninnissarput aalajangiusimasariaqarparput. Erinarsornerput misigissutsinik tussiaasiortup ima allaatigisaanik ersersitsiffiusussaavoq: „[Jehova] qutsavigissavara uummatikkut iluunngarlunga peqqusersuitsut akornanni katersorsimasunilu.“ (Tussiaat 111:1) Aap, erinarsorluni Jehovamik unnersiutiginneqataaneq ataatsimiinnitsinnut takkutiaarnissamut naareernissaatalu tungaanut najuunnissamut pissutissaalluarpoq.

8. Oqaluttuami Biibilimeersumi sorlermi ersersinneqarpa kristumiut ataatsimiinnerini qinnutigineqartut ataqqisariaqarlugillu soqutigisariaqarivut?

⁸ Ataatsimiinnitsinnut nuannersumik anersaakkullu ittumik sunniuteqartartut allat tassaapput qamannga pisumik qinnutit najuuttut tamaasa sinnerlugit qinnutigineqartartut. Ilaanni kristumiut siulliit Jerusalemimiittut katersuupput, qinullutillu ’isumaqatigiillutik nipitik anippaat Guutimut’ (1900/1961). Tamatuma kingunerisaanik ’Guutip oqaasia siooranatik nalunaajaatigiuarpaat’ — malersorneqaraluarlutik. (Apustilit Suliaat 4:24-31) Takorloorsinnaavarput najuuttut taakkua ilaat qinunerup tamatuma nalaani allarluinnarnik eqqarsaateqartut? Naagga, ’isumaqatigiillutik’ qinupput. Ataatsimiinnitsinni qinnutigineqartut najuuttut tamarmik misigissusiinik ersersitsipput. Qinnutit taakku ataqqillugillu soqutigisariaqarpavut.

9. Katersuuttarnitsinnik illernartunik ataqqinnittuunerput atisalersoriaatsitsigut pissusilersornitsigullu qanoq ersersissinnaavarput?

⁹ Aamma katersuuttarnitsinnik illernartunik ataqqinningaarnerput ersersissinnaavarput atisalersoriaatsitsigut. Isikkorput, tassa atisavut nutsattalu iluarsaannerat, ataatsimiinnernik ataqqinassuseqarnerulersitsisinnaapput. Apustili Paulusi ima kajumissaarivoq: „Piumasaraara angutit sumiluunniit ikkunik qinussasut assatik qullarsimallugit upperluarlutik, kamassimanatik saqitsaannatillu. Taamatuttaaq piumasaraara arnat isornaatsunik perroorniutaanngitsunillu atisaqassasut, nutsat eqqumiikajaamik kusassagaasut, kuultit sapanngallu atisalluunniit akisuut pinnagit, ajunngitsuliornerilli arnanut Guutimik mianerinninnerminnik nassuerutiginnittunut naleqquttut pinnersaatigalugit.“ (1 Timotheusi 2:8-10) Silami ataatsimeersuarnernut najuukkaangatta ataqqinassusermik ersersitsiitigaluta silap qanoq issusianut naleqquttumik atisalersorsinnaalluarpugut. Aamma pisunik ataqqinninnerput pissutigalugu saqqummiussisoqarnerata nalaani nerinatalu tyggegummitornavianngilagut. Ataatsimiinnitsinni ataatsimeersuarnitsinnilu naleqquttumik atisalersorneq pissusilersornerlu Jehovamut, taassumunnga pallorfiginninnermut uppeqatitsinnullu ataqqinaataapput.

Pissusilersorneq Guutip inoqutaanut tulluartoq

10. Apustili Paulusip qanoq takutippaa kristumiutut ataatsimiinnitsinni pissuserissaarnissaq piumasarineqartoq?

¹⁰ Apustili Paulusip qanoq kristumiutut ataatsimiittoqartariaqarnera pillugu siunnersuutaa pitsaasoq Korinthimiunut allakkani siullerni, kapitali 14-imiippoq. Paulusi ima naggasiivoq: „Suut  tamarmik ippinnanngitsumik torersumillu ingerlalit.“ (1 Korinthimiut 14:40) Ataatsimiittarnerit ilagiit kristumiut sammisassaannut ilaapput pingaarutillit, najuuttullu Jehovap inoqutaanut tulluartumik pissusilersortariaqarput.

11, 12. (a) Meeqqanut ataatsimiinnitsinnut najuuttartunut suut paasitinneqartariaqarpat? (b) Ataatsimiinnerni meeqqat uppernerminnik naleqquttumik qanoq ersersitsisinnaappat?

¹¹ Ingammik meeqqat pisariaqartippaat ataatsimiinnerni qanoq pissusilersornissaminnik ilinniartinneqarnissartik. Angajoqqaat kristumiut meeqqatik nassuiaattariaqarpaat naalagaaffilersaarfik atuakkamillu atuaqqissaaqatigiittarfik pinnguartarfiunngitsut. Jehovamik pallorfiginnittarfiullutillu taassuma oqaasianik atuaqqissaartarfiupput. Kunngi Salomo silatooq ima allappoq: „Guutip illuanukaraangavit mianersorlutit pisarniarit. Tusarnaariarlutit [tassunnartarit].“ (Oqaluussisartup oqaasii 4:17) Mosesip Israelikkut peqquai katersuuttaqqullugit, inersimasut „meeraaqqallu“ (NV). Ima oqarpoq: „Inuit . . . katersortittassavatit inatsisit tusaqqullugit ilikkarsinnaaqqullugu [Jehovap] Guutissi mianerinissaa oqaatsillu inatsimmi matumaniittut tamaasa maleruaqqissaaqqullugit, aamma ernissinnut inatsisinik nalugallartunut taakku tusaqqullugit ilikkarsinnaaqqullugu [Jehovap] Guutissi mianerinissaa.“ — 5 Mosesi 31:12, 13.

¹² Ullumikkut aamma meeqqat ingammik tusarnaarnissaq ilinniarnissarlu eqqarsaatigalugit angajoqqaatik ilagalugit ataatsimiinnernut najuuttarput. Aamma meeqqat malinnaanissamut sallusuissutinillu Biibilimeersunik tunngaviusuinnarnilluunniit paasinninnissamut naammattumik utoqqaassuseqaleraangamik, naatsumik akissuteqarnermikkut uppernertik ’tamanut nassuerutigisinnaavaat’. (Romamiut 10:10, NV) Meeqqat apeqqutinut paasisaminnut oqaasialuit atorlugit akisaleqqaarsinnaapput. Imaassinnaavoq aallaqqaammut akissutertik atuartariaqaraat, piffissalli ingerlanerani namminneq oqaatsitik atorlugit akiniartalerumaarput. Tamanna meeqqanut pisuunnguallaataasarlunilu nuannaarutaasarpoq, inersimasullu najuuttut taamatut namminneq piumassutsiminnik uppernerminnik ersersitsisut qiimasuutigisarpaat. Soorunalimi angajoqqaat namminneq akisarnermikkut maligassiuilluassapput. Ajornanngippat meeqqat namminneq Biibiliuteqarnissaat, erinarsuutaateqarnissaat atuaqqissaarutigineqartumillu atuagaateqarnissaat pitsaassaaq. Atuagassanik tamakkuninnga naleqquttumik ataqqinninnermik ersersitsinissaq ilinniassavaat. Tamakku tamarmik meeqqat isumaanni puiuikkiutitinneqassapput paasiniassammassuk ataatsimiittarnivut tassaasut katersuunnerit illernartut.

13. Siullermeerlutik ataatsimiigiartut eqqarsaatigalugit suna neriuutigaarput?

¹³ Soorunalimi kissaatiginngilarput ataatsimiinnitta kristumiuunerartut naalagiarnerinut, amerlanertigut misigissuseqarpalugatillu ingasattumik persuarsiorpaluttunut imaluunniit rockimik tusarnaartitsinertut nipitoorujussuusartunut, assingunissaat. Naalagaaffilersaarfitsinni ataatsimiinnerit nuannersuutillugillu orniginartuutikkusuppavut, imaanngitsorli katerisimaarnernut nalinginnaasunut eqqaanartuussasut. Jehova pallorfiginiarlugu katersuuttarpugut, taamaammallu ataatsimiinnivut ataqqinassuseqartariaqarput. Kissaatigisarput mannaavoq ataatsimiinnerni saqqummiunneqartut aamma uagut meeqqattalu pissusilersornerput siullermeerlutik najuuttut ima oqarusulissutigissagaat: „Ilumut Guuti akornassinniippoq.“ — 1 Korinthimiut 14:25.

Pallorfiginninnitsinnut ilaajuartoq

14, 15. (a) Qanoq ililluta ’Guutitta illua sumiginnarnaveersaarsinnaavarput’? (b) Esaja 66:23 maannangaaq qanoq eqquuppa?

¹⁴ Soorlu allaaserisami matumani eqqaaneqareersoq Jehovap innuttani katersorpai ’illuminilu qinusarfimmi’, naalaffimmini anersaakkut  ittumi, tipaatsutsillugit. (Esaja 56:7) Nehemiap aalajaatsup nunaqqatini juutit eqqaasippai naalaffimmik Jerusalemimiittumik aningaasatigut tapersiinermikkut tamatuminnga naleqquttumik ataqqinnittuunerminnik ersersitsisariaqarnerannik. Ima oqarpoq: „Guutitta illua sumiginnassanngilarput.“ (Nehemia 10:40) Aammattaaq Jehovap ’illumini qinusarfimmi’ imminik pallorfiginninnissamut qaaqqusissutaa sumiginnassanngilarput.

¹⁵ Esaja Guutimik pallorfiginninniarluni katersuuttuartarnissap pisariaqarneranik ersersitsisumik siulittuuteqarpoq. Ima allappoq: „Qaammanniffiit sabbatillu tamaasa inuit tamarmik aggertassapput kiinnama saanut palloriartorlutik, oqarpoq [Jehova].“ (Esaja 66:23) Ullumikkut tamanna eqquuppoq. Kristumiut tunniulluinnarsimasut Jehovamik pallorfiginninniarlutik katersuuttuartarput, sapaatit-akunneri tamaasa qaammatillu tamaasa. Ilaatigut taamaaliortarput kristumiut ataatsimiinnerinut najuunnermikkut tamanullu oqaluusseqataanermikkut. Illit ’Jehovap kiinaata saanut palloriartorlutik aggertuartartut’ ilagaatsit?

16. Sooq ataatsimiigiartuarneq ileqquliuttariaqarparput?

¹⁶ Jehovap silarsuassaani nutaami neriorsuutigineqartumi Esaja 66:23 tamakkiisumik eqquukkumaarpoq. Taamanikkussamut ’inuit tamarluinnarmik’ naassaanngitsumut, sapaatit-akunneri tamaasa qaammatillu tamaasa, ’aggertassapput Jehovap kiinaata saanut palloriartorlutik’, imaluunniit Jehovamik pallorfiginnikkiartorlutik. Uagut aamma pissutsinik aaqqissuussinissami nutaami Jehova pallorfiginiarlugu katersuuttuartassagatta, taava katersuunnernut illernartunut najuuttuartarneq maannangaaq ileqquliutissannginnerparput?

17. Sooq ataatsimiinnivut ’suli pisariaqartinnerulerpavut ullussaq qanillilersoq nalunnginnatsigu’?

¹⁷ Naggatissaq qanilliartuinnartillugu kristumiut ataatsimiinnerinut Jehovamik pallorfiginniffigisartakkatsinnut najuunnissarput aatsaat taama aalajangiusimatigisariaqarparput. Ataatsimiinnitsinnik illernartunik ataqqinnikkatta silamiuni suliffik, ilinniagassat aftenskolernerluunniit uppeqatitsinnik katersuuteqateqarnissatsinnut akornutaatittanngilavut. Taamatut katersuuteqateqarnermi nukik pisartagarput pisariaqartipparput. Ilagiittut ataatsimiittarnivut pissutigalugit ilisarisimaqatigiilernissatsinnut, qiimmassaqatigiinnissatsinnut aamma „asaqatigiinnermut ajunngitsuliornermullu“ kajumissaaqatigiinnissatsinnut periarfissaqarpugut. Taamaaliornissarput ’suli pisariaqarnerulerpoq ullussaq qanillilersoq nalunnginnatsigu’. (Hebræerit 10:24, 25) Taamaattumik katersuuttarnitsinnik illernartunik eqqortumik ataqqinnittuunitsinnik ersersitsiuarta najuuttuartarnitsigut, naleqquttumik atisalersornitsigut pissuserissaarnitsigullu. Taamaaliorutta ersersissavarput Jehovap illernartunut isiginnittaasiatut isiginnittaaseqarluta. (wE 11/1 06)

Uteqqiineq

• Sumit erserpa Jehovap innuttaasa katersuunneri illernartutut isigineqartariaqartut?

• Sumit paasinarsiva ataatsimiittarnivut tassaasut katersuunnerit illernartut?

• Meeqqat qanoq ersersissinnaavaat ataatsimiinnivut illernartutut isigalugit?

• Sooq ataatsimiigiartuarneq inuunitsinnut ilaajuartunngortittariaqarparput?

[Atuaqqissaarnermi apeqqutit]

[Qupp. 14-mi assiliartat]

Ataatsimiinnerit Jehovamik pallorfiginniffigisartakkavut sumiikkaluaraangamilluunniit tassaapput katersuunnerit illernartut

[Qupp. 17-mi assiliartaq]

Meeqqavut ataatsimiinnernut najuuttarput tusarnaarniarlutik ilinniarniarlutillu